حافظي على بشرتك.. بماسكات طبيعية 100%

ميرسى اوى على وصفاتك الجميلة بس بليز انا عندى مشكلة ومديقااانى اووووى مش عارفة عمر ماكان بيطلعلى اى حبوب او اى حاجات غريبة فى وشى بقالى شهرين ددلوقت بيطلعلى حاجات غربة اوى عبارة عن دوريات بيضة وخشنة شوية مش عارفة من اه دى وكشفت والدكتور ادانى كريم وراحت بس بتروح وترجع تانى على شكل حاجات تانية انا خايفة اوى منها ومش عارفة ايه دى لو عندك اى معلومات ياريت تفيدينى (وميرسى)

=================

رد بص وطل:

ميرسي ليكي ولمتابعتك انتي يا صديقتي العزيزة، وبالنسبة لمشكلتك فأحسن حل هو أنك تواظبي على استخدام العلاج اللي كتبهولك الدكتور، علشان يجيب نتيجة، وياريت لو تتابعي مع الدكتور وتخليه يكشف عليكي ويشخص لك نوع "الحاجات الثانية" دي إيه.

كل سنه وانتى طيبه يا قمر عايزة اطلب منك طلب عايزة زيت يوضع على الشعر بعد الغسيل لان كنت بوضع كريم وللاسف شعرى نشف اوووى وبقى بيقع كله وناشف واطرافه كمانه هايشه اووووى وحاسه انه لونه باهت ومجهد اووى وبيقع بغزارة انا اسفه انى طولت عليكى ارجو الرد سريعا

====================

رد بص وطل:

وانتي طيبة يا صديقتنا العزيزة وعيد سعيد عليكي، وتقدري تستخدمي الزيوت الطبيعية زي زيت اللوز والجرجير وجوز الهند، وكمان ممكن تستخدمي زيت دابر أملا، أو زيت فاتيكا.

السلام عليكم ورحمه الله.. كل سنة وانتم طيبين ويارب عيد سعيد عليكم، انا عندى مشكلة اني مشعرة شوية وجربت اعمل سويت مرتين منتظمين ولقيت نتيجه في رجلى ان الشعر خف حاجه بسيطه وبدا يتاخر في ظهوره مع الوقت بس ايدى زى ما هى تقريبا بيطلع بكثرة بس الشعرايه بقت اخف شوية وناعمه بليز عايزة ماسك او حاجه اعملها تاخر من نمو الشعر وتخففه وتفتح مكانه وتنعم البشرة علشان ميعملش حبوب او قشر، تانى طلب عايزة ماسك يفتح بشرتى وينضفها انا بشرتى مختلطه (دهنيه وعاديه) والاماكن الدهنيه بيطلع فيها حبوب صغيرة وساعات بتلتهب وتكبر وبعور وشى هل انا يناسبنى ماسك الرده وماء الورد ولااعمل ايه؟ سورى طولت عليكم.

==============

رد بص وطل:
كل سنة وإنتي بصحة وخير يا هويدا، ودي وصفة طبيعية لتقليل نمو الشعر وكل اللي عليكي إنك تنقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر...... واستمري على ذلك لمدة 3 أسابيع يوميا، أما بالنسبة لتفتيح البشرة فأحسن ماسك هو ماسك الزبادي بالليمون وده ممكن تعمليه يوميا، أما بالنسبة لماسك الردة وماء الورد فده ممكن تعمليه على المناطق الدهنية في بشرتك اللي فيها رؤوس سوداء.

ممكن ماسكات طبيعية أو من المستحضرات للأماكن السوداء في الأماكن الحساسة.

===========

رد بص وطل:
ده ماسك كويس جداً لتفتيح المناطق الحساسة وهو عبارة عن زيت زيتون + زيت لوز + دقيق خشن (دقيق البسيسة)

الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.

لو سمحتي انا كنت عاوزه اسال سؤال انا كنت في فترة تعبانه نفسيا ده اثر علي شعري بقى بينزل وضعيف جدا فانا عاوزه اعرف لو هو ممكن يرجع زي الاول وعاوزه حاجه بسيطه وكويسه تعالج شعري.

============

رد بص وطل:
طبعا ممكن يرجع لطبيعته مع الاهتمام بالتغذية الصحية والسليمة والاهتمام بشعرك وعمل حمامات كريم المغذية للشعر، ودي كمان وصفة طبيعية ممكن تعمليها علاج مشكلة تساقط الشعر وتقويته وهي عبارة عن بيضة واحدة + معلقة عسل كبيرة + زيت زيتون + زيت جوز هند + زيت صبار + ريحان مجفف (ممكن تجيبيه من عند العطار) + معلقة كبيرة مايونيز (والمايونيز على فكرة مفيد أوي لعلاج جفاف الشعر)، وبتخلطي المكونات دي كلها مع بعض وتحطيها على شعرك وهو ناشف وتسيبيها على شعرك لمدة ساعتين وبعد كده تغسلي شعرك بالشامبو.

أنا شاكرة مجهوداتكم اوى وربنا يجازيكم خير، كل سنة وانتم طيبيين، انا بشرتى دهنية اوى ولما بصحى من النوم بيكون عليها زيت كتير اوى، ولما اجى اخرج بغسل وشى كويس اوى وبيكون منور بس لما يعدى ربع ساعة يدهنن تانى ويغمق وشى واللى يشوفنى يفتكرنى انى مرهقة.. حاجة تانية انا شعرى فتلته حلوة وكان جمييييل وانا صغيرة بس دلوقتى باظ وفيه شعر ابيض وهايش بالنسبة للشعر الأبيض انا بعمله بحنة بس عاوزة حاجة لبشرتى وكمان حاجة عشان تطري شعري... ولكم جزيل الشكر وكل عام وانتم بخير.

=========

رد بص وطل:
بالنسبة لمشكلة بشرتك فإنتي ممكن تغسلي وشك كل يوم بماء الورد لإنه بيمتص الدهون الزائدة من على البشرة وكمان بيهديها ويمتص الالتهابات، واستخدمي غسول مناسب مع نوع بشرتك زي غسول نيتروجينا أو غسول ديور، وبالنسبة لشعرك فإنتي لازم تعملي له حمام كريم مرة كل اسبوع ومن أحسن أنواع حمامات الكريم لوريال وريفلون.

شكرا على المجهود الأكثر من رائع ده بس ممكن اسأل حضرتك عن أي حاجة تعالج تقصف الشعر.

============

رد بص وطل:
ميرسسي ليكي صديقتنا العزيزة على ذوقك، وبالنسبة لتقصيف الشعر فإنتي لازم تقصي أطراف شعرك مرة كل 45 يوم وكمان تعملي حمام كريم مرة على الأقل في الأسبوع، ودي كمان وصفة طبيعية لعلاج تقصيف الشعر وهي عبارة عن موزة + معلقتين زيت زيتون + معلقتين عسل نحل و بتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

Alsalmo 3alykom, shokran gedan 3ala wasfat 2l gamela kont 3ayza 2s2l so2al 2na balbs nadara w basbab makan 2l nadara men 3and man7'iry 7asal sawad w t7sy 2n 2l 7ata deh da7'ala 2na 3ayza 2ft7 2l manta2a deh 2na bashraty 7asasa w mesh gafa 2wy..w bardo 3and mant2t shfyfy men gandb 3'am2a? shokran

===========

رد بص وطل:
صديقتي العزيزة ممكن تعملي ماسك الزبادي بالخيار على بشرتك كلها بشكل يومي لإنه بيعيد النضارة للبشرة وبيساعد على تجديد خلايا البشرة، وحاولي إنك تقللي من لبس النظارة لفترة طويلة علشان ماتعلمش على بشرتك، وده كمان ماسك بيساعد على ترطيب البشرة وتفتيح المناطق الغامقة فيها وهو عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.

عايزة ماسك للسواد حول الفم.

===========

رد بص وطل:
ده ماسك كويس لتفتيح المنطقة حول الفم وهو عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.

Thank you for Lekki Ya Amar 14

اشكركم علي هذه الماسكات الرائعه ولكن أنا بشرتي سمراء وعملت الماسكات ولكن يفتح في ساعتها فقط فاريد حاجه تفتح بشرتي.

===========

رد بص وطل:
صديقتي العزيزة كل واحد منا وله لون بشرته الخاص به، ومفيش ماسك ممكن يخلي واحدة سمراء تبقى بيضاء، لكن الماسكات اللي بنعملها دي بتخلي البشرة ترجع للونها الطبيعي بعد المؤثرات الخارجية اللي بتتعرض لها البشرة، وكمان تقدري كل فترة إنك تعملي تقشير عند دكتور جلدية متخصص.

السلام عليكم لو سمحتى كنت عاوزه اعرف نوع كويس لمعطر الفم ومعطر الجسم بس تكون اسعارهم كويسه وشكرا ليكى.

===========

رد بص وطل:
فيه انواع وماركات كتيرة كويسة موجودة في السوق وأسعارها مختلفة وإنتي ممكن تختاري المناسب معاكي واللي يعجبك.

السلام عليكم ورحمة الله شكله جامد اوى ماسك البطاطس ده وبسيط ميرسى كتير يا ترى فيه ماسكات بسيطه لتفتيح وتنعيم الكفين.

============

رد بص وطل:
ده ماسك كويس لتفتيح الكفين وهو عبارة عن معلقة خميره + معلقة بيكنج بودر وبتعجنيهم بشوية مية وبتسيبيهم على إيديكي لغاية ما ينشفوا وبعد كده افركي ايديكي بفوطة مبلوله، وبعدين اشطفيها بماء الورد، وبتكرري الطريقة دي مرتين في الاسبوع.

انا وجهى ظهر فيه حبوب كتيرة وانا اصلا بيضة ومش عارفة اعمل ايه وانا كمان اسمريت لانى بنزل دروس فى الشمس يا ريت الرد بسرعة لانى تعبانة من وجهى.

============

رد بص وطل:
لازم يا hinda تستخدمي صن بلوك بمعامل حماية قوي قبل ما تتعرضي للشمس علشان تحمي بشرتك من آشعة الشمس الضارة، ومن أحسن الأنواع بايوديرما ولونا ونيفيا، ولما ترجعي البيت اعملي على بشرتك ماسك الزبادي بالخيار علشان يفتحها ويمتص الالتهابات أما بقى بالنسبة لمشكلة الحبوب فالأفضل إنك تستشيري دكتور أمراض جلدية علشان يديكي العلاج المناسب على حسب طبيعة الحبوب وأهم حاجة إنك ماتلعبيش في الحبوب دي خالص وتهتمي جداً بنظافة بشرتك.

ماسكات هايله

وصفاااات حلوه جداا جداا لانى بثق جداا فى موقع بص وطل فلو سمحتم انا عايزه حل لمشكلتى لانى مش عارفه اتصرف ولا لاقيه حل
انا كنت بستخدم كريم للعرق وعملى تقريبا زى حساسيه منه وبدأت منطقه تحت الابط عندى تلتهب جداا وعملت زى جروح وبعد ما خفت عملت سواد كتير جدااااا مع العلم انى بشرتى فاتحه جداااا والسمار ده ظاهر جدا وانا مش عارفه اعمل ايه ممكن تقولوا لى اتصرف ازاى ارجوكم تردوا عليّ.

============

رد بص وطل:
ميرسي ليكي جداً يا ريهام على ثقتك فينا، ونتمنى إننا نكون دايماً عند حسن ظنك، وبالنسبة لمشكلتك فاحنا دايماً بنقول إن المنطق الحساسة دي ماينفعش نستخدم لها أي منتج غلا لما نكون متأكدين منه، والأفضل إنك تستشيري دكتور جلدية علشان يديكي كريم طبي مناسب لتفتيح المنطقة دي من آثار الحساسية.

شكراا اووى على الموضوع المفيد ده وياريت كل فتره يكون فى حاجه زى دى عشان بجد فى كتير بيستفيده منها وجزاك الله كل خير

ممكن ماسك للبشره الدهنيه انا بشرتى دهنيه قوى ومفيش حاجه بتنفع مع بشرتى وتقلل الدهون

===============

رد بص وطل:
ده ماسك مناسب جداً للبشرة الدهنية وهو عبارة عن ردة + ماء ورد.

الطريقة:
ضيفي ماء الورد للردة لغاية لما تلاقيها أصبحت على شكل عجينة لينة.. وبعد كده حطيها على وشك ورقبتك لمدة ربع ساعة، وبعد كده افركي هذا الخليط من على وشك بس خلّي بالك إن عملية الفرك دي تكون بلطف.وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها، ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.

يا جيجي انا عاوزة ماسك للشعر يطرية علشان شعري خشن علشان العيد

===========

رد بص وطل:
ممكن تعملي لشعرك ماسك مكون من مقادير متساوية من الزبادي والعسل وتحطيه على شعرك وتسيبيه لمدة ساعة أو اكتر وبعد كده تغسلي شعرك كويس، ودي وصفة تانية عبارة عن قشر موز مجفف + مايونيز + زيت خروع + زيت الزيتون، وكل اللي عليكي إنك تجيبي قشر الموز المجفف وتطحنيه كويس لغاية ما يبقى زي البودرة، وبعد كده تضيفي عليه باقي المكونات وسيبي الخليط لمدة 30 دقيقة، وبعد كده حطيه على شعرك وركزي على فروة الرأس، وغطي شعرك بكيس بلاستيك وسيبيه لمدة ساعتين وبعدين اغسلي شعرك كويس.

انا بحس ان وشي لونه اصفر عايزة طريقة لبشرة وردية وأنا عملت تحاليل الهيموجلوبين وطلع كويس ممكن وصفه لجعل الخدود وردية.

===========

رد بص وطل:
فيه بشرة بيكون طبيعتها إن لونها أصفر، وده ماسك كويس بيعمل على نضارة وتوريد البشرة ومكناته عصير ثلاث جزرات وده بتعمليه بإنك تبشري الجزر بالمبشرة الناعمة وبعد كده تضربيه في الكبة أو في الخلاط + 2 ملعقة عسل + ملعقة زيت زيتون + بياض بيضة + 4/1 ثمرة طماطم + 2 ملعقة دقيق وبتخلطيهم كلهم مع بعض، وبعد كده تحطيهم على وشك لمدة عشر دقائق، وبعد كده اغسلي وشك بالماء الفاتر ثم الماء البارد.

ميرسي خالص على الماسكات الجميلة دى بس كنت عاوزة اعرف ماسك يكون كويس للبشرة الدهنية اللى بتطلع فيها حبوب وماسكات تفتيح للبشرة الدهنية.

==============

رد بص وطل:
ده ماسك مناسب للبشرة الدهنية وبيعمل على تفتيحها وهو عبارة عن 3 ملاعق دقيق + لبن + عصير ليمونة، وبتخلطي كل المكونات دي مع بعضها وبتضيفي لبن لغاية ما تحصلي على عجينة لينة، وبتفردي العجينة دي على بشرتك وبتسيبيها لمدة 20 دقيقة، وبعد كده تشطفي وشك بالماء الدافي.

انا عندى مشكله ان حوالين انفى من الجانبين لونهم غامق ودلوقتى ملتهبة ولونهم محمر أوي وجافه جدا وانا بشرتى مختلطة ياريت تقولي لى اعمل ايه لان المشكلة دى بقى لها فتره وشكرااا.

============

رد بص وطل:
صديقتي العزيزة لازم تستشيري دكتور جلدية متخصص لإن ممكن يكون عندك حساسية هي اللي بتسبب لك المشكلة دي.

السلام عليكم احب اشكركم على النصائح المفيدة دى بس انا كان عندى مشكلة مضيقانى ان لون بشرة ايدى ووجهى اسمروا بسبب الشمس واصبحوا مختلفين عن الاول فياريت لو فى اى ماسكات ممكن اعملها وتكون نتيجتها اكيدة وسريعة لان الموضوع ده مضايقنى وشكرا ليكم وجزاكم الله خيرا.

=============

رد بص وطل:
صديقتنا العزيزة دايماً بننصح إننا ندهن بشرتنا بالصن بلوك قبل ما نتعرض للشمس علشان نحميها من آشعة الشمس الضارة، ودايماً اعملي ماسك الزبادي بالليمون أو بالخيار لتفتيح البشرة وإزالة الالتهابات، وبالنسبة لاسمرار الكفين فده ماسك كويس جداً لتفتيحهم وهو عبارة عن معلقة خميره+ معلقة بيكنج بودر وبتعجنيهم بشوية مية وبتسيبيهم على إيديكي لغاية ما ينشفوا وبعد كده افركي ايديكي بفوطة مبلوله، وبعدين اشطفيها بماء الورد، وبتكرري الطريقة دي مرتين في الاسبوع.

هل تكفي ماء الود الطبيعية (من العطار) كبديل للتونك للبشرة الدهنية التي تعاني من الحبوب؟

=============

رد بص وطل:
ماء الورد بيكون له تقريباً نفس مفعول التونك.

السلام عليكم انا سعيدة جدا يا استاذة رنا بعمل ركن للماسكات الطبيعية وارجوالاستمرار عايزة نظام امشى عليه كل يوم كله ماسكات طبيعية مثلا لما اصحى ولما انام ممكن احط حاجة تغذى بشرتى وانا نايمة يعنى نظام متكامل علما ان انا بشرتى دهنية ووجهى شاحب وبهتان عايزة تغذية ونضارة وتفتيح وسنفرة وشكرا جزيلا واسفة للاطالة السلام عليكم.

===============

رد بص وطل:
طيب تابعينا يا مدام نورا ونوعدك إن الفترة الجاية هيكون عندنا مفاجآت جامدة جداً بس إنتي تابعينا وقولي لنا رأيك دايماً.

السلام عليكم ممكن ماسك ترطيب للبشرة الدهنية والحساسة.

=============

رد بص وطل:
ده ماسك كويس جداً ومناسب للبشرة الحساسة وبيعمل على تحسينها وترطيبها وهو عبارة عن عصير نصف جزره + 1/4 ملعقه عسل، وبتخلطي المكونات دي مع بعضها وتحطي الخليط على بشرتك وبتسيبيه لمدة ربع ساعة وبعد كده اشطفي بشرتك بالماء البارد.

كل سنة وانتم طيبين وميرسى ليكم بجد انا بشرتى دهنية وعندى مسام فى وجهى ولما بصحى من النوم بلاقى وجهى مليان زيت ممكن الاقى حل للمشكلة دى وياريت اعرف ازاى اهتم ببشرتى وايه انواع الكريمات المناسبة ليا وميرسى.

==========

رد بص وطل:
كل سنة وإنتي بصحة وخير صديقتنا العزيزة، وبالنسبة للبشرة الدهنية فإنتي لازم تهتمي بنظافتها ولازم تستخدمي غسول مناسب للبشرة الدهنية زي نيتروجينا للبشرة الدهنية وديور وكلين أند كلير، وممكن بعد ما تغسلي بشرتك تشطفيها بماء الورد واللي بيعمل على امتصاص الدهون الزيادة من على البشرة وكمان بيعمل كقابض للمسام، وممكن تغسلي بشرتك به قبل النوم، ويا ريت تتابعينا لإن في الفترة الجاية هنقدم أعداد خاصة للعناية بالبشرة والشعر.

السلام عليكم أنا عندى سؤال هو ماسك الخيار البنت اللي في الصورة على وجهها ماسك وعينيها خيار هو الماسك ده اللى على وجهها تبع ماسك الخيار ولا لأ.

===========

رد بص وطل:
الصورة مجرد صورة توضيحية وتقريبية للموضوع الي بنتكلم عنه، وزي ماقولنا إحنا ممكن نحط شرائح الخيار على منطقة العينين لعلاج الهالات السوداء، وكمان الماسك التاني اللي قولنا عليه.

السلام عليكم كل سنة وانتم طيبون جميعا فى انتظار الحلقات القادمة انا عندى سؤال فى ماسك ماء ورد وبودرة تلك هل صحية ولا لا؟

============

رد بص وطل:
كل سنة وإنتي بخير يا سوسو وإن شاء الله هتلاقي مفاجآت كتيرة في الأعداد اللي جاية، وبالنسبة لسؤالك فلو الماسك اللي بتسألي عنه للتفتيح يفضل إنك تستخدمي الدقيق أو اللبن البودرة كبديل لبودرة التلك.

انا عايزة اعرف.. هو المكياج ممكن يعمل بقع فى البشرة؟؟ وكمان يا ريت اعرف الاحسن البودرة المضغوطة ولا العادية.. وايه افضل الماركات؟؟ وشكرا ليكى.

=============

رد بص وطل:
الماكياج لو مش كويس ممكن يعمل مشاكل كتيرة للبشرة زي البقع والاصفرار والبهتان، علشان كده لازم تستخدمي أنواع كويسة وتهتمي بتنظيف بشرتك بعد الميك اب، وبالنسبة للبودرة فالبودرة السايبة فدي لازم تستخدميها بعد كريم الأساس، أما البودرة المضغوطة بتستخدم لتعديل الميك اب وامتصاص الدهون الزيادة من على البشرة.

thanQ :):)

كل سنه وانتي طيبه يا جميل انا عندي سؤال وياريت تقولي لي ايه الافضل اعمل ماسك بتاع الرؤوس السوداء ولا اجيب غسول نيتروجينا او اي ماركه تانيه ولو الغسول الافضل ياريت تقولي لي ايه احسن نوع.

============

رد بص وطل:
ممكن تعملي الاتنين، يعني بتستخدمي الغسول بشكل يومي والماسك بتعمليه مرة او مرتين كل أسبوع، وغسول نيتروجينا كويس جداً.

انا بشرتى دهنية وسمراء من كثرة التعرض للشمس ومحتاج ماسك قوى لتفتيح البشرة.

============

رد بص وطل:
ده ماسك كويس ومناسب للبشرة الدهنية وبيعمل على تفتيح البشرة وهو عبار عن لوز مطحون + بياض بيضة + نصف ليمونة.

الطريقة:
اخلطي اللوز المطحون مع بياض البيضة مع نصف الليمونة حتى تتجانس مع بعضها البعض، وحطيه على وجهك لمدة 20 دقيقة وبعد كده اغسلي وشك بالماء الدافئ وبعدين بالماء البارد.

جميل جدا ومكوناته بسيطه جدا

بصراحه الوصفات تحفه جامده جدا ربنا يزيدك تالقا كمان وكمان وتجيبلنا كل حاجه حلوه مرررررررررررررررررررررررررسى

انا شعرى بقى بينزل بطريقه غريبه بطوله بينزل كتير اوووى الايام دى وانا بجد خايفه وكمان هو مش تقيل اووى اعمل ايه نفسى فى وصفه تخليه مينزلش ويطول ويتقل شويه.

=========

رد بص وطل:
صديقتي العزيزة في أسباب كتير تانية ممكن أنها تكون السبب في تساقط الشعر زي مثلا نقص الفيتامينات، حدوث اضطربات في هرمونات الجسم نتيجة التعرض للضغط العصبي أو أثناء الدورة الشهرية، أو تناول بعض الأدوية التي تؤثر على على هرمونات الجسم، أو اتباع ريجيم قاسي مما يؤثر على تغذية الجسم بصفة عامة والشعر بصفة خاصة، أو الإصابة ببعض الأمراض زي أمراض الغدة الدرقية، أو استخدام السيشوار أو المكواة بكثرة، وكمان تسريح الشعر بطريقة خاطئة واستخدام أنواع من صبغات الشعر المصنوعة من مواد كيمائية، وعلشان تتجنبي مشكلة تساقط الشعر لازم تتجنبي كل الاسباب اللي قولنا عليها، ودي كمان وصفة كويسة لعلاج مشكلة تساقط الشعر والوصفة بتتكون من بيضة واحدة + معلقة عسل كبيرة + زيت زيتون + زيت جوز هند + زيت صبار + ريحان مجفف ( ممكن تجيبيه من عند العطار ) + معلقة كبيرة مايونيز (و المايونيز على فكرة مفيد أوي لعلاج جفاف الشعر )، وبتخلطي المكونات دي كلها مع بعض وتحطيها على شعرك وهو ناشف وتسيبيها على شعرك لمدة ساعتين وبعد كده تغسلي شعرك بالشامبو، وممكن تعملي الوصفة دي مرتين في الأسبوع.

اول حاجه كل سنه وانتم طيبين وميرسى ليكم على المجهود ده وبليز انا بجد مخنوقة أوووى انا بشرتي فاتحة وكانت مش فيها حاجه خالص مره واحده بقى عندى حبوب كتيره فى قورتي بقى لها 4 شهور مش راضيه تروح وكترت البثور السوداء فى وشى عند خدودى ودقنى وجمب مناخيرى ومليانه دهون وبجرب اعصرها بتطلع دهون كتيرة وشى كله كده بجد تعبت وسورى طولت عليكم.

=============

رد بص وطل:
أهلاً بيكي صديقتنا العزيزة وكل سنة وإنتي بصحة وخير، وبالنسبة لسؤالك عن مشكلة الحبوب فنصيحتي ليكي إنك تستشيري دكتور جلدية علشان يعرف إيه سبب ظهور الحبوب على بشرتك ويديكي العلاج المناسب على حسب طبيعة الحبوب، أما بالنسبة لمشكلة البثور السوداء فده ماسك كويس جداً ممكن تجربيه وكل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة، وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر، بس حاولي تبعدي عن المناطق اللي عليها الحبوب.

شكرا عالوصفات الحلوه دى هجربها واقولكوا

فى أنتظار المزيد كل عام وأنتم بخير وجزاكم الله خيرا

ماسك رائعه وفى انتظار مجموعه جديده من النصائح والوصفات المميزه

thanks alot

ممكن ماسك للرؤوس السوداء أنا عندى رؤوس سوداء في قورتى وفي خدودى جنب المناخير انا مش عارفه ومش عايزين يروحوا,اعمل معاهم ايه انا زهقت؟

===========

رد بص وطل:
ده ماسك كويس للتخلص من مشكلة الرؤوس السوداء كل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.