تزيين الأكل من الحاجات اللي بتخلّي شكل أكلك شهي ولذيذ، مش بس كده ده كمان بيعطي انطباع حلو جداً عن الطبق اللي بتقدميه، وزي ما قال المثل الشعبي "العين بتاكل قبل الفم".. علشان كده إحنا النهارده حبينا نقدّم لك عدد نعرفك فيه إزاي تزيّني أطباقك وتبيّني شطارتك وشياكتك في تقديم أكلك...
وعلشان تقدري تعملي أطباق شكلها حلو ومتميّز يبقى لازم تحطي شوية القواعد الأساسية دي قدامك...
1- إنك تستخدمي حاجات طبيعية لتزيين الأكل، وتحاولي على أد ما تقدري إنك تقللي من استخدام الحاجات غير الطبيعية زي مثلا شرائح الليمون البلاستيك؛ لأن الحاجات الطبيعية بتدي شكل أحلى.
2- حاولي دايماً إن الحاجات اللي بتستخدميها في التزيين تكون متناسقة مع نوع الأكل اللي بتقدميه، يعني مثلاً تزيّني طبق السمك بشرائح ليمون، لكن مش معقول إنك تزيني التشيز كيك بالبقدونس؛ لأن ما فيش أي ترابط بينهما.
3- خدي بالك كمان من إن الأطباق اللي بتحتوي على أكثر من مكون إنك تستخدمي فيها حاجات بسيطة في تزيينها، أما الأطباق البسيطة فممكن إنك تعملي لها ديكور معقد شوية.
4- حاولي تعملي بالأكل اللي موجود في الطبق أشكال هندسية، زي الدواير أو أي شكل عشوائي يدي شكل حلو في النهاية؛ زي مثلا لو بتقدمي صدور فراخ مقطعة قطع صغيرة تبقى ترصيهم في الطبق على شكل حرف X، وممكن كمان إنك تسندي شرائح اللحمة على جبل تعمليه من البطاطس الصغيرة المسلوقة، وممكن تعملي تبديل بين الأطوال المختلفة للأكل في نفس الطبق يعني من الآخر نوّعي في طريقة وضع الأكل في الأطباق.
5- اوعي تفتكري إن تزيين أطباق التقديم هو بس اللي بيخلي أكلك يبان بشكل شهي ولذيذ، لكن كمان طريقة ترتيب الأطباق على السفرة، علشان كده يا ريت إنك تحطي الأطباق المرتبطة ببعضها قريبة من بعض.
6- اوعي تخلي سفرتك مزحومة بأطباق كتيرة، وتفتكري إن هي دي الشياكة؛ لأن الزحمة دي ممكن إنها تدي شكل مش حلو على السفرة.
7- في معلومة مهمة جداً يمكن تكوني أول مرة تسمعي عنها، ولكنها مهمة وأساسية في فن تزيين الأطباق، وهي إنه من الأفضل إنك تستخدمي أعداد فردية في الحاجات اللي بتذوّقي بها، وبلاش الأعداد الزوجية، يعني لو هتستخدمي شرائح من الطمام أو الليمون في تزيين أي طبق يبقى الأحسن إنك تحطي واحدة أو ثلاثة أو خمسة وبلاش تحطي اثنين أو أربعة؛ لأن الأعداد الفردية مريحة أكثر للعين.
8- لو عايزة تضيفي شكل جذاب لأطباقك بطريقة بسيطة جداً، يبقى أحسن حاجة إنك تستخدمي طريقة الرش، يعني ممكن ترشي على الطبق حاجات زي البقدونس المفروم أو المكسرات المفرومة أو السكر البودرة أو الكاكاو، وطبعاً ده كله بيكون على حسب مكونات الطبق اللي إنتِ عايزة تزينيه.
ودلوقتي بقى تعالي نتعرّف مع بعض على شوية حاجات ممكن تستخدميها في تزيين أطباقك...
1- الصوص:
الصوص من الحاجات البسيطة اللي ممكن تستخدميها في تزيين حاجات كتير، وميزته إنه سهل ومتوفّر منه أنواع وألوان كثيرة أوي، زي الكاتشاب أو صوص الشيكولاتة بالنسبة للحلويات، وممكن تعملي به أشكال كتيرة على أطباقك، وممكن ترشيه على شكل زجزاج، ولو عندك ميول فنية ممكن تعملي بالصوص أشكال زي قلب أو وردة.
2- الفاكهة:
استخدام الفاكهة في التزيين بيدّي لأطباقك شكل منعش وجميل، والتزيين بشرائح الفاكهة حاجة سهلة جداً، وكل اللي عليكِ إنك تجيبي الفاكهة اللي إنتِ عايزاها وتقطعيها شرائح وتحطيها على طرف الطبق، أو ممكن إنك تستخدمي مجموعة من الفواكه مع بعضها كقاعدة للطبق تحطي عليها صنف الأكل اللي عايزة تقدميه، يعني مثلاً ممكن تحطي شرائح كنتلوب مع الموز والمانجو على الطبق وتحطي عليهم كيكة أو أيس كريم.
3- الخضروات:
الخضروات كمان بيكون لها تأثير حلو أوي على شكل الطبق زي الفاكهة بالضبط، وفيه خضراوات كتيرة ممكن تستخدميها في التزيين زي الجزر والفجل والبنجر.. وفيه أفكار سهلة وبسيطة ممكن تعمليها باستخدام الخضراوات، زي إنك تبشري الجزر أو الفجل أو أي نوع خضار تاني، وتعملي بيهم شكل جبل صغير في وسط الطبق أو على جنب، وكمان ممكن تقطعي الخضار على أربعة وتعملي بيهم شكل وردة مثلاً.
كمان الخضرة زي البقدونس والكرفس والريحان والكسبرة والروز ماري والزعتر من الحاجات اللي بتكون دايماً متوفّرة في أي مطبخ مصري سواء كانت طازة أو ناشفة، والخضرة من الحاجات اللي بتدي طعم حلو ومختلف لأكلك، مش بس كده ده إنتِ ممكن كمان تستخدميهم في تزيين الأطباق، يعني ممكن تحطي أعواد البقدونس على جنب الطبق أو ترشي البقدونس المفروم على الأكل بشكل عشوائي، وصدقيني هيعمل شكل تحفة، وممكن تزوّدي جمال الطبق بإنك تستخدمي الزهور اللي بتنبت مع الأعشاب دي.
ونصيحة مني حاولي تبتكري في تزيين الأطباق؛ يعني ممكن إنك تستخدمي أي نوع خضار عندك في تزيين أطباقك، زي مثلاً إنك تستخدمي حبوب البسلة في عمل صف في وسط الطبق.
4- الجبنة:
ممكن تستخدمي أنواع مختلفة من الجبنة في تزيين الأطباق زي الجبنة الفيتا أو البارميزان أو الجبنة الرومي وكمان الجبنة القريش، وممكن تعملي أشكال مختلفة من الجبنة الشيدر باستخدام القطّاعة اللي بيكون لها أشكال مختلفة واللي بتستخدميها في تقطيع البسكويت.
5- الخبز المحمص:
ممكن تستخدمي الخبز المحمص في تزيين أطباقك، وخصوصاً أطباق اللحمة، وممكن تحطي بعض شرائح الخبز المحمص جنب طبق الشوربة.
وطبعاً لما جينا نحضر لك عدد عن تزيين الأكل ما كنش ممكن ننسى إننا نعرّفك إيه الأدوات اللي المفروض تكون موجودة في مطبخك، علشان تعملي أحلى الأشكال لأطباقك وتخلّي كل الناس تقول لك "إيه الجمال ده"، وعلشان كده عملنا لك جاليري بأهم الأدوات اللي لازم تكون عندك في المطبخ
ودلوقتي اتفرجي معانا على...
جاليري يوضّح لكِ طريقة التزيين باستخدام الليمون
جاليري يوضّح لكِ طريقة التزيين بالخيار
جاليري يوضّح لكِ طريقة التزيين باستخدام الجزر
جاليري يوضّح لكِ طريقة التزيين بالبصل الأخضر
ولغاية هنا وخلص كلامنا النهارده..
وفي انتظار مشاركاتكم وتعليقاتكم...
سلام،،،
ميرسي اوى على الحاجات الحلوى
ميرسي اوى على الحاجات الحلوى دى وبجد كل يوم بستفيد وبتعلم
شكرا ليكم علي الموضوع الجميل
شكرا ليكم علي الموضوع الجميل دة
ميرسى اوى على الافكار التحفه
ميرسى اوى على الافكار التحفه دى وبجد الموضوع يستاهل اكتر من مليون ميرسى لان الحاجات دى بسيطه جدا بس بتعمل تأثير جامد اوى اوى خصوصاالناس اللى لو شافت قدامها الاكل مزين كده بتحس انها شبعت خلاص, وانا عندى فكره حلوه موت اننا نعمل بالخضروات اشكال حروف a b c كده يعنى وتتحط على الاكل ودى بتتقطع بواسطة القطاعات الصغيره دى او السكينه مثلا ويارب التوفيق للجميع وعلى فكره الجاليرى صوره حلوه اوى وبتظهر بسهوله جدا.
شكرا ليكم كتير بس ياريت
شكرا ليكم كتير بس ياريت تجيبوا مقادير وطريقه تزيين التورتات
السلام عليكم الموضوع رائع بس
السلام عليكم الموضوع رائع بس نفسى اعرف ازاى اعمل الطماطم على شكل ورده والخيار على شكل شجره وشكرا.
============
رد بص وطل:
ميرسي ليكي يا قمر وإن شاء الله نحاول نقدم لك كل اللي إنتي عايزاه في الأعداد الجاية.
حلو اوييييييييييييييي الموضوع
حلو اوييييييييييييييي الموضوع دا .تسلم اديكي
شكرا على المعلومات الجميلة دى
شكرا على المعلومات الجميلة دى وياريت تقدموا لنا طرق عمل الأكلات السريعة فى المنزل للسيدات العاملات وشكرا ليكم على الموقع الجميل ده ودايما للامام.
================
رد بص وطل:
ميرسي ليكي جداً صديقتنا العزيزة على كلامك الجميل ونوعدك إننا نقدم لك كل اللي إنتي عايزاه في أقرب وقت.
ربنا يجازيكم كل خير على
ربنا يجازيكم كل خير على المعلومات الجميلة
شكرا ليكم على المعلومات
شكرا ليكم على المعلومات الجميلة دى
موضوع حلو اوى ومفيد وفيه
موضوع حلو اوى ومفيد وفيه معلومات جديدة بالذات انى استخدم أعداد فردية من الحاجات اللى بزين بيها.. بس ماعرفتش اشوف الصور علشان بتيجى في جنب الشاشة بيبقى نصها متاكل مش عارفة ليه كده ياريت لو تقدروا تعدلوها..
===================
رد بص وطل:
سنعمل يا "emmo" على حل هذه المشكلة سريعاً إن شاء الله وشكراً لمتابعتك واقتراحاتك.
انتى جميلة اوى يا رنا وبجد
انتى جميلة اوى يا رنا وبجد موضوع تحفه ويجنن وتسلم ايدك يا قمر وفادنى كتير علشان بموت فى التزيين بس مش عندى افكار جديدة وكمان عاوزة اطلب منك طلب وبجد نفسى تساعدينى فيه انا لخمة اوى فى ترتيب السفرة ومش بعرف ابدا لما يكون عندى عزومة ارتبها صح واعمل المستحيل وفى الاخر بتطلع ملخبطة ولازم حد يساعدنى فيها لو سمحتى يا رنا تجيبي لنا الموضوع ده وياريت يكون بالصور وبجد ميرسى لمجهودك معانا.
====================
رد بص وطل:
ميرسي لذوقك يا "كيارا" وكلامك الحلو ده، وبالنسبة لطلبك فهيكون معانا قريب إن شاء الله وعلشان كده تابعينا وقولي لنا رأيك دايماً.
روحنا بتطلع على بال ما الصورة
روحنا بتطلع على بال ما الصورة بتطلع وكمان لو حبينا نحتفظ بأى صورة ده مش بنقدر نعمله وياريت لو الصور تنزل تحت بعضها زى زمان كان اريح وكمان اوضح بكتير.
=====================
رد بص وطل:
سنعمل على حل مشكلة حفظ الصور إن شاء الله، ولكن للأسف مش هنقدر نحط الصور تحت بعضها زي زمان وده لأن الشكل بتاعنا اختلف.
شكرا على العرض الجميل بس
شكرا على العرض الجميل بس عاوزين افكار تانيه كتير اوى اوى علشان نعرف جميع التفاصيل عن التزيين.
يا جماعه طريقة عرض الصور دى
يا جماعه طريقة عرض الصور دى وحشه اوى مش بعرف اسيف الصور ولا بعرف اقرأ التعليق.
==============
رد بص وطل:
احنا مانقدرش على زعلك صديقتنا العزيزة بس ياريت توضحي لنا ليه مش بتعرفي تقري التعليق هل الصورة مش بتظهر كاملة عندك ولا ايه المشكلة أما بالنسبة لحفظ الصور فنوعدك إننا نحل المشكلة دي في أقرب وقت.
افكار حلوة شكرا ليكم .. بس
افكار حلوة شكرا ليكم ..
بس بديهي طبعا ان محدش هيحط بقدونس على تشيز كيك
أفكار حلوة جدا و بسيطة في نفس
أفكار حلوة جدا و بسيطة في نفس الوقت ,,,
أكتر حاجة عجبتني الجزر :) شكرا أوي ليكم ,,