الروتين اليومي للحفاظ على صحة البشرة والشعر

انا فردت شعري بكريم دارك وهلا بدا يتقصف رجاء دلوني عايزهشعر طويل وكثيف

السر في الصدقة ممكن تخرجي اي نقود بسيطة صدقة بنية ان ربنا يصلح لك او يعالج شعرك وشعري النتيجة دي مجربة مع الاخذ بالاسباب وشكرا.

صباح الخير يارانيا بشكرك على المعلومات القيمة دي بجد فادتني كتير بس أنا عندي مشكلة وهي إني عندي في الجبهه من فوق طرف الحاجب الشمال ناحية الأنف زي تكشيرة يعني اللي يشوفني يقول إني مكشرة بس أنا مش كده ودي جاتني من شدة الاعصاب والضغط في العمل اول ما اشتغلت وفضلت موجوده معايا وبجد مضايقاني جدا في شكلي ومش عارفه ليها حل وكنت دهنتها بزيت خروع بس ما جبش نتيجه ياترى ايه الحل ياريت تفيديني اتخلص منها ازاي او ممكن اعمل ماسك ايه يخليها تروح واسفه اني طولت عليكي .

===========

رد بص وطل:
صديقتى merna، أنا بنصحك بأستشارة دكتور أعصاب عشان ممكن تكونى محتاجه علاج طبيعى وعمل بعض التمرينات للوجه، ويا ريت تطمنينا عليكي.

أنا بنت اختي عندها سنتين وشعرها خفيف وهايش بس فتلته ناعمة بس بيبان إنه مش ناعم وكمان من عند القورة كده مجعد بسيط ومقصف عايزة وصفة مناسبة لسنها وكمان عايزة وصفة لصنفرة الوجه عشان وشي أنا بشرتي مختلطة وبها حب الشباب بس بسيط بجانب أثار الحبوب دي شكرا ليكي وعلى مجهودك معانا وعلى مجهود بص وطل الرائع معانا طول السنين اللي فاتت.

=========

رد بص وطل:
صديقتى العزيزة aya بصى بنت أختك سنها صغير جداً إنها تبدأ تعمل ماسكات، أهم حاجه إن أكلها يكون صحى عشان ده بيأثر على شعرها، وبالنسبه للبشرة المختلطه فهى بتكون محتاجه عنايه منك وهى إنك تستخدمى سائل منظف يقوم بتنظيف البشرة وازالة الدهون والاوساخ وبعد كدة تستخدمى كريم مرطب للمناطق الجافه فى بشرتك، ويا ريت تقري الجزء الأول من العدد على قمر 14 وهتلاقي اللينك بتاعه في العدد ده وهتلاقي فيه ماسك لحب الشباب.

شكرا على هذا المجهود الرائع ولو سمحتي أنا عندي بثور سوداء في انفي ايه انسب طريقة عشان اتخلص منها وكمان شعري على طول مقصف عند الاطراف وبقص الاطراف بس برده مفيش فايدة أرجو الرد وجزاكي الله خيرا.

==========

رد بص وطل:
صديقتى ريم بصى هتلاقى فى عدد مشاكل البشرة ماسك للبثور السوده ممكن تعمليه وبالنسبه لمشكله التقصيف إبعدى عن إستخدام السيشوار وقصى أطراف شعرك كل 3 شهور وفى حاجه طبيعيه ممكن تعمليها كل يوم إنك تدلكى فروة الرأس بزيت حبة البركة المعصورة على البارد يوم ويوم، مع عمل حمام زيت لشعرك مكون من خليط من زيت الثوم وزيت جوز الهند وزيت جرجير 3 مرات في الأسبوع.

اعمل اية للحنة علشان يكون لونها بني؟ وانا شعرى نوعة جاف وعندي حبوب كتير في جبهتي ومتضايقة قوى منها أنا عندي 18 سنة أضع كريم النهار ولا الصن بلوك ولا الاتنين؟ واية رايك في منتجات oriflameو Evon فى المكياج والكريمات؟ شكرررا ليكي كتير.

==========

رد بص وطل:
صديقتى العزيزة engy ممكن تستخدمى حنه جلورى ودى هتلاقى منها اللون البنى ولو عايزة تستخدمى الحنه الطبيعيه وتديكى لون بنى حطى ربع كوب خل وعلبه زبادى وكوب شاى مغلى وإعجنيهم كلهم مع بعض بالماء الدافيء، وممكن تعملى حمام كريم مرة فى الأسبوع لأن الشعر الجاف بيكون محتاج حمام كريم وبالنسبه لسؤالك عن الصن بلوك وكريم الليل والنهار فهما مختلفين لأن الصن بلوك بيحميكى من أشعه الشمس لكن كريم الليل والنهار بيعمل على حمايه وترطيب البشرة ولكن الأهم في سنك إنك تستخدمي الصن بلوك وتهتمي بالتغذية الصحية والمتوازنة وشرب العصائر الطازة والميه أما بالنسبة لكريم الليل والنهار فممكن تستخدميهم وإنتي عندك 20 سنة، ومنتجات أوريفليم وافون كويسه وممكن تستخدميها وإنتى متطمنه.

الحقينى يارانيا شعرى مقدمة الراس عندى اتنحل خالص وقورتى كل شويه تكبر تكبر وزهقت من نفسى ورحت لدكاترة كتير والعلاج نتيجته مؤقته والشعر اللى بينمو بيقع تانى أعمل أيه عاوزة وصفه تنبت شعر جديد وتقوليلى احافظ عليه إزاى ومعلش القصه بتاعتى هايشه خالص بقيت شعرى بيبقى حلو والقصه بتقف لوحدها وتهيش افيدينى جزاكى الله خيرا .

==========

رد بص وطل:
صديقتى العزيزة لازم تستمرى على علاج الدكتور لفترة عشان بيكون محتاج وقت وإهتمى بوعيه أكلك زى الخضار والفاكهه ومنتجات الألبان وإبعدى عن إستخدام السيشوار وهتلاقى فى العدد ده وصفه طبيعيه لأنبات الشعر ممكن تعمليها، وداومي على عمل حمام كريم مغذي لشعرك مرة كل أسبوع علشان تغذيه وتطريه.

هاي رانيا أنا بحب الشعر الطويل جدا نفسي شعري يبقي زي شعور بنات الخليج يبقي تقيل كده سمعت عن عشب الياس بيقولوا إنه خطير جدا يطول الشعر لغايه الركوبه هل ده صحيح بينعمه بيكثفه أنا روحت اشتريت العشب ده من عند العطار طحنته حطيته علي نار عشر دقائق سبته يوم بحاله صفيته اخدت مياه بتاعته كل يوم اقبل ما انام بحطه علي شعري اصحي من يوم اغسله معليش طولت عليكي بس بليز يا رانيا عاوزه الرد بسرعه.

==========

رد بص وطل:
صديقتى بوسي بصى عشب الياس كويس جداً للشعر وممكن تستخدميه وهو مفيد للشعر وبيقلل من سقوط الشعر.

لو سمحتى ساعديني أنا قرات الموضوع كله بس ياريت تقولي لى على وصفه سريعه تساعدنى على إنى ارجع شعرى زى ما كان أنا شعرى خفيف وكمان مقصف جدا من الاطراف لما بقصه بلاقيه مقصف برضه من الامام فى الجبهه فيه بعض الشعر القصير المقصف يشوه منظر شعرى من الامام وكمان عندى استفسار كيف يمكننى استخدام نبات الصبار وكيف يمكننى حفظه عندى لفتره وماهى فوائده وكمان عصير الجرجير كيف اعمله هل اضع عليه ميه ولا لأ شكرا ليكى كتير واسفه على الاطاله ياريت تساعدينى لانى نفسيتى تعبانه بسبب شعرى.

===========

رد بص وطل:
صديقتى شيماء أهلاً بيكى، بصى هتلاقى فى العدد وصفه لأنبات الشعر والتقصيف ونصيحتى ليكى إنك ماتستخدميش السيشوار وتستمرى إنك تقصى أطراف شعرك كل 3 شهور، ونبات الصبار مفيد جداً للشعر وعشان تستخدميه بتجيبى ورقه الصبار وتاخدى المادة اللزجه وتحطيها على شعرك وبالنسبه لعصير الجرجير بتجيبى الحزمه وتحطيها فى الخلاط وحطى عليها ربع كوب ميه.

ميرسى جدا على الخلطات والوصفات اللى بتقولي لنا عليها أنا عندى مشكله إنى شعرى طويل لكن جاف استخدم زيوت ولا كريمات وإيه نوع الشامبو اللى استخدمه معاة.

========

رد بص وطل:
صديقتى العزيزة حاولى تعملى حمام كريم مرتين فى الأسبوع لأن حمام الكريم بيكون مناسب أكتر للشعر الجاف، وممكن تستخدمى شامبو بانتين أو دوف وكمان إستخدمى بلسم بعد الشامبو.

بالنسبه للماسك بتاع السيليوليت اللى هو معلقتين من زيت اللوز مع معلقة من دقيق الشوفان إيه هو دقيق الشوفان ده والاقيه فين وأعمل الماسك ده كل قد إيه وشكرا.

=========

رد بص وطل:
صديقتى sndrla دقيق الشوفان هتلاقيه عند أى عطار وممكن تعملى الماسك دة كل يوم.

هو أنا لو جيبت شعرى كله على قدام وسرحته مع جاذبيه الارض ده مفيد ولا المفروض يكون كله فى اتجاه واحد.

==========

رد بص وطل:
صديقتى العزيزة الطريقه دى كويسه ومفيد جداً لشعرك إنك تسرحيه فى كل الأتجاهات.

من فضلك عاوزة طريقة لمنع حدوث الالتهاب وظهور الحبوب بعد ازالة شعر الوجه بالفتلة ولو فى طريقة لتخفيف كثافة شعر الذقن لانه عندى اسود وسميك شكرا.

===========

رد بص وطل:
صديقتى منى لتتخلصي من مشكلة حساسية واحمرار بشرتك بعد إزالة الشعر الزائد من الوجة املي طبق غويط بالثلج وضيفي ليه 4 أكواب لبن وبعدين غطسي حتة قطن في الطبق ده وضعيها على المناطق اللي بتعاني من الاحمرار واتركيها لتجف ثم ضعي طبقة أخرى بعد 15دقيقة وكرري العملية مرتين لتعود بشرتك إلى حالتها الطبيعية، وبالنسبه لمشكله الشعر اللى فى الدقن لازم تستشيرى دكتور عشان تتأكدى إنك ماعندكيش مشكله فى الهرمونات، وممكن تعملي وصفة الترمس لتقليل نمو الشعر وكل اللي عليكي إنك تنقعي الترمس في مية لمدة 6 ساعات وتاخدي المية بتاعته واحتفظي بيها في الثلاجة وادهني منها على المنطقة دي واي مكان تاني عاوزاه خالي من الشعر واستمري على ذلك لمدة 3 أسابيع يوميا، لكن بأكد عليكي إنك تستشيري دكتور متخصص.

سورى ماكنتش اخدت بالى من الرد اشكرك جدا إنتى فعلا افدتينى جزاكى الله كل خير
كنت عايزة اسألك أنا سمعت عن فرد الشعر بالاعشاب اللى بيعمله الكوافير للعروسة بيفرد الشعر لمدة 6 شهور تقريبا كنت عايزة أعرف اعمله ولا لأ انا فرحى كمان 3 شهور وبصراحة نفسى عريسى يشوف شعري جميل ومفرود؟ كمان أنا شعرى تقيل وخصلته ناعمة بس فيها تقصيف كتير ودايما بيهيش ياريت تقولى لى الحل وياريت تقولى لى نوع شامبو كويس استخدمه ويفضل انه يكون ضد القشرة.

===========

رد بص وطل:
صديقتى العزيزة ألف مبروك مقدماً، أنا مش بنصحك بفرد الشعر بالأعشاب ولو عايزة شعرك يكون مفرود وناعم وتتخلصي من التقصيف والقشرة ممكن تقري العدد كويس وهتلاقي فيه وصفات لكل مشاكلك ولو عايزة تستعملي شامبو ضد القشرة فلازم يكون تحت إشراف دكتور.

هاى إذيكوا أنا محتاجة أعرف طريقة ماسك أو أى حاجة أعملها للحماية من أشعة الشمس طول السنة عشان ببقى فى كلية كلها شمس وبشرتى بيبقى لونها غامق فى المناطق اللى بتتعرض للشمس وباقى الجسم لونه الطبيعى زى الوجه عشان كدة عايزة حاجة تحمى من أشعة الشمس الحارقة وميرسى جداً على المواضيع الجميلة دى.

=========

رد بص وطل:
صديقتى العزيزة لازم تستخدمى صن بلوك قبل ما تتعرضى للشمس عشان تحافظى على لون بشرتك.

رانيا معلش فى حاجة عوزاكى تفيدينى فيها أنا شعرى طويل وبعمله خلطة اللى هى معلقة زيت زيتون ومعلقة حبة بركة وعلبة زبادى والحمد لله عمل نتيجة كويسة بس للأسف أنا شعرى مموج أوى أوى وخصوصا لما باجى افرده واحاول اسرحة لقدام لكن للأسف وأنا بفرده وبدخل إيدى كده جواة بلاقى تمويج جامد أوى ياريت تقولي لى أعمل إيه أخليه مفرود وميكونش في تموج ياريت تفيدينى وشكرا ليكى جدا.

============

رد بص وطل:
بالنسبه للتموج اللى فى شعرك فممكن تعالجيه بعمل حمامات لشعرك بزيت الحلبة أو زيت جوز الهند، لكن مع ضرورة المواظبة عليها.

رانيا كنت عاوزة استفسر عن حاجة أنا بحط زيت زيتون حولين عنيا وبحط زيت خروع على حواجبى ورموشى بس ساعة الوضوء غصب عنى لازم أغسل وشى كويس فهل كدة مفعول الزيت ممكن يروح من المياة اللى بجبها علية ساعة الوضوء ياريت تفدينى وشكرا.

=============
رد بص وطل:
صديقتى سومه ممكن إنك تحطى الزيت قبل ماتنامى وتغسلى وشك الصبح .

هاى رانيا إذيك كنت عاوزة استفسر بالنسبة للخيار إنى اضربة فى الخلاط لازم اقشرة الاول ولا احطة عادى لانك قولتى مفيد جدا إنى اغسل بي وشى كل يوم بس لازم أغسل وشى بعديها بالمياة وينفع استخدم عصير الخيار كغسيل لوشى كل يوم بدل الصابونة يا ريت تفيدينى بالظبط .

==========

رد بص وطل:
صديقتى العزيزة بصى الخيار أضربيه فى الخلاط وهو بقشرة عشان تاخدى كل الفايدة منه، بس بتستخدميه بعد ما تغسلي وشك بالغسول المناسب معاها وسيبيه على بشرتك اطول فترة ممكنة.

مشاكل الجسم الغير متناسق لونة وبه خطوط.

=========

رد بص وطل:
صديقتى العزيزة هتلاقى فى الجرء الأول من العدد وصفه لوشن لتفتيح الجسم ممكن تعمليه وبالنسبه للخطوط البيضه ممكن إنك تدهني جسمك بخل التفاح وسيبيه على جسمك لمدة 2 أو 3 ساعات وبعد كده أغسليه وممكن تعملي الوصفة دي يومياً وإن شاء الله هتحسي بالنتيجة على طول.

السلام عليكم أنا كنت عايزة اسألك عن الليفة المغربية والصابون المغربى أول حاجة هل هما مفيدين فى تفتيح وتوحيد لون الجسم؟ وهل ينفع استخدمهم فى البيت من غير ما اروح لمركز تجميل ولو ينفع ياريت تشرحي لى طريقة الاستخدام وهل بجيب حاجة تانية معاهم ولا هما كفاية؟ اجيب الليفة المغربية والصابون المغربى منين علما إنى من سكان القليوبية وهى بكام؟ إ زاى افرق بين الليفة الاصلى والتقليد علشان مايضحكش عليا؟ أشكرك بشدة على هذا العدد الرائع.

===========

رد بص وطل:
صديقتى العزيزة الحمام المغربى مهم ومفيد جداً وبيفتح البشرة وعشان تشترى الليفه المغربى الأصليه أشتريها من عند عطار مضمون أو صيدليه كبيرة وممكن تعملي الحمام المغربى فى البيت ودى خطوات الحمام المغربى .
المطلوب:
1. ماء ساخن جداً.
2. صابون للجسم ويفضل صابون مغربي
3. ليفة مغربي خشنة ودي برضه هتلاقيها عند العطار.
4. إسفنجة ناعمة، ممكن تلاقيها في الصيدلية أو السوبر ماركت وبرضه عند العطار.
الخطوات:
1. اقفلي أي منفذ للهواء في الحمام يعني تقفلي الباب والشباك وحتى الشفاط.
2. افتحي المية السخنة في البانيو على الآخر لغاية ما يبقى فيه بخار جامد في الحمام وبعدين سدي البانيو واملي نصه من المية السخنة.
3. جيبي طبق وامليه مية سخنة جداً وحطي فيه اللوفة الخشنة.
4. المطلوب في هذه المرحلة إنك تعرضي جسمك لأكبر قدر ممكن من البخار وده مش هيحتاج وقت أكتر من 5 دقائق بس.
5. بعد ما جسمك ياخد الكمية المحترمة من البخار تبدئي تحطي الصابون المغربي على جسمك ووجهك بس طبعاً تبعديه عن عينيكِ خالص المهم إزاي تحطي الصابون؟ تجيبي الصابون وتبدئي تفركيه على جسمك تفركيه بس من غير دعك، يعني بالراحة.
6. سيبي الصابون على جسمك حوالي 10 دقائق.
7. اشطفي جسمك بالمية السخنة وبعدين حطي كمية تانية من الصابون بنفس الطريقة السابقة وسيبيه برضه لمدة 10 دقائق.
8. ممكن تستفيدي بالفترة دي في إنك تنضفي الكعبين بالحجر الخفاف (موجود عند العطار).
9. بعد ما تعدي الـ10 دقائق اشطفي جسمك من الصابون برضه بمية سخنة.
10. امسكي اللوفة الخشنة وابدئي في دعك جسمك (من غير الوجه) بشكل دائري وهتكتشفي المفاجأة وهي إن الخلايا الميتة في الجسم بتتشال بمنتهى السهولة.
11. بالنسبة لتنضيف الوجه بتستخدمي الإسفنجة الناعمة وده عن طريق مسح البشرة بحركة دائرية من غير الدعك أو الضغط عليها لأن الضغط على البشرة بيؤدي لظهور التجاعيد بدري.
12. دلوقتي بقى اشطفي جسمك كويس بالمية، واغسلي شعرك طبعاً، بس أهم حاجة ممنوع منعاً باتاً استخدام أي نوع من العطور أو مستحضرات التجميل اللي فيها عناصر كيمياوية، ولكن يفضل إنك تستخدمي الزيوت والمستحضرات الطبيعية وأحسن حاجة واللي أنصحك بيها هي زيت اللوز وده لأنه بيفتح البشرة ويلمعها، وممكن كمان إنك تضيفي ماء الورد للمية اللي بتشطفي جسمك بيها.
ده بقى بمنتهى البساطة الحمام المغربي أظن الموضوع سهل جداً وممكن يتعمل في البيت من غير تكاليف كتيرة.

السلام عليكم عايز أعرف ايه السيروم أول مره اسمع عنه؟؟ ده نوعه ايه معلش أنا عايز افهم.

=========

رد بص وطل:
السيروم بيكون عبارة عن سائل ثقيل يستخدم لحمايه الشعر من التقصف ومن السيشوار وممكن يستخدم بدون إستخدام السيشوار لأنه ييقلل من هيشان الشعر وأفضل الأنواع (زيرو فريز وكريستال) ولكن يفضل إنه ما يتسبش على الشعر لأكتر من يوم وخصوصاً في جو الصيف والتراب اللي بنعيش فيه لإنه بيلم تراب على الشعر.

شكرا ليكي بجد ولموضوعاتك الجامدة دي بس أنا كان عندي سؤال أنا باستخدم شامبو لمنع تساقط الشعر اسمه هيرباميكس وباستخدم الزيت بتاعه إيه رأيك في هيرباميكس ده حلو ولا فيه حاجة احسن وباستخدم دواء كابسولات اسمه فيتازينك لمنع تساقط الشعر ايه رأيك فيه وعندي سؤال كمان لو فيه وصفة لإزالة شعر الوجه ياريت تقولي لي عليها ارجو الرد وشكرا ليكي أوي.

=========

رد بص وطل:
تساقط الشعر له أسباب كتير أهم حاجه إنك تهتمى بنوعيه أكلك وإبعدى عن إستخدام السيشوار بكثرة ونصيحتى ليكى ماتستخدميش أى شامبوهات طبيه أو أدويه بدون إستشارة الطبيب عشان تكونى واثقه إنه دة العلاج المناسب معاكى، وبالنسبة لكبسولات فيتازنك فهي كويسة جداً لكن بلاش تاخديها إلا بعد ما تسألي الدكتور، أما بخصوص شعر الوجه فدي وصفة طبيعية بتساعد على التقليل من سرعة نمو الشعر وهي إنك تنقعي الترمس البلدي وده بتجيبيه من عند العطار في مية لمدة 6 ساعات وتاخدي الميه بتاعته واحتفظي بيها في الثلاجة وادهني منها على أي مكان عاوزة الشعر يقل فيه، وكرري الموضوع ده يومياً.

سورى إنتى كده مافدتنيش باى شئ وبعدين أنا بستخدم ماركات الميك أب اللى بتقولى عليها والمناسبة لبشرتى لان بشرتى دهنية.

=========

رد بص وطل:
صديقتى بصى لازم قبل ماتحطى الميك أب تكونى منظفة بشرتك كويس، وكمان فى حاجه ممكن تعمليها قبل ماتحطى الميك أب هى إنك تمررى قطعه ثلج على بشرتك وكمان ممكن تحطى كريم مرطب مناسب مع البشرة الدهنيه قبل الميك أب، ونصيحتي ليكي هي إنك تحاولي تقللي الميك اب وخصوصاً في فترة الصبح يعني ممكن تكتفي بحاجات ورتوش بسيطة زي الليب جلوس وأحمر الخدود لإن الماكياج مع الحر والشمس بيبقى شكله مش حلو بعد فترة.

محتاجه أعرف ماسك لقفل المسام وخطوات قفل المسام بعد حمام البخار وشكرا.

==========

رد بص وطل:
أهلاً بيكى يا أميرة، بعد ماتعملى حمام البخار ممكن تغسلى وشك بميه ساقعه وكمان مررى قطعه تلج على بشرتك، وممكن تمسحى وشك بميه الورد وبالنسبه للمسام الواسعه ممكن تحطى شرائح الطماطم على البشرة لمدة نصف ساعة وتكرري الموضوع ده يوم بعد يوم.

لو عايزة اعمل حنة سودة انتي عارفة أن الحنة بتكون على الشعر 24 ساعة عشان اللون يثبت بس بعد ما بغسلها شعري بيكون ناشف وجاف جدا ايه الحل؟؟

==========

رد بص وطل:
صديقتى العزيزة ممكن تحطى على الحنه زبادى وبعد ما تعملى الحنه وتغسلى شعرك إغسليه بالبلسم وكمان ممكن تعملى حمام كريم لشعرك مرة كل أسبوع علشان ترطبيه.

السلام عليكم كنت عاوزة استفسر عن حاجة أنا بعمل لشعرى خلطة عشان تطوله وهى (علبة زبادى ومعلقة حبة البركة ومعلقة زيت زيتون) فهل الخلطة دي فعلا صح ومفيدة ولا لاْ بس وأنا بقرأ العدد لقيتك كاتبه أن فى خلطة بطول الشعر وهى عبارة نعمل حمام الزيت للشعر عبارة عن خليط من زيت الثوم وزيت الجرجير وزيت جوز الهند، وبنسيب الخليط ده على شعرنا لمدة 3 ساعات، وبعد كده نغسل الشعر الشامبو المناسب، وبنكرر حمام الزيت 3 مرات في الأسبوع فاْنهى خلطة الافضل والاسرع فى تطويل الشعر ومعلش أنا اكتشفت أن الخلطة الاولانية اللى بعملها فتحت لون شعرى ولونه اتغير فهل ده سببه ايه بالظبط ياريت تفيدينى وشكرا ليكى جدا.

=========

رد بص وطل:
صديقتى العزيزة بصى تغيير لون الشعر ده ملوش أى علاقه بالخلطه اللى إستخدمتيها لأنها وصفه طبيعيه وتغير لون شعرك ده ممكن يكون بسبب استخدام أنواع شامبو مش كويسة، والوصفتين كويسين وممكن تجربى الوصفه التانيه وإن شاء الله هتلاقى نتيجه هايلة مع المواظبة.

معلومات مفيده يا رانيا شكرا ليكى عندى مشكلتين أولهم أنا شعرى عادى يميل الى الدهنى وهو حلو الحمد لله لكن فى خصلة فى شعرى بسمك الاصبع هايشة ومكسرة بتبوظ شكل شعرى مرة قصيت نصها تقريبا وطولت تانى وفضلت زى ما هى ممكن حل لها؟ تانى حاجة أنا عندى خطوط بيضا على الارداف واضحه جدا وانا فرحى كمان 6 شهور ودى بقى لها سنين ممكن حل ليها غير عملية التجميل؟ وشكرا

==========

رد بص وطل:
صديقتي العزيزة يفضل إنك تستشيري دكتور جلديه متخصص علشان يعرف سبب المشكلة دي ويديكي العلاج المناسب، وبالنسبه لمشكله الخطوط البيضه دى بتكون بسبب الزيادة فى الوزن فحاولى تثبتى وزنك وكمان فى حاجه ممكن تعمليها وهي إنك تدهني جسمك بخل التفاح وسيبيه على جسمك لمدة 2 أو 3 ساعات وبعد كده اغسليه وممكن تعملي الوصفة دي يومياً وإن شاء الله هتحسي بالنتيجة على طول.

هاي ممكن طلب بس بليز بسرعه أنا فرحي بعد 3 شهور كنت عاوزه فوائد عشب الياس استخدمه إزاي هو لازم اجيبه من الخارج ولا ممكن اجيبه من عند العطار .

==========

رد بص وطل:
صديقتى بوسي ألف مبروك مقدماً وياريت تبعتي تقولي ايه مشكلتك علشان اقول لك الحل المناسب لها.

هاى رانيا الحقينى انا تعبانة جدا بسبب شعرى مش لاقية أى حل عمال يقصر ويتقصف ومش بيطول على القص المشكلة دلوقتى أنا كان شعرى طويل أوى وتقيل دلوقتى بيقصر وبخف بطريقة ملحوظة جداً أعمل إيه ساعدينى ارجوكى أنا روحت لدكتور وتابعت معاه وعلاجات كل شهر ب200ج ومفيش فايدة أنا تعبانة وكمان شعرى جاف وناشف جدا انا دلوقتى بستعمل شامبو دوف وكمان حمام كريم ياريت ياريت تساعدينى أعمل ايه.

=========

رد بص وطل:
صديقتى فاتن، أهم حاجه تهتمى بنوعيه أكلك زى الخضار والفاكهه ومنتجات الألبان عشان الشعر بيكون محتاج تغذيه ولازم تقصى أطراف شعرك كل فترة وإبعدى عن إستخدام السيشوار وممكن تستخدمي حمام كريم لوريال مرة كل أسبوع، ويا ريت تواظبي على علاج الدكتور لفترة لإن علاج مشاكل الشعر بيكون محتاج وقت وهتلاقى فى العدد ماسك لتساقط الشعر ممكن تعمليه.

هاى رانيا إذيك ربنا يحميكى يارب ودايما فى المزيد والتقدم كنت عاوزة استفسر عن حاجة أنا بعمل خلطة لشعرى عشان أطوله بس اكتشفت حاجة أنا شعرى أصلا لونة بنى فى أسود جيت وصبغته باللون الاسود ولما عملت الخلطة لقيت من عند الاطراف كدة لونه بقى بنى فاتح كدة ياترى إيه السبب وكنت عاوزة أعرف هتاخد منى وقت قد ايه وكام مرة لحد مايطول ويبقى طويل وناعم ياريت تفيدينى يا رانيا وشكرا ليكى جداً.

===========

رد بص وطل:
صديقتى العزيزة، عشان شعرك يطول لازم تهتمى بنوعيه أكلك وكمان قصى أطراف شعرك كل 3 شهور دة بيساعد على نمو الشعر وإستمرى على الخلطه اللى بتطول الشعر لفترة عشان الوصفات دى بتكون محتاجه وقت عشان يبدأ شعرك ينمو وبالنسبه للحنه فممكن تكونى مسبتيهاش فترة كفايه عشان تديكى اللون أو نوعها مش كويس عشان كده ما عملتش اللون اللى إنتى عايزاة فممكن تجربى نوع حنه تانيه وتسيبيها فترة على شعرك عشان تديكى اللون.

بليز انا عاوزة اسال عن حاجة ومش رديتم عليّ فيها ايه هو السيرم وهل ده فعلا بيتحط للشعر قبل ما يتعمل بالاستشوار عشان يقلل ضرر الاستشوار وبيتحط علي شعر مبلول ولا جاف؟؟

==========

رد بص وطل:
السيرم ممكن تحطيه على شعرك وهو مبلول قبل ما تعمليه بالسيشوار علشان يحميه من السيشوار ويدي له لمعة، ويداري التقصيف، لكنه مش بيعالج أي مشكلة في الشعر هو بس بيحسن شكله.

السلام عليكم ورحمة الله وبركاته انا عندى بقع غامقة فى وجهى ايه حلها؟

============

رد بص وطل:
صديقتنا العزيزة تقدري ترجعي للجزء الأول من الندوة على قمر 14 وهتلاقي اللينك موجود على الصفحة دي، وهتلاقي فيه ماسك لعلاج البقع الغامقة.

ازيك يا رانيا انا عايزه اعرف الاسم التجاري للبنج الموضعى اللى قولتى عليه قبل كده عشان السويت وعايزه اعرف هل هو مضر؟ وسعره في حدود كام؟

===========

رد بص وطل:
فيه أنواع كتير وممكن تستخدمي كريم إملا، وتدهنيه على المنطقة وتسيبيه لمدة ساعة قبل ما تزيلي الشعر، والأفضل إنك تستشيري الدكتور إذا كان مناسب معاكي ولا لأ.

انا سمعت ان الحنة بتغذي الشعر ومفيدة اوي للشعر وانا عايزة اعمل شعري حنة سودة ممكن تقولي لى اعملها ازاي وانهى احسن الحنة اللي بتتباع فى الصيدليات ولا اللى عند العطار ولو هشتريها من الصيدليات تنصحينى بانهي نوع شكرا وارجو الرد.

===========

رد بص وطل:
الحنة الطبيعية فعلاً مفيدة جداً للشعر، وممكن تجيبيها من الصيدلية وفيه أنواع كويسة زي جلوري أو من عند أي عطار مضمون، وبتعمليها زي ما قولنا بإنك تخلطي الحنة بالمية ومعاها وسط حمضي زي الليمون او خل وبتحطيها على شعرك وتسيبيها لمدة طويلة 3 ساعات أو اكتر وبعد كده تغسلي شعرك.

طيب ممكن تقولي يا قمر زيت الثوم بنعمله في البيت ولا بنشتريه وربنا يوفقك.

==========

رد بص وطل:
زيت الثوم بتجيبيه من عند العطار.

ميرسى اوى على الوصفات الهايلة دى بس ليه سؤال هل ممكن استخدم الحنة وانا عاملة كيراتين و لا يضر بيه.

===========

رد بص وطل:
مفيش مشكلة إنك تعملي الحنة بعد الكيراتين.

فرحي بعد شهر ونصف وكنت عايزاكي تقولي لي على كوافيرة مضمونه اعمل عندها الكيراتين لاني محجبه ومش عايزة كوافير راجل.. المشكله اني من الفيوم وعايزة حد كويس في القاهرة وسعره كويس.. الكيراتين الاصلي.

============

رد بص وطل:
فيه دلوقتي مراكز تجميل كتير بتعمل الكيراتين ممكن تسالي حد مجرب عن افضل مكان.

بصى يا جميل بجد أنا مستمتعه جداً بنصايحك لانى مش بستعمل كيماويات إنت دلوقتى قولتى طريقتين لتقصيف وهيشان وتطويل الشعر فاْيهما أفضل في حالتى:-
اولاً شعرى لونه في البنيات واطرافه دهبى طبيعى ومش بستعمل ولا كريم ولا زيت بستعمل شامبو هيد اند شولدرز بس للاسف ضعيف ومقصف وهايش مع إنه ناعم فأيه الاْنسب وصفة زيت حبة البركة على البارد واجيبه منين أن كان مناسبنى؟ ولا زيت الثوم والجرجير وجوز الهند مع العلم إنى بخاف لا الزيوت تغمق شعرى نفسى بجد شعرى يتقل ويبان نعومته ولونه ويطول كمان أنا مخطوبة ونفسى لحد ما اتجوز يكون اتظبط والموضوع ده قالقنى جداً الهيشان مخلينى مش عارفه أسرحه وبقيت أخاف اظهر بيه عند أى حد من قرايبى أنا محجبه فبفضل بحجابى بجد نفسى احس بيه ويتقل ويطول بالله عليكى ساعدينى واسفه للتطويل وياريت معلشى تخلى بالك أن كانت الزيوت تغمق ولا لأ الف الف شكر.

============

رد بص وطل:
ممكن تعملي وصفة زيت جوز الهند والجرجير والثوم لإن الزيوت دي مش بتأثر على لون الشعر.

رانيا بجد أنا مش عارفة أشكرك إزاى بجد مجهود أكتر من رائع وأنا استفدت جدا لان فى الفترة اللى فاتت وشى بجد كان بقى غريب ومجهد فى الوقت اللى إنتى نزلتى فيه الحلقة الاولى كنت عملت قبلها بيومين تنظيف بالبخار وكام ماسك كدة بس بردو وشى مكنش حلو فقررت اتبع وصفاتك بس فى مشكلة عندى يا رانيا إنى أنا وشى أسمر من الشمس لانى فضلت فترة مش بستخدم الصن بلوك وده طبعا مخلينى احط ميك أب علشان ادارى السمار والهالات السوده وعلى فكرة السمار بجد زايد جدا بطريقة غريبة ومش قادرة أبطل ميك أب زودى على دة إنى بشرتى دهنية وفيها بعض المشاكل تفتكرى إيه الحل علشان ابطل ميك اب مع السمار والهالات السودة اللى زايدة مع إنى بنام كويس جدا اسفة انى طولت عليكى وشكرا على مجهودك .

=========

رد بص وطل:
صديقتى العزيزة البشرة الدهنيه محتاجه إنك تهتمى بنظافتها بصفه مستمرة ممكن تستخدمى ميه الورد لأنها مفيدة جداً للبشرة الدهنيه ولازم الميك أب يكون مناسب لنوع بشرتك وكمان لازم تستخدمى صن بلوك قبل ماتتعرضى للشمس وتكون درجه حمايه عاليه عشان يحميكى من أشعه الشمس ونصيحتى ليكى إنك ماتستخدميش أى ميك أب على بشرتك الصبح لأنه مضر جداً خاصه إنك بشرتك دهنيه وإعملى ماسكات طبيعيه لبشرتك بصفه مستمرة واشربي مية كتير وكلي خضار وفاكهة طازة.

يعنى ايه زيت حبه البركه على البارد.

===========

رد بص وطل:
فيه طريقة لتحضير زيت حبة البركة بتكون معصورة على البارد، وإنتي بتجيبيه من عند العطار بتطلبيه بالاسم ده.

بشرتى مش قابلة مكياج خالص وكل ما احطة بتقطع جدا ويغمق لون بشرتى مع انه مكنش كدا فى الاول مش عارفة اعمل ايه؟بليز ساعدينى.

===========

رد بص وطل:
لازم تكوني متأكدة إنك بتستعملي ماركات كويسة من الميك اب وتكوني منظفة بشرتك كويس جداً ومرطباها.

السلام عليكم ياريت تردي عليّ لاني عندي مشكلة وهي اني رفيعة جدا طولي 173 ووزني 53 وعملت تحاليل ومفيش حاجة الحمد لله عايزة وصفة للنحافة وكنت عايزة اعرف ايه رايك في كريم mash للحماية من الشمس ودرجة حمايته 95 وشكرا.

==========

رد بص وطل:
كريم ماش نوعه كويس وكمان ممكن تستخدمي صن بلوك فوتوديرم، أما بالنسبة للنحافة فحاولي تكتري من الأكلات اللي فيها سعرات حرارية عالية زي العسل والحلاوة وغيرها ويفضل إنك تتابعي نظام غذائي مع دكتور متخصص.

أنا وشى مهرى فيه حبوب صغيرة خالص ولونه باهت جدا وملتهب ومفيهوش نضارة وجربت أعمل ماسك من هنا وشى باظ أكتر ومش عارفة أعمل إيه.

==========

رد بص وطل:
صديقتى العزيزة واضح إن بشرتك حساسة وضعيفة جداً علشان كده لازم تهتمي بالتغذية الصحية وتاكلي خضار وفاكهة ومنتجات البان والأفضل إن تستشيري دكتور وتعملي بعض التحاليل وتعرفي إيه السبب في عدم نضارة بشرتك وتاخدي العلاج المناسب.

عايزة اسال انا لو عايزة اعمل شعرى حنة سودة اعملها ازاى ولو الحنة اللى بتتباع فى الصيدليات اجيبها اسمها ايه.

===========

رد بص وطل:
صديقتى العزيزة أهلاً بيكى بصى بتحطى على الحنه ميه وليمون أو خل لإن الحنة بتدي نتيجة أفضل وهي في وسط حمضي وممكن تشترى الحنه من عند العطار أو حنه جلورى من الصيدليه.

أنا بستعمل شامبو بانتين وبديل الزيت بس بديل الزيت بيخلى شعرى طرى بس هايش هو كويس وإزاى اخليه مش هايش كده وكمان عندى حبوب فى فروة راسى أعمل فيها إيه.

=========

رد بص وطل:
صديقتى العزيزة نصيحتى ليكى إنك لازم تروحى لدكتور عشان الحبوب دى محتاجه علاج طبى وكمان الشامبوهات العاديه ممكن تكون بتزود الحبوب دى فالدكتور هيقول لك على شامبو طبى تستخدميه.

السلام عليكم أنا كنت عايزه أسال عن إزاله الشعر بالليزر هل الشعر بيطلع مره تانيه بعد فتره وهل ليه اضرار ولا لا.

===========

رد بص وطل:
لازم تستشيري دكتور أمراض جلدية علشان يقدر يحدد إذا كان الليزر هيكون مناسب ليكي وهيخلصك من الشعر تماماً ولا لأ، ويحدد لك عدد الجلسات اللي هتحتاجيها.

السلام عليكم يا رانيا ولو سمحتى كنت عايز اسال حضرتك فى حاجة انا بعمل استشوار كتير حوالى مرتين فى الاسبوع ومن كتر الاستشوار ده شعرى وقع وخف جدا هل فى علاج خصوصا ان انا سالت واتقلى ان الشعر اللى وقع ماينفعهش يطلع تانى الا بالزرع بس والف شكر لمجهود حضرتك ونصايح حضرتك.

==========

رد بص وطل:
عمل الشعر بالسيشوار بكثرة بيضر الشعر جداً، علشان كده حاول على أد ما تقدر إنك ماتعملش شعرك بالسيشوار في الفترة دي، واعمل حمامات كريم مغذية للشعر مرة كل أسبوع، وممكن تعمل لشعرك حمام زيت عبارة عن خليط من زيت الجرجير وزيت جوز الهند وزيت الثوم وبتسيبه على شعرك لمدة 3 ساعات وبعد كده كده تغسل شعرك كويس، وبتكرر الموضوع ده 3 مرات في الأسبوع.

هاى رانيا بجد انتى هايله وكل الوصفات الطبيعيه بتاعتك سهله جدا وجميله جدا جدا
رانيا انا نفسى تقولي لى على بروجرام لبشرتى يومى واسبوعى كأساسى يعنى كل يوم المفروض اعمل ايه؟ وفى الاسبوع المفروض اعمل ماسكات ايه مثلا؟ علشان بشرتى تفضل نضيفه ورطبه ونضرة وياريت كمان لو هتقولي لى على غسول ومنظف وتونر وكريمات تقولي لى ايه احسن الانواع لبشرتى (انا بشرتى مختلطه) ميرسى كتير رانيا وميرسى لاحلى سايت بص وطل.

============

رد بص وطل:
طيب تابعينا وإن شاء الله هتلاقي قريب على قمر 14 عن الروتين اليومي المناسب لكل نوع بشرة، وعموماً زي ما قولنا في العدد إن اصحاب البشرة المختلطة ممكن يحطوا على بشرتهم عصير خيار يومياً.

بالنسبة لازالة الشعر بالكريم للحوامل فاستعمال كريمات ازالة الشعر و صبغات الشعر مرفوضة تماما للحوامل يمكن ان تستخدم السيلك ابيل رغم انها مؤلمة لكنها تدوم واحتمالية الجروح موجودة لكنها قليلة او الحلاقة باله كهربائية ولكنها لن تدوم طويلا او السويت لو امكن رغم صعوبة هذه الطريقة مع الحمل.
ملحوظة: انا دكتورة يعني الكلام ده اكيد.

هااي انا بحبكم قوووي انا عندي كذا سؤال هطول عليكي يا قمر 14 انا عندي في المنطقة حول الفم اثار حبوب وغمقان ممكن حل سريع وميرسي يا قمر.

=========

رد بص وطل:
ممكن ترجعي للجزء الأول من العدد واللينك بتاعه موجود على الصفحة وهتلاقي فيه ماسك لعلاج آثار الحبوب.