أهلا وسهلا بكل أصدقائي وأصدقاء "قمر 14"، وحشتوني جدا الفترة اللي فاتت، وبجد باشكركم على كل المشاركات اللي بعتّوها تسألوا فيها عليّ، لكن أنا كنت مستنية الفترة دي علشان أرجع لكم بحاجات جديدة ومميّزة..
والنهارده وبمناسبة أعياد رأس السنة كل سنة وكلكم طيبين، هقدّم لكم حلقة عن الماكياج، وإزاي نختار الأنواع المناسبة مع كل بشرة، وطريقة توزيع الميك اب بشكل سليم؛ تابعونا...
حدّدي نوع بشرتك.. واعرفي نوع الماكياج المناسب لها
الماكياج محتاج لدقة في التعامل معاه، ولازم كل بنت تعرف إزاي تظبّط كمية الماكياج على بشرتها، وكمان تحدّد نوع بشرتها كويس؛ علشان تقدر تختار أنواع الميك أب المناسبة لها؛ فمثلا لو بشرتك دهنية ما ينفعش تستخدمي كريم أساس فيه نسبة زيوت؛ علشان كده النهارده هحاول أشرح لكم الفرق بين كل نوع من أنواع كريمات الأساس، وإيه استخدام كل نوع منهم.
لكن قبل ما نتكلّم عن الماكياج، عايزة أكّد إن الاهتمام بصحة ونضارة ونظافة البشرة حاجة مهمة جدا؛ لأن مش صح إنك تهتمي إنك تداري الحبوب والعيوب اللي موجودة على البشرة بالميك أب؛ لأنك بالطريقة دي مش بتعالجي المشكلة، لكن بالعكس إنتي بتزوّديها، لأن أدوات الميك أب بتنقل العدوى من مكان للتاني، علشان كده لو عندك مشكلة في بشرتك لازم تبدئي تعالجيها عن طريق استخدام العلاجات الطبية أو الماسكات الطبيعية، وطبعا الموقع بيقدّم حلول طبيعية وماسكات كتيرة لعلاج مشكلات البشرة.
ودلوقتي هنعرف مع بعض الخطوات الصحيحة اللي لازم كل بنت تعملها علشان تعمل ميك أب بشكل سليم:
صن بلوك
وده أوّل حاجة هنحطّها على بشرتنا قبل الماكياج؛ لأنه بيحمي البشرة من أشعة الشمس الضارّة، ومن أفضل الأنواع اللي موجودة في السوق هي بايوديرما بمعامل حماية 100%، والنوع السائل اللي هنشوفه في الفيديو ده مناسب جدا للبشرة الدهنية أو المركّبة، أما البشرة الجافة فبيناسبها النوع الكريمي.
Make Up Base
ده تاني حاجة هنحطّها بعد الصن بلوك؛ وده ميزته إنه بيحافظ على نضارة البشرة، وبيعمل طبقة عازلة بين البشرة والميك أب، وبيثبّت الميك أب أكتر، وبيخلّيه يقعد فترة أطول، كمان ممكن تستخدميه كبديل لكريم الأساس لو بشرتك مش محتاجة أو مافيهاش عيوب كتيرة.
وفيه ماركات كتير كويسة ممكن نستخدمها؛ زي ميك أب فور إيفر، وبرفكت وايت، والماركة دي ميزتها إنها بتنوّر الوش، وبتداري وتعالج آثار البقع الناتجة عن التعرُّض للشمس وكمان آثار الحبوب، بالإضافة إلى إنه بيدي لمعة طبيعية للوش، وممكن تستخدميه كبديل للصن بلوك لو مش هتتعرّضى للشمس لفترة طويلة؛ لأنه بيحتوي على معامل حماية 30%.
كريم الأساس
فيه أنواع كتير من كريمات الأساس؛ زى: البودرة المضغوطة، ودي بتناسب البشرة الدهنية أو المركبة، والنوع ده بيدي نسبة ثبات أعلى للميك أب، وطبعا بتتحكمي في كميته إذا كانت كتيرة أو قليلة على حسب هتستخدميه الصبح أو بالليل، لكن عامة أنا مش بافضّل استخدام كريم الأساس في كل وقت؛ يعني ممكن تستعمليه مثلا لو بشرتك مجهدة أوي، لكن لو البشرة مش محتاجة يُفضّل إنك تكتفي بـMake Up Base.
وفيه أنواع تانية من كريم الأساس، زي الإستيك، لكن النوع ده بيستخدمه المتخصصين في الميك أب؛ لأنه بيحتاج تحكّم علشان لو كميته زادت بيدّي شكل مش حلو.
وفيه كمان النوع السائل، وفيه ماركات منه بتستخدم لإخفاء التجاعيد أو لشدّ الوجه للبشرة المتقدّمة في السن.
الكونسيلر
فيه منه أنواع كتيرة؛ منها المضغوط، أو اللي بيكون كريمي في أنبوبة، وإنتي بتختاري النوع اللي يناسبك، ولما تيجي تحطّيه لازم توزّعيه بشكل كويس، يعني بلاش توزّعيه على شكل دواير تحت عينيكي؛ لأنه بيدّي شكل مش لطيف، وبلاش تكتري من الكونسيلر فوق عينيكي علشان مايقطعش منك أو يعمل خط أبيض على الجفن.
البودرة
فيه منها البودرة المائية ودي بنستخدمها بالميه، والنوع ده ممكن تستخدميه بعد كريم الأساس أو من غير كريم أساس، لكن أنا بافضّل البودرة السايبة بعد كريم الأساس؛ لأنها بتبقى أخف وبتدي نتيجة أحلى، والبودرة السايبة فيه منها درجات مختلفة، وكمان فيه منها اللون الشفاف، وده بيليق مع كل ألوان البشرة.
ودلوقتي تعالوا نشوف الفيديو علشان نعرف إزاي نوزّع كريم الأساس والكونسيلر والبودرة على البشرة بشكل صحيح..
ولغاية هنا خلصت حلقتنا النهارده..
أتمنّى إنها تكون عجبتكم..
وفي انتظار تعليقاتكم وأسئلتكم..
تابعوني الأسبوع القادم علشان نكمّل كلامنا عن الماكياج..
سلام،،،
ازيك يا جيلان بجد انتي
ازيك يا جيلان بجد انتي فهمتيني حاجات كتيره مكنتش افهمها بس كنت بلخبط فيها ومكنتش بعرف احط ميك اب واكون حلوة واطلع بالميك اب وحشه بس كنت عايزة اسألك عن البلاشر ايه الماركات اللي احلي ولو عايزة حاجه تليق علي وشي انا اللون العادي الفاتح يعني ولا بيضه اوي ولا سمره احط بلاشر ماركه ايه؟ والالوان اللي ممكن تليق عليه ايه؟ وياريت يا جيلان بجد تقولي لنا ازاي نعرف اشكال وشنا عشان نعرف نحط ميك اب ليه وشكررررررررررا بجد ليكي.
===============
رد بص وطل:
ميرسي يجد لذوقك يا صديقتي العزيزة.. وبالنسبة للماركات ففيه أنواع زي ميك اب فور ايفر وجيرلان وديور وبورجوا، ويا ريت تتابعينا في الحلقات اللي جاية وهتلاقي الإجابة على كل أسئلتك.
هاى يا جيلان ازيك كنت عايزة
هاى يا جيلان ازيك كنت عايزة اسألك انا عملت بنطلون من اللى صممتيهم واسع ونازل بأستك من تحت ذى سندباد بس محتارة البس عليه ايه فى رجلى عشان احنا فى الشتاء ومش عايزة البس حاجة مفتوحة تنصحينى بأيه؟؟؟؟؟؟؟؟؟
=========
رد بص وطل:
ممكن تلبسي عليه حذاء مقفول أو بوت، بيكون شكله شيك اوي.
هو ايه لون الفيست اللى انتى
هو ايه لون الفيست اللى انتى لابساه على البدى الجملى لان شكله كتير شيك وانا كنت سألاكى البس اية على فيست جملى وانا عاجبنى اللون سواء فى طرحة او بدى ياريت تقولي لى.
=========
رد بص وطل:
اللون ده بترولي، وهو من الألوان اللي بتليق جدا مع اللون الجملي.
ياريت تبقى تقولي لى انتى
ياريت تبقى تقولي لى انتى بتستخدمى اية لوجهك ككريم اساس او بودرة انواعهم اية لانى بحس ان كريم الاساس على ما بوزعه زى ما انتى ورتينى فى الفيديو لاقيتة كان بينشف بسرعة مش بلحق اوزعة وكمان الاسفنجة بحس انها بتضيعة مش بتثبتة زى ما عملتى انا بنقط على وشى كله وبعدين بوزعة بالاسفنجة على طول هل كدة غلط يا ريت تفهمينى وارجو الرد ميرسى كتير.
===========
رد بص وطل:
زي ما قلت في الفيديو فيه أنواع كتير كويسة بستخدمها زي ميك اب فور ايفر وجيرلان وديور، وبالنسبة لتوزيع كريم الأساس فانتي بتوزعيه بالطريقة اللي تريحك سواء بالفرشة أو باسفنجة أو باطراف أصابعك.
انا عندى بلوفر ابيض فى اسود
انا عندى بلوفر ابيض فى اسود مقلم بالطول وبهيكول عريض لونه ابيض البس عليه طرحة لونها ايه مش عارفة.
============
رد بص وطل:
ممكن تلبسي عليه طرحتين أبيض في أسود وتدخلي معاهم طرحة بلون مختلف زي الأحمر أو النبيتي.
ازاى اعمل سنفرة للجسم كله ايه
ازاى اعمل سنفرة للجسم كله ايه مكونات السنفرة دى؟
=========
رد بص وطل:
صديقتنا العزيزة تقدري ترجعي لأعداد جمالك من الطبيعة مع رانيا وهتلاقي فيها ماسكات ووصفات طبيعية وسنفرة للجسم بطرق طبيعية.
ازيك يا جيلان وحشانى موت
ازيك يا جيلان وحشانى موت والله افتقدناكى الفتره اللى فاتت كلها بس عايزه اعرف طريقه استعمال السيرم على الشعر واحط منه اد ايه على الشعر وهل هو مفيد للشعر ولا لا وانا عندى نوعين لوريال وكريستال ايه الاحلى فيهم وشكرا ليكى يا حبيبتى.
==========
رد بص وطل:
ميرسي لذوقك جدا يا mero وإنتم كمان وحشتوني أكتر، وبالنسبة للسيرم فده ممكن تستخدميه على شعرك قبل ما تعملي سيشوار أو مكواة علشان يدي له شكل لامع وكثيف، لكن السيرم مش بيعالج مشاكل الشعر لكن بيحسن من شكله، والأنواع اللي بتقولي عليها دي كويسة جدا.
جيلان وحشتينا موت انا نفسى
جيلان وحشتينا موت انا نفسى البس لبس حلو ومحترم ساعدينى ضرورى.
===========
رد بص وطل:
إنتم وحشتوني أكتر يا نجلاء وأتمنى إني اقدر افيدكم دايما، ويا ريت تتابعينا باستمرار لأننا بنقدم حلقات عن الموضة والأزياء وبنوضح فيها إزاي تختاري الملابس المناسبة لكي.
هاى جيلان منورة قمر14؟ أنا
هاى جيلان منورة قمر14؟ أنا هتجوز قريب وكنت عايزاكي تقولي لي على ماركات ماكياج كويسة بس ياريت تكون رخيصة لانى مابحطش اصلا بس ممكن احط اي شادو فى البيت وكونسيلر علشان ادارى الهالات السودا والميك اب بيس ممكن احطه حتى لو هحط اي شادو بس ولا مش لازم والاي شادو لازم يكون ماركة كويسة ولا ايه لانها معظمها غالية وانا عندى حاجات تانية أهم اشتريها اسفة على الاطالة بس ياريت تردى عليّ.
==========
رد بص وطل:
ميرسي ليكي يا شيرين على ذوقك، وألف مبروك مقدما على الجواز وربنا يتمم لك على خير، وبالنسبة لسؤالك فأي حاجة بتحطيها على بشرتك مباشرة لازم تكون غالية ومن ماركة مضمونة علشان تحافظي على بشرتك، وعموما طالما إنتي مش بتستخدمي ماكياج كتير يبقى الحاجة هتقعد عندك لفترة طويلة من غير ما تحتاجي تشتري تاني بس تبقي ضمنتي إنها مش هتأثر على بشرتك، ومن أحسن الماركات ريمال وبورجوا وجيرلان وديور وكيرولان.
انا متشكره اوى يا جيلان عشان
انا متشكره اوى يا جيلان عشان رديتى على سؤالى بس كنت عاوزه اقولك حاجه انا ارمى الفونديشن ده كده ولا استعمله انا بكلم عن supra color كيرولان انا ممكن احط منه على خفيف كده وانا خارجه بليل ولا هو غلط لانه تقيل وكمان ايه رأيك فى مزيل مكياج جونسون ومكتوب عليه كمان لازاله الكحل والماسكر هو فى حبيبات زرقه كده ايه رايك فيه وكمان عاوزه اسالك لو مفيش مزيل مكياج انا بحط كريم مرطب وبمسح وشى بيه كده ينفع ولا غلط اسفه طولت بس انا بثق فى كلامك جدا.
==========
رد بص وطل:
النوع ده كويس جدا بس ممكن تخليه للمناسبات الخاصة لأنه بيدي ثبات عالي على البشرة، وبالنسبة لمزيل ميك اب جونسون فهو كويس.
اولا وحشتينا موووووت وثانيا
اولا وحشتينا موووووت وثانيا عاوزه اعرف ماركه حلوه لعلبه مكياج العروسه الكبيره وسعرها كام تقريبا.
============
رد بص وطل:
انتم وحشتوني أكتر يا yassmen وبالنسبة لعلبة الماكياج الكبيرة ممكن تجيبيها من ماركات زي ميك اب فور ايفر أو جيرلان وسعرها بيبدأ من 300 - 400 جنيه.
ازيك يا جيلان انا عندي خطوط
ازيك يا جيلان انا عندي خطوط حمرا فى جسمى ومش عارفه اعالجها ازاى ممكن لو تعرفى تساعدينى؟
==========
رد بص وطل:
الأفضل إنك تستشيري دكتور جلدية متخصص علشان يديكي اسم كريم طبي مناسب.
تسلم ايدك يا جيلان الميك اب
تسلم ايدك يا جيلان الميك اب تحفة وانتي بجد قمر وخبرتك كويسة اوي
عندي سؤال مهم جدا يا ريت تجاوبي عليه ازاي اشيل الكحل انا جربت ماء الورد بس مش بيشيله كويس يا ريت تقولي لي علي طريقة اشيله بيها او لو فيه ماركات ازالة مكياج العين يا ريت تقولي علي اسماء متوافرة في السوق وتكون مش غالية اوي والف شكر يا جيلان علي مجهودك.
==========
رد بص وطل:
ميرسي جدا يا فاطمة على ذوقك، وبالنسبة لسؤالك ففيه مزيل ميك اب العيون من ماركات زي نيفيا وديور.
بليز جيلان انا معنديش هالات
بليز جيلان انا معنديش هالات بس كنت عايزه حاجه تنور عيني اجيب كونسيلر افتح ولا اغمق من الفاونديشن.
=============
رد بص وطل:
ممكن تجيبيه أفتح بدرجة واحدة من لون بشرتك، وكمان البودرة السايبة بتدي إضاءة وطلة حلو للوش.
جيلان هو سؤالي بخصوص البرفكت
جيلان هو سؤالي بخصوص البرفكت وايت ده سعره كام.
===========
رد بص وطل:
سعره بيكون في حدود من 300 : 400 جنيه.
بليز يا جيلان تقولي لى ايه
بليز يا جيلان تقولي لى ايه رايك فى كريم فير اند لافلى بما انك قولتى انك مبتفضليش كريمات التفتيح وكنت عايزة اسالك عن الصن بلوك والميك اب بيز استخدمه وأنا فى وشى حبوب يعنى احطهم على الحبوب عادى ولا استنى لما الحبوب تخف بليز ردى عليّ.
=============
رد بص وطل:
أنا بافضل استخدام الماسكات الطبيعية للتفتيح مع استخدام الصن بلوك علشان تحمي بشرتك من آشعة الشمس الضارة، وفيه أنواع منه بتناسب البشرة الدهنية أو اللي بتعاني من الحبوب، وممكن تستخدمي الميك اب بيز على بشرتك وهي فيها حبوب مفيش مشكلة وخصوصا إن فيه أنواع منه بتساعد بنسبة معينة في علاج الحبوب زي برفكت وايت، بس زي ما قلنا لازم تستشيري دكتور كويس علشان يديكي العلاج المناسب مع طبيعة الحبوب اللي عندك.
واخيرا رجعتِ لنا تانى وحشتينا
واخيرا رجعتِ لنا تانى وحشتينا مووووووووت يا جيلان انا جبت بلوفر لونه بترولي والذراعات فضى البس عليه ايه ولون الطرحه والجزمه والشنطه هو عليه زراير من على الصدر اسود وعندى واحد تانى بس صوف خفيف الاخضر المزرق مش قادره احدد لونه برضه البس عليه ايه.
============
رد بص وطل:
ميرسي ليكي يا manno على ذوقك وإنتم وحشوتوني أكتر، وبالنسبة لسؤالك فاللونين دول يليق عليهم اللون البني وكمان الجينز الأزرق، والبيج.
والله وحشينى جدا جدا
والله وحشينى جدا جدا ماتتخيليش كنت محتاجه اسألك حاجات كتير اوى وكنا فعلا مفتقدينك انا روحت اجيب فونديشن كيرولان بس ملقتش الدرجه اللى انا عايزاها لقيت نفس الماركه منها علبه مكتوب عليها supra color زى كومبكت كده بس هى كريم بس مش سائل اكيد عارفه بس طلع وحش اوى على بشرتى بحس انه بيبين نقط صغير اوى فى بشرتى كده مكنتش بتبان عندى حتى وانا مش حطه مكياج وكمان لانه مش سائل مش عارفه اوزعه ازاى هو اصلى انا جايباه من العزبى ياريت يا جيلان تعرفينى استعمله ازاى ولو مش ينفع استعمله تانى اجيب ايه وكمان انا لما بحطه بعد فتره وانا حطاه ببص لنفسى فى المرايا بعد ما ارجع البيت بلاقى وشى اسمر وزى ما اكون حاطه حاجه مسمرانى مع انه w1 اسفه طولت عليكى بس انا عاوزه اختار مكياج يكون كويس لبشرتى وكمان يطلعنى حلوه واهم حاجه الفونديشن ياريت تردى عليّ.
==========
رد بص وطل:
ميرسي لذوقك جدا يا سارة واتمنى إني اقدر اقدم لكم كل اللي يفيدكم، وبالنسبة لسؤالك فالنوع اللي إنتي جبتيه ده نوع تقيل وبيستخدمه المحترفين، والأفضل إنك تجيبي نوع خفيف يناسب نوع بشرتك وزي بورجوا وديور وميك اب فور ايفر، وكيرولان كمان كويس جدا بس زي ما قلت منتجاته بتناسب المحترفين أكتر.
انتى جميله يا جيلان ببعت كتير
انتى جميله يا جيلان ببعت كتير مش عارفه ليه مش بشوف المشاركه بتاعتى.
============
رد بص وطل:
ميرسي ليكي يا قمر وبالنسبة للمشاركات فاحنا بنرد على كل الأسئلة اللي بتوصل لنا وبنقوم بنشرها فورا، ولو رسالتك مش موجودة على الصفحة يا ريت تبعتيها لنا مرة تانية وهتلاقي الرد عليها في أسرع وقت.
لو سمحتى يا جيلان انا عندى
لو سمحتى يا جيلان انا عندى زيت قرنفل وزيت لوز حلو ومر ومش عرفة اعمل بيهم ايه ممكن تقولي لى وصفات استعملهم فيها؟ وعندى مشكلة تانية انا بعد ما بعمل بالحلاوة بلاقى فيه شعر صغير فى رجلى بيبدأ يكبر وملفوف شوية وكتير وشكله وحش بعد مابعمل بالحلاوة قولي لى اعمل ايه ربنا يكرمك؟
=============
رد بص وطل:
بالنسبة لزيت القرنفل فده ممكن تستخدميه لتخدير البشرة قبل عمل السويت، وبالنسبة لزيت اللوز الحلو فده بيدخل في العديد من الماسكات لتفتيح وتنعيم وترطيب البشرة، أما بالنسبة لزيت اللوز المر فده ليه استخدامات خاصة وتقدري ترجعي لأعداد جمالك من الطبيعة مع رانيا وهتلاقي فيها تفاصيل أكتر عن الماسكات الطبيعية، وبالنسبة لمشكلة الشعر الزائد فدي ممكن تعالجيها بعمل سنفرة للجسمكل فترة علشان تشيلي الجلد الميت اللي بيطلع تحته الشعر الصغير ده، وممكن تعملي إزالة للشعر بالليزر.
انا بستعمل كريم أساس ماكس
انا بستعمل كريم أساس ماكس فاكتور ده كويس أرجوكي ردي عليّ وأنا بشرتي عادية بس حاسة انه كريس ارجو الرد.
===========
رد بص وطل:
ماكس فاكتور كويس بس لازم تجيبيه من مكان مضمون لأن فيه منتاجت مقلدة كتير.
الحمد لله على سلامتك يا جيلان
الحمد لله على سلامتك يا جيلان وبجد كنتى وحشانا موووت وسؤالى هو ازاى ممكن نخفى الجبهة العريضة بالمكياج وكمان بتسريحة الشعر وكمان عايزة اعرف فعلا فيه كريمات أساس مخصوصة لإخفاء المناطق السمرة بالجسم زي الكوعين والركبتين وايه أنواعها؟
==========
رد بص وطل:
ميرسي جدا على ذوقك يا emmo وبالنسبة لمشكلة الجبهة العريضة فدي ممكن تداريها بإنك تعملي قُصة مدرجة، أما بالنسبة للمناطق الغامقة في الجسم، فهتلاقي ماسكات طبيعية كتير في حلقات جمالك من الطبيعة مع رانيا لتفتيح المناطق الغامقة في الجسم.
ازيك يا جيلان ممكن تتكلموا
ازيك يا جيلان ممكن تتكلموا على مشكله النحافه ارجوكم
هاى ازيك يا جيلان لو سمحتى
هاى ازيك يا جيلان لو سمحتى ممكن اعمل للهالات السوداء زبادى بالعسل ولو كده أستعمله لمدة اد ايه.
============
رد بص وطل:
ممكن تعملي ماسك الزبادي بالخيار للهالات السوداء وكمان شرائح الخيار لوحدها مفيدة جدا وكمان شرائح البطاطس وكمادات الشاي مفيدين جدا.
ازيك يا جيلان وشكرا على
ازيك يا جيلان وشكرا على مجهودك يا قمر عايزة اسألك عن المسام الواسعة مش عارفة اعمل فيها ايه واضحة اوى فى وشى ومخلية شكلى وحش مفيش حل للتخلص من المشكلة دي؟
============
رد بص وطل:
صديقتي العزيزة ده ماسك هايل جدا هيخلصك من مشكلة المسام الواسعة والماسك ده هو ماسك ماسك النشا وهو عبارة عن ملعقة كبيرة نشا + ربع فنجان قهوة مية دافية + ربع فنجان قهوة زيت الزيتون.
الطريقة:
ادهني البشرة الأول بزيت الزيتون وبعدين اخلطي النشا بالمية وحطيهم على البشرة لمدة 20 دقيقة واغسلي وشك بالمية الدافية وعلي فكرة الماسك ده هايل جدا لانه بيستخدم فيه النشا اللي بيساعد على علاج حبوب الوجه والمسام الواسعه وحروق الشمس بالإضافة لأنه منظف ممتاز للبشرة.
إزيك ياجيلان إنتى على فكرة
إزيك ياجيلان إنتى على فكرة شيك جدا جدا أنا نفسى تبقى وإنتى فى الحلقات ياريت تبقى تعرضى لبسك كويس أصل الكاميرا مبتبينش الا جزء صغير بس عشان نقدر نستفيد وياريت تعمليلنا حلقة تعرضى لنا فيها بعض الافكار لملابس الشتاء بليز.
============================
رد بص وطل :
صديقتى العزيزة تابعينا وإن شاء الله هتلاقى كل اللى إنتى عايزاة .
أنا بحط ماكس فاكتور فونديشن
أنا بحط ماكس فاكتور فونديشن ودي أحسن ماركه في الفونديشن والماسكرا وأي لاينر كمان احسن كونسيلر ميك أب فور ايفر واحسن كحل ماك ومكياجي احسن روج وجلوس شانيل عن تجربه.. وبورجوا احسن حاجه طبيا.
إزيك ياجيلان يا قمر أنا أولا
إزيك ياجيلان يا قمر أنا أولا بشكرك على كل حاجة جميلة بتقدميها هنا وبصراحة كلنا بنستفيد من كلامك الجميل ده ..أنا كان عندى سؤال صغير أنا عندى مشكلة لما بحط البودرة المائية بحس إنها بعد فترة قليلة بتجير وشكلها مش بيبقى حلو عايزة أعرف لما أجيب البودرة العادية أو السايبة استخدمها ازاى وايه افضل نوع وشكرا ليكى يا جميل ..
=================================
رد بص وطل :
صديقتى العزيزة أنا مش بانصح بأستخدام البودرة المائية و أفضل بودرة ممكن تستخدميها اللوس باودر، ودى أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور .
إزيك ياجيلان بجد بجد أنا
إزيك ياجيلان بجد بجد أنا عجبنى الميك أب بتاعك وأسلوبك السهل فى الشرح ومعلش هتقل عليكى واسألك أنا بشرتى سمراء فاتح ومش بحب أحط ميك أب رغم إنها مش صافية عشان حساسيتى لبعض المستحضرات
من فضلك قولى لى عن شئ واحد أحطه يخلى بشرتى مظهرها احلى ومايبانش انى حاطة ميك اب وياريت تكون حاجة سهلة الاستخدام عشان أنا لازم انزل الشغل بدرى وما عنديش وقت كتير وشكرا ليك يا قمر.
==============================
رد بص وطل :
صديقتى العزيزة إستخدمى الماسكات الطبيعيه اللى بنقول عليها وممكن تحطى ميك أب بكميات قليلة .
please Jailan 3wzen 7ala2h
please Jailan 3wzen 7ala2h 3an ezai n7ot el eyeshadow soire w 3ade khrog lbashra samra fate7 aw am7e 3lshan ana ba3ok elalwan w gefny ghame2 mn fo2 w mn ta7t plz rode
============================
رد بص وطل :
صديقتى العزيزة تابعينا وإن شاء الله هيكون فى حلقة مخصوص عن الميك أب السواريه .
هاى جيجى وحشتينى جدا عاش من
هاى جيجى وحشتينى جدا عاش من شافك انا سالت رانيا عليكى كتير
لو سمحتى ممكن تبقي تجيبي لنا
لو سمحتى ممكن تبقي تجيبي لنا حلقه لماركات رخيصه او تقولي لنا عليها.
جيلان يا قمر انا عايزة اعرف
جيلان يا قمر انا عايزة اعرف اعمل ايه للهالات السوداء بجد عقدتي في الحياة ممكن تقولي لي اعمل ايه احط مثلا كونسلير وعليها لوس بودر وانهي احسن الكونسلير الكريمي ولا القلم انا جبت كونسيلر اسمه كفير دراما بس وحش اوي ومش بيداري خالص يا ياريت تقولو لي ماركة كويسة واجيب الكريمي منه ولا القلم ودرجة اغمق مني ولا افتح
انا وشي حلو ومش فيه عيوب غير الهالات اجيب باز ميك اب ولا ملوش لازمة بليززززززز قولولي اعمل ايه انا مش بثق في حد غيرك
وانا سمعت ان كونسيلر لونا حلو بس انا خايفة منه عشان مش ماركة وبحب اجيب ميك اب ماركة عشان مش يضر بشرتي.
===========
رد بص وطل:
ميرسي ليكي يا لولو على ثقتك الغالية، وزي ما قلنا الميك اب بيز ممكن تستخدميه لوحده من غير كريم أساس لو بشرتك مافيهاش عيوب، وبالنسبة للهالات السوداء فلازم تستخدمي لها كونسيلر بنفس لون بشرتك أو أغمق درجة واحدة وبعد كده بتحطي بودرة سايبة شفافة أو افتح درجة من لون بشرتك، وفيه أنواع كونسيلر كويسة زي كيرولان وبورجوا وميك اب فور ايفر.
ممكن اعرف نوع اللوس بودر هل
ممكن اعرف نوع اللوس بودر هل هو بيتحط بعد الروجاجو، وايه احسن روجاجو اللي انتي حطاه نوعه ايه.
===========
رد بص وطل:
اللوس باودر بتتحط بعد كريم الأساس وقبل الروجاجو وفيه أنواع كتير كويسة زي كيرولان وديور وميك اب فور ايفر.
أنا خطوبتي الشهر اللي جاي
أنا خطوبتي الشهر اللي جاي وكنت عايزة رقمك وعنوانك يا ريت تردي بسرعة عليّ.
=========
رد بص وطل:
ده رقم تليفوني 0123418020 وممكن تكلميني في أي وقت.
هاى جيلان انا بشرتى جافة ولما
هاى جيلان انا بشرتى جافة ولما بحط البودرة المائية بحس انها بتنشف وشى جامد وبتخلى شعر وشي يطلع بسرعة عاوزة اسالك كريم اساس افون حلو ولا لأ لانها انواع ولان الماركات اللى انتى بتقولى عليها غالية اوى والبودرة السايبة اجيبها افون ولا ممكن اى ماركة تانية بليز ردي عليّ بسرعة.
===========
رد بص وطل:
أنا مش بافضل استخدام البودرة المائية لأنها بتسبب جفاف وتجاعيد للبشرة، وبالنسبة للماركات اللي بقول عليه هي غالية فعلا ولكنها مضمونة وموثوق فيها، لأن أهم حاجة لأي بنت إنها تحافظ على بشرتها.
السلام عليكم ورحمة الله ..
السلام عليكم ورحمة الله .. شغل هايل اوى تسلم ايدك على النصايح بس بعد اذنك كان عندى سؤال هى بشرتى اغمقت درجتين كنت عايزة كريم تفتيح كويس مش مهم السعر أكون مشكورة على الرد.
==========
رد بص وطل:
ميرسي ليكي يا toma على ذوقك، وبالنسبة لكريمات التفتيح فأنا مش باشجع استخدامها أوي لأنها مع التعرض للشمس ممكن تسبب أضرار للبشرة، وتقدري تستفيدي من الماسكات الطبيعية اللي بيقدمها الموقع لأنها سهلة ومضمونة.
جيلان معلش انا نزلت علشان
جيلان معلش انا نزلت علشان اشترى الميك اب بيس لقيته غالى اوى يعنى كانت ب 300 مفيش ماركة سعرها اقل من كده علشان كده غالى اوى عليّ.
=============
رد بص وطل:
أهم حاجة إنك تجيبي الحاجة اللي بتتحط ملامسة للجلد زي الmake up base او كريم الأساس من ماركات معروفة ومضمونة لأنه تأثيرهم بيكون كبير على البشرة.
بجد وحشتينااااا ولو سمحتى أنا
بجد وحشتينااااا ولو سمحتى أنا كنت عايزة اعرف اسم بلاشر كويس بس بكون من غير لمعة وكمان كنت عايزة اعرف البيس النوع اللى انتى قولتى عليه برفكت وايت الاقيه موجود فين؟ وياريت تقولي لى على كريم ترطيب كويس.
==========
رد بص وطل:
فيه ماركات كتير كويسة زي كيرولان وميك أب فور ايفر ومدينا وديور، وبالنسبة للميك اب بيز فجه هتلاقيه في الصيدليات الكبيرة زي سيف أو العزبي أو في المحلات اللي بتبيع مستحضرات التجميل زي سيف أو العزبي.
السلام عليكم يا جيلان كل سنة
السلام عليكم يا جيلان كل سنة وانتى طيبة ويارب تكونى معانا على طول وحشتينا اوى.
جيلان انتى بجد رائعة ربنا
جيلان انتى بجد رائعة ربنا يحميكى نفسى تجاوبينى على سؤالى انا بيضة قوى بس وشى شوية مش صافى فيه حبوب بس مش باينة قوى بستخدم كريم مائى درجة روشيل هل ده كويس ولا لا انا نفسى اعرف ماركة كويسة ولو مش كويس قولي لى انهى الاحسن بس يكون مائى برضو وميرسى ليكى.
=========
رد بص وطل:
ميرسي ليكي يا ميودة على ذوقك وزي ما قلت أن مش بافضل استخدام البودرة المائية ويستحسن إنك تستخدمي كريم أساس خالي من الزيوت ومعاه بودرة سايبة أو تستخدمي البودرة المضغوطة.
الحلقه تحفه اوي وانا مشكلتي
الحلقه تحفه اوي وانا مشكلتي اني مش بعرف استعمل الميك اب خالص بس اهو اتعلمت منك يا قمر النهارده وكنت عايزه اعرف منك ارويفليم احلى ولا منتجات ديور وميك اب فور ايفر وكيرولان ولو المنتجات دي احلى ياريت تقولي لنا على مكان مضمون نجيب منه،
وعلى فكره انتي كنتي زي القمر وشيك اوي بس انا عندي سؤال على اللبس انا بلبس كارينا بس عايزه اغيره فعايزه اعرف انتي بتجيبي البديهات بتاعتك من فين.. وبس كده سوري على الاطاله.
==============
رد بص وطل:
ميرسي ليكي جدا يا ولاء على ذوقك، وبالنسبة لمستحضرات التجميل فكل الماركات اللي قولتي عليها دي كويسة والنسبة لمنتجات زي كيرولان وديور وميك اب فور ايفر فدول ممكن تلاقيهم في الصيدليات الكبيرة زي سيف أو العزبي وكمان في المحلات الكبيرة اللي بتبيع مستحضرات التجميل زي مزايا أو faces، وبالنسبة للباديهات لو رجعتي للأعداد اللي فاتت اللي قدمت فيها موديلات ملابس هتلاقي في آخر الأعداد دي أرقام تليفونات الأماكن اللي بجيب منها اللبس والباديهات بتاعتي.
جيلان انا عايزة اعرف ايه رأيك
جيلان انا عايزة اعرف ايه رأيك في تونيك الفازلين للشعر هل هو مفيد ولا لا؟؟؟
=========
رد بص وطل:
النوع ده كويس لكن أنا مش بافضل دهان الشعر بأي زيوت أو كريمات لأن تزييت الشعر بيخليه يلم تراب ويسد المسام، والأفضل إنك تعملي حمامات زيوت أو حمامات كريم مغذية للشعر، مرتين كل أسبوع وهتلاقي إن الموقع بيقدم وصفات طبيعية للعناية بالشعر.
بحبك موووووت وحشتينى اوى انا
بحبك موووووت وحشتينى اوى انا بستفاد منك كتير اوى ربنا ميحرمناش منك فعلا المنتجات دى جميله لكن اسعارها غاليه شويه او شويتين بالنسبة لى ههههههههههههه بس والله كفايه انى اشوفك لانى بحبك ومستنيه منك كل جديد.
وحشتينا موووت انا كنت منزله
وحشتينا موووت انا كنت منزله السؤال ده بس منزلش هكتبه تانى كنت عايزه حاجه تفتح تحت الابط فعملت شبه على بودره تلج ايه رايك وياريت لو حاجه تفتح لى كمان الركبه وعندى خط اسود تحت فمى عايزه حاجه طبيعيه ياريت لانى بفضلها اكترررررر منوررررررره وماتغيبيش عننا تانى انا زهقتهم اسئله عن غيابك وكده تمام انك جيتى.
==========
رد بص وطل:
ميرسي يا قمر على اهتمامك واتمنى إني اقدر اقدم لكم كل جديد دايما، وبالنسبة لسؤالك فإنتي هتلاقي على قمر 14 حلقات بتتكلم عن العناية الطبيعية بالبشرة والشعر وهتلاقي فيها وصفات طبيعية كتيرة لعلاج المشاكل اللي بتعاني منها.
وحشتينااااا يا جيلان بجد ازيك
وحشتينااااا يا جيلان بجد ازيك ماتغيبيش عننا تاني وكل سنه وانتي طيبه وموقع بص وطل في تقدم وتطور وسنه سعيده علينا كلنا يااارب كنت عايزه رأيك يا جيلان انا عندي فرح النهارده الخميس وكنت عايزه اعرف المكياج والالوان المناسبه اللي استخدمها مع العلم اني هلبس فستان كحلي كت وعليه بوليرو قصير كحلي برده وفيه في الفستان خطين ابيض مع كحلي زي تقليمة من على الصدر فوق ياريت تساعديني يا جيلان وبرده ايه الالوان اللي البسها في الطرح البندانه تكون لونها ايه وفوقها لون ايه معلش طولت عليكي بس انا بثق في ذوقك جدا وميرسي ليكي كتييير.
============
رد بص وطل:
أهلا بيكي صديقتي العزيزة وبجد انتم وحشتوني أكتر ويا رب السنة الجديدة تكون كلها سعادة وأفراح، وبالنسبة لسؤالك فالموضة هي الألوان الهادية الرقيقة زي البينك والموف وكمان الفضي والذهبي ودول هيناسبوا جدا لون فستانك، وبالنسبة للطرح ممكن تدخلي طرح بألوان زي البينك مع الكحلي مع الفضي وإن شاء الله تكوني زي القمر في الفرح.
منورره قمر 14 سؤالى عن ان أنا
منورره قمر 14 سؤالى عن ان أنا بشرتى دهنية وبيطلع لى حبوب برؤوس حمره وبتظهر وبتختفى وكده وزهقت وبطلت اغسله وشى باى منظف بغسله بمياه بس ده صح ولا ايه ولو مش كده ممكن تقولي لى على حاجه استخدمها صابون او اى حاجه للاستعمال اليومي انا كنت بستخدم clear skin منتجات ايفون الغسول بس وقفته ارجو الرررررد لانى بشار ك كتير ومافيش مشاركات ليا بتنزل.
===========
رد بص وطل:
ميرسي لذوقك صديقتي العزيزة، وبالنسبة للمشاركات فإحنا بننشر كل الأسئلة اللي بتوصل لنا بشكل يومي، وبالنسبة لمشكلة الحبوب فأنا أفضل إنك تستشيري دكتور جلدية متخصص علشان يعرف إيه سبب ظهورها ويديكي الأدوية المناسبة، وحاولي أثناء فترة العلاج إنك تقللي من الميك اب على أد ما تقدري.
ميرسي جدا لكل الحاجات اللى
ميرسي جدا لكل الحاجات اللى بتقدميها... بس أنا كنت عايزة أعرف ايه ماركات كريمات الأساس الكويسة.
=========
رد بص وطل:
ميرسي ليكي إنتي صديقتي العزيزة على ذوقك، وبالنسبة للماركات الكويسة ففيه ماركات زي ديور وكيرولان وبورجوا ومدينا.
