نصائح مصفف الشعر "محمد يونس" للعناية بالشعر

انا شعرى خفيف جداااااااا ومش عارفه اعمل معاه ايه مع العلم ان شعرى كان جميل جدا وكان طويل بس انا قصيته كذا مره دجراديه ومش بقى يطول وحاسه انه خف جداااااااااااااا ولسه بدأت استعمل دوف وجبت بنتين بديل الزيت وبحاول ارجعه تانى بس ياريت تقولي لى على اى وصفه لشعرى اعملها انا اول مره اشارك هنا بس موضوعاتكم مفيده ياريت تردى عليا وكمان أنا فرحي قريب ومش عارفه اعمل ايه.

============

رد بص وطل:
ألف مبروك مقدماً يا جومانه وربنا يتمم لك على خير إن شاء الله، وبالنسبة لشعرك فإنتي لازم تبداي تهتمي به من دلوقتي ونصيحتي ليكي إنك لازم تستشيري دكتور وتعملي بعض التحاليل علشان تعرفي إذا كان فيه سبب عضوي لمشكلة شعرك دي ولا لأ، وبالتالي تبدأي تعالجيها، وكمان فيه وصفة طبيعية وسهلة جداً ومفيدة جداً جداً وهي وصفة عصير الجرجير وكل اللي عليكي إنك تجيبي الجرجير وتضربيه في الخلاط كويس جداً وتصفي الميه بتاعته وتاخديها وتدلكي بها فروة رأسك بالراحة وبتكرري العملية دي كل يوم من غير ما بتغسلي شعرك بعدها، وبتغسلي شعرك مرة واحدة في الأسبوع، والوصفة دي بتساعد على تقوية بصيلات الشعر وإنبات الشعر وكمان بتقويه وتنعمه وكمان حاولي تعملي لشعرك حمام كريم مرة في الأسبوع، علشان تغذيه وترطبيه.

دى اول مره اشارك فيها معاكى يا ايمان بالله عليكى ردى عليّ علشان انا فى حيره شعرى عملت له فرد بالبيرماننت عند كوافير مشهور فى نوع الفرد ويعتبر هو الوحيد المتخصص فى مصر لكن عندى مشكله انه بقى خفيف وفيه تقصيف كتير وكمان تقطيع مع العلم إنى اشتريت من السنتر ده كل حمامات الكريم الخاصه بعد الفرد وكمان البلسم اعمل ايه لو مش عاوزه افرد تانى ارجوكى ردى عليّ.

==============

رد بص وطل:
أهلاً بيكي يا منى ونتمنى إنك تتابعينا دايماً وتبعتي لنا مشاركاتك باستمرار، وبالنسبة لمشكلتك فإحنا نبهنا كتير جداً عن خطر كريمات الفرد على الشعر مهما كانت غالية، لإن الكريمات دي بتحتوي على نسبة كبيرة من المواد الكيميائية اللي بتحرق الشعر وتضره وتسبب تقصفه وتساقطه، وللأسف الشعر بيعد فترة طويلة جداً بعده لغاية ما يتخلص من الآثار المدمرة له، وافضل حل ليكي دلوقتي إنك تهتمي بشعرك أكتر وتعامليه بمنتهى الحساسية لإنه ضعيف جداً، وواظبي على عمل حمام كريم مرة كل اسبوع، ولازم تعرفي إن العلاج هيحتاج لوقت طويل شوية، ودي كمان وصفة طبيعية كويسة جداً بتساعد على تقوية بصيلات الشعر وإعادة إنبات الشعر المتساقط وهي إنك تدلكي فروة رأسك يومياً بعصير الجرجير ومش بتغسلي شعرك بعده لكن بتغسلي شعرك مرة واحدة في الأسبوع بالشامبو المناسب، وممكن تستشيري دكتور أمراض جلدية علشان يديكي بعض العلاجات اللي تساعده على التخلص من المشكلة دي بسرعة.

انا فرحي كمان 3 شهور ومش عرفه اعمل ايه وشعري متقصف جدا وبستحدم زيت بردهان لو في اي نوع زيت تاني يكون كويس او هل الزيت ده كويس وبيساعد علي منع التقصف ولو في نصائح تانيه ياريت تقولوا لي عليها لاني مش عرفه اعمل ايه بجد او اعتني بصحتي وجمالي للفتره دي وان شاء الله لبعد كده انا بشكركم جدا لان الموقع ده ممتاز وانا بحبه جدا جدا وردكم علي المشتركين جميل ومريح وفعلا بيكون رد صح.

==============

رد بص وطل:
أهلاً بيكي يا بوشي وألف مبروك مقدماً ربنا يتمم على خير إن شاء الله، وبجد ميرسي على كلامك الرقيق.. وبخصوص سؤالك عن العناية بالشعر فاحب اقول لك إن فيه شوية حاجات أساسية المفروض تاخدي بالك منها وده لينك لعدد كامل بيتكلم عن الموضوع ده ممكن تقريه علشان تستفيدي منه http://boswtol.com/health-and-beauty/beauty-and-styling/10/february/17/8424

هاى ايمان انا اول مرة اشارك معاكم انا شعرى مش بيطول ومش عارفة السبب
ياريت تقولى لي وصفة انا شعرى طوله على الكتف.

===========

رد بص وطل:
أهلاً بيكي يا سمر صديقة عزيزة للموقع ونتمنى إنك تتابعينا وتشاركي معانا دايماً، وبالنسبة لسؤالك فنصيحتي ليكي إنك تستشيري دكتور علشان تعملي بعض التحاليل وتعرفي إيه سبب عجز شعرك عن النمو بصورة طبيعية وبعد كده تبدأي تعالجي المشكلة وبعدها إن شاء الله شعرك هينمو بصورة طبيعية بس لازم تعرفي إن علاج مشاكل الشعر بياخد وقت طويل شوية وعلشان كده لازم تصبري وتواظبي على العلاج.

السلام عليكم ورحمه الله وبركاته بصراحة الموقع ده رهيب ربنا يزيدكم علم ومعرفة ومفيد جدا

انا اول مرة اشترك معاكوا وكان عندى سؤال "انا عندى الجبهة عريضة اوى مخليانى شكلى مش حلو لما سألت كوافير قالى انتى ممكن تروحى لعطار وهيديكى اعشاب وهنعملها لك على طريقة البخار بس انا مش عارفة لو عملتها هتجيب نتيجة وشكلى يبقى احلى ولا هتبوظلى شكلى ياريت تفيدينى وتقولي لى لو فى طريقة تانية ممكن اعملها ؟؟" وشكراا

=========

رد بص وطل:

ميرسي ليكي جداً صديقتنا العزيزة على ذوقك، ونتمنى إننا فعلاً نكون بنقدر نفيدكم، وبخصوص سؤالك ففي الحقيقة أنا مش قادرة افهم ايه هي الأعشاب اللي بتقولي عليها وبتعمل إيه بالظبط، وعموماً لازم تعرفي إن كل واحد وله شكله اللي ربنا خلقه به وأكيد بيكون مناسب لينا جداً، والجبهة العريضة دي إنتي تقدري تداريها بحاجات بسيطة جداً مثلاً بإنك تلبسي باندانا وتجيبيها على قدام شوية أو تعملي الطرحة كروس من قدام، ولو كنتي مش محجبة فإنتي ممكن تقصي قصة ديجراديه بحيث تاكل شوية من مساحة الجبهة.

momken a3raf a7san no3 ma7lol lensies

===========
رد بص و طل:
صديقتنا نانا, أولاً لما بتشترى العدسات من مكان مضمون أو بتعمليها عند الدكتور بيكون مع العدسات المحلول المناسب, وبالنسبة لأنواع المحلول ففيه أنواع زي أوبتى فرى.

هاى يا ايمى مرسيي ليكى ياقمر على مجهودك الرائع بس كنت عاوزه اسأل عندى هالات سودا تحت عينى ونفسى فى ماسك يبيض البشره ويخليها نضره ومنوره وكمان يا ايمى عاوزه طريقه اقوى بيها شعرى ويمنعه من التساقط والتقصف واشكرك يا جميل.

=========

رد بص وطل:
اهلاً بيكى يا رونى, عشان تحلى مشكلة الهالات السودة أولا ً لازم تنامى كويس وتبعدى عن السهر والماسك ده هيساعدك تتخلصى من الهالات السوداء ومكوناته: نصف كوب خيار مبشور + بياض بيضة + 2 معلقة حليب.
الطريقة:
تخلط المكونات جيدا لعمل عجينة رقيقة وتترك على الوجه لمدة 20 دقيقة، ثم يشطف الوجه بالماء الفاتر ودي بتساعد على التخلص من الهالات السوداء وكمان بتساعد على تفتيح البشرة.
وبالنسبة لمشكلة شعرك حاولى تقصى أطراف شعرك كل فترة وكمان اعملي له حمام كريم مغذي مرة كل أسبوع، وكمان لازم تهتمي بالأكل الصحي والمتوازن لإن الشعر بيتأثر بصحة الجسم ودي كمان وصفة هايلة جداً ممكن تجربيها وهي وصفة الزيت الثلاثي ودي عبارة عن مجموعة من الزيوت اللي معروفة باسم الزيت الثلاثي وبتتكون من زيت الخروع + زيت اللوز المر + زيت الزيتون

الطريقة:
امزجي مقدارا متساويا من زيت الخروع واللوز المر والزيتون مع بعض داخل زجاجة، وبعد كده خدي شوية من مجموعة الزيوت دي ودلكي بيها فروة رأسك لمدة عشر دقائق قبل النوم، وبعد كده سرحي شعرك بمشط ذي أسنان متسعة، وبعد كده غطي شعرك بإيشارب مصنوع من القطن لغاية الصبح، وبعد كده اغسلي شعرك بالشامبو المناسب لنوع شعرك.

بصراحه انا أول مره ادخل الموقع ده بس اعجبت بيه موت، في سؤال مهم جدا انا قربت اتزوج ياريت اعرف اي نوع كريم استعمله لدهن الشعر بعد غسله بمعني اني اعمل حمام كريم وبس ولا ادهن الشعر برده وشكرا ليكي جدا.

=============

رد بص وطل:
أهلاً بيكي يا رؤى صديقة عزيزة على موقع بص وطل وباب صحة وجمال ونتمنى إنك تتابعينا دايماً وتبعتي لنا كل أسئلتك وتعليقاتك، وبالنسبة لسؤالك فالأفضل إنك تواظبي على عمل حمام كريم مرة كل أسبوع ومن أحسن الماركات لوريال وبوناويل.

انا فرحي في شهر سبعة ان شاء الله وبدأت فعلا اعمل وصفة الجرجير وهعمل كمان حمام كريم قولي لي اعمله ازاي؟ وانا شعري خفيف قولي لي ينفع اقصه ديجراديه؟ وقولي لي اهتم بشعري كمان ازاي؟ واخبار شامبو هيد اند شولدرز ايه؟ ولو حبيت اصبغه لون استخدم صبغة ايه؟ بس تكون كويسة وماتأثرش على شعري وتبوظه؟ وانا وشي مدور شويه ينفع الديجراديه معاه وايه لون الصبغة اللي يليق معايا؟

=============

رد بص وطل:
ألف مبروك مقدماً يا عروستنا الجميلة، ويا ريت تواظبي على عمل الماسكات المغذية لشعرك وبشرتك، وبالنسبة لطريقة عمل حمام الكريم فكل اللي عليكي إنك تغسلي شعرك كويس أوي بالشامبو المناسب لنوع شعرك وبعد كده توزعي الكريم على شعرك بطريقة متساوية وبكميات كبيرة وتدلكي فروة رأسك بايديكي وبعد كده تغطي شعرك ببونيه للشعر ويكون أحسن كمان لو حطيتي فوطة مبللة بماء ساخن على البونيه عشان الحرارة بتفتح مسام فروة الرأس وتخليها تمتص أكبر كمية من حمام الكريم وتسيبي حمام الكريم على شعرك من 20 لـ 30 دقيقة وبعد كده تشطفي شعرك كويس، وتنشفيه كويس بفوطة ناشفة وإنتي لسه في الحمام لإنك لو عرضتي شعرك لهواء بارد بعد حمام الكريم ممكن يضره، وبالنسبة للشامبو فإنتي ممكن تستخدمي شامبو هيربل أو بانتين، أما الصبغة فممكن تستعملي باليت، والقصة الديجراديه بتدي شكل أتقل للشعر، وبالنسبة للون الصبغة فدي ممكن تختاريها مع الكوافير بتاعك على حسب اللي يناسب لون بشرتك وعينيكي.

لو سمحتى انا عايزة اسأل هى كريمات التفتيح بتضر ولا لأ، يعنى انا جبت واحد من اوريفليم وانا عارفة ان حاجاتهم حلوة بس خايفة يكون غلط لو سمحتوا ردوا عليّ.

==============

رد بص وطل:
الأفضل إنك تستخدمي الماسكات الطبيعية لتفتيح البشرة، ولو هتستعملي كريم تفتيح مضمون يبقى بلاش تحطيه وتتعرضي به للشمس لإن بيكون فيه مواد بتتفاعل مع آشعة الشمس وممكن تضر البشرة.

أنا كنت عايزة اتقل حواجبى عشان رفعوا اوى و كنت بفكر احط لهم زيت خروع بس سمعت انه بعد كده بيوقع شعر الحواجب ده صح؟؟ شكرا جدا :)

==============

رد بص وطل:
زيت الخروع من أحسن الطرق الطبيعية لتكثيف شعر الحواجب بس لازم تجيبيه من مكان مضمون وتتأكدي إنه الزيت الأصلي.

انا شعرى طويل بس خفيف مش عارفه اعمل ايه دى اول حاجه أما تانى حاجه ان شعرى ناشف عاوزه حاجه تطريه شويه وتنعمه عشان يكون افضل.

============

رد بص وطل:
صديقتي العزيزة لازم تهتمي بشعرك أكتر وتعملي له حمامات كريم مرة كل أسبوع، وكمان بلاش تسرحيه وهو مبلول، ودي وصفة سهلة أوي ممكن تعمليها علشان تطري شعرك وهي عبارة عن بيضتين بس، بتضربي البيضتين كويس وتبدأي توزعيه على أطراف شعرك بقطنة أو فرشاة وبعد كده توزعي الباقي على شعرك كله وتدلكي فروة رأسك كويس أوي وبعد كده ارفعي شعرك كله على فوق وغطي شعرك بالبونيه وبعد ساعة ارفعي البونيه من على رأسك وسيبى شعرك لغاية ما ينشف خالص وبعد كده اغسليه بالشامبو المناسب لنوع شعرك، وممكن تعملي الوصفة دي مره كل أسبوع.

السلام عليكم.. ميرسى ليك جدا يا ايمان على تعبك وبجد بستفيد منك جدا
انا كنت عملت شعرى استشوار فى خطوبتى وبعديه بيوم غسلت شعرى انا شعرى كان حلو اوى لقيته اتقصف وبقى هايش اوى وبقى جاف انا مش عارفه اعمل ايه علشان يرجع تانى ياريت تقولي لى استعمل شامبو ايه المناسب وكمان ايه نوع حمام الكريم المناسب علشان شعرى يرجع تانى كويس بجد انا زعلانه اوى ومش عارفه اعمل ايه وميرسى ليكى يا قمر.

===========

رد بص وطل:
أولاً ألف مبروك على الخطوبة، ثانياً بالنسبة لسؤالك ففيه شامبوهات كتير كويسة زي بانتين وهيربل اسينسز، وبالنسبة لحمامات الكريم ممكن تستخدمي بوناويل أو لوريال.

انا عندى 21 سنه وشعرى جاف اوى كان وانا صغيره ناعم جدا حتى لما كنت بلفه كان يبقى جميل جدا لكن دلوقتى مهما اعمل بيبقى هايش اوى وبستخدم شامبو يبقى كويس وهو مبلول لكن لما ينشف بيبوظ خالص ولما بيتلف وجه عليه ميه بيبوظ على الاخر عايزة حاجه كويسه لشعرى لانى زهقت قصيته كتير ومفيش جديد فيه كنت بسال عن السيرم ياترى ده كويس مفيش حاجه تانيه غيره استخدمها.

===========

رد بص وطل:
صديقتي العزيزة لازم تواظبي على عمل حمام كريم مغذي لشعرك مرة كل أسبوع وممكن تستخدمي حمامات زي بوناويل أو لوريال، وكمان بلاش تسرحي شعرك وهو مبلول لإنه بيتقصف ويتقطع وبيتساقط لإن الشعر وهو مبلول بيكون ضعيف، ودي كمان وصفة لعلاج هيشان الشعر ممكن عمليها وكل اللي عليكي إنك تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو والبلسم المناسبين لنوع شعرك، وممكن تعملي الوصفة دي مرة كل أسبوع.

مشكلتي إني خسيت جامد جدا من 73 كيلو إلى 62 والحمد لله لا أعاني من أي أمراض عضوية ولكن حالتي النفسية كانت سيئة بسبب مشاكل فى الشغل، علما بإنى أجريت تحاليل للغدة الدرقية ونتيجتها ممتازة، اعمل ايه؟!

==============

رد بص وطل:
صديقتي العزيزة الحالة النفسية من أكتر الحاجات اللي بتاثر على كل حاجة في الجسم حتى البشرة والشعر، وده ممكن يكون السبب في إن وزنك نزل فجأة، وأهم حاجة إن الوزن ده يكون مناسب مع طولك، يعني يكون هو الوزن الصحي مش أقل ولا أكتر.

السلام عليكم.. بشكركم على الموقع الجميل دة وبشكر كل القائمين علية.. انا عندى مشكلة فى شعرى وبجد مضايقانى اووووى ومخليانى مكتئبة ومش مخليانى احس انى بنوتة انا شعرى ناشف جدااا وكيرلى وهايش وصعب اتحكم فية وهو ناشف ومش بسرحة الا وهو مبلول وانا محجبة اعمل اية قولوا لى مع العلم ان انا 22 سنة وهتخطب قريب ودةمخوفنى

=================

رد بص وطل:
بصى يا قمر الشعر من الحاجات الحساسة أوي اللي بتتاثر بطريقة معاملتنا لها، يعني كل ما اهتميتي به هتلاقي إنه اتحسن، ونصيحتي ليكي إنك تعملي لشعرك حمام كريم مرة كل اسبوع علشان تغذيه وتطريه، وكمان بلاش تسرحيه وهو مبلول لإن الشعر المبلول بيكون ضعيف جداً وبالتالي هيتقطع منك وهيتقصف وهيتساقط، وعلشان إنتي محجبة فلازم دايماً تلبسي باندانا قطن تحت الحجاب لإن الخامات الصناعية المصنعة منها الطرح دلوقتي بتضر الشعر جداً، وبالنسبة لمشكلة هيشان الشعر فدي وصفة كويسة جداً ومفيدة للشعر ممكن تجربيها وكل اللي عليكي إنك تجيبى ورقة صبار وتفتحيها من النص وتاخدى المادة اللزجة اللى بتكون فيها وتخلطى 3 كوبايات من زيت جوز الهند مع المادة دى وتحطى الخليط على النار لمدة خمس دقائق وبعدين حطية فى زجاجة وسبية يبرد شوية وبعدين أعملى بية حمام زيت لشعرك وبعد كدة أغسلى شعرك بالشامبو والبلسم المناسب لنوع شعرك, وممكن تعملى حمام الزيت دة مرة كل أسبوع.

plzzz ana lsa gdeda hna w kont 3iza as2l ..
ana sh3ryy hayeesh awii m3a eno msh t2eel w howa asln carly was3 bs msh 3rfa ezay a5lih msh haysh 3shan el mwdo3 da mday2nii w 5sosan eni mo7gaba w b7s eni m2sra fi 7a2 sh3ry :S :S

==========================
رد بص و طل :
أهلا بيكى صديقة جديدةيا حنين , بالنسبة لمشكلة الشعر الهايش ممكن تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو والبلسم المناسبين لنوع شعرك ،وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر

شكرا على المعلومات المفيدة اللى بتقدميها (انا عندى بقع اثر الحبوب ومضيقانى اوى لو سمحت عايزة اى ماسك او كريم يضيعها)

==============

رد بص وطل:
بصى يا قمر ودي وصفة كويسة جداً لازالة آثار الحبوب الطريقة: تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع.

please i want to know hair vitamins
because my hair is very weak

=====================
رد بص وطل :
بصى يا نانا الشعر الضعيف ممكن يكون له أسباب كتير ومنها إنك يكون عندك مشاكل صحية زي الأنيميا أو نقص فيتامين معين في جسمك، وعلشان كده بانصحك بأستشارة طبيب وعمل بعض التحاليل لمعرفة المشكلة اللي عندك وبالتالي تبدأي تعالجيها في الأول قبل ما تعالجي شعرك، ولازم تعرفي كمان إن نوعية الطعام بتأثر على الشعر وعلشان كده لازم تهتمي بأكل الفاكهة والخضراوات الطازجة وكمان منتجات الألبان مهمة جداً للشعر, وده ماسك بيساعد على تقوية الشعر الضعيف وهو عبارة عن معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطيهم كويس مع بعض وبعد كده افردي الخليط على شعرك بالكامل ولفيه بفوطه دافئه لمدة ساعتان وبعد كده اغسليه بالشامبو المناسب لشعرك واشطفيه بماء فاتر.

انااشتغلت وعندى مشكلة ان وشى بيقشر جامد ومفيهوش أى نضارة وناشف جدا مع انى بستخدم كريم مرطب على طول جونسون فلو فى ماسك كويس يظبط,واحط ميك أب ايه وانا رايحة الشغل ولو فى ماسك أعمله كل يوم للتجديد ويضيع البهتان اللى فى وشى ياريت تفيدينى لانى بعت ومحدش رد
======================
رد بص وطل
بصى ياجميل بالنسبة لنضارة بشرتك فدا ماسك هايل هيخليها دايما نضرة وجميلة والمكونات هى:
نصف معلقة صفار بيضه +نصف معلقة زيت لوز + نصف معلقة عصير ليمون + نصف معلقة عصير برتقال + نصف معلقة ماء ورد او زهر + معلقة عسل + معلقة دقيق
الطريقة:
إخلطيهم كويس مع بعض و حطيه على كل البشرة ماعدا منطقه العين لمده 15 دقيقة وإغسلى بشرتك من ماء الحنفية و الماسك ده ممكن يتعمل مرتين في الاسبوع.
وبالنسبة للميك أب بتاع الشغل فعلشان تكوني بسيطة وجميلة لازم تعملي ميك اب هادي جداً بألوان هادية مناسبة للون بشرتك، يعني تبدأي بتوزيع كريم الأساس كويس على وشك، وبعد كده توزعي البودرة، وبالنسبة للآي شادو ممكن تستعملي مثلاً البينك مع الفضي والأسود علشان بيعمل ميكس حلو أوي، وكمان ماتنسيش الماسكرا والكحل علشان تبرزي جمال عينيكي، وبعد ما تخلصي رسم العينين، حطي بلاشر بينك على خدودك، والروج يكون هادي ورقيق.

شكرا لردكم على انا مش فهمه هو انا اعمل خلاصه الجرجير كل يوم واحطه على شعرى لمدة كام ساعه من غير غسيل يعنى اسيبه لحد ماينشف عادى ولما اغسل شعرى استعمل الشامبو مرة واحدة ايضا عند غسيل الشعر مرة وايه المدة الازمه لعلاج يعنى ممكن 3 اشهر كويس واستعمال الشامبو بانتيين دائما ولا ايه ارجو ردكم على المرة دى والاخيرة وشكراااااااااا لكم

=============
رد بص وطل :
بصى يا قمر خلاصة الجرجير بتدلكي فروة رأسك بها مرة كل يوم ومش بتغسلي شعرك بعدها لكن بتغسلي شعرك مرتين بس في الأسبوع، وبتستمري على الموضوع ده لمدة تتراوح من 3 إلى 6 شهور، وبالنسبة لشامبو بانتين فهو من الأنواع الجيدة اللي ممكن تستخدميها لشعرك.

ميرسى قوى
بس عايزة اعرف منين اجيب السيرم لاستخدامه بدل زيوت وكريمات لشعر
كمان اى انواعه وبكام ؟
شكرا
====================
رد بص وطل
بصى ياقمر السيرم ممكن تجيبه من الصيدليات الكبيرة وفى منه أنواع كتيرة منها السيرم الإيطالى وزيرو فريز وكرستال ولوريال وبالنسبة لسعره فهو بيبقى من 40 ل 45 جنيه .

هاي بجد مواضيعك هايلة اوي اولا ياريت تعملي مواضيع عن ربطات الحجاب واشكال كتير وجديدة للجامعة وكدة ثانيا انا بشرتي دهنية ولوني قمحي فاتح عايزة اجيب بودرة وكريم أساس بس مش عارفة اجيب نوعهم ايه مش الماركة انما مثلا كريم اساس سائل ولا ايه والبودرة انهي احسن السائبة ولا الكومباكت واللون اختار لوني قمحي فاتح ولا افتح كمان ؟؟؟؟ ياريت تردي عليا
======================
رد بص وطل
بصى ياقمر الأفضل إنك تستخدمى البودرة المضغوطة بس لإنها بودرة وكريم أساس في وقت واحد وهي بتستخدم لتغطية العيوب أو توحيد لون البشرة وبالنسبة للون فأختارى لون يكون نفس لون بشرتك أو أفتح بدرجة واحدة .

ازيك يا قمر انا حبيت اسألك على حاجة محيرانى جدا وياريت الاقى عند جواب انا عايزة اعرف طريقة وضع الكريم المرطب على الوجه لانى رأيت وقرأت فى عدد من المواقع انه يجب وضع الكريم المرطب من اسفل لأعلى فهل يقصدون بذلك من اسفل لاعلى من ناحية الشفاه مرورا بالخد ووصولا الى الفك ام من الفك من ناحية الاذن مرورا بالشفاه ثم الى الخد وننزل بعد ذلك وهكذا وايضا اريد ان اعرف طريقة ازالة الماكياج وطريقة غسل الوجة بالغسول المنظف هل يكون بنفس الطريقة ام يكون بداية من منطقة الفك ثم نصل الى اعلى عند الخد ثم النزول عند منطقة الشفاه لانى استخدم الغسول وازيل الماكياج بهذه الطريقة ولكى جزيل الشكر.

==============

رد بص وطل:
أحسن وأصح طريقة تحطي بها الكريم المرطب هي إنك توزعي الكريم من تحت لفوق في حركات دائرية بس بأطراف اصابعك وبالراحة جداً.

لو سمحتى يا ايمان انا عندى استفسار انا بشرتى مش عارفة هي مختلطة ولا دهنية هي فى منطقة الجبهة والانف والدقن بيكون فيها زيوت بكمية كبيرة وباضطر اغسلها كتير فى حين ان خدودى ساعات بتكون جافة وساعات بيظهر فيها زيوت وبتكون فيها قشور وانا باستخدم لمنطقة الخدين كريم مرطب جونسون للبشرة الجافة ووجهي بيكون ناعم ومش بيطلع لى حبوب ولا حاجة والحمد لله بشرتى صافيه ولكن بعد غسل وجهى بحوالى ساعة او ساعتين بتظهر الزيوت وكمان مش عارفة هو دة كريم مناسب ولا لا ولما بستخدم كريم للبشرة العادية لمنطقة الخدود قفط بيجف وجهى جدا وعايزة كمان اعرف اية احسن الكريمات المرطبة اللى تنفع لبشرتى اللى انا مش عارفة نوعها اتمنى انك تردى عليا ضرورى لانى محتارة جدا.

================

رد بص و طل:
بصى يا قمر بشرتك مختلطة لان فيها مواصفات البشرة المختلطة واللي بيكون فيها مناطق دهنية ومناطق تانية بتكون عادية أو جافة، وعادة بيكون الجزء الدهني هو منطقة الذقن، الأنف، الجبهة، والجزء الجاف هو جوانب الخدين والعنق ممكن أنك تستخدمي غسول "ديور" للبشرة الدهنية المختلطة أو غسول "نيتروجينا" للبشرة الدهنية المختلطة أو تستخدمي منتجات كلين اند كلير وعلى فكرة في حاجة حلوة اوي ممكن أنك تعمليها وهي أنك تغلسي وشك كل يوم الصبح بماء الورد لانه مفيد جدا وبيخفي اى افرازات دهنية ممكن أنها تظهر على البشرة، وده ماسك حلو أوي لإعادة التوازن للبشرة المختلطة، وهو ماسك البطاطس..
المكونات:
بطاطس مسلوقة.
معقتين كبار زبادي.
معلقة كبيرة نشا.
3 معالق كبيرة دقيق ذرة.
ربع معلقة صغيرة زيت زيتون.
4 معالق كبيرة من ماء الأرز المسلوق.
طريقة التحضير:
اهرسي البطاطس واخلطي المكونات مع بعضها في الخلاط، وبعدين إفردي الماسك على وجهك واتركيه لمدة 10 دقائق، ثم اغسليه بالماء البارد.

لو سمحت انا فرحى قرب وعايزة اسرع طريقة للقضاء على القشرة.

===============

رد بص وطل:
فيه طريقة طبيعية جداً للتخلص من القشرة وهي إنك تدلكي فروة رأسك يومياً بخل التفاح، ويا ريت في الفترة دي تقللي خالص من استخدام المكواة أو السيشوار لشعرك.

السلام عليكم، بشكركم جدا على الموقع الجميل ده لاننا بجد بنستفيد منه انا كنت عايزه اسال ولو سمحتم تردوا على انا شعرى كان تقيل وناعم جدا بس المشكله دلوقت نزل خالص تقريبا جلد راسى ظهرت واتقصف خالص واما كشفت عليه الدكتو ادانى شامبو وزيت بس مش جاب اى نتيجه انا شعرى كل يوم بينزل اكتر ومش عارفه اعمل ايه كمان حالتى النفسيه مش اوى وده مش عارفه ماثر عليه ولا لا ياريت تردوا علي وميرسى اوى ليكم.

===============

رد بص وطل:
أكيد الحالة النفسية بتاثر على الشعر جداً وبتسبب له مشاكل كتير، علشان كده حاولي على أد ما تقدري تبعدي عن اي قلق او توتر، وكمان يا ريت تعملي بعض التحاليل علشان تعرفي إذا كان عندك مشكلة عضوية أو نقص في فيتامين معين هو اللي مسبب لك المشكلة دي، وبالتالي لازم تعالجي المشكلة العضوية الاول قبل ما تبدأي تعالجي شعرك، ولازم كمان تهتمي جداً بتناول الأكل الصحي اللي بيحتوي على الفيتامينات اللازمة للشعر زي الخضار والفاكهة الطازة وكمان الأكلات اللي بتحتوي على نسبة حديد وفيتامين أ , ب و ج و د.
وحاولي تعملي له حمامات كريم مغذية مرة كل اسبوع.

حلو أوي بس انا كنت عايزة أسال أنا شعرى ضعيف وكيرلى بس مش اوى ولما بيبعد عن الماء بيبقى حلو اوى نفسى يبقى ناعم وبيلمع اعمل اييييه...؟ وكمان انا محجبه..... بليز قولي لى اعمل ايه.

==============

رد بص وطل:
المشكلة دلوقتي يا صديقتي العزيزة إن فيه بعض خامات الطرح بتضر الشعر وبتضعفه علشان كده لازم دايماً تلبسي باندانا قطن تحت الطرحة، وبلاش تغطي شعرك او تسرحيه وهو مبلول، يعني لازم تسيبيه يتهوى شوية، واهتمي دايماً إنك تعملي له حمام كريم مرة كل اسبوع، واغسليه مرة واحدة بس في الأسبوع.

هاى يا ايمان انا بشكر كل من تعب فى ان يحقق النجاح العظيم ده وأكيد انتى ربنا يوفقك وتمتعينا كمان وكمان بس انا كان عندى سؤال انا عندى 17 سنه وكنت عوزه اعمل وشى بالفتله انا مش عارفه اعمله ولا غلط لسه بدرى, هل عمل الوشى مضر وبيادى لتقدم سن البشره ولو سمحتى ردى على علشان أنا مش عرفه اعمل ايه.

==============

رد بص وطل:
الفتلة مش بتأثر على الوش، لكن لو بشرتك حساسة اوي فهي ممكن تعمل بعض الالتهابات، وممكن تعملي وشك من دلوقتي بس حاولي تثبتي الفترة اللي بتعملي فيها وشك يعني تعمليه مثلاً مرة كل 6 أسابيع، ولكن نصيحتي ليكي إن لو شعر وشك خفيف أصلاً فإنتي ممكن تأجلي الموضوع ده شوية.

السلام عليكم يا اخواتي انا مني عضوه جديده هنا وعندي مشكله ياريت حد ينصحني، انا مشكلتي الاول هي شعري شعري ناشف اوي ومقصف اوي وبيقع اوي يعني بعاني من كل مشاكل الشعر لدرجه اني بقالي فتره مش بسرح شعري بسبب انه عملي الاكئتاب، تاني مشكله هي بشرتي وايدي دائما خشنين اوي وناشفين اوي وفي ايدي بالذات تيجي عليا في الصيف وبتبقي في سواد، وفي سؤال تاني معلش اني طولت عليكم بس انا مخنوقه من نفسي ومن شكلي حاسه اني مش زي البنات، المهم هو لازم استعمل الزيوت الاصليه وايه هي العلامه اللي تبين الزيوت الاصليه اصلي خايفه اروح عن حد ويضحك عليا ويقول لي ده الزيت الاصلي وشكرا.

===============

رد بص وطل:
أهلاً بيكي صديقة عزيزة لموقع بص وطل، ونتمنى إنك تتابعينا دايماً وتبعتي لنا أسئلتك وتعليقاتك دايماً، اما بخصوص سؤالك عن شعرك فاحب اقول لك إن الحالة النفسية وإهمال الشعر بتأثر عليه جداً وبتضره جداً جداً، علشان كده لازم تبدأي تهتمي بشعرك من دلوقتي بإنك تسرحيه بهدوء وتعملي تدليك لفروة رأسك كل يوم بأطراف أصابعك علشان الدورة الدموية تنشط، وكمان اهتمي بعمل حمام كريم مرة كل أسبوع علشان تطريه وتغذيه وفيه أنواع كتير كويسة زي لوريال وبوناويل، وكمان اعملي تدليك لفروة رأسك بعصير الجرجير يومياً لإنه بيقوي الشعر ويغذيه ويمنع تساقطه.
أما بقى بالنسبة لبشرة وجهك وإيدك فإنتي لازم تستخدمي كريم ترطيب للبشرة مرة او مرتين في اليوم وفيه كريمات كتير ممكن تستخدميها زي نيفيا فيزاج أو دوف.
أما بخصوص اسمرار الكفين فدي وصفة سهلة وبسيطة ممكن تعمليها وكل اللي عليكي إنك تدفي زيت زيتون على النار , ثم تضعي على ايديكِ ورجليكِ وبعدين افركيهم بملح وليمون وكرري الطريقة دي يوميا.
وبالنسبة للزيوت الأصلية فدي بتلاقيها عند محلات العطارة الكبيرة.

عندى 20 سنه وشعرى ناعم جدا وطوييل لكن مقصف وبيشبك بسرعه وبيقع منه كتير انا عايزه حاجه تخليه يتقل ويبقى مش مقصف مع العلم انى مش بستعمل السيشوار أو المكواة ونادرا لما بستعمل زيوت، ارجوكم عايزه حل؟؟؟

=============

رد بص وطل:
صديقتنا العزيزة لازم تهتمي بشعرك اكتر، وبلاش تسرحيه وهو مبلول أوي علشان ما يتقطعش منك، وتقدري تعملي وصفة الجرجير علشان تقويه وتحميه من التقصف والتساقط وكل اللي عليكي إنك تجيبي الجرجير وتعصريه في الكبة أو في الخلاط وتعصريه بإيدك كويس، وتاخدي الميه بتاعته وتدلكي بها فروة رأسك بأطراف أصابعك وتكرري الموضوع ده كل يوم من غير ما تغسلي شعرك، وبتغسلي شعرك مرة واحدة كل أسبوع، وإن شاء الله مع المتابعة هتلاقي نتيجة هايلة.

ازيك عاملة اية، لو سمحتى عندى سؤال عصير الجرجير اللى هعملة لشعرى لازم اعملة كل يوم ولا ينفع اعصر كمية كبيرة واحطها فى زجاجة فى الثلاجة مثلا ولا لازم اعصر كل يوم طازة وعايزة اعرف اذا كانت الوصفة دى بتطول الشعر ولا لأ ولو لأ ياريت تدينى وصفة لتطويل الشعر.

=============

رد بص وطل:
مفيش مشكلة خالص من غنك تعملي كمية من خلاصة الجرجير وتحطيها في الثلاجة وتستخدميها كل يوم، والوصفة دي بتقوي بصيلات الشعر الضعيفة وبتمنع تساقط الشعر وبتساعد على تطويله لكن مع المواظبة في الاستخدام.

شكرا لكم على الموضوع ده حلو وكويس انا ماكنتش اعرف عن الشامبو وماذا عن كلير مش كويس للشعر الناعم ولا ايه انا شعرى بيقع ايضا ويضعف جدا ومش عرفه ايه العمل وكنت اضع زيت جرجير مرة احط ومرة لا انا عايزة اجرب حاجه جديدة وكويسه ومناسبه انا خايفه افقد شعرى ارجو ردكم انا منتظرة ردكم على طول وشكرا لك يا ايمان وممكن اسال سؤال لك كيف تحافظين على شعرك انت لانه يعجبنى ارجو الرد والسلام عليكم.

==============

رد بص وطل:
صديقتنا العزيزة ممكن تستخدمي خلاصة الجرجير الطبيعية بإنك تجيبي الجرجير وتضربيه في الخلاط أو في الكبة وتعصريه بإيدك كويس وتاخدي الميه بتاعته وتدلكي بها فروة راسك وبتكرري الطريقة دي كل يوم من غير ما تغسلي شعرك وبتغسليه مرة واحدة بس كل اسبوع، ومن أحسن الشامبوهات اللي ممكن تستعمليها بانتين وهيربل اسينسز، ويا ريت تحاولي تقللي من عمل الشعر بالسيشوار أو المكواة على أد ما تقدري.

أنا شعري مقصف من نهايته كثيرا، وهو طويل نوعا ما فكنت عاوزة أقصه ديجراديه علشان عرفت إن الديجراديه بيطول الشعر بسرعة لكن أنا خايفه يقصر أوي ممكن تقولي لي هل الديجراديه مفيد فعلا ولا بيزود التقصيف فيما بعد.

==============

رد بص وطل:
القصة الديجراديه بتدي كثافة وتقل للشعر، وكمان الميزة فيه إن شعرك مش بيقصر أوي لإنك بتقصي شعرك طبقات يعني ممكن تحتفظي بالطول الأساسي لشعرك.

أنا اشتريت مبرد للقدم من أوريفليم لكن مش عارفة إزاي المفروض أستخدمه؟
يعني والفدم مبلولة أم جافة وهل بعد حمام للقدم عاوزة أعرف إزاي علشان عندي تشققات في القدم ومش بتروح.

=============

رد بص وطل:
المبرد ده بتستخدميه على القدم وهي مبلولة يعني بتنقعيها لفترة في ماء دافي وممكن تستخدمي زيوت مرطبة زي زيت الزيتون، وبعد ما تنقعيها لفترة تبداي تفركيها بمبرد القدم كويس، وبعدين تنشفيها كويس وتدهنيها بزيت الزيتون وتلبسي في رجلك شراب، ويفضل إنك تعملي الموضوع ده قبل ما تنامي على طول.

اناعندى سؤال تانى بعد اذنك .انا حواجبى اصلا من قدام ثقيلة ومن الطرف من الاخر خفيفة ودة شئ مزعج جدا بالنسبة ليا وكل ما بخرج بكثف المنطقة دى بكحل لقيت الشعر بيطير اكتر وبعدين جربت اكثفها بالماسكرا بس انا عايزة اى وصفة تحل المشكلة خالص وحواجبة تكون تقيلة لان انا وشى مش بيليق معاة الحواجب الرفيعة وبعدين شوفت فى التليفزيون ان ممكن زرع شعر للحواجب زى ما انا عايزة فالموضوع دة حلو ولا لاء .

===============

رد بص وطل:
ممكن تستخدمي زيت الخروع لإنه بيتقل الحواجب جداً، وحاولي تعدي لفترة طويلة من غير ما تعمليهم، ولو عايزة تتقليهم بالميك اب يبقى تستخدمي البودرة الخاصة بالحواجب ودي موجودة في المحلات اللي بتبيع مستحضرات التجميل وبتحطيها بفرشة صغيرة جداً، أما بخصوص زرع شعر الحواجب فده لازم تستشيري فيه دكتور متخصص.

ميرسى على مجهودك بس انا محتاجة لك اوى يا ايمان ولازم لازم تردى عليا فى اسرع وقت انا خطوبتى قريب وهيبقى فستانى مفتوح اوى وعايزه ازيل شعر جسمى كله وبطريقه غير السويت لان جسمى حساس اوى وبيحصل لى حاجات غريبه لما بستخدم السويت عايزاكى تساعدينى انى اعرف دكتور كويس فى اسكندريه اقدر اعمل عنده ازاله ليزر بس يا ترى فعلا مش بيظهر بعدها تانى وسؤال مهم كمان ولازم تردى عليا فيه تكلفه الموضوع ده هتبقى اد ايه ارجوكى لازم تقولي لى ولو حتى رقم تقريبا عشان اعمل حسابى بليز يا منمون هتردى عليا بسرعه وياريت الرساله دى متتركنش هتسنى ردك.

================

رد بص وطل:
ألف مبروك مقدماً صديقتنا العزيزة، وبخصوص إزالة الشعر بالليزر فالتكلفة تتوقف على المكان اللي هتعملي فيه وتقريباً تكلفة الجلسة الواحدة للوجه حوالي 150 جنيهاً، أما الرجلين حوالي 300 جنيهاً، وإزالة الشعر بالليزر بتكون فعالة أكتر مع الشعر الأسود التقيل أكتر من الشعر الوبري، ولكن هو مش بيزيل الشعر تماماً لكن بيعمل على إضعافه وتخفيف لونه يعني الشعر الأاسود بيفقد صبغته وبيبقى اشقر تقريباً وكمان بيأخر نمو الشعر لفترات طويلة.

الحقوني شعري بيقع وبقى خفيف لدرجة إن جلد راسي بيقى باين لدرجة تخوف.

===============

رد بص وطل:
صديقتنا العزيزة تساقط الشعر ده بيكون له اسباب كثيرة جداً ومنها نقص فيتامينات معينة في الجسم، واستخدام المواد الكيميائية بكثرة على الشعر، واستخدام السيشوار والمكواة كتير، وكمان التعامل السيء مع الشعر، وعلشان تعالجي المشكلة دي لازم الأول تعملي بعض التحاليل علشان تعرفي إذا كان عندك مشكلة صحية وتبدأي تعالجيها، وبعد كده تبدأي تعالجي شعرك، ودي كمان وصفة طبيعية ممكن تعمليها لإنها بتساعد على تكثيف الشعر وتقوية فروة الرأس وهي إنك تجيبي الجرجير وتضربية في الخلاط أو الكبة وتاخدي الميه بتاعته وتدلكي بها فروة رأسك بأطراف أصابعك، وتكرري الموضوع ده كل يوم بس من غير ما تغسلي شعرك بعدها وبتغسلي شعرك مرتين بس في الأسبوع.

ازيك يا جميله اخبارك ايه؟؟؟؟؟ يارب بخير
انا كان عندى استفسار وياريت الاقى الرد لانى بجد منزعجه من الموضوع ده..
انا بلبس باليرينه فى رجلى فالجزء اللى باين من قدام اسمر من الشمس لان انا بشرتى حساسه اوى ورجلى بقى شكلها مش لطيف من الاسمرار ده وايدى كمان اسمرت والطرحه بقيت عامله اثر على وشى بلاقى جزء ابيض وجزء اسمر وعايزه حل او وصفه وإزاى اعتنى برجلى وايدى وبشرتى ضد اشعه الشمس لان بشرتى حساسه اوى ياريت تردى عليا علشان مش عارفه اسأل مين غيرك..........وشكرا.

==============

رد بص وطل:
بصي يا لولو علشان تحمي بشرتك من آشعة الشمس فإنتي لازم تستعملي صن بلوك وبتدهنيه على بشرتك قبل ما تتعرضي للشمس بحوالي ربع أو نصف ساعة، ولو هتعدي في الشمس لفترة طويلة فإنتي بتكرري دهانه مرة كل ساعتين، وممكن تدهنيه على إيديكي، وعلشان تفتحي بشرتك من آثار الشمس فده ماسك هايل جداً ونتيجته مضمونة وهو عبارة عن معلقة صغيرة من الماء اللي بيتكون على سطح الزبادي + عصير نصف ليمونة و بتخلطيهم مع بعض كويس و بعد كده تحطي الخليط على وشك بس خلي بالك إن الخليط مايجيش عند منطقة العيون وتسيبيه لمدة ساعتين وبعد كده تغسلي وشك وهتلاقي نتيجة سريعة و هايلة ان شاء الله.
أما بالنسبة لاسمرار الكفين والقدمين فعلشان تفتحيهم كل اللي عليكي إنك تدفي زيت زيتون على النار, وتدهنيه على ايديكِ ورجليكِ وبعدين افركيهم بملح وليمون وكرري الطريقة دي يوميا.

بجد حاجات في منتهى الجمال بس بليز عايزين لف طرح المحجبات جديدة للجامعة واسبانش وكدة والمكياج جميل بس عايزين اكتر طبعا وأنا بشرتي دهنية ولوني قمحي فاتح ايه افضل نوع باودر وكريم أساس ليها.

=============

رد بص وطل:
ميرسي ليكي جداً يا مرام على ذوقك وإن شاء الله نحاول نقدم لكم دايماً كل الجديد، وقريب جداً هتلاقي عدد عن لفات الطرح فتابعينا، وبالنسبة لسؤالك عن كريم الاساس فإنتي لازم تختاري كريم أساس خالي من الدهون أو free oil ودي افضل ماركات ممكن تستخدميها وإنتي متطمنة وهي "فلوريل" و"مادينا" و"كيرولان" و"ريمال" و"بورجوا" و"كريستيان ديور".

انا كنت عاوزه اعرف اسم شامبو كويس للشعر الجاف وكمان كريم كويس للتجاعيد والهالات السوداء ونعومه البشرة وكمان كريمات للمناطق السوداء.

=============

رد بص و طل:
الشعر الجاف بيحتاج دايماً لعناية خاصة واهتمام وترطيب، يعني لازم تواظبي على عمل حمامات كريم مغذية للشعر مرة كل أسبوع، ومن أحسن الكريمات اللي ممكن تستخدميها لوريال أو بوناويل، وبالنسبة للشامبو ممكن تستخدمي بانتين أو هيربل اسينسز أو دوف للشعر الجاف، وعلشان تحافظي على بشرتك فإنتي لازم تهتمي بتنظيفها يومياً ولازم تهتمي بإزالة الميك اب كويس جداً من على البشرة، وكمان لازم تستخدمي كريم ترطيب يومياً على الأقل مرتين وفيه كريمات كويسة زي نيفيا فيزاج ودوف، وكمان ممكن تستخدمي كريمات الليل والنهار للعناية بالبشرة وتعويضها عن كل العناصر اللي بتفقدها أثناء اليوم.. وده كمان ماسك هايل هيساعدك على التخلص من مشكلة التجاعيد دي نهائي
والماسك ده مكوناته هي:
ملعقة كبيرة من الخميرة + قليل من الحليب لتذويب الخميرة + ملعقة صغيرة من العسل + ملعقة كبيرة من الزبادي.
وعشان تحضريه.. اخلطي المكونات جيداً حتى يتماسك المزيج.. ضعي الماسك على وجهك واتركيه لمدة 7 دقائق.

أما بالنسبة للهالات السوداء فدي شوية وصفات ممكن تعمليها كل يوم قبل ما تنامي وهي..
1- إنك تضعي ماسك الزبادي بالعسل على منطقة الهالات السوداء كل يوم حوالي ساعتين قبل النوم.
2- وضع زيت الزيتون على الجفن السفلي قبل الذهاب للنوم.
3- تضعي قطعة قماش قطنية مشبعة بالحليب، وأغمضي عينيك لمدة 10 دقائق.
أما بالنسبة للمناطق السوداء فياريت توضحي أي مناطق بالظبط علشان اقدر اديلك الماسك المناسب لها.

ايمان انا زعلانة اوى منك لانى كتير بعت ومش كنتى بتردى عليا انا سؤالى انى فى سمار فى منصقة بين الثديين مش عارفة ليه الجلد غامق فى المنطقة دى ازاى ممكن احلها وكمان فى حاجة لمنطقة الصدر ممكن استعملها عشان تدى شكل حلو لو لابسة حاجة مفتوحة؟

============

رد بص وطل:
انا اسفة صديقتي العزيزة لو كنت اتأخرت عليكي في الرد لكن ده بسبب عدد المشاركات الكتير اللي بتوصل لنا يومياً، وبالنسبة لسؤالك فاحب اقول لك إن أهم حاجة إنك تهتمي جداً بترطيب بشرة وشك وجسمك لإن جفاف البشرة هو اللي بيعمل الغمقان ده، وده كمان ماسك بيساعد على تفتيح وترطيب المناطق الغامقة في الجسم ممكن تجربيه وإن شاء الله مع المواظبة عليه هتلاقي نتيجة هايلة، وهو عبارة عن زيت زيتون + زيت لوز + دقيق خشن "دقيق البسيسة"

الطريقة:
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع، وعموماً لو عايزة جسمك كله يبقى لون واحد لازم تاخدي حمام يومياً وتستعملي غسول يومي للجسم، وممكن تستخدمي الليفة المغربية في فرك جسمك مرتين كل أسبوع لإنها بتساعد على تفتيح الجسم واعطاؤه لون موحد بس ما تكتريش عن يومين في الأسبوع علشان جسمك ما يلتهبش.

ميرسى جدا يا ايمان على المجهود الرهيب دة بس انا عندى مشكله فى شعرى اتمنى انك تحليها لى انا شعرى مقصف وجاف جدا ومؤخرا ظهرت فيه الكسرة من تحت ومش عارفة اعمل فيا ريت قولوا لى على اسم شامبو وحمام الكريم او البلسم بتاعه يكون حلو لشعرى وياريت لو فى وصفات طبيعية وميرسى جداااااا

==============

رد بص و طل:
بصى يا فمر لازم كل فترة تقصى أطراف شعرك عشان التقصف, وما فيش نوع شامبو بيعالج التقصف لكن ممكن تستعملى شامبو عادي مناسب لنوع شعرك زي بانتين وهيربل ودوف، وفيه حمامات كريم كويسة ممكن تستعمليها زي لوريال وبوناويل, ودي وصفة كويسة لعلاج التقصيف ممكن تعمليها وهي بتتكون من موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

شكراً على المعلومات المفيدة، كنت عاوزة أسأل زيت جدايل للشعر من عبد الصمد القرشي هل هو مفيد في عمل حمام زيت وكيف استعمله لعمل حمام زيت وأعمله كل أد إيه أنا باستعمل شامبو هيربل وحمام كريم لما باغسل شعري وبعدين باحط بانتين بديل الزيت هل ده كافي مع إن شعري بيهيش ومش بيكون طري وانسيابي.

============

رد بص وطل:
زيت جدايل من الزيوت الجيدة للشعر لكن أهم حاجة إنك تكوني متأكدة أنه الزيت الأصلي ومش تقليد، وطريقة عمل حمام الزيت بكل بساطة هي إنك الأول تبدأي تدلكي فروة الرأس بأطراف أصابعك قبل ما تحطي الزيت، وبعد كده تلفي فوطة مبلولة بماء ساخن على رأسك، وبعد كده تسخني الزيت شوية على النار، وتبدأي توزعي الزيت على شعرك وفروة رأسك بأطراف أصابعك، وتسيبي الزيت على شعرك لمدة ساعتين أو ثلاثة وبعدين تغسليه بالشامبو المناسب لنوع شعرك وتنشفيه كويس اوي، ومع المتابعة والاستمرار هتلاقي شعرك اتحسن جداً، بس لازم كمان تهتمي بالتغذية الصحية السليمة اللي بتحتوي على كل العناصر والفيتامينات اللازمة للشعر.

شكرا ليكي يا ايمان، سؤالي انا بشرتي مختلطة وكنت عايزة كريم اساس وبودرة.انتي كنتي قولتي الماركات بس انا عايزة حاجات متكنش سميكة علي الوش وتدي مظهر طبيعي اوي وتنور الوش ويكون سعرها معقوووول.اة نسيت اشكرك علي ماسكات البشرة بجد حلوة اوي.وتاني thanx

==============

رد بص وطل:
ميرسي ليكي إنتي يا شاهي على ذوقك، وبالنسبة للماركات ففيه ماركات كويسة وسعرها معقول وخفيفة على البشرة زي نيفيا بس الأصلي وبوبا.

السلام عليكم بجد مجهود اكتر من رائع انا عندى مشكلة وعايزة مساعدتكم لان فرحى قرب انا شعرى ناعم بس بيهيش لو سبتة من غير زيت وكمان مقصف وبيتساقط جدا وخف جدا استعملت زيوت كتير ومفيش فايدة اعمل اية واى نوع من الشامبوهات والكريمات يكون كويس اعالج بية شعرى بجد مشكلة قلقانى جدا لانة كل مدى بيخف اكتر لدرجة انة مبقاش فية وهل القص ممكن يساعد فى علاجة وشكرا واسفة على الاطالة

=======================
رد بص و طل :
ألف مبروك صديقتنا العزيزة, بالنسبة لسؤالك فدي خطوات لازم تاخدي بالك منها علشان تعتني بشعرك ويبقى شكله صحي..
1- ابعدي عن استخدام السيشوار والمكواة بكثرة.
2- بلاش تسرحي شعرك وهو مبلول لإنه بيكون ضعيف جداً وبيتقطع اثناء التسريح.
3- قصي اطراف شعرك مرة كل 45 يوم.
4- اعملي حمام كريم لشعرك مرة كل أسبوع علشان تغذيه وفيه انواع كويسة زي لوريال وبوناويل.
5- لو إنتي محجبة يبقى لازم تحرصي على إنك تلبسي باندانة قطن تحت الحجاب، وبلاش تغطي شعرك وهو مبلول.
6- بلاش تستخدمي الزيوت في دهان الشعر لإن الشعر بيفقد قدرته على إفراز زيوته الطبيعية، وده اللي بيسبب مشكلة هيشان الشعر اللي بتشتكي منها، لكن مع الوقت شعرك هترجع قدرته على إنه يفرز زيوته بشكل طبيعي.

ميرسي جدا يا قمر على النصائح الحلوه دي بس انا عندي مشاكل كتيره في شعري مقصف قوي وخفيف جدا وباهت وروحت لدكاتره كتير ووصفوا لي ادوية كتيره بس ما جابتش نتيجه يا ريت تقولي لي على وصفه لحل المشكله اللي عندي دي وممكن تقولي لي على الوجبات اللي بتغذي الشعر.

==============

رد بص وطل:
صديقتي العزيزة لازم تعرفي إن علاج الشعر بيحتاج لوقت طويل شوية علشان تحسي بالنتيجة يعني بيحتاج لفترة تتراوح من 3 إلى 6 شهور، وعلشان كده لازم تواظبي على علاج الدكتور، وكمان لازم تعملي لشعرك حمام كريم مغذي مرة كل أسبوع، وكمان لازم تاخدي بالك من اكلك جداً وتاكلي الحاجات المفيدة والمغذية وأهم حاجة غنك تاكلي خضار وفاكهة طازة وكمان منتجات الألبان مهمة جداً.

هاى يا ايمى انا عندى سؤال ليكى انا سمعت ان شرب المياه السخنه بينزل الدهون بسرعه فهل له عيوب او بياثر على الحمل وازاى اواظب عليه؟

==============

رد بص وطل:
شرب الميه عامة مفيد جداً مع الريجيم سواء كانت ميه عادية او ميه سخنة، وعلشان تمشي على ريجيم أثناء الحمل لازم تتابعي مع دكتور متخصص.