أهلاً بكل بنات "قمر 14"..
في الفترة اللي فاتت بعتتوا ليّ رسايل كتير بتطلبوا فيها إني أقدّم لكم في فقرة "جمالك بالألوان مع جيلان" حلقات خاصة بربطات الحجاب؛ علشان تعرفوا إزاي تغيّروا في استايل حجابكم..
وأنا وعدتكم إني هاعمل لكم مجموعة من الحلقات خاصة بالموضوع ده، علشان أشرح لكم فيها إزاي تقدروا تلفوا الطرحة بطرق مختلفة وجديدة وفي نفس الوقت سهلة وبسيطة، وتقدري تعمليها وإنتِ رايحة الجامعة أو الشغل أو حتى لو عندك مشوار أو مناسبة خاصة...
وإزاي كمان تعملي ربطة الطرحة اللي تليق مع شكل وشك ومع ملامحك، يعني لو وشك كبير أو صغير، ولو جبهتك عريضة أو صغيرة...
ربطة عملية للبنت الجامعية:
النهارده هاقدّم لكم ربطة جديدة وهي مناسبة لفترة الصبح؛ يعني لو كنتِ رايحة الجامعة أو لو كان عندك ميعاد الصبح أو وإنتِ رايحة الشغل..
ودلوقتي تعالوا نشوف خطواتها مع بعض:
1- بنبدأ بإننا نربط باندانا قطن بيضاء على ورا ونربط عليها باندانا كحلي.
2- بعد كده بنجيب إيشارب أبيض بسيط خالص وعليه ركامة من الطرف، وبنربطه على ورا، ونسيبه مهدل من ورا.
3- بعد كده بنجيب إيشارب مربع فيه ألوان زي التركواز والكحلي والأبيض، والألوان دي طبعاً بتدي حيوية وشياكة وخصوصاً مع الجينز، وبنتني الإيشارب بحيث يكون الجزء اللي جوه أقصر من اللي بره ونربطه على ورا بطريقة عادية خالص.
وبكده تبقى عملتي لنفسك ربطة جديدة ومختلفة وبخطوات بسيطة، والربطة دي على فكرة بتناسب أصحاب الوش المليان، وخصوصاً إن الهيكول العالي بيداري منطقة الخدود والذقن الممتلئة.
أما أصحاب الوش الرفيع ممكن يعملوا نفس اللفة دي، لكن ممكن يغيّروا في الربطة بإنهم يجيبوا الإيشارب المربع على جنب شوية علشان يدي لوشها امتلاء.
ربطة اسبانيش بطيخي × بيج:
النهارده هقدِّم لكم شرح لربطة اسبانيش هندخّل فيها اللون البطيخي مع البيج، والربطة دي بنعتمد فيها على فكرة الكروسات الكتير...
ودلوقتي تعالوا نشوف خطواتها مع بعض:
1- أول حاجة هنربط باندانا قطن باللون البطيخي، وبعد كده نجيب طرحة بيج ونربطها على ورا؛ بحيث إن يكون لها طرف قصير وطرف طويل، ونجيب الطرحة البطيخي ونربطها بنفس الطريقة؛ يعني ناحية قصيرة وناحية طويلة، لكن عكس الإيشارب البيج.
2- بعد كده نجيب الناحية الطويلة من الإيشارب البيج ونلفها على قدام، لكن بميل شوية، وندبسها، وبعد كده نجيب الطرف الطويل من الإيشارب البطيخي ونلفه عليها بميل، ولكن في الاتجاه العكسي، علشان يدينا في الآخر شكل الكروس.
3- بعد كده هنجيب الأطراف الباقية من الإيشاربين ونثبتهم من ورا بشكل منفوش شوية، وبكده الطرحة من ورا هيكون شكلها كأنها مقسومة نصفين نصف بيج ونصف بطيخي.
والربطة دي بتدي شكل أنيق وبسيط، وممكن تعمليها لنفسك بسهولة، والربطة دي بتليق جداً مع أصحاب الوش المليان؛ لأننا عاملين فيها كروسات كتير ودي بتعمل زي تمويه لكبر حجم الوش وبتداريه.
ربطة حجاب عادية بالأبيض والأسود:
بنات كتير وخصوصاً البنات اللي سنّهم صغيّر لما بييجوا يلفوا الطرحة بالطريقة العادية، بيدخلوا طرحتين مع بعض، وساعات بلاقي بنات بتدخل 3 أو 4 طرح مع بعض في نفس الوقت، وبيعملوهم بطريقة هايشة أوي وضخمة.
لكن أنا مش بافضّل إن البنت يبقى وشها داخل جوه الطرحة وباين صغيّر أوي، وملامحها مش باينة، والأحسن إننا ربطة الطرحة تبقى بسيطة وشيك في نفس الوقت.
ودلوقتي هنشوف مع بعض الخطوات بالتفصيل:
1- أول حاجة هنعملها إننا هنحط باندانا بيضاء وندخلها مع الهاي كول، وبعد كده هنلبس عليها باندانا سوداء، لكن بشكل مايل شوية علشان يدينا شكل الكروس.
2- بعد كده هنجيب إيشاربين كاروهات، لكن كل إيشارب الكاروه بتاعه مختلف عن التاني، وإحنا هنا استخدمنا إيشاربين علشان ندي اللفة كثافة، وبنثبتهم من قدام بدبوس.
3- وبعدين نلف الإيشارب الأول، ولكن وإحنا بنلفه هنقلبه على ضهره؛ لأنه بيتلبس على الوشين، وبعد كده نلف عليه الإيشارب التاني، وبكده يكون الشكل كإننا استخدمنا أكثر من 4 طرح في نفس الوقت، لكن في الحقيقة إحنا ما استخدمناش إلا إيشاربين بس.
والربطة دي بتليق على أصحاب الوش المليان؛ بسبب الكروس اللي إحنا عملناه.
أما بقى أصحاب الوش الطويل والرفيع، فممكن يعملوا نفس الربطة لكن تعمل الباندانا من قدام باستدارة عادية وبلاش تعمل الكروس.
وبالنسبة لـأصحاب الجبهة العريضة فيُفضّل إنهم ينزّلوا الباندانا على قدام علشان يداروا منطقة الجبهة دي شوية.
وأصحاب الجبهة الصغيرة ممكن يرجّعوا الباندانا على ورا شوية بحيث إنها تبقى قبل بداية الشعر على طول.
وبكده تكون خلصت حلقتنا النهارده، وأتمنّى إنها تكون عجبتكم ويا ريت تبعتوا تقولوا لي رأيكم إيه، وكمان يا ريت تجرّبوا الربطات اللي قدّمناها وتقولوا لي على النتيجة، وتقدروا تكلموني في أي وقت على رقم تليفون 0123418020
وفي النهاية أحب أشكر محل scarfobia للإيشاربات اللي شارك معانا في الحلقات بمجموعة الإيشاربات اللي ظهرت في الفيديوهات، ورقم تليفونه 0106101710
استنوني في الحلقات اللي جاية مع ربطات جديدة...
إلى اللقاء،،،
شكرا ليكى وربنا يكرمك وكل سنة
شكرا ليكى وربنا يكرمك وكل سنة وانتى طيبة هو فى حاجة بناكلها او نشربها الصبح بتدى للوجة نضارة زى مثلا معلقة عسل اسود او شرب ليمون فى حاجات كده وبعد اذنك عايزة لفات طرح سواريه بس بالتل وشكرا جزيلا ليكى وسلام عليكم.
==========
رد بص وطل:
كل سنة وإنتي بصحة وخير يا مدام نورة، ويا ريت تتابعينا وإن شاء الله هتلاقي كل اللي إنتي عايزاه قريب جداً على قمر 14، وبالنسبة للأكل فطبعاً العسل الاسود مفيد جداً للجسم بشكل عام وكمان الزبادي والفاكهة الطازة، وعصير المشمش من العصاير المفيدة جداً للبشرة.
السلام عليكم هاااى جيجى بجد
السلام عليكم هاااى جيجى بجد انا معجبة جدا بيكى وبكل المشتركين وبكل اللى بيساعدوا علشانا بالمجهود الكبيييير اووووووووووووى ده بليز ممكن تقولي لى اذا كان استخدام بودرة جونسون المعطرة/غير معطرة + ليمون لتفتيح الاماكن الداكنة فى الجسم صح او لا؟؟ وميرسى ليكى كتير.
==============
رد بص وطل:
ميرسي ليكي جداً يا ايمي على ذوقك وأتمنى إننا نفضل دايماً عند حسن ظنكم، وبالنسبة لتفتيح الأماكن الغامقة في الجسم فطبعاً الليمون مفيد جداً، ولو عايزة تستخدمي ماسك طبيعي ممكن تجربي الماسك ده وهو عبارة عن زبادي + ترمس مطحون + عصير برتقال
الطريقة
اخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر.
جيلان هو العدد الجاي لفات طرح
جيلان هو العدد الجاي لفات طرح ولا ميك اب احنا نفسنا في عدد عن الميك اب وهل هتاخدي اجازة في رمضان ولا هتستمري.
=============
رد بص وطل:
طيب تابعينا وإن شاء الله تلاقي كل اللي إنتي عايزاه على قمر 14، وإن شاء الله هنكمل أعدادنا بعد شهر رمضان الكريم.
لون فستانى فضى سواريه وجبت له
لون فستانى فضى سواريه وجبت له طرحة روز هل تنفع معاه واريد معرفة اللفة الاسبانى اللى تمشى معاه وهل الفضى والروز يمشى مع بعض وعلى فكرة انا وجهى صغير اريد الرد سريعا لانى الفرح بعد بكره.
==========
رد بص وطل:
الفضي والروز بيليقوا مع بعض، وبالنسبة للربطة الاسبانش فإنتي ممكن تعمليها بحيث إنها تكون منفوشة شوية وممكن تجيبيها على جنب علشان تديكي امتلاء لوشك.
هاى جى جى انا عندى مشكلة انا
هاى جى جى انا عندى مشكلة انا عندى فى ايدى غمقان من بعد ضوافرى بشوية بقع كدة غامقة وشكلها مش حلو خالص وحاسة ان ايدى مش ناعمة كدة ياريت تقولي لى حل للغمقان دة والنعومة وشكرااا ليكى جدااا.
===========
رد بص وطل:
ممكن تدهني ايدك كل يوم بخليط من الجلسرين والليمون لإنهم بينعموا الإيد جداً وكمان الليمون بيفتح البشرة، وممكن إنك تدعكي منطقة الأظافر بنصف ليمونة كل يوم علشان تقوي أظافرك وتفتحي المنطقة دي.
انا بجد عجبنى مجهودك جدا
انا بجد عجبنى مجهودك جدا ياجيجى وبجد انا فرحانه جدا بيكى.
هاي جوجو بجد انا معجبة بيكي
هاي جوجو بجد انا معجبة بيكي جدا ونفسي اكون عروسة خارجة من عندك في فرحي ان شاء الله بس سألت وعرفت ان الاسعار غالية اوي فياريت لو تعملي لمتابعينك في بص وطل ديسكونت اكيد هنفرح بيه جدا.
============
رد بص وطل:
ميرسي ليكي صديقتي العزيزة على اقتراحك الجميل واوعدك إني افكر فيه، لكن لازم تعرفي إن الأسعار دي بتكون بسبب إني بستخدم خامات كويسة جداً ومعروفة علشان تثبت معاكي طول مدة الفرح ويفضل شكلك حلو طول الفرح.
ميييييرسي كتييير للرد عليا
ميييييرسي كتييير للرد عليا كنت عايزة اسال سؤال كمان هو ينفع البس شراب فليه على البالرينا عشان يحميني شوية من الشمس
ولا مينفعش الشرابات دي مع البالرينا ولو ينفع ايه هو النوع الكويس اللى اجيبه.
==========
رد بص وطل:
طبعاً ممكن تلبسي شرابات فيليه على الباليرينا، بس تكون خفيفة، وفيه أنواع كتيرة كويسة ممكن تسألي عنها في المحلات.
هاي يا جي جي لو سمحتي ممكن
هاي يا جي جي لو سمحتي ممكن تقولي لي علي وصفة لتوحيد لون الجسم ولو سمحتي ممكن تقولي لي علي وصفة لتطويل الشعر وانا كنت سمعت عن نبات اسمه الاس بيطول الشعر فممكن تقولي لي ازاي استعمله.
===========
رد بص وطل:
الحمام المغربي بيساعد جداً على تفتيح الجسم وتوحيد لونه، وده كمان ماسك لسنفرة وتنعيم الجسم ممكن تعمليه وهو عبارة عن خليط من كميات متساوية من الليمون وزيت الزيتون وملح ناعم وسكر خشن، وبتدهني جسمك كله بالخليط ده وتسيبيه على جسمك لمدة نصف ساعة وإنتي في حمام البخار، وبعد كده افركي جسمك كويس أوي بالليفة وبعد كده اغسلي جسمك بالماء والصابون، وبالنسبة لتطويل الشعر فنبات الآس بيقال إنه فعلاً بيطول الشعر وممكن تجيبي زيت الآس من عند العطار وتعملي به حمام زيت لشعرك مرتين كل أسبوع.
ايه اجمل برفان ممكن
ايه اجمل برفان ممكن احطه.
=========
رد بص وطل:
فيه انواع وماركات كتيرة موجودة في السوق والاختيار بيرجع ليكي ولذوقك إنتي.
هاى جي جي ميرسي بجد اوى لردك
هاى جي جي ميرسي بجد اوى لردك عليّ فى سؤالى بس معلش بتعبك كنت عاوزة اعرف ماسك التفتيح مقاديره قد ايه بالظبط واعمله كام مره فى الاسبوع وكنت عاوزة استشيرك فى حاجه كمان انا بشرتى بتطلع حبوب اثناء البيريود ولو نفسيتى تعبانه والدكتور قالى انه نفسيه لما كشفت قبل جوازى والكل قال ايه لما الواحدة هتتجوز كل ده بيروح وطبعا كله كلام فاضى، المهم لما بيطلع بستخدم ليه كريم معين بس بحاول احافظ عليها فبستخدم غسول نيتروجينا لما انتى شكرتى فيه وكمان بستخدم لوريال كريم ليل ونهار وعين بس اللى هو تفتيح مجرد يظبط وشى ومش هكرره لان وشى مش متناسق اللون وبعد كده ابقى استخدم تجديد البشرة ليل ونهار وعين لانى بصراحة مكنتش بهتم بوشى ولا جسمي قد كده وشكرا ليكي ياجميل على كل نصايحك الحلوة.
===========
رد بص وطل:
مقادير ماسك التفتيح بتكون على حسب الكمية اللي إنتي محتاجاها، يعني بتحطي معلقة كبيرة من كل حاجة وبتزودي لو محتاجة لكمية أكبر، أما بالنسبة لمشكلة الحبوب فهي بتظهر لأسباب كتير، لكن أهم حاجة علشان تتجنبي ظهورها إنك تاكلي أكل صحي وتهتمي جداً بنظافة بشرتك وبلاش تلعبي في الحبوب أبداً علشان ماتنقليش العدوى لمكان تاني.
ازيك يا جيجى يا حبيبتى انا
ازيك يا جيجى يا حبيبتى انا عندى سؤال انا عندى بدى سواريه لونه بنى احط اي شادو لونه ايه عشان انا مش بحب اللون البنى فى الاي شادو.
==============
رد بص وطل:
ممكن تحطي آي شادو بيج مع ذهبي.
السلام عليكم انا بحبك فى الله
السلام عليكم انا بحبك فى الله وانتى فعلا انسانة محترمة جدا لانك بجد بتعطى رقم تليفونك لكل الناس وبتردى عليهم بنفسك وبتساعديهم شكرا جدا وجزاكى الله خيرا بعد اذنك عايزة اسم بودرة كويسة ويكون فيها فيتامين وتكون فاتحة وتكون اقل ضرر وتثبت على البشرة لان بشرتى دهنية وبعد اذنك اعرف السعر وكمان تكون متواجدة فى الصيدليات لانى انا من بور سعيد وطلب اخر صن بلوك للبشرة الدهنبة وسعرة بعد اذنك عشان اعرف اخنصر من مصروف البيت وشكرا ليكى جدا واسفة لو طولت عليكى سلام عليكم حفظك الله.
============
رد بص وطل:
شكراً ليكي جداً صديقتي العزيزة، واتمنى إني اكون فعلاً باقدر اساعدكم، وبالنسبة لأنواع البودرة الكويسة فدي أحسن الماركات "فلوريل" و"مادينا" و"كيرولان" و"ريمال" و"بورجوا" و"كريستيان ديور" ودول هتلاقيهم في الصيدليات الكبيرة اللي بتبيع مستحضرات التجميل وبالنسبة للأسعار فممكن تسألي عليهم في الصيدلية، أما بالنسبة للصن بلوك فماركة بايوديرم تعتبر من احسن الأنواع اللي موجودة.
انا عندى مشكلة كبيرة وعايزة
انا عندى مشكلة كبيرة وعايزة مساعدة منك يا جيلان وهى إن مينفعش انى اتوضأ وانا على بشرتى اى دهان يكون عازل او عازل للماء عن البشرة فأنا مثلا بحتاج انى احط زيت شعر على شعرى بس ده بيسبب لى مشكلة وهى انى مش عارفة هل ده ينفع وخاصة ان ممكن يكون الزيت بيعزل المية عن الشعر وكمان انا لما بدخل اتوضأ بقعد كتير اغسل ايدى ووشى بالمية والصابون خشية ان يكون الزيت جه على ايدى او وشى على العلم ان الصابون برده بيبوظ بشرتى وبيكون شكلها جاف ووحش وانا مش عارفة اعمل ايه؟؟ هل فى زيوت او كريمات ممكن ما تعزلش المية عن البشرة؟؟ ياريت الرد سريعاااااااا لانه مسبب لى مشكلة كبيرة.
=============
رد بص وطل:
صديقتنا العزيزة مفيش مشكلة إنك تتوضي عادي طالما إنك بتغسلي ايدك ووشك من آثار الدهون، ولو عايزة الإجابة الأكيدة يبقى ممكن تبعتي سؤالك على لينك "اسألوا المفتي" الموجود في بص وطل.
أنا وشي رفيع وعاوزاه يتخن
أنا وشي رفيع وعاوزاه يتخن اعمل ايه مع العلم ان جسمي كويس بس فيه مناطق تخينة ومناطق رفيعة.
===============
رد بص وطل:
اهتمي بشرب السوائل طول اليوم وكمان أكل الفاكهة مهم جداً لإنها بتدي للوش نضارة وصحة وبتساعد على إنه يكون شكله ممتليء من غير ما جسمك يتخن.
انا كان عندى مشكلة بالوجه وهى
انا كان عندى مشكلة بالوجه وهى مكان إزالة الشعر فى منطقة الشنب فى غمقان واضح فيها وكنت عاوزة حاجة تضيع الغمقان دة وكنت عاوزة دة بيحصل نتيجة اية ومستنية ردك وشكرا.
==============
رد بص وطل:
الغمقان ده غالباً بيكون بسبب جفاف البشرة والتعرض للشمس لفترات طويلة ونقص بعض الفيتامينات وكمان بيحصل نتيجة لبعض الالتهابات اللي بتحصل على البشرة واللي بتسبب احمرار البشرة وبعد كده بتغمق، وعلشان تفتحي الغمقان ده لازم تستخدمي واقي شمس قبل ما تتعرضي للشمس، وكمان تهتمي بترطيب وشك، وتغذيتها بإنك تاكلي خضار وفاكهة طازة كتير وتشربي مية وسوايل، وده ماسك كويس جداً ممكن تعمليه وهو عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع.
انا خطوبتى كمان 3 شهور ومش
انا خطوبتى كمان 3 شهور ومش عارفه اعمل ايه لبشرتى وكده ساعدينى يا جى جى عشان قلقانه جدا، اعمل ماسكات ولا ايه مع العلم ان بشرتى الحمد لله كويسة بس المشكلة انى اسمريت من المصيف وكده وشكرا جزيلا.
============
رد بص وطل:
أهلاً بيكي صديقتي العزيزة، وألف مبروك مقدماً، وبالنسبة لبشرتك فاهم حاجة في الفترة دي انك تهتمي بنظافتها وترطيبها وإنك تشربي مية وسوايل كتير وتاكلي فاكهة طازة كتير، وكمان حاولي تجنبي التعرض لآشعة الشمس القوية لفترات طويلة، كمان حاولي تقللي من الميك اب اللي بتحطيه، وبالنسبة لمشكلة الاسمرار فواظبي على عمل ماسك الزبادي بالليمون على الأقل مرتين كل أسبوع.
بجد بنات كتير اوي استفادت منك
بجد بنات كتير اوي استفادت منك بس كنت عايزة اسألك على ماركة لوس بودر وفاونديشن كويسين وسعرهم مناسب بنتعبك معانا معلش.
=============
رد بص وطل:
ممكن تستخدمي ماركات زي بورجوا وكيرولان ومادينا وكمان منتجات اوريفليم كويسة.
انا عايزة اعرف ايه ماسك
انا عايزة اعرف ايه ماسك الزبادي والليمون ده ونعمله يوميا ولا لا؟ مع العلم اني بشرتي مختلطة، دهنية من عند الأنف والدقن.
=============
رد بص وطل:
ماسك الزبادي والليمون ده ببساطة بتعمليه بإنك تخلطي معلقتين من الزبادي مع نقطتين من عصير الليمون، وتفرديه على بشرتك وتسيبيه لغاية ما ينشف على وشك وبعدين تغسلي وشك، وممكن تعمليه مرة أو مرتين كل أسبوع، وممكن إنك تحطي على وشك طبقة من الزبادي كل يوم بعد ما تتعرضي للشمس.
السلام عليكم ورحمة الله
السلام عليكم ورحمة الله وبركاته اهلا يا جيلان انا بعتز بيكى جدا امام اصدقائى وكان عندى سؤال انا عندى 13 سنة ووزنى 36 وطولى 156 ممكن تقولي لى أي وصفة اكلة او اى حاجة فاتحة للشهية وبليز متقوليش تابعى مع دكتور ارجو الرد.
==============
رد بص وطل:
صديقتي العزيزة لازم تهتمي بالأكل الصحي والمتوازن اللي يكون بيحتوي على كل العناصر الغذائية اللازمة للجسم، ولازم كمان تستشيري دكتور وتعملي بعض التحاليل علشان تعرفي لو كان عندك سبب عضوي للنحافة دي، لإن النحافة مش بتتعالج بزيادة كمية الأكل وبس.
السلام عليكم.. اذيك ياجى جى
السلام عليكم.. اذيك ياجى جى انا لبسة اسدال ممكن تقوللى على طريقة للف الطرح على الاسدال سواء للصبح او بعد الظهر ياريت تردى عليّ فى اسرع وقت لو سمحتى...
===========
رد بص وطل:
صديقتي العزيزة ياريت تتابعينا وتستفيدي من ربطات الطرح اللي بنقدمها.
هاي جيلان أنا كنت عاوزة اسالك
هاي جيلان أنا كنت عاوزة اسالك ايه المحلات اللي ممكن اشتري من عندها تاج علي الطرحه وعلي فكره انا هكون محجبه وهي بتبقي غاليه ولا اسعارها معقولة وياريت أكتر تقولي لي لو في اماكن في وسط البلد.
==============
رد بص وطل:
صديقتي العزيزة ممكن تلقي التاج في المحلات اللي بتبيع الإكسسوارات ودي موجود منها كتير في وسط البلد واسعارهم بتكون متفاوتة.
ممكن لو سمحت يا جيجى تقولي لى
ممكن لو سمحت يا جيجى تقولي لى أيهما أسرع فى النتيجه لتساقط الشعر وصفه الجرجير أم وصفه زيوت الخروع واللوز والزيتون يا ريت تردى عليّ ضرورى وحقيقى جزاكى الله خيرا على المجهود الرائع اللى بتقومى به معانا.
=================
رد بص وطل:
صديقتي العزيزة الاتنين كويسين جداً للشعر، وإنتي ممكن تعملي وصفة الجرجير بشكل يومي، أما وصفة الزيوت فإنتي ممكن تعملي بها حمام زيت مرة كل أسبوع.
بكام شرائح
بكام شرائح الفيت؟
============
رد بص وطل:
ممكن تسألي على سعره في أي صيدلية.
هاى جيجى شكرا على ردك على
هاى جيجى شكرا على ردك على سؤالى بجد استفدت منك كتير ربنا يبارك لك ان شاء الله معلش عندى سؤال انا طولى 159 ووزنى 60 هل السراويل تكون مناسبه ليا مع العلم انى بحب البس كعب وهل التونيكات الطويله مناسبه ليا ولا القصيره وشكرا حبيبتى مره تانيه.
=============
رد بص وطل:
صديقتي العزيزة السراويل هتناسبك بس المهم إنك تختاري منها الموديل اللي يليق عليكي يعني بلاش الموديلات اللي بيكون حجرها ساقط اوي، وبالنسبة للتونيكات فهيناسبك التونيكات الطويلة.
هاي جيجي كنت عاوزة اسألك علي
هاي جيجي كنت عاوزة اسألك علي حاجه انا عندي هالات سوده ينفع وانا خارجه احط كونسيلر بس لما بحطه بحس كإني مش حاطه حاجه وبحط ماسكرا والكحل دايما بيسيح فمش بقيت بحطه ولا بحط اي نوع بودره بس بحط كريم نهار من ايفون فكده حلو ولا ايه رأيك ويا تري انهي احلي كريم أولاي ولا كريم النهار من ايفون بليز تردي عليّ وتقولي لي وانا خارجه احط ايه في وشي بس حاجات بسيطة علشان كتير من اصحابي شافوني وقالوا اني من غير ميك اب احلي واللي قولت لك عليه ده حلو ولا لأ وانا خارجه ميرسي ليكي كتير.
==========
رد بص وطل:
طبعاً يا سمسمه مفيش أحسن من البساطة والطبيعية، وممكن تكتفي بحاجات بسيطة زي الماسكرا وأحمر خدود بسيط وليب جلوس بلون رقيق وهادي، وبالنسبة لكريم النهار فمنتجات أولاي وافون كويسين، وبالنسبة للهالات السوداء فإنتي ممكن تحطي كونسيلر اغمق بدرجة من لون بشرتك وبعد كده بتحطي كمية بسيطة من البودرة السايبة بنفس درجة لون بشرتك تحت عينيكي وبكده هتداري الهالات دي تماماً.
هاى يا جيلان ازيك ميرسى اوى
هاى يا جيلان ازيك ميرسى اوى على تواصلك معانا وكنت عايزة اسألك انا اشتريت دريل ابيض فى اسمر فى تركواز وعليه بوليرو لونة اسمر فكنت عايزة اعرف الوان الطرح اللى تليق علية بحيث يبقى شكلة حلو ومميز وميرسى ليكى اوى.
=============
رد بص وطل:
ممكن تلبسي باندنا بيضاء وباندانا سمرا ومن فوق تلبسي طرحة تركواز.
ازيك يا جي جي عاملة ايه لو
ازيك يا جي جي عاملة ايه لو سمحتي يا جي جي انا بستخدم كريم لوكس بالورد للبشرة الدهنيه فيا تري الكريم ده كويس ولا لا وياريت تقولي لي علي اسماء كريمات للبشرة الدهنية وتقولي لي ازاي اعتني ببشرتي وايضا افضل ماسك لتبييض البشرة وسؤال كمان كنت عايزه ماسك لتوحيد لون الجسم.
==========
رد بص وطل:
كريم لوكس كيس بس أهم حاجة إنك تتأكدي إنه مكتوب عليه للبشرة الدهنية، وبالنسبة للاهتمام بالبشرة فده بيكون بالتغذية الصحية والسليمة والاهتمام بنظافة البشرة وتغذيتها بالماسكات الطبيعية المغذية للبشرة، وده ماسك هايل لتفتيح البشرة الدهنية وهو عبارة عن لوز مطحون + بياض بيضة + نصف ليمونة.
الطريقة:
انقعي اللوز في الماء حتى تستطيعي نزع القشرة منه، واطحنيه في الخلاط حتى يصبح بودرة، وبعد كده اخلطي اللوز المطحون مع بياض البيضة مع نصف الليمونة لغاية ما تتجانس مع بعضها البعض، وبعد كده ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك، وممكن تكرري الماسك ده مرتين في الأسبوع.
هااااااااى جيلان انا بحبك
هااااااااى جيلان انا بحبك اوووووووووووى كنت عايزة اسالك عن حاجة ضرورى انا شعرى بقاله سنتين بايظ اوى مكنتش بهتم بيه فترة الثانوى وكده وبقيت لما بحط كريم بيلزق فيه ولما بغسلة برده مش بينضف اووووووووووى بقى عامل زى القشر بس لزج بجد مزهقنى خالص انا بستعمل حمام كريم بوناويل كل اسبوع مرتين كده تمام ولا ايه؟؟؟ وشامبو هيد اند شولدرز للقشر بس مش مؤثر خالص قولي لى اعمل ايه وميرسى اوووووووى.
============
رد بص وطل:
صديقتي العزيزة لازم تهتمي بشعرك جداً لإنه من أكتر الحاجات اللي بتتاثر بالإهمال، وعلشان كده لازم تستخدمي نوع الشامبو المناسب لنوع شعرك وبتغسلي شعرك مرتين كل أسبوع مع عمل حمامات كريم مغذية باستمرار، وبلاش تدهني شعرك بعد الغسيل ولو عايزة تدهنيه ممكن تحطي كمية صغيرة جداً من اي كريم تصفيف زي بانتين بديل الزيت أو باراشوت، أما بخصوص القشرة ففيه طريقة طبيعية ممكن تعمليه وهي إنك تشطفي شعرك بعد ما تغسليه بكمية من خل التفاح، وبلاش تستعملي أي شامبو للقشرة إلا بعد استشارة دكتور جلدية متخصص.
لو سمحتى ياجي جى أنا أول مرة
لو سمحتى ياجي جى أنا أول مرة ادخل الموقع ده بس جميل جدا وإنتى بتعملى حاجات جميلة جدا بس ممكن اطلب منك طلب انا عندى 15 سنة عاوزة لفات طرح الصبح وبعد الظهر وأنا مليانة شوية ممكن أعرف كل حاجة عن لبس السن ده ولفات الطرح بجد أنا اسفة إنى طولت عليكى ميرسى ليكى.
=========
رد بص وطل:
صديقتى العزيزة أهلاً بيكي ونتمني إنك تتابعينا دايماً، وإن شاء الله حيكون فى عدد عن لفات طرح والملابس المناسبه للأجسام المختلفة.
هاى يا جى جى ازيك بجد انتى
هاى يا جى جى ازيك بجد انتى هايله ميرسى ليكى جدا لو سمحتى انا كنت عايزه اسالك ايه افضل انواع البودرات المستخدمه للوجه وشكرا ليكى.
=============
رد بص وطل:
دي أفضل الماركات اللي ممكن تستخدميها وهي "فلوريل" و"مادينا" و"كيرولان" و"ريمال" و"بورجوا" و"كريستيان ديور".
انا عايزه اكلمك بس محرجه اتصل
انا عايزه اكلمك بس محرجه اتصل فى اى وقت ياريت تقولى الوقت المناسب ليكى.
=============
رد بص وطل:
صديقتي العزيزة ممكن تكلميني في اي وقت يناسبك.
السلام عليكم ورحمة الله
السلام عليكم ورحمة الله وبركاته إزيك يا جى جى أنا متابعاكى من زمان والله وفرحت جدا لما لقيتك على بص وطل أنا كنت حابة استفيد منك فى كام سؤال بعد إذنك..
1- الهالات السوداء إنتى ذكرتى كذا طريقة فى الموقع أنا كنت حابة اعرف اقوى علاج من الطرق دى إيه مع العلم إنى جربت الخيار كتير ومش بيجيب مفعول
2-انا بشرتى خمرية واكترية الطرح اللى بلبسها غامقة زى الاسود والفوشيا والتركواز مش بحب الفاتح وخصوصا ان وجهى مدور والغامق بيحدده كده صح ولا لأ
وشكرا يا قمر على الاستفادة الكبيرة اللى بتحققيها لنا من خلال الموقع.
===========
رد بص وطل:
ميرسي بجد ليكي صديقتي العزيزة، وأنا بجد سعيدة جداً إني بتواصل معاكم من خلال موقع بص وطل، وبالنسبة لسؤالك عن الهالات السوداء فاحب اقول لك إن لها أكتر من سبب ومنها التعب والإرهاق والتعرض للشمس وكمان فيه اسباب عضوية زي نقص فيتامينات معينة أو انيميا أو ضعف وممكن سببها يكون وراثي، وفي الحالات اللي بيكون السبب فيها عضوي لازم العلاج يتم تحت إشراف دكتور متخصص، علشان يديكي علاج للأسباب دي لإن الطرق الطبيعية والماسكات مش هتجيب نتيجة أوي، أما بالنسبة لألوان الطرح فإنتي بتختاري الألوان على حسب اللي يناسبك ويناسب شخصيتك بالإضافة للون ملابسك واستايلك بحيث إنك في النهاية تكوني راضية عن نفسك وشكلك.
هاى جى جى أنا كنت عايزه أعرف
هاى جى جى أنا كنت عايزه أعرف اسماء المحلات اللى بتجيبى منها الملابس للموديل لان ذوق الملابس حلو جدا وأنا مش من القاهره فياريت تقولي لى أماكن المحلات شكرا كتير حبيبتى .
===================
رد بص وطل :
صديقتى العزيزة ده رقم تليفون محل الملابس ممكن تتكلمى وتسألى على اللى إنتى عايزاة "منال فلاورز" تليفون 0108255551 .
أنا عايزه حاجه تبيض اسنانى
أنا عايزه حاجه تبيض اسنانى أنا بغسلها كل يوم بس لسه فيها صفراء إزاى على الصفار ده .
==================
رد بص وطل :
صديقتى العزيزة فى طبيعه أسنان بيكون لونها كده بس من الأفضل إنك تستشيرى دكتور أسنان .
ميرسى يا جى جى على اهتمامك
ميرسى يا جى جى على اهتمامك وردك بس معلش هاتقل عليكى ممكن تحددى لى اكتر الاماكن فى عباس العقاد حتى لو فى رسالة على الميل
ميرسى كتير ليكى .
==================
رد بص وطل :
صديقتى العزيزة ممكن تروحى المولات التجاريه الكبيرة .
هاى جى جى الربطات تجنن ربنا
هاى جى جى الربطات تجنن ربنا يوفقك ومزيد من التفوق, بس أنا كان عندى سؤال محيرنى أنا إسمريت كتير وجبت دلوقتى واقى من الشمس وبعمل ماسك الزبادى والليمون زى ماإنتى قولتي لى بالظبط وبستعمل كريم غارنييه هل هرجع بيضة زى الاول وكنت عاوزه أعرف نوع كونسيلر كويس وسعره, وتحياتى لكل العاملين في بص وطل وقمر 14 لانهم فعلا بيتعبوا علشان يقدموا أفضل شئ وفعلا هما بيقدم أفضل شئ.
===========
رد بص وطل:
صديقتى العزيزة أهلاً بيكى وشكراً على ذوقك وأتمنى إنك تستفيدى من كل موضوعات قمر 14، وبالنسبه لسؤالك لازم إنك تحطى صن بلوك قبل ماتتعرضى للشمس وكمان استمرى فى استخدام الماسك وإن شاء الله هتحسى بفرق، وكمان تقدري تستشيري دكتور أمراص جلدية لإن عندهم طرق طبية لإعادة البشرة للونها الطبيعي.
هاى يا جى جى اخبارك ايه لو
هاى يا جى جى اخبارك ايه لو سمحتى انا كنت عايزه اعرف ايه رايك فى جهاز الشمع المستخدم عند الكوافيرات لعمل الوجه وميرسى ليكى جدا.
===========
رد بص وطل:
صديقتى هبه الشمع اللى بيتعمل للوجه كويس بس لازم حد متخصص هو اللي يعمله لك.
حبيبتي جيجي انا عندي سؤال خاص
حبيبتي جيجي انا عندي سؤال خاص ليكي اتفقت انا وخطيبي ان الشبكه تبقى قيمتها 10000 جنيه نقسمهم 5000 ساعه الخطوبه جبنا بيهم دبله وتوينز وخاتم واسوره وفاضل 5000 المفروض اشتري بيهم حاجات تاني بس انا مش عارفه اجيب ايه ممكن تساعديني وتقولي لي افكار في اسرع وقت.. شكرا يا جيجي.
==============
رد بص وطل:
صديقتي العزيزة الف مبروك على الشبكة، وبالنسبة للمبلغ الباقي فإنتي وخطيبك بس اللي تقدروا تحددوا إنتم هتجيبوا به ايه.
والله أرائك جميله جدا ربنا
والله أرائك جميله جدا ربنا يجازيكى خير أنا كنت عايزة اسأل عن وصفه لتخفيف نمو الشعر أنا جسمى مشعر وده بيضايقنى أوي وكمان إيه رأيك في كريم فاتيكا بالحنة واللوز وألوفيرا وشامبو سباركل حلو ولا لأ وحمام كريم بوناويل ومعلش تعباكى معايا.
===========
رد بص وطل:
صديقتى العزيزة أهلاً بيكى، ودى وصفه كويسه جداً وبتقلل من نمو الشعر وهي وصفة نبات السعد وده هتلاقيه عند العطار وبتاخدي منه 3 معالق وبتضيفيه على لتر ماء وحطيه على النار لغاية ما يغلي وسبيه لمدة ربع ساعة بعد كده حطيه على جسمك كغسول بعد إزالة الشعر لمدة 6 أيام متواصلة من كل شهر وإن شاء الله تحسى بفرق أما بالنسبه لمنتجات الشعر فأفضل أنواع الشامبو هي بانتين وهيربل اسينسز وبالنسبه لحمام كريم بوناويل فهو كويس وكمان حمام كريم لوريال كويس جدا، وبالنسبة لكريمات التصفيف فكريم فاتيكا وباراشوت كويسين بس بلاش تدهني شعرك بكمية كبيرة.
أنا بشرتى دهنية جدا ومش عارفة
أنا بشرتى دهنية جدا ومش عارفة أحط ايه يحمينى من الشمس انا مجرد ما اتعرض للحرارة بسود ممكن تردى عليه علشان مش عارفة أعمل إيه ميرسى ليكى جدا.
==========
رد بص وطل:
صديقتى العزيزة لازم تستخدمى واقى شمس وتكون درجه حمايه عاليه ودى أفضل الأنواع اللى ممكن تستخدميها وإنتى متطمنه بايوديرما، لونا، ونيفيا، ويا ريت بعد ما ترجعي من بره تحطي على وشك طبقة من الزيادي لإنه بيمتص الالتهابات اللي بتحصل على البشرة من آشعة الشمس.
لو سمحتي يا جيلان أنا سمعت إن
لو سمحتي يا جيلان أنا سمعت إن الحركة أثناء وجود ماسك على الوجه بيبطل مفعول الماسك هل الكلام ده صحيح؟ وكمان معلش سؤال هو ماسك الزبادي بالليمون أحط نقطتين بس ومفعوله بيبان في أد إيه؟
===========
رد بص وطل:
صديقتى العزيزة الكلام ده غير صحيح وبالنسبه لماسك الزبادى والليمون إنتى بتحطى نقطتين بس ولازم تستمرى فى الأستخدام لفترة وتواظبي عليه علشان تحسى بالفرق.
هاى جي جي يا قمر أنا أول مرة
هاى جي جي يا قمر أنا أول مرة اشارك بصراحه واسال واتمنى الاقى الرد إن شاء الله أنا متجوزه وعندى مشكله المناطق الغامقه وتعبانى نفسيا جدا سواء تحت الابط أو الركبه بجد بجد مضيقانى نفسي فى حل ليها ممكن تساعدينى يا جي جي ميرسي ليكي.
===========
رد بص وطل:
صديقتى العزيزة أهلاً بيكى ويا ريت تتابعينا وتبعتي لنا دايما وبالنسبه لسؤالك فالماسك ده كويس جداً وبيساعد على تفتيح المناطق الغامقه فى الجسم ومكوناته: زبادي + ترمس مطحون + عصير برتقال
الطريقة إخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر، كمان إزالة الشعر بالسويت بصفة دورية كل 20 يوم من الكوع والركبة حتى لو مفيش شعر فيهم بيساعد على تفتيحهم.
هاى جيلان بجد ربنا يخليكى على
هاى جيلان بجد ربنا يخليكى على مجهودك معانا ده وأحب اشكرك على موديلاتك الرائعه دى ولفات الطرح الهايله أنا جبت سروال جينز يا جى جى وهو نازل على جيب وبعد كده من أول الركبه كده نزل على بنطلون واسع وأسوره ماسكه الرجل من تحت هو مبين نهايه رجلى من تحت كنت حابه أعرف رأيك فى الموديل ده و ياريت لو تقولي لى البس عليه شوز إيه وبكعب ولا لأ ولو مش بكعب وده أفضل بالنسبه ليا يكون شكله عامل إزاى وهل ينفع البسه فى الشتاء ولو لبسته البس عليه شوز إيه وميرسى بجد ليكى.
========
رد بص وطل:
صديقتى العزيزة أهلاً بيكى، وبالنسبه لسؤالك عن الموديل ده فهو هيكون مناسب لو إنتى طويله وبالنسبه للشوز فالموضه دلوقتى الصندل الرومانى وعشان تلبسى البنطلون السروال فى الشتاء لازم تكون قماشته مناسبه ومش خفيفة.
لو سمحتي يا جي جي أنا كنت
لو سمحتي يا جي جي أنا كنت عايزة أعرف أفضل زيت لحمام الزيت وكمان وصفة زيوت اعملها لشعري كحمام زيت.
=========
رد بص وطل:
صديقتى العزيزة دي وصفة لحمام زيت بيساعد على تقوية الشعر وبتمنع تساقطه وجفافه وهو عبارة عن مقادير متساوية من زيت الخروع وزيت اللوز المر وزيت الزيتون.
أنا بيضه أصلا بس اسمريت
أنا بيضه أصلا بس اسمريت الفتره دى وعاوزة أرجع تانى مش عارفه أعمل إيه ياريت تساعدونى ضرورى.
===========
رد بص وطل:
صديقتى أميره لازم تستخدمى صن بلوك قبل ما تتعرضى للشمس وافضل ماسك لتفتيح البشرة هو ماسك الزبادي بالليمون.
هاي جيلان إذيك أنا أول مره
هاي جيلان إذيك أنا أول مره ابعت لك بس بتابع كل اللي بتقدميه وبجد بستفاد منه جدا وميرسي ليكي بجد أنا كنت عاوزه اخد رأيك في حاجه أنا عندي فست (تونيك كت) لونه اوف وايت وكنت عاوزه أعرف إيه ألوان البدي والطرحه اللي ممكن تكون عليه حلوه ورقيقه وكمان عندي واحد تاني في ثلاث الوان اسود واوف وايت ورمادي عاوزه بردو أعرف البس البدي لونه إيه ينفع الرمادي والطرحه اجيبها اوف وايت ولا هيكون مش حلو قولي لي رأيك بقي في الاتنين سوري لو كنت طولت عليكي وميرسي ليكي.
===========
رد بص وطل:
صديقتى العزيزة بالنسبه للأوف وايت ممكن تلبسى عليه بدى بنى أو موف وتلبسي ايشارب مشجر بنفس الألوان دي على باندانا لونها أوف وايت، أما بالنسبه للتونيك التانى فممكن تلبسى بدى ابيض أو رمادى أما الطرحه فممكن تلبسى أوف وايت وأبيض أو أوف وايت و رمادى.
هاى جى جى كنت عاوزة اسأل على
هاى جى جى كنت عاوزة اسأل على ماسك تفتيح طبيعى للوجة عايزة برده لتنظيف البشرة وهل الليمون فعلا بينظف البشرة؟
===========
رد بص وطل:
صديقتى العزيزة لازم تستخدمى غسول مناسب مع نوع بشرتك عشان تحافظى على نظافتها، وماسك الزبادي بالليمون بينظف ويفتح البشرة جداً لكن مع المواظبة والاستمرار.
السلام عليكم ورحمة الله
السلام عليكم ورحمة الله وبركاته ازيك يا جى جى أنا بحب اناقتك وشياكتك فى لبسك جدا بحس إنك جذابه جدا بعد إذنك كنت عايزة اسألك على اماكن المحلات اللى بتشترى منها لبسك الانيق ده علشان أنا مخطوبة وخطيبى بيحب اللبس الرقيق الشيك أوى وبيحب الشياكة جدا ونفسى أرضيه واحس فى عينيه إن لبسى عاجبه أوى وعايزة أبقى قدام الناس كمان شكلى محترم وحلو وعايزة كمان بعد إذنك أعرف البس إيه وأنا رايحه الجامعه بحيث إن ما يكونش لبسى شكله عادى كمان كنت عايزة اسألك التقشير الكيميائى للبشرة هل هو مضر ولا لأ معلش هتعبك معايا وجزاكى الله خيرا ياريت تردى عليه بسرعه ارجوكى.
===========
رد بص وطل:
صديقتى العزيزة أهلاً بيكى وميرسي لذوقك جدا وبالنسبه للبس فده رقم "منال فلاورز" المصدر اللي بجيب منه الملابس اللي بتعرض في الحلقات والرقم هو 0108255551 وحاولى وإنتى رايحه الجامعه إن هدومك تكون بسيطه ومريحة ليكي في الحركة أما بالنسبه للتقشير الكيميائى فلازم تستشيرى دكتور جلديه متخصص عشان يقول لك التقشير الكيميائى مناسب مع بشرتك ولا لأ.
