الحل لكل مشاكل بشرتك بطرق طبيعية مع "رانيا موسى"

يا جماعة بلييييييييييز انا نفسي اعرف الترمس فى اى ماسك بيبقى مسلووق ولا بيتحط فيه ميه بس؟؟؟؟

==========

رد بص وطل:
الترمس في ماسكات البشرة غالباً بيكون ترمس عادي مطحون وبتجيبيه من عند العطار مطحون.

ميرسى يا جميل على الماسكات بجد مفيده جدا انا عندى مشكله بخصوص شعرى
انا شعرى تقيل وهايش بس المشكله أن الشعره نفسها سمكها مش واحد بتبقى في مناطق رفيعه وفي مناطق سميكه وده مخلى الشعره مجعده ومكسره إيه الحل؟؟

===========

رد بص وطل:
صديقتى soly حاولى تقصى أطراف شعرك كل فترة وكمان إعملى حمام كريم مرتين فى الأسبوع وتابعينا لإن العدد الجي هنقدم فيه وصفات طبيعية للحفاظ على الشعر وعلاج مشاكله.

سوال معلش هو بالنسبه للفجل قصدك الورق بتاعه يعنى .

=========
رد بص وطل:
صديقتى العزيزة بصى المقصود الفجل نفسه مش الورق .

شكرا أوى على الوصفات دى بس أنا عايزة أعرف اسكينيول الليمون ممكن الاقيه فين لانى سمعت إنه بيفتح المناطق الغامقة بس مش لاقياه خالص وكمان لو سمحتم عايزة أعرف الخطوط البيضه بتروح إزاى من الجسم لانها عندى فى اماكن كتير لما تخنت فجاة وهى بتروح ولا لأ.

==========

رد بص وطل:
صديقتى lila أهلاً بيكى، بصى اسكينيول الليمون ممكن تلاقيه في الصيدليات وممكن تستخدمي زيت الليمون اللي قولت عليه في العدد لتفتيح المناطق الغامقة وده هتلاقيه عند العطار، وبالنسبه للخطوط البيضه فهى فعلاً بتكون بسبب زيادة الوزن حاولى تثبتى وزنك والخطوط دى بتروح عن طريق بعض المراهم الطبيه فا ممكن تستشيرى دكتور وكمان فى طريقه طبيعيه ممكن تعمليها وهي إنك تدهني جسمك بخل التفاح وتسيبيه على جسمك لمدة 2 أو 3 ساعات وبعد كده اغسليه وممكن تعملي الوصفة دي يومياً وإن شاء الله هتحسي بالنتيجة على طول.

ميرسى كتير لمجهودك يا رانيا بس ممكن تقولي لى استخدم نوع بودره إيه بدل البودرة المائيه بس للبشرة الحساسه.

==========

رد بص وطل:
صديقتى shemo بصى البودرة المائيه مضرة جداً وإبعدى عن إستخدامها وممكن تستخدمى اللوس باودر(البودرة السايبه) ودي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور.

ميرسى جدا على العدد الجميل ده بس عندى سؤال أنا شعرى طويل بس جاف أعمل له إيه وايه نوع الكريمات والشامبوهات اللى ممكن استخدمها.

=========

رد بص وطل:
صديقتى العزيزة بصى حاولى تعملى حمام كريم مرتين فى الأسبوع وكمان الشامبو المناسب للشعر الجاف وتابعينا لإننا هنكمل وصفاتنا الطبيعية عن العناية بالشعر.

بجد ميرسى لتعبكم معانا عايزة أطلب منك طلب أنا فرحى كمان 6 شهور وعايزة أعرف إيه اللى ممكن أعمله خاصه إنى عندى مشكله أن عندى اسمرار فى بعض الاماكن مع العلم انى بشرتى حساسه وعايزة أعرف إيه اللى ممكن أعمله فى خلال 6 شهور لحد الفرح وشكراً واسفه إنى طولت عليكى بس ياريت تردى عليه.

=========

رد بص وطل:
صديقتى shemo أهلاً بيكى وألف مبروك مقدماً وبالنسبه لأسمرار بعض الأماكن فى الجسم هتلاقى فى العدد ماسكات كتير للتفتيح ممكن تستخدميها لبشرة جسمك، وممكن في خلال الشهور اللي جاية تهتمي ببشرتك وبترطيبها وكمان لازم تشربي مية كتير وتاكلي خضار وفاكهة كتير.

ميرسي يا قمر وانا عايزة أعرف اسم كريم مرطب كويس للبشرة وانا بشرتي جافة شوية مش اوي يعني.

==========

رد بص وطل:
صديقتى العزيزة ممكن تعملي كريم اللانولين أو كريم شمع العسل اللي قولنا عليه في العدد لإنه مفيد جداً للبشرة الجافة وممكن تستخدمي كريم نيفيا أو دوف.

بجد انا بشكركم علي المجهود الرائع وكل اسرة بص وطل بس أناعندي مشكلة صعبة أنا سمرة وعندي نمش أو نقول حبوب سوداء بارزة علي الخدين والجبهةوازلتها بالليزر وبعده ماسك العسل الابيض وبعد فترة رجعوا تاني ويمكن أكتر من الاول عايزة حاجة تزيلهم نهائي ارجوكم.

========

رد بص وطل:
صديقتى العزيزة حبيبة بصى النمش ده بيكون بسبب أشعه الشمس أو إستخدام أنواع سيئه من المكياج صباحاً عشان كده بانصحك تستخدمى صن بلوك قبل ما تتعرض للشمس وكمان إبعدى عن إستخدام المكياج صباحاً، وبالنسبه إنك عملتى ليزر والنمش ده رجع تانى فلازم تستشيرى الدكتور اللى عمل لك الليزر عن المشكله دى، وهتلاقي في العدد ماسك الفجل لعلاج النمش والبثور السوداء والبقع الغامقة ممكن تجربيه وإن شاء الله هتلاقي نتيجة هايلة.

ميرسى على الوصفات التحفة دى بس كنت عاوزة اقولك إنى بعمل خلطة لشعرى يومين فى الاسبوع اللى هى (معلقة حبة البركة)(ومعلقة زيت زيتون)(وعلبةزبادى) وعملت 4 مرات لغاية دلوقتى بس أكتشفت أن شعرى اتغير لونة من تحت من الاطراف فيا ترى إيه السبب لوحده ولا من الخلطة دى ياريت تفيدينى أعمل إيه وكنت عاوزة أعرف بعد ما ادهن شعرى بالخلطة دى الف شعرى دوامة ولا أرفعه كله لفوق ولا أعمل فيه إيه بالظبط بحيث الشعر كله ياخد طبيعته ويمتص الخلطة ومعلش طولت عليكى شكرا.

=========

رد بص وطل:
صديقتى العزيزة لو شعرك فاتح فممكن إن الزيوت تخلي لونه يغمق شوية، وبعد ما بتعملى الماسك ده بتلمي شعرك وتغطيه ببونيه أو بفوطه سخنة.

أنا بسمر بسرعه من الشمس إيه اللى يرجع لونها تانى.

===========

رد بص وطل:
صديقتى العزيزة أهلاً بيكى، بصى أهم حاجه إنك تحطى صن بلوك قبل ما تتعرضى للشمس وفيه في العدد ماسك الترمس اللى بيساعد على تفتيح البشرة.

معلومات رائعة ربنا يكرمكم ليا سؤال هل فعلا زيت اللوز المر سام على المدى الطويل ولو كده ليه بينزلوه كمان عايزة اعرف فوائد نبات المرة (مر بطارخ).

=========

رد بص وطل:
صديقتى ليلي، ماعنديش اي معلومة أو دليل طبي يقول إن زيت اللوز المر سام، أما بخصوص فوائد زيت المرة فهو بيستخدم كمطهر للجروح وبثور البشرة وكمان بيستخدم لالتهابات الجلد ومنع رائحة العرق.

ميرسى اوى يا رونى على الوصفات الحلوه دى بس انا عايزه وصفه لتفتيح الايدين.

========

رد بص وطل:
صديقتى العزيزة بصى الماسك دة حلو أوى وبيساعد على تفتيح الإيد المكونات (ليمونه+ زيت زيتون) إدهنى إيدك بيه 3 مرات فى الأسبوع وسيبيه لمدة ساعتين بعد كده إشطفى إيدك بالميه وحطى كريم مرطب، وممكن تعملي كمان ماسك الترمس على ايديكي وبشرة وشك وجسمك.

أنا بشكرك جداً على الوصفات دى بس ليه سؤال زيت الورد ده بنجيبه منين وده غير ماء الورد وهل يا ترى فعلا الترمس بيقلل من نمو الشعر فعلا وشكرا ليكى.

==========

رد بص وطل:
زيت الورد ده غير ميه الورد وبتجيبيه من العطار ومنقوع الترمس فعلا بيقلل من نمو الشعر.

أنا عايزه أعرف نوع كريم بيفتح الاماكن الحساسه عشان فرحى كمان 3 شهور ونفسى افتح الاماكن دى ضرورى اوى ميرسى.

===========

رد بص وطل:
صديقتى ساره بصى كريم التفتيح ده لازم تستخدميه تحت إشراف الطبيب عشان ممكن تكون بشرتك حساسه والماسك ده كويس جداً وبيساعد على تفتيح المنطقة الحساسة وهو عبارة عن زيت زيتون + زيت لوز + دقيق خشن (دقيق البسيسة)
الطريقة:اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.

ميرسي أوى على المعلومات المفيده دى وكنت عايزه اسألك ضرورى على وصفه الترمس المطحون لتفتيح الاماكن الحساسه ووصفه تطرى شعرى معلشى طولت عليكى.

===========

رد بص وطل:
صديقتى العزيزة ساره بصى بالنسبه لتفتيح المناطق الحساسه ممكن تعملى الماسك ده المكونات:زيت زيتون+زيت لوز+دقيق خشن (دقيق البسيسة)
الطريقة:اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع وبالنسبه لشعرك دي وصفة هايلة جدا هتساعدك على التخلص من تجاعيد الشعر نهائي المكونات:
صفار بيضة واحدة + نصف ملعقة زيت زيتون + كوب إلا ربع من الماء الفاتر.
الطريقة:اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك ده وسيبيه على شعرك، ويا ريت تتابعينا لإن بكره هنكمل باقي الوصفات الخاصة بالعناية بالشعر.

انا مشكلتى مش لاقيه حل لها أنا سمرا بس بستعمل كريمات تفتيح وبكون بيضه فى البيت أول ما بتعرض للشمس بسمر جداً ووشى بيكون عرقان ومفيش مكياج بيثبت عليه أعمل إيه ارجوكى قولي لى.

=========

رد بص وطل:
صديقتى اسراء أهلاً بيكى، حاولى تستخدمى صن بلوك قبل ما تتعرضى لأشعه الشمس، وكمان إستخدام المكياج صباحاً بيكون مضر جداً للبشرة فحاولى ماتحطيش كريم اساس أو بودرة الصبح وممكن تكتفي ببلاشر وليب جلوس وكحل.

لو سمحت كنت عايزة اسأل عن كريمات التفتيح ليها ضرر زي كريم فير اند لفلي & كريم بي وايت بليز ردوا عليّ.

==========

رد بص وطل:
الافضل إنك تعملي ماسكات طبيعية لإن كريمات التفتيح بتكون فيها مواد بتتفاعل مع آشعة الشمس وممكن تسبب مشاكل في البشرة.

ميرسي الماسكات مفيدة بجد قوي بس كنت عاوزة اعرف ماسك الترمس لو جيت اعمله الترمس مر ولا حلو ؟؟ ولما اعمله اسلق الترمس ولا اعمله عادى من غير سلق؟؟

===============

رد بص وطل:
انتي بتجيبي الترمس العادي مطحون جاهز من عند العطار.

طيب انا سمعت ناس بيقولوا انهم بيعملوا الترمس المطحون مع الزبادي والعسل وناس تانيين بيعملوه مع لبن بودرة وليمون الماسكات دي ممكن يكون ليها نفس المفعول في تفتيح البشرة وتنعيمها؟

==========

رد بص وطل:
الترمس أصلاً بيفتح البشرة وبينعمها سواء كان مع ليمون أو مع عسل وزبادي.

لو سمحتى انا عندى جهاز بتاع الساونة ممكن ده يفيدنى في تفتيح لون الجسم ويكون كله لون واحد ولا لأ؟؟ وسؤال تانى..انا بشرتى دهنية وباهتة وفيها رؤوس سوده وحبوب بس مش كتير وبستعمل دايما البودة المائية بحس انها هى اللى بتنفع لبشرتى لأنى جربت كريم اساس oil free ومحبتهوش.. تفتكرى اعالج بشرتى ازاى وافتحها وازاى اضيق المسام كمان؟؟..اسفة انى طولت عليكى.

============

رد بص وطل:
صديقتنا العزيزة ياسمين هتلاقي ماسكات طبيعية لكل مشاكل بشرتك في العدد يا ريت تقريه كويس، وممكن وإنتي في الساونة تعملي لجسمك ماسك الترمس لإن مسام الجسم بتكون مفتوحة وده هيساعد على إن الماسك يعمل مفعول أكتر، ويا ريت تقللي من البودرة المائية على أد ما تقدري.

بجد تحفه يارونى ويارب تفضلى معانا على طول ممكن بس تقولي لى هى طريقه تفتيح الجسم اسيبها قد ايه على جسمى تقريبا واحطها فى الثلاجه قد ايه علشان اقدر استعملها من بعد ما اعملها وممكن لو فى كميه زيادة احفظها فى الثلاجه من غير مايحصل ليها حاجه؟ واحفظها فى زجاجه ازاز ولا بلاستيك سورى يا قمر لو كنت طولت عليكى.

=============

رد بص وطل:
وصفة تفتيح الجسم بتعمليها وممكن تسيبيها على جسمك لمدة ساعتين أو ممكن تسيبيها طول الليل ولما تصحي الصبح تاخدي الحمام بتاعك، وممكن تحتفظي بالكمية الباقية في زجاجة إزاز لأي مدة إنتي عايزاها.

ميرسي جدا على المعلومات الجامده دى بس انا عندى مشكله انا وانا صغيره كان شعرى ناعم جدا وبعد سن المراهقه شعرى اخشن شويه وبدأ يخف بالرغم انه كان تقيل جدا ياريت تساعدينى بوصفه وكمان عندى سؤال تانى وصفه الترمس دى بحطها بعد ازالة الشعر ولا عادى ولا امتى.

============

رد بص وطل:
طيب تابعينا في العدد الجاية وهتلاقي وصفات جامدة للشعر، وبالنسبة لوصفة الترمس لتقليل نمو الشعر فإنتي بتحطيها بعد إزالة الشعر وبتكرري الموضوع يومياً ولمدة 3 أسابيع.

انا حطيت مشاركه هنا وسؤال بس مش عارفه ليه منزلش لحد دلوقتي ممكن تقولوا لي؟

=============

رد بص وطل:
الرد على سؤالك صديقتنا العزيزة هتلاقيه في المشاركات المنشورة على الصفحة.

هى طريقه تفتيح الجسم دى كل قد ايه اعملها وكمان ازاى متعرضش للضوء ضوء الشمس يعنى ولا الضوء العادى وشكرااا.

==========

رد بص وطل:
ممكن تعمليها بشكل يومي وبتعمليها بالليل قبل ما تنامي علشان ما تتعرضيش بها لأي إضاءة قوية زي ضوء الشمس أو أي إضاءة قوية.

انا عاوزة اعرف سر ان جسم الفناين كله لون واحد ودايما بيلمع نفسى يكون جسمى كده
وكمان وشى مش فيه حبوب اوى بس بحسه خشن وميرسى كتير ليكم بجد متميزين.

============

رد بص وطل:
ميرسي ليكي إنتي صديقتنا العزيزة على ذوقك ويا ريت تتابعينا دايماً، وبالنسبة لخشونة وشك فإنتي ممكن تعملي ماسك الترمس لإنه بيفتح البشرة وبينعمها جداً.

انا معنديش عصارة برتقال بالكهرباء عايزة طريقة للحصول علي عصير الفجل لو سمحتي.

============

رد بص وطل:
ممكن تبشريه كويس أوي بالمبشرة العادية على الناحية الناعمة، وبعد كده تضربي اللي بشرتيه في الخلاط وممكن تضيفي كمية صغيرة مية.

ميرسى ليكى يا رانيا على المعلومات الجميلة دى بس بليز عندى سؤال انا بشرتى بيضا وماكنتش بستخدم البودرة المائية بس بدأت اتعود عليها وبشرتى ظهرت فيها بثور سوداء كتير تحت الجلد ودهون تحت الجلد وحبوب بليز قولي لى اعمل ايه.

==========

رد بص وطل:
صديقتي العزيزة بلاش تستخدمي البودرة المائية لإنها تقيلة جداً على البشرة ومش من السهل إنك تنضفيها من على بشرتك، ويا ريت تبطلي تستخدميها لإنها هي السبب في المشاكل اللي حصلت لبشرتك، وبالنسبة للبثور السوداء فممكن تعملي لها ماسك الفجل اللي موجود في العدد وبالنسبة للحبوب فممكن تعملي لها ماسك حبة البركة.

طيب بالنسبة لكمادات اللبن طريقتها ازاي وشكرا.

============

رد بص وطل:
كمادات اللبن بتعمليها بإنك تجيبي منديل وتغمسيه في طبق فيه لبن وتحطيه على عينيكي، وتسيبيه شوية وإنتي مسترخية، وممكن تكرري الطريقة دي 3 أو 4 مرات ورا بعض.

انا عايزة اعرف ازاي الترمس المطحون بيستخدم لتخفيف ظهور الشعر وشكرا...

=============

رد بص وطل:
الترمس بيستخدم في تقليل نمو الشعر بإنك تنقعي الترمس العادي مش المطحون في مية لمدة 6 ساعات وتاخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر، وبتستمري على كده لمدة 3 أسابيع يوميا.

انا عندي سؤال مهم هو الحاجات دي تنفع للشباب الرجالة ولا خاصة بالبنات وبس؟؟ يا ريت الرد.

==========

رد بص وطل:
لا طبعاً، الوصفات دي تنقع للشباب والبنات.

ميرسي علي الوصفات التحفه دي يا رانيا انا عندي مشكله في منطقه الفخدين والابط
انها غامقه اوي وجربت اكتر من وصفه وبخاف احط كريمات في المنطقه دي عشان حساسه
فعايزه وصفه لتفتيح المنااطق دي بعد اذنك.

===========

رد بص وطل:
ممكن تجربي الوصفة دي للمناطق الحساسة في جسمك وهي عبارة عن زيت زيتون + زيت لوز + دقيق خشن (دقيق البسيسة)
الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.

بجد انتم اكتر موقع انا بحبه وعلى طول بستفيد جدا منه انا بس كان نفسى اعرف طريقة تتخن الوش ضرورى لان الموضوع ده مضايقنى اوى وكمان انا جسمى حلو الحمد لله بس عندى مشكلة السليوليت بليز لو بردو فى طريقة علشان اتخلص منه انا سمعت عن كريمات واجهزة مساج وكدة بس انا مش عارفة ومحتاجة رايكم ضرورى قبل شهر 10.

============

رد بص وطل:
دي وصفة طبيعية ممكن تجربيها لعلاج مشكلة نحافة الوجه وهي عبارة عن خميرة + ماء ورد وبتحطي الماسك ده على بشرتك لمدة ربع ساعة وبعد كده تشطفي وشك بماء الورد، ومع الاستمرار هتلاقي نتيجة.

بصو بقي انا مشكلتي مجنناني وكسفاني اوي اوي كنت بهرش في رجلي ولحد ما يخرج الدم من الحبوب وعملت دلوقتي اثار بني وفي وشي كمان وفرحي قرب ممكن كمان 8 شهور فعاوزه حل ضروري عشان انا بنكسف حد يشوف رجلي بالبقع دي ومابلبسش حاجه قصيره ابدا ادام اي حد، شوفوا لي حل وربنا يجازيكم خير مش عارفه اعمل ايه ويا تري ممكن رجلي ترجع زي الاول بيضه وكويسه واقدر البس اي حاجه ادام اي حد؟ ساعدووووووووووووووووووووووووووووووووووووووووووووووووووووووني.

==============

رد بص وطل:
ممكن تعملي ماسك الفجل لتفتيح البقع الغامقة، بس لازم تعرفي إن الموضوع هيحتاج لوقت وممكن تسستشيري دكتور علشان يديكي كريم مناسب لتفتيح أماكن البقع دي.

انا عايزة ماسك لتفتيح وتوحيد لون البشرة بس يكون مفعوله سريع لاني فرحي قرب وفاضل شهر انا كنت بعمل الزبادي بالليمون بس سمعت ان الحاجات اللي فيها قيتامين سي بتساعد على امتصاص البشرة لآشعة الشمس بسرعة وبتسود.

==========

رد بص وطل:
ماسك الزبادي بالليمون كويس جداً بس مش لازم تتعرضي به للشمس لإن الليمون مش لازم نتعرض به لضوء شديد يعني ممكن تعمليه بالليل وتغسليه قبل ما تنامي، وممكن تعملي كمان ماسك الترمس اللي موجود في العدد، وتعمليه مرتين في الأسبوع وتسيبيه على بشرتك لمدة ساعة.

بصراحة العدد دةحلو قوي بس انا كنت عايزة اسألك انا شايفة انك قلتي كذا حاجة للتفتيح الاماكن الغامقة بس انا كنت عايزة حاجة واحدة لكل الجسم وخاصة الاماكن الغامقة زي البكيني والابط والركب والاكواع، وحاجة طبيعية وتخلي الجسم صافي وحلو.

===========

رد بص وطل:
ممكن تعملي ماسك الترمس لبشرة وشك وجسمك في الأماكن الغامقة زي الكوع والركبة، أما منطقة تحت الابط وخط البكيني ممكن تعملي لهم الوصفة دي وهي عبارة عن زيت زيتون + زيت لوز + دقيق خشن (دقيق البسيسة)
الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.

بجد ميرسي ليكى يا رانيا العدد هايل بس حبيبة قلبى كنت عوزاكى تقولي لى اعمل اية انا لما بحط زيت زيتون تحت عينى وبمشى عكس عقارب الساعة بقوم الصبح بحس عينى كانها ورمة بس مش اوى فكنت عاوزة اعرف دة عادى ولا اية وهل فى حاجة ممكن امسح بيها عينى أو اغسل بيها بدل المياة عشان اتاكد ان عينى راح منها الزيت نهائى ياريت تفيدينى يا رانيا.

==========

رد بص وطل:
زيت الزيتون مش بيسبب ورم العين ولا حاجة وممكن تغسليه الصبح بالغسول المناسب لنوع بشرتك علشان تتأكدي إنك تخلصتي من كل الآثار الدهنية على بشرتك.

انا فيه فى خدودى شعر واسود باين ومش عارفة اعمل اية وحاولت كمان اعمله بالفتلة بس مش بيطلع لانه صغير ومضايقنى قوى لانة باين.

============

رد بص وطل:
ممكن تعملي له تشقير.

موضوع رائع هل هناك وصفة لعلاج ترهل جلد البطن بعد الحمل حيث ان الجلد كان مشدود بشدة لانى كنت حامل فى توأم و ترهل الجلد جدا بعد الولادة شكرا.

=============

رد بص وطل:
ترهل الجلد علاجه الوحيد هو ممارسة التمارين الرياضية فنها بتشد الجسم وبتعالج ترهل الجلد.

بجد رآئع تسلموآ

ميرسى يا رانيا اوووى على الماسكات الحلوة دى بليز انا كنت عايزه اعرف حاجه للشعر تطوله وتنعمه وتزيل القشره يعنى انا عايزه برنامج للشعر لعلاجه وانا من النوع اللي بستمر على الخلطات لو حسيت بفائدتها انا جربت المايونيز ولقيت ناس كتير قالت عليه حلو اوووى وناس تانيه تقول مش حلو ويؤدى لسقوطه بعد استخدامه بفتره فبعدت عنه بليز يا رانيا محتاجه الرد اووووى مستنيه الرد وميرسى مقدما

==========

رد بص وطل:
طيب تابعينا والاسبوع الجي هنتكلم عن كل الوصفات الخاصة بالشعر.

انا بحب الموقع قوى وكتير بتفيدونا بكل اعدادكم عايزة اعرف لوشن تفتيح الجسم نحطه على الجسم مدة قد اية وكام مرة نستعملة وهل نشطف الجسم بعد كل استعمال؟ ميرسى ليكى.

============

رد بص وطل:
ممكن تحطيه على جسمك من بالليل للصبح، وتغسلي جسمك الصبح مع حمامك اليومي بس أهم حاجة إنك ما تتعرضيش به لإضاءة قوية.

انا عايزة اسم غسول كويس للمنطقة الحساسة ويكون مطهر في نفس الوقت ويعمل رائحة حلوة.

============

رد بص وطل:
يفضل إنك ما تستعمليش أي غسول للمنطقة دي إلا بعد مراجعة دكتور متخصص.

بجد شكرا على الوصفات الجميله دي انا كان عندي سؤال انا وشي ماكنش في حبوب خالص لكن لما عملته بالفتله والشمع طلع فيه حبوب كتير وفي مناطق اغمقت جامد مش عارفه ليه ممكن تقولي لي اعمل ايه واشيل الشعر اللي في وشي ازاي.

==============

رد بص وطل:
ممكن المناطق الغامقة اللي في وشك من آثار الحبوب تعملي لها ماسك الفجل، وبالنسبة لإزالة الشعر ممكن تعملي تشقير.

ميرسي علي المعلومات والموقع ده جامد اخر حاجة انا عندي كام سوال بس بليز تردو عليا ضروررررررري اولا انا شعري بعمله استشوار كتير أو بيبي ليس وسمعت ان المفروض ادهن شعري بالسيرم الأول وهو مبلول بس أنا عاوزة اعرف ايه السيرم ده وايه النوع الكويس هل سيرم زيرو فريز كويس ولا ايه والسيرم ده بيتعمل علي شعر ناشف ولا مبلول ازاي يعني استخدمه ثانيا عاوزة نوع شامبو كويس للشعر الجاف هيربل اسينسيز ولا زيرو فريز وكمان نوع حمام كريم كويس وانا سمعت ان فيه انواع كريم بيكون فيها كيراتين فياريت تقولي علي اسم حمام كريم كويس ثالثا لو عاوزة اعمل حنة لشعري ويكون اللون احمر شوية اضيف علي الحنة ايه رابعا عاوزة نوع صن بلوك كويس للبشرة الدهنية اسفة للاطالة والله بس ياريت تردوا عليّ.

=========

رد بص وطل:
طيب تابعينا الحلقة الجاية وهنكمل كلامنا عن العناية بالشعر بطرق طبيعية، ونصيحتي ليكي إنك تحاولي تقللي من السيشوار والمكواة على أد ما تقدري لإنهم بيسببوا تقصيف الشعر، والسيرم بتستخدميه على شعرك قبل السيشوار لإنه بيحمي الشعر من حرارة السيشوار، وبالنسبة لحمام الكريم ممكن تستعملي لوريال فنه من أحسن انواع حمامات الكريم، وبالنسبة للشامبو ممكن تستخدمي هيربل أو بانتين أو دوف.

انا ماما شعرها فى ابيض وهى بتحب تلونه بالحنه بس مش بيدى اللون اللى عايزه الخصل السودا مش بتلون لكن البيضه بتبقى لونها اورانج.
ــــــــــــــــــ
بالنسبه ليا
انا شعرى مش عارفه نوعيته ايه وبجدد على طول نوع الشامبو وبستخدم زيت فاتيكا
اوقات بلاقى شعرى بايظ خالص وخشن واوقات بلاقيه ناعم جدا وشعرى مش طويل ونفسي يطول ويبقى ناعم وعندى هالات سودا عند عينيا عايزه حاجه بسيطه ومش مكلفه تضيعها ووصفه ترجع بشرتى بيضه تانى ياريت تردوا عليا محتاجه الرد اوووووووووووى ياريت تردوا عليا.

=============

رد بص وطل:
يا ريت يا ساسو تقري العدد كويس وهتلاقي وصفات كتير للعناية بالشعر وللهالات السوداء ولتفتيح البشرة والعدد الجي هنكمل كلامنا عن الشعر والعناية به بوصفات طبيعية.

السلام عليكم هاى رانيا وصفاتك الطبيعية حلوة ممكن حل انا شعرى خشن وبيقع من اى حاجة ومقصف من الامام وعايزة طريقة لتنعيمه ومنع تقصفه من الامام وتساقط الشعر وشكرا منك.

===============

رد بص وطل:
طيب تابعينا الأسبوع الجي علشان هنكمل كلامنا عن العناية بالشعر بطرق طبيعية.

ميرسى يا جماعه على الموضوع الجميل ده انا استفدت قوى انا برضه فرحى كمان ثلاثه شهور وشعرى بايظ خالص ومقصف جدا ومش عارفه اعمل ايه تابعت مع دكتوره بس العلاج ماجبش اى نتيجه اصحابى نصحونى انى اقص الاطراف البايظه من كل شعرى حتى طوله دلوقتى مش مناسب ياريت تردوا عليا فى اقرب وقت.

=============

رد بص وطل:
ميرسي ليكي يا مشمش، وبالنسبةللشعر المقصف فالقص هو أفضل حل له، ويا ريت تتابعينا في العدد الجي علشان هنتكلم على بعض الوصفات الطبيعية لعلاج مشاكل الشعر.

اسرة بص وطل موقعى المفضل بحبكم اوى والله وكمان بثق فيكم جدا انا عندى مشكلة تساقط الشعر انا شعرى الحمد لله كان طويل وتقيل ففضل ينزل وبعدين كان مقصف قلت اقصه بس اتقص زيادة بقى قصير المهم اخد وقت حوالى سنة على ما طول شوية بس بردة ما طولش زى الاول كمان خف جدا ومش عارفة اعمل اية انا بثق فيكم انا شعرى عادى ياريت تقولوا لى على كريم استخدمة او نوع شامبو مناسب لشعرى العادى كمان تقولى على حاجة ترجع شعرى زى الاول تقيل وطويل بحبكم جدا وميرسى على كل حاجة.

========

رد بص وطل:
ميرسي ليكي يا موني على ذوقك ونتمنى إننا نفضل دايماً عند حسن ظنك، ويا ريت تتابعينا الاسبوع اللي جي علشان هنكمل وصفاتنا عن العناية بالشعر بطرق طبيعية، وبالنسبة للشامبو فإنتي ممكن تستخدمي شامبو بانتين أو هيربل اسينسز وبالنسبة لحمام الكريم ممكن تستخدمي لوريال.

انا بشكرك جدا على المعلومات القيمة بس كنت عايزه استفسر بالنسبه للوشن تفتيح الجسم حضرتك بتقولي ما نتعرضش للضوء المقصود بيه ضوء المنزل العادي ولا ضوء الشمس ياريت التوضيح وشكرا.

===========

رد بص وطل:
المقصود إنك ما تتعرضيش لأي إضاءة قوية سواء كانت ضوء الشمس أو ضوء كشاف قوي.