جمالك من الطبيعة مع رانيا.. ماسكات للعناية بالبشرة والشعر في الخريف

النهارده هنتكلِّم عن فصل الخريف والمشكلات اللي بيسبّبها للبشرة والشعر والجسم، من جفاف وتشققات وشعر باهت

أهلاً وسهلاً في حلقة جديدة من حلقات “جمالك من الطبيعة مع رانيا”…

تابعونا،،، 

لوشن لترطيب الجسم
اللوشن ده هنعمله من نوعين من الزيوت بيعتبروا من أحب الزيوت للبشرة؛ وهما: زيت الورد وزيت اللوز الحلو…

وعايزة أقول لكم إننا لما نيجي نشتري زيوت، علشان نتأكّد إنها كويسة لازم نشتريها من عند عطار كويس ومضمون، ونشم رائحته كويس؛ لأن رائحة الزيت بتدل على صلاحيته وجودته، وكمان لونه؛ فمثلاً زيت اللوز الحلو بيكون لونه أصفر، وزيت الورد بيكون لونه أبيض شفاف، وريحة الورد ظاهرة جداً فيه..

وطريقة تحضير اللوشن بتكون كالتالي:
بنجيب زجاجة، وبنملأها لغاية الربع بزيت الورد، ونكمّل عليه بزيت اللوز الحلو، وبعد كده نرج الزجاجة كويس جداً.

واللوشن ده بنستخدمه بعد الحمام، بعد ما تكون البشرة اتعرّضت لكمية كبيرة من البخار، وبعد كده نبدأ ندهن جسمنا باللوشن، ويُفضّل إننا ما نجففش الجسم أوي قبل ما ندهن اللوشن، وكمان لازم نرج اللوشن كويس أوي قبل الاستخدام.

وبنعمل مساج رقيق للجسم بأطراف الإيد من تحت لفوق في اتجاه القلب، واللوشن ده بندهنه بالليل، قبل ما ننام.

ومع المداومة على اللوشن ده هنحصل على بشرة نضرة طرية وريحتها حلوة؛ بسبب زيت الورد، وكمان بيقضي على الشقوق والقشور والحبوب البسيطة اللي بتكون موجودة على بشرة الجسم.

ونصيحتي كمان علشان نحافظ على صحة وجمال بشرتنا، إننا نهتم بالنظافة الشخصية، وبنظافة الفوطة اللي بنستخدمها لتجفيف بشرتنا، ويُفضّل إننا نغسل الفوطة الخاصة بنا يومياً.

كريم اللانولين للبشرة شديدة الجفاف
طبعاً معظمنا بيعاني جفاف في الإيدين والكعبين، وفي بشرة الجسم ككل في فترة الخريف والشتاء، وخاصة الستات أو البنات اللي بيتعاملوا مع الصابون السايل في غسيل الأطباق، وبنبقى مش عارفين نستعمل كريم إيه، وإيه الأفضل؟!!

دلوقتي هنعرف إزاي نعمل كريم ترطيب بنفسنا في البيت؛ علشان نكون واثقين من كل مكوّناته، ونستخدمه وإحنا متطمنين…

والكريم ده مكوّناته بسيطة جداً؛ وهي عبارة عن:

• قطعة لانولين في حجم عين الجمل “هتلاقيه عند أي عطار”
• ملعقة زيت زيتون
• ملعقة زيت لوز حلو
• ملعقة زيت جنين القمح
• ملعقة زيت جوجوبا
• ملعقة زيت ليمون
• ملعقة زيت مشمش

طريقة التحضير:
بنسيّح قطعة اللانولين في حمام مائي ساخن على النار، وأوّل لما يسيح هنبدأ نضيف مجموعة الزيوت اللي قلنا عليها بالترتيب، ونقلّبهم مع بعض لمدة دقيقة أو دقيقتين، علشان يندمجوا مع بعض.

وبعد كده نرفع الكريم اللي عملناه من على النار، ونحطّه في علبة زجاج أو أركوبال لها غطاء، ونسيبه يبرد شوية، وبعد كده نحطّه في الثلاجة لمدة ليلة كاملة، ولما نيجي نطلعه من الثلاجة هنلاقيه زي الكريم، ولكن لو سبناه بره هيبقى عامل زي الزيت اللزج، ويُفضّل إننا نحفظه في الثلاجة، ونطلعه بالليل علشان نستخدمه، وبعد كده نرجعه تاني.

والكريم ده بيدي نعومة للجسم والإيدين والركبتين والكعبين، بالإضافة إلى ريحته الجميلة اللي بيسيبها على الجسم.

مجموعة زيوت لعلاج تساقط الشعر
كتير مننا بيعاني مشكلة تساقط الشعر، وطبعاً تساقط الشعر له أسباب كتيرة جداً، لكن لو اتكلّمنا عن التساقط العادي اللي مالوش أسباب مرَضية، فده ممكن نعالجه بحمام زيت كويس أوي بيمنع تساقط الشعر وبينعمه ويغذيه ويقويه…

ومكوّناته عبارة عن:

• ملعقة زيت زيتون
• ملعقة زيت لوز
• ملعقة زيت صبار “بيكون لونه أصفر أو أخضر ولزج”
• ملعقة زيت خروع “بيكون لزج جداً”
• ملعقة زيت جوز الهند “بيكون لونه أبيض ولزج جداً”

الطريقة:
هنخلط كل المكوّنات دي مع بعضها لغاية ما تندمج كلها، وعند استخدام الزيت ده لازم يكون الشعر مغسول كويس جداً مرتين بالشامبو، وبننشف شعرنا كويس، وبعد كده ندهن الجذور الزيت ده، وبناخد منه كمية صغيرة جداً وندهن بها باقي شعرنا، وبكده يبقى الكمية اللي عملناها دي ممكن تكفي إننا نعمل بها حمام زيت مرتين، وبنعد بحمام الزيت ده لمدة 3 ساعات، وممكن إننا ننام به ونغسله تاني يوم.

وعايزة ألفت نظركم لغلطة بنات كتير بتعملها، وهي إنهم يسيبوا الزيت على شعرهم من غير غسيل أكتر من يوم؛ لأن الزيت مش المفروض إنه يفضل على الشعر لأكتر من 24 ساعة، وخصوصاً المحجبات؛ لأنك كده بتكتمي شعرك وتضريه أكتر ما تفيديه.

الليمون والعسل لعلاج القشرة الموسمية
بالنسبة بقى لمشكلة القشرة، هنعمل دلوقتي ماسك سهل جداً، ومكوّناته موجودة في كل بيت..

الماسك عبارة عن:

• عصير 2-3 ليمونة “على حسب الحجم”
• ملعقة كبيرة عسل

الطريقة:
بنقلّب المكونات كلها مع بعض كويس لغاية ما العسل يذوب في الليمون، وبنبدأ نوزّع الخليط ده على جذور الشعر باستخدام فرشة الصبغة، وبنحرّكها أكثر من مرة على فروة الرأس علشان نحرّك القشرة.

وفيه طريقة تانية سهلة أوي ممكن نوزع بها الماسك ده على شعرنا، وهي إننا نحط الخليط ده في زجاجة عطر قديمة، وعند الاستخدام بنرج الزجاجة كويس، ونبدأ نرّش منها على فروة الرأس، وبنسيب الماسك على الشعر لمدة ساعة واحدة بس، وبعد كده بنشطف الشعر كويس أو نغسله.

وممكن إننا نعمل إضافة بسيطة على الماسك ده بعد ما نوزّعه على فروة الرأس؛ وهي إننا نضيف عليه قطعة صغيرة من حمام الكريم، ونبدأ نوزّعه على باقي الشعر، والطريقة دي بنعملها علشان الماسك ماينشّفش الشعر مع الاستخدام، ويفضل طري وبيلمع.

وبكده تكون خلصت حلقتنا النهارده…
وأتمنّى إنكم تكونوا استفدتم منها.. وتجرّبوا الحلول اللي قلنا عليها…
وتابعونا في الحلقات اللي جاية…
سلام،،،