بالفيديو.. أحدث قصات الشعر لعام 2010

هااااااااااى عليكى بجد ميرسى أوي أنا عاوزة حاجة تطول الشعر وتخليه طرى يا ريت تقولي لى.

===============

رد بص وطل:
ميرسي ليكي إنتي يا سوسو على متابعتك لينا وعلى تعليقك الجميل، وبالنسبة لسؤالك فعلشان شعرك ينمو بطريقة طبيعية لازم تهتمي جداً بالتغذية الصحية الللي بتحتوي على كل العناصر الغذائية اللازمة لنمو الشعر بصورة طبيعية وكمان لازم تعملي بعض التحاليل علشان تعرفي إذا كان عندك أنيميا أو اي سبب عضوي تاني بيبطيء من عملية نمو شعرك، وبالتالي تبدأي تعالجي السبب ده علشان شعرك ينمو بطريقة طبيعية ودي وصفة طبيعية ممكن تجربيها لإنها بتقوي الشعر وبتساعد على تطويله وهي عبارة عن علبة زبادي ومعلقة حبة البركة مطحونة (ودي هتلاقيها عند العطار) ومعلقة زيت زيتون.
الطريقة
أخلطي المكونات دي كلها مع بعضها وبعد كده حطيهم على شعرك لمدة ثلاث أو أربع ساعات وطبعا غطي شعرك ببونيه، وبعد مرور 3 ساعات أغسلي شعرك بالشامبو والبلسم المناسبين وكرري الموضوع ده مرتين في الاسبوع لمدة شهر وإن شاء الله هتلاقي نتيجة هايلة.

hi Eman, kont 3aiza minik talab , 2na bashrety dohnya w kont 3aiza sun screener monaseeb w yareet lw t2olily 2sm marketo w yekon motawafer fe alex , thnx alot

=================

رد بص وطل:
فيه ماركات كتير كويسة ممكن تستعمليها ومتوفرة في كل مكان، زي لونا أو فوتو ديرم ماكس.

ميرسى يا ايمى على مجهودك الجميل اللي بتقدميه لنا، عندي سؤال ياريت تجاوبينى عليه، انا مشكلتى عندى حبوب فى ظهرى زى اللي بتكون في الوجه اللى هى حب الشباب ومش عارفه اعمل ايه فيها وبتكون أكتر عند الاكتاف ياريت لو أي وصفة سهلة أو أي حاجة اعملها علشان تنتهي.

===============

رد بص وطل:
حبوب الظهر دي لها أسباب كتيرة، وعلشان تتجنبي ظهورها كل ما عليكي إنك تهتمي أكتر بالنظافة الشخصية والاستحمام اليومي للتخلص الشوائب والدهون الزائدة اللي بتساعد على نمو الجراثيم وانسداد المسامات، وكمان لازم تهتمي جداً بنظافة ملايات السرير اللي بتنامي عليه، وكمان نظافة الملابس اللي بتكون ملتصقة مباشرة بالجسم، وحاولي تلبسي دايماً ملابس داخلية مصنوعة من القطن علشان تمتص العرق والرطوبة، واوعي تنسي كمان نظافة الشعر، وخصوصاً إذا كان شعرك طويل، ولو ظهرت عندك الحبوب فإنتي لازم تهتمي جداً بتنظيف المناطق الملتهبة بإنك تمسحيها بالمناديل المعقمة بعد ما تاخدي حمامك اليومي، وفيه كمان مطهرات موجودة في الصيدليات، ممكن تجيبيها وتمسحي بها ظهرك باستخدام قطنة مبللة بالمحلول ده.

هو ايه لوريال اللي قال عليها دي في الفيديو؟ وأنا بقى شعري عجيب هو دهني لكن اطرافه جافة استعمل اللوريال ده بايه؟ يعني لوريال بخلاصة ايه عشان يناسب شعري ده؟ وكمان انا عندي شعر ابيض بدأ يبقى كتير ومش عاوزة اعمل حنة عشان لونها الاحمر ده بيضايقني جدا والضبغة هتجيب اجل شعري اعمل ايه انا بقى؟

================

رد بص وطل:
لوريال ده هو اسم ماركة لمنتجات خاصة بالعناية بالبشرة والشعر، وحمام الكريم ماركة لوريال من أفضل حمامات الكريم اللي ممكن تستخدميها لشعرك، وهو موجود في الصيدليات الكبيرة أو في المحلات الكبيرة اللي بتبيع مستحضرات التجميل وتقدري تسألي المتخصص وإنتي بتشتري الكريم عن النوع المناسب لشعرك، أما بالنسبة لمشكلة الشعر الأبيض فيا ريت تتابعينا وقريب جداً هنعمل لك عدد خاص بالموضوع ده.. فانتظرينا.

بليز حد يرد علي، أنا أول مرة ابعت خالص وعايزة اسأل أنا عينيا واسعة وحواجبى فى مسافة بينهم وبين عينيا كتير وخفاف يعنى الشعر بيطلع دايما من ورا بس اى رسمة تبقى حلوة معاهم وسوال تانى بليز وشى فى حاجات حوالين الانف وتحت العين لما بحسس عليها زى ما تكون حبوب او حاجات خشنة مش عارفة اعمل فيها ايه.. يا ريت ما تكسفونيش وحد يعبرني.

===============

رد بص وطل:
واحنا سعداء جداً بوجودك معانا يا ريم ونتمنى إنك تتابعينا باستمرار وتبعتي لنا كل أسئلتك واستفساراتك، وبالنسبة لسؤالك عن ماكياج العينين فاحب اقول لك إن العين الواسعة دايماً بتحب الألوان الغامقة وكمان تقدري تحطي فيها كحل غامق من جوه لإنه بيبروزها وبيخلي شكلها حلو وجذاب وبالنسبة للحواجب فإنتي تقدري تتقليها باستخدام بودرة الحواجب وياريت تتفرجي على حلقات الماكياج اللي موجودة على قمر 14 وإنتي تعرفي طرق مختلفة لرسم العينين، أما بالنسبة لمشكلة بشرتك فدي تقدري تحليها بعمل سنفرة للبشرة وكمان حمام البخار مرة في الاسبوع.

السلام عليكم ازيك يا ايمى يا قمر على فكره انا بحبك جداااااااااااا وبجد شكرا على المجهود الرائع اللى بتبذليه علشانا، وانا بقى مشكلتى اللى خلاص زهقتنى هى شعرى هو فتلته ناعمه بس مموج ومش عارفه اخليه مفرود ازاى روحت علشان اعمله فرد، الكوافيرة قالت لى مش ينفع شعرك هيتحرق جبت بكر علشان يتفرد ومش عارفه استخدمه خالص مع العلم ان شعرى قصير وعلى طول هايش نفسى اوى بجد شعرى الموجه اللى فيه تختفى ويكون مفرود وأسفة لإني طولت عليكي.

=================

رد بص وطل:
وأنا كمان بحبكم جداً، وميرسي بجد على كلامك، وبالنسبة لمشكلة شعرك فاهم حاجة احب اقولها لك إنك ماتحاوليش خالص تفكري في فرد الشعر بالكيماويات لإنه بجد هيدمر لك شعرك، ولو عايزة تحافظي عليه وتعتني به يبقى اهتمي بالتغذية الصحية واللي بتحتوي على الفيتامينات اللازمة لنمو الشعر، وتقدري تعملي له حمام كريم مرة في الأسبوع، ودي كمان وصفة طبيعية كويسة جداً بتساعد على فرد تموجات الشعر وهي عبارة عن صفار بيضة واحدة +
نصف ملعقة زيت زيتون + كوب إلا ربع من الماء الفاتر.

الطريقة:
اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق قبل ما تشطفي شعرك.

شعري خفيف جدا ودايما بيقع بطريقة مستمرة مش عارفه اعمل ايه فيه مافيش طريقه تمنع وسقوطه باستمرار وتطوله؟ في سؤال كمان أنا خطوبتي قربت وكنت عاوزه مجموعه ماسكات لبشرتي للعلم ان بشرتي دهنية؟ وعاوزة اعرف نوع سنفرة يكون كويس؟

===============

رد بص وطل:
فيه طريقة سهلة ممكن تعمليها علشان تحافظي على شعرك وتمنعي تساقطه وكمان تساعديه على نمو الشعر، وهي إنك تدلكي فروة رأسك بأطراف اصابعك كل يوم بعصير الجرجير وتسيبيه على شعرك من غير غسيل وبتغسلي شعرك مرتين بس في الأسبوع، أما بخصوص البشرة الدهنية فده ماسك سنفرة كويس ممكن تجربيه وهو عبارة عن ردة + ماء ورد.

الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة، وبعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف، وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها، ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. وأكيد لما تجربيه هتشعري بده.

ودي كمان مجموعة ماسكات تانية للبشرة الدهنية ممكن تختاري اللي يناسبك منها..

ماسك الطماطم
وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.
المكونات:
ثمره طماطم.
قشر نصف ليمونة.
عصير ليمون.
الطريقة:
اهرسي ثمرة الطماطم وضيفي إليها بشر قشر الليمون وعصير الليمون.
وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.

ماسك شرائح الخيار
وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك

ماسك الخميرة
المكونات:
خميرة بيرة (هتجيبيها من عند أي فرن أو حلواني).
ماء ورد.
الطريقة:
اخلطي الخميرة البيرة مع ماء الورد، بس خلّي بالك إنك تحصلي على قوام غليظ يشبه العجينة، وادهني بيها وشك ورقبتك على الأقل لمدة ربع ساعة.وبعد كده اشطفي وشك بالماء الدافئ كذا مرة لغاية ما تتأكدي إنه مافيش أي أثر للخميرة على وشك.

هاى يا ايمان بجد تحفه ميرسى على كل الحاجات الحلوه دي.. كنت عاوزه اسألك انا بشرتى مختلطه انهى كريم افضل "لوريال ولا oriflame وانا عندى 17 سنه, وانا بستعمل ماسك الزبادى والليمون بقالى شهر بس معملش حاجه هل لسه المده دي قصيرة وهو انا لازم احط كوباية زبادى كامله ولا كفاية على بشرتى معلقتان زبادى, وهل اعمل وشى دلوقتى ولا لا علشان فيه شعر كتير ميرسى لكى يا قمر.

================

رد بص وطل:
نوعين الكريم اللي قولتي عليهم كويسين وممكن تستخدمي اي واحد منهم، وبالنسبة لماسك الزبادي بالليمون فهو فعال جداً في تفتيح البشرة بس إنتي واظبي عليه، وبتعملي الكمية اللي بتحتاجيها مش لازم الكوباية كاملة وممكن تعمليها كلها وتحطيها في الثلاجة وتستعملي منها كل ما تحتاجي.

كيف أكون جميلة؟ كيف يصبح شعرى طويل بسرعة؟ كيفية التخلص من النمش والبقع الغامقة في الخدود؟ كيفية اخفاء الشعر الابيض بدون صبغات؟ مشكورين.

=================

رد بص وطل:
بصي يا "يويو" الشعر بيطول بمعدلات مختلفة من شخص لآخر على حسب طبيعة جسمك والتغذية اللي بتحصلي عليها، ولو كان شعرك بيطول ببطء أو مش بيطول خالص يبقى لازم تستشيري دكتور أمراض جلدية علشان تعرفي السبب وتعالجيه، أما بالنسبة لمشكلة النمش والبقع الغامقة في الوجه فدي سببها بيكون جفاف البشرة والتعرض للشمس لفترات طويلة وكمان سوء التغذية وعشان تعالجي المشكلة دي ممكن تعملي الماسك ده وهو بيتكون من (معلقتين عسل + معلقة عصير ليمون + معلقة ترمس مطحون + بياض بيضة واحدة) وبتخلطي المكونات دي مع بعضها كويس وتفردي الخليط على وشك وتسيبيه من 20 لـ 30 دقيقة وبعد كده تغسلي وشك بماء ساخن وبعده ماء بارد، وممكن تعملي الماسك ده كل يوم عشان تحسي بالنتيجة.
أما بالنسبة لمشكلة الشعر الأبيض فإنتي ممكن تعالجيه بالحنة.

السلام عليكم.. لو سمحت كنت عاوزة اسألك انا شعرى متوسط الطول وكيرلى وبيقع اوى بطول الشعر ومقصف قولت يمكن علشان مش بقصه خالص تفتكرى هو ده الحل بتاعه مع العلم ان هو مقصف من اوله لاخره ولو قصيته انهى قصة تنفع معاه واعمل ايه فى التقصيف اللى فيه.. معلش لو كنت طولت.

===================

رد بص وطل:
صديقتنا العزيزة الشعر من أكتر الحاجات اللي بتتأثر بصحة الجسم وكمان بالحالة النفسية، وعلشان تعالجيه يبقى لازم تستشيري دكتور أمراض جلدية وتعملي بعض التحاليل والفحوصات علشان تعرفي أيه سبب تقصيفه وتساقطه، لإن ممكن يكون عندك أنيميا أو نقص فيتامين معين في الجسم، ولما تعرفي السبب لازم تعالجيه علشان تقضي على المشكلة دي نهائي ودي كمان وصفة هايلة لعلاج تقصف الشعر وضعفه وهي عبارة عن موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

انا اريد وصفة لحب الشباب بليز اريد الرد السريع.

================

رد بص وطل:
حب الشباب أحسن حل له إنك ماتلعبيش فيه وتسيبيه وهو هيروح لوحده بعد فترة، بس لازم تهتمي جداً بنظافة بشرتك وتقدري تستخدمي صابونة طبية زي ديتول مثلا، وكمان لازم تهتمي بنظافة حاجاتك الشخصية وماتخليش حد تاني يستعملها معاكي، ولو عايزة تستعملي اي علاج لها يبقى لازم تستشيري دكتور أمراض جلدية.

هاى ايمى ازيك يا حبيبتى اشتقتلك كتير لوسمحتى عاوزه اسئلك على حاجه بره الموضوع انا اختى هتتجوز قريب وانا جبت الحمام المغربى من عند العطار هو عطانى حاجات كتيره زى سنفره ومقشر وكريم مرطب ومسك وكانوا منتجات اصاله هل منتجات اصاله كويسه ومضمونه ولا لا وميرسى ليكى.

==================

رد بص وطل:
ربنا يتمم لها على خير إن شاء الله، ومنتجات أصالة دي كويسة.

هاى ايمان

ازيك يا ايمان كان ليا سؤال.. انا بشرتى دهنيه ومش عارفه احط ايه باودر مائى ولا كريم اساس انا بحط باودر مائى بس بعد فتره بتسيح وبيكون شكلها وحش وانا عمرى ما حطيت كريم اساس بس كنت عاوزاكى تقولي لى ازاى اخلى الباودر المائي مايسيحش خصوصا في الصيف، لان فى الشتا بتفضل كويسه وزى ما هى وميرسى جدا ليكى.

==================

رد بص وطل:
بصي يا اموله احنا نصحنا كتير وقولنا إن البودرة المائية دي مضرة جداً للبشرة، والافضل ليكي إنك تستخدمي كريم الأساس، بس خلي بالك إن كريم الاساس اللي بتستعمليه يكون فري اويل او خالي من الدهون، وبعد كده تثبتيه بالبودرة السايبة

هاى ازيك يا ايمى عامله ايه؟
يارب تكونى بخير يا قمر
كنت عايزة اسألك على كام حاجه
انا اشتريت كريم اساس ماكس فكتور اشتريت درجه لونى او افتح سنه من لونى عايزة اعرف لو جيبت بودرة سايبه اجيبها افتح ولا لونى برضو؟
وهي البودرة السايبه بيبقى نوعها كريمى ولا نوعها حاجه تانيه؟
وايه هيا البودرة المضيئه؟
وانا عندى فستان سهرة الجيبه لونها موف وعليها طبقه تل اسود والبلوزه لونها اسود ومرسوم فيها بموف بيلمع
عايزة اعرف البس عليها بدى لونه ايه واجيب شال للفستان لونه ايه؟
وبرضو عايزة اعرف لون الأيشاربات المفروض يكون ايه؟
علشان انا بجد محتاجه جدا اعرف
انا فكرت انى البس بندانه لونها اصفر وعليها ايشارب لونه اسود وعليه ايشارب لونه موف ينفع ولا مينفعش ؟
ياريت تجاوبينى على اسئلتى علشان محتاجه الرد عليها فى أقرب وقت
=================

رد بص وطل
بالنسبة للبودره السايبة فدي بنستخدمها بعد وضع كريم الاساس علشان نثبته ونخلي شكله أجمل وطبيعي أكتر ويفضل إنها تكون بنفس لون البشرة،
أما بالنسبة للبودرة الحره أو المضيئه فدي بتدى اضاءه للوجه والجسم.
وبالنسبة للبدى فممكن تختارى بدى لونه موف هادى أما الشال فيكون أغمق منه بدرجه، أما لون الإيشاربات فأنتي ممكن تدمجى بين طرحة لونها أسود ويكون فيها لمعة خفيفة مع طرحة لونها موف زاهى وممكن تستخدمى معاهم بندانه فضى عشان تنور الوش.

انا عاوزة وصفات للتفتيح من أشعة الشمس وتكون سريعة وبالنسبة للشعر انا شعرى خفيف وطويل بس نفسى يتقل قولي لى وصفة ليه وهل اللبن مفيد للبشرة فعلا ؟؟
==============

رد بص وطل
صديقتى بالنسبة لبشرتك فممكن تحافظى عليها من أشعة الشمس الضارة عن طريق إستخدام صن بلوك المناسب لبشرتك قبل ما تخرجي في الشمس بربع ساعة، وده كمان ماسك طبيعي عشان يفتح آثار اسمرار البشرة بسبب الشمس و هو عبارة عن معلقة صغيرة من الماء اللي بيتكون على سطح الزبادي + عصير نصف ليمونة و بتخلطيهم مع بعض كويس وبعد كده تحطي الخليط على وشك بس خلي بالك إن الخليط مايجيش عند منطقة العيون وتسيبيه لمدة ساعتين وبعد كده تغسلي وشك وهتلاقي نتيجة سريعة وهايلة ان شاء الله .
أما بالنسبة لشعرك فدى وصفة لتطويل الشعر ولمعانه وحيويته
1- كوب زيت جوز الهند
2-ربطة بقدونس
3- ملعقتين حناء
وكل اللي عليكي إنك تجففى ربطة البقدونس وتخلطيها مع الزيت والحناء
وتسخنيهم على النار وتشيليه عندك وبتستعمليه مرتين في الاسبوع، وان شاء الله هتلاقي نتائج رائعة.
أما بالنسبة للبن فهو مفيد جدا للبشره بمختلف انواعها فهو يحافظ على نظافة البشرة ومن أهم أسباب نضارتها، وهو عنصر اساسى فى اغلب الماسكات.

ميرسى يا ايمان بس كنت عايزة اعرف المادة اللزجة الموجودة فى الصبار اجيبها منين؟ لانى اول مرة اسمع عنها وكمان معلش دايما بسمع ان الزيوت بتغمق الشعر فكنت عايزة اعرف وصفة تانية مش فيها زيوت او حاجة تتحط مع الزيت تخليه مايأثرش على لون الشعر لانى انا اول لما عرفت انها بتغمق لون الشعر توقفت عن استخدام اى نوع من انواع الزيوت فورا وبدات استعمل كريمات العناية بالشعر اللى هى بتاعت التغذية والحماية من التساقط رغم ان طول عمرى ماكنت بحط كريم او زيت ومعرفش اية اللى حصل لشعرى ماكنش كده خالص والمشكله ان لو فات يوم او يومين من غير ما احط كريم على شعرى بيبقى هايش جدا وببقى مضايقة واسفة على الاطالة وبشكركم بجد على مجهودكم الرائع .
====================

رد بص وطل
بالنسبة للمادة اللزجة اللى فى الصبار فتقدرى تحصلى عليها عن طريق إنك تجيبي ورقة صبار وتفتحيها من النص وتاخدي المادة اللزجة اللي جواها، وورقة الصبار دي سهل تحصلي عليها سواء من عند العطار أو من نبات الصبار نفسه، وكمان تقدري تجيبي خلاصة نبات الصبار جاهزة من عند العطار.
وبالنسبة لمشكلة شعرك فدي بسبب إنك عودتيه على استخدام الزيوت والكريمات وبكده شعرك اصبح غير قادر على إفراز زيوته الطبيعية، وعلشان يرجع زي الاول حاولي تقللي استخدام الزيوت بالتدريج لغاية ما توقفيها خالص ويرجع شعرك قادر على افراز الزيوت الطبيعية فيه، ولكن الموضوع ده هيحتاج لبعض الوقت.

كنت عايزه اعرف ياريت بالنسبه لشعري جاف حمام الكريم المناسب ليه اجيبه بالزيتون ولا جوز الهند ولا الاتنين كويسين للشعر الجاف؟ وكان عندي استفسار هو ممكن تكون بشرة وجهي دهنيه مختلطه وشعري يكون جاف عشان انا سالت دكتورة جلديه ومقتنعتش برايها انا شعري جاف وهايش وفي نفس الاوقت بشرتي بتفرز دهون على حرف T ياريت تفيدوني في الموضوع ده واسفه على الاطاله وبشكركم كتير .
=======================

رد بص وطل
شكرا يا ميرنا، وبالنسبة للشعر الجاف فهو بيحتاج للزيوت وعلشان كده تقدري تستخدمي حمامات الكريم بزيت جوز الهند أو زيت الزيتون، ومن الأفضل إنك ما تغسليش شعرك كتير عشان ما يفقدش كمية الدهون القليلة اللى موجودة فيه، أما بالنسبة لشعرك من الممكن أنه يكون جاف وبشرتك دهنية.

بشكركم على المجهود اللي بتبذلوه عشان نكون في احسن صوره انا كان عندي سؤال انا بشرتي دهنيه مختلطه يعني على حرفT كنت عايزه اعرف المنظف والتونر بخلاصة شجرة الشاي يكون مناسب لبشرتي ولو مش مناسب ايه المناسب لبشرتي ؟ وميرسي ليكو جدا
===============
رد بص وطل
ميرسى يا ميرنا واحنا طبعا يهمنا أن كل صديقات بص وطل يبقوا دايما فى أجمل صورة وبالنسبة للتونر اللى بخلاصة شجرة الشاى فهو مناسب جدا لبشرتك لانة منظف وبيشيل الأثار الدهنية اللى بتتسبب فى ظهور البثور السوداء.

السلام عليكم أنا عندى مشكلتين الأولى بشرتى أحيانا تبقى صافيه وأحيانا يطلع فيها بقع بنى والمنطقة اللى تحت الفم غامقه عن باقى البشرة وانا بشرتى مختلطه جافه على الخدود وحرف t شبه دهنى وبيطلع لى حبوب فى الخدود إيه الماسكات اللى اعملها لبشرتى مع العلم إنى متعرضة للشمس بشكل شبه يومى وكمان شعرى بينزل بطريقه صعبه وكان عادى بقى شبه جاف وبيتقصف.
===================

رد بص وطل
بالنسبة للبقع البنى فدي وصفة سهلة جداً لتفتحيها
الطريقة:
قشري ثلاث حبات لوز وانقعيها في الماء وبعدين اطحنيها، وبعد كده تضيفي ملعقة صغيرة من عصير الليمون و بياض بيضة واحدة لعجينة اللوز وبعديد حطي طبقة من الخليط ده فوق البقع وبعدين اشطفي وجهك بماء فاتر بعد 15 دقيقة, كرري الماسك ده يومياً علشان تحسي بالفرق، ولازم كمان تهتمي بترطيب بشرتك يومياً، وكمان لازم تواظبي على استخدام واقي من الشمس في كل مرة هتتعرضي فيها للشمس لإنه بيحمي البشرة من الجفاف اللي بتسببه آشعة الشمس الضارة.

وده كمان ماسك هايل لإعادة التوازن للبشرة المختلطة، وهو ماسك البطاطس..
المكونات:
بطاطس مسلوقة.
معقتين كبار زبادي.
معلقة كبيرة نشا.
3 معالق كبيرة دقيق ذرة.
ربع معلقة صغيرة زيت زيتون.
4 معالق كبيرة من ماء الأرز المسلوق.
طريقة التحضير:
اهرسي البطاطس واخلطي المكونات مع بعضها في الخلاط، وبعدين إفردي الماسك على وجهك واتركيه لمدة 10 دقائق، ثم اغسليه بالماء البارد.

أما بالنسبة لشعرك فإنتي لازم تحافظي عليه بإنك تستخدمي الشامبو المناسب لنوع شعرك وكمان حاولي تقللي من عمل الشعر بالمكواة والسيشوار وكمان الصبغات، ودايماً اهتمي بتناول أكل صحي ومتوازن فيه الفيتامينات اللازمة للشعر زي الخس والجرجير والجزر والكبدة، وكمان عمل حمام كريم مغذي للشعر مرة كل أسبوع بيغذي الشعر وبيرطبه وبيحافظ عليه وممكن تستخدمي حمامات زي لوريال أو بوناويل.

لوووووووووو سمحتم لا تتجاهلوا الرساله
انا 18 سنه شعري طول شعر الموديل دى بس مقصف اووووى خاصه الاطراف
ارجوكم دلونى اعمل ايه دون الاضطرار الى قصه بشكل كبير وشكرا لكل اسرة بص وطل على المجهودات الجميله دى.

==============

رد بص وطل:
ميرسي ليكي يا روبي على ذوقك، وبالنسبة لشعرك فياريت تهتمي بعمل حمام كريم له مرة كل أسبوع، وكمان تقصي الأطراف على الأقل مرة كل 40 يوم. ودي وصفة هايلة ممكن تعمليها لعلاج تقصف الشعر وهي عبارة عن موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

ازيك يا ايمان حلوة الحلقة بس انا محجبة وكنت عايزة اعرف ازاى اهتم بشعرى وعايزة وصفة تكون كويسة للشعر الهايش وكمان يا ريت لو تعملوا حلقات كمان مع ممصمة لفات الطرح مروة البغدادى وشكرا ليكم.

===============

رد بص وطل:
طيب تابعينا ونوعدك إن قريب جداً هنعرض لكم حلقة جديدة مع مصممة لفات الطرح مروة البغدادي، وبالنسبة للعناية بشعرك وإنتي محجبة فكل اللي عليكي إنك ماتغطيش شعرك وهو مبلول، وكمان حاولي دايماً تلبسي باندانا قطن تحت الطرحة، احرصي على عمل حمام كريم لشعرك مرة كل أسبوع، ودي وصفة هايلة لعلاج مشكلة الشعر الهايش والمتقصف وهي عبارة عن المادة اللزجة اللي بتكون موجودة في الصبار وبتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو والبلسم المناسبين لنوع شعرك، وممكن تعملي حمام الزيت ده مرة كل أسبوع.

طيب انا شعرى متوسط اعمل ايه بقى هههههههههه عايزه فيديو ليا مليش دعوه