جمالك من الطبيعة مع رانيا.. ماسكات للعناية بالبشرة والشعر في الخريف

إزيك يارانيا كنت عاوزة أنا بشرتى من تحت العين ناشفه أوى والجبهه والخديين فيهم حبوب حمرا وبعمل ليها ماسكات كتير ومش راضيه تتظبط .

=======================
رد بص وطل :
صديقتى العزيزة بصى هتلاقى فى العدد اللى فات ماسك الترمس لكل أنواع البشرة، وتابعينا عشان تعرفى الحل لكل مشاكل البشرة فى الحلقات القادمة إن شاء الله .

هل زيت اللوز المر بيفتح البشرة وبيوحد لونها وهل هو مضر شكرا جدا .

=======================
رد بص وطل :
صديقتى العزيزة بصى زيت اللوز المر كويس جداً بس كل الماسكات اللى إستخدمناها فيها زيت اللوز الحلو، تابعينا عشان تعرفى نستخدم زيت اللوز المر فى إيه .

هاى رانيا أنا أول مرة أدخل وأستفدت كتير بجد وعندى سؤال بليز أنا مش بعرف أحط ميك أب خالص وكنت عايزة أعرف الخطوات .

========================
رد بص وطل :
صديقتى العزيزة بصى أهم حاجه إنك تستخدمى ماركات ميك أب مضمونه، دي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور وطبعاً لازم كريم الأساس يكون نفس درجه بشرتك مش أفتح أوى، وكمان إستخدمى اللوس باودر، ولازم تختارى ألوان ميك أب مناسبه مع لون بشرتك .

إزيك يارانيا ..أنا كنت بعمل شعرى كل اسبوع تقريبا ولازم يكون معمول على طول وده مخلية مقصف على طول ممكن لو فى حاجة تحمى الشعر من اضرار السيشوار ..وهل البيبى ليس أفضل ولا كله نفس الاضرار؟ وحاجة كويسة أوى برضو لترطيب الشعر توضع كل يوم عشان بيكون ناشف أوى ممكن كمان أعرف أسم ماركة كويسة لكريم حماية من التجاعيد حول العين??

============================
رد بص وطل :
صديقتى العزيزة بصى السشوار الكتير بيضر الشعر جداً والبيبى ليس كمان بس إنتى ممكن تستخدميهم لكن مش كل يوم، وممكن تستخدمى سيروم على شعرك قبل السشوار عشان تحفظى على شعرك وكمان لازم تعملى حمام كريم وزيت مرتين فى الأسبوع، وكمان ممكن تستخدمى بانتين بديل الزيت كل يوم لترطيب الشعر، أما بالنسبه لكريم التجاعيد فى كريمات كتير كويسه زى أولاى بس لو إنتى لسه سنك صغير ماتستخدميش أى كريمات وممكن تستخدمى بذرة القطون .

هاى رانيا بليز رودى عليه بسرعه أنا خطوبتى الجمعه ونزلت جبت من كيرولان فونديشن بش مش لاقيت جبت supra color أنا معرفش ده كومباكت بودر ولا إيه المهم انى حطيت منه فى قرايه فتحتى وحسيته مش مفتحنى وساح عليه بسرعه وأنا بشرتى عاديه وأنا مش عاوزة أرجع للبودرة المائيه لان واضح كده إنها رخيصه بس تغطيتها أحلى وأنا جايبه ماركه كويسه ومدتنيش اللى أنا عاوزاة أنا وزعته بصابعى يمكن ده غلط أوزعه بأسفنجه علشان يبقى تقيل أنا مش هروح كوافير وجبت مكياج ماركه علشان أبقى حلوه قولي لى أعمل إيه وأنا مش حطيت فوقيه لوس بودر عرفينى بسرعه وأنا اساسا فاتحه مش غامقه خالص يعنى أنا أفتح من الخمرى وأنا جايبه درجهw1 .

=========================
رد بص وطل :
صديقتى العزيزة ألف مبروك مقدماً، بصى أهم حاجه إنك تستخدمى ماركات مضمونه ودي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور، وكمان لازم يكون كريم الأساس مناسب مع نوع بشرتك ومايكنش أفتح من بشرتك غير بدرجه واحدة بس وكمان من الأفضل إنك توزعى كريم الأساس بأسفنجه أو فرشه وإبعدى عن إستخدام البودرة المائيه لأنها مضرة جداً على البشرة وإستخدمى اللوس باودر (البودرة السايبه) .

عندى مشكله فى جسمى مناطق غامقه كتير وجافه دايما عايزة حل أنا بشرتى جافه وأما مش بحطلها كريم مرطب بتلتهب كده تبقى حساسه

======================
رد بص وطل :
صديقتى العزيزة إنتى ممكن تستخدمى اللوشن اللى موجود فى العدد ده وهو كويس جداً لبشرة الجسم، وكمان ممكن تستخدمى كريم مرطب وتابعينا عشان تعرفى كل الماسكات المناسبه للبشرة الحساسه .

شكرا جدا علي الوصفات دي ولو سمحتي عايزه اي حل لحواجبي دايما تتنعكش مع اني بقصها كويس جدا لان الشعر بتاعها مش ناعم أوي عشان كده بيتنعكش عايزة اي حاجه عشان تكون شكلها حلو، كمان عايزة أعرف لو أستخدمت حمام كريم لوريال هل أشطفه كويس ولا اشطفه نص شطفه وهل النوع ده معالج ولا لأ؟ اعتذر للاطاله وارجوالاجابه علي كل الاسئله.

========================
رد بص وطل :
صديقتى العزيزة بصى بالنسبه لمشكله حواجبك تابعينا عشان تعرفى الحل، وحمام الكريم بعد ما تعمليه لازم تغسلى شعرك كويس جداً .

ميرسى قوى يارانيا على مجهودك أنا كنت عاوزه اسألك على حمام كريم كويس للشعر جيلان كانت قالت قبل كده على حمام كريم لوريال بس ده مش لاقياه خالص يا ريت تقولي لى على نوع يكون كويس ويا ريت تقولى لى كمان على نوع كويس لبديل الزيت .

==========================
رد بص وطل :
صديقتى العزيزة بصى حمام كريم لوريال هتلاقيه فى الصيدليات الكبيرة، وبالنسبه لبديل الزيت فممكن تستخدمى بانتين .

إزيك يارانيا أنا كنت عايزة أعرف هو ممكن نعمل جل طبيعى علشان الجل العادى بيوقع الشعر وعايزة .

=========================
رد بص وطل :
صديقتى العزيزة تابعينا وهتلاقى الرد على سؤالك قريباً إن شاء الله .

مرسى جدا على الوصفات السحريه دى بس ممكن اسالك سؤال عن تساقط الشعر الدهنى بصوره متكرره وبقى خفيف جدا من قدام ومش عارفه اعمل ايه ياريت تساعدينى

==========================
رد بص وطل :
صديقتى العزيزة هتلاقى فى العدد ده حمام زيت كويس جداً وبيقلل من مشكله تساقط الشعر، وتابعينا عشان هتلاقى ماسكات كتير لكل مشاكل الشعر .

إزيك يارنيا شكرا على أرائك الجميلة بس أنا ممكن اسألك عن حل لكسر الشعر أنا شعرى مكسر وجربت أكتر من شئ ومش عارفة الحل الممتاز ياريت أعرف الحل علشان أنا تعبت وكمان ممكن أعرف الحل المثالى للخطوط البيضاء الموجودة فى الجسم أنا عندى بعض الخطوط البيضة فى جسمى ياريت أعرف الحل لو سمحتى وشكرا .

========================
رد بص وطل :
صديقتى العزيزة تابعينا عشان هتلاقى الرد على كل أسئلتك قريباً إن شاء الله فى الحلقات القادمه .

هاي روني إزيك لو سمحتي أنا لما باجي اسرح شعري بيقع مني شعر قصيير جدااا مش عارفه ده إيه أو سببه إيه وفي سؤال تاني هل الشعر المجعد قوي ممكن يتفرد طبيعيا ولا محتاج فرد وياريت تجيبي أي حاجه بتنبت الشعر من أول وجديد لان بجد أنا بعاني من فراغات الشعر والحتت الفاضيه الموجوده في الشعر مع العلم إني هتجوز في شهر 7 وياريت يكون في العدد القادم .

=========================
رد بص وطل :
صديقتى العزيزة ألف مبروك مقدماً، وإنتى هتلاقى فى العدد ده حمام زيت عشان مشكله تساقط الشعر وتابعينا عشان هيكون فى حلول كتير لكل مشاكل الشعر .

أنا فى أعده تعارف لخطوبه مش عارفه أحط ميك أب إيه وأشتريت عبايه تشبه الدرلات أنا عينى صغيرة وطولى 155 ووشى صغير ومش طخينه ومش عارفه ألبس جيب وبلوزة ولا العبايه هى شكلها شيك أوى ومدينى شكل جميل أعمل إيه أهتم بنفسى إزاى وهى أول مقابله .

========================
رد بص وطل :
صديقتى العزيزة بصى الدرلات دى موضه جداً وإنتى ممكن تلبسى العبايه دى لو حاسه إنها مناسبه مع جسمك، أما بالنسبه للميك أب فأهم حاجه إنه يكون بسيط وتختارى الألوان المناسبه مع لون بشرتك وعشان نهتمى بمظهرك هتلاقى فى العدد اللى فات واللى قبله إزاى تخدى شاور صح وكمان وتستخدمى الليفه لبشرتك وكمان فى ماسك الترمس وده مناسب لكل أنواع البشرة .

ممكن أعرف ماسك الخميرة بتاع اثار الحبوب .

=====================
رد بص وطل :
صديقتى العزيزة بصى ماسك الخميرة بيكون عبارة عن قطعتين خميرة ومعلقه عسل نحل وبتدوبيهم كويس أوى وتحطيهم على بشرتك وتسبيه لمدة ساعه على الأقل، وتابعينا عشان تشوفى إزاى بنحضر الماسك ده فى الحلقات القادمه .

أنا بشكرك جداا يارانيا على الحلقات والمعلومات القيمه بس أنا عندي أستفسار :أنا دلوقتي عندي 27 سنه وبشرتي كانت صافيه اوي اول مادخلت الجامعه بس لما ابتديت أهتم بيها ماسكات وسنفره باظت وطلعت حبوب ودلوقتي أنا بطلت الماسكات والحاجات دي علشان حساسيه بشرتي بس بقالي شهر أو اكتر وشي عمال يطلع حبوب مش عارفه إيه السبب ولو عملت ماسك علشان الحبوب الحبوب هاتزيد اكتر ؟؟ أعمل إيه علشان وشي يرجع صافي تاني؟ وللعلم أنا بشرتي كانت جافه وبعدين بقت دهنيه ودلوقتي هيه مركبه وحساسه (ماتستغربيش علشان أنا كمان مش فاهمه ايه اللي بيحصل) أرجوكي تساعديني وأسفه جدا على الاطاله.

======================
رد بص وطل :
صديقتى العزيزة بصى هتلاقى فى العدد اللى فات ماسك كويس أوى ومناسب لكل أنواع البشرة، وتابعينا عشان تعرفى التكنيك المناسب للعنايه بالبشرة المركبة .

شكرا يارانيا على معلوماتك الجميله ربنا يحفظك لو سمحتي عايزة اسألك عن الخلطه دي زيت خروع وزيت زيتون وزيت جرجير وزيت جوزالهند وزيت صبار أنا الخلطه موجودة عندي ومش عارفه استعملها ولا لأ لان أنا شعري خفيف جدا أرجو الرد .

========================
رد بص وطل :
صديقتى العزيزة أهلاً بيكى ، وبالنسبة للوصفه دى فهى كويسه وممكن تستخدميها وتابعينا عشان هيكون فى ماسكات أكتر .

هاي رانيا إزيك لو سمحتي أنا كنت عايزه اسألك عن ماسك الشعر اللي هو زيت الجرجير والثوم وجوز الهند ينفع أعمل منه كميه وأعينها وعايزة أعرف المقادير بتاعة الكميه دي وياريت تقولي لي علي ماسك لازالة أثار الحبوب البنيه لانها مضيقاني قوي وشكرا .

=======================
رد بص وطل :
صديقتى العزيزة بصى إنتى ممكن تعملى الكمية اللى إنتى عايزاها، وتحتفظى بيها وإنتى بتحطى الزيت بمقادير متساوية وبالنسبه لماسك إزاله الحبوب تابعينا عشان هتعرفى الحل قريباً .

إزيك يارنوش منورة بص وطل ياقمرة أنا عايزة ماسك لتفتيح البشرة والكف من الشمس علشان أنا بنزل الكليه كل يوم وإيدى بقت لونين وعندى فرح بعد العيد وعايزة حاجه تفتح من فضلك وشكراا .

=======================
رد بص وطل :
صديقتى العزيزة تابعينا عشان هيكون فى ماسكات كتير لتفتيح البشرة، أما بالنسبه لتفتيح الكف فإنتى ممكن تفركى إيدك بالملح والليمون .

لو سمحتى أنا عندى مشكله مع البشرة وخاصة فترة النهار بتتكون دهون على شكل زيوت لامعه فى منطقة حرف T اللى هى من فوق الحواجب ومنطقة الأنف وجوانبها .

========================
رد بص وطل :
صديقتى العزيزة بصى تابعينا عشان هيكون فى عدد عن البشرة المركبة قريباً إن شاء الله .

هاى رانيا كنت عاوزة استفسر منك عن حاجة إيه رأيك فى ماسك للبشرة وعبارة عن نص كوب لبن ونص ليمونة معصورة عليه ومعلقة جلسرين إنتى قولتلي لى إنه ماسك كويس وهاتى الجلسرين من عند العطار ماينفعش أجيبه من الصيدلية ولا لازم من عند العطار ياريت تفدينى بالظبط.

===========================
رد بص وطل :
صديقتى العزيزة بصى الماسك ده كويس، وإنتى ممكن تجيبى الجلسرين من الصيدلية أو العطار مافيش مشكلة .

هااى يارانيا، إنتى بتقولى أن وضع الزيت على الشعر أكتر من 24 ساعة يسبب ضرر طيب ماهو أنا لو حطيت الزيت لمدة ليلة وغسلته وسيبت شعرى كده هينشف وهيبقى هايش وصعب تسريحه وكمان لو عملت الزيت ده كل يوم وغسلته كل يوم هيجيلى برد خاصة أن المناعة ضد البرد عندى ضعيفة لو عندك حاجة تخلى شعرى رطب وأستغنى عن الزيت ياريت تقوليهولى وجزاكى الله خيراً .

========================
رد بص وطل :
صديقتى العزيزة بصى إنتى مش بتسيى الزيت على شعرك أكثر من 24 ساعة، وكمان حمام الزيت بتعمليه مرتين فى الأسبوع بس، وممكن تستخدمى حمام كريم زى لوريال بس لازم تعرفى إن الزيوت بيكون ليها تأثير كويس جداً على شعرك مع الأستمرار على إستخدامها .

ميرسى كتير ليكى على الوصفات الهايله دى وكنت عايزة أطلب منك طلب وهو إنك تبعتيلى اللينك بتاع العدد اللى فات واللى قبله لانى مش عارفه أوصلهم وشكرا .

==========================
رد بص وطل :
صديقتى العزيزة بصى إنتى ممكن تدخلى على باب قمر 14 فى أخر الصفحه وهتلاقى كل الأعداد اللى إنتى عايزاها .

عاوزة اسأل عن فاعلية وصفة عبارة عن خلطة حبة البركة وزيت جوز الهند وزيت اللوز لهيشان الشعر أو الشعر الهايش؟ وكمان عاوزة أعرف أسيبها على شعرى قد إيه؟ وشكرا على مجهودك وتعبك المتواصل معانا .

=======================
رد بص وطل :
صديقتى العزيزة بصى الوصفه دى كويسه، وإنتى بتسيبى حمام الزيت على شعرك من 3 إلى 4 ساعات .

رانيا أنا شعرى طويل بس فيه نسبة تمويج بسيطة فكنت حابة تقولي لى ضرورى إزاى أتخلص منها .

==========================
رد بص وطل :
صديقتى العزيزة جوجو تابعينا وهتلاقى الرد على سؤالك قريباً فى الحلقات القادمة.

ممكن تقولي لى أعمل إيه؟ وشى مليان بثور سوداء مخرمة وشى وده مضايقنى موت ازاى اقدر اشيلها؟

============

رد بص وطل:
صديقتى العزيزة تابعينا وهتلاقى الرد على سؤالك قريباً إن شاء الله .

إزيك رنوش ياقمر عاوزة أعرف اللانولين أما جبته من عند العطار احتفظ بيه فى الثلاجة لحين أستعماله ولا أسيبه بره عادي؟ كمان أنا عندي نفس مشكلة أن بذر القطون أما بعمله الميه اللي فوقه ما بتبقاش جيل البذر بيبقي جيل تحت فى البرطمان وبتفضل الميه فوقيه فأنا اتلخبطت دلوقت هو المفروض ما نحطش البذر نفسه اللي بتتكتل تحت ونحط الميه اللي بتبقي فوقه وإذا كنا بنستعمل ميته بس فهي ليه ما بتبقاش جيل معايا

=========================
رد بص وطل :
صديقتى العزيزة بصى إنتى ممكن تشيلى اللانولين فى التلاجه أو تسيببه برة مافيش مشكله، أما بالنسبه لبذر القطون فإنتى بتستخدمى الميه وكمان ممكن تستخدمى البذر نفسه مافيش مشكله وبعد كده تحتفظى بيه فى التلاجه .

لو سمحتى عاوزة اعرف الطرحه الطويله اللى شبه طرحة الزفاف الابيض اللى بتبقى فى الخطوبه يعنى الوان موضه وشيك ولا لأ

=========================
رد بص وطل :
صديقتى العزيزة الطرحه دى موضه فعلاً، أما بالنسبه لأختيار الألوان دة بيكون حسب لون فستانك وكمان الألوان المناسبه معاكى .

هاااى مرسي على الوصفات اللى تجنن دى أنا عايزة أعرف وصفة تفتح الاماكن الحساسة نهائيا بليز ممكن الرد.

======================
رد بص وطل :
صديقتى العزيزة تابعينا عشان هيكون فى حلقه عن الموضوع ده وهتلاقى كل الماسكات اللى إنتى عايزاها .

لو سمحتى أنا عايزة أسم زيت أو كريم يكون كويس للشعر ويكون مفيد للتجاعيد بليييييز ضرووووورى .

=======================
رد بص وطل :
صديقتى العزيزة هتلاقى فى العدد ده والعدد اللى فات حمام زيت مناسب لكل أنواع الشعر أما بالنسبه لتجاعيد البشرة فاتبعينا عشان هتعرفى الرد على سؤالك قريباً إن شاء الله .

لو سمحتى أنا عاوزة أى كريم أستعمله لاخفاء أثار حب الشباب فى ظهرى لوسمحتى قوليلى ضرورى.

========================
رد بص وطل :
صديقتى العزيزة تابعينا وهتلاقى الرد على سؤالك قريباً إن شاء الله .

أنا بتطلعلى حبوب صغيرة وعندى أثار حبوب عايزة حل ياريت سرعة الرد بس إنتو للاْسف بتقولو إنتظرونا فى الاعداد القادمة ومش بنلاقى حاجة وعايزين كيفية الاعتناء بالبشرة الدهنية والمساكات بتعتها .

===========================
رد بص وطل :
صديقتى العزيزة بسمة بصى ماسك الخميرة كويس جداً عشان مشكله أثار الحبوب ومن الأفضل إنك تنتظرى عشان هتشوى كل الماسكات دى وطريقه تحضيرها وكمان هيكون فى عدد خاص بالبشرة الدهنيه .

هاي روني أنا معجبه جدا بيكي وبالوصفات اللي إنتي بتعمليها
بس عندي حاجه مهمه جدا وياريت ألاقي عندك حل لمشكلتي دي أنا بعاني من الشيب المبكر وده بيضايقني أوي وبيخلي نفسيتي سيئه جدا ولجأت للصبغه وأستخدت باليت بس أنا شعري بيطول بسرعه يعني بعد أسبوعين ثلاثه بلاقي الشعر الابيض ظهرت جذورة من جديد وخايفه أستعمل الصبغه كتير كده شعري الصبغه هتجهده وتبوظه أنا قريت إني لو أكلت كل يوم زبادي وعسل أسود وخميره ولبن رايب يوميا ممكن المشكله دي تختفي وترجع الضبغ المفقودة لجسمي تاني وكمان قريت إني لو غليت ريحان ناشف أو أخضر مع أكليل الجبل وأحطه فى الثلاجه وأرش منه ببخاخ علي شعري الابيض بعد غسل الشعر بالشامبو وده يتكرر بعد كل غسيل للشعر ويترك حتي الشعر يجف برضو بيرجعه للونه الأصلي بجد محتارة ومش عارفه أعمل إيه وأسفه إني طولت عليكي يا قمر.

===========================
رد بص وطل :
صديقتى العزيزة بصى الشيب المبكر ليه أسباب كتير جداً ممكن تكون وراثيه أو بسبب سوء التغذيه وكمان الضغوط النفسيه عشان كده إنتى لازم تتأكدى إن الشيب ده مش بسبب كده، وبالنسبه للعسل الأسود والخميرة فهم فعلاً كويسين جداً، ووصفه الريحان دى فعلاً كويسه وتابعينا عشان هتلاقى فى الحلقات القادمه وصفات كتير عشان المشكله دى .

كدة بعد اللوشن ده منغسلش جسمنا وينفع نحطه تحت الابط.

========================
رد بص وطل :
صديقتى العزيزة بصى اللوشن ده بتحطيه بعد ماتخدى شاور وماتنشيفيش جسمك أوى واللوشن ده بتحطيه على جسمك كله مافيش مشكله .

السلام عليكم أنا أول مرة أزور الموقع بجد جزاكم الله خيراً أنا بس عندي سؤال أنا بعاني من أثر الحبوب في وجهي وأستعملت علاجات كتير بس مش فيه فايدة .

=======================
رد بص وطل :
صديقتى العزيزة ريم أهلا بيكى، وتابعينا عشان هتلاقى الرد على سؤالك فى الحلقات القادمة إن شاء الله .

السلام عليكم ورحمة الله وبركاته إزيك يارونا عاملة إيه ميرسى جدا جدا على مواضيعك الجميلة دي بس أنا عندى مشاكل كتيرة جداً وأرجوكى ردى عليه ضرورى أنا عروسة وفرحى كمان 3 شهور وعايزة وصفة كويسة ومضمونة لتفتيح الركب والاكواع وفيه نقط سودة وخشنة مكان شعر الرجل وعاوزة ضرورى جداً وصفة لتفيتح الاماكن الحساسة أنا بستخدم زيت الورد وحاسة إنه مش بيجيب نتيجة وياريت ماسك تفتيح البشرة بدأت تظهرلى حبوب فيها بس مش كتيرة الحمد لله بس بتسيب أثر ليها وكف إيدى فيه شعر بردو والموضوع ده مأرقنى جدا أرجوكى ردى عليه كمان طولت عليكى بس غصب عنى .

=======================
رد بص وطل :
صديقتى العزيزة أهلاً بيكى وألف مبروك مقدماً، بصى إنتى ممكن تستخدمى اللوشن اللى الموجود فى العدد ده وهو كويس جداً لبشرة الجسم وزيت الورد كويس جداً بس لازم تعرفى إن فى زيوت معينه لما تستخدميهم مع بعض بيكون تأثيرهم كويس جداً لبشرة الجسم، وتابعينا عشان هتلاقى الرد على كل أسئلتك من خلال الحلقات القادمة .

لو سمحتي يارانيا أنا عملت بذر القطون زي ما قولتي بس مبقاش جل لسة برده ميه مش عارفة ليه حطيت معلقة بذر القطون في برطمان بلاستيك ومليت نصفه ماء ساخن وسيبته يبرد وغطيته وحطيته في الثلاجة كدة صح ممكن توضحيلي.

===================
رد بص وطل :
صديقتى العزيزة شوشو بصى أحن قولنا من خلال الحلقات إننا نستخدم برطمان زجاج والطريقه دى صح وإنتى بتستخدمى الميه اللى بتكون زى الجل .

أنا عندى 22 سنه وعندى أثار حبوب بنى وعايزاها تروح هو ممكن أعمل كريم سنفرة كل يوم ولا هيبقى فيه ضرر شكرا .

========================
رد بص وطل :
صديقتى العزيزة بصى الصنفرة ممكن تعمليها مرة واحدة فى الأسبوع، وتابعينا عشان تعرفى الماسكات الطبيعه لعلاج أثار الحبوب .

إزيك يارانيا بليز محتاجه مساعدتك أنا عندى فستان ساده بستاج عباره عن طبقه ستان والطبقه اللى فوق مخرمه كده زى التول بس اخشن المهم أنا محتاره مش عارفه ادخل إيه ألوان معاه مع العلم إنى خمريه ممكن تساعدينى بليز وشكرا اوى.

======================
رد بص وطل :
صديقتى العزيزة بصى الألوان دى يتكون مناسبه مع البستاج، الأبيض والبنى وممكن كمان اللون الفوشيه .

إزاى أقدر أشيل الماسكرا من غير متسيب أثر حولين العين أنا بستخدم زيت الزيتون فى إزالة الماسكرا ده حلو وله لأ؟ كمان أنا بشرتى مليانة بثور سوداء مخرمة وشى ومضايقانى أوى إزاى أقدر أشيلها ولو أستخدمت التنر من أوريفلام يبقى حلو ولا لأ؟ وكمان بودرة أماندا دى كويسة وله إيه؟ وشكرا ليكى ياقمر على مجهودك معانا.

========================
رد بص وطل :
صديقتى العزيزة منال بصى إنتى ممكن تشيلى أثار الماسكرا بمزيل الميك أب وكمان ممكن تستخدمى قطعه كريم وقطن وتشيلى بيها الماسكرا، وبالنسبه للتنر بتاع أوريفلام فهو كويس وممكن تستخدميه قبل ما تحطى الميك أب مثلاً، وبالنسبه لمنتجات أماندا فهى كويسه وممكن تستخدميها .

لو سمحتى شعرى خشن أوى عاوزة شامبو معين يكون حلو وكمان حاجه تعدلة دة بايز خالص وخشن ومقصف ومش بيطول .

======================
رد بص وطل :
صديقتى العزيزة بصى دى أفضل أنواع الشامبو اللى ممكن تستخدميها دوف ،بانتين أو هيربل وهتلاقى فى العدد ده واللى فات ماسك كويس جداً للشعر ممكن تستخدميه وتابعينا عشان هتلاقى ماسكات أكتر فى الحلقات القادمة .

السلام عليكم انا عملت ماسك القطون وفعلا طلع زى الجل بس أنا باخد الجل ده أحطه من غير بذر القطون بيكون لازء فى بعضه تحت صح الطريقة دى وسؤل تانى من فضلك ردى عليه النهاردة بخصوص عايزة أفتح لون شعرى بعد ماعملت حنة سوده جزاكى الله خيرا شكرا جزيلا .

========================
رد بص وطل :
صديقتى العزيزة إنتى بتستخدمى بذرة القطون صح وإنتى فعلاً بتاخدى الميه اللى بتكون زى الجيل، وبالنسبه لشعرك فالحنه بتاخد وقت طويل عشان تروح وكمان عشان تقدرى تغيرى لون شعرك، وممكن تغسلى شعرك بمغلى الكاموميل لأنه بيفتح الشعر .

شكرا قوى ع الاستفادة

السلام عليكم ورحمة الله وبركاته هى الماسكات بتاعه العدد ده كلها لبشره الجسم ؟

=======================
رد بص وطل :
صديقتى العزيزة اللوشن والكريم اللى فى العدد ده مخصصين لبشرة الجسم، بس تابعينا عشان هيكون فى وصفات كتير لبشرة الوجه.

السلام عليكم ورحمة الله وبركاته رونى ياريت تهتمى ببشره الوجه أكتر من الجسم يعنى تفتيح الوجه وترطيبه وعايزة ماسك ليلى للوجه وأنا بشرتى جافه فهل أستخدم الليفه كل يوم وكام مرة فى اليوم لانى سمعت أن البشره الجافه بيتعملهاش سكراب .

========================
رد بص وطل :
صديقتى العزيزة منه، هتلاقى فى الحلقات القادمة ماسكات كتير لبشرة الوجه وكمان هتلاقى فى العدد اللى فات ماسك مناسب لكل أنواع البشرة ممكن تعمليه، وبالنسبه لليفه فإنتى ممكن تستخدميها كل يوم وأكتر من مرة بس بتستخدميها برفق على بشرتك .

هاي روني ميرسي جدا على الماسكات الجامدة دي كنت عاوزة حاجه تخفي الهالات السودة والانتفاخ اللى تحت العين وكنت عاوزة حاجه كمان وهي ماسك للرؤس السودة وميرسي ليكي كتير.

========================
رد بص وطل :
صديقتى العزيزة أتمنى إنك تستفيدى من كل موضوعات قمر 14، وهتلاقى فى العدد الأول ماسك بذرة القطون للهالات السودة .

الحلقة رائعة بجد وهنستفيد جداً بيها خاصة إننا داخلين على الشتاء
متشكرة جدا إنك جاوبتينا علي تقشير البشرة بلوشن تحفه وأنا كنت عاوزه استفسر عن جنين القمح هل هو كويس لتفتيح الاماكن الحساسة وإزاي أستخدمه هل أحط عليه ليمون أو أي إضافات ولا إيه؟

=====================
رد بص وطل :
صديقتى العزيزة شكراً جداً على ذوقك وأتمنى إنك تستفيدى من كل موضوعات قمر 14، بصى زيت جنين القمح مفيد جداً للبشرة، بس تابعينا عشان تعرفى تستخدميه إزاى .

إزيك يارانيا أنا عايزه حاجه تفتح تحت الابط فى أسرع وقت ياريت وكمان الركبه شكرا.

===================
رد بص وطل :
صديقتى العزيزة إنتى ممكن تستخدمى اللوشن اللى موجود فى العدد ده لأنه بيرطب الجلد جداً، وتابعينا عشان تعرفى الرد على سؤالك .

بجد بحييكي على الوصفات الهايله دي أنا بحتفظ بكل نصايحك الموجوده في العدد ده والاعداد اللي فاتت بس كنت عايزة استفسر بالنسبه لليفة الاستحمام والوجه ممكن أحتفظ بيها فين وإزاي بعد ماأخلص الحمام بتاعي عشان أنا مش عايزه أسيبها في الحمام خوفا حد يستخدمها بالغلط وسؤال تاني معلش هو مزيل العرق ريكسونا يعتبر كويس؟ وميرسي لذوقك جدا جدا . .

=====================
رد بص وطل :
صديقتى العزيزة إنتى ممكن تشيلى الليفه فى أى كيس بلاستك وتشليها فى مكان مخصص ليكى، وبالنسبه لمزيل العرق فهو كويس بس أهم حاجه إنك تستحمى كل يوم .

السلام عليكم ازيك يا رانيا بجد تسلم إيدك على كل الحاجات الجميله دى بس عندى سؤال عاوزه غسول كويس لبشرتى هى نوعها مركبه.

====================
رد بص وطل :
صديقتى العزيزة شكراً جداً على ذوقك وإنتى ممكن تستخدمى غسول ديور أو نتروجينا للبشرة المركبه .

شكرا يارانيا على المعلومات المفيدة قوى دى عايزة أعرف إذا كان فى حاجة تضيع الشيب المبكر .. سمعت إن زيت المريمية بيضيعه
ياريت تقولى على حاجة ويارب تكون سهلة .

=====================
رد بص وطل :
صديقتى العزيزة بصى المرمريه كويسه جداً للشعر والبشرة وهى فعلاً بتغمق الشعر، وتابعينا عشان هنتكلم أكتر عن الموضوع ده .