جمالك بالألوان مع جيلان.. ربطة طرحتك بإيشارب واحد

ممكن لو تكرمتى توصفي لى ماسك لأزاله الرؤوس السوداء وكمان ماسك لتفتيح المناطق الداكنه بالجسم وكمان عندى مشكله ضوافرى نموها بطىء جداً ولما بتطول بيكون شكلها مش لذيذ ممكن تقولي لى على وصفه أو علاج وعندى حبوب صغيرة أوى فى قورتى مش بتروح خالص هل دى ملهاش علاج ولا إيه علماً بأن وأنا صغيرة كان في حبوب بس كتيره أوى وشكلها مش حلو كانت بتظهر فى دراعى من فوق بس الحمد لله بفضله راحت جزاكى الله خيرا .

===================
رد بص وطل :
صديقتى العزيزة بالنسبه للرؤوس السودة فا أهم حاجه إنك تهتمى بنظافه بشرتك وده ماسك كويس للتخلص من مشكلة الرؤوس السوداء كل اللي عليك إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة وقبل ما تشيليه حاولي تضغطي برفق على بشرتك باستخدام قطنة أو منديل، وبعد كده إفركي بشرتك كويس، وبعدين إغسلي وشك بميه فاترة، وبالنسبه لمشكله الأظافر فإنتى لازم تهتمى بنوعيه أكلك عشان تحفظى على صحه أظافرك وممكن تدهني أظافرك وكل الجلد المحيط بها بعصير الليمون 3 مرات في اليوم لمدة عشرة أيام بس خدي بالك إنك تغسلي إيديك قبل وضع الليمون أما بالنسبه لمشكله الحبوب فا أهم حاجه إنك تهتمى بنظافه بشرتك، وكمان ماتلعبيش فى الحبوب ومن الأفضل إنك تستشيرى دكتور جلديه متخصص عشان يديكى علاج مناسب .

أنا نفسى أنيم البندانه على قورتى بس بيكون شكلها وحش أوى لازم أوقفها حوالى 2سم كده مع إن قورتى صغيره ووشى مدور نفسى أنيمها أو أعمل حاجه مختلفه ممكن تساعدينى جزاك الله خيرا.

==================
رد بص وطل :
صديقتى العزيزة إنتى ممكن تعملى ربطات مختلفه وممكن تعملى البندانا كروس وتابعينا وإن شاء الله حتلاقى لفات طرح مختلفه ومناسبه .

السلام عليكم أختى عندها 20 سنه وبشرتها دهنيه وعندها رؤوس سوداء كتيره وأستخدمت أدويه بس ماجابتش نتيجه ودلوقتى بتستخدم مقشر كلين أند كلير مبيجبش نتيجه يااريت تقولى لى على وصفه أو مقشر كويس للتخلص من هذه الرؤوس لأنى زهقت .

===================
رد بص وطل :
صديقتى العزيزة بصى البشرة الدهنيه بتكون محتاجه إنها تهتم بنظافه بشرتها وتستخدم غسول مناسب للبشرة الدهنيه وعلى فكرة في حاجة حلوة أوي ممكن تعملها وهي إنها تغسل وشها كل يوم الصبح بميه ورد لاْنها مفيدة جدا وبتخفي أى إفرازات دهنية ممكن إنها تظهر على البشرة، وده ماسك كويس للتخلص من مشكلة الرؤوس السوداء ومكوناته بسيطه جداً كل اللي عليها إنها تحط شوية خميرة على ردة وتعجنهم بماء ورد أو عسل وبعد ما تعمل حمام بخار لبشرتها تحط الخليط على البشرة وتسيبيه 20 دقيقة وقبل ما تشيله تحاول تضغط برفق على البشرة باستخدام قطنة أو منديل، وبعد كده تفرك بشرتها كويس، وبعدين تغسل وشها بميه فاترة.

جزاك الله كل خير على مساعدتك لينا والله حبيتك عندى لكى سؤال بصراحه مشكله مضيقانى موت أنا عندى 21 سنه حاسه إنى كل ما بكبر لون بشرتى بتغمق مش عارفه ليه هل ده من الشمس ده حتى فتره الاجازه بشرتى مبتفتحش بجد مضايقه أوى جربت ماسكات كتير بس ووشى بيلتهب بسببها وكمان شعرى حتى لو أهتميت بيه أوصفي لى أى طريقه سهله لانى زهقت أوى شكرا جزاكى الله خيرا.

==========

رد بص وطل:
صديقتي العزيزة بصي لازم تهتمي ببشرتك وكمان لازم تستخدمي صن بلوك بمعامل حماية قوي قبل ماتتعرضي للشمس وفي ماسكات طبيعيه ممكن تعمليها واهمها ماسك الزبادي بالليمون. أما بالنسبه لمشكله شعرك فلازم إنك تهتمى بيه وتعملى حمام كريم مرتين فى الأسبوع ودى أفضل الأنواع اللى ممكن تستخدميها (بوناويل،لوريال،دوف) وكمان لازم تقصى أطراف شعرك كل فترة.

السلام عليكم ياجيلان حبيبة قلبى إنتى فهمتينى غلط لما قولتلك وبعتلك إنى كنت عاوزاكي تقولي لى أعمل إيه أنا كل لما بعمل الطرحة مش بتطلع منفوشة خالص وبحط تطرحتين بحس إنها كاتمة على نفسى كدة ومفرودة على قولى لى أعمل إيه بحيث أخليها منفوشة وطريقتها إزاى ياريت تردى علي وتساعدينى أنا أقصد إنها تبقى منفوشة من قدام من عند الرقبة مش من ورا الطرحة اللى هى العادية مش الاسبنيش ياريت تفدينى وشكرا.

===================
رد بص وطل :
صديقتى العزيزة بصى عشان تخلى الطرحه منفوشه من قدام إنتى مممكن تلفى جزء منها على رقبتك وكمان نوعيه الأيشارب بتفرق عشان كل لما كانت قماشه الإيشارب تقيله حتساعدك أكتر إنك تعملى النفشه دى، بس خلى بالك إن الشكل ده مش بيكون مناسب على كل الناس .

هاي ياجيلان إزيك وحشتيني كتير لو سمحتي ياجيلان أنا عندي أثار حبوب في دقني ومضيقاني قوي فممكن تقولي لي علي وصفة لازالة أثار الحبوب دي وعندي بردو أثار حبوب جامده في بطني فممكن تقولي لي علي ماسك أو أي حاجة لأزالتها وفي حاجة تانيه أنا سمعت إن بعد إزالة الشعر في المنطقة الحساسة لو غسلنا المنطقة بالميه بعدها علي طول بيسمرها يا تري الكلام ده صح ولا غلط ولو فعلا بيسمرها قولي لي أعمل إيه .

====================
رد بص وطل :
صديقتى العزيزة دي وصفة كويسة جداً لازالة آثار الحبوب الطريقة: تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، إفرديها على وشك ومنطقه الدقن وسيبى الماسك لمدة عشرين دقيقة وبعدها إشطفي وشك بميه دافيه، والماسك ده بينظف البشرة ويفتح لونها ويضفي عليها نضارة ويخفي أى أثر للحبوب الموجودة، وأنصحك بالماسك مرة في الأسبوع، أما بالنسبه للحبوب اللى فى بطنك فامن الأفضل إنك تستشيرى دكتور جلديه متخصص عشان تعرفى إيه سبب الحبوب دى وكمان عشان يديكى علاج مناسب، ومن الأفضل إنك ماتستخدميش الميه بعد إزاله الشعر من المنطقه الحساسه .

هاى جيلان أنا بجد مبسوطة من الحاجات الى بتقدميها لنا أنا عندى 14 سنة ومش طويلة أوى ولا قصيرة أوى وقمحاوية عاوزة أعرف إيه الالوان اللى تليق عليه وياريت تقولي لى على كريم تفتيح كويس وميرسى ليكى يا قمر.

===================
رد بص وطل :
صديقتى العزيزة بصى الألوان دى بتكون مناسبه مع البشرة القمحاويه الذهبي‏،‏ الأحمر الداكن‏،‏ البرتقالي والأخضر الغامق‏،‏ والتركواز والفوشيا‏ وبالنسبه للون الأسود فهو بيكون مناسب للبشرة السمرة بس المهم هو إنك تختارى نوعيه القماش المناسب زى التول والشيفون والحرير وتدخلي معاه ألوان تفتحه، أما بالنسبه للكريمات التفتيح فمن الأفضل إنك تستخدمى ماسكات طبيعيه زى الزبادى والليمون
الطريقة: حطى نقطة أو اثنتان من عصير الليمون على الزبادي.
وحطى الخليط على وشك لمدة ساعتين لحد ما ينشف الماسك وبعد كده إشطفي وشك بالميه ولو عايزة تستخدمى كريمات تفتيح يبقى من الأفضل إنك تستشيرى دكتور جلديه.

السلام عليكم أنا عندى مشكلة كبيرة جدا فرحى قرب أوى وعندى مشاكل كتيرة بشرتى من الشمس أغمقت جدا والمنطقة الحساسة مش لون جسمى أنا نفسى فى نوع كريم يكون كويس ولما أبطلة مش يرجع السواد تانى أو مجموعة زيت أدهنها بالليل لأنى بشتغل وعندى مشكلة تحت الابط من نزع الشعر بقى فيها حبوب تحت الجلد مش بتروح خالص وعاوزة حاجة تفتح الكوع والركب وعندى مشكلة فوق كعب رجلى للأسف من الشوز عملت لى بقعة سودة مش بتروح نهائى أرجوكم ردوا عليّ أنا أسفة طولت عليكم.

============

رد بص وطل:
صديقتى العزيزة ألف مبروك مقدماً، وبالنسبه لسؤالك إنتى لازم قبل ماتتعرضى للشمس تحطى صن بلوك عشان تحافظى على بشرتك وكمان ممكن تعملى ماسكات طبيعيه عشان تفتحى بشرتك والماسك ده كويس جداً ومكوناته:المكونات: زبادي+ ليمون.
الطريقة:حطى نقطة أو اثنتان من عصير الليمون على الزبادي.
وحطى الماسك ده على وشك لمدة ساعتين لحد ما ينشف الماسك وبعد كده إشطفي وشك بالميه، أما بالنسبه لتفتيح المنطقه الحساسه فأهم حاجه إنك تستخدمى ملابس قطنيه وكمان ممكن تعملى الماسك ده ومكونات: زيت زيتون+ زيت لوز+ دقيق خشن (دقيق البسيسة)
الطريقة:إخلطي كل المكونات دي مع بعضها وافركي بها المناطقه دي، وعلشان تشعري بالنتيجة ممكن تعملي الوصفة دي 3 مرات في الأسبوع، أما بالنسبه لمشكله وجود الحبوب تحت الجلد فلازم تستشيري دكتور أمراض جلدية أما بالنسبه لتفتيح الكوع والركبه فدي طريقة سهلة أوي ممكن تعمليها عشان تتخلصي من الغمقان ده وهي إنك تدهني المنطقة الغامقة بزيت زيتون وبعد كده تدعكيها كويس بنصف ليمونة مغموسة في ملح ناعم وممكن كمان تعملى الطريقه دى فى البقعه اللى فوق كعب رجلك، وفيه كمان كريمات في الصيدلية لعلاج البقع دي بس لازم الدكتور هو اللي يقول لك عليها.

السلام عليكم كل سنة وانتي طيبة يا جيلان حبيبة قلبى كنت عاوزاكي تقولي لى اعمل اية انا كل لما بعمل الطرحة مش بتطلع منفوشة خالص وبحط طرحتين بحس انها كاتمة على نفسى كدة ومفرودة على صدرى ياريت تقولي لى اعمل ايه بحيث اخليها منفوشة وطريقتها ازاى ياريت تردى عليّ وتساعدينى وشكرااااا.

============

رد بص وطل:
ممكن تلبسي توكة كبيرة تحت الطرحة أو تلفي طرحة على شعرك من ورا وبعد كده تلبسي الطرحة.

ميرسى يا جيلان يا قمر على اللفات دى انا بس يا قمر كنت عاوزاكى فى مشكلة: انا شعرى ناعم جدا جدا بس المشكله انه هايش اوى وانا بستعمل شامبو بانتين وزيت فاتيكا ياريت تقولي لى ايه الحل لان بجد الموضوع ده تاعبنى.

=============

رد بص وطل:
ده ماسك كويس جداً لعلاج هيشان الشعر وكل اللي عليكي إنك تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو والبلسم المناسبين لنوع شعرك.

السلام عليكم جيلان.. معلش انا عايزة اعرف ازاى اهتم ببشرتى على العلم انها مختلطة؟؟ وعايزة اعرف مفيش نوع صابون كويس استخدمه لبشرتى؟ وهل نوع الصابون ده مفيهوش اى مواد تعزل المية عن البشرة علشان مسألة الوضوء زى ما قولتك قبل كده؟؟ فى حاجة كمان ازاى اهتم بشعرى على العلم انه خفيف جدا وكمان من النوع اللى بيهيش فعايزة اعرف استخدم زيت ايه او كريم ايه؟ وازاى اعمل حمام الزيت او الكريم؟؟ وهل بيتم عمل حمام الزيت او الكريم بشكل يومي ولا ايه النظام؟؟؟؟

===========

رد بص وطل:
طيب تابعينا لإن قريب جداً هيكون عندنا على قمر 14 مفاجآت جامدة جداً لكل بنات قمر 14 بخصوص العناية بالبشرة والشعر فانتظرينا، وبالنسبة لحمام الزيت أو الكريم فإنتي ممكن تعمليها مرة كل اسبوع، ودي طريقة عمل حمام الكريم وهي إنك تغسلي شعرك كويس أوي بالشامبو المناسب لنوع شعرك وبعد كده توزعي الكريم على شعرك بطريقة متساوية وبكميات كبيرة وتدلكي فروة رأسك بايديكي وبعد كده تغطي شعرك ببونيه للشعر ويكون أحسن كمان لو حطيتي فوطة مبللة بماء ساخن على البونيه عشان الحرارة بتفتح مسام فروة الرأس وتخليها تمتص أكبر كمية من حمام الكريم وتسيبي حمام الكريم على شعرك من 20 لـ 30 دقيقة أو على حسب المدة اللي مكتوبة على علبة الكريم اللي بتستخدميه وبعد كده تشطفي شعرك كويس، وتنشفيه كويس بفوطة ناشفة وإنتي لسه في الحمام لإنك لو عرضتي شعرك لهواء بارد بعد حمام الكريم ممكن يضره، أما بالنسبة لحمام الزيت فدي طريقته وهي إنك تدلكي فروة الرأس بالأصابع قبل ما تحطي الزيت، وبعد كده تلفي فوطة مبلولة على رأسك، وبعد كده تسخني الزيت شوية على النار، وتبدأي توزعي الزيت على شعرك بأطراف أصابعك، وتسيبي الزيت على شعرك لمدة ساعتين أو ثلاثة وبعدين تغسليه بالشامبو وتنشفيه كويس اوي.

ازيك يا جى جى كل سنة وانتى طيبة انا عندى مشكلة شعرى خفيف جدا وبجد زهقت منه خالص استعملت حاجات كتيير روحت لدكاترة وكدة وبرضه مفيش نتيجة انا بستعمل شامبو نيتشرز بالثوم وبستعمل زيت كومبليت الدكتور كان كاتبهولى وبستعملة كل يوم بحط زيت ولازم البس بونية وانا نايمة عشان الزيت بيبقع وكنت عايزة اسأل على وصفة الجرجير هو انا هستعمله كل يوم زى الزيت كدة ولا استعمله ازاى ياريت تفهمينى وبالنسبة للكريم باراشوت ده حلو ولا ايه رأيك فية معلش طولت عليكي.

==============

رد بص وطل:
وصفة الجرجير مفيدة جداً للناس اللي شعرها ضعيف وبيتساقط، وكل اللي عليكي إنك تضربيه في الخلاط أو في الكبة وتاخدي العصارة بتاعته وتدلكي بها فروة راسك كويس وتسيبيه من غير ما تغسليه وبتكرري الموضوع ده كل يوم من غير ما تغسلي شعرك وبتغسلي شعرك مرتين أو ثلاثة في الاسبوع، وممكن تستخدمي حمام كريم لوريال، وبالنسبة لكريم باراشوت فهو كويس.

hiiii;jeje ana mabsota gedan mn mosharkatk wrdodk elgamila ana 3awza as2alk 3an eeh aktr 7aga monasba lfostan soiree fedi hoa simple awi kolo satain albs tar7a lonha eeh wkman elmake up kolo haikon eeh wa3ml dawafry frenche maniceer walla eeh el27san wel2accesory's bardo sa3deeny ana twly 170 wgesmy motanask wkman weshy mn elnoo3 albaidawy;;;;;; help me please

============

رد بص وطل:
ممكن تلبسي مع الفستان ده طرح بألوان كتيرة يعني ممكن تدخلي الفضي مع الموف أو البينك أو الازرق الزهري، وبالنسبة للإكسسوارات فإنتي ممكن تلبسي خاتم فيه فصوص ألماظ وممكن تلبسي عقد طويل أو قصير على حسب شكل الفستان، وممكن تعملي المانيكير فرينش هيكون مناسب أوي، وبالنسبة للميك اب فهيكون على حسب الألوان اللي هتدخليها في الطرح.

اعرف منين ان الكيراتين اصلى.

==============

رد بص وطل:
الكيراتين الاصلي هو الكيراتين البرازيلي ولازم يكون حاصل على شهادة FDA ولازم تتأكدي إن نسبة الفورمالين فيه مش أكتر من 0.2%

انا عندى 21 سنة وشي ماكنش بيظهر فيه حبوب خالص وكان صافي بس دلوقتي بدأ يظهر فيه حبوب زي البقع كده وكمان المنطقة اللي حول فمي اغمق من بقية وشي مع اني بيضاء فى اي كريمات او ماسكات؟

============

رد بص وطل:
لازم تهتمي بنظافة بشرتك وتستخدمي غسول مناسب مع طبيعة بشرتك، وبلاش تلعبي في الحبوب دي علشان ماتعلمش، ويا ريت لو تستشيري دكتور أمراض جلدية علشان يقول كل ايه سبب ظهور الحبوب دي ويديكي العلاج المناسب لها، وبالنسبة لغمقان المنطقة حول الفم فده ماسك كويس جداً ممكن تجربيه وهو عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.

كل سنه وأنتي طيبة يا جيلان ممكن أطلب منك طلب ممكن أيميلك عالياهوو بعد أذنك عشان لما أتزنق أعرف أكلمك بليييييز.

===========

رد بص وطل:
ممكن تكلميني على رقم التليفون ده وهو 0123418020

السلام عليكم كنت عايزة اعرف ماسكات لتصفية البشرة وتفتيحها وكمان ماسكات لازالة اثار الحبوب من الوجه وبجد صفحتك جميله ومفيدة جداا لكل البنات جزاكى الله عنا خيرا.

=============

رد بص وطل:
ميرسي ليكي يا نوجا ويا ريت تتابعينا دايماً، وبالنسبة لأثار الحبوب فده ماسك كويس لإزالة الآثار دي وكل اللي عليكي إنك تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، وكمان ماسكات الزبادي بالخيار أو بالليمون او بالعسل مفيدة جداً لتفتيح وصفاء ونعومة البشرة، ويا ريت تتابعينا لإن قريب جداً هيكون عندنا مفاجآت كتيرة لكل بنات قمر 14.

جيلان بصى كنت عاوزه اسألك على حاجه كنت سألت عن الكيراتين لاقيت فيه أنواع كتير من البرازيلي يعنى واحد نسبة الفورمالين فيه 0.2% وفيه 1% و 2% وفيه مافيهوش فورمالين خالص كنت عاوزه اعرف منك ايه احسن ومش يبوظ شعرى ويعالجه ويفرده في نفس الوقت؟؟ ومعلش لو طولت عليكى.

==============

رد بص وطل:
يفضل إنك تستخدمي الكيراتين اللي مفيهوش أي نسبة من الفورمالين وده بيستخدم لعلاج الشعر فقط مش للفرد لكن نتيجته كويسة، أما لو عايزة علاج وفرد فنسبة الفورمالين في المنتج اللي هتستخدميه مش لازم تزيد عن 0.2%.

أهلا جيلان أنا مبسوطة جدا من الحجات اللى بتعمليها وكنت عايزة اسألك أنا عندى 12 سنة وشعرى وأنا صغيرة ناعم جدا بس دلوقتى خشن مع إنى برتدى حجاب من 3 سنين تقريبا ومش عارفة أعمل إيه ياريت تقولي لى على وصفة طبيعية لتنعيم الشعر من غير متكون مكلفة و مكوناتها تكون موجودة فى البيت واسفة للتطويل عليكى.

=====================
رد بص وطل :
صديقتى العزيزة سمر، بصى إنتى لازم تهتمى بشعرك وتعملى حمام كريم مرتيتين فى الأسبوع ودى أفضل الأنواع اللى ممكن تستخدميها(بوناويل،لوريال ،دوف) ودى وصفه طبيعيه ممكن تعمليها وهى بتساعد على تنعيم الشعر اخلطي مقادير متساوية من (الزبادي ،العسل، زيت الزيتون )وحطيها علي شعرك كحمام زيت وممكن تعملى الوصفه دى مرتين فى الأسبوع .

ازيك جي جي كل سنة وانتى طيبة انا عندى مشكلة هى شعرى خفيف جدا وبيقع من الجدر واستعملت حاجات كتيير جدا انا حاليا بستعمل زيت كومبليت من عيد الاضحى وحاسه انه مافيش نتيجة انا بعمل حمام كريم براديس مرتين فى الاسبوع عايزة اعرف وصفة الجرجير دي هنستعملها زى الزيت كدة ولا اية انا الزيت ده بستعمله كل يوم انا بلبس بونية وانا نايمة عشان بيبقع المخدة بجد زهقت اوي من شعري ده انا عايزة تفهميني ازاي استعمل وصفة الجرجير ومعلش طولت عليكي.

============

رد بص وطل:
وصفة الجرجير مفيدة جداً للناس اللي شعرها ضعيف وبيتساقط، وكل اللي عليكي إنك تضربيها في الخلاط أو في الكبة وتاخدي العصارة بتاعتها وتدلكي بها فروة راسك كويس وتسيبيه من غير ما تغسليه وبتكرري الموضوع ده كل يوم من غير ما تغسلي شعرك وبتغسلي شعرك مرتين أو ثلاثة في الاسبوع، وممكن تستخدمي حمام كريم لوريال.

واو بجد إنت رائعة وردودك على البنات جامده جدا وأنا بموت فيكى يا جيلان .

هاى جيلان ممكن أحط صن بلوك على وشى وهو فيه حبوب؟ والحبوب دى بتطلع من الحر فى الصيف وميرسى ليكى .

===================
رد بص وطل :
صديقتى العزيزة ممكن إنك تستخدمى صن بلوك للبشرة الدهنيه ومن الأفضل إنك تستشيرى دكتور جلديه.

السلام عليكم ورحمة الله وبركاته ازيك يا جيلان انتى بجد انسانة جميلة واحلى حاجة فيكى انك بتساعدى غيرك ربنا يوفقك يارب وكل سنة وانتى طيبة ممكن تساعدينى فى مشكلتى000000 أنا فى الصيف بتطلع حبوب فى وشى من الحر فممكن تقولي لى على ماسك يمنع ظهور الحبوب؟ وعايزاكى تقولي لى على ماسك تفتيح بس ميكونش فيه ليمون عشان الحبوب بتلتهب وميرسي ليكي.

==========

رد بص وطل:
ميرسي ليكي يا نورهان على ذوقك، وبالنسبة لسؤالك بخصوص الحبوب فأهم حاجة علشان الحبوب ما تظهرش إنك تهتمي جداً بنظافة بشرتك وتستخدمي غسول مناسب مع نوع بشرتك وبلاش تستخدمي أدوات حد تاني أو حد يستخدم أدواتك الشخصية.

انا اكتشفت الموقع ده بالصدفه وبجد احلي صدفه لاني استفدت منه كتير بس عندي كام سؤال وياريت تجاوبيني عليهم انا شعري كان ناعم لكن مع الحجاب والجو بقى ناشف اوي ومتقصف من تحت بطريقه فظيع وهايش لانه تقيل اوي وكنت سمعت عن الثوم انه حلو للشعر بيطوله وبيخليه جميل كنت عايزه منك وصفه وعايزه اتاكد اذا كان الثوم هيعالج لي الجفاف والتقصف والخشونة دي ولا لأ وكنت كمان عايزه منك وصفه للمناطق السوداء زي الكوع والركبه وكده ومعلش اسفه اني طولت عليكي بس بجد أنا محتاجة مساعدتك قوي وشكرا يا قمراية وكل سنة وإنتي طيبة.

==========

رد بص وطل:
أهلاً بيكي يا راني صديقة عزيزة جداً على موقع بص وطل، ونتمنى إنك تتابعينا دايماً وبالنسبة لسؤالك عن مشاكل شعرك فإحنا دايماً بننصح اي بنت محجبة علشان تحافظ على شعرها إنها لازم تلبس باندانا قطن تحت الحجاب لإن الخامات اللي بيصنع منها الايشاربات دلوقتي بتضر الشعر جداً، وكمان بلاش تغطي شعرك بالايشارب وهو مبلول لإن ده بيسبب جفاف الشعر وبيحرقه ويقصفه، وعلشان تعالجي التقصيف لازم تقصي شعرك مرة كل 40 يوم وبالنسبة للثوم فهو مفيد جداً للشعر، ودي وصفة كويسة جداً بالثوم وكل اللي عليكي إنك تجيبي راس ثوم وتقشريها وتفرميها ناعم جداً وبعد كده اخلطيها مع مجموعة من الزيوت زي زيت الزيتون وزيت جوز الهند وزيت الجرجير وزيت الصبار وزيت الخروع، وبتحطي الخليط ده على النار لمدة دقيقتين وبعد كده بتعملي به حمام زيت لشعرك، وبالنسبة للمناطق الغامقة للجسم فإنتي ممكن تعملي لها الماسك ده وهو عبارة عن زبادي + ترمس مطحون + عصير برتقال
الطريقة
اخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر.

كل سنة وإنتي طيبة ياقمر طبعاً مش عايزة كلام إن أي حاجة بتعمليها بتبقى جنان وتسلم إيدك بس ياريت والنبي تعملي لفة تحجيبة عادية بس تليق على واحدة أورتها عالية يعني شكل مثلث من قدام مثلاً .

===================
رد بص وطل :
صديقتى العزيزة تابعينا وإن شاء الله هتلاقى كل لفات الطرح اللى إنتى عايزاها .

ميرسى جدا على اللفات الحلوة دي

لو سمحتي يا جيجي انا سألتك قبل كده على ملح الحليب استعمله اد ايه؟ وكنتي قايلة مانستخدمهوش كتير ليه؟ وبالنسبة للجرجير ممكن اشيلة في إزازة ولا لازم اعمله كل مره طازة.. بليز ردي عليّ.

=============

رد بص وطل:
ملح الحليب كويس وبيستخدم كسنفرة لبشرة الوجه والجسم، وممكن تستخدميه مرة كل اسبوع، وبالنسبة للجرجير فإنتي ممكن تجيبي جرجير طازة جداً وتحفظيه في الثلاجة لمدة يومين أو ثلاثة.

هاى يا جيجى كل سنه وانتي طيبة يا قمر رمضان كريم.. ليا سؤال من فضلك ايه رأيك فى زيت اللوز هل ينفع كبديل عن زيت الزيتون انى ادهن بيه الهالات السودا قبل النوم واغسله الصبح ولا مضر؟ وميرسى ليكى يا قمر.

=============

رد بص وطل:
زيت اللوز مفيد جداً لعلاج الهالات السوداء.

شكرا يا جيجى على ردك عليّ بس عاوزة اسالك على حاجة انا بعمل وصفة للشعر بس عاوزاكى تقولي لى هى حلوة وبتعمل نتيجة ولا اية انا بعمل ثوم + عسل + زيت زيتون وبسيبه ربع ساعة وبعد كده بحطه على شعرى ساعتين انتى اية رايك فى الخلطة دى بس مش بقرب الثوم من الفروة العصارة بتاعته بس ياريت تجاوبى عليّ وشكرا ليكى يا قمر.

============

رد بص وطل:
الوصفة دي كويسة ومفيدة للشعر جداً.

السلام عليكم ورحمه الله وبركاته إزيك يا جيلان أولا أنا بحبك جدا وبتعجبنى لفات الطرح الى بتعمليها بس للاسف ما بقدرش أعملها لانى لابسه الاسدال وكنت عايزه أطلب منك وياريت تردى عليه بسرعه إنى كنت عايزه لفات طرح للاسدال لانى زهقت من اللفه التقليديه بتاعته الى هى من جوه ومن بره ارجوكى ساعدينى وشكرا كتير لان ده موقع ممتاز والسلام عليكم ورحمه الله وبركاته .

=====================
رد بص وطل :
صديقتى العزيزة تابعينا ,إن شاء الله هتلاقى لفات طرح مختلفه ومناسبه .

هاى جيلان كل سنه وإنتى طيبه بجد إنتى رائعه عايزه أعرف لفات طرح بتكون عاديه بس بشوف الطرحه مرفوعه لفوق قبه عايزه أعرف بتتعمل إزاى عشان بتكون شكلها حلو على بعض الناس .

===================
رد بص وطل :
صديقتى العزيزة تابعينا وهتلاقى اللفات اللى إنتى عايزاها أما بالنسبه للطرحه المرفوعه فإنتى بتربطى كذا إشارب من ورا عشان يعمل الشكل ده .

جزاكى الله كل خير أنا نفسى فى حاجه بسيطه جدا لأزاله الحبوب أنا وشى دهنى .

=====================
رد بص وطل :
صديقتى العزيزة منه، بصى إنتى لازم تهتمى بنظافه بشرتك وتستخدمى غسول مناسب للبشرة الدهنيه ودى أفضل الأنواع اللى ممكن تستخدميها ديور، نيتروجينا أو تستخدمي منتجات كلين أند كلير وعلى فكرة في حاجة حلوة أوي ممكن إنك تعمليها وهي إنك تغلسي وشك كل يوم الصبح بميه الورد لانها مفيد جدا وبتخفي أى افرازات دهنية ممكن أنها تظهر على البشرة وبالنسبه لمشكله الحبوب فامن الأفضل إنك تستشيرى دكتور جلديه عشان يديكى علاج مناسب .

جيلان انا بعت لك قبل كده وما ردتيش عليّ بخصوص ان بشرتى مختلطة فى النصف دهنية من جهة الانف والجبهة لكن الخدود جافة وخاصة بتبان جدا فى الشتا فأنا كنت عايزة اعرف اهتم بيها ازاى وكمان ايه نوع الصابون اللى اقدر استخدمه علشان اغسل وشى بيه قبل الوضوء وميكونش الصابون ده بيعزل المية عن البشرة لان الموضوع ده عامل لى مشكلة زى ما قولت لك قبل كده وفى حاجة كمان بخصوص شعرى وهى ان شعرى من النوع الخفيف وبيتساقط دايما وكمان هايش فأنا مش عارفة اهتم بيه ازاى وياترى ايه الافضل هل الزيت ام الكريم؟ يعنى الافضل استخدم حمام زيت ولا كريم؟ وازاى استخدمه؟ وازاى اتقل شعرى؟ وازاى اخليه ما يبقاش هايش بالشكل ده لانه بيبقى هايش من ادام كمان ومتقصف.

===============

رد بص وطل:
طيب تابعينا يا نونا لإن قريب جداً هيكون عندنا على قمر 14 مفاجآت جامدة جداً لكل بنات قمر 14 بخصوص العناية بالبشرة والشعر فانتظرينا.

هاى جيلان كل سنه وإنتى طيبة بجد إنتى عسولة أوى وأنا حبيتك وأول مرة أبعت على بص وطل أنا بتابع بس أنا مشكلة حياتى وعقدتى النفسية إنى نحيفة جدا طولى 160 ووزنى 42 مش عارفة أعمل فنفسى إيه شكلى صعب وسنى 20 سنة ياريت تقولي لى حل مع العلم إنى دايما مش ليه نفس أكل وعملت تحاليل عندى أنيميا والغدد عندى الحمد لله سليمة أنا بجد تعبانه من نفسى أوى يا ريت تقولي لى حل .

=====================
رد بص وطل :
صديقتى العزيزة بصى أهم حاجه إن مايكونش عندك مشكله فى الغدد، ومن الأفضل إنك تتابعى مع دكتور تغذيه وكمان ممكن تخدى فاتح شهيه بعد إستشارة الطبيب .

فين ده اللي طرحه واحده ماكلهم تحتهم باندانا ده غير البطانه اللي تحت والنبي تشوفي لنا فكره اخف من كده احنا هنمووت من الحر

هاي ياجيلان هل ممكن لما أعمل ماسك ممكن أحتفظ ببقيتة في التلاجة ولا لأ ؟

===================
رد بص وطل :
صديقتى العزيزة ممكن إنك تستخدمى الماسك وتحتفظى ببقيته فى الثلاجه.

السلام عليكم كل سنه وانتوا طيبين أنا عندى سؤال أنا شعرى متقصف وبيقع وبقى خفيف جدا وروحت لدكاتره كتير أخر واحد قالى إنه حاله نفسيه المهم أعرف كوافير قال لى إنه هيعمل لشعرى كيراتين بس أنا أعرف إن الكيراتين ب 5 ألاف وأقل حاجه ألف هو قالى إنه هيعملى الكيراتين ب 300 جنيه الكوافير ده يعرفنى وطالب منى حاجات اعملها له وتقريبا هو هايعملى الكيراتين بالسعر ده مجامله عشان الحاجات اللى أنا هعملها له بس فى كيراتين ب 300 جنيه يعنى ده يبقى كيراتين أصلى وأعمله ولايبقى أى حاجه ويبوظ شعرى أكتر ماهو بايظ شكرا .

======================
رد بص وطل :
صديقتى العزيزة بصى الكيراتين الأصلى مش بيقل سعرة عن ألف ونصف، فالازم إنك تتأكدى إن الكيراتين اللى الكوافير هيعملهولك أصلى .

هاى جيلان كل سنة وإنتى طيبة أنا عندى 16 سنة وشعرى كان حلو
أنا شعرى طويل وناعم بس دلوقتى بقى مقصف جدا وهايش رغم إنى قبل الحجاب كان أحسن من كدة أنا قولت بعد الحجاب هيكون أحسن عشان بعيد عن الشمس وكدة معلش أنا بس عايزة طريقة كويسة ترجع شعرى زى ما كان شكرا .

=====================
رد بص وطل :
صديقتى العزيزة أهلاَ بيكى وبالنسبه لسؤالك، لازم تهتمى بشعرك وتعملى حمام كريم مرتين فى الأسبوع على الأقل ودى أفضل الأنواع اللى ممكن تستخدميها (بوناويل،لوريال،دوف) ولازم تقصى أطراف شعرك كل فترة عشان مشكله التقصيف، وبالنسبة لمشكلة الشعر الهايش إنتى ممكن تعملى الوصفه دى وهى إنك تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين إعملي بيه حمام زيت لشعرك وبعد كده إغسلي شعرك بالشامبو والبلسم المناسبين لنوع شعرك، وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر .

السلام عليكم ألف شكر ياجيلان على ردك عليه بقولك أنا جبت ملح الحليب ومش عارفة أستخدمه كام مرة وليه إنتي كنتي قايلة مانستخدمهوش كتير وبلنسبة للجرجير ممكن أحطة في إزازة وأستعمل منه ولا لازم أعمل جديد كل يوم وألف شكر .

===================
رد بص وطل :
صديقتى العزيزة بصى ملح الحليب كويس بس هو مش بيستخدم كل يوم وممكن تستخدميه مرة فى الأسبوع، أما بالنسبه للجرجير ممكن إنك تحطيه فى إزازة وتستخدمى منه كل يوم .

شكرا على تعبك معانا وكل سنة وانتى طيبة واسرة بص وطل طيبين وانتم وحشتونى جدا

بجد القسم ده رائع بس أنا بطلب منك لو سمحتى أنا بحب الطرحه تبقى مغطيه الرقبه عشان أنا مش بلبس بديهات برقبه ياريت تجيبى ربطات حجاب بسيطه بس تغطى منطقة الرقبه وممكن نزود بندانا .

====================
رد بص وطل :
صديقتى العزيزة شكراً على ذوقك، وتابعينا وهتلاقى عدد عن لفات طرح مختلفه .

السلام عليكم ورحمة الله وبركاته إزيك يا جيلان أنا أول مرة اكتبلك بس ما شاء الله نصايحك ووصفاتك حلوة أوى وكمان مفيدة أنا عندى سؤال
أنا وشى دايما بهتان ولونه أصفر مع إنى بيضة ولون جسمى أبيض بس وشى دايما لونه قمحى ومابحسش فيه بنضارة عايزاكى تقولي لى ماسكات طبيعية غير الزبادى تنور وشى وتديه حيوية ونضارة خصوصا إنى مش عايزة احط ميك أب عندى كمان هالات سوده بتضايقنى أوى وبحطلها كريم بس مابيعملش حاجة أرجوكى ساعدينى .

========================
رد بص وطل :
صديقتى العزيزة وعليكم السلام، بصى عشان بشرتك تكون صحيه ونضرة لازم تهتمى بنوعيه أكلك زى الخضار والفاكهه ومنتجات الألبان وده ماسك حلو أوي ممكن تعمليه علشان تحافظي على نضارة بشرتك وهو بيتكون من خيارة ومعلقتين عسل نحل .
الطريقة: إضربي الخيارة في الخلاط وبعدين ضيفي عليها العسل، وإفردي الخليط ده على وشك، وسيبيه لمدة ربع ساعة وبعد كده إغسلي وشك بماء دافئ والماسك ده ممكن تعمليه مرة كل أسبوع وإن شاء الله هتحسي بنتيجة هايلة، أما بالنسبه لمشكله الهالات السوده فالازم تنامى كويس ودى وصفه طبيعيه ممكن تعمليها كل يوم باليل قبل ماتنامى، إنك تضعي شرائح الخيار بحيث تغطي العين والمنطقة الموجود فيها الهالات السوداء وحطى الشرائح لمدة 15 دقيقة كرري هذه العملية كل مساء.

هاي جيلان إزيك كنت عايزة أعرف وصفة الجرجير أعملها إزاي وإيه فوائدها لأني برضع وشعري بيقع جامد جدا ومش عارفة أعملة إيه وإيه وصفات تانية ممكن أعملها تغذي الشعر وكنت عاوزة اسألك كمان إيه أنسب طريقة للبس انا خسيت قوي بعد الولادة بس من تحت أرفع شوية من فوق فعايزة أعرف ألبس إزاي مبينش الديفو ده سواء كان في الخروج أو البيت لاني بحب أهتم بمظهري في البيت أوى وميرسي ليكي وكل سنة وإنتي طيبة يا قمر.

==========

رد بص وطل:
صديقتى العزيزة أهلاً بيكى وبالنسبه لوصفه الجرجير جيبي حزمة جرجير حطيها في الخلاط مع كوب ماء, وبعد كده حطى عصير الجرجير على راسك واحرصي إنه يلامس فروه راسك لان تاثيره يكون في انبات الشعر وتقويه البصيلات الضعيفه كرري العملية يومياً وبتغسلي شعرك مرتين او ثلاثة في الأسبوع وبتستمري على الوصفة دي لمدة 3 شهور وهتلاقي نتيجة هايلة أما بالنسبه للملابس المناسبه إنتى ممكن تلبسى جيبات أو بنطلونات واسعه أو تونيكات طويلة وفضفاضة وفى البيت إنتى ممكن تلبسى باديهات على بنطلون قطني واسع أو عبايات شيك.

هاى ياجيلان أنا عندى مشاكل وياريت تساعدينى أنا عندى 20 سنة ومخطوبة وعايزة أقولك إن عندى شعر جسمى كتير وصدرى صغير أوى وبتكسف منه أوى قولي لى أعمل إيه ضرورى.

=============

رد بص وطل:
صديقتى العزيزة أولاً إنتى لازم تعملى تحليل هرمونات عشان تكونى واثقه إنك ماعندكيش مشكله صحيه، ودى وصفه طبيعيه ممكن تعمليها بتقلل من نمو الشعر استخدمي نبات السعد هتلاقيه عند العطار خدي 3 معالق من مسحوق النبات وضيفيه إلى 'لتر ماء' وحطيه على النار لغاية ما يغلي وسبيه منقوع لمدة ربع ساعة وحطيه على جسمك كغسول بعد إزالة الشعر لمدة 6 أيام متواصلة من كل شهر، أما بقى بالنسبة لمشكلتك التانية فإنتي ممكن تلجأي لعمليات التجميل ولكن لازم تتأكدي إنك تروحي لدكتور شاطر وموثوق فيه، وكمان فيه تمارين رياضية بتساعد على تكبير حجم الصدر ودي ممكن تسألي عنها مدربة رياضية متخصصة.

الاول كل سنه وانتى طيبه ياجيلان رمضان كريم عليكى بصى أنا عندى مشكله فى ضوافرى بتبئه مش قويه لو طولت مثلا ممكن تتكسر على طول والجلد اللى حواليها فى صوابعى مش مظبوط بيقشر على طول أعمل فيهم إيه؟ وبعدين عاوزه اسألك على حاجه تانيه كنت قريت على وصفه تغذى وتنعم للضوافر خلط بياض بيضة ومعلقة شاي جلسرين ومعلقة شاي عسل و1/2 معلقه شاي دقيق بيتخلطو وبيتحطو فى زجاجه وكل يوم بالليل أحط منه على ضوافرى هل ده فعلا بيغذى ولا ده كلام فاضى ؟ سورى لو طولت عليكى يا قمر ورمضان كريم مره تانيه .

===================
رد بص وطل :
صديقتى العزيزة مكونات الماسك دى كويسه وممكن تعمليها وكمان إستخدام الليمون وزيت الزيتون للأظافر مفيد جداً .

انا مبسوطه أوى بالقسم ده ومتشكره ليكى جدا على المعلومات الهايلة دى انا كنت عايزة أسأل على حاجه انا عملت حنة فرد على شعرى هى ريحتها قرنفل أوى بيقولوا مكوناتها طبيعيه انا مش عارفه بس هى كانت كويسه أوى وعايزة أعملها تانى بس خايفة انتى ايه رأيك يا ريت تجاوبينى وشكرا.

===============

رد بص وطل:
للأسف يا عبير حتى حنة الفرد على الرغم من إنها مادة طبيعية لكنها علشان تفرد الشعر بيدخل فيها مواد كيميائية كتيرة بتضر الشعر جداً، وعلشان كده يفضل إنك ما تعمليهاش تاني، واهتمي بشعرك عن طريق عمل حمامات الكريم والاهتمام بالتغذية الصحية السليمة والمتوازنة.

lw sam7ty ana ba7ot lamon lazalet el 3arak bs semet anoh bysawed howa fe3ln keda we lw keda moken asta3'dem eh 3'r el lamon bs tekon mn 7agat el tabe3ya we kman ana weshy bydawy eh lafat el tore7 aly tel2 3leh ...shokrn ya amr

=================

رد بص وطل:
المنطقة تحت الإبط بيكون الجلد فيها حساس جداً، وعلشان كده ممكن مايستحملش الليمون ويحصل التهابات، واحمرار وبعد كده يقلب بسواد، ولو عايزة حاجة طبيعية لتفتيح المنطقة تحت الابط ممكن تعملي الماسك ده وهو عبارة عن زيت زيتون + زيت لوز + دقيق خشن (دقيق البسيسة)

الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.
وبالنسبة للفات الطرح فكل اللفات اللي بنقدمها بتليق على اوش المدور والبيضاوي.

سلام عليكم.. ازيك يا جيجي بصي يا ستي انا اشتريت صن بلوك النهاردة درجه حمايته 80 تمام وماركته isis pharma تمام اولا انا مش عارفه الماركه دي كويسه ولا لا تانى حاجه فى الصيدليه الدكتورة قالت لى ان ده تبع بايوديرما الكلام ده صحيح والا لا.ثالث حاجه كان فى نفس النوع درجه حمايه 50 بس سعرة اغلى من اللى درجه حمايته 80 مش عارفه بردو ايه السبب فى كدة يعني كنت محتارة اختار اللى درجه حمايه 80 وسعرة اقل من اللى درجه حمايه 50 ... اخر حاجه ومعلش طولت عليكي ايه رايك فى غسول جونسون

=============

رد بص وطل:
الصن بلوك ماركة بايوديرم اسمه فوتوديرم وهو بيعتبر من أحسن أنواع الصن بلوك الموجودة، وبالنسبة لغسول جونسون فهو كويس بس انا بافضل أكتر غسول نيتروجينا أو دوف.