جمالك بالألوان مع جيلان.. ماكياج عيونك بالتفصيل

طب ايه حل الخطوط الرفيعة اللي بتظهر تحت العين؟

==========

رد بص وطل:
لازم تهتمي بتغذية بشرتك وترطيبها عن طريق التغذية الصحية والمتوازنة، وكمان لازم تعملي ماسكات طبيعية للبشرة وهتلاقي على قمر 14 حلقات كتير عن العناية بالبشرة وعلاج مشاكلها بطرق طبيعية.

صراحة شغل جيلان في الماكياج أوفر أوي وبلدي ومش بيعجبني نهائي... بعدين أنا شفت شغلها في كذا مجلة زي مجلة حجاب بتعتمد على موديل وشها أصلا جميل يعني معندهاش خبرة في التجميل وعاوزة أعرف هي دارسة فين الماكياج وفنونه وأصوله.... لازم الأول نعرف كل حاجة عنها وعن خبرتها مش كل من هب ودب يصحى الصبح يقول أن خبير ماكياج نجري وراه... إحنا عندنا في مصر خبراء حقيقيين لكن للأسف الموقع هنا مش بيركز عليهم خالص... مش عارف ليه... وبعدين لازم يكون في تنوع في الخبراء مش معقول كل ما أفتح الموقع ألاقي الأخت جيلان بس...أنا آسفة بس دي وجهة نظري يا جماعة ويمكن أكون غلطانة فيها بس أنا سافرت حول العالم وكل عواصم الموضة من باريس ولندن وروما وبيروت وغيرها.. الناس برة أفكارها متطورة لكن جيلان متزعليش مني أنا بس عشان صريحة حبتين... أرجو النشر والرد من جيلان ومن المشرفين على الموقع اللي بحبه جدا وبتابعه باستمرار.

===========

رد بص وطل:
ميرسى ليكى يا مروة على رأيك ومشاركتك معانا ومتابعتك لينا وطبعا انتى عارفة لولا اختلاف الاذواق لبارت السلع، وتقدري تشوفى اللينك ده عشان تعرفى اللى انتى عايزاه عن خبيرة التجميل جيلان عاطف http://www.boswtol.com/health-and-beauty/beauty-and-styling/10/may/18/13660
وتابعينا دايما لأننا بنحاول طول الوقت نقدم كل اللي يرضي اصدقاؤنا ويفيدهم في حياتهم.

هاي جيلان أنا هسألك عن بودره تثبت بدون ما استخدم كريم أساس
وتاني حاجه انا بسأل عن الهاي كوول بتاعتك دي حلوه أوي علشان تغطي الرقبه فممكن أعرف اقدر اجيبها منين ونوعها ايه؟؟

==========

رد بص وطل:
بالنسبة لانواع البودرة ممكن تستخدمي أنواع زي بورجوا وديور وجيرلان، ولازم يبقى معاكي دايما في شنطتك علبة بودرة مضغوطة علشان تظبطي بها الميك اب كل ما تحتاجي، أما بالنسبة للهاي كول فهتلاقي في آخر الأعداد اللي اتكلمنا فيها عن الملابس أرقام تليفونات لبعض المصادر اللي بجيب منها الملابس دي، واستنوني في الحلقات اللي جاية علشان هنتكلم فيها عن موضة الملابس.

معلشى انا لية كمان سؤال انا طبعا قربت اتجوز بس انا مشعرة جدا وجسمى فيه شعر كتير فى كوافيرة قالت لى انى اعمل جسمى بمكنة الشمع اية رايك وكمان جسمى قمحاوى فاتح بس ركبى وكوعى سود وبيقشرو انا بستخدم جلسرين بس مش بيعمل اى حاجة انا متشكرة جدا ليكى واسفة على الاطالة شكرا.

===========

رد بص وطل:
الشمع كويس لازالة الشعر بس أهم حاجة لازم حد متخصص هو اللى يعمله عشان مايسببش اضرار للبشرة، وبالنسبة لسواد الركبة والكوع ممكن تعملى ماسك الترمس والزبادى وده عبارة عن زبادى وترمس مطحون وعصير برتقال بتخلطيهم مع بعض وتحطيهم على المناطق الغامقة وسبيها لمدة 10 دقائق واشطفى جسمك بماء فاتر، وبالنسبة للجلسرين فهو كويس بس بلاش تستخدميه لوحده لأنه بيسمر، لازم تخلطيه مع ليمون، ويا ريت تتابعي الأعداد اللي بيقدمها قمر 14 عن العناية بالبشرة بطرق طبيعية.

السلام عليكم أنا أول مرة اشارك بس بصراحة يا جيلان انتى رائعة جدا انا عندى سؤال انا شعرى ناعم شوية وكان تقيل بس للأسف بيضعف جدا وبينزل بطوله وانا مش عارفة اعالجه ازاى انا مش بعمل استشوار خالص ولا حتى مكواة وكمان انا قربت اتجوز ايه رايك ممكن اعمل حنة فرد واستخدم حقن الكيراتين ولا اعمل ايه انا نفسى شعرى يتقل زى الاول اعمل ايه اسفة للاطالة.

===========

رد بص وطل:
اهلا بيكى معانا يا مونوس وتابعينا دايما هتلاقى حاجات تفيدك والف مبروك مقدما، وبالنسبة لشعرك مادام بتقولى ناعم يبقى بلاش تدخلى فيه حاجات كيماوية علشان النتيجة مش هتبقى كويسة وممكن تمشى على ماسكات طبيعية وحمامات كريم وزيوت من اللى بنقدمهم فى قمر 14 وان شاء الله هتعمل نتيجة كويسة، وبالنسبة لكيراتين العلاج فده كويس وممكن تعمليه، أما بالنسبة لكيراتين الفرد فأنا مش بانصح باستخدامه.

تسلم ايديكى يا قمر انا كان ليا سؤال ياقمر لو تسمحى
انا شفايفى عريضه شويه وانا مش بحط ميك اب وكنت سمعت عن حاجات لتصغير الشفايف فياريت لو تعرفى حاجه منهم تقولي لى عليها وطريقه استعمالها؟ لأن الموضوع بيضايقنى اوى ولا مفيش حل غير الجراحه؟

==========

رد بص وطل:
للأسف مفيش غير الجراحة علشان تصغير الشفايف أو استخدام تحديد الشفايف بإنك تحددي شفايفك من الداخل مش على بره، وبعد كده تحطي الروج علشان تدى منظر أصغر للشفايف.

هاى جيلان انا عينى حساسة جدا وبالبس لنسز ورحت لمحل بيع ادوات تجميل قال لى ان افضل نوع كحل اسمه سيبال وهو فحم بس بردو بيوجعنى لان من عينى من تحت اعمل ايه قبل ما احط الكحل لان اى قلم بيوجعنى من تحت عينيا.

==========

رد بص وطل:
صديقتي العزيزة واضح إن عينيكي حساسة جدا، ولازم تستشيري دكتور قبل ما تستخدمي أي حاجة جوه عينيكي، وممكن تستغني عن الكحل وتكتفي بماسكرا وآي شادو خفيف.

ازيك يا جيلان كل سنه وانتي طيبه عايزه اسألك علي حاجه بس ياريت تردي عليّ بصي انا هتجوز كمان 5 شهور عايزاكي تقولي لي اعمل ايه بقي عايزه وصفات لجسمي عشان يبقي شكله حلو وكمان لشعري عشان هو جاف قوي عايزه اهتم بيه من دلوقتي عشان يتعدل شويه وتتفك منه التموويجه اللي فيه ممكن تقولي لي علي حمامات كريم او حمامات زيوت طبيعيه او مش طبيعيه عشان يبقي شكله كويس عشان انا متعقده منه جداااااااااااااا كمان عايزاكي تقولي لي اعمل حمام العروسه ده ازاي وانا عارفه بتعبك معايا كمان لو عايزاكي تعملي لي الميك اب بتاعي في الفرح احجز عندك قبلها باد ايه.

==========

رد بص وطل:
ميرسى ليكى يا سارة وتابعى اعداد قمر 14 هتلاقى حلقات خاصة بتجهيز العروسة والعناية بالشعر والجسم والبشرة بماسكات وحمامات زيوت طبيعية، وده كمان لينك لعدد عن حمام العروسة http://www.boswtol.com/health-and-beauty/beauty-and-styling/09/october/6... وبالنسبة للميك اب ممكن تكلمينى على الرقم ده 0123418020 وتسألي على كل اللي إنتي عايزاه.

أنا جبت كريم الاساس واللوس باودر وكونسيلر من الماركات اللي قلتي عليهم بس هو البيز مهم بيأثر قوي في نتيجه الميك اب ولا إيه أصله غالي وممكن أجيب بداله حاجات كتير أهم ولا إيه رايك.

===========

رد بص وطل:
البيز زي ما قلنا بيحمي البشرة وبيديها شكل صحي أكتر لكن ممكن تستغني عنه، وممكن تجيبي البيز وتستخدميه كبديل لكريم الاساس وفي النهاية انتي بتختاري اللي يناسبك.

جيلان معلش عايزه اسالك سوال انا مبقاش ينفع شعرى اى حاجه ولا حمامات وجربت كتيررر ومش نافع انا خلاص زهقت من تجعيده وهيشانه فنفسى يتفرد فعايزه اعمل فرد ففى كريم poipount للفرد الشعر ايه رايك طيب فى ده ارحم ضرر شويه ولا ايه انا خلاص والله يا جيلان النفس جت فى شعرى مش بيتعدل خاالص لان اصلا هو مكنش وحش بس خلاص ده كويس الكريم ده ولا ايه لان متنتجات بويبونت كويسه لحد كبير ايه رايك فى ده.

===============

رد بص وطل:

زى ما قلت قبل كدة انا مابشجعش اوى فكرة كريمات الفرد او اى حاجة بتعمل فرد للشعر لانها بيبقى داخلها كيماويات فده بيبوظ اكتر ما بيصلح انتى بس اهم حاجة تهتمى بحمامات الكريم و الزيوت و ماتستعجليش النتيجة و ادى لشعرك وقت عشان يستجيب.

ممكن اعرف يا جيلان لو سمحتى سعر base الابيض كام.

==============

رد بص وطل:

ممكن تلاقيه فى حدود 300 او 400 جنيه.

معلش عندي سؤال كمان فية كحل نازل جديد عاجبني أوي ومريحني وهتجوز بعد سنة وأنا صعب جدا الاقي كحل يمشي مع عيوني ينفع يا جيلان أجيب الكحل وأشيلة واستعملة بعد سنة؟ ولا هيبوظ؟ وينفع يتشال أد اية أقصي مدة؟ وهل في طريقة معينة لحفظه؟ والروج برضو ينفع لو حاجة عجبتني اجيب واشيلة سنة؟

==========

رد بص وطل:
الكحل ممكن تحتفظي به من سنة لسنتين بس أهم حاجة انك ماتستعمليهوش يعنى تشيليه وهو جديد لانك لما بتستعمليه بتفتحيه وطبعا الهوا بيدخله وده بيعرضه انه يتلف اسرع وعمره يبقى اقصر.

يعني ينفع البس فستان سوارية والبس علية بوليرو عادي؟
وأجيب بوليرو عادي ولا هيبقى سوارية والاقيه فين البوليرو المنقوش أو السوارية ده؟؟؟؟؟

==============

رد بص وطل:

ممكن طبعا تلبسى بوليرو على الفساتين السواريه بس المهم إنه يكون لايق على تفصيلة الفستان و طبعا لازم يكون سواريه يعنى مثلا يكون ستان أو شيفون حسب ستايل الفستان وده ممكن تجيبيه من محلات السواريهات أو ممكن تفصليه على ذوقك.

جيلان انا بحب اشوف كل الحاجات اللى انتى بتعمليها وبتابع دائما كل جديد انتى بتقدميه بس بليز تكترى شوية من ربطات الايشاربات وازى نليق اللبس مع بعضه وشكرا كتيييييييييير.

===============

رد بص وطل:

ميرسى ليكى يا مونى وتابعينا دايما هتلاقى كل اللى انتى عايزاه وإن شاء الله نعمل حلقة عن ربطات الايشاربات قريب.

الحلقة جميلة جدا وأفادتنى أوى لانى لسه سنة أولى فى حط الميك أب هههه شكرا أوى لتعبك وافادتك لينا على فكرة انتى مكياجك ما شاء الله هادى وجميل وبحب فى حضرتك انك بتقربى الميك أب ان يكون طبيعى وهادى جدا وجذاب ربنا يزيدك جمال وتألق أنا كان عندى سؤال بره الحلقة أنا عندى فى شعرى من قدام تقصيف جامد يعنى زى ما يكون شعر صغير متقطع كده ومتقصف مش عارفة اعمل فيه ايه بعمل حمامات زيوت وبهتم بيه كويس بس برده الكام شعره المقطعين دول ما بيطولوش واما بسرح شعرى بيفضل من قدام كده شكله متقصف ومتقطع وواقف بسبب الشعر ده مش عارفة اعمل ايه ياريت تفيدينى.

==========

رد بص وطل:
ميرسى ليكى كتير وبالنسبة لسؤالك لو انتى محجبة يبقى لازم تلبسى طرح من القطن أو تلبسى باندانا قطن على شعرك قبل ما تلبسى الطرحة، وبلاش تستعملى السيشوار كتير فى المنطقة دى لانها بتضعفها اكتر وممكن انك تستشيرى دكتور علشان يديكى حاجات تنشط فروة الراس علشان تنبت الشعر تانى.. وحاولي تعملي حمامات كريم أو زيوت لشعرك مرة كل أسبوع على الأقل، وهتلاقي على الموقع وصفات طبيعية كتيرة للعناية بالشعر.

جيلان بجد انتى جميله اوى ما شاء الله عليكى.. عاوزة اسالك فى حد سالك عن افضل شامبو وقولتى هيربل فانا فهمت ان قصدك هيربل اسنسيز بس بتقولى هيربل للسهوله فروحت للبياع وقولت له هيربل فادانى شامبو هيربل هو امريكى للشعر الجاف ولونه اخضر بس بعد ما روحت لقيت مكتوب عليه هيربل بس مش هيربل اسنسيز فانتى تقصدى هيربل بس ولا هيربل اسنسيز؟ ياريت تردى عليّ علشان لو تقصدى هيربل اسنسيز اروح اغيره قبل ما استخدمه.

==========

رد بص وطل:
أنا كنت أقصد هيربل اسنسيز بالفواكه والاعشاب.

ازيك يا استاذة جيلان كل سنة وانتي طيبة يارب.. وتكون سنة سعيدة عليكي وعلينا انا خطوبتي قريب والفستان اوف وايت بسيط اوي مش فيه شغل كتير من عند الصدر بس قنار تطريز ونازل سادة خالص كنت عاوزة اعرف ايه الوان الطرح اللي اقدر استخدمها والبدي او البوليرو يكون لونه ايه انا قمحية وايه الوان الميك اب اللي اقدر استخدمها مع العلم ان الخطوبة عائلية في البيت معلش تعبتك متشكرة جدا علي ذوقك.

==========

رد بص وطل:
وانتى طيبة والف مبروك مقدما وربنا يتمم لك بخير، اللون الأوف وايت ده شيك أوى وميزته انه بيليق عليه حاجات كتير أوى يعنى ممكن تلبسى عليه طرح بنفسجى أو فوشيا أو بينك، وحاولى البادى او البوبيرو اللى هتلبسيه يكون نفس لون الفستان او قريب منه علشان يبان انه على بعضه وممكن تجيبى بوليرو دانتيل اوف وايت، وبالنسبة للماكياج ممكن تحطى الوان بينك أو بيجات في ذهبي رقيقة لانك فى البيت ومش محتاجة حاجة أووفر.

جيلان شكرا علي مجهودك عايزة أعرف ‏ايه رأيك في ميك اب سارة الانواع التانية أنا عارفاها بس سارة عايزة رأيك فيه ضرورى.

==========

رد بص طل:
ممكن توضحي لى السؤال اكتر لانى مش عارفة ميك أب سارة.

ازيك يا جيلان وحشانى خالص حلقه النهارده عجبتنى اوى واستفدت منها كتير بس انا عايزه اعرف منك هل السيرم مفيد للشعر ولا لا انا عندى نوعين لوريال وكريستال ياريت تقوليلى اى واحد فيهم احسن وطريقه حطه على الشعر شكرا ليكى.

=============

رد بص وطل:

ميرسى ليكى يا مرمر وانتو كمان وحشتونى أوى، وزى ما قلنا السيرم مالهوش أى فوايد للشعر غير انه بيدى لمعة للشعر لما بتكويه أو تعمليه سيشوار، وبالنسبة للنوعين الاتنين كويسين وده بتحطيه قبل ما تعملى فير أو سيشوار للشعر.

hi ya jelan sorry 3la kotr el2s2la,ana 3andy 7bob so3'yra fe weshy betzed fel7ar wma3 elmake up ma3 eny ba7ot make up 2olayel we 2nwa3 kwayes wro7t le dr wktably mrahem 7atetha fatra twela bas m3maletsh 7aga 2olely 3la mask astamer 3aleh 3shan el7bob de wa7to kol 2ad eh

==========

رد بص وطل:
الأفضل إنك تواظبي على علاج الدكتور لأن أي مشكلة جلدية بتحتاج لوقت طويل شوية علشان تشعري بنتيجة العلاج، وتقدري ترجعي للأعداد اللي موجودة على قمر 14 اللي بتقدم ماسكات وحلول طبيعية لعلاج مشاكل البشرة والشعر.

هاى انا اول مره اشارك معاكم بس كنت عاوزه اسال انا بشرتى دهنيه وعاوزه اسماء ماركات كويسه للغسول والتونك وكريم النهار وانا عندى 24 سنه.

==========

رد بص وطل:
اهلا بيكى صديقتنا وبالنسبة لماركات الغسول والتونك ففيه أنواع زي نيتروجينا ودوف وديور.

انا معجبة بيكى جدا وشوفتك ف كذا حتة مش هنا فى بص وطل بس بس انا عندى طلب شخصى انا من اسكندرية وعاوزاكى تيجى تعمليلى ميك اب ف فرحى ينفع ولا لأ.

==============

رد بص وطل:

ميرسى ليكى و الف مبروك مقدما و ربنا يتمملك بخير، ممكن تكلمينى على الرقم ده 0123418020

ازيك يا جيلان يارب تردى عليه فى اقرب وقت على السوال ده لانى بثق فى كلامك على طول انا شعرى طوله كويس مش قصير بس بيهيش على طول ومجعد جدااا وناشف ووحش من الاخر ففيه ناس بتقول لى على حنه الفرد للشعر الاسود ايه رايك فيها وايه عيوبها ولو حلوه اخد كميه قد ايه وهل ليها اضرار فيما بعد ولا مبتنصحيش بيها عشان الكيراتين سعره غالى شويه فقولت ده سعرها كويس ياريت يا جيلان تردى على ايه رايك فيها اجيبها ولا لا الف شكرررررررررررر.

=============

رد بص وطل:
أنا ما بانصحش باستخدام اي حاجة لفرد الشعر لأنها دايما بتكون بتحتوي على مواد كيميائية مضرة جدا للشعر، والأحسن إنك تبدئي تهتمي بشعرك وتعملي له حمامات كريمات وزيوت مرة كل أسبوع على الأقل، وهتلاقي على الموقع حمامات زيوت طبيعية لعلاج مشاكل الشعر، وبالنسبة للكيراتين ممكن تعملي اللي بيعالج الشعر مش اللي بيفرده.

هاى يا جيلان... هى البودرة السايبة بتبقى عاملة ازاى مش فاهمة؟

============

رد بص وطل:
البودرة السايبة بتبقى بودرة عادى مش مضغوطة يعنى زى بودرة الاطفال كدة.

من فضلك يا جيلان كنت عايزه اسم ماركة كريم تقشير للبشره تكون كويسه.

==========

رد بص وطل:
كريمات تقشير البشرة زى نيتروجينا وديور ولانكوم.

ميرسى اوى يا جيلان انا كنت عايزة اسالك بالنسبه للكحل كل انواعه والماركات بيسيح؟ وعشان مايسيحش اعمل ايه؟ وانا بحب الكحل وبحبه يبقى تقيل بس معظم الاقلام بيبقى خفيف وهو اقلام الكحل دى مش مضره لاني بحط كحل باستمرار ولا الاسمد افضل وعشان اجيب اسمد اصلى اجيبه من الصيدليه؟

==========

رد بص و طل:
ميرسى ليكى يا لوءة وبالنسبة للكحل فيه منه أنواع كتير كويسة زى فلوريل، وبورجوا، ومدينا، وكيرولان، وبالنسبة للكحل علشان مايسيحش ممكن تدفي الكحل على النار قبل ما تستخدميه لمدة 3 ثواني أو تحطي بودرة سايبة تحت عينيكي قبل ما تحطي الكحل وبعد كده تشيلي البودرة الزيادة وعشان تضمنى ان استخدامك للكحل مايبقاش مضر لعينك لازم تستعملى اقلام خاصة بيكى لوحدك علشان لو حد استعملها ممكن يكون عنده حساسية فى عينه وتتنقل لك.وبالنسبة للاسمد والكحل كويسين وممكن تجيبيه من الصيدلية.

hi ya jilan ana 7wagby feha fra3'at kter wna mshba3melhom 2sta5dem bodret 7wageb wla 2geb 2lam 7wageb a7san ya3ny eh elly maywa2a3sh sha3r 7wagby
ma3lesh ana 3andy so2al tany ana basta5dem eldepliner el2swed bta3 oriflame 3shan ana weshy dohny wbeysya7 elko7l yatra hwa shaklo 7elw lel3en eldy2a wla elko7l a7san wlw elko7l shaklo 27la eh el2nwa3 elly btesbat lftrat twela 3la elbashra eldohneya wmerci leky

=========

رد بص وطل:
بالنسبة للحواجب ممكن تستعملى البودرة احسن لانها بتبقى ناعمة على الحواجب ومابتوقعهاش.. وبالنسبة للديب لاينر استعمليه عادى وهو بيناسب اى عين بس المهم الرسمة اللى هتحطيه بيها او المكان سواء من جوا العين او برة العين، وفيه كمان ماركات كويسة من الكحل زي ريمال وبورجوا وديور ومايبلين.

ازيك يا جيلان بجد وحشتينى اوى وكنا مفتقدينك جدا بجد جيلان أنا عندى فستان ستان بستاج وعليه طبقه من القماش مخرمه كده زى الشيفون بس كلها مخرمه بستاج برضو وأنا خمريه عاوزة أدخل لون معاه لانى مش بلبسه خالص والفستان نظام كاب بس فعاوزه أدخل فكره معاه ياترى أدخل لون ايه معاه يليق معايا كمان وأدخل فكره إيه فى الفستان.

==========

رد بص وطل:
ميرسى ليكى يا شاهى وإنتم كمان وحشتونى أوي.. اللون البستاج ممكن تدخلى معاه الوان كتير زى البنفسجى أو الفوشيا، وبالنسبة للفكرة ممكن تعرفيني أكتر شكل الفستان عشان اعرف أفيدك.

أنا زعلانة أوى يا جيلان لأنى كتير أوى ببعت لكم ومفيش أى رد أنا سؤالى هو إزاى ممكن أخفى الجبهة العريضة بالميكب وتسريحات كمان الشعر اللى ممكن تخفيها وكمان عايزة أعرف إذا كان ممكن إننا نستعمل منتجات الأطفال زى بيبى جونسون ولا بالنسبة لحد كبير مش هيكون فى أى فايدة من استعمالها؟

========

رد بص وطل
صديقتي العزيزة إحنا بنرد على كل المشاركات اللي بتوصل لنا يوميا بس ممكن بسبب كثرة عدد المشاركات تكوني مش عارفة توصلي للرد، وبالنسبة الجبهة العريضة ممكن تداريها بانك تقصى شعرك ديجراديه لانها بتاكل شوية من حجم الجبهة وممكن تداريها بالماكياج بانك تحطى لون بلاشر غامق شوية عليها. وبالنسبة لمنتجات الاطفال جونسون فهي كويسة وممكن تستعمليها عادى.

بجد ما شاء الله عليكي إنتي قمر ربنا يكرمك بجد كنت عاوزة أسالك علي البادي اللي إنتي لابساه في الفيديو ده الاقيه فين أنا في حدائق القبة عاوزة أقرب مكان ممكن الاقي فية الباديهات دي
وتاني حاجة انا خطوبتي قريب انا بشعري بس خطيبي عاوز فستان ميبينش ولو حتي ايدي اية الحل اجيبة منين ده وانا مبقتنعش بفكرة بادي تحت الفستان دي خالص وكل الفساتين طبعا مفتوحة لو عندك حل قوليلي
==============

رد بص وطل
ألف مبروك ليكى مقدما وربنا يتمم لك بخير، إنتى ممكن تلاقى البادى فى المحلات اللى بنقول عليها فى آخر كل عدد، وبالنسبة للفستان ممكن إنك تجيبى فستان بسيط و تجيبى عليه بوليرو بكم و يكون ليه كولة عريضة أو طويلة أو منفوشة حسب اللى هيليق على الفستان.

أنا عايزه أعرف أدمج الكحل إزاي مع الرموش عشان الفيديو مش شغال وشكرا ليكي بجد.

===========

علشان تدمجى الكحل مع الرموش حاولى إنك ترسمى خط رفيع خالص من الكحل وبعدين تسيحيه بفرشة الآى شادو باللون اللى هتحطيه.

أنا لوني زي الموديل ومختلطه ممكن تجاوبيني إيه نوع الاساس إلي حطيتيه لها بالتحديد ماركه إيه ودرجته وشكرا ليكي أصلي مش عارفه اختار أساس مناسب.

============

رد بص وطل:
ممكن تستخدمي أساس ميك اب فور ايفر أو جيرلان وبالنسبة للدرجة فدي لازم تجربيها بنفسك على بشرتك قبل ما تشتري.

جيلان أنا بجد بحبك بس أنا عايزه أعرف الوان الكحل اللي بيليق علي اللنسز الرمادي.

============

رد بص وطل:
ميرسي يا شيماء لذوقك وبالنسبة للكحل اللي بيليق مع العدسات الرمادي فهو الأسود والبني والموف.

الف شكر ليكى وسؤالى عن الميه بتاعة الترمس اللى انتى كنتى قايله عليها بعد السويت عشان عدم نمو الشعر ينفع احطها فوق حواجبى بعد ما اعملها لان حواجبى بتطلع بسرعه جداااااااا انا بشرتى دهنيه وعندى حبوب فى وشى هل المياه دي بتبقى المفروض بتاعت نقع الترمس ولا مياه سليقه الف شكرررر ويارب الموضوع يتنشر وعايزين تانى مواضيع عن البشره والشعر.

==========

رد بص وطل:
ممكن تستخدمي مية الترمس الي بتطلع بعد نقعه لمدة 6 ساعات في كل أماكن الشعر الزائد.

الموضوع جميل يا جيلان بجد بشكرك جدااا عرفتينى كتير عن الميك اب وكان عندى سؤال مهم جدا ومضايقنى انا مشكلتى المنطقة اللى حوالين الفم سمرا جداا لونها غامق اوى ومش عارفة اعمل اية فيها ياريت لو تقولي لى حل ليها ولو عايزة اخفيها بالميك اب اعمل ايه؟؟؟ وميرسى لذوقك يا جيلان!

==========

رد بص وطل:
ممكن تستخدمي زيت اللوز الحلو في إنك تدهني المنطقة دي به كل يوم باليل قبل ما تنامي، وممكن تداريها بالماكياج بإنك تحطي على المنطقة دي كونسيلر أغمق بدرجة من لون بشرتك وبعد كده توزعي كريم الأساس والبودرة.

جيلان انتى جميلة اوى وانا بموت فيكى بجد.. جيلان كنت عاوزة اعرف انا بشرتى الحمد لله كويسة مفيهاش اى مشكلة بس انا لازم استخدم باودر علشان لما بحط ميك اب من غير باودر بتغمقنى شوية وكمان انا مش بستخدم كريم الاساس خالص.. ينفع استخدم اللوس باودر لوحدها ولا لازم كريم الاساس ولو ينفع استخدمها لوحدها اجيبها شفافة ولا تبقى افتح من لونى مع العلم بشرتى خمرية.

=============

رد بص وطل:
إنتي الأجمل أكيد يا كيارا، وبالنسبة لسؤالك فإنتي ممكن تستخدمي البودرة السايبة لوحدها في خروجاتك العادية وممكن تجيبيها شفافة أو افتح بدرجة واحدة من لون بشرتك.. وكمان ممكن تستخدمي البودرة المضغوطة ودي بتكون عبارة عن كريم اساس وبودرة في وقت واحد.

هاي يا جيلان يا قمر انا عندى هالات سوداء مع انتفاخ وجربت كل حاجة وكشفت ومفيش فايدة وظبط نومى كمان انا عايزة اعرف ممكن اعملها بالليزر وفين المكان اللي اعمل فيه وسعره بيكون بكام.

==========

رد بص وطل:
فيه طبعا علاج بالليزر لكن لازم تستشيري دكتور متخصص في الأول علشان قدر يحدد إذا كان علاجها بالليزر هيجيب نتيجة معاكي ولا لأ، وبالنسبة للسعر فده بيختلف على حسب عدد الجلسات اللي هتعمليها والتقنية اللي هتستخدميها.

تسلم ايديكى يا جيلان انا كنت عايزة اسالك على كريم الاساس اللى هو دوف ده حلو ولا لا وياريت تقولي لى الماركات الحلوة وبتبقى عاملة في حدود كام سعرها.

==========

رد بص وطل:
كريم أساس دوف كويس وهتلاقيني قلت في الحلقة اللي فاتت أكتر من ماركة ماكياج كويسة زي جيرلان وديور وميك اب فور ايفر.

جيلان بجد انا بحبك اووووووي وبحب استايلك جدا، كنت عايزة اعرف تقسيمات الوش يعني اعرف منين وشي عريض ولا مش عريض بيضاوي ولا طويل عشان اعرف اتعامل معه في الميك اب وانا انفي مدور وظاهره نوعا ما وبكون مش عايزة تبان كده اعمل ايه؟

==========

رد بص وطل:
ميرسي لذوقك جدا صديقتي العزيزة، وإن شاء الله قريب جدا هنعمل حلقة نتكلم فيها عن أشكال الوش المختلفة وأيه الميك اب المناسب معاها، وبالنسبة لعيوب الانف فدي ممكن تداريها بنظرية الظل والضوء وهي إن الأماكن الكبيرة اللي عايزة تداريها بتحطي عليها درجة كونسيلر أغمق من لون بشرتك والأماكن اللي عايزة تظهريها تحطي عليها درجة افتح من لون بشرتك.

إزيك يا رانيا يا قمر يارب تكونى بخير، كنت عايزة أسألك أنا بشرتى فاتحه و حواجبى لونها بنى مصفر أنا شقراء أصلا فا لما باجى أرسم حواجبى بحس إنى زى العفريت مع إنى برسمها بلون بنى بس برده شكلى بيبقى وحش و بتتخن أوى مش عارفة درجة اللون إللى ارسمهم بى؟ وأرسمهم إزاى؟

============

رد بص وطل:
لازم تستخدمي بودرة حواجب بني فاتح وبترسميها بفرشة رفيعة جدا وبتملي بس الفراغات اللي فيها مش بتخرجي بره الحدود الطبيعية بتاعتها علشان شكلك يبقى طبيعي.

ازيك يا جيلان شكرا على المعلومات دي ممكن تقولي ايه الالوان اللي تليق على العين الخضرا وكمان لو فيه ماسك لاثار حب الشباب وعلى فكرة أنا متزوجة وفي الخارج يعني ياريت تقولي حاجات اقدر الاقيها بسهولة وشكرا يا قمر.

===========

رد بص وطل:
العين الخضرا ممكن يليق عليها الكحل الأخضر والبني والأسود، وبالنسبة للآي شادو ممكن تحطي درجات البيج والبني والزيتي والنحاسي، أما بالنسبة لحب الشباب فالأفضل إنك تستشيري دكتور جلدية متخصص علشان يديكي الدواء المناسب.

الموضوع حلو اوووووى يا جيلان وبجد انا من اشد المعجبين بيكى علشان بتعلمينا حاجات جديدة وانا بحب موقع بص و طل اووووى من المواقع المفضلة لدى شكرااا

هاى جيلان مرسي علي مساعدتك لينا .. يس كنت عايزة اسال عن كريم اساس اسمه حوردانا jordana ده كويس ولا لا وفي سارة ولونا حلويين ولا لا ومنتجات تشاو زى الروج والروجاجو كويسين ولا لا ؟؟

==============

رد بص وطل:
من أفضل ماركات الماكياج زي ما قلت ميك اب فور ايفر وجيرلان وريمال وبورجوا وديور.

عجبتني أوي الحلقة بتاعة النهارده جدا تسلم إيدك.. عايزة اخد رأى حضرتك في مشكلة عندي اللى هى إنى ملامحى صغيرة مسمسمة:) وشكل وشى مدور بدرجة كبيرة و محجبة فمش بعرف احط ماكياج من غير ما احس انه غير شكل ملامحى تماما وطلعنى مش انا مع انى مش بحط ماكياج تقيل و كمان عندى مشكلة انى حوالين العيون عندى لونها مختلف أغمق فبحس انى لازم احط كريم اساس تقيل عشان اغطيها فياريت لو حضرتك تردي عليّ وتقولي لي اعمل ايه؟

==========

رد بص وطل:
أولا إنتي معندكيش أي مشكلة لأنك الحمد لله زي القمر، فمش محتاجة أصلا إنك تحطي أي ماكياج ولو حطيتي يبقى استخدمي حاجات خفيفة تحدد ملامح وشك، وإنتي الوحيدة اللي تقدري تعرفي إيه اللي يناسبك وايه اللي يظهرك أجمل، وزي ما قلت إنتي ممكن تكتفي بالميك اب بيز، وتحطي عليه حاجات خفيفة زي كحل وماسكار وليب جلوس لونه رقيق، وبالنسبة للهالات فممكن تستخدمي كونسيلر.

شكرا جدا علي مجهودك ويا ريت تردي عليّ لأني انا بعت في الموضوع اللي فات ومحدش رد عليا.. ازاي اشيل الكحل؟

==========

رد بص وطل:
شكرا ليكي يا فاطمة على متابعتك وذوقك، وبالنسبة لسؤالك فاحنا ردينا عليه الحلقة اللي فاتت بس يمكن إنتي مش عارفه توصلي للرد بسبب كثرة عدد المشاركات، وعموما الكحل ممكن تشيليه بمزيل ماكياج خاص بالعيون وفيه انواع كويسة زي نيفيا وديور.

ميرسى جداااااا

بصراحة تسلم ايديكى بجد بجد انتى فنانة انا كان ليا طلب انا نفسى اخد كورسات في الماكياج واخد شهادة فيها لانى بحب الماكياج اوى بس مش عارفة اماكن ياريت تقولي لى ف اسكندرية وتسلم ايديكى
واسفة ع الاطالة.

===========

رد بص وطل:
ميرسي لذوقك بجد يا صديقتي العزيزة لكن للأسف أنا معرفش اماكن تدريب في الإسكندرية لكن ممكن تسألي على النت وأكيد هتلاقي أماكن كويسة، وممكن تسألي في مراكز التجميل الكبيرة لأنهم بيعملوا في بعض الأوقات دورات تدريبية.

أنا سالت علي بيز ميك اب في العزبي اسمه كفر دريم حلو ولا إيه ب146 أجيبه.

===========

رد بص وطل:
أحسن نوع ممكن تجيبيه هو برفكت وايت وميك اب فور ايفر.

جيلان أنا جبت كريم سوبرا من كيرولان بس حطيته وحطيت له لوس باودر بس وشي قشر وكان ناشف ووحش أوي كان ملخبط أنا عايزة أعرف إيه كريم الأساس اللي يناسبني.

============

رد بص وطل:
أهم حاجة إنك تختاري اللي يناسب نوع بشرتك يعني لو بشرتك جافة يبقى إنتي محتاجة تجيبي حاجة فيها نسبة كريم علشان تديها ترطيب، والأفضل إنك تروحي المحلات الكبيرة اللي بتبيع مستحضرات التجميل زي FACES ومزايا، لأن بيكون هناك ناس مسئولة علشان تديكي المنتجات المناسبة مع نوع بشرتك.

هاى جيلان كنت عايزة اسألك انا بشرتى فيها اثار حبوب و احمرار هى عموما مختلطة نزلت رحت faces وجبت البرودكت دة lasting finish RIMMEL هى البنت قالت لى انه فيه mineral enriched ومناسب للبشرة الدهنية وكمان جبت كومبكت باودر من ريميل اسمها stay matte presses powder بس مش عارفة حاسة انها بتجير منى انا مخبيش عليكى جبت المنتجات دى و هى غالية عشان بشرتى حساسة اوى كنت عايزة اسألك اية رايك فيهم و بردة لازم استعمل اللوس باودر و يا ريت تقوليلى على ماركة كويسة لة و بردة هل ينفع انى اجيبها شفافة لانى مش عارفة احدد الدرجة المناسبة كل ما اجيب باودر تجير فى وشى .... ومعلش اخر سؤال انا بردو جبت قلم l'oreal indefectible القلم ده استعمله فين بالضبط وبعدين فى اخر القلم فى جزء ابيض شبة الاستيكة دة اية دورة بالضبط؟؟؟ و كمان معلش عايزة اسال عن كونسيلر بتاع make up forever اللى هوا فية كذا لون اخضر واورانج وكده تفتكري ده كويس فى حالة البشرة اللى فيها حبوب ولا ده للمحترفين بس واسفة جدااا انى طولت عليكى بس كنت عايزة اعرف انتى بتدي كورسات ميك اب؟؟؟

==========

رد بص وطل:
المنتجات اللي إنتي ذكرتيها ده كلها كويسة، لكن الكومبكت باودر ده بيستخدم لوحده من غير كريم اساس أما اللوس باودر فدي بتستخدميها بعد كريم الأساس علشان تثبت الميك اب وكمان تمتص الزيوت وتخلي الوش ما يمتصش التراب اللي موجود في الجو، وممكن تجيبيها شفافة علشان تليق مع بشرتك، وبالنسبة لl'oreal indefectible فده كونسيلر بيثبت لفترة طويلة أكتر من 6 ساعات، أما بالنسبة لكونسيلر make up forever اللي فيه الألوان فده بيستخدمه المحترفين وممكن إنتي كمان تستخدميه علشان تداري البقع الغامقة وأماكن الحبوب، أما بالنسبة لكورسات الميك اب فللأسف أنا مش بعمل كورسات بس ممكن تسأليني في كل اللي إنتي عايزاه على بص وطل وهتلاقي الإجابة في أسرع وقت وكمان تقدري تتابعي الحلقات اللي بنقدمها.