بالفيديو.. ميك أب وربطة طرحة للعروسة

الكونسيلر: طبعا الكونسيلر بنحطّه في المنطقة اللي تحت العين؛ علشان لو فيه أي هالات سودا بيداريها، وماينفعش نحط منه على باقي الوش؛ لأن هو لونه أصفر، لما بيتحط تحت العين بيدّي لون بيج، لكن لو حطينا منه على الوش هيخلي لونها أصفر.

عايزة أنبهكم إن مش صح إننا نفتّح منطقة تحت العين بشكل كبير؛ لأنها هتدّي شكل مش حلو، وهيكون أقصى درجة لتفتيح المنطقة دي هي نصف درجة أو درجة واحدة فقط، هنحط من الكونسيلر فوق العين كمان؛ علشان يظهِر لون آي شادو.

البودرة: أفضل أنواع البودرة هي البودرة السايبة، ودي بتكون شكلها بودرة فعلا عادية مش مضغوطة وجامدة.

بنوزّع البودرة على الوش كله بشكل هادي، وبرضه لازم نراعي إن البودرة تكون متوزّعة توزيع جيد.

فيه خطوة مهمة بنعملها إننا بنحط من البودرة تحت العين كمية كبيرة ونسيبها مانوزّعهاش، ودي فايدتها إن لو فيه آي شادو وقع تحت العين أثناء وضع الماكياج هنشيلها في الآخر مع البودرة.

البلاشر: أنا بحب أحط البلاشر في البداية بعد الفونديشين؛ علشان يساعدني على تخيل الشكل كله، وفيه طريقة بسيطة بنعملها علشان نحط البلاشر بشكل صحيح؛ وهي إننا بنحط صوابعنا على شكل 7 على الخدود، ونحط البلاشر في المنطقة اللي في المنتصف، وبعد كده بالجزء الفاضي في الفرشة هنوزّع البلاشر اللي حطيناه، وبعدين نوزّع على باقي الوش على الجبهة والذقن.

ماكياج العين: أفضل طريقة أنا بحب أستخدمها علشان أحط آي شادو هي الصوابع؛ وده علشان الإيد بيكون فيها حرارة بتساعد على تسييح آي شادو بشكل جيد، وأفضل صباع نستخدمه هو البنصر أو ring finger؛ وده لأنه بيكون أضعف صباع في اليد، وبيكون حنيّن ولطيف على البشرة، بنسيّح آي شادو الكريمي بلون على العين كلها ما عدا الجزء الأخير، وطبعا لازم نراعي إن اللون اللي هنحطه نحط منه على العين التانية على طول؛ علشان يبقى نفس الشكل ونفس تركيز آي شادو.

بعد كده هنحط آي شادو البودرة وده بيكون ثابت أكتر، واللي بيساعد على ثباته هي طبقة الآي شادو الكريمي اللي بنحطّها قبله، وده هنحطه بالفرشة وهنوزّع اللون الفاتح على كل العين.

بالنسبة للرموش أنا بافضل إني أحطها على العين قبل ما أخلص رسمتها وقبل ما أبدأ أحط ألوان آي شادو؛ لأنها بتبيّن وتحدد شكل العين هيكون إزاي.

بنرسم بالآي لاينر الجيل خط رفيع على العين من فوق، وبعد كده هنستخدم قطن الأذن ونسيّح خط الآي لاينر ده على الجفن المتحرك؛ علشان يدي شكل طبيعي ومش أوي.

بعدين نبدأ نحط الرموش على حسب رسمة العين نفسها ونحاول نحطها على الرموش الأصلية، وبنستخدم لزق مخصوص للرموش؛ علشان يناسب العيون الحساسة، وهو مصرح باستخدامه ومافيش أي مشكلة منه، وبيكون لونه رمادي، وبعد ما بنحطه بشوية بيدي اللون الأسود زي الآي لاينر، وهنسيب الصمغ ده ينشف شوية قبل ما نحط الرموش؛ علشان ماينزلش في الرموش من تحت، ونسيبه بعد كده لحد ما ينشف تماما لمدة دقيقة أو اتنين؛ علشان مايعملش أي لخبطة في رسمة العين.

بعد كده هنبدأ نرسم العين بالآي شادو، وطبعا كلنا بنحب رسمة العين الإسموكي أو العيون المدخنة، بس أنا هعملها بشكل بسيط؛ علشان ماتبقاش غامقة أوي وتدي سن أكبر للبنت؛ علشان كده أنا اخترت لون صارخ شوية؛ علشان أفرشه على العين في الأول وهو اللون الأخضر، هنحطه على الجفن المتحرك بالكامل، وبعد كده هاحط عليه لون بني لامع شوية، وهيكون برضه على الجفن المتحرك فقط، ولازم ناخد بالنا لما نكون هنرسم سموكي آيز مابنخرجش باللون بره الجفن إلا في النهاية.

وبعدين أنا بافضل إني أحط لون أسود مط على زاوية العين الخارجية في الجفن المتحرك؛ لأنه بيدّي وسع للعين وتركيز للنظرة وبيكون شكله حلو.

بعد كده بنبدأ نتدرج باللون على الجفن من فوق، وعلشان نعمل ده بنختار لون يكون وسط بين اللون الغامق اللي رسمنا به من تحت، وبين الجزء الفاتح على العين من فوق، وأنا اخترت لون بيج وهاحطه على المنطقة اللي بتكون بين الجفن المتحرك والجفن الثابت من فوق، وبعدين باحط لون يكون منور زي مثلا لون برتقالي مط؛ علشان أسيح به الألوان مع بعض.

بعدين بنحط لون أسود على عضمة العين فوق الجفن المتحرك عند الزاوية الخارجية للعين، وبعد كده بارسم خط بالآي لاينر الجيل على العين من فوق عند منابت الرموش، بس ده هنسيبه مش هنسيحه، وده بيدي تحديد للنظرة أكتر وبيبقى فيه تركيز على الرموش وبيخليها تبان أتقل، وبنيجي عند آخر خط الآي لاينر ونسيحه؛ علشان ندمجه مع باقي الألوان، ودي يا إما بنسيح الآي لاينر نفسه أو بنحط آي شادو أسود ونسيحه، وبعدين ناخد نفس فرشة الآي لاينر بنحط خط رفيع أوي تحت العين وعند زاوية العين الداخلية؛ لأن ده بيدي وِسع للعين، بعد كده هختار لون كحل أفتح من الأسود زي البني؛ وده بيكون لونه قريب من لون الجلد، وبعدين نسيحه؛ علشان يدي شكل طبيعي للعين.

الموضة في الحواجب دلوقتي إنها تكون عريضة وكمان مايكونش شكلها باين إنها مرسومة ومتحددة، باستخدام قلم الحواجب ويكون بلون قريب من لون الحواجب وباملي بين الفراغات بفرشة رفيعة، وبعدين أسرح الحواجب؛ علشان اللون يندمج مع الشعرات نفسها ومايبانش إنه كتلة من اللون محطوطة في الحاجب، وأهم حاجة إننا نستخدم لون يكون بيثبت؛ علشان مايحصلش أي مشكلة لو عرقنا مثلا أو عملنا أي حركة غلط عند الحواجب، بعد كده أنا بحب أعيد عليها تاني باستخدام بودرة الحواجب؛ لأنها بتدي لون مط طبيعي مش بيلمع، أهم حاجة وإحنا شغالين إننا نمسح أي زيادات على العين أو تحتها أو عند الحواجب؛ علشان تبقى منطقة العين دي منورة.

آخر حاجة باحطها في العين هي الماسكرا وبنحطها بحركات شمال ويمين؛ علشان ترسم الرموش أكتر، ومن فوق الرموش، وناخد بالنا إننا مانجيبش الماسكرا على الجفن، وبعدين بنحط من الماسكرا على الرموش السفلية بشكل خفيف علشان لو فيه بودرة وقعت عليها مايبقاش لونها أبيض، وبعد كده هنرسم تحت العين بالكحل، وأنا بافضل الآي لاينر الجيل؛ لأنه بيبقى أكتر ثباتا.

رسمة الشفايف: أول حاجة بحب أحطها على الشفايف هي المرطب؛ علشان يدي نعومة، ويخلي الشكل طبيعي، وبعدين بأحدد الشفايف، والموضة السنة دي في تحديد الشفايف أنها تكون مدورة مش مثلثة، وبنفرش بقلم التحديد على الشفايف كلها، وبعدين نسيحه بالقطنة؛ علشان اللون يكون متوزع على الشفايف بشكل متساوي.

أنا النهارده هختار لون رقيق للروج؛ علشان يبقى التركيز أكتر على العين، ودايما نحاول إننا نعمل توازن بين رسمة العين وبين لون الروج، يعني لو لون العين تقيل يبقى الشفايف أخف والعكس صحيح، وأنا اخترت اللون البادي روز، وده بيبقى ميكس بين اللون البيج والروز وبيكون لونه أقرب للطبيعي، بنوزع الروج بالفرشة؛ علشان يسيح كويس على الشفايف، بعد كده هاحط ملمع شفايف فاتح أوي على الروج في منتصف الشفايف، ونسيبه لمدة دقيقة علشان ينشف.

وبعدين باحط ملمع شفايف نسيح به الروج ومايكونش لامع؛ لأن الموضة في الروج هي الألوان المط أو النصف لامع، ومن الماركات الكويسة للملمع هي ديور.

اللمسات النهائية: المنطقة اللي حطينا فيها البلاشر في الأول هنعيد عليها تاني بسيط، وبعدين هفضي الفرشة من أي بلاشر وأبدأ أسيح على باقي الوش، وبعدين هاستخدم من الآي شادو الفاتح اللي حطيناه فوق العين وأحط منه على أطراف البلاشر وعلى باقي الوش بشكل بسيط؛ علشان أدمج الألوان مع بعض، وبعد كده باوزع بودرة لامعة بسيطة على الوش كله، ودي بتدي شكل حلو للوش، وفي الآخر بارُش اسبراي مثبت على الآي شادو؛ وده بيدي ثبات عالي للآي شادو؛ علشان لو اتحركنا كتير يفضل يكون موجود.

دلوقتي هنعرف إزاي نعمل ربطة الطرحة للعروسة.. بالخطوات
أهم حاجة إننا ننسق الطرحة مع شكل الفستان، وكمان مع رسمة وش العروسة والماكياج، والنهارده فستان العروسة معانا له ديل طويل؛ وعلشان كده هيبقى مناسب معاها أوي طرحة قصيرة، وكمان التطريز في الفستان بسيط ولونه مائل للفضي، ودي حاجات لازم أراعيها في اختيار الطرحة والربطة.

- أول حاجة لازم نلم الشعر بطريقة صحيحة وبلاش نستخدم الأستك الرفيع؛ لأنه بيقطع الشعر، وكمان هاستخدم البِنس الرفيعة اللي بيكون فيها تعريجات، ودي بتبقى مناسبة للشعر ومابتعلمش فيه؛ وعلشان العروسة اللي معانا لها ذقن بارزة شوية؛ فأنا هارفع شعرها بشكل عالي أوي؛ علشان الطرحة العالية هتناسب وشها أكتر.

- بعد كده أول طبقة هاحطها هتكون من التول الاسترتش؛ ودي علشان نغطي بيها الأذن؛ لأن في الغالب المنطقة دي مابتتغطاش وبيكون شكلها مش لطيف، والطبقة دي بنربطها وممكن نبين جزء من منابت الشعر أو ممكن لو مش عايزين يبقى هنغطيها وخصوصا لو الجبهة عريضة يبقى هننزل الطرحة لتحت شوية.

- بعدين هاحط طبقة صغيرة من الأسفنج الخفيف أوي وباثبتها على البنس اللي حطيتها في الشعر، والغرض من الطبقة دي هي إنها هتدي ارتفاع وكثافة للطرحة، وده لأن الفستان بسيط أوي ورقيق ومنفوش بسيط.

- هحط طبقة من الستان الاسترتش الخفيف، وده بيكون رفيع جدا غير الستان المستخدم في الفساتين، وهاثبت الطبقة دي بالدبوس المشبك لأنه بيبقى ثابت أكتر وهيقعد فترة طويلة في الفرح، وبعدين باثبته من عند البنس اللي ثبتها في الشعر من الأول كزيادة في الأمان.

- هابدأ ألم الطبقات اللي حطيتها بطريقة شيك وده لأن الطبقة الأخيرة هتبقى تول ودي بتشف اللي تحتها وعلشان كده لازم يبقى شكله لطيف، وأنا دايما بأحب أتخلص من أي زيادات في القماش علشان مايعملش كثافة في الشكل النهائي للطرحة.

- أنا حاولت أجيب وحدات من الفستان نفسه؛ علشان أوزعها على الطرحة بشكل يليق مع وش العروسة، وباثبتها بالدبابيس السادة اللي بتكون من غير رأس، وباحاول أحطها بشكل لطيف علشان ماتبقاش باينة في الطرحة.
- بعد كده هابدأ أثبت الطرحة من ورا، وأنا بافضل الطرح السادة خالص ويكون فيها مثلا شريط ستان رفيع من تحت؛ ودي بتدي شكل لطيف أوي والطرحة بتكون رقيقة وخفيفة تتحرك معانا بسهولة.

- باراعي دايما أثناء ما أنا باربط الطرحة إن يكون فيه معايا إكسسوارات زيادة؛ علشان لو حسيت إن ممكن أضيف أي لمسة تانية أقدر أستغلها.

أتمنى إن الماكياج ولفة الطرحة اللي عملناهم النهارده يكونوا عجبوكم..

واستنوني دايما وحلقات مميزة جدا على "قمر 14"..

وكل سنة وكلكم بخير وصحة وسعادة..

وعيد سعيد،،،