أهلاً بكل بنات "قمر 14"
أيام قليلة ونحتفل بعيد الفطر المبارك، أعاده الله علينا وعلى الأمة الإسلامية بالصحة والخير.. وطبعاً الأفراح والمناسبات بتكتر في موسم الأعياد والإجازات، وكل عروسة بتحلم في اليوم ده إنها تكون ملكة مُتوّجة، وبتفكّر إزاي شكلها يكون حلو ومميز جداً..
علشان كده فكّرت إني أقدِّم لكم النهارده عدد خاص بالعروسة؛ هنتكلّم فيه عن الألوان الموضة في الميك أب، وهنشوف تصميمات مختلفة لفساتين الأفراح، وكمان هنشوف ربطات طرح مختلفة..
- نصيحة للعرايس.. بلاش تجري وراء الموضة
أكيد موضة الميك أب بتختلف من موسم لموسم، لكن أنا عايزة أنصح كل العرايس بلاش تجروا ورا الموضة؛ لأنك لو مشيتي على موضة أو استايل معين، بعد مدة هتلاقي إن استايلك في الصور غريب ومش على الموضة.
علشان كده الأفضل إنك تختاري الألوان اللي ما بتبطلش أو بيكون لها موضة معينة، يعني دايماً خليكِ في الألوان الكلاسيكية في الميك أب؛ زي: الروز والموف والبني بدرجاتهم والأوكسيديه والذهبي والأسود والرمادي والنبيتي.
ويا ريت تبعدي عن درجات الأزرق والأخضر؛ لأن الألوان دي مش بتليق على بشرتنا، لكن ممكن تحطّي كحلي أو زيتي.
وحاولي على أد ما تقدري يوم فرحك إن شكلك يكون بسيط، والميك أب بتاعك يبقى هادي وشيك.
- ماكياج العيون.. مهم للعروسة المحجبة
طبعاً فيما يخص ميك أب العروسة المحجبة، بنحب نركّز أكتر على ماكياج العيون؛ لأنها أكتر حاجة بتظهِر الوش.
والسنة دي الموضة في الميك أب هي الألوان الفاتحة في الآي شادو، ويكونوا أكتر من لون وبندمجهم مع بعض، ومعاهم آي لاينر ورموش، ونحط خط آي شادو من تحت العين.
وبالنسبة لأحمر الشفاه، فاخترته باللون الروز، وعلشان اللون يثبت معانا فأنا مليت شفايف الموديل كلها بقلم التحديد، وبعد كده حطيت أحمر الشفاه، وفي الآخر حطيت ملمع الشفايف.
وزي ما هنشوف في الفيديو أنا عملت للموديل ميك أب العيون بدرجات الموف والروز، مع إضافة الرموش الصناعية، وطبعاً دلوقتي بقى فيه أطوال وكثافات وأنواع مختلفة من الرموش.
أما بالنسبة لكريم الأساس، فطبعاً اخترت الدرجة المناسبة مع لون بشرة الموديل، مع تحديد الوش بتوزيع كريم الأساس الغامق مع الفاتح بطريقة معينة، وبعد كده حطيت أحمر خدود باللون الروز، وحطيت جزء بيلمع على منطقة الأنف والخدود.
- التاج والإكسسوار.. موضة في طرحة العروسة المحجبة
دلوقتي هنشوف مع بعض إزاي ممكن نعمل ربطة طرحة مناسبة مع الوش الطويل والرفيع، وزي ما هنشوف أنا عملت للموديل ربطة بالتول منفوشة شوية علشان تدي لوشها امتلاء، وحطيت عليها من قدام إكسسوار عبارة عن عقد ألماظ نازل منه فصوص وفيه وردة، ونازل من النصف دور من السلاسل على شكل دوران، وطبعاً ده مناسب مع الوش الطويل؛ لأنك لو لبستي إكسسوار نازل بالطول هيطوّل وشك أكتر.
وبعد ما ربطت الطرحة الأولى، هجيب طرحة تول تانية طويلة وهثبّتها كويس جداً، وبعد كده هثبّت عليها طرحة تانية قصيرة مطرّزة بفصوص قريبة من شكل التطريز اللي على الفستان.
فيه عرايس كتير بتخاف من الطرحة الطويلة إنها تداري على الفستان، لكن ما تخافيش خالص؛ لأن الطرحة الطويلة موضة جداً، وكمان التول شفاف، وبالتالي هيبيّن اللي تحته.
ده غير إن الطرحة الطويلة بتدّي طول وبتخلي شكل الجسم أرفع، وكمان لو وشك مليان يا ريت تبعدي عن الطرحة القصيرة والمنفوشة؛ لأن شكلها مش هيبقى لطيف.
- الكورساج مناسب مع العروسة الطويلة
بالنسبة لشكل الفستان اللي الموديل لابساه، فهو عبارة عن 3 قطع بادي، وعليه الكورساج وجيب.
والفستان ده طبعاً هيبقى مناسب أكتر مع العروسة الطويلة، أو لو واحدة مليانة من الجزء اللي فوق هيخلّيها تبان أرفع؛ لأن الكورساج نازل بالطول، والجيب قَصّتها زي قَصة السمكة اللي بتكون ضيّقة من فوق ونازلة على واسع من تحت.
وقماش الفستان من تحت عليه رسوم بالسيلفر وفصوص بسيطة أوي متوزّعة عليه، أما البادي والكورساج عليهم شغل وتطريز أكتر، والفستان زي ما هنشوفه شكله رقيق وناعم، وكمان مش هيضايق العروسة في الحركة؛ لأن الديل بتاعه مش طويل أوي، وكمان الفستان نفسه خفيف.
وطبعاً أنا عارفة إن معظم البنات بتحب إنها تلبس فستان عليه تطريز كتير في خطوبتها أو في فرحها؛ علشان مع الإضاءة يبقى شكلها ظاهر، دي وجهة نظر مش باعترض عليها، لكن أنا بافضّل البساطة، وإن خطوط الفستان تبقى انسيابية أكتر زي ما بنشوف في الموديلات الأوروبية.
- الكروشيه موضة في طرحة العروسة
دلوقتي هنشوف شكل جديد للطرحة، استخدمنا فيه الكروشيه المشغول، والشكل ده جديد وغير مكرر، وممكن نستخدمه بإننا نحطه كباندانا.
وعلشان أنا مستخدمة الكروشيه فيه فصوص، فحبيت إن الطرحة من ورا تبقى سادة، ومنفوشة علشان تدي دوران للوش، وبكده تبقى الطرحة أبسط وأسهل في الحركة، وتبقى العروسة حرّة وقادرة تتحرّك بشكل أحسن.
الطرحة بقى من ورا عبارة عن طبقتين من التول السادة؛ لأن أنا حبيت إن الشغل كله يكون على الجزء الأمامي من الطرحة، علشان الطرحة ما تبقاش تقيلة أوي على العروسة.
والربطة دي ميزتها إن الإكسسوار عليها من كل ناحية؛ لأن فيه عرايس بيقابلها مشكلة مع التصوير إن الشغل اللي على الطرحة بيكون على ناحية واحدة بس، والربطة دي بتليق لو لابسة بادي سادة، ومش لابسة أي إكسسوارات من فوق.
- الأورجانزا والتول.. لفستان فرح مُميز
في الفستان ده التطريز على الكورساج بس، والجيب عليها تطريز خفيف، والبادي مطرّز من على الياقة ومن على الكم..
وهنلاقي إن الكورساج من فوق فيه درابيه، بيدي امتلاء للبنت الرفيعة من فوق، أما بقى طريقة توزيع الإستراس الموجود في الكورساج بالجنب بتدي شكل أنحف لمنطقة الوسط.
أما بالنسبة للجيب فهي ملمومة كلها بأبليكة ونازلة بفولونات وكرانيش، والقماش الفستان ده عبارة عن أورجانزا وتول، والقماش ده بيدي شكل حلو ومبهج جداً للعروسة.
وهنلاقي إن التطريز على الجيب مش كتير أوي؛ يعني مجرد حاجة بسيطة على الذيل، وده بيدي للعروسة حرية أكتر في الحركة؛ لأن التطريز الكتير بيتقل الفستان.
وميزة الموديل ده إنه بيداري امتلاء الجسم من تحت؛ لأنه مقسوم لقطعتين.
- طرحة عروسة بشكل جديد
دلوقتي هنشوف موديل جديد ومختلف، هنلاقي فيه إن الطرحة بتتلبس في الإيد، والطرحة دي بتليق على ناس كتيرة، وخصوصاً لو واحدة مليانة من منطقة الأكتاف.
وبالنسبة للفستان فهنلاقي إن الموديل لابسة بادي من تحت الكورساج ومن فوق بوليرو..
وفي ربطة الطرحة استخدمت أكتر من خامة؛ فأنا استخدمت ستان وبعدت عن التول، واستخدمت كروشيه وشيفون مقلّم، وعملت ربطة الطرحة بشكل ملكي شوية.
وبكده يكون خلص عددنا النهارده..
وأتمنّى إن الموديلات اللي قدّمناها تكون عجبتكم..
وإن شاء الله كل عروسة تكون زي القمر يوم فرحها..
بس أهم حاجة إن العروسة تختار المناسب لها وبلاش تجري ورا الموضة..
وفي النهاية أتمنّى لكل أصدقاء "بص وطل"
عيد سعيد،،،
هااااى جيلان أنا عايزة أعرف
هااااى جيلان أنا عايزة أعرف هو السيرم بيستخدم بدل الكريم وينفع استخدمة كل يوم وقبل الاسشوار ولا بعدة وأعمل إيه لشعرى علشان أحافظ عليه من الاسشوار علشان أنا بسشورو على طول وخايفة لحسن يبوظ كفاية كدة علشان انا طولت عليكى سلاام يا قمر.
======================
رد بص وطل :
صديقتى العزيزة بصى السيروم ممكن تستخدميه وشعرك ناشف أو مبلول ونصحتى ليكى إنك تقللى من إستخدام السشوار .
كل سنة وانتم طيبين وبجد موقع
كل سنة وانتم طيبين وبجد موقع جامد ومفيد، ليا عندكم طلب وضروريىىى عرايس كتير الفترة القادمة فممكن ملف كامل من اول الاهتمام بالشعر لحد ازاى اقدر اعمل حمام عروسة تحفة يعنى كل حاجة، بالله عليكم صرورى فرحى ميعاده قرب وماكنتش عاملة حسابى على الميعاد ده خالص وقلقانه موت ومحتاجة مساعدتكم.
===============
رد بص وطل:
طيب تابعينا وبجد هتلاقي مفاجآت كتيرة لكل البنات والعرايس على قمر 14 في الفترة اللي جاية.
هاي كل سنه وانتي طيبه يا جيجي
هاي كل سنه وانتي طيبه يا جيجي والله ذوقك تحفه في كل حاجة
على العموم انا محتاجه مساعدتك في كذا حاجة اولها شعري عاوزه اعمله كيراتين لانه مش بيطول وخفيف هو ناعم بس ضعيف اوي
هيكون بحدود كام كده ومين ممكن يبقى كويس يعمله لي وايه النوع الكويس، تاني حاجة نفسي اخس ومش عارفه بكره شكل جسمي بس بخس وارجع تاني كتيييير لحد ماجسمي ثبت على كده وبدات اكره نفسي اعمل ايه ارجوكي ساعديني وياريت تقولي لنا على لبس للناس المليانه شويه طولت عليكي بس تسلمي على مجهودك.
==============
رد بص وطل:
كل سنة وإنتي بصحة وخير صديقتي العزيزة، وبالنسبة لمشكلة شعرك فأهم حاجة إنك تهتمي بالتغذية المتوازنة الصحية لإن الشعر بيتأثر بصحة الجسم، وبالنسبة للكيراتين فافضل نوع هو النوع البرازيلي لإنه الاصلي ولازم يكون حاصل على موافقة الـ FDA وده ممكن تعمليه عن كوافير يكون معروف ومضمون والسعر بيبدأ تقريباً من 1000 جنيه، أما بالنسبة لجسمك فإنتي لازم تمشي على نظام غذائي صحي ومتوازن علشان تقدري تواظبي عليه ولازم يكون تحت إشراف دكتور متخصص، وبعد كده لازم تمشي على نظام تثبيت علشان تحافظي على الوزن اللي وصلتي له، وتابعينا دايماً لإن كل الموديلات اللي بنقدمها بتكون فيها حاجات بتناسب أصحاب الجسم المليان.
عايزه وصفه او ماركه لتساقط
عايزه وصفه او ماركه لتساقط الشعر لان انا شعرى بيقع وحاسه انى خلاص معنديش شعر مش عارفه اعمل ايه ياريت تساعدينى
=============
رد بص وطل:
لازم تهتمي بأكلك وإنك تحصلي على كل العناصر الغذائية اللي بيحتاج لها الجسم لإن الشعر هو أكتر حاجة بتتأثر بصحة الجسم، وكمان اهتمي بشعرك واعملي له حمام كريم مغذي مرة كل اسبوع على الأقل وبلاش تسرحيه او تغطيه وهو مبلول، ودي وصفة طبيعية ممكن تجربيها وهي عبارة عن بيضة واحدة + معلقة عسل كبيرة + زيت زيتون + زيت جوز هند + زيت صبار + ريحان مجفف (ممكن تجيبيه من عند العطار) + معلقة كبيرة مايونيز، وبتخلطي المكونات دي كلها مع بعض وتحطيها على شعرك وهو ناشف وتسيبيها على شعرك لمدة ساعتين وبعد كده تغسلي شعرك بالشامبو.
هاااى جيلان انا سمعت عن
هاااى جيلان انا سمعت عن الموقع وزرته طلع جامد اوى لو سمحتى انا خطوبتى كمان اسبوع عايزه لفة طرحه مناسبه للخطوبه بليز لو سمحتى وعايزه اعرف ازاى احط ميك اب ميرسى.
==========
رد بص وطل:
طيب تابعينا وإن شاء الله هتلاقي كل اللي إنتي عايزاه في أقرب وقت.
كنت عاوزة اسال على الحبوب
كنت عاوزة اسال على الحبوب اللى بتطلع فى الوجه اعمل ليها ايه علشان تروح.
=============
رد بص وطل:
يفضل إنك ماتلعبيش فيها خالص وماتستخدميش ليها أي علاج إلا بعد ماتستشيري دكتور علشان يديكي العلاج المناسب على حسب طبيعة الحبوب.
السلام عليكم انا شعرى متجعد
السلام عليكم انا شعرى متجعد انا عايزه حاجه تخف التجاعيد وعايزاه يطول متعرفيش اى حاجه لتصغير الانف.
==============
رد بص وطل:
صديقتي العزيزة دي وصفة هايلة جدا هتساعدك على التخلص من تجاعيد الشعر نهائي المكونات:
صفار بيضة واحدة.
نصف ملعقة زيت زيتون.
كوب إلا ربع من الماء الفاتر.
الطريقة:
اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق وبعد كده اغسلي شعرك، وبالنسبة لتصغير الانف فمفيش إلا اللجوء لعمليات التجميل وكمان ممكن تداريها بالميك اب.
هاي جيلان أنا عايزة اسألك علي
هاي جيلان أنا عايزة اسألك علي شوية حاجات هي مية الترمس بتتحط إمتي فبل نزع الشعر ولا بعده وإيه هي المسكات بتاعت الهالات السودة وإيه أحسن مزيل عرق (الماركة)وهل أجيبه سبراي ولا دوارة وإيه علاج السواد تحت الابط وأسفة إني طولت عليكي.
================
رد بص وطل :
صديقتى العزيزة بصى ميه الترمس بتحطيها كل يوم لمدة 3 أسابيع، أما بالنسبه للهالات السودة فإنتى ممكن تحطى شرائح الخيار كل يوم لمدة ربع ساعه، وبالنسبه لمزيلات العرق فممكن تستخدمى دوف أو ليدى سبيد إستيك ودى وصفه طبيعيه ممكن تعمليها عشان تفتحى منطقه تحت الأبط ومكوناتها: زيت زيتون+زيت لوز+دقيق خشن (دقيق البسيسة)
الطريقة:إخلطي كل المكونات دي مع بعضها وإفركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع .
لو سمحتي يا جيلان أنا عندي
لو سمحتي يا جيلان أنا عندي مشكله إن حاولين فمي أصفر كده مع إن وشي صافي ودى مشكله مضايقني ولما بحط ميك أب بتبان برضه يارب تردي عليه بسرعه عشان عندي خطوبه أختي ومش عايزاها تبان ..
=====================
رد بص وطل :
صديقتى العزيزة إنتى لازم تستشيرى دكتور جلديه عشان تعرفى إيه سبب الأصفرار ده وكمان عشان يديكى علاج مناسب .
هاااااى أنا عايزة أعرف ماركت
هاااااى أنا عايزة أعرف ماركت كريم أساس كويسة وهو فعلا لو حطيط كريم مرطب تحت كريم الاساس مش هيضر بشرتى .
=====================
رد بص وطل :
صديقتى العزيزة بصى كريم الأساس أول وأهم حاجه بتحطيها وممكن تحطى كريم مرطب قبل ما تحطى كريم الأساس بربع ساعه ودي من أفضل ماركات الماكياج اللي ممكن تستعمليها وإنتي مطمنة فلوريل ومادينا كيرولان وريمال وبورجوا وكريستيان ديور .
هاى جيلان عندى سؤالين الاول
هاى جيلان عندى سؤالين الاول عندى حمام كريم أسمه كانشوم هل نوعه كويس؟ عايزة أعرف أى نوع من براون سيلك أبيل أحسن وسعرها كام؟
====================
رد بص وطل :
صديقتى العزيزة دى أفضل أنواع حمامات الكريم اللى ممكن تستخدميها(لوريال،دوف) أما بالنسبه لمنتجات بروان فكلها كويسه جداً وممكن تسألى على سعرها وإنتى بتشتريها .
جيلان إزيك وكل سنه وإنتى طيبه
جيلان إزيك وكل سنه وإنتى طيبه بجد إنتى جميله اوى أنا كان عندى سؤال وحبه كمان تتكلمى عن كل حاجه تخصه وهو أنا لما خطيبى يجيلى فى البيت معزوم عندنا مثلا البس لبس خروج ولا بجامات وكده ويوم الخطوبه نفسه بعد ما المعازيم تمشى وهو هيسهر معانا فى البيت وأنا هغير البس البس بجامه لازم تعرفينى كل ده لانى محتاجه ده اوى وكمان سؤال أنا اسفه هو لما احط كريم تفتيح جارنيه لايت وأنا فى البيت وحد عندنا غلط ولا عادى عشان مش فى الشمس اسفه طولت اوى .
======================
رد بص وطل :
صديقتى العزيزة ساره بصى أكيد إنتى ماينفعش تلبسى بجامات قدام خطيبك سواء وهو جاى يزورك أو بعد الخطوبه وممكن تلبسى لبس خروج أو أى لبس بسيط .
هاى جيلان أنا عندى فرح
هاى جيلان أنا عندى فرح وفستانى لونه أصفر فى بينك وعايزه أعرف الميك أب للعين يكون لونه إيه وميرسى ليكى .
======================
رد بص وطل :
صديقتى العزيزة بصى إنتى ممكن تحطى درجات البينك .
أنا عايزة طريقة لازاله الرؤوس
أنا عايزة طريقة لازاله الرؤوس السوداء من على الانف وماسك لتفتيح البشرة الدهنية.
======================
رد بص وطل :
صديقتى العزيزة ده ماسك كويس للتخلص من مشكلة الرؤوس السوداء كل اللي عليك إنك تحطي شوية خميرة على ردة وتعجنيهم بميه ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة وقبل ما تشيليه حاولي تضغطي برفق على بشرتك باستخدام قطنة أو منديل، وبعد كده إفركي بشرتك كويس، وبعدين إغسلي وشك بميه فاترة وبالنسبه لماسك التفتيح فالماسك ده مناسب جداً للبشرة الدهنيه ومكوناته:زبادي+ ليمون.
الطريقة: حطى نقطة أو اثنتان من عصير الليمون على الزبادي.
وحطى الخليط على وشك لمدة ساعتين لحد ما ينشف الماسك وبعد كده إشطفي وشك بالميه .
إزيك ياجيلان كنت عايزه أسالك
إزيك ياجيلان كنت عايزه أسالك بخصوص وصفه التوم والزيت لتطويل الشعر لانى روحت لكوافيره وقالتلى عالوصفه دى فمش عارفه هل كويسه ولا لأ؟ ثانيا أنا خليتها تقصلى شعرى لانه متقصف أوى وكان مقصوص دجراديه قالت لى هقصهولك كاريه علشان يتحسن بس أنا خفت بصراحه وخليتها تعمله دجراديه بالرغم إنها قالت لى إن القصه دى هتقصفلى شعرى برضه أعمل ايه؟ ساعدينى.
=====================
رد بص وطل :
صديقتى العزيزة بصى وصفه التوم كويسه جداً وممكن تستخدميها بس أنا مش عارفه إنتى تقصدى وصفه إيه لتطويل الشعر فاياريت توضحى أكتر، ومن الأفضل إنك تقصى أطراف شعرك كل فترة عشان مشكله التقصيف وده بيكون غير القصه اللى إنتى عايزة تعمليها .
هاى ياجيلان لو سمحتى كنت
هاى ياجيلان لو سمحتى كنت عايزة أعرف أفضل ماسك لتفتيح بشرتى أنا بشرتى قمحى وبتتاثر أوى بالشمس .
======================
رد بص وطل :
صديقتى العزيزة إنتى لازم تستخدمى صن بلوك عشان تحفظى على لون بشرتك وممكن تعملى الماسك ده لأنه بيساعد على تفتيح البشرة ومكوناته:زبادي+ ليمون.
الطريقة:حطى نقطة أو اثنتان من عصير الليمون على الزبادي.
وبعد كده حطى الخليط على وشك لمدة ساعتين لحد ينشف الماسك وبعد كده إشطفي وشك بالميه.
هاي جيلان أنا أول مره أدخل بس
هاي جيلان أنا أول مره أدخل بس بجد عجبني جدا جدا كل المجهود اللي إنتي عاملاه وحبيت أشكرك عليه وكمان اسالك علي شويه حاجات كده بصي انا قرايه فتحتي بعد العيد وهلبس فيها سواريه وعايزه اجيب فستان يكون حلو عليه بس المشكله إني نحيفه جدا (طولي 152ووزني 42 وسني 21سنه)فعايزه حاجه تداري نحافتي ديه وكمان منطقه الصدر عندي صغيره عايزه إستايل معين في الفستان يبرزها ويكبرها شويه عايزاكي تقولي لي ستايل الفستان والالوان اللي بتقترحيها عليه انا لوني قمحي كمان الوان الميك أب
كمان عايزه أقولك إني محجبه واللفه اللي إنتي عملتيها للعروسه ديه برده مش هتليق عليه انا وشي رفيع وطويل ومفيش اي حاجه بتليق معاه نهائي فأنا عايزه اعرف لو انا لفيت اللفه العاديه اللي بربطها وانا خارجه عادي علي الفستان السواريه ده هيبقي شكله وحش عليه أو مش هيبقي مناسب يعني كمان عايزه أسألك علي اللبيليرو اللي العروسه كانت لابساه لو أنا لبست حاجه زي كده في الفستان السواريه بدل البدى لاني دراعي نحيف جدا هتليق عليه ولا ديه للتخان بس معلش طولت عليكي بس ارجوكي ردي عليا ضروري جدااااا
===========================
رد بص وطل :
صديقتى العزيزة ألف مبروك مقدماً، بصى حاولى تلبسى فستان يكون فيه دربيهات كتير فى منطقه الصدر وممكن تلبسى اللون الأحمر أو الدهبى أو الأزرق هيكونوا مناسبين معاكى وطبعاً الميك أب لازم يكون مناسب للفستان، ولو ربطه الأسبنش مش بتكون مناسبه معاكى فإنتى ممكن تربطى الربطه العاديه، وممكن إنك تلبسى بوليرو زى ده بدل البدى وهيكون حلو معاكى .
أنا عندى ندوب حب الشباب وسمعت
أنا عندى ندوب حب الشباب وسمعت أن طين البحر الميت مفيد جدا وبيعالج الندوب أنا كنت عايزه أعرف أجيبه منين وإيه ماركاته الكويسه.
========================
رد بص وطل :
صديقتى العزيزة هتلاقى طين البحر ده عند أى عطار .
hii gigy 3mla a kol sana w
hii gigy 3mla a kol sana w anty tyba, ana isa far7y b3d al3ed alkber 3yza a3rf 2wslk azay 3lshan isa akon 3rosa 3ndk
====================
رد بص وطل :
صديقتى العزيزة ألف مبروك مقدماً وده رقم تليفونى ممكن تكلمينى وتسألى على اللى إنتى عايزاة 0123418020 .
بجد يا جيلان إنتى هايله مش
بجد يا جيلان إنتى هايله مش عارفه أقولك إيه على ذوقك ورقتك وكل سنه وإنتى بألف خير وسعاده ياارب أنا كتب كتابى بعد العيد إن شاء الله بأسبوعين وهيكون فى الجامع ولغايه دلوقتى محتاره موت ومش عارفه ألبس إيه أنا بشرتى بيضاء ومش رفيعه ولا طخينه يعنى متناسقه وطبعاً هكون محجبه فياريت إقتراحاتك لكل حاجه اللون والطرح والميك أب وكله معلش هتعبك معايا يا قمرايه.
==================
رد بص وطل :
صديقتى العزيزة ألف مبروك مقدماً، وإنتى ممكن تلبسى بدله أو تاير وكل الألوان الفاتحه هتكون مناسبه معاكى وحاولى إن الميك أب بتاعك يكون خفيف وكل درجات الروز والموف هتكون مناسبه معاكى وبالنسبه للطرح فإنتى بتختارى الألوان حسب لون لبسك .
azyk bgd shokran awe bas kont
azyk bgd shokran awe bas kont 3ayza as2al law ana bashrty kant safya awe wfag2a kda bd2 masam albashra tfta7 w 5doody bda2 ytl3 feeha 7bob a3mel a aw ast3mel a wana bast3ml olay w garneh
====================
رد بص وطل :
صديقتى العزيزة بصى إنتى لازم تستشيرى دكتور جلديه عشان يديكى علاج طبى مناسب .
كل سنه وإنتي طيبه ياجيلان أنا
كل سنه وإنتي طيبه ياجيلان أنا فرحي كمان شهرين ونفسي في خلطه لتفتيح الاماكن الحساسه.
=======================
رد بص وطل :
صديقتى العزيزة شيماء ألف مبروك مقدمأ، بصى إنتى ممكن تعملى الوصفه دى لأنها بتساعد على تفتيح المناطق الحساسه ومكوناتها:
زيت زيتون+زيت لوز+دقيق خشن (دقيق البسيسة)
الطريقة :إخلطي كل المكونات دي مع بعضها وأفركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.
ممكن تقولي لى حاجة تأخر وتقلل
ممكن تقولي لى حاجة تأخر وتقلل نمو الشعر وهل وضع زيت الزيتون على الصدر بعد الاستحمام بيقوم بتكبيره أو فى تمرينات لتكبير الصدر ولو سمحتى أنا نفسى أخلى شعرى يتقل ممكن تقولي لى أعمل إيه وجزاكى الله كل خير.
========================
رد بص وطل :
صديقتى العزيزة بصى عشان تقللى من نمو الشعر إنقعي ترمس في ميه لمدة 6 ساعات وخدي الميه بتاعته واحتفظي بيها في الثلاجة وادهني منها على إيديك ورجليك وكل مكان عاوزاه خالي من الشعر وإستمري على ذلك لمدة 3 أسابيع يوميا وإن شاء الله هتحسى بفرق، أما بالنسبه لتكبير الصدر فامفيش أى دراسات علميه أثبتت صحه الكلام ده.
تسلم إيدك افكار مكياجك
تسلم إيدك افكار مكياجك يجنن..كل سنه انتي طيبه :)
مساء الخير ياجيلان أنا عاوزة
مساء الخير ياجيلان أنا عاوزة اسألك أنا عينى ضيقة عاوزة أوسعها بس أنا مش بحط ميك أب كتير أنا بحط كحل وبس .
======================
رد بص وطل :
صديقتى العزيزة بصى بلاش تحطى كحل غامق جوة عينك زى الأسود مثلاً وممكن تستخدمى الألوان الفاتحه.
السلام عليكم,كل سنة وإنتم
السلام عليكم,كل سنة وإنتم طيبين أسرة بص وطل, إزيك ياقمر يا جيلان كنت عاوزة اسالك فرحي قريب وموش عارفة لفة الطرحة تكون إزاي لان وشي مدور وعندي خدود, وكمان ألبس فستان الفرح قطعة واحدة ولا 3 قطع أنا طولي 167سم ووزني60وكمان كنت عاوزة اسالك عن الميك أب مائي لماكس فاكتور كويس ولا اللوس باودر والمضغوط أفضل انا بشرتي عادية تنصحيني بايه ياقمر وعاوزة حاجة لتفتيح المناطق الغامقة بالجسم معلش طولت عليكي أرجو الرد.
======================
رد بص وطل :
صديقتى العزيزة ألف مبروك مقدماً، بصى من الأفضل إنك تلبسى فستان قطعه واحدة، أما بالنسبه للميك أب فإبعدى تماماً عن إستخدام الميك أب المائى واللوس باودر أحسن حاجه ودى من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور وبالنسبه لتفتيح المناطق الغامقة فالماسك ده كويس جداً وممكن تعمليه ومكوناته:زبادي+ترمس مطحون+عصير برتقال
الطريقة:إخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده إشطفي جسمك بماء فاتر.
كل سنه وانتى طيبه ياجيجى يارب
كل سنه وانتى طيبه ياجيجى يارب تكونى بخير ان شاء الله انا عاوزاكى تقوليلى التشقير دة مضر ولا مش مضر على البشرة واحدة صحبتى بتشقر بس بالاكسجين وكدة يعنى وبعدين جت قالتلى فى كيس تقشير فى الصيدليه لكل نوع بشرة جابته وعملته وشقر وشها فى الحالتين بيبقى شعر الوجه لونه اصفر وبيبقى باين برضو انا عمرى ماجربت ازيل شعر وجهى قبل كدة بس قولت اجرب هو مش شعر كتير للدرجه ولا حاجه بس قولت اجرب بحيس لما باللف الطرحه فى البيت اسبانيش بيبقى باين وطبعا لونه اسود انا بشوف الفنانين عاملينه بس بيبقى لون غير الاصفر بصى علشان ماطولش عليكى فى حاجه انا مش فاهمه انتى اكيد هتفيدينى فى كدة اكتر منى فشوفى هاتقوليلى ايه عن التشقير انا حاحبه بس انه لون ميكونش باين واكنه لون طبيعى ماشى حاجه تانى انا شعرى فى كسرة وقولت اجرب السيروم وسألتك قبل كدة وقولتيلى3انواع بس لما اتصلت بالعزبى قالى كريستال بيستعمل اكتر مع السشوار زيرو فريز دة بيستعمل اكتر للشعر المجعد صح كدة وفعلا ولا ايه معلش انا عايزة الافادة وهل استخدامه برضو فى ضرر حاجه كمان معلش طولت عليكىروموشى مش متساويه بحس انها مقصفه ولما بحط ماسكار بيبقى شكلها مش حلو اعمل ايه معلش طولت عليكى بس اكيد لما حد بيثق فى حد بيبقى عايز يسئله فى كل حاجه لانه بيبقى فاهم فى الشئ دة ربنا يوفقك ويزيد حب الناس فيكى اكتر واكتر يا قمر
=============
رد بص وطل:
صديقتى العزيزة نورهان بصى إنتى ممكن تستتخدمى بودرة التشقير ودى هتلاقيها فى أى صيدليه، وبالنسبه لشعرك فالكسرة دى بتكون طبيعه شعر بس إنتى ممكن تهتمى بشعرك وتعملى حمام كريم مرتين فى الأسبوع زى لوريال وممكن تستخدمى سيروم زيرو فريز، أما بالنسبه لرموشك فلازم إنك تستخدمى نوع ماسكرا مضمونه زى بورجوا،ريمال، مدينا وكمان ممكن تستخدمى منتجات أوريفلام وكمان فى حاجه ممكن تعمليها كل يوم وهى تغذية رموشك بزيت اللوز أو زيت الخروع أو زيت الزيتون لأنهم مغذيين جدا للرموش بس خدي بالك إن الزيوت دي ما تلامسش عينك، وبالنسبه لقص الشعر فمن الأفضل إنك تقصيه وهو مبلول.
حلوووووووووووووووووة ماشاء
حلوووووووووووووووووة ماشاء الله على الشياكة
السلام عليكم كل سنة وإنتم
السلام عليكم كل سنة وإنتم طيبين بجد ميرسي خالص عالموقع الجميل و للاستاذة جيلان على كل اللي بتقدمهولنا..كنت عايزة اسأل بعد إذنكم إيه أحسن زيت للشعر الجاف..وجزاكم االله خيرا.
======================
رد بص وطل :
صديقتى العزيزة بصى بالنسبه لمشكله جفاف الشعر فأهم حاجه إنك تعملى حمام كريم مرتين فى الأسبوع وكمان لازم تستخدمى شامبو وبلسم مناسبين للشعر الجاف زى بانتين أو هيربل .
السلام عليكم إزيك ياجيلان أنا
السلام عليكم إزيك ياجيلان أنا أول مرة ببعتلك فيها ومحتاجة بجد تردى عليه أنا مشكلة شعرى إنى وانا صغيرة كان حلو جدا وطويل بس لما كبرت شعرى أتغير تماما وبقى هايش على طول وروحت لدكتور وقعدت سنه أخد علاج مش القشرة والحمد لله راحت بس دلوقتى شعرى بقى ناشف جدا وهايش وبعملة حمام زيت 3 مرات فى الاسبوع ومفيش نتيجة ممكن تقولي لى إزاى أعمل حمام الزيت وأحل مشكله الهيشان دى إزاى سورى طولت عليكى بس بجد محتاجاكى تردى عليه باى .
=====================
رد بص وطل :
صديقتى العزيزة بصى إنتى لازم تهتمى بشعرك وتعملى حمام كريم مرتين فى الأسبوع وممكن تستخدمى حمام كريم لوريال وكمان إبعدى عن إستخدام السشوار، وكمان دى وصفه طبيعيه ممكن تعمليها ممكن تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين أعملي بيه حمام زيت لشعرك وبعد كده أغسلي شعرك بالشامبو والبلسم المناسبين لنوع شعرك ،وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر .
السلام عليكم عيد سعيد علينا
السلام عليكم عيد سعيد علينا وعليكي ياجيلان لو سمحتي أنا إن شاء الله فرحي قريب عاوزة حاجة لتفتيح المنطقة الحساسة وعاوزة أسم غسول كويس للمنطقة دي برضه أسفة على التطويل وميرسي ليكي ياجميل.
======================
رد بص وطل :
صديقتى العزيزة ألف مبروك مقدماً، وإنتى ممكن تعملى الماسك ده لأنه بيساعد على تفتيح المنطقه الحساسه ومكوناته: زيت زيتون+زيت لوز+دقيق خشن (دقيق البسيسة)
الطريقة:إخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع، أما بالنسبه للغسول فالازم تستشيرى دكتور عشان يديكى غسول طبى .
لو سمحتى أنا بشرتى دهنيه
لو سمحتى أنا بشرتى دهنيه وبعالجها وفرحى بعد شهر وخايفه إنى أحط كريم اساس فى الفرح يضر بشرتى وأنا مش بحط ميك أب اساسا كتير فممكن تقولي لى على ماركه كويسه لكريم الاساس للبشره الدهنيه وياريت لو تقولي لى على سعره وكل سنه وإنتى طيبه.
=====================
رد بص وطل:
صديقتى العزيزة ألف مبروك مقدمأ وإن شاء الله هتكونى زى القمر ودى من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور .
إزيك يا جيلان أنا كنت عاوزه
إزيك يا جيلان أنا كنت عاوزه أسألك على لبسك لانه منسق وجميل جدا كنت عاوزه اسألك على البضيهات الرقبه الى بتلبسيها بتجبيها منين وبكام وهل بيجى معاها البندانات نفس اللون ولا بتجبيها منين وكنت عاوزه اسألك على الجيلهات الجميله الى بتلبسها منين .
======================
رد بص وطل :
صديقتى العزيزة بصى هتلاقى فى أخر العدد أرقام تليفون محل الملابس والأشاربات ممكن تتكلمى وتسألى على اللى إنتى عايزرة .
لو سمحتى ياجيلان ممكن تقولي
لو سمحتى ياجيلان ممكن تقولي لى المفروض أسيب ماء الترمس على الجسم أد إيه بعد نزع الشعر؟
========================
رد بص وطل :
صديقتى العزيزة إنتى ممكن تسبيه لمدة ساعة .
شكرا لكى وكل عام وإنتى
شكرا لكى وكل عام وإنتى والجميع بصحة وسعادة ياسكر زيادة
هاي ياجيلان إزيك لو سمحتي أنا
هاي ياجيلان إزيك لو سمحتي أنا عندي سؤال بالنسبة لميه الترمس أنا الميه اللي عندي كنت نقعت فيها الترمس لمده يوم وبعد كده حطيتها بالترمس علي النار وغليتها فيا تري تنفع ولا لأ.
===================
رد بص وطل :
صديقتى العزيزة إنتى ممكن تستخدمى الميه دى مافيش مشكله .
هاى جيلان أنا عندى مشكله
هاى جيلان أنا عندى مشكله بشرتى كان لونها فاتح لحد ما وصلت سبع سنين كده وبعد كده رحنا اسكندريه وبشرتى أغمقت من الشمس والبحر ومارجعتش تانى وجسمى بقى فيه مناطق قاتحه ومناطق غامقه ممكن تقولي لى أى حاجه ترجع لون بشرتى وتخلى جسمى كله لون واحد أنا دلوقتى 19 سنه معلش طولت عليكى .
======================
رد بص وطل :
صديقتى العزيزة بصى أهم حاجه إنك تستخدمى صن بلوك وتكون درجه حمايه عاليه عشان تحفظى على بشرتك من أشعه الشمس وممكن تستخدمى بايوديرما، وبالنسبه لتفتيح الجسم فإنتى ممكن تعملى الماسك ده ومكوناته:زبادي+ترمس مطحون+عصير برتقال
الطريقة:إخلطي المكونات دي كلها مع بعضها، وإفرديها على المناطق الغامقة في جسمك، وسيبيها لمدة 10 دقائق وبعد كده إشطفي جسمك بماء فاتر.
إزيك ياجيلان كل سنة وإنتي
إزيك ياجيلان كل سنة وإنتي طيبة وعيد سعيد عليكي لو سمحتي يا جيلان هو أستعمل ميه الورد على الوش 3 مرات في اليوم غلط.
====================
رد بص وطل :
صديقتى العزيزة بصى مافيش مشكله لو إستخدمتى ميه الورد 3 مرات فى الأسبوع .
جيلان أنا عملت صبغة باليت زى
جيلان أنا عملت صبغة باليت زى ماإنتى قولتى لكن فى مشكلة كبيرة أوى ودي مزعلانى جدا حسة إنى ضيعت فلوس فى الهوا أنا دلوقتى شعرى مدى على بنى شوية وأنا وبتاع الصيديلة قالى خدى لون بنى فاتح هيبقى حلو عليكى بس لللاسف جبتها ومش باينة خالص فى شعرى نهائيا أكنى معملتش حاجة مفينفعش أعمل اى حاجة تبين الصبغة دى واسفة على الاطالة بس أنا زعلانة جدا وكل عمال يقول أحنا قولنالك متعملهاش .
========================
رد بص وطل :
صديقتى العزيزة ياسمين بصى إنتى ممكن تكونى جبتى درجه مش مناسبه مع شعرك عشان كده ماتدتكيش اللون اللى إنتى عايزاة، كمان من الأفضل إنك تخلى الكوافير هو اللى يعملك الصبغه .
من فضلك ياجيلان أنا عندي
من فضلك ياجيلان أنا عندي مشكلة في شعري إن أطرافه بتبقى ملفوفة كدة ومموجة زي السوستة غير إن شعري بيبقى طري وجميل في الطبقة الي جوة بس الطبقة الي فوق من برة بتقى ناشفة وهايشة اوي .
======================
رد بص وطل :
صديقتى العزيزة بصى إنتى لازم تقصى أطراف شعرك كل فترة وكمان لازم تواظبى على إستخدام حمامات الكريم مرتين فى الأسبوع على الأقل وممكن تستخدمى حمام كريم لوريال .
كل سنة وانتى طيبة ياجيلان
كل سنة وانتى طيبة ياجيلان حبيبة قلبى كنت عاوزة استفسر عن حاجة أنا لما بقص دوافر رجلى بلاقى مكانها جلد وشكلة مش حلو خالص لكن ضوافرى لسة موجودة فاعمل إيه بحيث أضيع شكل الجلد دة خالص وبالنسبة لايدى حاسة إنها فيها بقع كدة ياريت تقولي لى على حاجة بسيطة أعملها بحيث البقع دي تروح من فضلك وشكرا ليكى وكل سنة وإنتى طيبة .
========================
رد بص وطل :
صديقتى العزيزة بصى ده بيكون جلد زيادة وممكن إنك تحطى رجلك فى ميه دافيه وكمان تحطى كريم مرطب على الجلد الزيادة ده وتستخدمى الحجر الخاص بالقدم وتدعكى بيه رجلك عشان تتخلصى من مشكله الجلد ده، أما بالنسبه لمشكله إيدك إنتى لازم تستشيرى دكتور جلديه الأول عشان تعرفى إيه سبب البقع دى ولو محتاجه علاج .
لو سمحتى أنا عاوزة أجيلك فى
لو سمحتى أنا عاوزة أجيلك فى خطوبة ممكن أعرف عنوانك والاسعار.
======================
رد بص وطل :
صديقتى العزيزة بصى ده رقم الموبايل ممكن تكلمينى وتسألى على اللى إنتى عايزاة 0123418020
شكرا ياجيلان على الميك أب
شكرا ياجيلان على الميك أب والنصايح الجميلة دي بس أنا كان نفسي يكون في إستيل فستان فرح للمحجبات من غير ميكون في بادي تحتية يعني هو نفسة يكون بكم لا شكل البادي بيخرب الفستان كله ياريت لو عندك أفكار أو إستيلات بالشكل دة تعرضيها حتى لو كانت رسومات لاشكال الفساتين دي علشان لو الواحد حب يفصلها لان أكيد مافيش في أي محل بيبيع فساتين فرح بكم وشكرا ليكي كتير .
===================
رد بص وطل :
صديقتى العزيزة روني بصى فى فساتين كتير ممكن تلبسى عليها بوليرو وبيكون شكلها شيك ومناسب جداً بدل البدى وكمان إنتى مممكن تفصلى فستان ويكون بكم .
هاى إزيك ياجيلان كل عيد وإنتى
هاى إزيك ياجيلان كل عيد وإنتى بصحه وسلام أنا خطيبى جابلى مكينه براون لفرد الشعر بس ممكن تقولي لى أستعملها إزاى وكل قد إيه .
=======================
رد بص وطل :
صديقتى العزيزة بصى أعتقد إنك بتسألى عن البيبى ليس وعامه إنتى لازم تستخدميها وإنتى شعرك ناشف تماماً، وطبعاً ماتستخدميهاش كتير عشان متضريش شعرك، وهتلاقى أكيد معاها طريقه الأستخدام .
إزيك يا جيلان كل سنة وإنتي
إزيك يا جيلان كل سنة وإنتي طيبة كنت عايزة اسالك ازاي أعمل حمام الكريم زي الطريقه اللي مكتوبة ولا إيه .
=====================
رد بص وطل :
صديقتى العزيزة بصى عشان تعملي حمام الكريم بتغسلي شعرك كويس أوي بالشامبو المناسب لنوع شعرك وبعد كده توزعي الكريم على شعرك بطريقة متساوية وبكميات كبيرة وتدلكي فروة رأسك بايديكي وبعد كده تغطي شعرك ببونيه للشعر ويكون أحسن كمان لو حطيتي فوطة مبللة بماء ساخن على البونيه عشان الحرارة بتفتح مسام فروة الرأس وتخليها تمتص أكبر كمية من حمام الكريم وتسيبي حمام الكريم على شعرك من 20 لـ 30 دقيقة وبعد كده تشطفي شعرك كويس ، وتنشفيه كويس بفوطة ناشفة..
أنا بستعمل شامبو جونسون وعندى
أنا بستعمل شامبو جونسون وعندى حمام كريم أسمه كانشوم ومع ذلك شعرى مطفى مش بيلمع وبيهيش ممكن تقولي لى أعمل إيه وهل الشامبو وحمام الكريم نوعهم كويس ولا أغيرهم؟ وعايزة أعرف إيه الرولو ده ميرسى ليكى وكل سنة وإنتى طيبة.
=======================
رد بص وطل :
صديقتى العزيزة بصى شامبو جونسون كويس جداً وممكن تستخدميه وإنتى مطمنه وبالنسبه لحمام الكريم فإنتى ممكن تستخدمى لوريال أو دوف، أما بالنسبه للرولو فاده بتلفى بيه شعرك وهتلاقيه عند أى كوافير .
إزيك ياجيلان عامله إيه علي
إزيك ياجيلان عامله إيه علي فكره أنا زعلانه منك عشان أنا كتبتلك سؤالين وجاوبتي علي واحد بس علي العموم أنا هقولهولك تاني بس ياريت تجاوبي عليه أنا كنت قرات ماسك بيتعمل بعد إزاله الشعر ده بيشيل الاثار وبيمنع ظهور الشعر تحت الجلد وهو بيتكون من زيت زيتون + زيت لوز + شبه ومسك + ملح + برتقال + ليمون ويتضرب في الخلاط ويتحط علي المكان المنزوع منه الشعر يا تري الماسك ده كويس ولا لأ وشكرا ليكي.
====================
رد بص وطل :
صديقتى العزيزة أهلاً بيكى وماتزعليش، بس أنا ردت على سؤالك ده، وعامه الماسك ده كويس وممكن تستخدميه بعد إزاله الشعر .
إزيك ياجيلان وعيد سعيد عليكى
إزيك ياجيلان وعيد سعيد عليكى يارب أنا عندى سؤال أنا شعرى لونة بنى غامق قوى وأنا بشرتى قمحية وعنيه خضرة فعاوزة لون صبغة يليق عليه ويفتح وشى وعاوزة أسم شاور للجسم يكون كويس وشكرا ليكى ياقمر.
======================
رد بص وطل :
صديقتى العزيزة بصى إنتى ممكن تعملى صبغه يكون لونها بنى فاتح أو تعملى هاى لايت بنى فاتح، وبالنسبه لسؤلك عن الشاور جيل فممكن تستخدمى منتجات أوريفلام لأنها كويسه جداً .
إزيك ياجيلان كل سنة وإنتى
إزيك ياجيلان كل سنة وإنتى طيبه أنا كنت عاوزة أعرف لو خطوبة وحبيت أعمل عندك ميك أب ولفه طرحه ممكن تقوليلى فى حدود كام والمكان فين وشكرا.
========================
رد بص وطل :
صديقتى العزيزة بصى إنتى ممكن تكلمينى وتسألى على كل اللى إنتى عايزاة وده رقم الموبايل 0123418020
كل سنه وإنتى طيبه ياجيلان
كل سنه وإنتى طيبه ياجيلان يارب تكونى بخير إن شاء الله أنا عاوزاكى تقوليلى التشقير دة مضر ولا مش مضر على البشرة واحدة صحبتى بتشقر بس بالاكسجين وكدة يعنى وبعدين جات قالت لى فى كيس تقشير فى الصيدليه لكل نوع بشرة جابته وعملته وشقر وشها فى الحالتين بيبقى شعر الوجه لونه أصفر وبيبقى باين برضو أنا عمرى ماجربت أزيل شعر وجهى قبل كدة بس قولت أجرب هو مش شعر كتير للدرجه ولا حاجه بس قولت أجرب بحيس لما باللف الطرحه فى البيت أسبانيش بيبقى باين وطبعا لونه أسود أنا بشوف الفنانين عاملينه بس بيبقى لون غير الاصفر بصى علشان ماطولش عليكى فى حاجه أنا مش فاهمه إنتى أكيد هتفيدينى فى كدة أكتر منى فشوفى هاتقوليلى إيه عن التشقير أنا حاحبه بس إنه لون ميكونش باين وكأنه لون طبيعى حاجه تانى أنا شعرى فى كسرة وقولت أجرب السيروم وسألتك قبل كدة وقولتيلى 3 أنواع بس لما اتصلت بالعزبى قالى كريستال بيستعمل أكتر مع السشوار زيرو فريز دة بيستعمل اكتر للشعر المجعد صح كدة وفعلا ولا إيه معلش أنا عايزة الافادة وهل استخدامه برضو فى ضرر حاجه كمان معلش طولت عليكى روموشى مش متساويه بحس إنها مقصفه ولما بحط ماسكار بيبقى شكلها مش حلو أعمل إيه وأخر حاجه شعرى مقصف وهقصه الصح إن الشعر يتقص وهو ناشف ولا وهو مبلول معلش طولت عليكى بس أكيد لما حد بيثق فى حد بيبقى عايز يسئله فى كل حاجه لانه بيبقى فاهم فى الشئ دة ربنا يوفقك ويزيد حب الناس فيكى أكتر وأكتر يا قمر.
====================
رد بص وطل :
صديقتى العزيزة نورهان بصى إنتى ممكن تستتخدمى بودرة التشقير ودى هتلاقيها فى أى صيدليه، وبالنسبه لشعرك فالكسرة دى بتكون طبيعه شعر بس إنتى ممكن تهتمى بشعرك وتعملى حمام كريم مرتين فى الأسبوع زى لوريال وممكن تستخدمى سيروم زيرو فريز، أما بالنسبه لرموشك فالازم إنك تستخدمى نوع ماسكرا مضمونه زى بورجوا،ريمال، مدينا وكمان ممكن تستخدمى منتجات أوريفلام وكمان فى حاجه ممكن تعمليها كل يوم وهى تغذية رموشك بزيت اللوز أو زيت الخروع أو زيت الزيتون لأنهم مغذيين جدا للرموش بس خدي بالك إن الزيوت دي ما تلامسش عينك، وبالنسبه لقص الشعر فمن الأفضل إنك تقصيه وهو مبلول .
