لكل العرايس.. 8 نصائح للحفاظ على شعرك قبل زفافك

أنا بشكركم على اهتمامكم وردودكم وفرحت جدا لما رديتى علي بجد ميرسى ليكى ويارب يحقق لكي كل حاجة بتتمنيها ويريحك زي ما انتي بتريحيني بنصائحك الجميلة، وطمنتينى على زيت الحشيش بالرغم من ان فى ناس خوفونى وقالوا انه ممكن يخليكى مدمنة منه فهل ده صحيح، واستعمله ازاى؟

===============

رد بص وطل:
ميرسي ليكي جداً صديقتنا العزيزة على كلامك الجميل ونتمنى إنك تتابعينا على طول وتبعتي لنا تعليقاتك وأسئلتك باستمرار، وبالنسبة لسؤالك عن زيت الحشيش فالأفضل إنك تسألي دكتور متخصص عن الموضوع ده علشان يديكي إجابة وافية وأكيدة، ونوعدك إننا في أقرب وقت نعمل عدد عن الزيوت الطبيعية المستخدمة للشعر ومدى فائدتها.

السلام عليكم أنا معجبة جداً بالمعلومات دي جداً وميرسي عليها اوى وعايزة اقول لك ان انا هتجوز فى شهر 7/2010 وعايزة اقول ان شعري خفيف ونفسي يتقل وعايزة يبقى ثقيل في فترة قليلة وعايزة اي حاجة لتفتيح الركبة والكوع وكمان عايزاكى تقولي لي أي نوع شامبو وبلسم يناسب الشعر الناعم لو سمحتى اديني الرد بسرعة ومتشكرة أوي.

=================

رد بص وطل:
ألف مبروك مقدماً يا سمر وربنا يتمم لك على خير، وبالنسبة لسؤالك عن مشكلة شعرك الخفيف فدي ممكن تعالجيها بإنك تعملي لشعرك حمام كريم مرة في الأسبوع وكمان تهتمي بالتغذية الصحية والمتوازنة واللي بتحتوي على كل الفيتامينات اللازمة للشعر والبشرة، ودي كمان وصفة كويسة لعلاج مشكلة الشعر الخفيف ممكن تجربيها وهي عبارة عن معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة :
اخلطيهم كويس مع بعض وبعد كده افردي لخليط على شعرك كامل ولفيه بفوطه دافئه لمدة ساعتان وبعد كده اشطفيه بماء فاتر.
ومن أحسن الشامبوهات اللي ممكن تستعمليها هيربل اسينسز أو بانتين أو دوف.
وبالنسبة لتفتيح الكوع والركبة فدي وصفة سهلة جداً ممكن تجربيها وهي إنك تدهني المنطقة الغامقة بزيت زيتون و وبعد كده تدعكيها كويس بنصف ليمونة مغموسة في ملح ناعم.

السلام عليكم شكرا أوى على الوصفات الجميله بس انا جربت الماسك بتاع صفار البيض على شعرى بس شعرى ريحته كانت بيض خالص، وكنت عاوزه اعرف ازاى الف شعرى بالرول وازاى اقسم شعرى مع العلم ان شعري قصير ومكسر خالص
وشكرا لمجهوداتك الرائعة.

================

رد بص وطل:
ميرسي ليكي إنتي صديقتنا العزيزة على متابعتك لينا، وبالنسبة لماسك صفار البيض فإنتي ممكن تتغلبي على الريحة بإنك تغسلي شعرك بشامبو له رائحة قوية وتغسليه كويس جداً، أما بالنسبة للف الشعر فدي بسيطة جداً وكل اللي عليكي إنك تقسمي شعرك لنصفين وتاخدي كل نصف وتقسميه لخصلات صغيرة جداً وتلفيها على الرول.

شكرا على النصائح الرائعه.. انا فرحى بعد شهرين وكنت عاوزه اعرف وصفه استعملها فى الفتره دى تزيد من كثافته وكمان عندى مشكله الهالات السوداء ياريت الاقى وصفه او كريم معين استخدمه ارجو المساعده.

===============

رد بص وطل:
ألف مبروك مقدماً يا مريم وربنا يتمم لك على خير، وأحسن حاجة تعمليها لشعرك في الفترة دي هي حمامات الكريم المغذية وبتعمليها مرة كل أسبوع، ودي كمان وصفة بتزود من كثافة الشعر وهي عبارة عن معلقة زيت زيتون + معلقة زيت الخروع + معلقة زيت اللوز + صفار بيضتين.
الطريقة :
اخلطيهم كويس مع بعض وبعد كده افردي لخليط على شعرك كامل ولفيه بفوطه دافئه لمدة ساعتان وبعد كده اشطفيه بماء فاتر.
أما بقى بالنسبة لمشكلة الهالات السوداء فدي شوية وصفات ممكن تعمليها كل يوم قبل النوم وهما..
1- ممكن إنك تضعي ماسك الزبادي بالعسل على منطقة الهالات السوداء كل يوم حوالي ساعتين قبل النوم.
2- وضع زيت الزيتون على الجفن السفلي قبل الذهاب للنوم.
3- وضع قطعة قماش قطنية مشبعة بالحليب على العينين لمدة 10 دقائق.

بصى انا عروسة وشعرى مجعد ومكسر اوىىىىىى وكمان دايما ناشف لانى مش مهتمة بيه وانتى بتقولي ان لازم تبتعدى عن كريمات الفرد طيب اعمل ايه وشعرى كده وانا كنت ناوية اعمل كريم فرد قبل الفرح وصبغة انصحينى بليييييييييييز وشوفي لى حل.

==============

رد بص وطل:
أحسن حاجة إنك تعملي لشعرك حمام كريم مرة في الأسبوع وممكن تستخدمي منتجات زي لوريال أو بوناويل، ودي كمان وصفة بتساعد على فرد تجاعيد الشعر وهي عبارة عن صفار بيضة واحدة + نصف ملعقة زيت زيتون + كوب إلا ربع من الماء الفاتر.

الطريقة:
اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق قبل ما تشطفي شعرك.

انا عاوزة اسأل على كريم اولاى للتفتيح وافضل انواع ماسكات تغذية البشرة وشكررررررا.

================

رد بص وطل:
منتجات أولاي كويسة لكن بالنسبة لتفتيح البشرة فيفضل إنك تستخدمي الماسكات الطبيعية وده ماسك كويس جداً لتفتيح البشرة وتغذيتها ممكن تجربيه وهو عبارة عن لوز مطحون + بياض بيضة + نصف ليمونة.

الطريقة:
• انقعي اللوز في الماء حتى تستطيعي نزع القشرة منه.
• اطحني اللوز المقشر في الخلاط حتى يصبح بودرة.
• اخلطي اللوز المطحون مع بياض البيضة مع نصف الليمونة حتى تتجانس مع بعضها البعض.
• ثم ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك.
• كرري هذه العملية كل يوم وسوف ترين الفرق.

أنا بشرتي شكلها دبلان ومرهق اوي فعاوزة حل ليها ضرورى وكمان اسم كريم مرطب يكون كويس انا بشرتى مختلطه وحاجة لترطيب الشفايف واعطاؤها نضارة لانها على طول ناشفه ومشققة صيف وشتا فبليز تقولي لي اعمل لها ايه وميرسي اوي.

===================

رد بص وطل:
علشان بشرتك تبقى نضرة وشكلها حلو ومنور، لازم تنامي كويس جداً وتبعدي عن السهر والإرهاق، وكمان لازم تشربي ميه كتير طول اليوم، وبالنسبة لكريمات الترطيب ففيه حاجات كتير منها نيفيا وأولاي ودوف بس لازم تجيبيه للبشرة المختلطة، أما بالنسبة لتشقق الشفايف فكل اللي عليكي إنك تدهنيها كل يوم بالفازلين الطبي.

أنا قربت اتجوز يعني ان شاء الله 3 شهور شعرى كان جميل ومرة واحدة استعملت شامبو للقشرة نشف شعرى جدا وبوظه خالص قولي لى اعمل ايه فى ناس نصحونى بزيت الحشيش الاصلى ارجو الرد عليّ ضرورى واعمل ايه فى شعرى.

=================

رد بص وطل:
صديقتنا العزيزة شامبوهات القشرة دي يفضل إنك تستخدميها تحت إشراف دكتور متخصص، وبالنسبة لزيت الحشيش فهو فعلاً كويس وله فوائد كتيرة جداً للشعر.

الموضوع ده جميل جدا جدا ومحتاجاه فعلا لان فرحى قريب، مشكلتى بقى شعرى طويل وبقى خفيف اوى اوى، عايزة حاجه سريعه ترجعه تقيل تانى ياريت وانا بستعمل حمام كريم اسمه مينك بدهن الحيه وكريم الماجيك، بس سمعت ان امبولات لتتقيل الشعر ممكن نضفيها للكريم يا ريت لو تقولي لى عليها وعلى وصفه كمان، واستعمل ايه لشعرى.

=================

رد بص وطل:
ألف مبروك مقدماً يا عروستنا الجميلة، وميرسي على كلامك الجميل ده، وبالنسبة لسؤالك عن أمبولات الشعر فدي لازم تستعمليها تحت إشراف طبي علشان يديكي النوع المناسب ليكي على حسب اللي شعرك محتاج له.

مرسي علي المعلومات الجميلة ديه بس ممكن تقوليلي اجيب كريم غارنيه للهالات السودة منين وبكام ضرورى.

===============

رد بص وطل:
كريم غارنييه هتلاقيه في الصيدليات الكبيرة.

جميل اووووووي الموقع الرائع ده بجد شجعتوني اهتم بنفسي وبشعري لاني بيأس منه بسرعه وكمان كليتي مش مخلياني مهتميه به بس ياريت كمان وصفات للبشرة تكون مفيدة للتفتيح والاهتمام بيها.

==================

رد بص وطل:
ميرسي جداً يا ياسمين على رايك وكلامك الجميل ده، ويا رب دايماً نكون عند حسن ظنكم، ودي مجموعة من الماسكات الطبيعية لتفتيح البشرة وتغذيتها وإنتي أختاري المناسب ليكي...
أولا: ماسك اللوز
المكونات:
لوز مطحون.
بياض بيضة.
نصف ليمونة.
الطريقة:
انقعي اللوز في الماء حتى تستطيعي نزع القشرة منه، وبعدين اطحني اللوز المقشر في الخلاط حتى يصبح بودرة، اخلطي اللوز المطحون مع بياض البيضة مع نصف الليمونة حتى تتجانس مع بعضها البعض، ثم ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك، كرري هذه العملية كل يوم وسوف ترين الفرق.

ثانياً: ماسك الموز
المكونات:
موز + نصف كوب من اللبن.
الطريقة:
تهرس الموزة، يوضع عليها اللبن ويخلط جيداً، ويوزع الخليط على البشرة مع التركيز على الأماكن الغامقة في البشرة، ويترك لمدة ربع ساعة ثم تغسلين الوجه بالماء، بس المياه تكون فاترة، والماسك ده مش بيبيض الوجه بس لأ وكمان بيكسبه نعومة وحيوية ليس لها مثيل.

ثالثاً: ماسك البطاطس
المكونات:
ثمرة بطاطس + لبن حليب.
الطريقة:
اسلقي البطاطس واهرسيها، واخلطي البطاطس المهروسة مع اللبن وياريت في الخلاط لغاية ما تبقى ناعمة، وبتضعي الخليط على وجهك وتتركيه لمدة نصف ساعة حتى ينشف، ثم اغسلي وجهك بالماء الدافئ ثم بالماء البارد، علشان غسيل الوجه بالماء البارد ثم الدافئ بيعطي للبشرة انتعاشا، وتعملي الماسك ده مرة كل أسبوع وهتلاحظي الفرق.

ميرسي يا قمر علي المعلومات دي بس ممكن اعرف ايه انواع حمامات الكريم الكويسه؟

==============

رد بص وطل:
فيه أنواع كتير ومنها لوريال وبوناويل.

انا بشكر بص وطل على الحاجات الحلوة دى، وانا نفسى اعرف سلطة الكرنب عشان انا بحبها جدا وياريت خلال هذا الاسبوع.

===============

رد بص وطل:
حاضر نوعدك إننا نقدمها لك في أقرب وقت ممكن.. بس إنتي تابعينا.

من فضلك تقولي لى على طريقه عمل عصير الجرجير للشعر وحاجه تانيه انتى كاتبه وصفات كتير للشعر انا شعرى جاف وبعمله حمام زيت مره فى الأسبوع وبغسله مره واحده ومش بيقع كتير وبقصه كل فترة من الأطرف بس هو اطرافه بتكون ناشفه لما بستعمل الزيت فى شعرى ممكن تقولي لى استعمل إيه بالظبط زيت ولا كريم واسرع وصفه اعملها علشان شعرى يطول فى شهر أو اقل علشان خطوبتي كمان شهر معلش طولت عليكي ياريت تفيديني ربنا يخليكي.

==================

رد بص وطل:
بالنسبة لعصير الجرجير فكل اللي عليكي إنك تضربيه في الخلاط، وتاخدي الميه بتاعته تدلكي بها فروة رأسك، وتقدري تعملي لشعرك حمام كريم بالزيوت الطبيعية مرة كل أسبوع، أما بالنسبة لتطويل الشعر فده بيحتاج لمدة طويلة شوية أكتر من شهر.

لو سمحتى انا عندى مشكلة فى شعرى انا شعرى طويل وتقيل انا محجبه وتقريبا مش بروح للكوافير وشعرى كان كويس مش ناعم اوى بس كان حلو وممكن اسرحه واعمل فيه اى حاجه وبستخدم شامبو مناسب وكريم مناسب بس فجاه شعرى اتقصف وبقى ناشف جدا وبيقع وانا فرحى فى الصيف وخطيبى شاف شعرى علق عليه جدا، وانا اتحرجت اوى غير ان شعرى بجد مضايقنى اوي ومخليني مضايقه منه وعماله اجيب زيوت وكريمات واغير الشامبو بس مفيش فايده ارجوكى ساعدينى اعمل ايه اخليه لامع وناعم وكمان عندى مشكلة تانيه انا وجهى ناعم جدا جدا بشكل ملحوظ فجأه اصبح ناشف وظهرت فيه قشور على الانف والخدين انا ممكن اغطيها بالميك اب بس انا عايزه اعالجها ارجوكى ساعدينى واسفه انى طولت عليكى وضايقتك.

=================

رد بص وطل:
ألف مبروك مقدماً صديقتنا العزيزة، وبننصحك باستشارة دكتور أمراض جلدية وعمل بعض الفحوصات والتحاليل علشان تعرفي ايه سبب مشاكل شعرك وبشرتك اللي ظهرت فجأة دي وتبداي تعالجيها ويا ريت تطمنينا عليكي.

بليز عاوزة اعرف اعمل الكيراتين عند مين كوافير كويس ومايكونش غالي أوي وايه رايك في كريمات التفتيح يا ترى بتفتح بجد ولا لأ.

==================

رد بص وطل:
فيه مراكز كتير دلوقتي بتعمل الكيراتين موجودة في مصر، وسعره بيتراوح بين 1500 إلى 5000 جنيه، وبالنسبة لتفتيح البشرة فيفضل إنك تستخدمي الماسكات الطبيعية لإن كريمات التفتيح دي بتحتوي على مواد ممكن تسبب مشاكل للبشرة لما بتتفاعل مع أشعة الشمس.

شكرا بجد على المعلومات التحفه ده
بس ليه سؤال انا شعرى كويس إلى حد ما بس عايزة حاجة تخليه ناعم وتشيل الموجه منه لانها مضايقانى اوى
ويا ريت لو تقولي لى اى حاجة اعملها للهالات وايه راى حضرتك فى كريم غارنييه للهالات.

================

رد بص وطل:
دي وصفة كويسة لتنعيم وترطيب الشعر وكمان بتساعد على فرد التموجات ا للي فيه وهي عبارة عن صفار بيضة واحدة + نصف ملعقة زيت زيتون + كوب إلا ربع من الماء الفاتر.

الطريقة:
اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون بالقطارة تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق قبل ما تشطفي شعرك.
أما بالنسبة للهالات السوداء فكريم غارنييه كويس ودي كمان شوية وصفات طبيعية ممكن تعمليها كل يوم قبل النوم..
1- ممكن إنك تضعي ماسك الزبادي بالعسل على منطقة الهالات السوداء كل يوم حوالي ساعتين قبل النوم.
2- وضع زيت الزيتون على الجفن السفلي قبل الذهاب للنوم.
3- وضع قطعة قماش قطنية مشبعة بالحليب، وأغمضي عينيك حوالي 10 دقائق.

انا بشكرك على ردك ليا وبشكر بص وطل اللى منورة الدنيا انا اختى خطوبتها الجمعه الجاية وفستانها لونه دهبى غامق عاوزه تعرف تلبس ليه ايه بادى والطرح الوانها ايه وكام طرحه والميك اب كمان وميرسى basbosa

=============

رد بص وطل:
ألف مبروك لأختك يا بسبوسة وربنا يتمم لها على خير، وبالنسبة للون البادي فهي ممكن تلبسي بادي لونه بيج أو ذهبي بلون الفستان، وبالنسبة لألوان الطرح ممكن تدخل ذهبي مع بني مثلاً وبيج.

ميرسي قوي علي العدد الهايل انا كنت عملت شعري كريم فرد ونصة وقع وبدا يطلع تاني بس انا حاسة انه ضعيف قوي وبيكسر وكمان مقصف جدا لو ممكن كنت عايزة زي برنامج امشي عليه وأسماء حمامات كريم.

==================

رد بص وطل:
لازم تهتمي بالتغذية الصحية وأكل خضار وفاكهة طازجة كتير، وممكن تستعملي حمامات كريم زي بوناويل ولوريال.

ارجوكم لا تستعملوا الكيراتين فى فرد الشعر لان اطباء الجلد المتخصصين حذروا بانة مسبب للسرطان اللهم انى قد بلغت

السلام عليكم ورحمة الله وبركاتة انا قربت على ميعاد جوازى باذن الله بس المشكلة فى شعرى محتاجة انى اطولة واخلية تقيل هو ناعم بس مش قوى لانى بعمل حمام كريم مرتين فى الاسبوع بس بجد بجد محتاجة ان شعرى يطول لانة مش بيطول وخفيف جدا ومحتاجة انى اتقلة لو سمحتم قولوا لى اعمل اية بجد فرحى قرب وربنا يجازيكم كل خير.

=========================

رد بص وطل:

شعرك ممكن يطول بكل سهولة يا "نهاد" لو عرفتي سبب عدم نموه وهو ممكن يكون سبب عضوي وعلشان كده لازم تعملي تحليلات وصورة دم كاملة وتواظبي على حمامات الكريم المغذية واهتمي إنك تأكلي الأكل الصحي اللي بيحتوي على الفيتامينات، وتقدري كمان تعملي الوصفة دي واللي بتتكون من موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

سلام عليكم :) بجد انا بشكركووو اوووي علي المجهود الرائع اللي بتقدمووه في الركن دا يالاخص :)) انا عندي سؤال, انا شعري مقصف و بيقع كتيـــــــــر ودا عاملي مشكله كبيره جداا ممكن تقولي لي علي علاج كويس يعني حمام كرريم.. للعلم انا عامله فرد حنا من 6 شهور كدا وهو دا تقريبا السبب الرئيسي للمشاكل دي كلها :<.

===============

رد بص وطل:
ميرسي ليكي صديقتنا العزيزة على ذوقك، وبالنسبة لسؤالك فإنتي ممكن تستخدمي حمامات كريم زي لوريال أو بوناويل، وبلاش تكرري موضوع الفرد بالحنة ده تاني لإنه بجد مؤذي جداً للشعر.

ميرسى على المعلومات المفيده جدا بس انا عندى مشكله ونفسى الاقى الحل هو ان شعرى بيتنحل من ادام انا بستخدم زيت الزيتون بينبت بس خفيف جدا مع العلم ان شعرى طويل فهل الطول هو اللى بيأثر وميرسى جدا.

=================================

رد بص وطل:

كل مازاد طول الشعر يا صديقتي العزيزة كل ما لازم تزودي اهتمامك بيك بإنك تغذيه بالزيوت الفيدة وتقصي أطرافه كل 45 يوم، وبالنسبة لمشكلة نحول شعرك من الأمام فالحل هتلاقيه موجود في عصير الجرجير ممكن فانتي ممكن تجيبي الجرجير وتعصريه وتأخذي العصير بتاعه وتحطيه على فروة رأسك بأطراف صوابعك لأن ده هيزيد من نسبة إنبات الشعر المتساقط ويقوي بصيلة الشعر، ويا ريت كمان تهتمي بأكلك وتلعبي رياضة لأن كل ده بيساعد في تقوية الشعر ومنع سقوطه.

متشكرة على كل التعب اللى بتتعبوه علشانا ربنا يجازيكم خير عننا .. سؤالى هل حمام المايونيز مفيد للشعر ام حمام زيت الذرة، لأن شعرى هايش ومجعد وعايزة حل له. انا اصل شعرى كويس وشعرى كان تحفة بس حسبى الله ونعم الوكيل واحده ناشته عين مارجعش زى ماكان ابدا.فأنا عاوزة حل يتقل شعرى ويخليه طرى وكويس زى ماكان. ولكم جزيل الشكر وفائق الاحترام.

==================

رد بص وطل:

شكراً لمتابعتك يا صديقتي العزيزة وبالنسبة لحل مشكلة شعرك فانتي تقدري تعملي الوصفة دي بإنك تجيبي المادة اللزجة اللي بتكون في نبات الصبار وتخلطيها بكوب من زيت جوز الهند وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو، وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر وتديله نعومه ولمعان والوصفة دي بتكون مفيدة لشعرك أكثر من حمام زيت الذرة أو المايونيز.

شكرا علي النصايح المهمه كلها لكن سؤالي انا سمعت ان الشامبو غلط اوي علي الشعر واننا مفروض نخففه بالمياه للتخفيف من اضراره وده منقول عن خبير تجميل ياريت تقدموا لنا بديل للشامبو.

========================

رد بص وطل:

يفضل فعلاً يا صديقتي العزيزة إنك تخففي الشامبو بشوية مية قبل ما تحطيه على شعرك، لكن في أنواع من الشامبوهات بيكون ضررها قليل أوي وتقدري تستخدميها زي بيبي جونسون أو دوف.

انا كنت عايزة اسأل طريقة عمل عصير الجرجير ووضعة على الشعر واحطة فى التلاجة ولا اية عشان انا عملت بس بعد كدة لقيت لونة اتغير كنت عايزة اعرف هو طريقتة ازاى واسفة على الاطالة هو لما اعملة فى البيت مدة الصلاحية تكون قد اية، وشكرا يااحلى بص وطل.

==========================

رد بص وطل:

الموضوع بسيط جداً يا صديقتي العزيزة، لأنك هتجيبي الجرجير وتضربيه في الكبة أو الخلاط وتصفيه وتأخذي العصير اللي هيتبقى عندك وتشيليه في الثلاجة لمدة ما تزيدش عن أسبوع.

ميرسى اوى على المعلومات التحفة دى بس انا عندى مشكلة مرعبة بطلت ابص فى المراية من كتر مابقى شعرى فى حالة سيئة ورحت لدكاترة كتير ومفيش فايدة ومقدرش اعمل كيراتين لانة بيبطل الوضؤ فارجوكى ادينى حل انا عمرى27سنةومش متجوزةشعرى مش بيطول خااااااااااااااااااااااااالص ومتقصف جدا ومن قدام قصير جداااااااااا وخفيف جدا ومن قدام ناحل وضعيف جدا لو بس شديدة بسيط بيقع فى ايدى الشعرةبتنزل بالبصيلةمعاها وصلت انى بخاف اسرحة لحسن ينزل كلة فارجوكم عاوزة حل انا بستخدم شامبو بانتين بالحليب وكريم بالمرز بجوز الهند او فاتيكا بالزيتون وبرضوا مفيش فايدة اعمل اية؟؟؟؟؟؟؟؟؟

==============================

رد بص وطل:

لازم تعرفي يا صديقتي العزيزة إن لتأثير الحالة النفسية عامل مهم جداً في سقوط الشعر ومن الممكن إن يكون سبب سقوط شعرك مش عضوي بس نفسي علشان كده إنتي محتاجة تستشيري دكتور أمراض نفسية، وممكن كمان تجيبي الجرجير وتعصريه وتأخذي العصير بتاعه وتحطيه على فروة رأسك بأطراف صوابعك لأن ده هيزيد من نسبة إنبات الشعر المتساقط ويقوي بصيلة الشعر، ويا ريت كمان تهتمي بأكلك وتلعبي رياضة لأن كل ده بيساعد في تقوية الشعر ومنع سقوطه.

انا عاوزه اسأل الكيراتين ده بيتعمل ازاى وبيقعد اد ايه وهو غالى ولا ايه؟

=======================

رد بص وطل:

الكيراتين هو ماده طبيعية بتفرد الشعر وتنعمه وتعالجه من مشكلة التقصف، وفايدته إنه بيعوض نقص الكيراتين الطبيعى اللى موجود فى الشعر وهو بيتكلف من 1500 لـ 5000 جنيه، وأغلى نوع ده تأثيره دائم على الشعر وهو بيستمر المدة اللي تختاريها يعني هتلاقي نوع بيستمر 6 شهور ونوع آخر بيستمر سنة.

شعرى مقصف وخفيف وبغسله بشامبو سباركل وبدهنه بكريم كازانوفا الحاجات دى كويسه لشعرى وعايزه حاجه لتكثيف الشعر مع العلم إن شعرى ناعم بليز قولي لى على حل مش معايا حمامات كريم وحمامات الزيت وفرحى قرب أعمل إيه؟

=========================

رد بص وطل:

علشان تتخلصي من تقصف الشعر تقدري تعملي الوصفة دي واللي بتتكون من: موزة + معلقتين زيت زيتون + معلقتين عسل نحل و بتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة. ونوع الشامبو والكريم اللي ذكرتيهم كويسين وتقدري تستخدميهم.

السلام عليكم، جزاكم الله كل خير ممكن تقولوا لى ايه الماسكات الطبيعية لتفتيح البشره الحساسه والشامبوهات الطبيه هل ليها ضرر على الشعر وايه هو نوع الزيت الكويس للشعر ؟

=========================

رد بص وطل:

وعليكم السلام ورحمة الله وبركاته، بالنسبة لماسكات التفتيح يا "اسماء" فتقدري تعملي الوصفة دي واللي بتتكون من معلقتين لبن بودرة + ماء ورد + معلقتين بياض بيضة + نص معلقة نشا، وبتخلطي المكونات كلها مع بعضها وبعدين تفردي الخليط على وشك وتسيبيه لمدة ربع ساعة وبعد كده تغسلي وشك بماء دافئ ثم بماء بارد، وممكن تعملي الوصفة دي مرتين في الأسبوع.
وبالنسبة للشامبوهات الطبية فبالتأكيد مالهاش ضرر على الشعر وبالنسبة للزيت فتقدري تستخدمي زيت دابر أملا أو فاتيكا أو أي زيت طبيعي تحبيه زي زيت الجرجير أو اللوز.

هاااااى ميرسى اوى لمجهودك الرائع ده انا عندى مشكله فى شعرى فى طرف اى شعره من شعرى الطرف بتاعها بيتقسم نصفين مش عارفه اعمل ايه ياريت تساعدينى وتكونى فهمتينى.

=====================

رد بص وطل:

مشكلة شعرك يا صديقتي بيطلق عليها " تقصف الشعر" وهي لما أطراف الشعر بتتقسم نصفين أو أكثر ودي ممكن تتخلصي منها بإنك تقصي أطراف شعرك كل 45 يوم وكمان ممكن تعملي الوصفة دي واللي بتتكون من موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.

عايزه اعرف الشعر بياخد وقت قد ايه علشان ينمو ويطول؟

========================

رد بص وطل:

الشعر بيأخذ فترة طويلة نسبياً يا "مارو" علشان ينمو ويطول وبتتراوح من 3 إلى 6 شهور.

انا وقت ظهور الشعر وعلى الرغم انه بيتأخر فى انه يطلع تانى بس بيوجعنى وقت ظهوره وبيطلع لى حبوب يا ترى دا ليه وايه الحل للعلم شعر المنطقة الحساسة والرجل؟؟ وانا كنت عملت وشى مرة بالحلاوة هل هى هتسبب ضرر فى وشى؟ وحاجة كمان انا بحط على وشى زيت زيتون علشان الشعر يقل وانا بشرتى دهنية هل ده فى ضرر؟؟ ولكى جزيل الشكر.

====================

رد بص وطل:

مشكلتك يا صديقتي العزيزة مالهاش سبب معين غير إن دي طبيعة بشرتك وعلى ما يبدو إن بشرتك كمان حساسة وده اللي بيفسر ظهور الحبوب المصاحب لنمو الشعر ويفضل إنك تستشيري طبيب أمراض جلدية علشان يحدد لك العلاج المناسب، وبالنسبة لاستخدام الحلاوة لإزالة شعر الوجه فهو مضر جداً والأفضل إنك ماتكررهاش تاني لأن ده بيؤدي للتجاعيد المبكرة ويخلي كمان الوجه يترهل والأحسن إنك تستبدليها بالفتلة، وبالنسبة لزيت الزيتون فيفضل لإنك ماتستخدمهوش تاني علشان بشرتك دهنية وممكن تختاري أي طريقة من الطريقتين دول وتعمليها لتقليل الشعر:

1- انقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على كل مكان عاوزاه خالي من الشعر...... واستمري على ذلك لمدة 3 أسابيع يوميا.

2- استخدمي نبات السعد -هتلاقيه عند العطار. خدي 3 معالق من مسحوق النبات وضيفيه إلى "لتر ماء" وحطيه على النار لغاية ما يغلي ثم يترك لينقع لمدة ربع ساعة.... ثم يوضع كغسول بعد إزالة الشعر لمدة 6 أيام متواصلة من كل شهر.

انا بستعمل سيرم اسمه هير جين ده الدكتوره هى الى قالت لى عليه لان شعرى خفيف فهل السيرم ده ضار ام مفيد مع العلم انه فى الاول حسيت انه جايب نتيجه لكن دلوقتى لا ولو مش الدوا ده وحش ايه الافضل؟؟

====================

رد بص وطل:

صديقتي العزيزة السيرم ده مش بيستخدم لعلاج الشعر ولكنه بيستخدم للحفاظ على الشعر من الاستشوار وكثر استخدامه بيكون مضر على الشعر وبينصح كمان إنك ماتحطهوش فترة طويله على شعرك، ولو كنتي عايزة تزيدي من كثافة شعرك ممكن تعملي الوصفة دي واللي بتتكون من:
معلقة زيت زيتون + معلقة زيت الخروع + معلقة زيت اللوز + صفاربيضتين.

الطريقة :
اخلطيهم كويس مع بعض وبعد كده افردي لخليط على شعرك كامل ولفيه بفوطه دافئه لمدة ساعتان وبعد كده اشطفيه بماء فاتر.

لو سمحتى اعالج القشرة ازاى ؟

=====================

رد بص وطل:

بالنسبة لمشكلة القشرة فانصحك انك ماتستعمليش أي شامبوهات ضد القشرة إلا تحت اشراف دكتور متخصص في الأمراض الجلدية وممكن تشطفي شعرك بالخل بعد ماتكوني غسلتيه بالشامبو ودي طريقة طبيعية وفعالة لعلاج مشكلة القشرة.

اهلا بيكم يا احلى بص وطل انا فرحى بعد 20 يوم ولحد دلوقتى مش لاقية وقت اهتم فيه بنفسى انا عايزاكم تعملوا لى جدول والله علشان العناية بالشعر والجسم فى الاسبوعين دول انا والله لقيت وقت بالعافية علشان اقعد على النت ارجوكم ساعدوووووووونى وعقبال كل البنات يااحلى بص وطل.

=======================

رد بص وطل:

ألف مبروك يا صديقتي العزيزة وربنا يتمم بخير إن شاء الله، وهيكون معانا قريب كل اللي طلبتيه بس أهم حاجة إنك تتابعينا وتقولي لنا رأيك دايماً.

ميرسي يا قمر على المعلومات الجميله دي بس انا شعري تعبان قوي مع اني مبطله الاستشوار من زمان قوي من يجي 4 شهور بس دايما هايش وتعبان وانا بستعمل شامبو دوف وكريم بالمز مش عارفه اذا كانوا كويسين ولا لأ بليز تردي عليا بسرعه.

====================

رد بص وطل:

ميرسي ليكي إنت يا " soso" وميرسي لمتابعتك، وبالنسبة لشامبو دوف وكريم بالمز فهم كويسين بس حاولي كمان إنك تستعملي زيوت طبيعية زي زيت الجرجير واللوز والصبار.

ميرسي ياقمر ربنا مايحرمني منكم

عدد بجد هايل وجميل اوى انا عروسه وفرحى فى الصيف انا شعرى حلو وكل حاجه بس انا من النوع اللى مش بهتم بيه بس حاليا بعمل دوامه وكريمات وحمام كريم بس بكسل بصراحه المهم انا كنت بفكرقبل فرحى اروح الكوافير واخليهم يظبطوا شعرى واعمل خصل وحاجات كده يا ترى اطلب منهم ايه يعملوا فى شعرى خصوصا لو ماكنش الكيراتين متواجد عندنا مش عارفه بجد اعمل خصل وخلاص نفسى اعمل حاجه جديده خطيبى يحس بيها افيدووووووووووووووونى

=======================

رد بص وطل :

ألف مبروك يا "روني" على الفرح وربنا يتت بخير إن شاء الله، وانتي ممكن تطلبي من الكوافيرة إنها تعمل لك قصة جديدة تليق عليكي وكمان ممكن تلوني خصل من شعرك وتعمليها هاي لايت بأي لون تختاريه ومش مستحب تعملي كيراتين خصوصاً إن شعرك ناعم زي ما بتقولي.

عندي طريقة لزيادة كثافة الشعر ودي عن طريق الحنا
المكونات:حنا من عند العطارأعجنها باللبن+عسل ابيض+زبادي وتترك على الشعر لدة 6 ساعات وتكرر الحنا لمدة شهر (مرة في الأسبوع)

شكرا على النصايح الغاليه دى انا عروسه وفرحى بعد ثلاث اشهر شعرى طويل بس ضعيف وبيتساقط وانا عايزه اصبغه بس خايفه انه يضعف اكتر ومش عارفه اعمل ايه وانا بدأت اهتم بيه بس عايزه اسماء لانواع حمام كريم كويس وكمان شعرى خفيف من الامام وسمعت ان الثوم مفيد لكدا ارجوا الافاده.

======================

رد بص وطل:

ألف مبروك على فرحك يا "mayar" وربنا يتمم بخير، وبالنسبة لحمامات الكريم الكويسة ممكن تستخدمي حمام كريم لوريال أو ريفلون أو بوناويل، أما بالنسبة لمشكلة نحولة شعرك من الأمام فانتي ممكن تستخدمي الجرجير في إنك تعصرية وتأخذي العصير بتاعه وتدهني بيه فروة شعرك من الأمام وكل أماكن خالية من الشعر وإن شاء الله النتيجة هتكون كويسة جداً.

انا كنت عايزة اعرف ازاى احدد نوعية شعرى اذا كان جاف او عادى او دهنى؟

=========================

رد بص وطل:

هتقدري تعرفي نوع شعرك يا صديقتي بكل سهولة مع النصايح دي:
الشعر الدهني: لو شعرك دهني هتلاقيه مزيت جداً وحتى لو اتغسل الشعر مرتين في اليوم بيكون شكله دهني.
الشعر الجاف: الشعر الجاف هو الشعر القاسي واللي على طول هتلاقيه ناشف ولازم نعمل له حمامات كريم بصفه دورية كل أسبوع علشان الشعر نفسه يتحسّن ويتحول من شعر جاف لشعر عادي.
الشعر العادي: هو اللي بيبقى أحسن الأنواع لأنه معتدل ما بين الدهني والجاف.

جزاكم الله خيرا على المعلومات المفيدة بس انا عايزة استفسر عن الكيراتين وده اسمه المتداول ولا ليه اسماء تانيه وشكرا ليكم جدا.

================================

رد بص وطل:

الكيراتين هو ماده طبيعيه بتفرد الشعر وتنعمه وتعالجه من مشكله التقصف، وفايدتها إنها بتعوض نقص الكيراتين الطبيعى اللى موجود فى الشعر، وهو ده إسمه والهوش أسماء تانية يا "إيمان".

انا عندي قشره فهل استخدم خل التفاح ام الخل العادي ايهم افضل واستخدمه ازاي؟ وكمان انا شعري جاف وفيه قشره استخدم شامبو ايه كويس؟ وبلسم كمان اعتذر للاطاله وأرجو الرد ضرووووووووووووري

========================

رد بص وطل:

تقدري تستخدمي أي نوع من الخل سواء كان العادي أو خل التفاح بس المهم إنه يكون بعد غسيل شعرك بالشامبو، وتقدري تستخدمي أي نوع شامبو تحبيه وهتلاقي إن في أكثر من نوع للشامبو بيكون داخل معاه البلسم، بس لو عايزة تستخدمي شامبو ضد القشرة فيفضل إنه يكون تحت إشراف طبيب.

ميرسي علي النصائح الجميله دي وكنت عاوزه اسأل السيرم بيعمل ايه في الشعر؟

====================

رد بص وطل:

السيرم يا "omnya" بيستخدم للحفاظ على الشعر من الاستشوار وكثر استخدامه بيكون مضر على الشعر وبينصح كمان إنك ماتحطهوش فترة طويله على شعرك لأنه بيلم تراب ومع كثرة الاستخدام بيقصف الشعر.

السلام عليكم، طبعا بشكركم جدا علي كل المعلومات المفيدة اللى انتم بتقدموها بجد حاجات جميلة.
بعد إذنكم انا عندي سؤال مهم جدا: انا شعري فيه مشاكل كتيرة الحقيقة، لأنه مقصف وفى الجزء الأمامي فى شعر قصير جدا ومش بيطول خااااااالص والموضوع ده مضايقني جدا جدا جدا، انا بجد مش عارفة اعمل ايه وعلي فكرة انا عندي 20 سنة. وكنت عملت تحليل والحمد لله مفيش انيميا. بالله عليكم تفيدوني
ومعلش كنت عايزة اسأل عن كريم اسمه " منك " عبوته لونها ازرق كده فانا كنت عايزة اعرف هو كويس ولا لأ، وسواء كده او كده ربنا يخليكم تقولوا لي علي نوع كريم كويس لانى مش بحب الزيوت بس انا عايزة نوع كريم كويس ومضمون.
اسفة جدا اني طولت عليكم وهاستنى الرد ضروري.
وميرسي علي معلوماتكم الحلوة.

========================

رد بص وطل:

وعليكم السلام ورحمة الله وبركاته، حل شعرك يا "صفا" في إنك تهتمي بيه أكثر من كده شوية وتحاولي تهتمي بأكلك عن طريق إنك تأكلي سمك وسلاطة وتشربي لبن وكمان استخدمي الزيوت الطبيعية بإنك تدهني بيها شعرك زي زيت اللوز أو الجرجير أو الصبار أو الخروع.
وبالنسبة لكريم منك فهو كويس ممكن تستخدميه.

انا عايزه حل للأماكن الداكنه فى الجسم بس مش وصفه عايزه اسم كريم يكون مفعوله شريع ومتجرب.

========================

رد بص وطل:

لازم تستشيري دكتور أمراض جلدية يا صديقتي العزيزة علشان هو يحدد لك الكريم المناسب لنوع بشرتك.

شكراً أوى على المعلومات القيمة دي بس أنا شعرى نوعه تقيل وطبعاً التقل والكثافة ميزة حلوة أوى بس للأسف أنا مش شايفاها فى شعرى لأنه بيهيش أوى فمش باعرف أعمل أى تسريحة غير إنى ألمه وغالباً باغطيه حتى فى البيت أنا محجبة والمفروض أسيبه فى البيت من غير الحجاب بس للأسف علشان بيهيش فأنا بأتحرج منه وبالتالى بيكون متغطى معظم الوقت وكمان ناشف انا كنت بستخدم زيوت للشعر فإيه الحل أرجوكى أفيدينى أفادك الله ولكى جزيل الشكر.

========================

رد بص وطل:

شكراً لمتابعتك واهتمامك يا صديقتي، وبالنسبة لمشكلة هيشان شعرك فانتي تقدري تتخلصي منها عن طريق إنك تجيبي المادة اللزجة اللي جوه نبات الصبار وتخلطيها بكوب من زيت جوز الهند وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو، وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر.

متشكره اوى على المعلومات دى مع انى لسه ماجربتهاش

ميرسى على المعلومات المفيدة دى انا عندى مشكلة في شعري خفيف ومقصف ايه الوصفة المفيدة لمنع التقصف وهل الحناء مفيدة للشعر ارجوكم قولوا لى ايه الحل وشكرا.

========================

رد بص وطل:

الحنة الطبيعية اللي موجودة في الصيدلية مفيدة جداً للشعر وتقدري تستخدميها وبالنسبة لمشكلة شعرك فتقدري تعملي الوصفة دي واللي بتتكون من موزة + معلقتين زيت زيتون + معلقتين عسل نحل و بتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة سريعة.