مع رانيا.. إجابة الأسئلة اللي بتحيرك عن بشرتك وشعرك

اهلين رانيا إزيك ..حبيت اسالك عن ميه الاكسجين يعني عادي اخذ علبه المشقر بتركيز 9 بالميه بس هو لونه اخضر هههه يصير صح اهم شي إنه اكسجين مايفرق اللون طبعا هذه الخلطه بستخدمها للانف لان فيني رؤوس سودا جابت لي المرض وثاني سؤال اللي ابي استفسر منه انتي قلتي الأرز المصري بنستخدمه لان فيه نشا كبير فاستنتجت إنه يعني عادي استخدم النشا بدال الأرز المصري وخلطه الارز مع البركه تنفع للمنطقه الحساسه يعني تاثيرها يبان مو لازم استخدم ليكوسيد وتروسيد أرجو الرد ومشكوووره على هالبرنامج الحلو الله يحفظك .

==================
رد بص وطل :
صديقتى العزيزة ميه الأكسجين بيكون لونها شفاف وممكن تستخدمى ميه الأكسجين بنسبه تركيز 10% ، وماينفعش فى ماسك التفتيح تستخدمى النشا بدل الأرز .

لو سمحتي انا فرحي الاسبوع الجاي ان شاء الله دعواتك بقى ياجميل سؤالي عن الحمام المغربي ههل هو بعمله قبل السويت ولا بعد السويت أصل سمعت ان لو عملت بعدالسويت بيحصل الالتهابات فياتري إيه الاحسن وهل ملح الحليب دا حلو لو عملته بعد السويت وانا باخد الشاور بتاعي بدل الحمام المغربي كبديل يعني ولا ايه وكمان في حاجه معلشي انا وشي حاسه انه دبلان اوي اليومين دول وباين علي عيني ومش عارفه اعمل ايه لا أكل عارفه اكل ولا نوم برتاح فيه وهعيط خلاص ههههه سوري طولت عليكي بس ياريت الرد بسرعه ياجميل.

==================
رد بص وطل :
صديقتى العزيزة ألف مبروك مقدماً إنتى ممكن تعملى سويت الأول وبعد كده تانى يوم تعملى الحمام المغربى وملح الحليب كويس وممكن تعمليه لكن مش بديل عن الحمام المغربى وبالنسبه لبشرتك ممكن تعملى الماسكات اللى بنقول عليها يومياً زى ماسك الموز والعسل وكمان الزبادى والخيار .

رانيا يعنى زيت حبه البركه المعصورة على البارد.

====================
رد بص وطل :
صديقتى العزيزة الزيوت اللى بتشتريها من عند العطار بتكون معصورة على البارد وإنتى إطلبى الزيت معصور على البارد من العطار .

السلام عليكم ورحمة الله وبركاته متشكرة على ردك على سؤالى عن ماسك السنفرة وكنت عايزة اسالك عن ماسك طبيعى لتقليل ظهور التجاعيد على الوجه والبشرة وشكرا.

======================
رد بص وطل :
صديقتى العزيزة إنتى ممكن تعملى ماسك الموز والعسل وهتلاقيه فى العدد ده http://www.boswtol.com/health-and-beauty/beauty-and-styling/10/may/26/14186

ممكن اعرف طريقة للقضاء على الشعر الابيض انا سنى مش كبير لكن فى شعر ابيض ظاهر عندى فى شعرى وفى الحاجب كمان بدأت شعرة أو شعرتين وشعر قليل فى اماكن متفرقة من الجسم يعنى شعرة واحدة فى أماكن الجسم المختلفه مفيش اى حل لمشكلة الشعر الابيض خصوصا الى فى الشعر والحاجب.

=======================
رد بص وطل :
صديقتى العزيزة من الأفضل إستشارة دكتور فى الأول وتعملى بعض التحاليل عشان تتأكدى إن معندكيش مشكلة صحيه، وخاصة إن الشعر الأبيض ده بدء يظهر فى جسمك .

السلام عليكم إزيك يارنيا وإيه اخبارك انا وزنى 50 كيلو وعندى هالات سودة تحت العين جامدة اوى وعلى فكرة انا الضغط عندى واطى وكمان عندى ضعف عايزة حل للهالات عشان بجد انا تعبت منها اوى وشكر ليكى ياقمر.

========================
رد بص وطل :
صديقتى العزيزة إهتمى بنوعيه أكلك زى الخضار والفاكهه ومنتجات الألبان وبالنسبه للهالات ممكن تعملى ماسك بذر القطون وشرائح الخيار يومياً .

تاعبينك معانا دايما بس كنت عايزة اسأل عن جهاز الشمع ياترى ممكن نستعمله فى الاماكن الحساسة ؟

=====================
رد بص وطل :
صديقتى العزيزة ممكن تستخدمى جهاز الشمع فى الأماكن الحساسه .

هاى رانيا أنا بقالى أسبوع بستخدم ماسك اللوز المطحون وبياض البيض للتفتيح بس بحط ترمس مطحون بدل اللوز عشان مش لقياه عشان ده مش الموسم بتاعه فهل ينفع ولا لأ؟ هو خلى وشى صافى كده بس مفتحش اوى ممكن تقولي لى بديل عشان يفتح اسرع وفى صابونه الارز إيه نوع الصابونه اللى نبشرها وميرسى اوى يارانيا.

===================
رد بص وطل :
صديقتى العزيزة الترمس كويس لكن ماينفعش تستخدمى الترمس بدل اللوز فى الماسك ده، وبالنسبه للصابونه إنتى ممكن تستخدمى أى صابونه بدون إضاقات ممكن تستخدمى صابونه جود مورنج .

هاى رانيا ميرسى على ردودك الجميله ووصفاتك التحفه انا عايزة وصفه تطولى شعرى لانه مش بيطول وزيت السمسم بينعم الشعر وأستخدمه إزاى وشكرا ليكى اوى.

=====================
رد بص وطل :
صديقتى العزيزة إنتى ممكن تعملى حمام زيت القرفه وهتلاقيه فى العدد ده http://www.boswtol.com/health-and-beauty/beauty-and-styling/11/january/1... .

السلام عليكم يادكتورة انا اعاني من شعيرات بذقني وبأسفل وجهي وماني عارفه كيف اشل الشعر نهائي من وجهي للابد اعاني منه كثير ومزعجني ياريت اذا في طريقه مضمونه وطبيعيه لازاله الشعر من وجهي ومن وين القى المستحضرات اللي بتذكرينها ولكي جزيل الشكر
وعندي سؤال ثاني اذا سمحتي ابغى طريقه لازاله سواد اصابع اليدين والرجلين علما بأن سواد اصابع ايدي تختلف عن منطقه باقي جسمي باللون ياليت لو في طريقه طبيعيه لازاله سواد الاصابع باليد والرجل تحياتي لك وشكرا . .

=====================
رد بص وطل :
صديقتى العزيزة الحل الوحيد لأزالة الشعر نهائياً هو الليزر، وعشان تزيلى الشعر من وجهك ممكن تستخدمى الشمع أو الفتلة، وإنتى ممكن تستخدمى الليمون والجلسرين على إيدك ورجلك عشان مشكلة السواد .

السلام عليكم أنا أرسلت لكم سؤال أمبارح عن أستخدام نبات السعد
على بشرة الوجه بعد الفتله وعايزة أعرف الوزن المناسب لى حسب طولى انا وزنى 57 وطولى 160 وعمله برنامج غذائى بس مش عارفه الوزن المناسب الى المفروض أوصله وكنت عايزة اعرف مستحضر مضمون لتقشير البشرة الدهنيه الموجود بها حبوب للأزاله الخلايا الميته من اليشرة وكيفيه استخدامه وكم مرة فى الاسبوع ممكن تقولولى على أنواع وأسامى الحبوب الغير منزوعة القشور لانى قرأت أنها مفيدة جدا للبشرة والصحة العامة وأسفة انى طولت عليكم والسلام عليكم.

==================
رد بص وطل :
صديقتى العزيزة إنتى ممكن تستخدمى نبات السعد على بشرتك مافيش مشكلة وبالنسبه لوزنك فهو كويس جداً وبالنسبه لبشرتك فإنتى ممكن تعملى إسكراب السكر وزيت الزيتون وممكن تستخدمى مقشر نيفيا وكمان إستخدمى الماسكات المخصصة للبشرة الدهنيه .

ميرسى اوي انك رديتى عليّ بجد بس ممكن تقولي لى ايه الخطوات اليومية للعناية بالبشرة وتكون كلها ماسكات طبيعية والطرق بتاعتها بالنسبة للبشرة الدهنية وانا متاكدة ان السؤال دة هيهم كل البنات والسيدات اكيد وبالنسبة لصابون لمبادا ده هل هو موجود فى مصر بس ولا ممكن الاقيه فى السعودية لاننا في السعودية لظروف الشغل وميرسي أوي ليكي.

===========

رد بص وطل:
إن شاء الله قريب جدا هنعمل مجموعة حلقات عن الروتين اليومي والأسبوعي والشهري للعناية بكل أنواع البشرة، وبالنسبة لصابون لمبادا فهتلاقيها كمان في السعودية، ولو مالقيتهاش ممكن حد يبعتها لك من مصر.

إزيك يا رانيا يارب تكوني بخير عايزه أسأل عن علاج للبشره المتهدله أو الغير مشدوده عندك علاج بيشد بشرة الوش والرقبه؟ وشكرا على نصايحك بجد

=============

رد بص وطل:
أهلا بيكي يا اسمهان، وبالنسبة لسؤالك فلو بشرتك دهنية ممكن تعملي ماسك ببياض البيض ونقطتين من عصير الليمون، وهتحسي إنه شد بشرتك جدا.

ازيك يا روني، شوفي انا عندي هالات سوداء ومضيقاني جدا، وبصراحه ماليش في الماسكات والوصفات أوي، أنا جبت كريم vichy للهالات السوداء، ايه رايك فيه؟؟ وكمان جبت منظف vichy برده 3 in 1 هل يغني عن الغسول؟؟

===========

رد بص وطل:
صديقتي العزيزة.. بالنسبلة للهالات فالماسكات الطبيعية فعلا بتجيب نتيجة كويسة جدا لكن مع المواظبة والصبر، لكن لو عايزة تستخدمي مستحضرات جاهزة يبقى الأفضل إنك تستشيري دكتور متخصص علشان يقدر يعرف سبب الهالات السوداء عندك ويديكي العلاج الطبي المناسب لها، وبالنسبة لماركة VICHY فهي كويسة.

السلام عليكم انا مشكلتى ان بشرتى فيها حبوب وكمان اثار حبوب قديمة وكمان بشرتى بتتأثر بالشمس جدا حتى لو حطيت صن بلوك وخصوصا انى بتعرض للشمس كتير وعاوزة اعرف طريقة للعناية بشفايفى.. شكرا.

===========

رد بص وطل:
صديقتي العزيزة يا ريت ترجعي للأعداد اللي فاتت وهتلاقي لينك الأرشيف في آخر كل عدد وإنتي تلاقي أكتر من وصفة لعلاج الحبوب وتفتيح الآثار الناتجة عنها، وبالنسبة للشفايف فأهم حاجة إنك تتجنبي بل شفايفك بلسانك، وكمان تاكلي خضار وفاكهة كتير، وامسحيهم كل يوم بقطنة مبللة بخليط من اللبن والعسل أو بزيت اللوز الحلو.

رانيا عايزه أعرف حل لحب الشباب وعندي بقع في بشرتي من آثار الحبوب مضيقاني قوي نفسي تكون بشرتي نضيفه وعايزه ماسك كويس لتفتيح بشرتي مش عايزه استعمل مكياج تاني.. واعمل ايه لتفتيح الإيدين وبشكرك جدا.

============

رد بص وطل:
أهم حاجة إنك تهتمي بنظافة بشرتك بإنك تغسليها كل يوم بالصابونة والليفة ولو بشرتك دهنية ممكن تستخدمي صابونة زي لمبادا أو ادورا مرتين في الأسبوع، ولو رجعتي لأرشيف الحلقات هتلاقي حلقة كاملة عن ماسكات لتفتيح البشرة.

رانيا انا بحبك قوى انا اول مرة اشترك عايزة اعرف ازاي 3 حاجات 1\ازاي افرد شعري من كسرة خفيفة بطريقة طبيعية بدل استعمال السيشوار وشعري ناعم في الاصل، 2\ازاى يتقل ويطول، 3\ايه الطريقة الطبيعية اللي تعادل السيرم عشان شعري مايهيش عشان اسعار السيرم عالية (اجو الافادة وان الماسكات تكون بسيطة وسريعة المفعول) لو مافيش ماسكات قولي لي اسماء منتجات مستحضرات تفيد بالغرض.

==========

رد بص وطل:
أهلا بيكي صديقتي العزيزة، وبجد إحنا سعداء بمتابعتك لينا ونتمنى إن تستمري وتبقي صديقة دائمة معانا، وبالنسبة لسؤالك الأول فإحنا دايما بنقول إن مفيش حاجة طبيعية بتفرد الشعر أو تغير طبيعته لكن أهم حاجة إنك تهتمي بصحته ونظافته علشان يبقى شكله في حيوية وصحة حتى لو كان مموج أو مجعد، ولازم تعرفي إن أي حاجة بتفرد الشعر بيكون فيها مواد كيميائية بتضر الشعر جدا، أما بالنسبة لتكثيف الشعر وتطويله فهتلاقي في الحلقات اللي فاتت حمامات زيوت وماسكات كتيرة للشعر علشان تتقله وتطوله بشكل طبيعي، بس أهم حاجة زي ما قلنا إنك تهتمي بصحته عن طريق إنك تحصلي على أكل صحي ومتوازن، وتهتمي بنظافة شعرك، وبكده هتحصلي على شعر صحي ولامع ومش هايش.

هاى رانيا انا شعرى خفيف جدا من الامام ودايما مفروق وفروه راسي باينه جدا اعمل ايه وشكرا ليكي.

============

رد بص وطل:
ممكن تستخدمي زيت حبة البركة المعصورة على البارد وتدلكي به فروة رأسك يوم بعد يوم، وتعملي حمام الزيت ده 3 مرات في الأسبوع وهو عبارة عن خليط من زيت الثوم وزيت الجرجير وزيت جوز الهند بنسب متساوية، وبنسيب الخليط ده على فروة شعرك لمدة 3 ساعات، وبعد كده نغسل الشعر الشامبو المناسب.

هاى يا رونى ازيك كنت عايزه اسألك انا حطيت زيت خروع على شعر لوحده وحسيت انه بيوقع شعرى جامد فبطلته وكمان عملته 3 مرات وماحستش بأي طول وهو غلط لوحده وبيوقع الشعر ولا إيه.

==========

رد بص وطل:
زيت الخروع مفيد جدا للشعر ولكن لازم يتخلط مع زيوت تانية وتحطيه على فروة الرأس فقط، أما بقى لتطويل الشعر فممكن نعمل حمام زيت عبارة عن ملعقة زيت جوز هند على نصف ملعقة زيت قرفة؛ بس ناخد بالنا إننا ما نزوّدش كمية زيت القرفة لأنها ممكن تسبب تساقط الشعر لو كميتها زادت، وممكن كمان نعمل خليط عبارة عن ملعقة كبيرة من عسل النحل وملعقة صغيرة من زيت الزيتون، لكن أهم حاجة عايزة أقولها إننا علشان نحسّ بنتيجة من الماسكات دي لازم نواظب عليها لفترات طويلة.

انا خطوبتي اخر الشهر وعاوزة ماسك تفتيح وكمان عندي هالات سودا.

===========

رد بص وطل:
ممكن تدخلي على اللينك ده وهتلاقي ماسكات لتفتيح البشرة واللينك هو http://www.boswtol.com/health-and-beauty/beauty-and-styling/10/november/... وبالنسبة لمشكلة الهالات السوداء فإنتي لازم تهتمي بصحتك وتنامي فترات كافية وتاكلي خضار وفاكهة كتير وتشربي ميه كتير طول اليوم، وممكن تعملي ماسك بذر القطون وده هتلاقيه في الأعداد القديمة.

هو منين اجيب الشمع بتاع ازالة الشعر وليا سؤال تانى ممكن تقولي لى على اسم صابونة استعملها للبشرة الدهنية وممكن تقولي لى على افضل وصفة لتتقيل الشعر وتكون فى وقت صغير مش كبير اوى؟

=========

رد بص وطل:
ممكن تجيبيه من الصيدليات ومحلات بيع مستحضرات التجميل، وبالنسبة للبشرة الدهنية فإنتي ممكن تستخدمي لها صابونة زي أدورا أو لمبادا، وبالنسبة لتتقيل الشعر فكل حمامات الزيوت اللي عملنها في الحلقات اللي فاتت بتستخدم لتتقيل الشعر، وكمان حمام الزيت الثلاثي اللي بيتكون من زيت جوز الهند وزيت الجرجير وزيت الثوم، لكن لازم تعرفي إن اي ماسكات طبيعية لعلاج الشعر بتحتاج لوقت مش أقل من شهرين علشان تحسي بنتيجتها، ولكن مع المواظبة هتحسي بتحسن كبير في شعرك.

السلام عليكم لو سمحتى انا بشرتى دهنيه وعاوزه نوع صن بلوك حلو.

============

رد بص وطل:
ممكن تستخدمي صن بلوك من بايوديرما لأنه من أحسن الأنواع اللي موجودة بس تجيبي النوع السائل مش الكريمي.

شكرا ليكي جدا لكن عندي سؤال هل استخدام الليمون والجلسرين للمنطقه الحساسه لتفتيحها بيفيد حتي لو بياخد وقت تاني حاجه عاوزه ازاي استعمل الليفه المغربي يعني بعد اما اغسل جسمي بالشاور ولا ايه وهل كريمات دوف او جونسون او نيفيا كويسه لبشره الوجه قبل ما أنام وربنا يجزيكي الخير.

============

رد بص وطل:
الكريمات اللي قلتي عليها دي كويسة لكن طبعا بتجيبي النوع المناسب مع نوع بشرتك، وبالنسبة لليفة المغربي فإنتي بتستخدميها مرة كل أسبوع وبتدعكي بها جسمك مع الصابون أو الشاور العادي اللي بتستخدميه وممكن تستخدمي الصابون اللي بنعمله في الحلقات بتاعتنا، وبالنسبة لتفتيح المناطق الحساسة فأي وصفة من وصفات تفتيح البشرة ممكن تستخدم للمناطق الحساسة، وده لينك لحلقة كاملة عن تفتيح المناطق الحساسة ممكن تستفيدي منه واللينك هو http://www.boswtol.com/health-and-beauty/beauty-and-styling/11/january/3...

انتي جميله بجد بس لو تخففي الاحمر والاخضر الي ف وشك عشان يبقي الجمال طبيعي

السلام عليكم ورحمة الله وبركاته إزيك يا رونى عامله ايه ربنا يجزيكى كل خير عنا انتى فعلا بتنفعينا بعلمك بس انا عاوزه وصفه لحاجه عندى هو انى فى علامتين فى مشط رجلى من الصلاة هما لونهم بنى وابتدوا ينشفوا ومش عارفة اعمل لهم ايه ياريت تدينى وصفة ليهم وشكرا.

=========

رد بص وطل:
أهم حاجة إنك تهتمي بترطيب بشرة جسمك بالزيوت والكريمات اللي بنعملها في الحلقات ومع الحمام اليومي لازم تستخدمي الليفة وتركزي على المناطق اللي زي دي علشان تقشري الجلد الزيادة، وبعد الحمام ترطبي بشرتك بالزيوت والمرطبات وممكن تعملي ماسكات تفتيح البشرة اللي قلنا عليها في الحلقات اللي فاتت، ومع الوقت هتحسي بنتيجة كويسة، وممكن وإنتي بتصلي تلبسي شراب علشان جلدك ما يتأثرش من الاحتكاك.

رانيا أنا شعرى ناعم جدا بس مموج شويه مفيش اى ماسكات تفرد التمويجه دىفس هي بسيطه يعنى الحمد لله بس نفسي تتفرد أوي.

==========

رد بص وطل:
أهم حاجة إنك تهتمي بصحة شعرك وتغذيته، علشان يبقى شكله صحي ولامع، لكن مفيش حاجة طبيعية بتفرد الشعر أو تغير طبيعته، ممكن تعملي حمامات زيوت بزيت الحلبة أو زيت جوز الهند، لأنهم بينعموا الشعر جدا، ومع الاستخدام ممكن تلاقي التمويجة دي بقت أقل.

هو فرد شعر للولاد يستمر لفتره طويله يعنى مثلا يفضل مفرود ل 6 شهور مثلا؟ ولو فيه طب الشعر اللى بيطلع جديد بيبقى عامل إزاي؟
وياريت الأسعار لو أمكن وشكرا أوى.

===========

رد بص وطل:
أنا مش بانصح تماما باستخدام اي حاجة لفرد الشعر لأنها بتحتوي على مواد كيميائية مضرة جدا للشعر وبتدمره وبتخلي الشعر اللي بيطلع ضعيف جدا ومقصف.

ممكن يا رانيا تقولي لنا علي طريقة لتعطير الجسم والشعر معلش أنا تقلت عليكي.

=========

رد بص وطل:
ممكن تعملي لوشن زيت اللوز مع زيت الورد وتستخدميه على بشرتك بعد الحمام، وبالنسبة للشعر فإنتي ممكن تخلطي البلسم اللي عملناه مع شوية من أي زيت عطري تحبي ريحته وتغسلي به شعرك بعد الشامبو.

السلام عليكم ورحمه الله وبركاته أزيك يا رنوش بجد انا فرحانه بيكى وباهتمامك بنا والمجهود اللى بتعمليه علشانا وكنت عايزة أسال ينفع نستخدم نبات السعد على بشرة الوجه بعد ما نزيل الشعر بالفتله وانا وزنى 56 وطولى 160 وماشيه على برنامج تخسيس كنت عايزة اعرف الوزن المناسب اللى المفروض اوصل له والسلام عليكم.

============

رد بص وطل:
نبات السعد من الحاجات اللي بتساعد على تقليل نمو الشعر وممكن تستخدميها على بشرة الوجه وعلى الجسم كله بعد إزالة الشعر، وبتسيبيه يوم كامل على بشرتك وبتكرري الموضوع ده لمدة 6 أيام ورا بعض وبتكرري نفس الطريقة مرة كل شهر، وبالنسبة لسؤالك لتاني فالوزن الصحي المناسب مع طولك لابد وأن يتراوح بين 51 إلى 64 كيلو يعني وزنك الحالي مناسب جدا مع طولك لكن المهم إنك تحافظي عليه.

السلام عليكم لو سمحتي يا رانيا عايزة اعرف البلسم اللي عملتيه طريقة استخدامه إزاي وكمان أنا بعمل مرتين في الأسبوع حمام زيت جوز هند ممكن اعمل مره في الاسبوع ماسك الزبادي والحلبه بعد ما اغسل شعري من الزيت في نفس اليوم بحيث إني مغسلش شعري كتير؟؟ ولا كده يجهد الشعر شكرا أوي وجزاكي الله كل خير على مجهودك ده:)

===========

رد بص وطل:
ممكن تعملي لكل ماسك يوم في الأسبوع وتعمليه فيه.

رانيا انا عندى حبوب في اعلى ايدى وفي ظهرى وظهر كمان آثار ليها حبوب حمرا صغيرة وعندى كمان إنى مليانة في الأرداف والمؤخرة عن باقي جسمى عايزة رياضة معينة لتخسيس المناطق دي أو أي حل ليهم بليز.. شكرا.

===========

رد بص وطل:
بالنسبة لمشكلة الحبوب فإنتي لازم تهتمي بالنظافة الشخصية جدا، وتاخدي حمام مرة كل يوم على الأقل وتغيري الملابس الملامسة للجسم يوميا، وتلبسي اقطان وتبعدي عن الباديهات اللي فيها خامات صناعية، وده لينك لعدد فيه ماسك لعلاج الحبوب اللي بتظهر على الجسم واللينك هو http://www.boswtol.com/health-and-beauty/beauty-and-styling/10/december/27/25060، أما بالنسبة للسمنة الموضعية فأحسن حل لها هو ممارسة التمارين الرياضية، ودي ممكن تسألي عليها مدرب رياضي متخصص، وتابعينا في الحلقات اللي جاية وإن شاء الله هتلاقي مفاجآت كتيرة هتلاقي فيها كل اللي إنتي محتاجة له بإذن الله.. فانتظرينا.

ana 3wza a3raf ya3ny el7enna elbida ynfa3 tet7at 7awalin el3in w hia mkhlota bzet loz plz 2olili w tet7at kam marra fe elesbo3 w bardo astkhdem elsabon elbalady f eh

=======================
رد بص وطل :
صديقتى العزيزة أفض حل لمشكلة الهالات السودة ماسك بذر القطون وشرائح الخيار بس الأستمرار عليها يومياً .

هاى رونى عايزة وصفة للبثور السوداء الصغيرة بالبشرة بليز قبل ماتكبر؟؟؟؟

=====================
رد بص وطل :
صديقتى العزيزة عرضى بشرتك للبخار وإستخدمى صابونة مناسبه مع نوع بشرتك وكمان ممكن تعملى ماسك الترمس والردة وكمان ممكن تعملى ماسك الفجل وهتلاقيه فى العدد ده http://www.boswtol.com/health-and-beauty/beauty-and-styling/10/may/26/14186

هاى ازيك يا رونى يا قمر انا كنت عايزة اعرف ايه الفرق بين الشمع والسيلك ابيل والسويت بالنسبه لازاله الشعر ولوان الشمع احسن ياريت اعرف احسن ليه؟ وما هى التجهيزات اللازمه للبشرة قبل وبعد عمل الازاله وشكرا.

=============

رد بص وطل:
صديقتى العزيزة الطرق التلاتة دى كويسة لازالة الشعر بس أفضلهم هو الشمع لأنه سهل الاستعمال ومابيسببش اى ألم وكمان بيشيل حتى أصغر شعيرات وكمان السويت كويسة لازالة الشعر لانها بتساعد على تفتيح البشرة هى ممكن تسبب ألم بسيط لكنها جيدة، وبالنسبة للسيلك أبيل هى كويسة لانها طريقة سهلة وسريعة وانتى ممكن تستخدمى الطرق التلاتة دى بس على فترات على حسب اللى تستريحى ليه وتحسى انه جاب نتيجة كويسة معاكى. بالنسبة للتجهيزات مش هتحتاجى تجهزى جسمك لحاجة بس ممكن بعد الازالة لو عايزة تقللى من ظهور الشعر تستخدمى نبات السعد اللى قلنا عليه قبل كدة.

لو سمحتي يارانيا عايزة اسألك علي حاجه طبيعيه لتوطيل الرموش
وممكن تقولي لي الوصفه دي صح ولا لأ المكونات مجموعة من نواة التمر تحميصهم على النار لحد ما لونهم يبقي أسود فاحم
بعدين أطحنهم واخليهم بودرة ناعمة جداً وأخلطهم مع زيت الخروع لحد يتكون خليط متماسك زي المسكارة واحطها علي رموشي ؟؟؟؟

====================
رد بص وطل :
صديقتى العزيزة أنا مش بانصح بأستخدام أى حاجة على الرموش وزيت الخروع على الرموش ممكن يعمل مشاكل فى عينك أهم حاجة إنك تستخدمى ماسكرا نوعها كويس و مضمونه .

السلام عليكم لو سمحتي يا رانيا كنت عايزه اسألك عن ماسكات عشان ماما الأول عايزه حاجه عشان البقع البني اللي بتبقي في الوش و الايد وكمان ماسك البيض لشد الوش لو سمحتي عايزه اعرف طريقته بالظبط شكراا.

=================

رد بص وطل:
صديقتى العزيزة بالنسبة للبقع الغامقة هتلاقى فى العدد ده ماسك الفجل http://www.boswtol.com/health-and-beauty/beauty-and-styling/10/may/26/14186 ، وبالنسبة لشد الوش فانتى ممكن تستخدمى بياض البيض لوحده يعنى تحطيه على بشرتك لمدة 20 دقيقة وهو مفيد جدا لشد البشرة وتستمرى عليه يوميا وهتحسى بالفرق، كمان ممكن تضيفى معاه نقط ليمون أو نصف ملعقة خل أبيض +نصف ملعقة مية ورد.

ازيك يا رنوش بصى أنا عندى مشكلة وهى الاسترتش ماركس مش عارفة اتخلص منها أنا رفيعة وعمرى ما تخنت وزنى على طول بين 47 و50
كمان عايزة اسألك على ماركة mash صن بلوك عندى درجة حمايته 45 وانا عندى 20 سنة وبشرتى عادية هل الماركة كويسة والدرجة مناسبة لية؟

=================

رد بص وطل:
صديقتى العزيزة بالنسبة لمشكلة الخطوط البيضا هتلاقى فى العدد ده ماسك لسان البحر للتخلص منها http://www.boswtol.com/health-and-beauty/beauty-and-styling/10/november/... وكمان ممكن تدهني جسمك بخل التفاح وسيبيه على جسمك لمدة 2 أو 3 ساعات وبعد كده اغسليه وممكن تعملي الوصفة دي يومياً وإن شاء الله هتحسي بالنتيجة على طول. وبالنسبة لماركة ماش هى كويسة ممكن تستعمليها.

ازيك يا رونى انا عايزة اسألك على حاجة لتبيض الاسنان انا عندى الفك السفلى من جوة اصفر لانى بشرب منبهات كتير شاى وقهوة وبغسل سنانى بالمعجون بس برده من جوة اصفر عايزة حاجة لتبيض الاسنان شكرا جزيلا.

==============

رد بص وطل:
أهم حاجة علشان تحصلي على أسنان بيضاء وبتلمع إنك تغسلي أسنانك بفرشة الأسنان بعد كل وجبة وياريت تجددي فرشة أسنانك كل فترة، علشان تتأكدي إنها بتؤدي وظيفتها على أكمل وجه، واستعملي معجون أسنان مبيض وده موجود في الصيدليات، وكمان ممكن تستخدمي السواك كل يوم قبل ماتنامي، ولازم تهتمي بإنك تاكلي خضار وفاكهة كتير وعلى فكرة الفراولة لها تأثير مبيض على الأسنان.

هاى رانيا عاملة ايه انا كنت بعتلك قبل كدة انا لسه لاول مرة هحط ميك اب انا بعرف اعمل مكياج انا عايزة أعرف بس اجيب ايه لتنظيف البشرة أنا مش بستخدم اى حاجة الا صابونه دوف لان بشرتى جافة وحساسة وكريم نيفيا بحطة قبل ما انام أنا كنت بسمع فى تليفزيون عن حاجات دى غسول ومزيل للميك اب وكريم نهار وكريم ليل وكريم للعين وتونر او تونك هو انا مش عارفة يعنى ايه تونر أو تونك ياريت تقولي لى دول بيعملوا ايه وهل انى لازم اجيب كل الحاجات دى ولا ايه واجيب ماركه ايه انا اسفة جدا على الاطاله بس ياريت تردى عليا بل تفصيل لانك انتى اللى هتفدينى شكرا.

==================
رد بص وطل :
صديقتى العزيزة صابونه دوف كويسه وممكن تستخدميها والكريمات اللى بيكون فيها زبادى وخيار كويسه جداً للبشرة زى إيفا، وبالنسبه للتونر هو التونك وهو بيقفل المسام وإنتى ممكن تستخدمى ميه الورد أو الزهر أو الياسمين، وكريمات الليل والنهار أنا مش بانصح بأستخدامها لو سنك أقل من 35 سنه .

الدنيا نورت بوجودك ولو سمحتى انا بشرتى جافه وعملت صابونة الطين الطبيعى وحطيت زيت السمسم عليها فاستعملها كام مره فى اليوم يعنى لو تلات مرات مثلا فى اليوم عادى أو اكتر . وانا دايما بيتقال لى انى لما اعمل ماسك على وشى ممنوع اتكلم او اضحك علشان ميسببش ليا تجاعيد بالزات لما ينشف على بشرتى فطبعا بيكون عذاب بالنسبه لى فايه راى حضرتك. وانا عندى21 سنه ينفع استعمل ترنشات الخيار على عينى وربنا يخليكى ليا.

==============

رد بص وطل:
صديقتى العزيزة بالنسبة لصابونة الطين ممكن تستعمليها مرتين فى اليوم وتستخدمى بعدها مرطبات أو تدهنى بشرتك بزيت اللوز، وبالنسبة لموضوع الماسكات مش صحيح وممكن تعيشى حياتك عادى، وبالنسبة لعينيك ممكن تحطى ترنشات خيار وبطاطس.

بالنسبة لمشكلة قشرة الشعر، انتى قولتى هنا على ماسك مكون من خليط الخل مع الخميرة والعسل، يا ريت تقولي لى طريقته ومدته على الشعر ومرات استخدامه، بس يا ريت متقوليليش على الماسك اللى بالكاموميل لانى عاجبنى مكونات ده اكتر.

================

رد بص وطل:
صديقتى العزيزة زى ما قلنا قبل كدة إننا لازم ندى فرصة للماسكات سواء ماسكات شعر أو بشرة على الأقل 3 شهور علشان النتيجة يبان أثرها، والماسك ده هتحطى قطعة خميرة مع ملعقة عسل وعصير ليمونة وتحطيهم على شعرك بعد غسيله وتسيبيه لمدة 15_ 20 دقيقة وتشطفيه، وتكررى الماسك مع غسيل الشعر.

العناية بالقدامين ورائحة القدامين وكيفية عمل استرخاء للقدامين.

=================

رد بص وطل:
صديقتى العزيزة العدد ده هتلاقى فيه ماسك للعناية بالقدمين http://www.boswtol.com/health-and-beauty/beauty-and-styling/10/october/1...

هو ينفع اعمل الشمع على وشى وهل بيضر ولا إيه وهو احسن ولا الفتلة.

==================
رد بص وطل :
صديقتى العزيزة الشمع كويس بس لازم حد متخصص يعملهولك والفتلة كمان كويسه وممكن تعمليها مرة فى الشهر .

السلام عليكم ورحمة الله وبركاته رانيا انا كنت قرأت في عدد قبل كده عن لوشن الكريم بالليمون وانتي قولتي ماتستعمليش كريم فيه نسبه مرطبات عاليه كنت عاوزة اعرف نوع كريم استخدمه, وكمان كنت عاوزة اعرف بالنسبه للبلسم اللى عملتيه ممكن احطه على الجذور عادي ولا ده هايسقط الشعر.

=====================
رد بص وطل :
صديقتى العزيزة إنتى ممكن تستخدمى كريم نيفيا أو دوف أما بالنسبه للبلسم فإنتى بتحطيه على شعرك والبلسم ده طبيعى جداً ومفيهوش أى مشكلة .

السلام عليكم ورحمة الله وبركاته رونى بعتلك كذا مرة علشان اسالك على حاجه استخدمها علشان ايدى فيها بقع سمرا مكان الحروق من البوتجاز فيريت تقولي لى ضرورى علشان إيدى شكلها وحش اوى وعايزة حاجات احطها على الحرق أول ماتحرق من الفرن علشان متعلمش ربنا يجازيكى كل خير يارب.

====================
رد بص وطل :
صديقتى العزيزة إستخدمى الليمون والجلسرين على إيدك يومياً وكمان العدد ده هتلاقى فيه ماسك البطاطس لتفتيح اليد http://www.boswtol.com/health-and-beauty/beauty-and-styling/11/march/21/...

أنا أول مرة اكتبلك بس متفألة بيكى اوى وحاسه إنك هتفيدينى وتقولي لى إزاى أعمل حمام بخار لوشى فى البيت وإيه الماسكات الطبيعية اللى لازم استعملها بعدة خصوصا إنى بشرتى دهنيه وعندى دهون سمرا على الانف فعايزة اتخلص منها ياريت تردى على .

======================
رد بص وطل :
صديقتى العزيزة أهلاً بيكى البخار اللى بتتعرضى ليه وإنتى بتخدى دش ده كفايه جداً على بشرتك، وإنتى ممكن تستخدمى صابونة لمبادا لأنها مناسبه للبشرة الدهنيه وكمان إستخدمى الليفه المخصصة للبشرة وماسك الترمس والردة بيعالج مشكلة الدهون دى .

انا عامله حنه من شهر 3 وفرحي في شهر 6 وكنت عايزة اصبغ شعري هينف ولا لأ .

=====================
رد بص وطل :
صديقتى العزيزة ألف مبروك مقدماً، للأسف لازم يعدى فترة على الأقل 6 شهور على الحنه عشان لما تيجى تعملى صبغه تديكى اللون اللى إنتى عايزاة .

أنا شعرى مقصف من الامام جدا لدرجة إنه لازم استعمل عدة توك من الامام ومع إنى عمرى 25 عام ومع ذلك شعرى ظهرت به شعر أبيض اكتر من والدتى ماذا أفعل أرجو سرعة الرد.

=====================
رد بص وطل :
صديقتى العزيزة ممكن تعملى ماسك حبه البركة عشان مشكلة التقصيف وهتلاقى الوصفه فى العدد ده http://www.boswtol.com/health-and-beauty/beauty-and-styling/10/june/2/14678 وممكن تستخدمى الحنه عشان مشكلة ظهور الشعر الأبيض .

لو سمحتى يارانيا هو بذر القطون بنسيبه قد إيه على العين يعنى بنام بيه لحد الصبح وبنحطه فوق العين عادى ومعلش كمان هو النمش مالوش علاج إلا الليزر.

=====================
رد بص وطل :
صديقتى العزيزة إنتى ممكن تحطى بذر القطون وتنامى بيه مافيش مشكلة وبالنسبه للنمش ممكن تعملى ماسك الفجل الموجود فى العدد ده http://www.boswtol.com/health-and-beauty/beauty-and-styling/10/may/26/14186

إزاى أعالج الخطوط البيضاء فى منطقة الاكتاف.

=================
رد بص وطل :
صديقتى العزيزة العدد ده هتلاقى فيه ماسك للخطوط دى http://www.boswtol.com/health-and-beauty/beauty-and-styling/10/november/...