بالفيديو.. ماكياج هادي للجامعة مع إيمان أيوب

لو سمحتم هو فين الرد لو اتبعت انا مش عارفه اشوفه ازاي ابعتيهولي علي الاميل بتاعي طيب.

============

رد بص وطل:
صديقتي العزيزة الرد هتلاقيه في المشاركة الموجودة اسفل هذه المشاركة مباشرة.

الميك اب بجد تحفه وتسلم ايدكم معلش انا عندي سؤال ونفسي تجاوبيني عليه بسرعه انا بشرتي دهنية وفيها حبوب مش كتير واثار حبوب قديمة فانا مكنتش بهتم بوشي اوي بصراحة فانا بداءت اهتم وعاوزة اسالك علي انواع ماركات للبشرة الدهنية مثلا optimals balance night gel دة كريم ليل & optimals balance day gel spf8 ودة كريم نهار & optimals balance refreshing toner ودة تونر منعش كل دول منتجات تبع اوريفليم عاوزة اعرف المنتجات دي كويسه اجبها ولا لا ولو لا اية الاحسن بدل منها اسفه طولت عليكي يا قمر.

==============

رد بص وطل:
الماركات دي كويسة وممكن تستخدميها وإنتي متطمنة.

هاى ايمان بليز كنت عايزة اعرف علاج لل stretch marks وهى بتتعالج أصلا ولا لأ؟

=================

رد بص وطل:
الـ stretch marks بتروح لوحدها مع الوقت ولو عايزة تسرعي من اختفاؤها ففيه كريمات مخصوصة لكده لكن لازم تستشيري دكتور أمراض جلدية في نوع الكريم المناسب ليكي.

ميرسى

السلام عليكم.. بجد الميك اب تحفة بس كنت عاوزة اعرف ازاي اخلي بشرتي صافية واتخلص من الحبوب السوداء في منطقة الأنف وعند الدقن وإزاي اطول وانعم شعري بأسهل وصفة وأسعار الكريمات والماركات الأفضل، وشكراً.

===================

رد بص وطل:
ميرسي ليكي يا نورهان على ذوقك، وبالنسبة لمشكلة الرؤوس السوداء، فده ماسك حلو أوي للبشرة علشان ينضفها من الدهون والشوائب ويعالج مشكلة الرؤوس السوداء والماسك بيتكون من كوب زبادي كبير + معلقتين من الطمي الخاص بالبشرة (وده بيكون موجود في الصيدليات أو عند العطار)+ معلقتين ماء بطاطس (وده ممكن تعمليه بإنك تسلقي البطاطس وتاخدي الميه بتاعتها).
الطريقة:
بتخلطي المكونات دي كلها مع بعضها وبعد كده تفردي الخليط على وشك وتسيبيه لمدة 20 دقيقة وبعد كده تشطفي وشك بالماء الفاتر وتحطي كريم مرطب والماسك ده بيتعمل مرة واحدة في الأسبوع.
أما بقى بالنسبة لشعرك فإنتي ممكن تعملي له حمام كريم مرة كل أسبوع، وفيه ماركات كتير ومنها لوريال وبوناويل.

لو ممكن تساعديني في حل مشكلتي دي وهي بجد مضايقاني جدا، هي ان حول الفم وزواياه عندي اغمق من باقي الوجه، اعمل ايه؟؟؟

====================

رد بص وطل:
ده ماسك كويس لتفتيح المنطقة حول الفم وهو عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.

ازيك يا احلى إيمان أنا بحبك اوى ممكن اسألك سؤال يا قمر أنا بشرتى دهنيه جدا ومساماتها واسعه ومش عارفه استعمل باودر مناسب ياريت تقولي لي على نوع باودر كويس ليها ويكون متوافر في الاسواق والاقيه وياريت كمان طلب ممكن شويه ماسكات تناسب بشرتى ولكي جزيل الشكر.

===================

رد بص وطل:
فيه ماركات باودر كتير كويسة وموجودة في السوق زي "فلوريل" و"مادينا" و"كيرولان" و"ريمال" و"بورجوا" و"كريستيان ديور".
ودي مجموعة ماسكات مناسبة للبشرة الدهنية ممكن تختاري منها اللي يناسبك..

ماسك الطماطم
وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.
المكونات:
ثمره طماطم + قشر نصف ليمونة + عصير ليمون.
الطريقة:
اهرسي ثمرة الطماطم وضيفي إليها بشر قشر الليمون وعصير الليمون.
وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.

ماسك الردة
المكونات:
ردة + ماء ورد.
الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة.بعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف.وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها.ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. أكيد لما تجربيه هتشعري بده.

ماسك شرائح الخيار
وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك.

حلو اوووووووي الميك اب ده يا ايمى انا عندى سؤال انا عايزه اعرف كريم اولاى لتفتيح البشره ده كويس ولا لأ لإن انا بستعمله على طول قبل ما احط الميك اب وايه ماركه غسول للوش كويسة وماركة كريم ليل ونهار ارجو الرد وميرسي ليكي كتييييير يا ايمي.

===============

رد بص وطل:
بنشكرك على متابعتنا وتعليقك الجميل ده صديقتنا العزيزة، وبالنسبة لمنتجات أولاي فهي كويسة، لكن بالنسبة لتفتيح البشرة فيفضل استخدام الماسكات الطبيعية لإن كريمات التفتيح دي بتحتوي على مواد لما بتتفاعل مع أشعة الشمس بتعمل مشاكل للبشرة، وبالنسبة لكريمات الليل والنهار فإنتي ممكن تستخدمي أولاي أو ديور، وبالنسبة لغسول البشرة فإنتي ممكن تستخدمي ديور أو كلين أند كلير أو نيتروجينا.

ايمو أنا كنت عاوزة اسأل عن نوع الشادو اللي اقدر ارسم بيه الحواجب هل هو كريمي ولا باودر عادي وايه احسن نوع علشان ارسم بيه حواجبي وكمان عاوزة اسم كونسيلر كويس.

================

رد بص وطل:
بالنسبة لشادو الحواجب فهو بيكون باودر، وبترسميهم باستخدام فرشة رفيعة، وكمان تقدري تستخدمي الشادو العادي، ودي افضل ماركات الماكياج اللي تقدري تستخدميها وإنتي متطمنة وهي "فلوريل" و"مادينا" و"كيرولان" و"ريمال" و"بورجوا" و"كريستيان ديور".

بليز عايزه نوع كريم ليل يكون كويس ويكون بيفتح البشره و بيخليها نضره
=====================
رد بص وطل
بالنسبة لسؤالك دى شوية ماركات هايلة جدا ومش بتضر البشرة بالاضافة الى إن سعرها مناسب جدا جدا وهى:
أولاي olay أو نيفيا Nivea.

ازيك يا ايمان بجد انا بشكرك جدا على كل اللى انتى بتعمليه انا كان ليا سؤال انا لما بحط باودر مائى بتكون كويسه على وشى كله ما عدا بس منطقة الخد بحس انها مش بتكون باينه فيه ومش بتدارى اثر الحبوب اللى موجوده فى الخد عاوزه اعرف ايه السبب؟ هل انا مش بعرف اظبطها فى المنطقه دى؟ وبحس انى وشى كمان من عند خدى كانه مقشر شويه، بس هو ده حصل معايا فى الفتره دى لكن قبل كده كانت بتبقى عاديه جدا، معلش طولت عليكى انا عارفه وعارفه كمان انه سؤال غريب بس اتمنى تردى يا قمر
=======================
رد بص وطل
بصى ياقمر مشكلتك دى بتحصل لأن بشرتك جافة وخاصة عند الخدود وعشان تعالجى المشكلة دى لازم تهتمي بترطيب بشرتك وتنظيفها من آثار الميك اب، وكمان بلاش تستخدمي البودرة المائية لإنها بتضر البشرة جداً وبتتسبب في جفافها، وممكن تستخدمى البودرة المضغوطة لأنها بودرة وكريم أساس في وقت واحد وهي بتستخدم لتغطية العيوب وتوحيد لون البشرة وممكن تحطي ميه على السفنجة وإنتي بتحطي البودرة المضغوطة علشان تثبتيها أكتر.

ازيك يا ايمى انا بحبك جدا لانك فعلا رقيقه بس انتى مقله فى اعمالك الفنيه انا كان ليا كذا سؤال علاج للهالات السوداء بس يكون فعال وكمان للشعر الخفبف والضعيف وطريقه لتقليل ظهور الشعر الزائد للجسم بسرعه وشكرا.
==================

رد بص وطل
ميرسى يا هيومة وإن شاء الله هتلاقونى متواجدة معاكم بشكل اكبر فى الفترة الجاية، عشان ارد على كل إستفسارتكم، وبالنسبة لعلاج الهالات السوداء فلازم الأول تنامي كويس بالليل وكمان بلاش تنامي في النور ودى وصفة هايلة لعلاج الهالات السوداء ومتوافرة فى كل بيت وهى الخيار فممكن إنك تضعي شرائح الخيار بحيث تغطي العين والمنطقة الموجود فيها الهالات السوداء وتسيبى الشرائح لمدة 15 دقيقة.. كرري هذه العملية كل مساء.
أما بالنسبة لشعرك فدى وصفة لتكثيف الشعر ومكوناتها عبارة عن معلقة زيت زيتون + معلقة زيت الخروع + معلقة زيت اللوز + صفار بيضتين.
الطريقة :
اخلطيهم كويس مع بعض وبعد كده افردي لخليط على شعرك بالكامل ولفيه بفوطه دافئه لمدة ساعتان وبعد كده اشطفيه بماء فاتر.
ودى طريقة هايلة لتقليل ظهور الشعر الزائد بالجسم، وهي إنك تاخدي 3 معالق من مسحوق نبات السعد وده هتلاقيه عند العطار وبتضيفيه إلى 'لتر ماء' وحطيه على النار لغاية ما يغلي ثم يترك لينقع لمدة ربع ساعة.. ثم يوضع على الجسم كغسول بعد إزالة الشعر وبتكرري الموضوع ده لمدة 6 أيام متواصلة من كل شهر.

بجد الميك اب تحفة وجميل اوى وطبيعى جدا انا على فكرة اول مرة اشارك بس ان شاء الله مش هتكون اخر مرة لانى بجد استفدت من اجاباتكم على الاسئلة بس فعلا انا عندى مشكلة انى بستعمل بودرة مائية وانتى بتقولى انها مضرة فكنت عايزة استبدلها بحاجة مش تضر البشرة ياريت تقولي لى استخدم كريم اساس ولا ايه؟ وبجد شكرا جدا يا ايمى ياعسولة
====================

رد بص وطل
ميرسى يا شيرى على مشاركتك معانا فى بص وطل ونتمنى إنك تبقى صديقة دائمة للموقع وبالنسبة لسؤالك فممكن تستخدمى كريم الأساس لأنه بيدى البشرة جمال ونعومة مع مراعاة إنه عند إختيارك للكريم لازم يكون لونه نفس لون بشرتك أو أغمق درجة.

ازيكم يا احلي موقع وحشتوني اوي انا مش عارفة اشكركم ازاي انتم دايما معايا خطوة بخطوة في حياتي انا دايما ببعت لكم اخد رأيكم في كل شئ
ودلوقتي خطوبتي في شهر 6 عقبال كل البنات يارب ده حبيبي اللي كنت بحكي لكم عنه وانتم بتنصحوني اعمل ايه عشان كان في مشاكل كتير
والحمد الله ربنا وفقنا وخلاص حنتخطب
المهم عشان مطولش عليكم
انا عايزة اعرف ماسكات كويسة للبشرة قبل فرحي
انا بشرتي دهنية وخصوصا منطقة الانف والذقن ياريت تقولي لي على ماسكات تكون كويسة وتفيدوني زي كل مرة شكرا ليكم
بحبكم اوي يا أسرة بص وطل وربنا يحفظكم كلكم.
مع السلامة
====================

رد بص وطل
ألف مبروك يا مروة وإن شاء الله ربنا يتمم لك على خير يا قمر وبمناسبة قرب ميعاد خطوبتك فده ماسك حلو أوي للبشرة الدهنية، بينظف البشرة ويفتحها ويرطبها.
المكونات:
بياض بيضة
معلقة كبيرة عسل أبيض
عصير ليمونة
الطريقة:
اخفقي بياض البيضة مع العسل كويس أوي وبعد كده ضيفي عصير الليمون واخلطي كل المكونات دي مع بعض وبعد كده افردي الخليط على الوجه واتركيه لمدة 20 دقيقة، وبعد كده امسحي وشك بقطنة مبللة بماء الورد، وبعد كده اشطفي وجهك بماء بارد، والماسك ده ممكن تعمليه مرتين في الأسبوع.

لو سمحت انا كنت باستخدم كريم تفتيح للبشره بس للاسف الكريم ده عمل بقع لونها بنى فى وجهى.. وفى حاجه كمان انا محجبه وبتعرض للشمس كتير جدا.. فالجزء المتغرض للشمس من وجهى اصبح اغمق من باقى وجهى.. اعمل ايه.

=============

رد بص وطل:
للأسف معظم كريمات تفتيح البشرة بتحتوي على مواد لما بتتفاعل مع الشمس بتسبب ضرر كبير للبشرة، علشان كده من الافضل إنك تستخدمي الماسكات الطبيعية لتفتيح البشرة، وعلشان تحافظي على بشرتك من آشعة الشمس لازم تستخدمي صن بلوك قبل ما تتعرضي للشمس ولو هتتعرضي للشمس لفترة طويلة يبقى لازم تجددي دهانه مرة كل ساعتين، وده ماسك هايل لتفتيح البشرة من آشعة الشمس وهو عبارة عن معلقة صغيرة من الماء اللي بيتكون على سطح الزبادي + عصير نصف ليمونة و بتخلطيهم مع بعض كويس و بعد كده تحطي الخليط على وشك بس خلي بالك إن الخليط مايجيش عند منطقة العيون وتسيبيه لمدة ساعتين وبعد كده تغسلي وشك وهتلاقي نتيجة سريعة وهايلة ان شاء الله.

لو سمحتى حبيبة قلبي كنت عايزة اعرف ماركة لكريم الاساس ماتكونش غالية اوى وما تضرش البشرة وتحت عينى في سواد خفيف بس طبعا بيخلينى وحشة في الصور اوى وعايزة ميك اب للعين المتوسطة لا واسعة ولا ضيقة.

===============

رد بص وطل:
لازم يا هيام دايماً تكوني متأكدة من إن كريم الأساس اللي بتستخدميه من ماركة كويسة ومعروفة لإن كريم الاساس لو مش كويس بيضر البشرة جداً، ودي من أحسن ماركات الميك اب اللي ممكن تجيبيها ومنها "فلوريل" و"مادينا" و"كيرولان" و"ريمال" و"بورجوا" و"كريستيان ديور"، ويا ريت تتفرجي على حلقات الميك اب الموجودة على قمر 14 وإنتي تعرفي طرق مختلفة لرسم العيون.

إيمى انا بحبك علشان انتى رقيقه قوى ممكن اعرف طريقه عمل عصير الجرجير للشعر واعمل كل قد إيه واسيبه على شعرى قد إيه مع العلم ان فرحى كمان شهر ونفسى شعرى يطول فى الفتره دى.

==============

رد بص وطل:
ميرسي ليكي جداً يا saso على رقتك، وبالنسبة لعصير الجرجير فطريقته سهلة جداً كل اللي عليكي إنك تجيبي الجرجير وتضربيه في الخلاط، وتدلكي فروة رأسك بالعصير ده بأطراف اصابعك، وبتكرري الموضوع ده كل يوم وممكن تسيبيه على شعرك من غير غسيل وبتغسلي شعرك بس مرتين في الأسبوع.

انا كان شعرى ناعم ولكن اصبح بعد ذلك جاف جدا وخفيف ولا اعرف كيف اعيد له حيويته مع العلم انه مازال ناعم ولكن ليس به لمعان وجاف.

================

رد بص وطل:
حاولي تداومي على عمل حمام كريم لشعرك مرة كل أسبوع، وممكن تستعملي منتجات زي لوريال أو بوناويل، مع تقليل عمل الشعر بالسيشوار والمكواة.

كنت عايزه اعرف يا ايمان هو المرطب هو كريم النهار؟ ارجو الرد.

==============

رد بص وطل:
كريم النهار بيكون فيه مواد مرطبة للبشرة وكمان مواد مغذية للبشرة بتعوضها عن العناصر اللي البشرة بتفقدها طول النهار.

لو سمحتي يا ايمي عايزه ماسك كويس للتجاعيد.

============

رد بص وطل:
ده ماسك كويس لمنع ظهور التجاعيد المبكرة، والماسك ده مكوناته هي:
ملعقة كبيرة من الخميرة.
قليل من الحليب لتذويب الخميرة.
ملعقة صغيرة من العسل.
ملعقة كبيرة من الزبادي.
وعشان تحضريه، اخلطي المكونات جيداً حتى يتماسك المزيج، وضعي الماسك على وجهك واتركيه لمدة 7 دقائق، وبتكرري الماسك ده مرة كل أسبوع.

ازيك يا ايمان بجد انتي فنانه محترمه وياريت تحافظي علي كده بجد انتي زي السكر وكنت عايزه اسالك سؤال انا شعري خفيف من قدام ياريت تقولي لي علي وصفه ارجو الرد
===============================
رد بص وطل
ميرسي يا انون على ذوقك، وبالنسبة لمشكلة شعرك فكل اللي عليكي إنك تدلكي فروة راسك بعصير الجرجير بشكل يومي، لإن الجرجير له تأثير كبير في إنبات الشعر وتغذيته، وياريت كمان تعتنى بشعرك دايماً بعمل حمام زيت أو حمام كريم مرة كل أسبوع.

يسلموووووووا حلقة جميله جدا

ميرسى يا ايمان وميرسى ليك يا علاء

ننتظر الجديد من التالق

انا عايزه حاجه لتخفيف لون الجلد مكان الحرق
وشكرا
=========================
رد بص وطل
شكرا على مشاركتك وبالنسبة لسؤالك فالأفضل انك تستشيرى أخصائية تجميل عشان تحدد لك الكريم المناسب.

انا بجد زعلانه منك جددا علشان قولتلك عاوزين حلقه عن طرق العنايه بالبشره وازاي اعمل تنظيف لبشرتي سواء كان بالبخار او غيره وقولتيلي حاضر ومعملتيش حاجه وبسبب كده بشرتي اتبهدلت جدا ليكي حريه التصرف بقى
بس بجد زعلانه
=========================

رد بص وطل
صديقة بص وطل بالنسبة للعدد الخاص بالعناية بالبشرة وتنظيفها فتابعينا وان شاء الله هيتم نشره قريب أما بالنسبة لبشرتك فممكن تبعتي لنا أى استفسار وهنرد عليكى فى أسرع وقت إن شاء الله.

هاي
ايمان عندي سؤال مش عارفه بتقل عليكي بجد ومش عارفه هو ضمن اختصاصاتك ولا لاء عامة هساله ولو تقدري تفيديني ربنا يجازيكي خير
انا ميه بتغلي وقعت علي ايدي من شهرين تقريبا مش فاكره بالظبط لكن مش من بعيد وبعدها استعملت مضادات حيوية وكريمات وكده طبعا الالم زال لكن لونها بني انا مخنوقه من منظر ايدي هي اه بقعه بسيطة لكن مزهقاني بجد لو تقدري تفيديني باي وصفه او كريم يروح بها اللون ده مكان الحرق لانه أنا بستعمل كريم تفتيح لكن ولا بياثر
معلش بتقل عليكي وميرسي لكي
====================
رد بص وطل
ألف سلامة عليكي يا نانسي، وياريت تستشيرى دكتور أمراض جلدية عشان يحدد لك نوع كريم مناسب لتفتيح آثار الحرق وابقي طمنينا عليكي.

هااااااااى يا ايمى يا عسل.. اخبارك ايه ان شاء الله بخير..
بصى يا جميل انا مشكلتى كلها فى بشرتى... بتتاثر اوى بالشمس وانا اصلا بشرتى دهنيه جدا وبصراحه بتتعبنى والحبوب عندى سايبه اثر وكمان بشرتى بتلم تراب بسرعه فى الحر لانها دهنيه والميكب اب بيروح فى ثوانى بس انا مش بحط لا كريم اساس ولا بودره مائيه بس احمر خدود وروج بسيط مش بحط ميك اب كتير، ياريت تنصحينى احافظ عليها ازاى وايه الكريمات او الماسكات الطبيعيه اللى استمر عليها علشان بشرتى تكون نضره وناعمه.. ارجو الرد
========================
رد بص وطل
أول نصيحة احب اقولها لك يا لولو هي إنك لازم تستعملي الصن بلوك قبل ما تتعرضي للشمس لإنه بيحمي البشرة من آشعة الشمس الضارة، أما بالنسبة لمشكلة آثار الحبوب فده ماسك هايل جداً ممكن تجربيه وهو ماسك الخميرة.
الطريقة :تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع.
وده كمان ماسك مناسب للبشرة الدهنية وبيساعد على تنظيف الوجه وحمايته والحفاظ على نضارته وكمان بيساعد على تخليص المسام من الدهون

المكونات:
ثمره طماطم.
قشر نصف ليمونة.
عصير ليمون.

الطريقة :
اهرسي ثمرة الطماطم وضيفي إليها بشر قشر الليمون وعصير الليمون.
ثم حطي الماسك على وشك لمدة ربع ساعة، ثم اشطفي وشك بالماء الفاتر.

هاى ايمان بجد بشكرك على الحلقه الجميله دى. وكنت عاوزه اسأل سؤال محيرنى اوى . هو ايه اللى بيخلى اللون اللى تحت العين ابيض جدا عن باقى البشره. هل ده نتيجه استخدام درجتين مختلفتين من كريم الاساس ولا ايه بالظبط.
====================

رد بص وطل
إستخدام كونسيلر لونه فاتح جداً عن لون بشرتك هو اللي بيبيض منطقة تحت العين علشان كده لازم تستعملي درجات مناسبة للون بشرتك سواء في كريم الأساس أو في الكونسيلر.

وكمان فى حاجة انا شعرى بقاله فترة قريبة هو كان فتلته ناعمة بس دلوقتى شعرى من قدام بحس انه ليف سلك وبتكسف لما حد يجي لنا بغسله قبلها علشان ميبقاش وحش ازاى اعرف اظبطه
=======================

رد بص وطل
أحسن حاجة تعمليها علشان تعالجي شعرك هي إنك تعملي له حمام كريم مغذي للشعر مرة كل اسبوع، ولازم كمان تهتمي بالتغذية الصحية والمتوازنة للشعر.

انا بشكرك جدا على كل اللى قدمتيه وبشكر كل القائمين فى موقع بص وطل
انا عندى سؤال انا بيضة والمشكلة انى لما بحط مكياج بحس انى عفريت مش بعرف اظبطه كويس وكمان تحت عينى داخل لجوة انا لون عينى ازرق احط ايه الالوان اللى تليق عليه وازاى اظبط المكياج كويس لاحسن انى فاشلة مكياج وشكرا اوى
=========================

رد بص وطل
طيب تابعينا لإن قريب جداً هنقدم حلقة عن ماكياج البشرة الفاتحة.. فانتظرينا.

انا بشرتي دهنية.. ممكن أحط بودرة من غير كريم أساس؟ علشان ما بحبش أحط حاجات كتير على بشرتي,, فياريت تفيدونى أحط ايه علشان يكون وشى لون واحد وطبيعية
===========================
رد بص وطل
صديقتى بالنسبة للبشرة الدهنية ممكن تستخدمي البودرة المضغوطة لإنها عبارة عن كريم اساس وبودرة في نفس الوقت، لكن لازم تختاري ماركات كويسة ومضمونة زي "فلوريل" و"مادينا" و"كيرولان" و"ريمال" و"بورجوا" و"كريستيان ديور".

بليييييز يا ناني ممكن وصفة لتطويل الشعر تكون متجربة ومضمونة.

=================

رد بص وطل:
صديقتي العزيزة علشان شعرك يطول بطريقة طبيعية لازم تتأكدي إنك بتمديه بكل العناصر والفيتامينات اللازمة له، وكمان لازم تعرفي إن تقصف الشعر من الأسباب اللي بتعجز الشعر عن إنه يطول، ودي وصفة كويسة لتطويل الشعر ممكن تجربيها وهي عبارة عن علبة زبادي ومعلقة حبة البركة مطحونة (ودي هتلاقيها عند العطار) ومعلقة زيت زيتون.

الطريقة:
أخلطي المكونات دي كلها مع بعضها وبعد كده حطيهم على شعرك لمدة ثلاث أو أربع ساعات وطبعا غطي شعرك ببونيه ..وبعد مرر 3 ساعات أغسلي شعرك بالشامبو والبلسم المناسبين وكرري الموضوع ده مرتين في الاسبوع لمدة شهر وإن شاء الله هتلاقي نتيجة هايلة.

ميرسي يا ايمان بجد انتم أحلى حاجه وميرسي كمان لعلاء وبما اننا طماعين فإحنا بنقوله يلا كمان كمان.
بس انا عندي سؤال ياريت تردي عليا فيه انا بستعمل البودرة المائيه من خمس سنين وفعلا حاسه ان بشرتي متأثره هل لو وقفت استخدامها واستخدمت كريم اساس هيحافظ على اللي باقي منها.
وميرسي مره تانيه ليكم.

=================

رد بص وطل:
ميرسي ليكي إنتي يا مروة على متابعتك لينا، وبالنسبة لسؤالك احب اقول لك إن تنظيف البشرة هو أهم حاجة علشان تحافظي على بشرتك وتستعيدي نضارتها، وأكيد كريم الأساس أفضل بكتير من البودرة المائية لكن لازم كمان تتأكدي من ماركة كريم الاساس اللي بتستعمليه, وإنك تجيبيه من مكان مضمون، ويا ريت تحاولي على قد ما تقدري تقللي من الميك اب يعني مش لازم تحطي ميك اب كامل بشكل يومي ممكن تحطي حاجات خفيفة بس لتحديد ملامح الوجه.

ميرسي جدا يا ايمان للرد
ربنا يعزك

ميرسى يا ايمان على ردك الجميل ده.

الميك اب تحفة بس انا عندى سؤال ممكن تردى علية بشرتى حساسة قوى وفى الصيف بتعرق جامد ولو عملت ميك اب هيسيح ممكن تقولي لى اعمل ايه والمفروض انى بنزل بالنهار عشان الكلية مش عارفة اعمل ايه.

===========

رد بص وطل:
نصيحتي ليكي يا "ميما" هي إنك وإنتي في الجامعة -وبالذات إنك بتتعرضي للشمس لفترات طويلة- الأفضل ليكي إنك تحطي ميك اب خفيف يعني ممكن تكتفي بآي شادو خفيف مناسب مع لون ملابسك وبشرتك، وأحمر خدود رقيق مع ملمع شفايف وصدقيني شكلك هيبقى طبيعي ورقيق جداً، وكمان ما تنسيش الصن بلوك لإن ده اللي هيحمي بشرتك من آشعة الشمس.

هاي ايمان اخبارك ايه فعلا انت بتعملى مجهود ميرسى ليكى بصى أنا وشي مسامه واسعة مش كانت كدة وبعدين حرف التى اللى المفروض الناس بتقول انه دهنى لا عندى بقى جاف وتقريبا كل وشى بقى كده مجرد ما اغسله باى حاجة بيجف ويعمل قشر ياريت تقولي لى على غسول وكمان كريم واعمل ايه للجفاف ده، انا بستعمل احيانا حاجة من مستحضرات ايفون بس الوضع دلوقتى تغيير لوشى اسفة طولت عليك.

==============

رد بص وطل:
شرائح الخيار من الحاجات الرائعة اللي بتحافظ على نضارة البشرة وبترطبها، ممكن تداومي يومياً على وضع شرائح الخيار دي على وجهك، وبعد كده تحطي كريم الترطيب المناسب ليكي وفيه أنواع كتير كويسة ومنها كريم نيفيا فيزاج.

ازيك يا ايمي انا كنت بسأل على نوع كريم أساس يكون كويس ومايؤذيش البشرة؟

==============

رد بص وطل:
فيه ماركات كتير كويسة ومنها "فلوريل" و"مادينا" و"كيرولان" و"ريمال" و"بورجوا" و"كريستيان ديور".

انا محتاجه نوع باودر وماسكرا يكونوا كويسين فياريت تقولى استعمل ايه وانا بشرتى فاتحه.

=========================

رد بص وطل:

دي من أفضل ماركات الماكياج اللي ممكن تستعمليها وإنتي مطمنة يا صديقتي العزيزة "فلوريل" و"مادينا" و"كيرولان" و"ريمال" و"بورجوا" و"كريستيان ديور".

بجد موقع متميز وانا متابعة الحلقات بتاعتك يا ايمان من الاول بجد بحبك اوى وبجد يا علاء الميك اب تحفة وهادى جدا وكنت عايزة اسأل عايزة اعرف اسم لوس بودر يكون كويس وكمان كنت عايزة اعرف انا باستعمل الكونسيلر اللى هو الصلب مش السائل هل هو احسن ولا الكونسيلر السائل ولو السائل كنت عايزة اعرف نوع كويس ومعلش اخر سؤال هل البودرة المائية بتضر البشرة؟ لانى مش بعرف اضبط الميك اب الا بيها بحس انها بتثبت اكتر من اى حاجة خصوصا فى المناسبات وشكرا ليكم.

=========================

رد بص وطل:

ميرسي لمتابعتك ولذوقك يا صديقتي العزيزة وأنا كمان بحبك وبحب كل قراء قمر 14، وبالنسبة لماركة اللوس باودر فدي من أفضل الماركات اللي ممكن تستعمليها وإنتي مطمنة يا صديقتي العزيزة "فلوريل" و"مادينا" و"كيرولان" و"ريمال" و"بورجوا" و"كريستيان ديور".
أما بالنسبة للكونسيلر فانتي ممكن تستخدمي أي نوع فيه سواء كان السائل أو الصلب لأن نتيجتهم تقريباً واحدة، أما البودرة المائية فهي فعلاً مش كويسة للبشرة ويفضل إنك تستبدليها بكريم الأساس، وبعد كده تحطي عليه البودرة المضغوطة علشان تزيدي من ثباته.

هو ايه ماسك الخميرة ده؟؟؟

============

رد بص وطل:
ماسك الخميرة ده ماسك لتفتيح المناطق الغامقة من آثار الحبوب وتنظيف البشرة وتفتيح لونها، وأنصحك بالماسك مرة في الأسبوع.، وبتعمليه بإنك تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ.

هاي ايمي انا بعت سؤالي فهل ممكن تجاوبيني عليه علي الايميل او حتي هنا علي الموقع بس مش عارفه هو ظهر ولا لأ؟

=======================

رد بص وطل:

يشرفني طبعاً يا "بيرو" إن أرد على أي أسئلة ليكي بس للأسف سؤالك ماوصلش، فياريت لو تعيدي إرساله مرة ثانية وهتلاقي الرد عليه إن شاء الله في أقرب وقت.

ازيك يا ايمان ممكن تجاوبيني بعد اذنك
ايه افضل كريمات للبشرة سواء عنايه او تنضيف او تفتيح او حماية من التجاعيد
يعني فيه بوندز ونيفيا كريم نهار وليل وكمان معالجه حب الشباب وتفتيح المناطق الغامقة وفيه لوريال باريس للتجاعيد
فهل تنصحي بنوع معين او ماركة معينه اي كان سعرها للبشره بجميع مشاكلها والعنايه بيها وشكرا لمجهودك.

============

رد بص وطل:
الماركات اللي إنتي ذكرتيها كلها كويسة ولها تأثير فعال على البشرة بس أهم حاجة إنك تجيبي الحاجة المناسبة لنوع بشرتك.

ازيك يا ايمان بعد اذنك، أنا عايزة حاجه لانتفاخات تحت العين ولو سمحتي ردي عليّ بسرعه.. شكرا.

=============

رد بص وطل:
ممكن تعملي كمادات الشاي لعينك وتسيبيها لمدة من 10 إلى 15 دقيقة، وكمان تقدري تعملي لعينيكي كمادات بالماء المثلج المضاف له لبن بارد.

ايمان في سؤال بسيط اذا سمحتي، لو بشره كانت ظهر فيها حب الشباب في فترة واخدت علاج بس لها اثار برضو بقع بني في وشها ياتري الخميرة وماء الورد ممكن يضيع البقع البني دي ولا اصلا مالهومش علاقه بالبقع دي وميرسي يا جميله.

==============

رد بص وطل:
بصي يا نانسي هي آثار البقع دي صعب إنها تختفي تماماً لكن تقدري تفتحي لونها بعمل تقشير للبشرة كل فترة، وكمان ماسك الخميرة مفيد جداً لإنه بيساعد على تجدد خلايا الجلد.

ميرسي يا ايمان وميرسي يا علاء

الميك اب تحفه جداااااا بس ياريت تعملوا توبيك بانواع واسعار الميك اب الحلو لانى خايفه على بشرتى جدااا وياريت يكون قريب عدد جامد من بص وطل.

=================

رد بص وطل:
حاضر يا جميلة نوعدك إننا نحاول نعمله لك في أقرب وقت.. بس إنتي تابعينا.