أهلاً بيكم في حلقة جديدة، وأنا سعيدة جداً إني هاكون معاكم النهارده، ومعايا ومعاكم النهارده خبيرة الماكياج "سحر شلبي" اللي هنتعرّف معاها على خطوات وضع الماكياج المناسب للبشرة الفاتحة اللي بتعاني من وجود بعض المشكلات اللي بتقابل البنات؛ زي مثلاً مشكلة وجود الحبوب الخفيفة على بعض المناطق على البشرة إلى جانب مشكلات ثانية كتير هنحاول إننا نحلّها بالميك أب..
يلّا بينا نتفرّج ونشوف إزاي...
إزاي تشتري كريم أساس مناسب؟!
هنبدأ نوزّع كريم الأساس على البشرة، ولازم نختار درجة مناسبة للون بشرتنا، ودي هنعرفها بإننا وإحنا بنشتري نعمل اختبار للون على منطقة الخدود، ونراعي إن لون الفاونديشن يكون أفتح درجة أو اتنين بس من لون بشرتنا، ويا ريت يكون معانا لون تاني غامق لمعالجة المشاكل اللي ممكن إنها تكون موجودة في بشرتنا..
الغامق والفاتح لإخفاء العيوب!!
هنستخدم اللون الفاتح تحت العين؛ لعلاج الإرهاق اللي ممكن يظهر نتيجة السهر أو التعب أو الإجهاد، بعد كده بنجيب اللون الغامق علشان نحدد بيه عضمة الفكين...
ولازم يا جماعة ندرج البشرة زي ما وشنا بيقول، ففي الموديل اللي معانا النهارده بنلاقي إن منطقة الخدود عالية، علشان كده هنحاول إننا نحدد عضمتين الخدود باللون الغامق، ونمشي عليهم بالظبط كأننا بنعمل تفحيم للخدود بطريقة دائرية لغاية ما نوصل للودن.
طريقة توزيع كريم الأساس
بنبتدي نوزّع اللون بطريقة التربيت "زي ما هنشوف في الفيديو"، علشان يكون موجود على البشرة كلها.. وعلى فكرة يا جماعة الماكياج الناجح بيعتمد على التدريج أو المزج التدريجي في الألوان بين الفاتح والغامق، وبلاش نعتمد على اللون الفاتح فقط؛ لأنه بيعمل أخطاء وفي بعض الأحيان بيعمل تشوّهات للبشرة، وبيبيّن البشرة تعبانة مرهقة جداً زي ما قولنا قبل كده.
أدواتنا الشخصية مش لحد تاني
في معلومة مهمة جداً يا ريت ناخد بالنا منها، وهي إن ما حدش يستعمل أدواتنا خالص؛ لأن ده ممكن ينقل ميكروبات وفطريات، وبكده ممكن نقعد فترة طويلة جداً نتعالج عند دكتور أمراض جلدية، علشان نتخلّص من الحاجات اللي بتطلع في بشرتنا نتيجة العدوى اللي ممكن تتنقل من استخدام الغير لأدواتنا.
البودرة السايبة لتثبيت الميك أب
دخلنا دلوقتي على مرحلة اللوس باودر.. وهنا بنستخدم لوس باودر مائل للبيج؛ لأنه مناسب جداً للون بشرة الموديل اللي معانا، وعلى فكرة اللون ده طبيعي وحلو أوي على البشرة، وبيخلي البشرة تبان طبيعية جداً؛ لأن زي ما إحنا عارفين إن الميك أب كل ما كان طبيعي كل ما كان أحلى.
كمان عايزة أقول لكم على حاجة مهمة أوي، وهي إن وظيفة اللوس باودر أو البودرة السايبة هي تثبيت الفاونديشن، وفي ناس كتير بتحط الكومباكت باودر "البودرة المضغوطة" بعد الفاونديشن وده غلط كبير جدا، يا جماعة لازم يكون في لوس باودر لتثبيت الفاودنيشن، لكن "البودرة المضغوطة" دي وظيفتها امتصاص الدهون الزيادة الموجودة في البشرة وتصليح الميك أب.
ولازم نستخدم بودر لونها مناسب للون بشرتنا، ونبعد عن البودرة الفاتحة؛ لأنها مش مناسبة نهائي، لازم دايماً نستخدم الألوان اللي تكون قريّبة من درجات البيج ونختار منها المناسب للون بشرتنا.
خطوات عمل ماكياج بسيط للعين
1- علشان نعمل ماكياج عين بسيط بنختار الألوان على حسب لون بشرتنا ولون عينينا ولون اللبس؛ فمثلاً الموديل اللي معانا لابسة أزرق زهري على جينز، علشان كده "سحر" هتسخدم لها اللون السيمون..
2- هنبدأ نوزّعه بالفرشاة المخصصة لمنطقة الجفن المتحرّك، وأكيد مع اللون ده هتستخدم اللون الأزرق الكحلي، وعلى فكرة من عوامل نجاح الماكياج -خاصة ماكياج العين- هي الفُرش؛ لأن كل فرشاة لها وظيفة محددة؛ ففرشاة توزيع اللون فوق الجفن المتحرّك بتختلف عن فرشاة توزيع اللون على جانب العين وبتختلف عن فرشاة توزيع اللون تحت العين وبتختلف عن فرشاة الآي لاينر.
3- بنبتدي نسيّح اللون على الجفن المتحرّك وفوق الجفن المتحرّك، علشان هنعمل رسمة بسيطة مش هنمزج فيها ألوان كتيرة علشان الماكياج يكون بسيط وطبيعي.
4- بنفتّح المنطقة اللي تحت الحاجب بلون فاتح زي اللؤلؤ؛ لتنوير المنطقة اللي تحت الحاجب، وبنمزجه مع درجة اللون اللي موجود على الجفن المتحرّك.
5- جينا دلوقتي لمرحلة مهمة جداً، وهي مرحلة تحديد جذور الرموش باللون الأسود، بنمشي على الحدود بالظبط، ولازم نكون حريصين جداً في المرحلة دي، بعد كده بنستخدم الفرشاة الخاصة بزاوية العين لتحديد زاوية العين بشكل بسيط بحيث إنها ما تقفلش العين.
على فكرة الرسمة دي بسيطة جداً، وبتناسب أغلب العيون وخصوصاً العيون المتهدلة، كمان مناسبة لو كنا خارجين الصبح أو بعد الظهر، أو لو كنا عايزين نظهر بمظهر طبيعي وبسيط.
هندخل بعد كده على مرحلة الآي لاينر، وطبعاً مش لازم نشد الجفن وإحنا بنرسم خط الآي لاينر، وعلى فكرة الآي لاينر بيعمل نظرة فيها عمق للعين، وبيحدد العين وينورها.
الطريقة الصحيحة لوضع الماسكرا
علشان الماسكرا تتعمل معانا صح بنجيب الماسكرا ونمشط بيها الرموش من اليمين إلى الشمال، وفي حاجة حلوة ممكن إننا نعملها لو الماسكرا اللي عندنا في البيت نشفت، ممكن نجيب إناء ونغلي فيه مية ونحط فيه الماسكرا شوية صغيرين لغاية ما تبدأ تشتغل تاني وتطلع السائل اللي فيها، أو نحط نقطة أو اتنين فقط مش أكتر من كده من قطرة الـ"البروزولين" اللي عندنا في البيت ونحرّك الفرشاة داخل الماسكرا وهنلاقي إن الماسكرا اشتغلت.
كمان أحب أقول إن الماسكرا اللي بتطوّل وتكثف بتدي شكل أحلى للعين من الماسكرا اللي بتطول بس أو بتكثف بس.
ولو عايزين مظهر طبيعي يبقى هنجيب الماسكرا اللي بتطوّل بس، وعلى فكرة إحنا هنا بنعمل مظهر طبيعي من غير ما نحتاج لرموش صناعية.
تحديد العين بالكحل
هنجيب بعد كده قلم الكحل ويكون طري، ولو مش طري بنسخنه بالولاعة شوية ونستنى لما يبرد، وبعد كده نحطه جوه العين، وعلى فكرة لون قلم الكحل بيتحدد بلون اللبس.. وعلى فكرة لو كنا عايزين ماكياج العين يثبت لمدة طويلة، يبقى يا ريت نبلل الفرش بشوية مية قبل ما نستخدمها في رسم الآي شادو.
طريقة وضع ماكياج الشفايف
هنبتدي نحط قلم التحديد ويكون لونه أغمق درجة من لون الروج اللي هنستعمله، وبنحدد الشفايف بشكل يتناسب مع شكلها، وعلى فكرة دلوقتي فيه مستحضرات تجميل عبارة عن جلوس "ملمع" فيه مادة "الكولاجين" بيساعد على تكبير الشفايف شوية، ولو كان غالي ممكن إننا نستخدم أي ملمع أو زبدة كاكاو تكون فيها مادة النعناع ونستعملها قبل ما نحط الروج.
مهم أوي إننا نستخدم الفرشاة في وضع الروج؛ لأنها بتسهل وضعه بطريقة سريعة وجميلة وبتخليه يملى الشفايف كلها، كمان الجلوس مهم جداً لأنه بيدي ضي حلو أوي للشفايف.. ونصيحة مهمة جدا بعد ما نستعمل قلم الروج لازم نجيب قطنة مبللة ببعض من الماء ونمسح مكان ما استخدمنا الروج، وعلى فكرة إحنا هنا حطينا روج هادي وما تقلناش علشان تقلنا ماكياج العين والعكس طبعاً لو كنا خففنا ماكياج العين يبقى هنتقل الروج.
ودلوقتي بندخل على المرحلة الأخيرة، وهي البلاشر "أحمر الخدود" وبنختار لون هادي وبناخده بزواية على عضمة الودن وما بنحطهوش على الوش كله.
كنا سعداء معاكم النهارده..
وإن شاء الله نقدّم لكم كل جديد في الحلقات القادمة..
وفي انتظار أسئلتكم ومقترحاتكم
ميرسي ليكم "إيمان أيوب"...
بليز يا ايمان انا عندي بثور
بليز يا ايمان انا عندي بثور صغيرة في خدودي وحبوب لونها احمر اكنها حساسية كنت عاوزة ماسك عشان يخلي بشرتي صافية.
==========
رد بص وطل:
اهلاً بيكي يا سلمى، وبالنسبة لمشكلة الحبوب فالأفضل إنك تستشيري دكتور علشان يديكي العلاج المناسب على حسب طبيعة الحبوب، ويا ريت بلاش تلعبي فيهم خالص وأهم حاجة إنك تاخدي بالك جداً من نظافة بشرتك والأفضل إنك تستخدمي صابون طبي.
من فضلك لو انا عندى كذا مشكلة
من فضلك لو انا عندى كذا مشكلة فى البشرة وانتم بتكتبوا لكل مشكلة ماسك وبتنصحوا باستخدامه مرة اسبوعيا ده معناه اني كل يوم اعمل ماسك مختلف على مدار الأسبوع ولا ده يكون مضر للبشرة أرجو الرد.
=============
رد بص وطل:
مفيش أي مشكلة من إنك تعملي ماسك كل يوم.
هاى ايمى مشكووووووووووووورة
هاى ايمى مشكووووووووووووورة جدا على تعاونك معانا بس انا عندى مشكلة هو مافيش طريقة تانية للقورة غير المكياج ده يبقى افضل دى اول حاجة تانى حاجة.. انا رفيعة جدا وعايزة وزنى يزيد شوية بس فى وقت قليل وشكرا اوى ليكى.
=============
رد بص وطل:
بالنسبة لمشكلة القورة فدي تقدري تداريها بأكتر من طريقة يعني لو كنتي محجبة يبقى ممكن تعملي الطرحة كروس أو تلبسي باندانا وتجيبيها على أدام شوية، ولو كنتي مش محجبة فإنتي ممكن تداريها بقصة ديجراديه، أما بالنسبة لمشكلة النحافة فإنتي لازم تعملي بعض التحاليل علشان تعرفي إيه سبب النحافة اللي عندك وتبدأي تعالجيه، وكمان حاولي تكتري من الأكلات اللي فيها سعرات حرارية عالية زي العسل والحلاوة بس لازم تعرفي إن موضوع زيادة الوزن ده بيحتاج لوقت أكتر من تنزيل الوزن فلازم تصبري شوية.
شكرا يا ايمى على المعلومات
شكرا يا ايمى على المعلومات الجميله دى وانتم غير المواقع التانيه بتردوا علينا بس انا هسالك حاجه مش عارفه فى مجالكم ولا لا أنا سنى 18 سنه ورفيعه جدا وطبعا مفيش امكانيات اوى وده كله بيعمل عقده نفسيه وسمعت ان فى كريم لتكبير الصدر هل ده مضر ام سليم ارجو الرد واسفه للاطاله.
==============
رد بص وطل:
ميرسي جداً يا روزي على رأيك فينا ونتمنى إننا نفضل دايماً عند حسن ظنكم بنا، وأهلاً بكل أسئلتك في أي وقت، وبالنسبة لسؤالك فأنا مش بافضل استخدام الكريمات دي إلا تحت إشراف دكتور متخصص، وعلى فكرة فيه تمرينات رياضية بتساعد على تكبير الصدر ممكن تعمليها.
هاي ايمي انا معجبه بيكى جدا
هاي ايمي انا معجبه بيكى جدا وبحبك جدا وممكن اعرف طريقه لإزالة الرؤوس السوداء بليز.
==============
رد بص وطل:
ميرسي ليكي جداً يا ريم على ذوقك، وأنا كمان بحبك وبحب كل اصدقاء بص وطل جداً، وبالنسبة لمشكلة الرؤوس السوداء فإنتي تقدري تعملي لها الماسك ده وإن شاء الله هتحسي بنتيجة هايلة وكل اللي عليكي إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
ازيك يا ايمى انا مشكلتى ان
ازيك يا ايمى انا مشكلتى ان شعرى خفيف جدابس ناعم وكمان قورتى كبيرة فعايزة طريقة تتقل شعري وتصغر القورة دي اول حاجة
تانى مشكلة :- وشى غامق وساعات يبقى فاتح وساعات يبقي غامق وفيه حبوب بسيطة اول مرة تظهرلى وبالذات عند الانف وده ملهوش علاقة بالدورة الشهرية والهالات السوداء اللي تحت عنيا
فعايزة ماسك حلو لبشرتى والحبوب مع العلم انها بشرة عادية والهالات السوداء وياريت ترد عليا في اقرب وقت
===============
رد بص وطل
صديقتى بالنسبة للشعر الخفيف فدى وصفة هايلة بتتقل الشعر
والمقادير :
معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطيهم كويس مع بعض وبعد كده افردي لخليط على شعرك كامل ولفيه بفوطه دافئه لمدة ساعتان وبعد كده اشطفيه بماء فاتر.
أما بالنسبة للقورة فدى طريقة سهلة عشان نصغرها بإستخام المكياج
الطريقة : ضعى الفونديشن غامق درجة عن بشرتك بالفرشاة تحت خط الشعر ( منبت الشعر)ووزعيه بالسفنجة على الجوانب ودا هيديك شكل أصغر للجبهة.
أما بالنسبة لبشرتك فدا ماسك مناسب جدا للبشرة العادية
والمكونات:
خيارة.
عسل نحل.
الطريقة:
اهرسي الخيارة جيدا في الخلاط وحطي عليها ملعقتين من عسل نحل واخلطيهم جيدا مع بعض، ثم حطي الماسك على وشك لمدة ربع ساعة، ثم اغسلي وشك بالماء الدافئ.
وده ماسك هايل هيساعدك على التخلص من مشكلة الحبوب الموجودة عند الأنف وهو ماسك الخميرة
الطريقة :تذوب معلقة خميرة في معلقة كبيرة ماء ثم أضيفي معلقة عسل ومعلقة دقيق وتخلط كل المكونات لحد ما تكون زي العجينة في السمك.. افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ… وتأكدي إن النتيجة مذهلة.. ماسك الخميرة بينظف البشرة ويفتح لونها ويضفي عليها نضارة ويخفي اى اثر للحبوب الموجودة … أنصح بالماسك مرة في الأسبوع.
وبالنسبة لمشكلة الهالات السوداء علشان تتخلصي منها لازم تنامي كويس بالليل وكمان بلاش تنامي في النور ودي شوية وصفة طبيعية وبتتكون من الخيار
الطريقة:
ضعي شرائح الخيار بحيث تغطي العين والمنطقة الموجود فيها الهالات السوداء وتوضع الشرائح لمدة 15 دقيقة. كرري هذه العملية كل مساء.
أنا مش عارفة أجيب ماركات
أنا مش عارفة أجيب ماركات الجلوس اللي قولتوا عليها منين أرجو الافادة فلوريل ومادينا وريمال وبرجوا وكريستان ديور أجيبها منيييييييييين ؟؟؟!! قولي لي وصفة سهلة تكون قريبة من وسط البلد حتى!
==============
رد بص وطل:
ممكن تلاقي الماركات دي في اي فرع من فروع صيدلية العزبي أو في المحلات الكبيرة اللي بتبيع مستحضرات التجميل زي faces أو مزايا.
مشكووووووووووره اوى بجد
مشكووووووووووره اوى بجد ياايمى يا قمرايه
ربنا يبارك فى عمرك على نصايحك الجميله دى وعلى الفيديو الرائع الجميل اللى شوفناه، بس كنت عاوزه اسالك سؤال انا مثلا هاتجوز قريب ودايما فى كوافيرات لما بيجوا يزينوا العروسه مش بيعملوا خالص اللى سحر عملته ده وبالدقه دى، كنت عاوزه اعرف سحر ليها مكان زى كوافير لمكياج العرائس وغيره والعنايه بالشعر وكده ولو ممكن تسألي لى بس تكلفة مكياج العروسه لو هايتعمل عند سحر ممكن تقريبا يبقى فى الرينج كام بالظبط، واسفه جدا طولت عليكى، جزاكى الله كل خير.
==============
رد بص وطل:
الميك اب ده كان في كوافير "elle" تقدري تكلميهم وتسأليهم على كل التفاصيل، وإن شاء الله تكوني عروسة زي القمر.
هاى ايمى انا عندى 22 سنه
هاى ايمى انا عندى 22 سنه وبشرتى بقت مقشرة جدا وجافه واول مرة تكون كدة وميرسى ليكى.
===========
رد بص وطل:
صديقتي العزيزة لازم تستعملي كريم ترطيب مناسب لبشرتك بشكل يومي علشان تحافظي عليها من الجفاف وفيه كريمات ترطيب كتير كويسة ومنها نيفيا فيزاج ودوف، وكمان لازم تبدأي من دلوقتي تستخدمي كريمات الليل والنهار للعناية بالبشرة وتعويضها عن العناصر اللي بتفقدها طول اليوم وحمايتها من العوامل الخارجية.
ازيك يا إيمي؟ أنا عروسة على
ازيك يا إيمي؟ أنا عروسة على وشك الزواج مشكلتي إن في حبوب في رجلي موجودة بصفة مستمرة سواء نزعت الشعرالزائد او لا وعايزة طريقة لتخفيف الشعر الزائد وفي نفس الوقت تضيع الحبوب دي؟ وعايزة ماسك للمسام الواسعة مع ملاحظة إن بشرتي دهنية وشكراً لتعاونك معانا.
===========
رد بص وطل:
ميرسي ليكي إنتي يا بسنت على ذوقك ورقتك وإن شاء الله ربنا يتمم لك على خير وتكوني عروسة زي القمر، ودي بعض الطرق لتخفيف وتقليل نمو الشعر في الجسم..
1- انقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر، واستمري على ذلك لمدة 3 أسابيع يوميا.
2- استخدمي نبات السعد - وده هتلاقيه عند العطار، خدي 3 معالق من مسحوق النبات وضيفيه إلى لتر ماء وحطيه على النار لغاية ما يغلي ثم يترك لينقع لمدة ربع ساعة، ثم يوضع على الجسم كغسول بعد إزالة الشعر لمدة 6 أيام متواصلة من كل شهر.
أما بالنسبة للحبوب اللي بتظهر في جسمك فإنتي لازم تهتمي جداً بتنظيف المناطق الملتهبة بإنك تمسحيها بالمناديل المعقمة بعد ما تاخدي حمامك اليومي، وفيه كمان مطهرات موجودة في الصيدليات، ممكن تجيبيها وتمسحي بها المناطق الموجود فيها الحبوب باستخدام قطنة مبللة بالمحلول ده، ويفضل كمان إنك تستشيري دكتور أمراض جلدية علشان يديكي العلاج المناسب لها.
أما بالنسبة لمشكلة المسام الواسعة فده ماسك كويس ممكن تجربيه وهو عبارة عن 3 نقط عصير ليمون + معلقة كبيرة خميرة مدوبة في معلقتين ميه + معلقة نشا مدوبة مع معلقة ماء ورد + معلقتين لبن.
طريقة تحضير الماسك:-
بتحطي المكونات كلها مع بعضها لغاية ما يبقوا مزيج متماسك، ولو المزيج ناشف شوية ممكن تحطي شوية لبن، ولو المزيج طري بتحطي شوية دقيق، بتحطي الماسك على بشرتك لمدة 5 دقائق، وبعد كده بتشيليه بالميه الفاترة، على فكرة الماسك ده بينظف البشرة وبيسد المسام الواسعة في منطقة الأنف أو الخدود وبيخفف الإفرازات الدهنية في الخدود.
هاااااااى يا مونا يا جميله
هاااااااى يا مونا يا جميله انت.. ربنا يبارك فيكى يارب وان شاء الله دايما فى تقدم وشكر خاص لفريق بص وطل كله...
المهم مش هطول عليكى انا مامتى فى الخمسين بس تحت عينيها اسمر وهى عايزه وصفه تزيل الاسمرار ده (الهالات) وتخلى بشرتها نضره وتشدها علشان وشها فى كرمشه كده المهم هى عايزه وصفه كويسة تشيل الهالات وتشد بشرتها وتخليها نضره.. وشكرا يا جميل.
=============
رد بص وطل:
ميرسي ليكي جداً على ذوقك وعلى كلامك الجميل، ونصيحتي لمامتك إنها لازم تستعمل كريمات ليل ونهار للعناية بالبشرة، وبالنسبة لمشكلة الهالات السوداء فدي وصفة كويسة ممكن مامتك تجربها وإن شاء الله هتلاقي نتيجة كويسة وهي عبارة عن معلقة كبيرة نشا + معلقة كبيرة ماء ورد + معلقة كبيرة خميرة + معلقة كبيرة لبن فاتر + نقطتين زيت لوز + معلقة كبيرة عصير الخيار.
طريقة تحضير الماسك:
بتخلط المكونات دي كلها مع بعضها كويس أوي، وبتجيب قطعة شاش من الصيدلية، وبتحط فيها الماسك ده، وبعدين بتحطه على عينيها لمدة 10 دقائق، بعد مرور العشرة دقائق بتشيل قطعة الشاش، وبعدين تغسل عينيها بالميه الباردة، وممكن بعد ما تخلص الماسك ده تحطي كريم مرطب حول العين.
ودي وصفة تانية لعلاج تجاعيد البشرة وهي عبارة عن بشر تفاحة + معلقة نشا مدوبة في معلقتين لبن ساقع + نقطتين زيت زيتون + معلقة كبيرة دقيق.
طريقة تحضير الماسك:
بتخلط المكونات دي كلها مع بعض، وممكن تحط شوية لبن لو كان الخليط سميك شوية، وبتحط الماسك على وجهها لمدة 10 دقايق وبعد كده تغسله بميه ساقعة جدا.
مساء الخييير يا إيمي يا قمر
مساء الخييير يا إيمي يا قمر ميرسي أوي على نصايحك الجامدة جدا واللي كلنا بجد استفدنا منها كتييييير بس بليييييز يا ايمى الحقينى شعرى خفيف اوى من قدام وكل شويه ينحل على ورا فرحى قرب يا ايمى ردى عليه بسرعه بالله عليكى يا ايمى قولي لى حل وعلى فكره أنا محجبة ومش بشد الطرحه أوي على شعري وكمان شعري ناعم ومفرود ايه السبب وايه العلاج اسفه طولت عليكي.
================
رد بص وطل:
ربنا يتمم لك على خير يا نودي وتبقي عروسة زي القمر، وبالنسبة لسؤالك فتساقط الشعر له اسباب كتير منها القشرة أو نقص فيتامينات معينة في الجسم أو إنك يكون عندك انيميا وغيرها من الأسباب، وإنتي لازم تبداي تعتني بشعرك من دلوقتي وتعملي حمام كريم مرة كل أسبوع وكمان حاولي دايماً تلبسي باندانا قطن تحت الحجاب، وفيه وصفة هايلة كمان تقدري تعمليها كل يوم وهي إنك تجيبي الجرجير وتعصريه في الخلاط أو في الكبة وتاخدي الميه بتاعته وتدلكي بها فروة رأسك كويس وبتسيبي شعرك من غسيل وبتغسليه بس مرتين في الأسبوع.
هاى يا ايمان ربنا يوفقك على
هاى يا ايمان ربنا يوفقك على الحاجات التحفة دي بس انا كان عندى ليكى سؤال الحلاوه مابتشيلش شعر ايدى ورجلى كله، وكمان الحلاوه مابتعملش شعري كله لما بيكون شعرى كله طلع مش عارفه اعمل ايه هل اجيب كريمات ازاله الشعر ولا اعمل ايه لو سمحتى انجدينى ميرسى لكي كتير.
==============
رد بص وطل:
صديقتي العزيزة ميرو السويت تعتبر من أفضل طرق إزالة الشعر، وفيه كمان الشرائح الشمعية ودي بتعمل نتيجة هايلة وهتلاقيها في كل الصيدليات، وتقدري كمان تستخدمي ماكينة إزالة الشعر مع السويت بحيث تقدري تزيلي أي شعر زيادة موجود بعد ما تعملي بالسويت.
يسلمووووووووووا ايمى جزاكى
يسلمووووووووووا ايمى جزاكى الله خيراا، حلقة اكثر من رائعة.. عندى سؤال والدتى عندها بقع سمراء فى جنب الجبهه من الناحيتين يا ريت شىء يفتحها وبشكرك كتير يا ايمى على ما تقدميه لينا.
=============
رد بص وطل:
ميرسي ليكي يا ندى، وبالنسبة لوالدتك فالأفضل إنها تستشير دكتور أمراض جلدية علشان تعرف سبب البقع دي وبالتالي تاخد العلاج المناسب لها ويا ريت تطمنينا عليها.
شكرا يا ايمي علي وجودك معانا
شكرا يا ايمي علي وجودك معانا ويارب تكونى بخير انا شعري ناعم بس خفيف خالص ومش عارفة اعمل له ايه يا ريت تقولي لي وصفة حلوة وسهلة.
===============
رد بص وطل:
دي وصفة كويسة جداً للشعر الخفيف ممكن تجربيها وهي عبارة عن معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطي المكونات كويس مع بعض وبعد كده افردي الخليط على شعرك كله ولفيه بفوطه دافئه لمدة ساعتان وبعد كده اشطفيه بماء فاتر، وممكن تكرري الوصفة دي مرة كل أسبوع علشان تحسي بالنتيجة.
انا شعرى تقيل من فوق وخفيف من
انا شعرى تقيل من فوق وخفيف من تحت.
==============
رد بص وطل:
حاولي تقصي اطراف شعرك كل فترة واهتمي بتغذيته وإمداده بالفيتامينات اللازمة له، وممكن تعملي حمام كريم مغذي لشعرك مرة كل أسبوع.
كنت عايزة اسألك عن منتجات
كنت عايزة اسألك عن منتجات "اوريفليم" ايه رأيك في استخدامها هل هي آمنة؟
==========
رد بص وطل:
منتجات اوريفليم كويسة وآمنة لإنها مستخرجة من منتجات طبيعية.
إزيك يا ايمان أنا مبسوطة اوي
إزيك يا ايمان أنا مبسوطة اوي بالفقرات بتاعتك كان عندى سؤالين اولهم رجلى فيها بقع من زمان ايام ما كنت بركب العجله على الساق كدة قبل الركبه ورغم انى بعمل سويت مابتروحش ايه الحل؟ ثانيا العروق الزرقاء فى الفخد من فوق ايه حلها؟
==============
رد بص وطل:
ميرسي ليكي جداً صديقتنا العزيزة ويا ريت تتابعينا باستمرار، وبالنسبة لسؤالك عن البقع اللي عندك من آثار كدمات قديمة فدي للأسف مش هتروح نهائي لكن تقدري تفتحي لونها بالاستحمام اليومي وفرك الجسم كويس بالليفة وتقدري تستخدمي الليفة المغربي مع ماسك السنفرة المغربي في تدليك الجسم مرة كل أسبوع، أما بالنسبة لمشكلة العروق لزرقاء فتقدري تعالجيها بإنك تدلكي المنطقة اللي فيها العروق الزرقاء دي بخل التفاح مرة الصبح ومرة بالليل لمدة الشهر.
بشكرك أوي بجد.. أنا محجبة ومش
بشكرك أوي بجد.. أنا محجبة ومش عارفة اغير في الاستايل يا ريت لو تساعدوني في الموضوع ده وكمان لبسي دايماً كاجوال جوب على بادي والطرحة بالف ناحية والتانية بسيبها كده مش عارفة اغير مش عارفة اعمل ايه ابتدي ازاي ياريت لو تقولي لي وخاصة أنا رفيعة من فوق ومليانة من تحت شوية بس مابحبش البنطلون بحس انه بيعرضني.
==============
رد بص وطل:
طيب يا ريت تتابعينا دايماً يا صديقتنا العزيزة لإننا بنقدم دايماً حلقات وأعداد عن الموضة والأزياء هتفيدك جداً، واحب اقول لك إنك ممكن تلبسي بنطلونات مفيش مشكلة خالص بس أهم حاجة إنك تختاري التفصيلة المناسبة ليكي، وتقدري تجددي في ملابسك عن طريق التجديد في الألوان والموديلات اللي بتلبسيها، بس خلي بالك إنك دايماً تلبسي الألوان الفاتحة من فوق وتلبسي جيبات وبنطلونات بألوان غامقة، وممكن تلبسي اكسسوارات ضخمة شوية للمنطقة اللي فوق علشان تبعدي الانتباه عن المنطقة اللي تحت.
انا كنت عايزة أعرف نوع كويس
انا كنت عايزة أعرف نوع كويس لكريم الأساس واللوس باودر، وشكرا على الحلقات الجميلة دي وبجد استفدنا منها جدا.
==============
رد بص وطل:
دي من أفضل ماركات الماكياج اللي ممكن تستعمليها وإنتي مطمنة "فلوريل" و"مادينا" و"كيرولان" و"ريمال" و"بورجوا" و"كريستيان ديور" .
هاي ايمان بصراحة فيديو رائع
هاي ايمان بصراحة فيديو رائع وانا اول مرة اتفرج عليكم او اتابعكم بس بعد كده على طول هتلاقيني موجوده بس انا كان عندي طلب صغير انا خطوبتي كمان اسبوعين وكنت عايزة ماسكات للبشرة عشان الحفلة وانا بشرتي دهنية وكان عندي حب شباب بس خلاص انا اتعالجت فأنا عايزة اعرف ايه الماسكات اللي تناسب بشرتي.
=============
رد بص وطل:
واحنا بنتشرف بوجودك معانا صديقتنا العزيزة ونتمنى لك حفلة خطوبة سعيدة، ودي مجموعة ماسكات مناسبة للبشرة الدهنية ممكن تجربي اللي يناسبك منها..
ماسك الطماطم
وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.
المكونات:
ثمره طماطم.
قشر نصف ليمونة.
عصير ليمون.
الطريقة :
اهرسي ثمرة الطماطم وضيفي إليها بشر قشر الليمون وعصير الليمون.
وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.
ماسك الردة
المكونات:
ردة.
ماء ورد.
الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة.بعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف.وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها.ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. أكيد لما تجربيه هتشعري بده.
ماسك شرائح الخيار
وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك
ماسك الخميرة
المكونات:
خميرة بيرة (هتجيبيها من عند أي فرن أو حلواني).
ماء ورد.
الطريقة:
اخلطي الخميرة البيرة مع ماء الورد، بس خلّي بالك إنك تحصلي على قوام غليظ يشبه العجينة، وادهني بيها وشك ورقبتك على الأقل لمدة ربع ساعة.وبعد كده اشطفي وشك بالماء الدافئ كذا مرة لغاية ما تتأكدي إنه مافيش أي أثر للخميرة على وشك.
انا بشرتي دهنية وفيها حبوب
انا بشرتي دهنية وفيها حبوب وجربت مرة واحدة احط كريم الأساس ومستحملتش
انا عايزة حاجة تناسبني انا وشي مدور وفاتح وعايزة ابان قدام خطيبي بصورة حلوة وهادية انا دايما بحط كحل وماسكرا واي شادو وبلاشر بدون ما احط كريم اساس فطبعا يعني الصورة مقبولة شوية بس عايزة اعمل حاجة مختلفة وخاصة هو مسافر ياريت لو تساعديني وميرسي اوي لذوقك وتعبك معانا.
===============
رد بص وطل:
صديقتي العزيزة بما إنك مش متعودة أصلاً على إنك تستخدمي كريم أساس، فالأفضل إنك تستخدمي حاجات خفيفة زي ما إنتي، ولو عايزة تعملي تغيير فإنتي ممكن تغيري في ألوان الميك اب اللي بتحطيه وفي ألوان واستايل ملابسك وحجابك لو كنتي محجبة.
أنا شعري تقيل من فوق وخفيف من
أنا شعري تقيل من فوق وخفيف من تحت.
============
رد بص وطل:
حاولي تقصي اطراف شعرك كل فترة واهتمي بتغذيته وإمداده بالفيتامينات اللازمة له، وممكن تعملي حمام كريم مغذي لشعرك مرة كل أسبوع.
ميرسي ليكى يا إيمى علي
ميرسي ليكى يا إيمى علي المواضيع دي أنا عندي مشكلة شعري كل مرة بينزل وبيخف ياريت أي وصفة.
==============
رد بص وطل:
لازم تحافظي على شعرك وتقللي من عمل السيشوار والمكواة والصبغات لغاية ما يستعيد صحته وحيويته، وكمان يفضل إنك تقصي اطراف شعرك مرة كل 45 يوم وتعملي حمام كريم مرة كل اسبوع، ودي كمان وصفة طبيعية للحفاظ على الشعر وهي عبارة عن مجموعة من الزيوت اللي معروفة باسم الزيت الثلاثي
المكونات:
زيت الخروع
زيت اللوز المر
زيت الزيتون
الطريقة:
امزجي مقدارا متساويا من زيت الخروع واللوز المر والزيتون مع بعض داخل زجاجة، وبعد كده خدي شوية من مجموعة الزيوت دي ودلكي بيها فروة رأسك لمدة عشر دقائق قبل النوم، وبعد كده سرحي شعرك بمشط ذي أسنان متسعة، وبعد كده غطي شعرك بإيشارب مصنوع من القطن لغاية الصبح، وبعد كده لكِ الحرية إن إنت تغسلي شعرك بنوع شامبو مناسب إو إنك تسيبيه من غير غسيل.
والوصفة دي ميزتها إنها بتقوي الشعر من جذوره وتمنع تساقطه وكمان بتمنع ظهور القشرة، ولو فيه قشرة بتشيلها، كرري هذه الوصفة لمدة شهر، وبعد كده في الشهر التاني استمري في استخدام نفس الوصفة بس بدل كل يوم خليها يوم ويوم، وبعد كده كرري العملية دي مرة كل شهر.
شكرا علي المجهود الكبير ده..
شكرا علي المجهود الكبير ده.. عندي سؤال ابنتي عندها 7 ستوات ويوجد شعر كثيف في ظهرها ووشها وأعلي الفم (شنب)ارجو افادتي وكيف الحل..ام قلقانه جداا.
==============
رد بص وطل:
ماتقلقيش نفسك يا سميرة، لإن المشكلة دي هتختفي لوحدها مع الوقت وكل ما بنتك تكبر الشعر هيقع لوحده.
عندى سؤال يا ايمى انا عندى
عندى سؤال يا ايمى انا عندى بقع مكان الحبوب عايزة اعرف ادارى البقع دى ازاى بالمكياج علشان بشرتى تبان اصفى وعندى برضه خروم صغيرة مش كتيرة فى وشى بسبب الحبوب ادارى كل ده ازاى بالمكياج؟
==================
رد بص وطل:
تقدري تخفي آثار الحبوب الغامقة على بشرتك بإنك تستخدمي كونسيلر افتح درجة من كريم الأساس، وتضعيه على البقع، وبعد كده تضعي كريم الأساس بنفس لون بشرتك بالضبط وبكده هتخفي اى بقع موجودة في البشرة.
ميرسي بجد يا ايمان علي
ميرسي بجد يا ايمان علي المجهود الكبير اللي بتعمليه ده بحبك جدا وميرسي لكل بص وطل عايزة بس اسالك علي حاجة سمعت عنها كتير هي امبولات الكولاجين من ايفا سمعت انها بتنفخ الخدود وتفيد البشرة انا عندي 21 ومشكلتي ان وشي خس جدا وشكلي تعبان فقولت استخدمها ياريت تقولي لي ده صح ولا لا.
===============
رد بص وطل:
منتجات إيفا كويسة لكن يفضل إنك تستخدميه بعد إستشارة الدكتور.
ميرسي يا إيمي وبجد ردود رائعة
ميرسي يا إيمي وبجد ردود رائعة ووصفات هايلة ممكن يا جميل تقولي لي وصفة لحب الشباب؟
==============
رد بص وطل:
أفضل علاج لموضوع حب الشباب ده إنك ماتلعبيش فيها خالص وماتستخدميش أي علاج لها إلا تحت إشراف طبي، ويا ريت في الفترة دي تقللي من الميك اب وتهتمي بتنظيف بشرتك كويس وممكن تستخدمي صابونة طبية زي الديتول.
ازيك يا ايمو انا بحبك جدا
ازيك يا ايمو انا بحبك جدا وبحب تمثيلك وانتى اصلا رقيقه جدا وعايزين نشوف جديد ليكى انا عايزة اسألك على حاجه بس مضايقانى ويا ريت تردى علي، أنا بالبس شوذ باليرينا ورجلى من قدام بقت لون ولون من الشمس فعايزة حاجه ترجع لون رجلى وكمان ايدى تانى ترجع بيضه تانى اى شئ يكون مفعوله سريع وشكرا ليكى يا ايمو.
===============
رد بص وطل:
دي وصفة كويسة لتفتيح الكفين والقدمين ممكن تجربيها وكل اللي عليكي إنك تدفي زيت زيتون على النار , ثم تضعي على ايديكِ ورجليكِ وبعدين افركيهم بملح وليمون وكرري الطريقة دي يوميا.
ميرسى على المعلومات دي بس انا
ميرسى على المعلومات دي بس انا عندى مشكله مضايقانى اوى وهى النمش فى بشرتى وعايزة حل له وازاى اخفيه بالمكياج ارجو الرد.
==================
رد بص وطل:
ممكن تخفي النمش بالميك اب بإنك تحطي كونسيلر يني على أماكن النمش وبعد كده تحطي كريم الأساس بلون بشرتك.
انا عندى مسام بشرتى منطقة
انا عندى مسام بشرتى منطقة الخدود والانف مقفولة المسام على نقط سوداء ازاى اقدر اخفيها بالميك اب وكمان ازاى اعالجها بطرق طبيعية لان بشرتى بتلتهب من الكيماويات اللي فى الأدوية وبشرتي دهنية في مناطق وجافة في منطقة الأنف وده بيبان لما بحط الباودر انه مقشر حتى لما بحط كريم مرطب معلش طولت عليكى بس ياريت تساعدينى وتردى يا قمر.
================
رد بص وطل:
ده ماسك طبيعي تقدري تعمليه علشان تتخلصي من مشكلة الرؤوس السوداء دي وكل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
السلام عليكم ازيك يا ايمي؟
السلام عليكم ازيك يا ايمي؟ انا كان ليا اسئلة كده بسيطة دلوقتى انا بشرتى دهنية بس الحمد لله خفت عن الاول وبعدين بسبب انشغالى زادت شوية انا عايزة ماسك للبشرة الدهنية وعندى سؤال تانى هو حمام البخار بالنعناع ينفع استخدمه لتنظيف البشرة؟ وفي ماسك حضرتك قولتيه قبل كده لتنظيف البشرة والمسام الواسعة بس مشكلته ان فيه زيت زيتون ينفع استخدمه؟ ياريت لو ماينفعش تقولي لي علي ماسك للمسام الواسعة بس يكون مكوناته بسيطة واسفة للتطويل بس ماعنديش غيركم اسأله.
===============
رد بص وطل:
ده ماسك كويس جداً للبشرة الدهنية بيرطبها وينظفها
المكونات:
ردة.
ماء ورد.
الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة، حطيها على وشك ورقبتك لمدة ربع ساعة، وبعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف، وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها، ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. وأكيد لما تجربيه هتشعري بده.
ايمان انا عايزة اسالك علي
ايمان انا عايزة اسالك علي حاجة سمعت عنها كتير ومش عارفة ده صح ولا لا انا وشي خس اوي مرة واحدة وشكلي بقي تعبان سمعت عن امبولات ايفا بالكولاجين بتنفخ الخدود وكمان بتحسن البشرة لو فيها تجاعيد فهل صح موضوع نفخ الخدود ده وهل هي مفيدة.
=============
رد بص وطل:
صديقتي العزيزة لازم تستشيري دكتور متخصص قبل ما تستعمليه علشان يحدد إذا كان مناسب مع بشرتك ولا لا.
شكرا جدا لكي يا ايمي على سرعة
شكرا جدا لكي يا ايمي على سرعة الرد عليّ انا هجرب الوصفة وان شاء الله هقول لك على النتيجة، لو سمحتى انا كمان عندى مشكلة عندى هالات سوداء حول عينى فعاوزة ماسك علشان انا مابحطش ماكياج، وانا شعري مش ناعم ولا خشن يعني في المتوسط بس بيقع كتير وأطرافه ناشفة لو سمحتي اريد اي شيء طبيعي يعالج هذا وشكرا لكي على المساعدة.
================
رد بص وطل:
شكراً ليكي إنتي يا وردة على متابعتك لينا، وبالنسبة لمشكلة الهالات السوداء فده ماسك كويس ممكن تجربيه وهو عبارة عن معلقة كبيرة نشا + معلقة كبيرة ماء ورد + معلقة كبيرة خميرة + معلقة كبيرة لبن فاتر + نقطتين زيت لوز + معلقة كبيرة عصير الخيار.
طريقة تحضير الماسك:
بتخلطي المكونات دي كلها مع بعضها كويس أوي، وبتجيبي قطعة شاش من الصيدلية، وبتحطي فيها الماسك ده، وبعدين بتحطيه على عينيك لمدة 10 دقائق، بعد مرور العشرة دقائق بتشيلي قطعة الشاش، وبعدين بتغسلي عينك بالميه الباردة، وممكن بعد ما تخلصي الماسك ده تحطي كريم مرطب حول العين.
أما بالنسبة لشعرك فأحسن حاجة ليكي إنك تعملي له حمام كريم مرة في الأسبوع وتقصي أطرافه مرة كل 45 يوم.
ميرسي اوي يا ايمي بجد انتي زي
ميرسي اوي يا ايمي بجد انتي زي القمر وانا استفدت منك كتير بس انا عندي مشكلة اني عندي حسنتين في وشي جمب بعض ووسط ولا كبار ولا صغيرين بحس اني مكسوفة لو بينت الاتنين وكمان انا وشي اسمر اوي من الشمس عايزة ماركة صن بلوك كويس وماركة كريم تفتيح للبشرة واسفة للاطالة ميرسي اوي.
=================
رد بص وطل:
فيه ماركات كتير كويسة من الصن بلوك زي لونا أو فوتو ديرم ماكس، ويا ريت بلاش تستخدمي كريمات التفتيح لإنها بتحتوي على مواد بتتفاعل مع آشعة الشمس وممكن تضر بشرتك، علشان كده أنا بانصح دايماً باستخدام الماسكات الطبيعية للتفتيح وده ماسك كويس جداً ممكن تجربيه وهو ماسك الزبادي بالليمون..
الطريقة:
توضع نقطة أو اثنتان من عصير الليمون على الزبادي، ثم ضعي الخليط على وجهك لمدة ساعتين إلى أن ينشف هذا الماسك ثم اشطفي وجهك بالمياه الفاترة، وممكن تعملي الماسك ده مرة كل أسبوع.
ميرسى يا ايمان على المعلومات
ميرسى يا ايمان على المعلومات الجميله دى عندى سؤال يا ريت تجاوبينى عليه
مشكلتى انى عندى حبوب فى ظهرى زى الحبوب اللى بتكون فى الوجه والحبوب دى اكتر عند الاكتاف ياريت لو وصفه سهله وسريعه اعملها تخلصنى منها.
================
رد بص وطل:
حبوب الظهر دي لها أسباب كتيرة، وعلشان تتجنبي ظهورها كل ما عليكي إنك تهتمي أكتر بالنظافة الشخصية والاستحمام اليومي للتخلص الشوائب والدهون الزائدة اللي بتساعد على نمو الجراثيم وانسداد المسامات، وكمان لازم تهتمي جداً بنظافة ملايات السرير اللي بتنامي عليه، وكمان نظافة الملابس اللي بتكون ملتصقة مباشرة بالجسم، وحاولي تلبسي دايماً ملابس داخلية مصنوعة من القطن علشان تمتص العرق والرطوبة، واوعي تنسي كمان نظافة الشعر، وخصوصاً إذا كان شعرك طويل، ولو ظهرت عندك الحبوب فإنتي لازم تهتمي جداً بتنظيف المناطق الملتهبة بإنك تمسحيها بالمناديل المعقمة بعد ما تاخدي حمامك اليومي، وفيه كمان مطهرات موجودة في الصيدليات، ممكن تجيبيها وتمسحي بها ظهرك باستخدام قطنة مبللة بالمحلول ده.
شكرا على الرد، جزاكى الله كل
شكرا على الرد، جزاكى الله كل خير.. طيب انا كنت سمعت وصفة لتسمين الوجه وهى: زبادى وحلبة مطحونة وترمس مطحون وماء ورد؟! هل دى صحيحة؟ ولو صح النسب هتكون ايه؟؟ وآسفة على ازعاجك.
==============
رد بص وطل:
موضوع الوصفات الطبيعية اللي بتنفخ مناطق معينة في الجسم ده مفيش اي دراسات اثبتت صحته من عدمها.
ايمان ممكن تقولي لى وصفة
ايمان ممكن تقولي لى وصفة لتفتيح المنطقة الحساسة؟ ووصفة لتكثيف الشعر؟ وايه افضل نوع صن بلوك للبشرة الدهنية وهل ليه درجات للعلم انى بشرتى لونها قمحى وايه اسعاره؟ وميرسى جدا يا ايمان.
=================
رد بص وطل:
بالنسبة لتفتيح المناطق الحساسة فدي وصفة طبيعية ممكن تجربيها وهي عبارة عن زيت زيتون + زيت لوز + دقيق خشن (دقيق البسيسة)
الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.
أما بالنسبة للصن بلوك ففيه أنواع كتير كويسة زي لونا وفوتو ديرم ماكس، واسعارهم معقولة جداً ومعامل الماية بيتحدد على حسب نوع بشرتك.
وبالنسبة لمشكلة الشعر الخفيف فدي وصفة طبيعية كويسة وهي عبارة عن معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطيهم كويس مع بعض وبعد كده افردي الخليط على شعرك كله ولفيه بفوطه دافئه لمدة ساعتان وبعد كده اشطفيه بماء فاتر.
جميل اوى اوى يا ايمى.. ربنا
جميل اوى اوى يا ايمى.. ربنا يكرمك يارب
انا كان عندى سؤالين يارب الاقى الجواب عندك
اولا.. لما بعمل دايت جسمى بينزل بسرعة وبتبسط من كده اوى، لكن المشكلة ان وجهى بيرفع اوى وبيبقى مش حلو.. هل فى طريقة لجعل الوجه سمين؟
السؤال التانى.. انا بستخدم كريم اساس لونا.. وبحبه اوى مريحنى هل الماركة دى كويسة؟
===================
رد بص وطل:
ميرسي ليكي يا ريم، وبالنسبة لسؤالك الاول فعلشان تحافظي على وشك ويفضل شكله زي ما هو بعد الريجيم لازم تكوني متأكدة إن الريجيم اللي إنتي ماشية عليه صحي ومتوازن وبيحتوي على كل العناصر اللي بيحتاج لها الجسم، وكمان لازم تهتمي بشرب الميه اثناء اليوم، أما بالنسة لصن بلوك لونا فهو كويس.
اشكرك جدا على كل المعلومات
اشكرك جدا على كل المعلومات المفيدة.. انا عندى بنت عندها 7 سنوات شعرها جاف وكثيف جداالمشكلة عند تسريحه بتتعب جدا وهى بتعيط كثير وانا باضفره علشان بيهيش جدا وعلشان بتذهب الى المدرسة اريد اى شي لتنعيمه ويكون طبيعى واسفة ورخيص حضرتك عارفة ظروف الحياة بس نفسى احل مشكلة بنتى علشان لما تكبر يكون شعرها ليس عقبة بالنسبة لها وارجو الا يكون حمام علشان مش هتقدر تضع فوطة ساخنة على راسها. وشكرا لكى واسفة على الاطالة.
================
رد بص وطل:
دي وصفة كويسة اوي يا وردة بتطري الشعر وتعالج جفافه وفي نفس الوقت مش مكلفة خالص وهي عبارة عن بيضتين بس، بتضربي البيضتين كويس وتبدأي توزعيه على أطراف شعرها بقطنة أو فرشاة وبعد كده توزعي الباقي على شعرها كله وتدلكي فروة رأسها كويس أوي وبعد كده ارفعي شعرها على فوق وغطيه بالبونيه وبعد ساعة ارفعي البونيه وسيبي شعرها لغاية ما ينشف خالص وبعد كده اغسليه بالشامبو المناسب لنوع شعرها، وممكن تعملي لها الوصفة دي مره كل أسبوع.
هاااااى يا ايمى ممكن تساعدينى
هاااااى يا ايمى ممكن تساعدينى أنا عندى خطوط بيضاء فى رجلى عند الركبه بس من وراه وشكلها وحش وانا كمان بعمل ريجيم وحاسه ان رجلى جلدها شكله وحش اوى وبتكرمش كانى ست كبيره مش عارفه اعمل ايه وكمان رجلى لونها مجير معلش مشاكلى كتير بس بليز عايزه وصفه اتخلص فيها من كل ده وتكون سهله وسريعه معلش تقلت عليكى ميرسى جدا.
===============
رد بص وطل:
صديقتنا العزيزة.. الخطوط البيضاء وباقي المشاكل اللي بتحصل لك دي سببها الريجيم وهتروح لوحدها مع الوقت بس لازم تتأكدي في الفترة دي من إن الريجيم اللي إنتي ماشية عليه ريجيم صحي ومتوازن، وبيحتوي على كل العناصر الغذائية والفيتامينات اللي الجسم بيحتاج لها ويفضل لو كان تحت إشراف دكتور متخصص، وماتنسيش كمان دور الرياضة حتى لو كانت رياضة المشي كل يوم لمدة 30 دقيقة في شد الجسم، ولو عايزة كريم يسرع من عملية اختفاء الخطوط دي يبقى لازم تستشيري دكتور أمراض جلدية.
أنا عايزة جلوس يكون حلو ومش
أنا عايزة جلوس يكون حلو ومش غالي ومتوفر في السوق يعني مثلا موجود في وسط البلد وما يغلاش عن 20 جنيه.
================
رد بص وطل:
فيه انواع كتيركويسة ومتوفرة في السوق وأسعارها متفاوتة ومنها "فلوريل" و"مادينا" و"كيرولان" و"ريمال" و"بورجوا" و"كريستيان ديور".
الكلام بتاعكم رائع قوي يا
الكلام بتاعكم رائع قوي يا جماعة بس يا ريت تقولوا لي أعمل ايه في الرؤوس السوداء لأنها عذبتني كتير ومش لاقية ليها حل عملت بخار الماء وضغطت عليها بالمناديل وحتى الفتلة ومافيش فايدة أنا تعبت قولي لي طريقة سهلة قوي وحاجات تكون متوفرة في كل مكان وطبيعية وشكرا.
================
رد بص وطل:
ده ماسك كويس للتخلص من مشكلة الرؤوس السوداء كل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
ميرسى اوي يا إيمان على
ميرسى اوي يا إيمان على المعلومات الجميلة دى لو سمحتى عاوزة اعرف ايه الماركات الكويسة للبانكيك البودرة.
===============
رد بص وطل:
دي من أفضل ماركات الماكياج اللي ممكن تستعمليها وإنتي مطمنة "فلوريل" و"مادينا" و"كيرولان" و"ريمال" و"بورجوا" و"كريستيان ديور".
ميك اب تحفة يا ايمان.. عندي
ميك اب تحفة يا ايمان.. عندي سؤال ايه علاج الرؤوس السوداء اللى بتظهر في البشرة الانف وكده وميرسي يا قمر على الفيديو استفدنا كتيررررررر.
===============
رد بص وطل:
ده ماسك كويس للتخلص من مشكلة الرؤوس السوداء كل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
توبيك جميل جدا يا قمر ممكن
توبيك جميل جدا يا قمر ممكن اسال سؤال بخصوص الهالات السوداء اللي تحت العين انا حطيت لها حاجات كتير وما بتختفيش ولا حتي بعرف اداريها ممكن تقولي لي علي طريقه كويسه حتي اخفي بيها الهالات دي ولتاني مره يا جميل بجد توبيك راااااااااااااااااااااااااائع.
==============
رد بص وطل:
ميرسي ليكي جداً على ذوقك ونتمنى إنك تتابعينا على طول، وبالنسبة لمشكلة الهالات السوداء فإنتي تقدر يتداريها بالميك اب عن طريق إنك تحطي كونسيلر اغمق درجة من لون بشرتك وبعدين تحطي كريم الاساس بنفس درجة لون بشرتك وبعد كده توزعي تحت عينيكي كونسيلر افتح درجة من لون بشرتك.
ايمي، كنت عايزة اسألك علي
ايمي، كنت عايزة اسألك علي كريم اولاي انا بستخدمه اصلا زى كريم الاساس بحطه الاول وبعدين بحط عليه الباودر وبيبقي شكلي طبيعي جدا، بس كنت عايزة اعرف هل فيه خطوره من استخدامي ليه بالشكل ده؟؟ كمان كنت عايزة حاجه طبيعيه عشان الهالات لانها بتبوخ شكل عيني بصراحه .... وميرسي ليكي يا قمر بص وطل.
=========
رد بص وطل:
كريم اولاي كويس ومفيش مشكلة من استعماله بالطريقة دي لكن خلي بالك إنك تحطي الكريم قبل ما تنزلي للشارع بحوالي ربع ساعة علشان البشرة تتشربه كويس. أما بالنسبة للهالات فدي مجموعة وصفات طبيعية ممكن تعمليها كل يوم قبل النوم وهي...
1- نك تضعي ماسك الزبادي بالعسل على منطقة الهالات السوداء كل يوم حوالي 2- وضع زيت الزيتون على الجفن السفلي قبل الذهاب للنوم.
3- وضع قطعة قماش قطنية مشبعة بالحليب، وأغمضي عينيك حوالي 10 دقائق
هاي ازيك يا ايمان ميرسي كتير
هاي ازيك يا ايمان ميرسي كتير ليكي علي موضوعاتك اللي بتقدميها لنا بس كان ليه سؤال عن الشعر الزائد نفسي في حاجة تقلله خالص لانه بيضايقني جدا وخصوصا اللي في الوجه وكل ما بعمله بشرتي بتلتهب جدا وشكرا.
================
رد بص وطل:
دي بعض الطرق اللي بتساعد على تقليل نمو الشعر وهي..
1- انقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر، واستمري على ذلك لمدة 3 أسابيع يوميا.
2- استخدمي نبات السعد -هتلاقيه عند العطار، خدي 3 معالق من مسحوق النبات وضيفيه إلى 'لتر ماء' وحطيه على النار لغاية ما يغلي ثم يترك لينقع لمدة ربع ساعة، ثم يوضع على الجسم كغسول بعد إزالة الشعر لمدة 6 أيام متواصلة من كل شهر.
ودي كمان طريقة علشان تقللي الحساسية اللي بتظهر على الوجه بعد إزالة الشعر وكل اللي عليكي إنك تملي طبق غويط بالثلج وضيفي ليه 4 أكواب لبن وبعدين غطسي حتة قطن في الطبق ده وضعيها على المناطق اللي بتعاني من الاحمرار واتركيها لتجف، ثم ضعي طبقة أخرى بعد 15 دقيقة وكرري العملية مرتين لتعود بشرتك إلى حالتها الطبيعية السابقة.
متشكرة أوي على ردكم بس برده
متشكرة أوي على ردكم بس برده ماعرفتش اجيب ايه كمزيل للعرق يعني اجيب منين الشبه وتبقى شكلها ازاي واستعملها ازاي؟ وبرده الليمون يعني اعصر من تحت الابط بالليمون ولا فيه منتجات طبيعية برائحة الليمون واسمها ايه المنتجات دي؟ وينفع استعملها على جسمي كله ولا في مناطق معينة؟ يعني عايزه تفصيل اكتر معلش بتعبكم معايا .. وميرسي ليكم جدا جدا.
==============
رد بص وطل:
الشبه يد يا ميرنا بتلاقيها عند أي عطار، وبتكون إما قطع صحيحة لونها أبيض أو بودرة، وبتعصري عليها نقطتين ليمون وتحطيها في منطقة تحت الابط هتمنع رائحة العرق نهائي، وعلى فكرة فيه دلوقتي شبه بروائح مختلفة هتلاقيها عند العطار.
