جمالك من الطبيعة مع رانيا.. ماسكات لكل أنواع البشرة والشعر

انا بشرتي فيها حبوب كتير اوي وجربت كل الادويه اللي في الدنيا بس نفسي ادور بجد على حاجه طبيعيه وتكون مفعولها سريع ياريت تنصحوني ايه الاعشاب الطبيعيه المناسبه ليا؟؟؟؟

===============

رد بص وطل:
صديقتي العزيزة تابعينا لإننا بنقول دايماً خلال الحلقات حاجات خاصة بالبشرة اللي فيها حبوب، وهتلاقي في الحلقة دي نصايح للبشرة اللي فيها حبوب، ويا ريت تبعتي لنا تفاصيل أكتر عن طبيعة الحبوب اللي في وشك وهل هي حب شباب أو حاجة تانية علشان نقدر نقول لك على حاجة فعالة لها.

السلام عليكم بجد معلوماتك فادتنى كتير إن شاء الله يضاف فى ميزانك
بس ممكن تساعدينى ازاى اعرف نوع بشرتى أنا بيطلع ليا حبوب حمرا وساعات الاقى وشى بيقشر وميرسي أوي ليكي.

============

رد بص وطل:
ميرسي ليكي إنتي صديقتي العزيزة على ذوقك ورقتك، ونتمنى إنك تتابعينا دايماً وإن شاء الله تلاقي الإجابة على سؤالك في الحلقات اللي جاية.

هاى رانيا كنت عاوزة استفسر منك عن حاجة ايه رايك فى ماسك للبشرة هم عبارة عن نص كوب لبن ونص ليمونة معصورة عليه ومعلقة جلسرين ايه رأيك فيه وكنت عاوزة اعرف الجلسرين اجيبه منين وهل ليه انواع ولا ايه وبالنسبة لليفة الجزء المخصص للبشرة اللى هو اطرى حتة فى الليفة استخدمه لوشى ازاى افتحها نصين ولا بحالها كده ياريت تفيدينى وتردى عليّ

==============

رد بص وطل:
الماسك بتاع الجلسرين والليمون مفيد جداً للبشرة والجسم، بس لازم نستخدمه بالليل، لإنك لو استخدمتيه واتعرضتي به للشمس هيسمر بشرتك، وبالنسبة للجلسرين فإنتي هتلاقيه عند أي عطار بس يكون عطار مضمون وكويس أما بالنسبة لليفة فإنتي بتقصيها بالطريقة اللي إنتي عايزاها، وبتعملي بها مساج رقيق على بشرة الوجه.

عاوزه حاجه لتطويل الشعر لانه كان طويل وقصر.

===============

رد بص وطل:
طيب تابعينا وإن شاء الله هتلاقي كل اللي إنتي عايزاه في اقرب وقت على قمر 14.

جميل

الموقع جمييييييييل

انا كنت عايزه اسال ممكن استخدم ماء الورد المركز للتنظيف اليومي للوجه ولا لا.

=============

رد بص وطل:
ممكن تستخدمي ماء الورد العادي وتخلطيه مع ترمس مطحون وتستخدميه يومياً على بشرتك.

ليا سؤال عندك يا روني، انا عندي زيت زيتون بس بقى له فتره كبيره هل كده ممكن يكون باظ ولا الزيوت مش بيحصل لها حاجة، انا كنت هستخدمه في وصفه لشعري؟

==============

رد بص وطل:
علشان تتأكدي إن الزيت لسه صالح للأستخدام لازم تشمي ريحته لو كانت ريحته عادية يبقى استخدميه، لكن لو ريحته متغيرة أو مزنخة يبقى الزيت ده مش كويس.

السلام عليكم ورحمة الله وبركاته ياريت يا رونى تبقى تقولي لنا صابون كويس للبشرة الجافة أو غسول الأحسن فيها وتقولي لنا أسامى معينة أو تعملي لنا طريقة صابونة زى بتاعة الجسم، وكذلك تقول لنا شامبو للشعر الجاف يكون كويس انا بستخدم شامبو من ماى واى اسمه ميلك اند هنى مش عارفه كويس ولا لأ.

===============

رد بص وطل:
فيه أنواع صابون كتير كويسة زي دوف ولمبادو، وتابعينا لإننا في الحلقات اللي جاية هنعمل صابون حلو جداً للبشرة، وبالنسبة للشامبوهات ممكن تستخدمي النوع ده او بانتين للشعر الجاف أو هيربل اسينسز.

شكرا على الوصفات، بس انا عندى بثور سودا ومحتاجة علاج ليها ياريت لو تساعدينى.

==============

رد بص وطل:
صديقتي العزيزة ممكن تعملي ماسك الترمس والردة اللي قولنا عليه في الحلقة اللي فاتت، وتابعينا لإننا هنقول ماسكات أكتر لعلاج الموضوع ده.

ببعت لك للمرة التالتة هو انتم مش بتنشروا سؤالي ليييييه؟؟ ده سؤال عادي والله نقول كمااان هل الكيراتين ده كويس فعلا ولا مضر للشعر؟؟ يا ريييييت تردي عليّ المره دي.

===============

رد بص وطل:
بنعتذر ليكي صديقتنا العزيزة على التأخير، لكن إحنا ردينا عل السؤال ده قبل كده، وعموماً الكيراتين فيه ناس كتير بتعمله وبيجيب معاهم نتيجة كويسة، لكن انا شخصياً مش باشجعه أوي، وممكن إنك تستخدمي شامبوهات أو حمامات كريم اللي بتحتوي على الكيراتين المغذي للشعر لإنها مفيدة جداً، والمنتجات دي هتلاقيها في الصيدليات الكبيرة زي سيف والعزبي.

انا كنت في سوبر ماركت كده ولقيت تونيك للشعر من فازلين وسمعت انه كويس فياريت تقولي لي رايك ايه فيه ويعني ايه تونيك للشعر أساساً.

===========

رد بص وطل:
منتجات فازلين كويسة، لكن زي ما قولنا قبل كده أكتر من مرة إننا ماينفعش نسيب أي نوع من الدهان على شعرنا لمدة أكتر من 24 ساعة يعني لازم نغسل شعرنا بعد ما نحطه، يعني بالطريقة دي هتحتاجي إنك تغسلي شعرك بالشامبو يومياً، وده طبعاً هيضر شعرك، علشان كده من الأفضل إنك تعملي لشعرك حمام زيت أو كريم مرتين في الأسبوع، من الماسكات اللي قولنا عليها.

السلام عليكم معلش ممكن تساعدينى أن أعرف نوع بشرتى هى بيجى عليها وقت وبيطلع فيها حبوب حمرا صغيره ووقت بلاقيها كويسه وكتير أوى الاقيها بتعمل قشور ولما أحط عليها أى كريم بحس إنه بيلسع ومتشكره أوى ليكى .

====================
رد بص وطل :
صديقتى العزيزة بصى إنتى لازم تتحدى نوع بشرتك عشان تعرفى إيه التكنيك المناسب للعنايه بها وتابعينا عشان هتعرفى ده من خلال الأعداد القادمة .

مرسي كتييدير علي الوصفات بس هنتعبك بقي شويه عاوزه وصفه فعاله وذات نتائج ملحوظه لمنع نمو شعر الجسم وكمان وصفه تصلح لتبيض جميع الاماكن الغامقه بالجسم ومعلش بقي وصفه لغلق مسام الجسم والوجه.

======================
رد بص وطل :
صديقتى العزيزة أهلاً بيكى وتابعينا عشان هتعرفى الرد على سؤالك قريباً إن شاء الله .

السلام عليكم يا رانيا: أنا كان عندى سؤال بشرتى بدأت تبقى شاحبة جدا من غير ماكياج أنا متعودة 10 سنين على وضع الماكياج يوميا كامل عند الخروج وبحاول دلوقتى أبطله عشان بجد تعبت منه وخايفه على بشرتى بس مشكلتى الهالات السودا اللى بقت واضحة جدا وزادت مع وضع الماكياج عايزة حاجة للهالات السودا وحاجة لشحوب البشرة أنا سنى 27 سنه.

===========================
رد بص وطل :
صديقتى العزيزة أهلاً بيكى، وبالنسبه لسؤالك هتلاقى فى العدد اللى فات ماسك للهالات السودة ممكن تسعمليه وكمان هتلاقى فى العدد ده ماسك مناسب لكل أنواع البشرة وده بيدى للبشرة نضارة ونعومه وبيروق البشرة ممكن تعمليه وتابعينا عشان هيكون فى ماسكات كتير لكل مشاكل البشرة .

عاوزة أعرف أسم كريم تشقير طبي لشعر الوجه مع العلم إن بشرتي حساسة وعاوزة أعرف ماركة سيروم للشعر كويسة شكرا.

=====================
رد بص وطل :
صديقتى العزيزة بصى كريمات التقشير ممكن تسببلك إلتهاب فى بشرتك خاصه إنها حساسه، وبالنسبه للسيروم فإنتى ممكن تستخدميه .

هاى رانيا أنا سمعت ان غسل الشعر بالماء العادى بعد الماء الساخن بيمنع التساقط ومفيد للشعر؟ فهل الكلام ده صحيح ولا خطأ
وشكرا مقدما لردك.

=========================
رد بص وطل :
صديقتى العزيزة الكلام ده مالوش علاقه بسقوط الشعر أو لأ، أهم حاجه إنك تعملى ماسكات مناسبه لنوع شعرك بنفس الطريقه اللى هتلاقيها فى العدد.

حبيبتي رانيا شكراً على تعبك ومجهودك معانا عاوزه اسالك سؤال بس الله يخليكي ردي عليّ ضروري انا عاوزه اعمل شعري كيراتين لأنه هايش على طول يا تري هيضر شعري في حاجه؟ ولو نصحتيني بيه ممكن تساعديني وتقولي لي على مكان مضمون عشان انا معرفش حد ولا اصحابي كمان، شكراً ليكي مره كمان وفي انتظار ردك.

==============

رد بص وطل:
ميرسي ليكي صديقتي العزيزة على ذوقك، وبالنسبة للكيراتين ففيه ناس كتيرة بتعمله وبيجيب نتيجة حلوة معاهم بس انا شخصياً مش بأؤيده لإنه مش مضمون على الصحة مهما كان غالي وماركة معروفة، لكن فيه شامبوهات ومنتجات كتيرة بتحتوي على الكيراتين المغذي للشعر وده مفيد جداً وممكن تستخدميه وهتلاقي المنتجات دي في الصيدليات الكبيرة والمعروفة زي سيف والعزبي.

السلام عليكم بعد إذنك كنت عايزة أعرف ماسك بذرة القطون بحطة أد إيه تحت العين وسؤال تانى من فضلك أنا عملت حنة جلورى سودة ولونها طلع وحش ورحت عشان أصبغ منفعش وجبت كركم وشيح البابونج وحنه بردة مطلعش أى لون أفتح بى شعرى أرجو مساعتك عشان أغير لون شعرى شكرا جزيلا فى أمان الله .

=====================
رد بص وطل :
صديقتى العزيزة إنتى بتحطى ماسك بذرة القطون حوالى ساعه، وبالنسبه لمشكله شعرك تابعينا عشان هتعرفى الرد قريباً إن شاء الله .

السلام عليكم هى وصفة زيت الجرجير والثوم وجوز الهند تتعمل كام مرة فى الأسبوع علشان تجيب نتيجة كويسه بالنسبالى كولد.

======================
رد بص وطل :
صديقى العزيز إنتا ممكن تعمل الوصفه دى مرتين فى الأسبوع .

السلام عليكم ورحمة الله وبركاته مين الاحسن للشعر الجاف البلسم ولا حمام الكريم ولا حمام الزيت ولا السيروم ومعلش ياريت تبقى كل ماسك تقولى نعمله كام مرة فى الاسبوع سواء للوجه أو الشعر .

=====================
رد بص وطل :
صديقتى العزيزة تابعينا عشان تعرفى التكنيك المناسب للعنايه بالشعر الجاف .

السلام عليكم ورحمة الله وبركاته أنا بشرتى جافه وبغسل وشى الصبح بلوفه برغيها بصابونه اللى هى البيضه بتاعه أيام زمان ناس قالولى إنها مفيده فمش عارفه استخدم صابونه إيه ولا غسول علشان بشرتى متبظشى .

======================
رد بص وطل :
صديقتى العزيزة بصى أهم حاجه إنك تستخدمى صابونه مناسبة مع نوع بشرتك .

شكراً على الوصفات بس عايزه أعرف إيه هى أفضل أنواع العسل ياترى العسل اللى بيتباع بالسوبر ماركت ينفع ولا لاء ؟

======================
رد بص وطل :
صديقتى العزيزة إنتى ممكن تستخدمى العسل اللى موجود فى السوبر ماركت .

بجد شكرا اووووي علي الوصفات الجميله دي بس انا كنت عايزه اسالك هو انا ممكن استخدم ماء ورد مركز على بشرتي للتنضيف اليومي وانا بشرتي مختلطة.

============

رد بص وطل:
ماء الورد مفيد جداً للبشرة وممكن تخلطيه مع الترمس، وتغسلي به بشرتك كل يوم.

يا جماعة فين جيلان هى راحت فين انا شوفتها امبارح في الرحاب وقالت لى هى مش عارفة ليه استبعدوها من بص وطل يا جماعة عاوزين جيلان هى اد ايه حد جميل ومحترمة وحبوبة جدا واولادها ماشاء الله ربنا يخليهم لها وابنها شيك وذوق زيها بليز يا جماعة عاوزين جيلان.

==============

رد بص وطل:
صديقتي العزيزة مفيش حد قال إن جيلان مش معانا، وهي الفترة دي بتجهز لحلقات جديدة خاصة بالموقع.. تابعينا قريباً جداً.

عايزه وصفه لتخسيس البطن فى أسبوع وياريت الاقى الحل مش تأجلونى.

====================
رد بص وطل :
صديقتى العزيزة إنتى لازم تمارسى الرياضة لفترة عشان مشكله بطنك وكمان تمشى على نظام غذائى مناسب وده بيكون محتاج لوقت .

طبعا ميرسى ليكم ولتعبكم معانا انتم بتتعبوا بس أنا فى حاجه مضايقانى خالص انتم ليه مش بتردوا على الناس، الناس دى محتاجة لكم اوى ماتركننوناش كده على الرف لحد ما يجى العدد اللى محتاجينه تكون الناس خلاص قربت تموت من كتر المشاكل طبعا بعد الشر على أى حد بس كده ربنا معاكم.

=========

رد بص وطل:
صديقتي العزيزة إحنا بنرد فعلاً على كل المشاركات اللي بتوصل لنا، لكن فيه بعض المشاركات بتكون حلولها موجودة بطريقة عملية في الحلقات، فالأفضل إن الناس تشوف الطريقة بنفسها وبطريقة عملية، بالإضافة إلى إننا بنعمل حلقات خاصة للرد على أسئلة الناس، فتابعينا وابعتي لنا كل اسئلتك وهتلاقي الرد عليها في أسرع وقت.

السلام عليكم أنا بشرتى دهنية ممكن أستخدم منتجات غارنيه ممكن أعرف أسم كريم أستخدمه لما أخرج وشكرا .

====================
رد بص وطل :
صديقتى العزيزة منتجات غارنيه كويسه وممكن تستخدميها وبالنسبه للبشرة الدهنيه فاتبعينا عشان تعرفى الرد على سؤالك .

شكراااااا جزيلاً لكى أريد وصفة لتجاعيد العين وشد البشرة.

===========================
رد بص وطل :
صديقتى العزيزة تابعينا وهتلاقى كل الوصفات اللى إنتى عايزاها قريباً .

هاى رانيا مرسى أوى على الحاجات الجميلة اللى بتقوليها كونت عاوزة أسئل سؤال هل كريم بى وايت لتفتيح البشرة ليل ونهار حلو ولا ضار للبشرة .

=========================
رد بص وطل :
صديقتى العزيزة شكراً على ذوقك، بصى كريم الليل والنهار مش بيستخدم للسن الصغير يعنى بنبدأ نستخدم كريم الليل والنهار من سن 35 سنه أو أكتر ولو عايزة تفتحى بشرتك ممكن تستخدمى ماسكات طبيعيه وتابعينا عشان تعرفى الماسكات دى .

أنا مبسوطة إنى بشارك معاكم ياريت أعرف مزيل عرق ماركة كويسة ما تعملش أى التهابات وإيه هى الوصفات الطبيعية اللى ممكن أستعملها لازالة رائحة العرق من الابطين وأشكركم جدا.

=======================
رد بص وطل :
صديقتى العزيزة منى بصى الماركات دى كويسه ومضمونه وممكن تستخدميها وإنتى مطمنه دوف، نيفيا وبالنسبه للوصفات الطبيعيه فاتبعينا عشان وهتلاقى الرد على سؤالك قريباً إن شاء الله .

ميرسي يا قمرايه علي كل الوصفات الهايله دي وعايزه أعرف ماسك للهالات السودة اللى تحت العين ومش عارفه أوصل إزاي للأعداد اللى قبل كده.

=======================
رد بص وطل :
صديقتى العزيزة شكراً جداً على ذوقك، وعشان توصلى للعدد اللى قبل كده بتدخلى على الصفحه الرئيسيه لصحه وجمال وهتلاقى كل الأعداد القديمه .

ميرسي أوى ياقمر على الماسكات الجميلة دى وإن شاء الله تكون مفيده لكل البنات بس أنا عندى مشاكل كتير فى بشرتى ومش عارفه أتخلص منها أنا بشرتى دهنية والمسام وسعة جدا وشكلها بيضيقنى وكمان الحبوب مش بتروح خالص وطبعا بقع ومشاكل كتيير ومش عارفة أعمل إيه وعلى فكرة أنا عروسة وفرحى فى الصيف ياريت تسعدينى.

========================
رد بص وطل :
صديقتى العزيزة أهلاً بيكى وألف مبروك مقدمأ وتابعينا عشان هيكون فى عدد عن كل مشاكل البشرة .

السلام عليكم ورحمة الله وبركاته جزاكى الله خيرا يارونى على الوصفات الجميله ومستنيين الكتير منك فى صيدلى بيعمل وصفه للتبييض بالكريمات تفضل كذا سنه مش عارفه أجيبها ولا أتابعك فى الوصفات الطبيعيه وهل الكريمات فعاله أكتر ولا الماسكات مين فيهم الافضل والاسرع معلش الشفايف عايزاكى تكتبى حاجه تخلى لونها محمر كده ووردى وحاجه كويسه وفعاله تضيع سمار الشفه العلويه وفى أقتراح يارونى إنك تمسكى كل حاجه على حده وتعمللها ملف كل نوع بشره مثلا تجيبى كل شىء عنها ترطيبها وتفتيحا ونضارتها كذلك كل نوع شعر تطريته ونعومته وتطويله وفى استفسار أنا شعرى جاف ومقصف وهايش بس لما أعمله كحكات وأحطله زيت كويس بيبقى مفرود وحلو وأنا نفسى إنى أصبغه وقصه دجرديه فهل ممكن مع الوصفات اللى بتكتبيها ييجى اليوم اللى شعرى يبقى كويس وأقدر أقصه براحتى ولا هضطر إنى أفرده علشان أقصه لأنه مبيبقاش كويس إلا بالكحكه ولازم يكون ملموم ومش قصير معلش يا قمر تردى على جزئيات السؤال كلها ومعلش جدا للاطاله .

=========================
رد بص وطل :
صديقتى العزيزة أهلاً بيكى، بصى الماسكات الطبيعيه مالهاش أى أضرار وبتكون مفيدة جداً بس أهم حاجه إنك تستمرى فى إستخدامها ,وإن شاء الله يكون فى عدد عن كل أنواع البشرة والماسكات المناسبه ليها وكمان عن كل مشاكل الشعر وهتلاقى فى العدد ده ماسك للشعر وهو بيعالج مشاكل كتير وكمان مناسب لكل أنواع الشعر .

بجد مرسي اووى يارانيا على الاضافات والحاجات الحلوة دى أتمنى ليكى مزيد من النجاح وبجد إنتى هايله وأنا متبعاكى بس ليه طلب صغير عند حضرتك أنا عايزة سيادتك توضحى فى الحلقات اللى جايه ليه ولكل البنات طرق لتفتيح الاماكن الغامقه فى الجسم وتكون طرق ووصفات سريعه وفعاله وجزاكى الله كل خير.

=========================
رد بص وطل :
صديقتى العزيزة أهلاً بيكى وشكرأ جداً على ذوقك وتابعينا عشان هتلاقى كل الوصفات اللى إنتى عايزاها قريباً إن شاء الله .

أنا باستخدم شامبو بانتين وبديل الزيت بتاعة ولكن شعرى أول يومين بعد الاستحمام ووضع بديل الزيت بيكون كويس بعد كده الشعر بينشف قولي لى أستخدم إيه دهان للشعر.

======================
رد بص وطل :
صديقتى العزيزة تابعينا عشان تعرفى كل الماسكات المناسبه لمشكله شعرك .

بجد وصفات هائله جدا أنا كنت عايزة أطلب منك طلب أنا فرحى بعد ثلاث شهور وعايزة أعرف أعتنى ببشرتى إزاى وشعرى إزاى وعايزة أعرف منك هل زيت الزيتون ممكن نعمله حمام زيت وإزاى نعمله أنا أسفه إنى طولت عليكى ونفسى أعرف حل الهالات السوداء لانها مشكله جامده عندى لانى بيضاء وظاهرة عندى أوووى هل بذرة القطونه ده فيها ضرر على البشرة الحساسه جدا أرجوا الرد سريعا وشكرا أوووى .

=====================
رد بص وطل :
صديقتى العزيزة أهلاً بيكى وألف مبروك مقدماً، بصى إنتى هتلاقى فى العدد ده الطريقه الصحيحه عشان تعملى حمام الزيت وزيت الزيتون كويس جداً بس تابعينا عشان تعرفى ممكن تستخدمى زيت الزيتون مع زيوت تانيه، وبالنسبه لبذرة القطونه فهى طبيعيه وممكن تستخدميها .

أنا بشرتي دهنية بس بتبقي جافة في الشتي عايز ماسك مرطب.

======================
رد بص وطل :
صديقتى العزيزة تابعينا وهتلاقى حل لمشكله بشرتك قريباً .

هاى رانيا ميرسى بجد على المعلومات الجميله دى ولو سمحتى أنا دلوقتى لما بحط حمام الكريم على شعرى وأنا بحطة كده الاقى شعرى بينزل فى إيدى وأنا بغسله بردة, فأنا مش عارفة دة بقى لان نوعيته مش كويسه ولاعيب فى شعرى هو أسمة cream special وهو إيطالى الصنع ودة اللى خلانى أجيبه بس هو على فكرة مكتوب عليه حمام زيت وهو بالنخاع فياريت لو أنا بعمل حاجة غلط أو إنتى شايفة إن النوع دة مش كويس تقولي لى مع العلم إنى جربت واحد تانى بردة وبيحصل نفس مشكلة سقوط الشعر دى واللى مخلينى مستغربة ان مابيحصلش كده لو حطيت زيت عادى على شعرى؟!!!!

=========================
رد بص وطل :
صديقتى العزيزة هتلاقى فى العدد ده الطريقه الصحيحه عشان تعملى حمام زيت، وإنتى ممكن تعملى حمام الزيت اللى موجود فى العدد ده وتابعينا عشان هتلافى ماسكات كتير مناسبه لشعرك .

السلام عليكم أنا عندى مشكلة بجد خنقانى وخايفة أتجوز بسببه, أنا تقريبا كل جسمى فيه خطوط بيضا وأنا مش عارفة أعمل فيها إيه لانها مشوهه جسمى خالص .. ياريت تقولي لى على حل ولو لها حل يبقى خلال أد إيه يجيب نتيجة.

===========================
رد بص وطل :
صديقتى العزيزة أهلاً بيكى وبالنسبه لسؤالك تابعينا عشان هتعرفى الرد قريباً إن شاء الله .

السلام عليكم لو سمحتى كنت عاوزة ماسك للمسام الواسعه فى البشره وتفتيح أو تنضيف شكرا.

===========================
رد بص وطل :
صديقتى العزيزة تابعينا وهتلاقى الرد على سؤالك قريباً .

اريد ان اسال هل صحيح ان الحلبة والخميرة اذا وضعت على البشرة كماسك تنفخ الخدود وشكراً جزيلا.

============

رد بص وطل:
صديقتي العزيزة الحلبة والخميرة من المواد المغذية جداً والمفيدة للبشرة ومش بتنفخ الخدود.

هاي رانيا إزيك عامله إيه لو سمحتي ياروني الماسك بتاع الشعر ده هل ينفع للي عندها فراغات في الشعر واللي شعرها خفيف وهل ممكن برده بينبت الشعر ولا إيه وياريت تقولي لي علي حاجه بتنبت الشعر لان بجد شعري مليان فراغات كتيييير ويكون بسرعه وميرسي ليكي .

========================
رد بص وطل :
صديقتى العزيزة بصى الماسك ده كويس جداً وبيساعد على إنبات الشعر، وتابعينا عشان هيكون فى ماسكات كتير لكل مشاكل الشعر .

إزيك يارانيا يا قمر...وميرسى على العدد الهايل ده كنت عاوزه أعرف بس أحنا بنحط معلقه زيت ثوم واحده زيت جرجير ولا بنزود زى ماأحنا عايزين يعنى لو حطيت معلقتين من الجرجير يبقى أحط معلقتين من الثوم على حسب كثافه الشعر وكمان لو سمحتى عاوزه أعرف إيه هو الصن بلوك ده وإزاى أقدر أعرف نوع بشرتى ..والشامبو المناسب لشعرى أعرفه إزاى كمان وشى بيعرق كتير بالذات وأنا خارجه وبيخلى شكله وحش أعمل إيه عشان العرق ده...ومعلش طولت عليكى.

=====================
رد بص وطل :
صديقتى العزيزة أهلاً بيكى وشكراً على ذوقك، بصى إنتى ممكن تزودى الزيت بس بنفس الكميه، وبالنسبه للصن بلوك فهو واقى من الشمس وبتستخدميه قبل ماتتعرضى للشمس، وبالنسبه لنوع البشرة فاتبعينا عشان تعرفى إزاى تحددى نوع بشرتك وكمان هتعرفى الحل لمشكله العرق، ودى أفضل ماركات الشامبو اللى ممكن تستخدميها بانتين، هيربل، دوف .

هاى انا عاوزه اعرف جيلان فين هترجع تانى ولا ايه انا عاوزه اسال كام سؤال وبليز الرد بسرعه عاوزه اعرف الفرق بين التونر والتونك وبيتحط امتى وماركه غسول كويسه للبشره العاديه وكمان ماركه اولاى كويسه لكريم الليل والنهار وكريم العين وايه فايده كريم العين وكمان انا عاوزه فاونديشن يثبت ومايسيحش لان رغم ان بشرتى عادى بس لما بحط اى كريم بيسيح عاوزه اعرف كيرولان الفاونديشن واللوس بودر كويس ولا ايه وكمان بيثبت وعاوزه اعرف الغسول بيتحط كل اد ايه ومزيل مكياج جونسون كويس ولا فيه احسن والروتين اليومى اللى هو كريم الليل والنهار والغسول والتونر بس بليز بلاش حاجات طبيعيه علشان مبيجيش ليا طول بال خااااااالص واسفه انا طولت اوى.

=================

رد بص وطل:
صديقتنا العزيزة أهلاً بيكي وبكل أسئلتك في أي وقت، وبالنسبة لمدام جيلان فهي مسنمرة معانا وهي بتحضر لحلقات جديدة علشان تنزل على بص وطل في أقرب وقت، وبالنسبة للفرق بين التونر والتونيك فمفيش أي فرق بينهم والاتنين بيستخدموا لقبض مسام الوجه، وبلاش تستخدميهم طول الوقت يعني ممكن تستخدميهم قبل الميك اب، أما بالنسبة لكريمات الليل والنهار وكريمات العين فهي كويسة ومفيدة لكن لسن فوق الثلاثين لكن لو كنتي لسه في العشرينات فمش بانصح خالص باستخدام المنتجات دي، يعني ممكن نستخدم كريمات ترطيب عادية وغسول مع المنتجات الطبيعية اللي بنقول عليها، وممكن تستخدمي غسول من منتجات ديور أو نيفيا، أما بالنسبة للميك اب فممكن تستخدمي منتجات زي كيرولان أو ميك اب فور ايفر أو أي حاجة من المنتجات المعروفة زي ريمال أو بورجوا بس تكوني متأكدة إنها منتجات أصلية وتجيبيهم من مكان مضمون.

إزيك ان شالله تكوني بخير.. أنا كنت عاوزة أعرف فى ماسك الترمس ده الترمس المطحون بيبقى ترمس عادي وبيتطحن ولا ترمس عادي وبيتسلق بعدين أطحنه ولا هو بيجي مطحون اصلا؟؟؟

=====================
رد بص وطل :
صديقتى العزيزة الترمس المطحون ده هتلاقيه عند أى عطار وبيكون جاهز للأستعمال .

أنا كنت عايزة أعرف حاجة أنا بغسل شعري وبعديه بدهنه بسيرم زيرو فريز هو كده كويس و لامضر أصل أنا سمعت إن الكريمات والسيرم مش بتخلي الشعر يفرز زيوته الطبيعيه.

======================
رد بص وطل:
صديقتى العزيزة بصى مش أى حاجه ينفع تحطيها فترة طويله على شعرك، والسيروم مافيهوش مشكله بس هو ممكن يلم تراب على شعرك ومن الأفضل إنك تستخدمى المستحضرات الطبيعيه .

بجد إنتي قمر قمر قمر ومنورة الموقع وخلاص بقيتي مثلي الاعلي في الاجمال والاناقة أنا عندي كام حاجة عايزة اسال عليها أنا عندي 16 سنة و بروح المدرسة كل يوم فعايزة اسال حضرتك أحط صن بلوك ولا لأ مع إني بحط كونسلير عشان عندي سواد تحت العين وعايزة أسال حضرتك أعمل إيه عشان سواد اللي تحت العين يروح وأنا ممكن أعمل ماسك إيه ينفع لسني وكنت عايزة أعرف هو أنا لما بعمل حمام زيت بغسل شعري بعديه ولا لأ عشان حضرتك عارفة طبعا إنه ممكن يكون مزيت و محطش علي الشعر خالص وأحط علي الجذور وشكرا جدا ياقمر الموقع .

======================
رد بص وطل :
صديقتى العزيزة أهلاً بيكى وشكراً على ذوقك وأتمنى إنك تستفيدى من كل موضوعات قمر 14، ولازم قبل ماتتعرضى للشمس تحطى صن بلوك عشان تحمى بشرتك، وبالنسبه للهالات السودة اللى تحت العين هتلاقى فى العدد الأول ماسك كويس جداً عشان المشكله دى، وبالنسبه لحمام الزيت فإنتى طبعاً بتغسلى شعرك بعديه وهتلاقى فى العدد ده الطريقه الصحيحه عشان تعملى حمام الزيت .

بجد ميرسى ياقمر بس أنا عايزه حاجه تكثيف الشعر وعايزاكى تقولى طريقة حمام الزيت المظبوطه وميرسى ليكى.

===================
رد بص وطل :
صديقتى العزيزة إنتى ممكن تستخدمى حمام الزيت اللى موجود فى العدد ده وهتلاقى الطريقه الصحيحه عشان تعملى حمام زيت فى نفس العدد، وتابعينا عشان هتلاقى وصفات كتير عشان تكثيف الشعر .

لو سمحتي عاوزه الرد ضروري أنا عندي حبوب شباب لو راحت فضل بقع حمراء علي وشي بقي وشي بيقشر مش عارفه أعمل إيه.

=======================
رد بص وطل :
صديقتى العزيزة تابعينا وهتلاقى الرد على سؤالك قريباً إن شاء الله، وهتلاقى فى الأعداد القديمه عدد بأسم الحل لكل مشاكل بشرتك بطرق طبيعية، ههتلاقى فيه ماسك مناسب لمشكله البقع .