أهلاً بكل بنات قمر 14 والنهارده هيكون معايا ومعاكم خبير التجميل والميك أب "علاء التونسي" اللي كل البنات بتستنى تشوف موضة الميك أب الجديدة اللي بينزلها، وإحنا سعداء جداً إنه معانا في موقع "بص وطل" النهارده..
وأعتقد إنكم كمان هتكونوا مبسوطين جداً وإنتم بتاخدوا درس في الميك أب من حد متخصص ومحترف، وكمان تعرفوا إيه الحاجات الغلط اللي بتقعوا فيها وإنتم بتعملوا ميك أب الصبح قبل ما تروحوا الجامعة أو الشغل وإزاي تتجنبوها، يلّا نبدأ مع بعض..
تحضير البشرة قبل الميك أب
أهم حاجة لازم تعملها أي بنت قبل ما تحط الميك أب إنها تجيب قطنة فيها تونيك أو ماء ورد علشان تشيل أي شوائب أو تراب أو آثار ميك أب ممكن إنها تكون موجودة على البشرة علشان ننظف البشرة ونحضّرها للميك أب، ده غير إن ماء الورد بيمنع ظهور التجاعيد المبكرة في البشرة وبيقفل المسام.
وبعد تنظيف البشرة يُفضّل وضع كريم مرطب سريع الامتصاص؛ لأنه بيرطب البشرة وفي نفس الوقت بيغذي البشرة وبينوّر الوش ويفتحه، وطبعاً بالنسبة لخروجات الصبح اللي بيروحوا الجامعة لازم يحطوا صن بلوك (واقٍ من الشمس)، ويُفضّل إنها ما تكترش الصبح الميك أب خالص يعني تحاول تحط أقل حاجة ممكنة علشان يكون شكلها طبيعي وهادي.
مشاكل البنات مع الكونسيلر (مصحح العيوب)
فيه بنات كتير بتسأل وبتقول إن الكونسيلر بيشقق أو بيقطع تحت العين، وعلشان تعالجوا المشكلة دي لازم نوزّع اللوس باودر "بودرة سايبة" تحت العين بعد الكونسيلر، واللوس باودر دي دورها إنها بتثبت الميك أب سواء كان كونسيلر أو كريم الأساس، ولازم نفرّق كويس أوي بين البودرة السايبة والمضغوطة؛ لأن البودرة المضغوطة بتستخدم لإزالة الدهون الزايدة وفي تصليح الميك أب.
كمان فيه بنات كتير بتستخدم درجة كونسيلر فاتحة جداً عن لون بشرتها وده غلط؛ لأنه بيظهر منطقة تحت العين فاتحة جداً وبيكون شكله مش مناسب خالص، وخصوصاً في ضوء النهار لأن الضوء ده بيكشف تفاصيل الوجه بالظبط.
شاهدي الفيديو علشان تعرفي إزاي توزّعي الكونسيلر تحت العين
تحديد العين بالكحل
بعد ما وزعنا الكونسيلر واللوس باودر تحت العين هنبدأ بعد كده في تحديد العين من فوق بقلم الكحل، ولازم ناخد بالنا إن القلم اللي هنستعمله يكون ناعم وطري ومبري كويس علشان ما يجرحش العين.
بنرسم بالقلم من فوق العين من الخارج للداخل وما نكملش لغاية آخر زاوية العين الداخلية، وزي ما هنشوف في الفيديو إننا اختارنا لون الكحل البني؛ لأنه مناسب مع لون البشرة الخمرية ولون الشعر ولون العينين، وده هيدينا في الآخر شكل طبيعي وهادي.
رسم العين بالآي شادو
بعد كده نرسم العين بالآي شادو على الجفن المتحرّك على الجزء اللي فوق خط القلم اللي رسمناه بالظبط، ونبتدي نسيّحه بالفرشة من الداخل للخارج بطريقة بسيطة.
ولازم كل بنت يكون عندها الفرش الخاصة بمزج الآي شادو ودي بتكون موجودة في محلات بيع مستحضرات التجميل وفي الصيدليات، والفرش دي بتساعد البنت جداً، وبتخلي رسم العين بالآي شادو سهل.
شادو مضيء تحت الحاجب
بعد ما رسمنا العين بلون الآي شادو الأساسي واللي بيكون مناسب مع لون بشرتنا وملابسنا بنبدأ نحط لون مضيء تحت الحاجب؛ علشان نبرز عضمة الحاجب، وممكن نحط كمان عند الزاوية الداخلية للعين لأن الطريقة دي بتدي إضاءة وإشراق للعين.
رسم الحواجب
لما نيجي نرسم الحواجب يُفضّل إننا نستخدم شادو أو بودرة مخصوصة للحواجب؛ لأن القلم مع الوقت الطويل بيوقّع شعر الحواجب، وفيه دلوقتي ماركات أقلام عالمية بنستخدمها بإننا نبلها بنقطة ميه ونرسم بها العين كإننا بنرسم ببودرة.
ونصيحة لكل البنات علشان يعرفوا يرسموا حواجبهم بشكل طبيعي ومناسب مع شكلهم يا ريت بلاش نرسمهم باللون الأسود ونختار اللون المناسب مع لون شعرنا وبشرتنا، وكمان بنرسم على الحواجب بفرشة خاصة بتكون رفيعة جداً، وبنرسم بالفرشة دي بزاوية صغيرة جداً زي ما هنشوف في الفيديو؛ علشان ما تخليش الحاجب أتخن من الطبيعي وبالتالي ما تغيرش من شكلنا الطبيعي.
تحديد العين
علشان نبرز رسمة العين ونديها شكل جذاب بنستخدم "آي شادو" غامق وبنحطه عند الزاوية الخارجية للعين، وبندخل على جوه بزاوية بسيطة علشان نبرز كسرة العين، وبعد كده وقت رسم العين بالكحل بس في المرحلة دي لازم ناخد بالنا إن..
العين الضيقة..
يُفضّل إننا نستخدم لها كحل فاتح جوه العين زي الأبيض أو الأخضر؛ علشان تفتح العين، وممكن نحط من بره ألوان زي البني أو الرمادي.
العين البارزة..
بيكون حلو معاها جداً الكحل الغامق جوه العين، لكن مش لازم نزوّد كحل فوق أو تحت العين؛ لأن ده بيخلي العين تبان جاحظة.
العين المُجهدة..
يُفضّل إننا نرسم بقلم أسود تحت العين علشان يداري الإحمرار والإرهاق اللي جوه العين، ولازم نهتم جداً باختيار قلم الكحل إنه يكون ماركة كويسة ومش بتسيح.
وبعد ما خلصنا رسم العين بالآي شادو وتحديدها بالكحل ممكن نجيب البيبي كوتون ودي بتكون موجودة في الصيدليات ونحدد بها العين من النهاية بلون بني، ونحاول إن المنطقة دي ما تكونش محددة أوي يعني شكلها يكون مموه ومش بنقفل العين كلها والطريقة دي بتدي بساطة للعين وبتوسعها.
شاهدي الفيديو علشان تعرفي إزاي ترسمي عينيكِ
الآي لاينر
بنرسم من فوق العين بخط آي لاينر رفيّع خالص بنمشي به على جذور الرموش من فوق وبنسحبه لبره شوية، وده بيعمل شكل كثيف للرموش، ودي طريقة أي بنت ممكن تعملها لنفسها، ولو مش بنعرف نرسم بالآي لاينر ممكن نعمل نفس الحكاية بقلم كحل بس يكون سنّه رفيع.
كريم الأساس بلون البشرة
لازم نختار لون الأساس بتاعنا بعناية جداً، يعني ما ينفعش نحط لون كريم أساس أفتح من لون بشرتنا بخمس درجات مثلاً ودي مشكلة بنلاحظها في بنات كتير.
ولو أي بنت عايزة تفتح لون بشرتها؛ فممكن إنها تستعمل لون كريم أساس أفتح من بشرتها بدرجتين على الأكثر.
أما لو هي فاتحة وعايزة تغمق بشرتها أو لو عندها كريم أساس فاتح وعايزة تخليه يبان مش فاتح أوي ممكن تغمقه بإنها تستخدم أحمر خدود برونزي على الوش كله؛ لأنه بيعمل درجة حلوة وبيغمّق اللون شوية.
ويا ريت نبعد عن درجات الروز في كريم الأساس؛ لأن إحنا بطبيعتنا خمريين وبيمشي معانا أكتر درجات البيج.
ولو إحنا خارجين الصبح يا ريت ما نكترش خالص من كريم الأساس اللي هنحطه على بشرتنا؛ علشان الشكل يكون طبيعي ومناسب مع الصبح.
ماسك طبيعي لنضارة البشرة
فيه ماسك مفيد جداً وممكن كل البنات تعمله قبل الميك أب علشان تحافظ على نضارة وإشراقة بشرتها وهو ماسك "بياض البيض وعسل النحل والليمون"، والماسك ده مفيد جداً للبشرة بيعالج مشاكل كتيرة جداً في البشرة وبيشدها، وبيخلي شكلها ناعم وصافي وبيضيّق المسام وبيحافظ على نضارة وإشراقة البشرة.
والفيديو ده بيوضح الخطوات اللي فاتت
البلاشر (أحمر الخدود)
هنيجي لخطوة توزيع البلاشر وفي الحالة دي هنختار لون روز حفيف علشان ينوّر البشرة ويخليها مشرقة.
تصليح عيوب الأنف بالبلاشر
لو أي بنت عندها مشكلة أو عيب في منطقة الأنف؛ زي إنها تكون عريضة شوية، ممكن نعالجها بإننا ندمج الغامق مع الفاتح واللي بيعتمد على فكرة الظل والنور.
الماسكرا
الطريقة الصحيحة في وضع الماسكرا على الرموش هي إننا نبدأ من الجذور لفوق علشان الرموش تترفع وتطول، وبعد كده نسحب الرموش على بره شوية.
وفيه أنواع ماسكرا كتيرة منها اللي بتطول أو بتكثف أو بتعمل الاتنين مع بعض، بس أهم حاجة وإحنا بنختار الماسكرا إننا نختار الماسكرا اللي بتتقل وبتدي طول وكثافة ولون للرموش.
أحمر الشفاه
بعد ما خلصنا الماسكرا بنحط أحمر الشفاه وبنختار لون هادي مناسب مع الصبح، وممكن نكتفي بإننا نستخدم قلم تحديد لونه هادي، وبنحدد ونملى به الشفايف كلها، وبعد كده نحط الليب جلوس (ملمع الشفاه).
بلاش المستحضرات الرخيصة
وبعد ما خلصنا الميك أب أحب أنصح كل بنت إنها علشان تحافظ على بشرتها لازم تبعد خالص عن المنتجات الرخيصة والمقلّدة؛ لأن المستحضرات دي بتعمل مشاكل كتيرة في البشرة وبتدمرها وبتتسبب في ظهور الحبوب، وكمان لما البشرة بتتعرّض للشمس بتعمل بقع في البشرة.
إزاي نعرف إن مستحضرات التجميل فيها مواد مسرطنة؟!
بنسمع كتير إن في بعض مستحضرات التجميل بيضاف عليها مواد مسرطنة علشان تزوّد فترة صلاحيتها.
ودي طريقة سهلة أوي ممكن كل البنات تعملها علشان تعرف إذا كان المستحضر اللي هي بتستعمله فيه مواد مسرطنة ولا لأ؟!
كل اللي عليها إنها تدهن المستحضر سواء كان روج أو كريم أساس على أي حاجة دهب عندها، ولو لقينا الدهب ظهر عليه لون أسود نعرف بكده إن المستحضر فيه مواد مسرطنة.. وعموماً فيه بعض مستحضرات التجميل ممكن تعد فترة طويلة عندنا زي البلاشر والآي شادو، لكن الماسكرا والروج والآي لاينر والأقلام فأقصى مدة صلاحية لها هي سنة.
والفيديو ده بيوضح طريقة توزيع البلاشر والروج
وفي النهاية نتمنى إن الحلقة تكون عجبتكم..
وتكونوا استفدتم منها..
ويا ريت تبعتوا لنا آراءكم واستفساراتكم..
وإلى اللقاء،،،
ازيك يا ايمان انا اول مره
ازيك يا ايمان انا اول مره اشترك معاكم بس انتى بجد هايلة انا كنت عاوزه استفسر انا بدء يظهر لى ارداف وظهرت قوى الايام دى عندى جيبات فاتحه مابقيتش البسها ينفع البس جيبات فاتحه ليها نظام معين تدارى لانى بصراحه بحب الجيبات الفاتحه وتانى حاجه معلش هتعبك معاى استعملت ماكينه ازاله الشعر بقيت بحس ان الشعر بيطلع بسرعه وواقف هل كل الماكينات استعمالها كده.
==========
رد بص وطل:
أهلا بيكي يا ندى وبجد احنا سعداء بمشاركتك معانا ويا ريت دايماً تتابعينا وتبعتي لنا اسئلتك ومشاركاتك، وبالنسبة لسؤالك الاول فيفضل إنك تلبسي جيبات غامقة، ولو عايزة تلبسي جيبات فاتحة فيفضل إنك تلبسي الاستايل اللي بيكون نازل على واسع من بعد الوسط علشان ما يحددش المنطقة دي وكمان من الأفضل إنك تلبسي عليها جواكت طويلة شوية بحيث تداري المنطقة دي، أما بخصوص إزالة الشعر فأفضل طريقة هي السويت لإنها بتزيل الشعر من جذوره، وماكينات إزالة الشعر كمان كويسة لكن لازم تستعمليها بالطريقة الصح علشان تشيل الشعر من جذوره وده بإنك تمشي بها على جسمك في عكس اتجاه نمو الشعر وبلاش تكون ملتصقة على جسمك يعني تكون بعيدة مسافة صغيرة عن الجسم.
هاى ايمان انا بستعمل صن بلوك
هاى ايمان انا بستعمل صن بلوك لبشرتى من لونا درجة حماية 50 فهل النوع ده كويس ام لا وبستعمل بودرة مائية سندريلا فهل يوجد نوع بودرة احسن منها علما بان بشرتى بيضاء وبها نمش خفيف.
===========
رد بص وطل:
معامل الحماية للصن بلوك بيتحدد على حسب لون بشرتك والأوقات اللي بتتعرضي فيها للشمس، وعموماً كل ما لون بشرتك بيكون افتح كل ما بتحتاجي لحماية اقوى، أما بالنسبة للبودرة فيفضل إنك ما تستعمليش البودرة المائية بأي نوع لإنها مضرة للبشرة والأفضل إنك تستخدمي كريم اساس مناسب لنوع بشرتك وتثبتيه ببودرة سايبة ودي أفضل الماركات اللي إنتي ممكن تستعمليها وهي "فلوريل" و"مادينا" و"كيرولان" و"ريمال" و"بورجوا" و"كريستيان ديور".
ازيك يا ايمان انا كنت عايزه
ازيك يا ايمان انا كنت عايزه اعرف ايه احسن نوع كريم اساس وايه اللون المناسب للبنات السمره وميرسى اوى علي مجهودكم.
===============
رد بص وطل:
فيه أنواع كتير كويسة زي "فلوريل" و"مادينا" و"كيرولان" و"ريمال" و"بورجوا" و"كريستيان ديور"، وبالنسبة للدرجة المنابة فإنتي لازم تجربيه على بشرتك وفي إضاءة كويسة علشان تختاري الدرجة المناسبة ليكي وممكن تستعيني بالبائع الموجود في المحل لإنه بيكون عنده خبرة في إنه يرشدك للدرجة المناسبة.
هاى ايمى عايزه ماسك للهالات
هاى ايمى عايزه ماسك للهالات السوده تحت العين.
=============
رد بص وطل:
ده ماسك كويس جداً لتفتيح الهالات تحت العين ممكن تجربيه وهو عبارة عن معلقة كبيرة نشا + معلقة كبيرة ماء ورد + معلقة كبيرة خميرة + معلقة كبيرة لبن فاتر + نقطتين زيت لوز + معلقة كبيرة عصير الخيار.
طريقة تحضير الماسك:
بتخلطي المكونات دي كلها مع بعضها كويس أوي، وبتجيبي قطعة شاش من الصيدلية، وبتحطي فيها الماسك ده، وبعدين بتحطيه على عينيك لمدة 10 دقائق، بعد مرور العشرة دقائق بتشيلي قطعة الشاش، وبعدين بتغسلي عينك بالميه الباردة....ممكن بعد ما تخلصي الماسك ده تحطي كريم مرطب حول العين.
انا وشى رفيع بس مش رفيع اوى
انا وشى رفيع بس مش رفيع اوى وعايزة وشى يكون طخين شوية ويكون لونة احمر اعمل اية او اكل اية.
===========
رد بص وطل:
دي وصفة طبيعية ممكن تجربيها وهي عبارة عن خميرة + ماء ورد وبتحطي الماسك ده على بشرتك لمدة ربع ساعة وبعد كده تشطفي وشك بماء الورد والماسك ده ممكن تعمليه مرتين في الأسبوع.
ميرسى اوى يا ايمان بس انا ليه
ميرسى اوى يا ايمان بس انا ليه سؤال كنت عاوزه اسألك عن واقى الشمس اسمه isis pharma وانا بشرتى دهنيه ايه رأيك فيه بليز ردى عليه.
============
رد بص وطل:
النوع ده كويس.
ميرسى اوى على المجهود الرائع
ميرسى اوى على المجهود الرائع ده ممكن اسألك على حاجه يا نانى فى اللبس انا مليانه شويه من تحت وعايزه اجيب فستان فى العيد ممكن تقولي لى اختاره ازاى وتكون تفصيلته ايه وايه اللى يليق عليه فى لبسه وياريت تقولي لى لون يظبط شكل جسمى بليزز ساعدينى وميرسى اوى لمجهودك.
================
رد بص وطل:
أهم حاجة إنك تلبسي ألوان غامقة من تحت وبلاش تلبسي اي حاجة ممكن تشد الانتباع للمنطقة دي زي مثلاً جيب فيها قصات كتير، يعمي حاولي تلبسي الجيبات اللي بتكون نازلة على واسع.
بجد يا نانى انتى بتفيدينى
بجد يا نانى انتى بتفيدينى اووووووى بالمعلومات دى ربنا يخليكى للبنات انا كنت عايزه اسالك انا عندى ريحه جمب انفى وحشه شويه دى ممكن تكون من ايه وازاى اتخلص منها وكمان ياريت تقوليلى على حاجه تضيع ريحه الفم نهائيا بليز يا نانى ارجوكى ساعدينى.
==============
رد بص وطل:
ميرسي ليكي يا soso على ذوقك، وبالنسبة لمشكلة رائحة الفم فإنتي ممكن تتخلصي منها بغسيل الاسنان يومياً، وشرب ميه وسوائل كتير، وكمان احرصي دائماً على إنك تمضغي لبان بالنعناع أو بالقرفة بعد الوجبات، وخلي دايماً معاكي في شنطتك قرنفل لإنه بيعطي للفم رائحة جيدة وكمان بيساعد على التخلص من البكتيريا.
أما بالنسبة لسؤالك التاني فياريت توضحيه شوية لإني مش فاهمة ايه المشكلة بالظبط.
أنا اقصد ان فى ريحه وحشه جمب
أنا اقصد ان فى ريحه وحشه جمب مناخيرى فى ناس كتير قالوا لى كده جمب انفى مش عارفه اعمل ايه.
===============
رد بص وطل:
طيب يا صديقتي العزيزة ممكن تستشيري دكتور أمراض جلدية علشان يعرف إيه سبب ومصدر الرائحة دي ويديكي العلاج المناسب وياريت تطمنينا عليكي.
هااااااااااى يا نانى ميرسى
هااااااااااى يا نانى ميرسى أوي على المجهود الرائع ده أنا كنت عايزة اسألك على ثمن كريم الاساس ماكس فاكتور الاصلى بكام و بودرة دوف الاصلي برضه بكام.
================
رد بص وطل:
ميرسي ليكي إنتي يا noma على ذوقك، وبالنسبة للأسعار فهي بتتراوح من 80 إلى 150 جنيه.
ميرسى أوي على الطريقة الحلوة
ميرسى أوي على الطريقة الحلوة دي بس أنا عايزة اعرف ماركة بودرة وجه كويسة لإني بعاني من الحبوب على الرغم من إن بشرتي جافة.
==============
رد بص وطل:
فيه ماركات كتير كويسة زي "فلوريل" و"مادينا" و"كيرولان" و"ريمال" و"بورجوا" و"كريستيان ديور".
ايمي ازيك الحقيني عندي سمار
ايمي ازيك الحقيني عندي سمار جامد في الركبة ومش عارفه اعمل ايه بليز ردي عليّ.
===========
رد بص وطل:
فيه وصفة سهلة جداً ممكن تعمليها وكل اللي عليكي إنك تدهني المنطقة الغامقة بزيت زيتون وبعد كده تدعكيها كويس بنصف ليمونة مغموسة في ملح ناعم.
هاي يا إيمان أنا اول مرة ابعت
هاي يا إيمان أنا اول مرة ابعت لك وبجد مواضيعك هايلة سؤالي أنا عندي 20 سنة وبشرتى دهنية وعندى بقع مكان الحبوب ومش عارفة اتخلص منها ازاي وياريت تقولي لي على ماركة كريم ليل ونهار وكمان واقي شمس معلش طولت عليكي.
===============
رد بص وطل:
بالنسبة لآثار الحبوب فده ماسك هايل ممكن تجربيه وهو ماسك الخميرة..
الطريقة: تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع.
وبالنسبة لكريم الليل والنهار فإنتي ممكن تستخدمي كريم أولاي وبالنسبة لواقي الشمس ممكن تستخدمي photoderm max أو لونا.
هاى يا ايمى الربطات والمكياج
هاى يا ايمى الربطات والمكياج تحفه بس انتى بتوحشينا ماتتأخريش علينا, كنت عاوزه اسألك على ماركه "اماندا" البودره وكريم الاساس هل كويسه وينفع البشره المختلطه الدهنيه وماركه بينكي زون هل كويسه وفعلا هى مرخصه من وزاره الصحه, ميرسى لكى يا قمر.
===============
رد بص وطل:
ميرسي ليكي صديقتنا العزيزة على متابعتك واهتمامك وبالنسبة لماركة أماندا وبينكي زون فهما كويسين.
هاى يا ايمان بجد ربنا يوفقك
هاى يا ايمان بجد ربنا يوفقك مشكوره على كل التعب ده يارب تفضلى تمتعينا على طول, كنت عاوزه اسألك هل ماسك الترمس المطحون والعسل والزبادى بيفتح بسرعه ولا ماسك الزبادى بالليمون افضل, كنت عاوزه اسألك انا شعرى بقى مقصف وتالف وخشن عاوزه نوع شامبو وكريم حلو ميرسى لكى كتير.
===============================
رد بص وطل:
ميرسي لذوقك يا "dalo3a" وبالنسبة لسؤالك الأول فالماسكين نتيجتهم واحدة تقريباً وتقدري تستخدمي أي ماسك تختاريه فيهم، وبالنسبة لشعرك فانتي تقدري تستخدمي له شامبو دوف أو صانسيلك وكريم تصفيف فاتيكا.
ازيك يا ايمان انا بحبك جدا
ازيك يا ايمان انا بحبك جدا انا عندي سؤال ليكي من فضلك انا عندي بثور سوداء في الانف فقط وعملت محاولات كتير لازالتها ماعرفتش وجربت اللاصق من الصيدلية بيشيلها بس بترجع تاني من فضلك عايزة حل وميرسي علي كل اللي بتعمليه لكل البنات
=========================
رد بص وطل:
ده ماسك كويس للتخلص من مشكلة الرؤوس السوداء يا "بوسي" وكل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تنظفي بشرتك كويس تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
طب انا كنت عايزة أسأل عن افضل
طب انا كنت عايزة أسأل عن افضل طريقة لتنظيف المكياج وخصوصا ماكياج العين والكحل .. وميرسى مقدماً.
========================
رد بص وطل:
أفضل وسيلة لإزالة المكياج وخصوصاً مكياج العيون هو المحلول أو التونيك المخصوص لده أو مناديل إزالة المكياج واللي تقدري تشتريها من الصيدلية وهتلاقي منها أنواع كثيرة.
ازيك ايمان عامله ايه انا عندى
ازيك ايمان عامله ايه انا عندى سؤال انا ساعات بلاقى فى بشرتى قشور ولما بحط الميك اب بتبقى باينه اوى هو ده يمكن عشان مش بستعمل ماسك تقشير للبشرة ولا ايه؟ ولو ده كان السبب ياريت تقولي لى على اسم ماسك للتقشير كويس ووصفه طبيعيه للتقشير وشكرا ليكى.
==========================
رد بص وطل:
أهلاً بيكي يا "ايمو" وأهلاً بكل اسئلتك، وبالنسبة لمشكلة بشرتك فده سببها إنك مش بتجهزي بشرتك كويس للمكياج، وتقدري تجهزيها كويس بإنك تغسليها وتنظفيها كويس وبعد كده تنشفيها وتحطي عليها كريم مرطب من أي نوع تفضليه وتسيبيه على وشك لمدة 5 دقائق وبعد كده حطي المكياج.
السلام عليكم انا بحب الموقع
السلام عليكم انا بحب الموقع ده جدا جدا وهو اول حاجة بفتح عليها
انا لو سمحتم عندى سؤال انا انسانة جامعية يعنى بتعرض للشمس كتير وده بيأثر على لون بشرتى فانا اشتريت كريم واقى من الشمس كنت عايزة اعرف احطه قبل اما اخرج للجامعه بأد ايه؟ ولكم جزيل الشكر بس اتمنى سرعة الرد.
=================
رد بص وطل:
ميرسي ليكي يا رباب وبجد كل فريق عمل بص وطل بيتشرف بصداقتكم دي ونتمنى إنها تستمر وبالنسبة لواقي الشمس فإنتي بتحطيه قبل ما تنزلي في الشمس بحوالي ربع ساعة ولو هتعدي في الشمس لفترة طويلة يبقى بتكرري دهانه على بشرتك مرة كل ساعتين.
مشكلة شعري هي حشرات
مشكلة شعري هي حشرات الشعر
=========================
رد بص وطل:
صديقتي العزيزة تقدري تتخلصي من مشكلة حشرات الشعر دي بإنك تكثري من عدد مرات غسيل شعرك وكمان تقدري تشتري أي لوسيون طبي من الصيدلية وتستخدميه بانتظام وإن شاء الله هتلاقي حشرات الشعر دي اختفت.
هاى يا ايمان ميرسى كتير على
هاى يا ايمان ميرسى كتير على الحاجات التحفه دي ماكياج وملابس تحفه مدلعانا اخر حاجه, ايمان كنت عاوزه اسألك هل كريم لوريال النهار والليل مفتح ولا كريم مرطب فقط؟
وهل كريم ايفا كويس؟
ميرسى ليكى يا إيمان على مساعدتك ليا.
===============
رد بص وطل:
يارب تكون الحاجات اللي بنقدمها فعلاً عجبتك، وبالنسبة لكريم لوريال النهار والليل فهو كريم للعناية بالبشرة وترطيبها وتزويدها بالعناصر الأساسية اللي بتفقدها أثناء اليوم.. وكريم ايفا كمان كويس.
ميرسي ليكي يا ايمان اوي على
ميرسي ليكي يا ايمان اوي على مجهودك الرائع ده
انا فرحي في الصيف ان شاء الله وعايزة اعمل ميك اب وطرحة جديدة ومش تقليدية تنصحيني اعملها فين؟؟
===============
رد بص وطل:
ألف مبروك مقدماً يا سارة وربنا يتمم لك على خير، وبالنسبة للميك اب والطرحة فدلوقتي بقى فيه مراكز تجميل كتيرة خاصة بتجهيز العرايس ممكن تشوفي إيه الأفضل بالنسبة لك وتعملي فيه وكمان تقدري تسألي صحباتك أو قرايبك على مكان يكون كويس ويكونوا جربوه بنفسهم وتعملي فيه.
ميرسى اوى ليكى على المعلومات
ميرسى اوى ليكى على المعلومات الجميلة دي وكان ليا سؤال انا بشرتى فى منطقة الخدود والانف حساها ناشفة اوى ومهما احط كريم مرطب مش بيجيب نتيجة والحكاية دي من فترة قريبة ياريت تقولي لى حل اعالجها بيه من فضلك.
=============
رد بص وطل:
ميرسي ليكي إنتي يا "سوسو" وتقدري تعملي الماسك ده علشان ترطبي بشرتك وهو عبارة عن صفار بيضه + عسل نحل وبتمزجيهم مع بعض وتضعيهم علي الوجه لمدة 15 دقيقه كل اسبوع.
بلييييييييييز فين موضوع انتي
بلييييييييييز فين موضوع انتي اجمل مع ايمان
ياجماعة ده موضوع كان حلو اوي
==========================
رد بص وطل:
صديقتي العزيزة، موضوع إنتي أجمل مع إيمان أيوب هتلاقيه في الأرشيف واللي هتقدري توصلي له عن طريق خريطة الموقع أسفل الصفحة بإنك تدوسي على باب "قمر 14" واللي هيدخلك على كل الموضوعات اللي اتنشرت.
الميك اب يجنن بس انا عايزه
الميك اب يجنن بس انا عايزه اعرف نوع كحل ما يسيحش لان دايما الكحل اللي بحطه بيسيح مني وبجد شكرا لتعبك.
===========
رد بص وطل:
فيه ماركات كحل كتير كويسة زي "فلوريل" و"مادينا" و"كيرولان" و"ريمال" و"بورجوا" و"كريستيان ديور".. وعلشان الكحل مايسيحش بتحطي بودرة سايبة تحت عينيكي وممكن إنك تدفي قلم الكحل على نار لمدة ثانيتين قبل ما تستعمليه.
هاى ايمى ازيك انا بس عايزة
هاى ايمى ازيك انا بس عايزة اسالك سؤال انا شبكتى الخميس القادم وعايزة اعرف بس ماسكات تفيد البشره قبل الفرح وكمان افضل طريقه لتفتيح وتنعيم الجسم لان الفسان كات.
==============
رد بص وطل:
ألف مبروك مقدماً صديقتنا العزيزة وإن شاء الله تكوني عروسة زي القمر، وبالنسبة لتفتيح وتنعيم البشرة فأحسن طريقة هي الحمام المغربي.. وبالنسبة للبشرة فإنتي ممكن تخلطي زبادي مع عسل أبيض وتوزعيهم على وجهك وتسيبيه لمدة 20 دقيقة وبعد كده تشطفي وشك بماء فاتر وممكن تكرري الماسك ده كل يوم.
السلام عليكم.. أنا عندى عشرين
السلام عليكم.. أنا عندى عشرين سنة وبشرتى مليانة مشاكل اولا مليانة حبوب وبقع ومش عارفة اضيعها ازاى.
ثانيا المسام مفتوحة وواسعة أوى وشكلى بقى وحش خالص بليييز بالله عليكم اللى عنده حل يقول لى.
================
رد بص وطل:
صديقتي العزيزة علشان تعتني ببشرتك في الفترة دي يا ريت تقللي من الميك اب وتهتمي جداً بتنظيف بشرتك يومياً ونصيحتي ليكي إنك تستشيري دكتور أمراض جلدية علشان يديكي علاج مناسب لطبيعة الحبوب اللي عندك وبلاش تلعبي خالص في بشرتك علشان ماتعلمش، أما بالنسبة لمشكلة المسام الواسعة فإنتي ممكن تجربي الماسك ده
المكونات:
3نقط عصير ليمون.
معلقة كبيرة خميرة مدوبة في معلقتين ميه.
معلقة نشا مدوبة مع معلقة ماء ورد.
معلقتين لبن.
طريقة تحضير الماسك:
بتحطي المكونات كلها مع بعضها لغاية ما يبقوا مزيج متماسك، ولو المزيج ناشف شوية ممكن تحطي شوية لبن، ولو المزيج طري بتحطي شوية دقيق.
بتحطي الماسك على بشرتك لمدة 5 دقائق، وبعد كده بتشيليه بالميه الفاترة، على فكرة الماسك ده بينظف البشرة وبيسد المسام الواسعة في منطقة الأنف أو الخدود وبيخفف الإفرازات الدهنية في الخدود.
ميرسى يا ايمان يا قمر انا
ميرسى يا ايمان يا قمر انا بموت فيكى وبجد استفدت جدا يا جميل انا ليه سؤال
انا وشى حساس جدا مش بعرف اعمل فتلة بيطلع حبوب فيه فبعمل تشقير وبستعمل جولى ايفا للتشقير عايزة رايك فى كده انا قلقانة من انى بستعمل الكريم مش عارفة مدى ضرره ايه ولو فيه حل تنصحينى بيه، وليه طلب عندك كمان نفسى تعملى حلقة للاظافر انا ظوافرى مش بتطلع نموها بطىء جدا ايه الحل.. مشكوووووووورة جداً يا ايمى.
================
رد بص وطل:
إن شاء الله يا مي تلاقي عدد قريب عن العناية بالأظافر، وبالنسبة لكريم التشقير اللي بتستعمليه فهو كويس ومفيش فيه مشكلة.
هاااى يا إيمان بجد المعلومات
هاااى يا إيمان بجد المعلومات اللى قدمتيها لنا هايلة مشكووووووورة جدا استفدت كتير منها بس عندى سؤال انا وشى حساس جدا مش بعرف اتخلص من الشعر الموجود فيه بعد الفتلة بيطلع حبوب وعلى بال ماتروح ييجى وقت الفتلة تانى
انا غلبت وحاليا باستعمل كريمات تشقير وباستعمل ماركة جولى ايفا
عايزة رأيك فى كده وهل اللى بعمله صح.
=================
رد بص وطل:
الماركة دي كويسة وممكن إنك تعملي إزالة للشعر نهائياً بالليزر.
ميرسى اوى على المعلومات
ميرسى اوى على المعلومات الجميلة دي وليا سؤال من فترة قريبة لاحظت ان منطقة الخدود والانف عندى خشنة شوية مش عارفة ومن ايه وازاى ازيل الخشونة دي مع انى بستعمل كريم مرطب دايما.
=============
رد بص وطل:
خشونة البشرة دي لها أسباب كتيرة زي غسيل الوجه بماء ساخن جداً وكمان كثرة استعمال الماء والصابون على البشرة، وده ماسك كويس جداً لترطيب البشرة وهو عبارة عن صفار بيضه + عسل نحل، وكل اللي عليكي إنك تخلطيهم مع بعض وتوزعيهم على الوجه لمدة 15 دقيقه وبتكرري الموضوع ده كل اسبوع.
هلا ايمان فرحى قرب ومحتاجه
هلا ايمان فرحى قرب ومحتاجه اعرف مركز تجميل موثوق فيه اروح له او خبير تجميل وبليز تردى عليا.
===============
رد بص وطل:
ألف مبروك مقدماً يا "ملك" وربنا يتمم لك على خير، دلوقتي بقى فيه مراكز تجميل كتيرة في كل المناطق خاصة بتجهيز العرايس ممكن تشوفي إيه الأفضل والأقرب لك وتعملي فيه وكمان تقدري تسألي صحباتك أو قرايبك على مكان يكون كويس ويكونوا جربوه بنفسهم وتعملي فيه.
هاى يا ايمى ازيك يا قمر ميرسى
هاى يا ايمى ازيك يا قمر ميرسى اوى على الحاجات الجامدة اللى بتقدميها
ربنا يبارك لك بس ليا سؤال وياريت تجاوبينى عليه الحبيبات المضيئه اللى هى بتبقى فى علبه وعبارة عن كرات صغيرة من البودرة او مش عارفه ايه
دى فعلا كويسه وبتدى الوش او الجسم اضاءة واشراقه ولو هى فعلا كويسه طب ايه رايك فيها من افون ماركه كويسه متهيأ لى.. ياريت تجاوبينى يا قمر.
==============
رد بص وطل:
دي فعلاً كويسة ومنتجات افون كويسة جداً.
ميرسي لردك يا ايمي ... بس
ميرسي لردك يا ايمي ... بس ماقلتيش على نوع كحل مايتمسحش علشان عينيا بتدمع جامد؟؟ أنا بستخدم قلم كحل من اوريفلام ... هو كويس بس لو عينيا دمعت بلاقيه برضه اتمسح واتلخبط.
======================
رد بص وطل:
كل أقلام الكحل ليها درجة ثبات معينة بس في النهاية كلها مع العرق أو الدموع لازم تتمسح علشان كده حاولي تختاري ماركة موثوق فيها وتستخدميها زي "بورجوا" أو "ديور" وده لأن بتكون درجة ثباتهم كويسة.
ميرسى ليكى يا ايمان على
ميرسى ليكى يا ايمان على المعلومات الجميلة عندى سؤال لو ممكن تساعدنى انا ان شاء الله فرحى قرب وبحضر للفرح وانا ماكنتش بهتم بموضوع المكياج بس انا عاوزة اعرف الحاجات اللى انا ممكن احتاجها علشان اشتريها محتاجة اية فى المكياج واية الماركات والمنتجات الكويسة اللى ممكن اشتريها انا اسفة انى طولت عليكى ارجو الرد سريعا وشكرا ليكى.
=======================
رد بص وطل:
إنتي هتحتاجي تشتري كل أدوات المكياج يا صديقتي زي الفرش باختلاف أحجامها واستعمالاتها زي فرش البودرة وفرش الأي شادو ودي بتبقى مجموعة مع بعضها وهتلاقيها عند أي محل بيع مستحضرات تجميل، ده غير إنك هتشتري برضه كريم الأساس والبودرة المضغوطة والكحل بألوانه وعلبة أي شادو فيها ألوان كثيرة وأحمر خدود وكونسيلر وأي لاينر وأقلام روج وملمع للشفاة.
ودي من أفضل ماركات الماكياج اللي ممكن تستعمليها وإنتي مطمنة "فلوريل" و"مادينا" و"كيرولان" و"ريمال" و"بورجوا" و"كريستيان ديور".
هاي ازيكم انشالله تكونوا
هاي ازيكم
انشالله تكونوا تمام
بليز فين موضوع انتي اجمل مع ايمان
مش ظاهر عندي وكنت عاوزة اسال استفسارات
اعمل ايه؟؟
==============
رد بص وطل:
أهلاً بيكي صديقتنا العزيزة وبالنسبة لموضوع إنتي أجمل فهو موجود على الصفحة وتقدري تبعتي استفساراتك عليه.
انا عندي 16 سنة وعايزة اعرف
انا عندي 16 سنة وعايزة اعرف امتي السن المناسب علشان اعمل حواجبي يعني اعملها دلوقتي ولا استني لامتي ؟؟؟؟؟؟
=======================
رد بص وطل:
يفضل إنك ماتعملهاش خالص يا صديقتي ولكن يستحسن إنك تنظفيها وتشيلي الزيادات اللي فيها، وممكن تستني لغاية لما تتجوزي وتعمليها لو كنتي شايفة إن في حاجة لده.
هاى يا ايمان انا بحبك اوى
هاى يا ايمان انا بحبك اوى وأنتى رقيقه جدا وبجد حاجات جميله جدا
كنت عايزه اسألك انا شعرى جاف ايه احسن نوع كريم للشعر الجاف وكنت عايزه اسألك هل رسم الحنه على الجسم يسبب أمراض علشان فى مكونات بتتحط مع الحنه بس أنا معرفهاش علشان فى وحده بترسم لى حنه فانا خايفه الصراحه أرسم حنه ولا مضره للجسم ومعلش طولت عليكى يا ايمو وميرسى ليكى.
================
رد بص وطل:
ميرسي ليكي يا ايمان على ذوقك ورقتك، وبالنسبة لسؤالك فإنتي لازم تعملي حمام كريم لشعرك مرة في الاسبوع علشان تطريه وتغذيه ومن احسن حمامات الكريم اللي ممكن تعمليها هي بوناويل ولوريال.. أما بالنسبة للحنة فهي مالهاش أي أضرار على الجسم بس لازم تتأكدي من المكونات اللي بتتحط عليها.
هاي ايمي ممكن اعرف امبولات
هاي ايمي ممكن اعرف امبولات بانثينول إيفا للشعر كويسة ولا لأ ولو كويسة ايه احسن طريقة لاستخدامها.
==============
رد بص وطل:
امبولات بانثينول ايفا دي كوييس فعلاً وبتستعمليها بالطريقة العادية وهي إنك تاحدي محتويات الامبول وتدلكي بها فروة راسك بلطف
ازيك يا ايمان وازيك يا رنا
ازيك يا ايمان وازيك يا رنا بجد مش عارفة اشكركم ازاى واشكر بص وطل على المجهود الرائع ده وعلى المعلومات المفيدة اللى بتقدموها لينا، بس من فضلك انا عندى سؤال مهم لانه يخص مشكلة بالنسبة ليا وارجو مساعدتكم بخصوصه انا عندى للاسف الحاجب الايمن خفيف جدا عن الحاجب الايسر وتقريبا الشعر فيه مش بينمو خالص وجربت زيت الخروع وجربت الثوم وبرضه مافيش فايدة خالص ارجو مساعدتكم ليا وتقولوا لى اعمل ايه واسفة للاطالة عليكم
==========================
رد بص وطل:
لازم تواظبي على استخدام زيت الخروع على حواجبك وده لأن علاج الشعر أو الوجه بيتطلب وقت طويل نسبياً، وكمان تقدري طول فترة العلاج إنك تستخدمي الأي شادو البني في تغطية وتتقيل حاجبك الخفيف.
ازيك يا إيمان وازيك يا رنا
ازيك يا إيمان وازيك يا رنا بجد مش عارفة اشكركم ازاى واشكر بص وطل على افادتكم لينا بالمعلومات المهمة دى من فضلك يا إيمى كان عندى سؤال يخص مشكلة بالنسبة ليا انا عندى الحاجب اليمين اخف من الشمال وشعره ضعيف جدا وتقريبا مش بيطلع وجربت زيت الخوع وجربت الثوم ومافيش حاجة جابت نتيجة وبجد مش عارفة اعمل ايه وبتمنى يكون عندك ليا حل للمشكلة دى واسفة للاطالة عليكى يا قمر.
=================
رد بص وطل:
ميرسي ليكي جداً يا "shosho" على مشاركتك الجميلة معانا ونتمنى إنك تتابعينا على طول وبالنسبة لمشكلة حواجبك فإنتي تقدري تداريها بالميك اب وباستخدام البودرة المخصصة للحواجب.
شكرا علي معلوماتك لينا بس انا
شكرا علي معلوماتك لينا بس انا عايزه اسألك انا بستخدم كريم اساس والباودر ماركه دوف وكريم الترطيب جونسون ممكن تقولي لي هما كويسين ولا لا شكرا جدا ليكي ومزيد من التوفيق ان شاء الله.
================
رد بص وطل:
الماركات دي كويسة فعلاً بس لازم تجيبيها من أماكن موثوق منها علشان تتأكدي إنها أصلية.
هاي يا ايمان انا بجد مش عرف
هاي يا ايمان انا بجد مش عرف اوصل لك اعجابى بكل اللى انتى بتعمليه ميرسى لكى, انا بشرتى مختلطه دهنيه عاوزه ماسك تفتيح غير الزبادى علشان بيعد ساعتان وده ممل اوى, وكمان عاوزه اسالك هل صابونة ايفا بالجلسرين كويسه وكريمات ايفا كويسه ينفع استعملها, وعاوزه اطمن على نانيس هى امتى هترجع تانى على الموقع, ميرسى لكى يا ايمان.
================
رد بص وطل:
ميرسي ليكي بجد صديقتنا العزيزة على ذوقك العالي ده، وبالنسبة لسؤالك عن تفتيح البشرة الدهنية فإنتي ممكن تجربي الماسك ده
المكونات:
بياض بيضة
معلقة كبيرة عسل أبيض
عصير ليمونة
الطريقة:
اخفقي بياض البيضة مع العسل كويس أوي وبعد كده ضيفي عصير الليمون وخلطي كل المكونات دي مع بعض وبعد كده افردي الخليط على الوجه واتركيه لمدة 20 دقيقة، وبعد كده امسحي وشك بقطنة مبللة بماء الورد، وبعد كده اشطفي وجهك بماء بارد، والماسك ده ممكن تعمليه مرتين في الأسبوع.
وبالنسبة لمنتجات ايفا فهي كويسة.
انا بشرتى دهنية وفى ناس قالوا
انا بشرتى دهنية وفى ناس قالوا لى استخدمى ماء ورد لترطيب البشرة وقفل المسام الواسعة ده صح.
================
رد بص وطل:
فعلاً ماء الورد مفيد جداً لإنه بيمتص الدهون الزائدة من البشرة وكمان بيعمل على قبض المسام.
ميرسى ليكى ايمان على اهتمامك
ميرسى ليكى ايمان على اهتمامك بالرد بس لو سمحتى كنت عاوزة ماركه كويسه لكريم الصن بلوك وكام فى الميه وامتى احطه فى خطوات الميك اب يعنى يبقى بدل الكريم المرطب ولا قبله يعنى فى اى مرحله.
===============
رد بص وطل:
فيه أنواع صن بلوك كويسة ممكن تستخدميها زي لونا وماش وphotoderm max وبتحطيه قبل كريم الترطيب بحوالي ربع ساعة.
ميرسى بجد ليكى معلومات حلوة
ميرسى بجد ليكى معلومات حلوة اووى بس انا كنت عايزة اعرف هى منتجات افون كويسة ولا لا.
===============
رد بص وطل:
منتجات افون كويسة.
انا بس عايزه اعرف ايه نوع
انا بس عايزه اعرف ايه نوع الكريم المرطب اللى هو بيحطه للبنت قبل الماكياج بلييييييييييييييييييييييييييييييييييييييز.
===============
رد بص وطل:
فيه كريمات ترطيب كتير زي نيفيا أو دوف أو نيتروجينا أو ديور.
متشكرة اوى يا ايمان على
متشكرة اوى يا ايمان على مساعدتك ليا بس ليا برضه اسئله، انا هعمل الفستان كله لون واحد من الساتان لون بتنجانى علشان يخلينى ارفع من حجمى شويه بس هلون فى الأيشاربات، بس اجيب الأيشاربات كلها نوع ستان ولونها بتنجانى واصفر علشان انا الأصفر بيليق عليا جدا جدا؟
والجزمه والشنطه اللبسهم فضى ؟ ولا لازم تكون دهبى علشان الايشارب لونه اصفر؟
======================
رد بص وطل:
ممكن تجيبي الإيشاربات بتنجاني في أصفر أو بتنجاني في موف فاتح وشوفي أي لون فيهم أحلى عليكي بس لو هتحطي أصفر في الإيشاربات يبقى لازم الشنطة والجزمة يكون لونهم ذهبي، ولو عايزاهم فضي يبقى اختاري الإيشاربات البتنجاني في الموف الفاتح.
اناعندى 15 سنة مش عارفة السن
اناعندى 15 سنة مش عارفة السن دة كويس اني احط فيه ماكياج ولا بدرى واية شكل الماكياج اللي ينفع وانا كل ما احط كريم اساس بيشقق مع ان بشرتى دهنية وبحس انة بيبرز الحبوب اللى فى وشى ومش باعرف ازاى اخبى الحبوب وميرسى جدا لكى ياايمى وانت فعلا زى القمر.
=========================
رد بص وطل:
لسه بدري شوية عليكي يا "ريرى" في حط الماكياج وخصوصاً إنك بتقولي إن وشك فيه حبوب، علشان كده الأحسن إنك ما تحاوليش تحطي أي مواد تجميل على وشك خالص طول فترة ظهور الحبوب علشان الماكياج بيزود الحبوب وبيساعد في إنتشاره، وممكن تكتفي إنك تحطي كحل خفيف أو ملمع للشفاه، والأفضل إنك تستشيري طبيب أمراض جلدية علشان يحدد لك العلاج المناسب للحبوب.
السلام عليكم, انا كنت عايزه
السلام عليكم, انا كنت عايزه اعرف اسم الكريم المرطب اللى استخدمه قبل الميك اب او اى كريم نظيف جدا بس يكون للبشرة الدهنية وياريت فى اقرب وقت لان عندى فرح بعد اسبوع.
================
رد بص وطل:
فيه كريمات كتير زي نيفيا أو نيتروجينا أو ديور بس أهم حاجة إنك تتأكدي إنك تجيبي النوع الخاص بالبشرة الدهنية.
مكياج بجد رقيق اوى وهادى
مكياج بجد رقيق اوى وهادى وفعلا مناسب للنهار بس انا عندى سؤال انا عندى 26 سنه ووزنى 43 كيلو ونحافتى مسببة لي مشكله انا عملت تحاليل والحمد لله مفيش اى حاجه صحيه لو سمحتى عرفينى اعمل ايه بسرعه.
=============
رد بص وطل:
أهلاً بيكي يا إيمان وبالنسبة لمشكلة النحافة فاحب اقول لك إن لها أسباب كتيرة غير الأمراض العضوية ومنها الحالة النفسية أو طبيعة جسمك نفسها أو إنك مش بتحصلي على السعرات الحرارية اللازمة والحل هو إنك تنظمي أكلك وتحصلي على أكل صحي فيه كل العناصر الغذائية اللازمة لجسمك وكمان إنك تاكلي وجبات فيها سعرات حرارية عالية زي الحلاوة والعسل مع ضرورة ممارسة التمارين الرياضية.
