أنا سعيدة جدًّا إني معاكم النهارده، وهيكون معانا الماكييرة الجميلة "سحر شلبي" اللي هتعرّفنا على خطوات وضع ماكياج بسيط وطبيعي مناسب للبنت صاحبة البشرة الخمرية، وتقريباً معظم البنات في مصر بشرتها خمرية، وكمان هنعرف مع بعض خطوات بسيطة لعمل "الأسموكي آيز" ماكياج العيون الدخاني بطريقة بسيطة وناعمة ومش سواريه أوي...
يلّا بينا نشوف مع بعض...
قبل ما نحط الماكياج نحدد
1- ملامح الوجه والعيوب:
أول حاجة المفروض إننا نعملها قبل ما نبتدي نحط الماكياج، هي إننا نلم شعرنا لوراء علشان نبعده عن الماكياج، ونقدر إننا نحدد معالم وجهنا بالضبط، ونشوف إيه هي العيوب اللي عايزين نخفيها؟ وإيه الحاجات الحلوة الموجودة في وجهنا علشان نظهرها بالماكياج؟ وده عن طريق إننا نلعب على نظرية الظل والنور.. يعني الغامق علشان نخبي ونصغر، والفاتح علشان نظهر الحاجات الحلوة في بشرتنا.
2- لون العين والملابس:
كمان نحدد لون العين؛ لأن لون العين بيساعد الماكيير إنه يلعب في درجات الألوان المستخدمة في ماكياج الوجه بصفة عامة وماكياج العيون بصفة خاصة، وطبعاً لون الملابس بتلعب دور كبير في اختيار ألوان الماكياج؛ فمثلاً الموديل اللي معانا النهارده لابسة موف وده هيخلينا نعتمد على اللون الموف بدرجاته المختلفة في الماكياج.
بعد كده نجهز الكونسيلر والبلاشر والفرش والروج وأدوات الماكياج اللي هنستخدمها، إلى جانب طبعاً فرش الحواجب وفرش تمشيط الرموش.
غلطة بتقع فيها بنات كتير
إوعي تقعي في الخطأ اللي بتقع فيها بنات كتيرة أوي في إنها تستخدم الماكياج الكتير لتفتيح البشرة زيادة على اللزوم والحصول على اللون الأبيض زي نجمات السينما؛ لأننا يا جماعة عندنا إضاءة والإضاءة دي هي اللي بتفتح البشرة طبيعي من غير ماكياج كتير، وعلى فكرة اللي بيحط على بشرته لون أفتح كثير من درجة بشرته بيلاقي في النهاية إن لون البشرة بقى باهت أو كالح.
وبالنسبة لاختيار لون الماكياج المناسب فكل المصريين تقريباً بيناسب بشرتهم ألوان البيجات، وغير مناسب لهم اللون الوردي الفاتح أو الألوان اللي نقدر نقول إنها مناسبة للبشرة الفاتحة أوي أو البشرة الأوروبية؛ لأن كل ما بعدنا عن اللون الفاتح كل ما ظهرت البشرة في شكل أجمل.
نصائح للبشرة المرهقة قبل الميك أب
لو حسينا إن بشرتنا مرهقة أو تعبانة، يبقى نعمل ماسك أو إسكراب لبشرتنا، ونحط كريم مرطب قبل الميك أب، ولازم نتأكد تماماً إن البشرة امتصت كل الكريم؛ لأن الكريم لو البشرة ما امتصتهوش كويس هيسيّح الميك أب ومش هيكون ليه ثبات على البشرة، ونقدر إننا نعرف إن البشرة امتصت كريم الترطيب بإننا نأخذ منديل ونحطه على وجهنا بطريقة التربيت الخفيف، ونشوف إذا كان لسه فيه آثار للمواد الدهنية ولا لأ؟!
توزيع كريم الأساس
أول حاجة بنعملها هي إننا بنخفي الهالات اللي تحت العين بإننا بنحط كريم الأساس، وعلى فكرة أكتر حاجة ممكن نستخدمها بنفسنا وتثبت معانا لمدة طويلة خصوصاً لو كنا رايحين سهرة هي "كريم الأساس المائي" أو "السوبرا"؛ لأنها سهلة ونقدر نستخدمها بسهولة في البيت بنفسنا وممكن نحطها بإسفنجة خفيفة.
بعد كده نبدأ نسيّح كريم الأساس باستخدام أسفنجة رطبة أو مبللة ومعصورة كويس جداً، ونبتدي نعمل مزج تدريجي للألوان وهنسيح اللون بطريقة متناسقة تقدر إنها تعكس الظل والنور، اللعب على الظل والنور ده أهم حاجة زي ما اتفقنا وما حدش يفرح يا جماعة ويقول أنا عايز أحط اللون ده من غير ما يشوف الأول إذا كان اللون ده مناسب للون بشرته ولّا لأ؟!
وفي خطأ شائع جداً بتقع فيه كل البنات إنهم بيجربوا الفاونديشن لما ييجوا يشتروه على كف الإيد، ودي حاجة مش مضبوطة؛ لأن المفروض تجربي الفاندويشن على منطقة الفكين، وتشوفي إذا كان مناسب للون بشرتك ولّا لأ؟ وتجربي أكتر من درجة لغاية ما توصلي لأقرب لون لبشرتك.
البودرة السايبة أساسية في الميك أب
بنوزع اللوس باودر على الوجه بكمية كبيرة ومتساوية في المنطقة اللي تحت العين، علشان يكوّن زي واقي يحمي المنطقة أثناء وضع ماكياج العين.
بعد كده هنعمل رتوش باللوس باودر عند عضمة الخد وبنبتدي نعملها بطريقة دائرية لغاية ما نوصل لعظمة الأذن، والرتوش دي بنعملها علشان نخفي أي عيوب في الوجه ونبرز الحاجات اللي نحب إننا نظهرها.
كمان بنعمل تشحيم لمنطقة الفكين لغاية ما نوصل لعضمة الأذن، وبكده بنصحح العيوب الموجودة في بشرتنا؛ لأننا بنلعب برضه زي ما قلنا على الظل والنور الظل الغامق بيخفي العيوب والأبيض الفاتح بيبن الحاجات الجميلة اللي عايزين نظهرها في وجهنا.
الفرش مهمة لميك أب ناجح
طبعاً الفرش مهمة جداً للميك أب الناجح، وممكن نستخدم فرشاة متوسطة أو كبيرة لتوزع اللوس باودر في المنطقة اللي تحت العين، عندنا برضه فرشاة تانية لأحمر الخدود وده بنوزعه بطريقة الدواير علشان ناخد عضمة زاوية الفكين، وماننساش طبعاً كلنا وإحنا بنحط الروجاجو ابتسامة جميلة؛ لأن الابتسامة دي هي اللي بتحدد لي شكل الروجاجو هيكون إزاي.
وعلي فكرة يا جماعة الماكياج مش مجرد إننا نقعد نحط في مستحضرات تجميل وبس.. لأ إحنا لازم نحط مستحضرات التجميل اللي تناسب بشرتنا، وطبعا كل نوع بشرة وليه ماكياج محدد فماكياج البشرة الدهنية غير البشرة الجافة غير البشرة العادية.
خطوات عمل الإسموكي آيز smoky eyes
• أول حاجة هنعملها هي أننا هنحط على العظمة اللي تحت الحاجب آي شادو لونه لؤلؤي لامع أو ممكن يكون فضي أو أبيض أو أي درجة من الدرجات الفاتحة علشان تدي تفتيح للمنطقة دي.
• هنجهز الـفرشاة باللون الغامق ونبتدي نوزع على الجفن العلوي فوق الرموش بالظبط، وأساس الأسموكي إن الـbase الأساسي بتاعه يكون باللون الأسود، حتى لو كنا هنعمله بأي لون.
• بنبتدي نوزع الأول من الداخل للخارج وبعدين ندخل على زاوية العين ونبتدي نظبط المقاسات اللي علي أساسها هنظبط بيها دوران الإسموكي وبالتدريج بنسيح اللون، وعلي فكرى الإسموكي بيناسب كل العيون وخصوصاً العيون اللي زي الموديل اللي معانا اللي منطقة الجفن فيها واسعة وكبيرة لأنها بتكون حلوة في الرسم، وحتى العيون الضيقة بتكون مناسبة معاها.
• هنجيب قلم الكحل ولأن الموديل اللي معانا عيونها واسعة فهنستخدم قلم كحل أسود علشان يقوي النظرة، أما بالنسبة للعيون الضيقة فأنا بانصحكم إننا مانستخدمش القلم الأسود نهائياً جوه العين ونحط أي لون فاتح جوه العين.
في رسم الحواجب نبعد عن الأسود
بعد ما ننظف الحواجب بمشط الرموش أو بفرشاة الرموش ونبدأ نتقل على الحواجب.. وفي المرحلة دي بنبعد نهائي عن اللون الأسود الصريح، ونستخدم البني وبنحطه على شكل نقط بسيطة جداً وده علشان اللون ما يكترش معانا ويغير شكلنا تماماً وبنبتدي نوزعه ونسيحه بعيدان القطن الصغيرة.. ويا ريت نحاول دايماً ما نبعدش عن شكلنا الأساسي.
الآي لاينر
جينا دلوقتي لمرحلة وضع الآي لاينر وبلاش نشد الجفن وإحنا بنعمل الآي لاينر نهائياً، لأن شد الجفن هيخلي الرسمة نفسها مش مظبوطة ومش دقيقة وهتخلي خط الآي لاينر يطلع متعرج.
الرموش الصناعية
أما في المرحلة الأخيرة في ماكياج العيون فممكن فيها أننا نلزق رموش صناعية، بس بشرط أننا نجيب الرموش المتناسبة مع عينينا ولون بشرتنا وما تكونش طويلة قوي.
أما لو كانت رموشنا حلوة فيفضل إننا نستخدم ماسكرا كويسة وممكن كمان نستخدم الماسكرا اللي بتطول وتكثف في نفس الوقت كبديل عن الرموش الصناعية، وعلى فكرة لو كنا خارجين الصبح يبقى نستخدم الماسكرا اللي هتطول فقط لأنها بتدي مظهر طبيعي أكثر.
طريقة توزيع أحمر الخدود
هنوزع البلاشر "أحمر الخدود" ولازم ناخده بزاوية طولية لغاية الودن وما بناخدوش زي ما البنات بتعمل وتحطه على خدودها ومناخيرها ودقنها ومنطقة الجبهة، لأ إحنا بناخده بزاوية لغاية الودن علشان يدي سحبة للوش ويرفعه.
ماكياج الشفايف
هندخل بعد كده على مرحلة الروج بس لازم نستخدم قلم التحديد لتحديد الشفايف ويا ريت القلم يكون طري مش ناشف علشان ما يتسببش في تشقق للشفايف، وبعد كده بنحط الروج وفي آخر مرحلة بنحط الجلوس أو ملمع الشفايف.
وعلى فكرة يا جماعة أهم حاجة في الماكياج هي استخدام خامات كويسة ومعروفة؛ لأن الميك أب إما بيظبط وشك أو بيضره ويهد كل حاجة عملتيها، وبأؤكد إن مافيش قواعد ثابتة للميك أب لأن المفروض إنك تشوفي بشرتك وشكل وشك محتاج لإيه؟!
ودي كانت آخر حاجة معانا النهارده، ونتمنى إن إحنا نكون عملنا حاجة كويسة وجميلة، فهمتوا بيها طريقة الميك أب مع الماكييرة الجميلة "سحر شلبي".
كنا سعداء معاكم النهارده...
اتمنى إنكم تتفرجوا على الفيديوهات وتتعلموا الخطوات بسهولة وبساطة...
ميرسي "إيمان أيوب"...
هاى يا ايمى انا عندى مشكله
هاى يا ايمى انا عندى مشكله بليز ردى على فيها انا شفايفى مش متحدده خالص وداخله فى ملامح وشى وده بيديها شكل انها كبيره اعمل ايه؟ وسؤال تانى معلش انا بستخدم بودر مائى هل ده كويس ولا لأ؟ وبشرتى دايما جافه ومقشره حتى فى الشتا هل ممكن يكون من البودر المائى.
=========
رد بص وطل:
أهلاً بيكي صديقتنا العزيزة، وبالنسبة لسؤالك عن مشكلة الشفايف فافضل حل إنك وانتي بتحطي الميك اب حاولي تحددي المنطقة اللي حول الشفايف ببودرة سايبة واستخدمي قلم تحديد بنفس لون الروج اللي هتحطيه علشان تحددي به شفايفك قبل ما تحطي الروج، أما بقى بالنسبة للباودر المائي فالافضل إنك ما تستخدميهوش لإنه زي ما قولنا كتير قبل كده بيسبب جفاف البشرة ومشاكل تانية كتير ده غير إنه من الصعب جداً إزالته من على البشرة وده بيعمل مشاكل كتير، وأفضل حاجة بالنسبة للبشرة الجافة إنك تستخدمي الاستيك فاونديشن "كريم الأساس الجامد وافضل الماركات اللي ممكن تستعمليها وانتي متطمنة هي كيرولان وبورجوا وريمال ومادينا وفلوريل وكريستيان ديور.
انا مبسوطه قوى من المعلومات
انا مبسوطه قوى من المعلومات الحلوة دى وبعد اذنك انا كنت عايزة اسأل بالنسبة لبشرتي فهي دهنيه جامد قوى ومش بيقعد فيها ماكياج مجرد ما بخرج كإنى مش حاطه أي حاجة ايه الحل وايه أنواع كريم الاساس والباودر الأحلى.
=============
رد بص وطل:
فيه ماركات كتير كويسة من كريم الأساس والبودرة اللي ممكن تستعمليها زي "فلوريل" و"مادينا" و"كيرولان" و"ريمال" و"بورجوا" و"كريستيان ديور"، وعلشان الميك اب يثبت معاكي لازم تنظفي بشرتك كويس جداً قبل ما تحطي الميك اب وتمسحيها بقطنة مبللة بماء الورد وبعد كده تحطي كريم الاساس وتثبتيه بالبودرة السايبة، وخلي دايماً معاكي في شنطتك علبة بودرة مضغوطة واسفنجة علشان تظبطي بها الميك اب كل ما تحتاجي.
ايمان ممكن تساعديني انا عارفة
ايمان ممكن تساعديني انا عارفة اسئلتي كتير بصي انا مظهر رجلي مش عاجبني صوابعي فيها حاجات بارزة تقريبا مش عارفة كاللو ولا ايه ولونها كمان اسمر وكمان رجلي ناشفة واسمرت فبالبس على طول كوتشي ومش عارفة البس جزم اعمل ايه وكمان رجلي رفيعة اوي والعروق بارزة ايه الجزم اللي تناسبني.
==============
رد بص وطل:
فيه علاج للكاللو موجود في الصيدليات، ممكن تستخدميه، ونصيحتي ليكي إنك تحاولي تلبسي احذية مقفولة شوية وإنتي في الجامعة علشان رجلك ما تسمرش من الشمس، ويا ريت ترطبي رجلك كل يوم قبل ما تنامي بكريم فازلين طبي او بخليط الجلسرين والليمون.
هو انا بروح الجامعة 4 مرات في
هو انا بروح الجامعة 4 مرات في الاسبوع يعني هستخدم سوبرا كيرولان 4 مرات هل ليه ضرر وانا بحبه عشان تغطيته عالية هل في كريم اساس تغطيته حلوة يناسب الاستخدام اليومي.
============
رد بص وطل:
سوبرا فعلاً تغطيته عالية لكن مشكلته إنه تقيل وفيه نسبة رصاص كبيرة وعلشان كده الأفضل إنك تستخدميه في المناسبات، وممكن في الجامعة تكتفي بمك اب خفيف وفيه كريمات كويسة وخفيفة على البشرة زي كريم أساس نيفيا بس الأصلي منه.
ايمان عايزة اسالك سؤال هو انا
ايمان عايزة اسالك سؤال هو انا 160 طولي ووزني 68 هل ده كتير اوي وايه الانسب لان في لبس كتير وموديلات حلوة مش عارفة اجيبها ومن تحت مضايقني اوي وانا عندي زيادة في الارداف 11 سم هل ده كتير لدرجة انه يخليني البس مقاس كبير.
===============
رد بص وطل:
بصي يا شوشو إنتي محتاجة تنزلي تقريباً من 5 لـ 8 كيلو علشان وزنك يبقى مناسب لطولك، وعلشان تداري منطقة الأرداف دي حاولي تختاري جيبات وبنطلونات بألوان غامقة شوية وحاولي دايماً تختاري باديهات أو تونيكات فيها شغل وتشجيرة من فوق علشان تبعد الانتباه لمنطقة الأرداف، وبلاش تشتري مقاس كبير يعني اشتري المقاس المناسب ليكي مش مقاس أكبر لإن ده ممكن يبينك أتخن من الحقيقة.
انا متضايقة اوي نزلت اجيب لبس
انا متضايقة اوي نزلت اجيب لبس ومش لاقية حاجة حلوة رحت بلاتينيوم في شهاب وتكبير ومش لاقية حاجة تشدني خالص ممكن تقولي لي اماكن اجيب منها لبس انا ساكنة جنب شهاب اعمل ايه وعايزة اجيب بنطلون بس مش عارفة اجيبه لونه يه اديني رأيك يا ايمي.
==============
رد بص وطل:
بصي يا شوشو ممكن تصبري شوية وأكيد قريب هتنزل موديلات الصيف الجديدة، وممكن تدوري في المولات المعروفة وفي محلات وسط البلد وروكسي أكيد هتلاقي حاجة مناسبة بس إنتي لازم وإنتي نازلة تشتري تكوني حاطة في دماغك إنتي محتاجة لإيه بالظبط علشان ماتشتتيش تفكيرك في حاجات كتير، وبالنسبة للون البنطلون فلازم تختاري لون يكون مناسب مع باديهات أو تونيكات عندك علشان تلاقي له استخدام كتير، وفيه ألوان أساسية لازم تبقى موجودة عندك زي البني والأسود.
حبيبتي انا مش فاهمة يعني احط
حبيبتي انا مش فاهمة يعني احط الكونسيلر البرتقالي وبعده كريم الاساس وبعده الكونسيلر البيج ممكن توضحي لي يا قمر وكمان انا حاسة اني بقي عندي تجاعيد تحت العين وحول الفم مكان الضحكة مع العلم اني عندي 17 سنة اعمل ايه وانا بحط بودر مضغوط على كريم سوبرا لسة مشترتش اللوس بودر عادي ولا اللوس باودر هتدي شكل احسن عشان كمان يستمر معايا طول اليوم عشان ببقي في الجامعة.
==============
رد بص وطل:
بصي يا شوشو أنا نصيحتي ليكي إنك تحاولي تقللي شوية من كمية الميك اب اللي بتحطيها لإن ده ممكن يضر بشرتك وخصوصاً إنك بتحطي كميات كبيرة وبتتعرضي بها للشمس لفترات طويلة وإنتي في الجامعة، والأفضل إنك تكتفي بوضع الصن بلوك وعليه ميك اب خفيف زي آي شادو وليب جلوس وبلاشر خفيف، مع عمل ماسكات تغذية وترطيب للبشرة، وبالنسبة لكريم سوبرا فالأفضل إنك تستخدميه في المناسبات بس لإنه تقيل ومجهد للبشرة، وبالنسبة لمشكلة التجاعيد فده ماسك كويس ممكن تجربيه وهو عبارة عن بشر تفاحة + معلقة نشا مدوبة في معلقتين لبن ساقع + نقطتين زيت زيتون + معلقة كبيرة دقيق
طريقة تحضير الماسك:
بتخلطي المكونات دي كلها مع بعض، وممكن تحطي شوية لبن لو كان الخليط سميك شوية، وبتحطي الماسك على وجهك لمدة 10 دقايق وبعد كده تغسليه بميه ساقعة جدا.
بصي انا عندي سؤال جديد متهيأ
بصي انا عندي سؤال جديد متهيأ لي محدش سأله بصي انا عندي مقابلة مهمة مع الانسان اللي مرتبطة بيه وقررت اجيب طقم عايزة فكرة لطقم حلو وروش منك وانا جسمي معقول بس مليانة شوية من تحت 64 كيلو اديني ألوان الطرح ولو ممكن البس اسكارف ولون الكوتشي بليز كله بالتفصيل عشان اكون شكلي جديد بالنسبة له وكمان ماسك تفتيح لان عندي مناسبة بعد اسبوعين.
===============
رد بص وطل:
طيب إيه رايك يا شوشو لو تغيري في استايل لبسك خالص، يعني لو كنتي متعودة دايماً تلبسي كوتشي وجينز، ممكن المرة دي تجيبي جوب وعليها شيميز أو بادي وتلبسي حذاء جلد رقيق، ومش معنى إنك هتلبسي جوب وحذاء جلد إنه مش هيكون روش، بالعكس فيه موديلات دلوقتي روشة جداً وشبابية، وعلشان تداري امتلاء المنطقة اللي تحت ممكن تختاري جوب لونها غامق شوية وتكون نازلة على واسع ولو مشجرة يبقى التشجيرة بتاعتها لازم تكون رسوماتها صغيرة، وممكن تلبسي من فوق بادي رقيق وحاولي تختاري اكسسوار ضخم من فوق بحيث يبعد الانتباه عن المنطقة اللي تحت، أما بقى بالنسبة للألوان فاختاري الألوان اللي بتليق عليكي أكتر حاجة واللي بتحسي فيها إن وشك منور لما بتلبسيها.
أما بالنسبة لتفتيح البشرة فأحسن حاجة ممكن تستخدميها هي ماسك الزبادي والليمون وكل اللي عليكي إنك تحطي نقطة أو اثنتان من عصير الليمون على الزبادي، وبتفردي الخليط على وجهك لمدة ساعتين لغاية ما ينشف خالص، وبعدين اشطفي وجهك بالمياه، والماسك ده ممكن تكرريه يومياً.
انا اشتريت بنطلون اسكيني كحلي
انا اشتريت بنطلون اسكيني كحلي جباردين غامق اوي شبيه للجينز ممكن البس كل الالوان ولا هيقيدني وانا بلس باديهات كت ونص فبألبس بادي كارينا من تحتهم ممكن البس الاسود عادي ولا لازم كحلي والوان الباديهات عادي اصفر واحمر واخضر وابيض كل الالوان ياريت تفيديني بليز.
==============
رد بص وطل:
مش شرط خالص إنك تلبسي بادي أسود او كحلي، يعني ممكن تلبسي ألوان تانية مناسبة مع لون البادي اللي من فوق، يعني ممكن تلبسي بادي أصفر مع موف أو أحمر مع بيج يعني مش لازم تقيدي نفسك بلون بادي واحد من تحت.
انا بلبس عدسات رمادي فاتح
انا بلبس عدسات رمادي فاتح وبحس ان الكحل الاسود بيدي شكل مرعب وبيسمر انا عاوزة منك تديني اقرب لونين يخلو شكل العدسات طبيعي ويليق مع لون بشرتي انا اغمق من لون بشرة الموديل شوية مع العلم اني معيش ميزانية لاكتر من اتنين فعايزة اقرب لونين من كحل بورجوا وياريت تكتبي لي الدرجات والارقام بالظبط انا حاسة اني بتعبك معايا أنا اسفة.
==============
رد بص وطل:
ولا يهمك يا قمر وأهلاً بكل أسئلتك في أي وقت، وبالنسبة لسؤالك فاحب اقول لك إن أهم حاجة إن لون العدسات يكون مناسب للون بشرتك وشكل عينيكي ووشك، لإنها لو مش مناسبة هتدي نتيجة ومظهر مش لطيف، وبالنسبة لدرجات الكحل فإنتي ممكن تستخدمي البني الغامق أو الموف أو الأزرق الغامق.
طب يا ايمان انا عندي هالات
طب يا ايمان انا عندي هالات وبداريها بالكونسيلر اوك وبستخدم كريم اساس كيرولان احطة الاول ولا الكونسيلر مع العلم اني بستخدم كونسلير قلم بريشة برتقالي غامق وبحط فوق كونسيلر قلم بيج فاتح من اوريفليم كدة صح ولا مينفعش وانا زعلانة عشان انتي مش بتردي علي كل حاجة كتباها بتردي علي حاجة بسيطة وانا كدة مش بستفيد ياريت اجابة وافية انا معنديش غيرك.
================
رد بص وطل:
ميرسي يا شوشو على ثقتك فيا، ووبالنسبة لسؤالك عن الكونسيلر فإنتي بتحطيه الأول وتوزعيه كويس على المنطقة تحت العين يعني بتفرديه كويس جداً بحيث ميبقاش مكلكع، وبعد كده بتوزعي كريم الأساس على منطقة العيون وعلى باقي الوش، وفعلاً الكونسيلر البرتقالي وبعده الكونسيلر البيج هي أحسن طريقة لاخفاء الهالات بس خدي بالك إنك ماتحطيش كميات كبيرة، يعني حطي كمية مناسبة ووزعيها كويس.
هاى ايمان. كنت عايزة أسأل عن
هاى ايمان. كنت عايزة أسأل عن وصفة لل stretch marks?
==============
رد بص وطل:
الـstretch marks دي بيكون سببها نقص أو زيادة الوزن المفاجيء أو بعد الحمل والولادة، وعادة بتروح لوحدها مع الوقت، ولو عايزة تسرعي من اختفاؤها ممكن تدهني جسمك كل يوم بخل التفاح وتسيبيه لمدة ساعتين وبعد كده تشطفي جسمك.
حبيبتي بتعبك معايا أنا جبت
حبيبتي بتعبك معايا أنا جبت كريم أساس سوبراnb وهستخدمة وانا رايحة الجامعة مع العلم ان بشرتي اغمق من الموديل شوية بس لونة بيج غامق وبيدي درجة معقولة علي الوش هو ممكن يغمق بشرتي واجيب له لوس باودر كيرولان افضل عشان نفس الماركة ولا اجيب بورجوا وكمان جبت باودر مضغوط من بورجوا درجتها71bieg clairايه رأيك ممكن تديني رأيك يا قمر عشان بثق في انا اخترت صح ولاايه وهل صحيح كريم سوبرا بيضر البشرة مع استخدامه يوميا او يوم بعد يوم يعني مينفعش اعتمد عليه على طول.
==============
رد بص وطل:
صديقتي العزيزة كريم أساس سوبرا كويس جداً وبيعمل تغطية هايلة للبشرة، لكن مشكلته إنه تقيل على البشرة وفيه نسبة رصاص كبيرة، علشان كده يفضل إنك تستخدميه في المناسبات والسهرات، وبالنسبة للجامعة فيفضل إنك تستخدمي حاجات خفيفة شوية زي منتجات اوريفليم، وبالنسبة للووس باودر من كيرولان وبورجوا فالاتنين كويسين.
عايزة اسألك على حاجة أنا
عايزة اسألك على حاجة أنا بشرتي اغمق من الموديل درجة استخدم قلم كحل اسود بيلمع ولا بني بيلمع انهي افضل وانا برسم عيني من فوق وبسيحه كانه شادو ومن تحت عشان يوسع العين وفي اول العين قلم اي لون فاتح لؤلؤي وكمان بورجوا تحفة شكرا ليكي يا قمر.
==============
رد بص وطل:
اللونين هيكونوا مناسبين معاكي، وممكن تفتحي بالشادو بعد كده.
فى غاااااااااااااااايه الجمال
فى غاااااااااااااااايه الجمال والإبداع سيدتى
شكر كتير بس انا عاوزة اعرف
شكر كتير بس انا عاوزة اعرف كريم اساس يعطي البشرة بريق لان حضرتك قولتي استخدم البودرة الشفافة لكن وجهي بيلطش من البودرة طب ينفع كريم الاساس المائي لوجهي لكي يكون لين علي وجهي لان البودرة بتنشف وجهي، وأفضل اساس لوجهي ايه علما باني بيضة لكن وجهي شاحب لو البودرة الشفافة كويسة استخدمها بس بعد كريم الاساس وافضل نوع كريم اساس ليه ممكن تردي عليّ أصل بحب نصيحك.
===============
رد بص وطل:
البودرة الشفافة دي بتستخدميها بعد كريم الأساس، علشان تثبته وتمنعه من إنه يمتص الأتربة، ودي افضل ماركات كريم الأساس اللي ممكن تستخدميها "فلوريل" و"مادينا" و"كيرولان" و"ريمال" و"بورجوا" و"كريستيان ديور".
هاى ايمى انا فرحى قرب
هاى ايمى انا فرحى قرب وعايزاكى تقولي لى وصفات للعنايه ببشرتى انا بشرتى عاديه ومن فتره طلع فيها حبوب بسيطه وخفت بس سايبه بقع ياريت تقولي لى على وصفه بس تكون متاحه بالنسبة لى تزيل البقع دى او ماسك بسيط وميرسى يا قمر.
==============
رد بص وطل:
ألف مبروك مقدماً يا مارو وربنا يتمم لك على خير، وبالنسبة لمشكلة آثار الحبوب فده ماسك كويس تقدري تستخدميه لإنه بيساعد على تفتيح آثار الحبوب دي لكن مع المواظبة في الاستخدام، والماسك ده هو ماسك الخميرة وكل اللي عليكي إنك تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، والماسك ده بينظف البشرة ويفتح لونها وبتكرري الماسك ده مرة في الأسبوع.
انا اسفة بتعبك معايا انا
انا اسفة بتعبك معايا انا معرفتش اوضح لك من الاول هي بقع غامقة تشبه الحبوب ولونها بيحمر من الماء او لما تليف جسمها وهي مسببة لهاان لون جسمها اتغير بقى غامق مع العلم انها بيضاء جدا وفجاة لما تزيد الحبوب دي بعد سفرها جسمها اغمق يا ريت تفيديني اية السبب اللي خلى جسمها اغمق كانها قمحي مع إنها بيضة جداً، والكلام ده من حوالي شهرين جسمها اتغير لونه فانا بعتقد من ظهور البقع الغامقة اللي تشبه الحبوب ياريت تفيديني ان جسمها يرجع مثل الاول والبقع دي تروح.
=============
رد بص وطل:
ولا يهمك يا جميل وأهلاً بكل أسئلتك في أي وقت، وبالنسبة لأختك فدي وصفة ممكن تعملها وهي بتساعد على تفتيح البقع الغامقة في الجسم وهي عبارة عن عسل + ملح خشن + ترمس مطحون + عصير ليمون
الطريقة:
بتخلط كل المكونات دي مع بعضها كويس وبعد كده بتفرك الخليط ده على جسمها، بس خدي بالك أن الفرك يكون بالراحة علشان بشرتك ما يحصلش لها أي التهاب، وبتسيب الخليط على جسمها لمدة 7 دقائق، وبعد كده بتشطف جسمها بماء فاتر، وبتكرر الوصفة دي مرتين في الأسبوع وإن شاء الله هتلاقي نتيجة كويسة، لكن لو جسمها التهب أو احمر يبقى لازم تستشير دكتور أمراض جلدية لإن كده ممكن يكون عندها حساسية، وبالتالي لازم علاجها لازم يكون تحت إشراف دكتور، ويا ريت تطمنينا عليها.
هاي ايمي من فضلك كنت عايزة
هاي ايمي من فضلك كنت عايزة اعرف ايه الموضة في نضارات الشمس ولو هاشتري نضارة واحدة بس وعايزاها تمشي مع كل ألوان اللبس ايه الافضل أختار الأسود ولا البني مع العلم انا بشرتي خمرية وفي الصيف بتسمر شوية ومحجبة ووشي مدور او بيضاوي وسني 26 سنة
==================
رد بص وطل
بصى ياقمر الموضه السنة دى فى نظارت الشمس إنها تكون كبيرة وألوانها زاهية ولازم تراعى إن نظارة الشمس تغطي العين كلها وتغطي الحاجبين ومتلمسش الخدود بس تكون على مسافة منهم فلازم تناسب حجم الوش بحيث إنها لا تكون عريضة ولا ضيقة واللون الأسود والشفاف ألوان محايدة تناسب أي لون من الملابس أما بالنسة للون النظارة اللى يمشى مع بشرتك فهى ألوان النظارات الغامقة وحاولي تبعدي في اختيار شكل نظارتك عن النظارات البيضاوية والمربعة والمستطيلة لو كان وشك بيضاوي.
يا ايمان مرديتيش عليا ليه ؟
يا ايمان مرديتيش عليا ليه ؟ انا كنت بسالك هل الكيراتين لما المده بتاعته تخلص بيروح من الشعر كله ولا الجدور اللي طالعه بس هي اللي بتبقي مش معموله ياريت تكوني فاهمه قصدي ردي عليا بقي مش زي المره اللي فاتت وميرسي يا ايمي بحبك اوى
===================
رد بص وطل
بصى يا قمر الكيراتين مدته بتختلف على حسب النوع اللي بتعمليه وعلى حسب اهتمامك بشعرك بعد ما تعملي الكيراتين يعني فيه نوع بيستمر لمدة 5 أو 6 شهور، وفيه نوع بيستمر لمدة سنة وفيه نوع بيستمر لمدة 3 سنوات ولما مفعوله بيروح بيروح من الجذور.
اختي عايشة برة على طول بتتنقل
اختي عايشة برة على طول بتتنقل لاكثر من بلد هي بيضة بس جسمها اغمق وبقي فيه حبوب ورقبتها سودا من ساعة ما بقت تسافر مش عارفة اية السبب ممكن تفيدوني وبجد انا بشكرك على ردك عليّ بجد انتي عسل اوي
========================
رد بص وطل
بصى يا جميل بالنسبة لمشكلة الحبوب اللي بتظهر في جسمها فهي ممكن تتجنبها بإنها تهتم أكتر بالنظافة الشخصية والاستحمام اليومي للتخلص الشوائب والدهون الزائدة اللي بتساعد على نمو الجراثيم وانسداد المسامات، وكمان لازم تهتم جداً بنظافة ملايات السرير اللي بتنام عليه، وكمان نظافة الملابس اللي بتكون ملتصقة مباشرة بالجسم، وتحاول تلبس دايماً ملابس داخلية مصنوعة من القطن علشان تمتص العرق والرطوبة، وكمان نظافة الشعر مهمة جداً وخصوصاً إذا كان شعرها طويل، ولو ظهرت عندها الحبوب فهي لازم تهتمي جداً بتنظيف المناطق الملتهبة بإنها تمسحها بالمناديل المعقمة بعد ما تاخد حمامها اليومي، وفيه كمان مطهرات موجودة في الصيدليات، ممكن تجيبها وتمسح بها جسمها باستخدام قطنة مبللة بالمحلول ده.
أما بالنسبة لرقبتها فدي وصفة هايلة هتساعدها على تفتيح رقبتها..
المكونات:-
• بشر تفاحة طازجة.
• معلقة كبيرة دقيق.
• نقطتين عصير ليمون.
طريقة تحضير الماسك:-
بتخلط التفاحة المبشورة مع الدقيق وعصير الليمون، وبعد كده بتحط الماسك على رقبتها لمدة 10 دقائق، وبتشيله بالميه الفاترة، وعلى فكرة الماسك ده مش بس بيفتح الرقبة وبس ده كمان بيشد عضلات الرقبة.
انا وشى على طول ناشف اوى
انا وشى على طول ناشف اوى وبيقشر ولما بحط ميك اب المسام الواسعة بتظهر وبتضايقنى مع العلم انى بستخدم منتجات نظيفة
============================
رد بص وطل
ده ماسك حلو أوي ممكن تعمليه علشان تحافظي على نضارة بشرتك وهو بيتكون من خيارة ومعلقتين عسل نحل .
الطريقة :اضربي الخيارة في الخلاط وبعدين ضيفي عليها العسل، وافردي الخليط ده على وشك ،وسيبيه لمدة ربع ساعة وبعد كده اغسلي وشك بماء دافئ، والماسك ده ممكن تعمليه مرة كل اسبوع وإن شاء الله هتحسي بنتيجة هايلة.
أما بالنسبة للمسام الواسعة فده ماسك هايل جدا هيخلصك من المشكلة دى وهو ماسك النشا.
المقادير: ملعقة كبيرة نشا + ربع فنجان قهوة مية دافية + ربع فنجان قهوة زيت الزيتون.
الطريقة:
ادهني البشرة الأول بزيت الزيتون وبعدين اخلطي النشا بالمية وحطيهم على البشرة لمدة 20 دقيقة واغسلي وشك بالمية الدافية وعلي فكرة الماسك ده هايل جدا لانه بيستخدم فيه النشا اللي بيساعد على علاج حبوب الوجه والمسام الواسعه وحروق الشمس بالإضافة لأنه منظف ممتاز للبشرة.
بجد رائع وفوق الرائع كمان يا
بجد رائع وفوق الرائع كمان يا ايمى بس معلش سؤالى هو انا عينى واسعة يا ترى هيبقى شكلها حلو فى اللينسيز (العدسات) وأى لون يليق فيا وأنا بشرتى بيضة وبقف فى الشمس كتير يا ريت لو تقولي لى اسم كريم علشان أحافظ على لون بشرتى.
===============================
رد بص وطل:
ميرسي يا "منى" لذوقك، وبالنسبة لألوان العدسات اللي ممكن تستخدميها فهي " الأخضر والرمادي واللبني"، أما بالنسبة لبشرتك فتقدري تستخدمي كريم واقي للشمس من بين ماركات "ماش، لونا، فوتوديرم".
هاااااى بجد احنا مش عارفين
هاااااى بجد احنا مش عارفين نقول لك اية على المعلومات دى وبجد ميرسى جدا بس ياريت تقولي لى على حاجة تخلى ايدى طرية على طول وبقى كمان يبقى رطب وانا شعرى ماكنش مقصف خالص بس من حوالى اسبوع وهو ابتدى يقصف ياريت تقولي لى على الحل.
============================
رد بص وطل:
شكراً لمتابعتك ولمشاركتك يا "سالي"، وبالنسبة لإيدك فانتي تقدري تستخدمي لها أي كريم مرطب تحبيه وممكن تستخدمي كمان خليط الجلسرين بالليمون بس أهم حاجة إنك تواظبي عليه علشان تحسي بنتيجة سريعة، وبالنسبة لشفايفك فواظبي على وضع الفازلين ليها بانتظام، أما مشكلة تقصف شعرك فحلها في إنك تقصي الأطراف المقصفة كل 45 يوم، وتهتمي بإنك تأكلي الأكل المفيد زي الأسماك والخضروات ومنتجات الألبان، وممكن تعملي الوصفة اللي هقولك عليها دلوقتي واللي بتتكون من موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.
بليز ردي عليا ضروري علشان انا
بليز ردي عليا ضروري علشان انا بعت كتير ومش بلاقي رد خالص، انا عندي اثر خفيف للحبوب لونه أحمر شويه عايزه اي ماسك يخلي بشرتي بيور بليز قولي لي ضروري. ومرسي اوي ليكم.
=======================
رد بص وطل:
نأسف يا "ياسمين" على تأخر الرد نظراً لكثرة المشاركات الواردة إلينا وبالنسبة لمشكلة بشرتك فدي وصفة كويسة جداً لازالة آثار الحبوب تقدري تستخدميها عن طريق إنك تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع.
كنت عايزة اعرف ماسك للبقع
كنت عايزة اعرف ماسك للبقع السوداء.
======================
رد بص وطل:
دي وصفة سهلة جداً ممكن تعمليها علشان تفتحي البقع اللي بتظهر على الوجه
الطريقة:
قشري ثلاث حبات لوز وانقعيها في الماء وبعدين اطحنيها، وبعد كده تضيفي ملعقة صغيرة من عصير الليمون وبياض بيضة واحدة لعجينة اللوز وبعدين حطي طبقة من الخليط ده فوق البقع واشطفي وجهك بماء فاتر بعد 15 دقيقة, كرري الماسك ده يومياً علشان تحسي بالفرق.
هاى يا ايمى كنت عايزه اسأل
هاى يا ايمى كنت عايزه اسأل حمام الكريم والزيت بيتعمل ازاى انا بعمله بطريقه وخايفه تكون غلط.
==========================
رد بص وطل:
طريقة حمام الزيت أو الكريم سهلة جداً يا "منى" وهتعمليهم عن طريق إنك تغسلي شعرك بالشامبو وبعين تشطفيه كويس وبعد كده تحطي عليه حمام الكريم أو الزيت من الجذور للأطراف وتسيبيه لمدة تلت ساعة وتكوني لابسة بونيه على شعرك وبعد كده تشطفيه بالماء الفاتر.
ميرسي اوي ليكي يا ايمان بس
ميرسي اوي ليكي يا ايمان بس برضه انتي ماعملتيش حلقه عن تنظيف البشرة
وبصي انا بشرتي دهنيه ومش عاوزة احط ميك اب علشان بطلته فترة ولما رجعت احطه مابقتش حباه في وشي، انا باستعمل كريم اساس ولوس باودر من اوريفليم
عاوزه حاجه تساوي لون البشره ولا تفتح ولا تغمق، مجرد ضي للبشرة من غير ما احط كريم الاساس والباودر.
========================
رد بص وطل:
تقدري تحطي كونسيلر بس وتخفي بيه العيوب الموجودة في بشرتك زي الهالات أو آثار الحبوب مع كحل خفيف وبكده ماتحتاجيش لكريم الأساس ولا الباودر.
hi emy plz ana regli esamrt
hi emy plz ana regli esamrt awiii mn el blerina f le momken mask yft7a w y5leha rtba l2n fe el sef b7b albs sandles
=====================
رد بص وطل:
علشان تفتحي لون رجلك تقدري تعملي الماسك ده وهو عبارة عن معلقة صغيرة من الماء اللي بيتكون على سطح الزبادي + عصير نصف ليمونة وبتخلطيهم مع بعض كويس وبعد كده تحطي الخليط على رجلك وتسيبيه لمدة ساعتين وبعد كده تغسلي رجلك وهتلاقي نتيجة سريعة وهايلة إن شاء الله، وعلشان ترطبيها وتخليها أنعم ممكن تستعملي لها خليط من الليمون والجلسرين بس واظبي على وضعه كل يوم.
لسلام عليكم فى لبدايه اشكركم
لسلام عليكم فى لبدايه اشكركم على مجهودكم الرائع ده وربنا يجازيكم كل خير انا هتجوز كمان 6 شهور لكن عندى مشاكل كتيره جدااااااا ومش قادره اوصف لك انا نفسيتى تعبانه ازاى انا بعانى من حب الشباب فى وجهى كتير اوووووى وكمان ظهرى واماكن متفرقه فى جسمى واعانى ايضا من الدوالى وشعرى كمان بايظ خالص رغم انه ناعم يعنى مقصف وقصير وفيه قشره وكمان اعانى من حرقان فى البول وكمان وزنى عاوز يزيد اناكنت نحيفه اوى لكن الحمدلله زد شويه لكن عاوزه ازيد لسه انا عارفه ان مشاكلى كتير اووووووووى بس بالله عليكم انا اتكلت على ربنااولا ثم انتم ياريت تساعدونى باى نصيحه ارجوكم وجازكم الله خيرا يارب
====================
رد بص وطل
ألف مبروك ياقمر وربنا يتمم لك على خير إن شاء الله وبالنسبة لمشكلة الحبوب فأهم حاجةإنك ماتلعبيش فيها خالص وكمان ماتستعمليش أي علاج ليها إلا تحت إشراف دكتور في الأمراض الجلدية عشان يديكي العلاج المناسب على حسب طبيعة الحبوب .
وبالنسبة للدوالى وحرقان البول فننصحك بإستشارة طبيب متخصص وكذلك بالنسبة للوزن عشان يديكى النظام الغذائى الصحيح اللى يناسب جسمك .
أما بالنسبة لتقصف الشعر فدى وصفة هايلة جدا وبتتكون من موزة + معلقتين زيت زيتون + معلقتين عسل نحل و بتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة .
أما القشرة فأنا بانصح انك ماتستعمليش أي شامبوهات ضد القشرة إلا تحت اشراف دكتور متخصص في الأمراض الجلدية وممكن تشطفي شعرك بالخل وبعد كده تغسليه بالشامبو العادي المناسب لشعرك و دي طريقة طبيعية وفعالة لعلاج مشكلة القشرة.
السلام عليكم ورحمة الله
السلام عليكم ورحمة الله وبركاته، انا مشكلتى هى الشعر المجعد انا نفسى فى وصفه تفرده وتجعله انسيابى انا كتير متضايقه لو سمحتم اريد مساعدتكم.
========================
رد بص وطل:
وعليكم السلام ورحمة الله وبركاته، تقدري يا صديقتي تخففي من مشكلتك بأنك تستخدمي الوصفة دي واللي بتتكون من معلقتين زيت سمسم + معلقة عسل نحل + بيضة واحدة وبتخلطي كل المكونات دي مع بعضها وتدلكي فروة رأسك كويس بالخليط ده وبعد كده تغطي شعرك بفوطة وتتركيه لمدة نصف ساعة وبعد كده تشطفيه بالشامبو المناسب لشعرك ،وممكن تعملي الوصفة دي مرة في الاسبوع .
فى البداية ميرسى ليكم كتير
فى البداية ميرسى ليكم كتير على المعلومات المفيدة دى بس ان عندى سؤال ضرورى كنت عاوزة اعرف ايه الافضل الفرشة الدوارة ولا الاستشوار لانى باجهز ومحتاجة اجيبهم بسرعة انا شعرة جاف ومقصف وطويل وبيهيش مع العلم انى ماليش تجارب خالص فى استعمال حاجات منهم قبل كده خالص كنت باروح للكوافير وياريت الماركة الكويسة كمان لأن فى ناس كتير قالو لى ان الفرشاة الدوارة وحشة وبتقطع الشعر واللى قالوا لى ان الاستشوار مضر ارجو الرد ضرورى اوى وشكراااااااا
============================
رد بص وطل:
تقدري تستخدمي الاستشواار يا صديقتي العزيزة لأنه أحسن من الفرشه الدوارة اللي مابتكونش مناسبة لأنواع شعر معينة، وممكن تختاري ما بين ماركات زي "براون" أو أي ماركة تانية كويسة تلاقيها بس أهم حاجة إنها ماتكونش صيني أو سعرها رخيص.
انا بقى عندى حبوب كتير فى
انا بقى عندى حبوب كتير فى وجهى وبقى شكلى وحش وبشرتى كتير بهتانه وبحط ماسكات طبيعيه مش نافع اعمل ايه وانا سنى 22سنه وحاسه ان وجهى شاحب.
=======================
رد بص وطل:
أهم حاجة في الحبوب يا صديقتي العزيزة إنك ماتلعبيش فيها خالص وكمان ماتستعمليش أي علاج ليها إلا تحت إشراف دكتور في الأمراض الجلدية علشان يديكي العلاج المناسب على حسب طبيعة الحبوب، ولازم تعرفي إن ده شيء طبيعي بسبب طبيعة المرحلة العمرية اللي بتمري بيها علشان كده ما تنزعجيش.
هاى يا نانى ازيك يا قمر انا
هاى يا نانى ازيك يا قمر انا عندى مشكله العيد جاى وانا جايبه لبسى ازرق فى كحلى ومش عارفه اعمل الميك اب ازاى انا سنى صغير انا 18 سنه ممكن تقولي لى على رسمه هاديه والحاجات اللى تخلينى ابان طبيعيه وهل الاي لاينر ليا بيكون اوفر اوى ميرسى يا قمر اوى
=======================
رد بص وطل:
كل سنة وانتي طيبة يا صديقتي العزيزة،وإحنا كنا إتكلمنا على موضوع الماكياج الهاديء ده قبل كده بس الظاهر إنك مش متابعانا كويس وعلى العموم تقدري تقرأي الموضوع تاني وتشوفي الفيديو اللي هيجاوبك على كل أسئلتك لما تدوسي على اللينك ده:
http://www.boswtol.com/health-and-beauty/beauty-and-styling/10/february/...
حاجه جميلة اوى ربنا يوفقكم
حاجه جميلة اوى ربنا يوفقكم ونبطل مكياج خالص اريح لبشرتنا
هاى ازيك يا ايمى انا عايزة
هاى ازيك يا ايمى انا عايزة اعرف كريم اساس للبشرة الدهنية وكنت عايزة اقول لك نفسى يكون الموديلز حلوين علشان المكياج يكون أحلى انتى بجد بتقدمى مكياج خطير ومعلومات مفيدة بس لما بنشوف الموديلز بنقول خسارة
========================
رد بص وطل:
تقدري تستخدمي في كريم الأساس ماركات زي "فلوريل" و"مادينا" و"كيرولان" و"ريمال" وهتلاقي إن في منها مخصوص للبشرة الدهنية واللي بتكون خالية من الزيوت بس هتلاقي أسعارها مرتفعة شوية.
لو سمحت انا عايزه الرد على
لو سمحت انا عايزه الرد على السؤال بتاعى انا عندى بقع فى جسمى كله بسبب الحساسيه هى بنى بس مش عارفه اعالجها ازاى وهو الطريقه الوحيده هو الليزر وايه اضراره شكرا
======================
رد بص وطل
صديقتى بننصحك إنه من الأفضل إستشاره طبيب متخصص عشان يحدد الطريقة المناسبة ليكى للتخلص من هذه البقع .
ارجوكي ردي عليا انا محتاجاكي
ارجوكي ردي عليا انا محتاجاكي في اسرع وقت انا مش عارفة اجيب كريم اساس ولوس باودر من اوريفليم ولا الماركات اللي انتي بتقولي عليها وعايزة اعرف الاقيها في صيدليات ايه وارجوكي الأسعار بتتراوح من كام علشان اعمل حسابي وياريت أعرف سعر كريم الأساس السوبرا المائي ياريت تردي عليا في اقرب وقت
=======================
رد بص وطل:
تقدري يا صديقتي إنك تستخدمي أي ماركة أنتي تحبيها سواء كانت ماركات أوريفليم أو أي ماركة أنا قلت عليها قبل كده، وهتلاقيهم في كل الصيدليات الكبيرة والمشهورة وكمان محلات بيع مستحضرات التجميل، والأسعار بتتراوح من 150 إلى 250 جنيه.
ايمان انا كنت عايزة اخد رأيك
ايمان انا كنت عايزة اخد رأيك فى ماركات ايفون واوريفليم فى الميك اب وكمان عايزة اسألك انا مش بحط كريم اساس ولا بودرة خالص بس عايزة استعمل بودرة مضغوطة ينفع استعملها من غير كريم اساس قبلها.
=====================
رد بص وطل:
منتجات إيفون وأوريفليم كويسة يا صديقتي وتقدري تستخدميهم، وبالنسبة للبودرة المضغوطة فهي لازم تستعمل بعد كريم الأساس علشان تزيد من تثبيته وتنور الوش، وماينفعش تستخدميها لوحدها.
شكرا يا ايمى رائع بجد
شكرا يا ايمى رائع بجد ..
عاوزة اعرف بعد الفاونديشن باستخدم لوس باودر ولا بودرة مائية ولا كومباكت باودر ..
وهل فى حاجة من اللى قلتها بتضر البشرة ؟
وايه افضل ماركة للميك أب استخدمها بعد كده وتكون متوافرة فى كل مكان للميك أب ؟
مش تنسى تردى عليا.. وربنا يكرمك يارب.. بجد بتفيدينا
======================
رد بص وطل:
بعد ما تحطي الفاونديشن يا "ريمو" بتحطي كومباكت باودر أو لوس باودر على حسب اللي تفضليه لكن ما تحطيش بودره مائية لأنها بتضر البشرة مع كثرة الاستخدام، ودي من أفضل ماركات الماكياج اللي ممكن تستعمليها وإنتي مطمنة "فلوريل" و"مادينا" و"كيرولان" و"ريمال" و"بورجوا" و"كريستيان ديور".
ممكن اعرف ايه الفرق بين الصن
ممكن اعرف ايه الفرق بين الصن بلوك والصن سكرين، وكمان ازاي احدد الدرجة اللي مناسبة لي انا حاليا باستعمل صن سكرين لونا 12 spf كويس؟
وممكن استخدمه علي الكفين؟ معلش اخر حاجة ازاي نعتني بالعين ونخليها فريش كده عشان وانا رايحة الجامعه مش باحط اي مكياج ميرسي كتير وبجد انا مبسوطة كتير اني متابعة الحلقات الجميلة دي وباستفاد كتير.
==============
رد بص وطل:
مفيش فرق كبير بين الصن بلوك والصن سكرين والاتنين بيقوموا بنفس الدور تقريباً، أما بالنسبة لدرجة الحماية فكل ما كانت أكبر كان أفضل لإن طبيعة الشمس عندنا في مصر حامية شوية.
أما بالنسبة لسؤالك الثاني فإنتي تقدري تحافظي على عينيكي نضرة بإنك تنامي كويس وتشربي ميه كتير وكمان وضع شرايح الخيار على العينين كل يوم مفيد جداً.
اولا ميرسي جدا ليكي علي الميك
اولا ميرسي جدا ليكي علي الميك اب الجميل اللي بتقدميه لينا وعلي نصائح وضع الميك اب الصحيح والمناسب لكل بشره ثانيا انا عايزه اعرف ازاي احط ميك اب مناسب ليا خصوصا ان منطقه الخدود عندي عاليه شويه ومش بعرف اخبيها شويه او اصغرها بالميك اب؟؟؟ تاني حاجه ان شفايفي من فوق اصغر من تحت وكمان طبيعتها انها مش متحدده بدوران ولكنها شكل طرف المثلث شويه من الناحيتين وداخله من الوسط ولما بحاول اخليها دائريه بقلم التحديد مش بتتظبط خالص؟؟؟؟ معلش طولت في الاسئله وميرسي ليكي.. ارجو الرد
ويارب تقدمي لنا الاحسن كل مره.
==================
رد بص وطل:
ميرسي ليكي جداً يا ندى على ذوقك ورقتك، ويا ريت تتابعينا دايماً لإننا بنقدم فيديوهات كتير بتوضح وبتشرح إزاي كل بنت تقدر تتعامل مع عيوب وجهها زي المحترفين، فتابعينا وقولي لنا رأيك.
جزاك الله كل خير على ردودك...
جزاك الله كل خير على ردودك... وسؤلى عندى المنطقه حول الفم غامقه شويه عن البشره على الرغم من استخدامى كريم مرطب جونسون وبشرتى دهنية وكمان وجهى غامق عن جسمى مع انى بستخدم كريم حمايه من الشمش لونا.
==========================
رد بص وطل:
علشان تفتحي الغمقان اللي حول الفم يا صديقتي ممكن تعملي الوصفة دي وهي عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.
انا بشكرك جدا علي نصايحك دى
انا بشكرك جدا علي نصايحك دى وبجد انا استفدت كتير اوي انا عمري ماعرفت انواع الماركة اللي ممكن استخدمها لبشرتي ممكن تفيدينني علي الأقل بالنسبة لي الاساس انا بيضة وخدودي حمراء ودة بيخليني معرفش اعمل ميكب بس انا عاوزكي تفيديني بالنسبة لنوع الكريم أو الاساس أنا بيضة بس وجهي باهت مش عارفة اعمل اية ونفسي اعرف الكريم الي يجعل البشرة كانها منورة او بها ضي بجد نفسي استعمل هذا الكريم
====================
رد بص وطل
بصى ياقمر عشان تعرفى إذا كان لون كريم الأساس يمشى مع بشرتك ولا لا فلازم الأول تجربيها على المنطقة الموجودة عند الرقبة وأسفل الخد أما عشان تنورى وشك فأفضل حاجة ليها إنك تستخدمى البودرة الشفافة لإنها بتدي اضاءه للوجه وكمان بتساعد على تثبيت الماكياج لأطول وقت.
هاى ايمى بجد انتى امور اوى
هاى ايمى بجد انتى امور اوى انا فرحى شهر 5 وكنت بستعمل بودرة مائية وكنت عايزة ابطلهاكنت عايزة كريم اساس كويس ويستعمل ازى وانا كنت عايزةاسم فرد للشعر يكون كويس وميوقعليش شعرى وهل الفرد الاعشاب كويس
==================
رد بص وطل
دي من أفضل الماركات اللي ممكن تستعمليها وإنتي مطمنة "ريمال" و"بورجوا" و"كريستيان ديور" أما بالنسبة لطريقة إستعماله يبقى لابد من إنك تضعي الإسفنجة في كريم الأساس، أو تأخذي القليل منه على إيدك، ثم تضعيه على نصف الوجه من فوق، وتنزلي به إلى الأسفل إلى أن تصلي للعينين، والخد ثم الشفايف والرقبة، وإلى أي مكان يظهر سواء في الرقبة أو الكتف، وإلى منابت الشعر من فوق لكي تعطي نتيجة طبيعية...وياريت تمزجي نقطة كريم أساس مع المرطب خاصة لو حسيتي إن كريم الأساس تقيل شويه أو مش عارفة توزعيه كويس.
ودي وصفة هايلة جدا هتساعدك على التخلص من تجاعيد الشعر نهائي المكونات:
صفار بيضة واحدة.
نصف ملعقة زيت زيتون.
كوب إلا ربع من الماء الفاتر.
الطريقة:
اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق قبل ما تشطفي شعرك.
مرسي ليكي اوي ياايمان على
مرسي ليكي اوي ياايمان على المعلومات الجميله دي وانتي فعلا فنانه وشخصيه جميله جدا
أنا وجهي مليان حبوب اعمل
أنا وجهي مليان حبوب اعمل ايه؟
=============
رد بص وطل:
موضوع علاج الحبوب ده يا موني لازم يكون تحت إشراف دكتور أمراض جلدية علشان يديكي العلاج المناسب، وفي الوقت ده لازم تقللي خالص من وضع الميك اب، واهتمي جداً بتنظيف بشرتك وممكن تستخدمي صابونة طبية زي ديتول أو صابونة كبريت.
هاى يا ايمى يا قمر على فكره
هاى يا ايمى يا قمر على فكره انا بموت فيكى بجد وكان عندى مشكله بالنسبه للبودر المائى انا بستعمله هوه بيعطينى النتيجه اللى انا عايزاها بس بحس ان بيبان انى حطه ميك اب كتير حتى لو خففت انا بشرتى دهنيه وبيضه بس جبت كريم اساس olay وبحط عليه بودر سابت العادى ده بس بحس انه مش مدينى الشكل اللى انا عايزاه مش بيبيضنى يعنى بس انا عايزه اسألك استعمل ايه تحت عينى وعلى بشرتى انهى احسن وممكن اجيب حاجه تانيه استعملها على الكريم والبودر ولا ايه بس انا عايزه احط ميك اب بس فى نفس الوقت يكون هادئ وخفيف ومرسي يا قمر انا اسفه طولت عليكى بجد بحبك
======================
رد بص وطل
بصى ياقمر بالنسبة للبودرة المائية فدى مضرة للبشرة ويفضل إستخدام كريم الأساس أما لو كنى عايزة تعملى ميك أب رقيق وبسيط فمن الأفضل إنك توزعى كريم الأساس كويس على وشك بعد كدا حطى كونسيلر فى المنطقة اللى تحت العين لإخفاء أى هالات سودا أو أى أثر للسهر وحطي بلاشر بينك على خدودك، والروج يكون هادي ورقيق .
بجد معلومات قيمة شكراً يا
بجد معلومات قيمة شكراً يا ايمان بس عندى سؤال عايزة اي معلومات لعلاج البشرة المرهقة اولا قبل المكياج وبدون عمل مكياج عايزة اكون طبيعية على الأقل تكون بشرتى في البيت تكون مش مرهقة وأنا هكون من غير ميك اب مع الشكر.
==================
رد بص وطل:
صديقتي العزيزة الحل أنك تبدائي في التقليل تدريجيا من المكياج اللي أنتي بتحطيه يعني كفاية أنك تحطي مثلا "كحل وروج وأحمر خدود على خفيف"، وكمان اهتمي دايماً أنك تنظفي بشرتك من اى أثار للمكياج اللي عليها علشان تديها فرصة أنها تتنفس بعد كده ممكن أنك تجربي الماسك ده لإنه مفيد جداً وبيعالج أي علامات إرهاق أو تعب ممكن أنها تكون موجودة على البشرة وهو ماسك الخيار..
المكونات:
نصف فنجان خيار مبشور.
بياض بيضة.
2 معلقة صغيرة من اللبن البودرة.
الطريقة:
اخلطي المكونات دي كلها مع بعضها لغاية ما تبقى عجينة لينة وحطيها على وشك، وبعد مرور 20 دقيقة اشطفي وشك بالماء الدافئ، وبعد شوية اشطفيه بالمية الباردة، جربي الماسك ده مرتين في الأسبوع وهتشوفي النتيجة بنفسك.
هاى ايمى انا عايزة وصفة حلوة
هاى ايمى انا عايزة وصفة حلوة لتطويل الشعر وتتقله اناجربت بتاعة حبة البركة بس لوفى حاجةاحلى ياريت وكمان انابشرتى ناشفة اوى من الشتا لو فى حاجةاعملها عشان مش بعرف احط ميك اب من النشفان وايدى باظت من غسيل المواعين بجيب كريمات ايد غالية من اوريفيليم مفيش فايدة اعمل ايه وشكراياقمر
===========================
رد بص وطل
صديقتي العزيزة دي وصفة هايلة جدا لتطويل الشعر وكمان مكوناتها سهلة جدا كل اللي إنتي هتحتاجيه:
1- كوب زيت جوز الهند
2-ربطة بقدونس
3- ملعقتين حناء
تجفف ربطة البقدونس وتخلطيها مع الزيت والحناء
وتسخنيه على النار وخزنيه عندك واستعمليه مرتين في الاسبوع
وان شاء الله هتلاقي نتائج رائعة
ودى وصفة جميلة جدا لتتقيل الشعر والمقادير :
معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطيهم كويس مع بعض وبعد كده افردي لخليط على شعرك كامل ولفيه بفوطه دافئه لمدة ساعتان وبعد كده اشطفيه بماء فاتر.
وده ماسك حلو أوي ممكن تعمليه علشان تحافظي على نضارة بشرتك وهو بيتكون من خيارة ومعلقتين عسل نحل .
الطريقة :اضربي الخيارة في الخلاط وبعدين ضيفي عليها العسل، وافردي الخليط ده على وشك ،وسيبيه لمدة ربع ساعة وبعد كده اغسلي وشك بماء دافئ .والماسك ده ممكن تعمليه مرة كل اسبوع وإن شاء الله هتحسي بنتيجة هايلة .
أمابالنسبة لمشكلة جفاف الكفين فإنتي ممكن تعملي الوصفة دي مره في الأسبوع ولمدة ربع ساعه وهي عبارة عن معلقة خميره مع معلقتين حليب فاتر ويضاف للمزيج معلقه صغيره عسل ممزوجه بصفار بيضه ومعلقه من الجلسرين ومعقلتين كبار من ماء الرز المغلي، ومعلقه صغيره زيت زيتون وبتخلطي كل الحاجات دي مع بعضها وتحطيها على ايديكي ولو حسيتي إن الخليط مش متماسك أوي ممكن تحطي عليه شوية دقيق.. وبتسيبيه على ايديكي لمدة ربع ساعة وبعد كده تشطفيها بالماء الفاتر.
