جمالك بالألوان مع جيلان.. تألّقي في رمضان بموديلات شرقية

حلو قوى ياجيلان بس أنا كان عندى ليكى سؤالين أنا بشرتى دهنية والميك أب بيروح منها بسرعه وكنت عايزة أعرف طريقة لتثبيت الميك أب وهل اللوس بودر مناسبه ليه ولا البودرة العادية وإيه أفضل الماركات للبودره، ولو سمحتى عايزة أعرف نوع ماسكرا بطول وتكثف الرموش عشان أنا رموشى خفيفه وقصيره وميرسى ليكى .

========================
رد بص وطل :
صديقتى العزيزة بصى لازم تستخدمى ماركات مكياج مضمونه عشان تثبت معاكى، وبالنسبه للوس باودر فهى كويسه جداً لأن البودرة العاديه بتكون مضرة ودي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور .

جيلان كنت عاوزة اسألك عن الاسمرار اللى تحت الابط أتخلص منه إزاى وبالنسبة للاظافر أقويها وأطولها ازاى وإيه رايك فى زيت الخروع بالنسبة للرموش والحواجب .

========================
رد بص وطل :
صديقتى العزيزة بصى بالنسبه للأسمرار دي طريقة سهلة عشان تتخلصى من مشكله السواد تحت الابط ومكوناتها: زيت زيتون+زيت لوز+دقيق البسيسة
الطريقة:إخلطي كل المكونات دي مع بعضها وإفركي بيها المنطقه دي، وعلشان تشعري بالنتيجة ممكن تعملي الوصفة دي 3 مرات في الأسبوع، وبالنسبه لمشكله الأظافر فالازم إنك تهتمى بنوعيه أكلك عشان الأظافر تنمو بتكون محتاجه فيتامينات وممكن تدهني أظافرك بعصير الليمون 3 مرات في اليوم، وبالنسبه لزيت الخروع فهو كويس جداً وممكن تستخدميه.

hi ya jilan ana bgad 3andy moshkela 2rfany awy ana sha3ry mn 3la elwesh metksar awy wfeh 5shona shtabe3ya zay selk elmwa3en ya3ny elsha3raya wa5da shakl zegzag be5shona wsha3ry mn ta7t na3em ana ro7t le dr w2aly 2ntazem fel2sbo3 3la 3'aselo marten wahtam bel3'eza bta3y wedany spray lfarwet elsha3r wekrem wna montazema 3la keda mn 7waly 5 shhor wbardo mafesh fayda ana zhe2t awy wekreht sha3ry 3shan hwa mkansh keda plzzzzz rabena yes3edek 2olely 23mel eh aw 27ot 3aleh eh ma3 el3elm en sha3ry gaf

==============

رد بص وطل:
ممكن تلجأي لعلاج الشعر بالكيراتين عند اي مصفف شعر متخصص بس يكون موثوق فيه.

معلش ياجيلان أنا عمالة اسألك عن حجات كتيرة ومش بترودى عليه أنا عايزة أعرف عندى بدى رمادى وعايزة عليه بدى كارينا ومش عارفة لونة ياريت تقولى لى لونه إيه وكمان شعرى جاف بس فيه قشرة كتيرة عايزة حاجة للقشرة والتجاعيد اللى فيى وخشونة ياريت تردى عليه بسرعة.

====================
رد بص وطل :
صديقتى العزيزة بصى إنتى ممكن تلبسى بدى أبيض أو أسود وبالنسبه لشعرك فعشان تتخلصى من مشكله القشرة لازم تستشيرى دكتور جلديه عشان يديكى علاج وبعد كده ممكن تعملى حمام كريم عشان مشكله التجاعيد وممكن تستخدمى حمام كريم لوريال.

عاوزة غسول مناسب للبشره الجافه ولو سمحتى تقولي لى هو بيستخدم إمتى؟ وكام مره؟

=====================
رد بص وطل :
صديقتى العزيزة بصى إنتى ممكن تستخدمى غسول نتروجينا أو دوف بس يكون مناسب للبشرة الجافه وممكن بعد كده تستخدمى كريم مرطب وممكن تستخدميه مرتين فى اليوم .

عاوزة ماسك حلو للجسم وعاوزة تقولي لى طريقه نعطر بيها الشعر.

===================
رد بص وطل:
صديقتى العزيزة بصى إنتى ممكن توضحيلى إنتى محتاجه ماسك إيه للجسم وتابعينا وهتلاقى الرد على كل أسئلتك .

أنا قريت حاجه عن تخسيس البطن عباره عن ماء دافىء عليه كمون ولمونه معصوره ده فعلا بيخسس؟

===================
رد بص وطل :
صديقتى العزيزة بصى مفيش أى دراسات علميه أثبتت الموضوع ده، وكمان إنتى ممكن تبعتى سؤالك على لينك إخسر وزنك .

كنت عايزة اسألك عن أحسن نوع صبغة أسمها إيه وفى حدود كام وإيه رايك فى صبغة جارنية حلوة ولا لأ.

=======================
رد بص وطل :
صديقتى العزيزة ياسمين بصى صبغه جارنيه لايت كويسه جداً وكمان ممكن تستخدمى صبغه باليت .

السلام عليكم إزيك ياجيلان أنا أول مرة الحقيقة أشارك هنا بس بجد الموقع رائع جدا لو سمحتى ياجيلان كان عندى سؤال بسيط أنا عندى اسمرار حول الفم وفى بعض اجزاء من وشى ارجوكى عايزة حل سريع ونتيجته مضمونة.

======================
رد بص وطل :
صديقتى العزيزة إنتى لازم تستشيرى دكتور جلديه عشان تعرفى إيه سبب السواد ده وكمان عشان يديكى علاج مناسب .

جيلان مممكن تقولي لى على ماسك مفعولة مضمون أعمله للشعر اللى بيبقى فيه تمويج بسيط وبالنسبة للماسك الروس السوده بتاع الردة والخميرة أستخدمة كل قد إيه .

========================
رد بص وطل :
صديقتى العزيزة دى أفضل أنواع حمام الكريم اللى ممكن تستخدميها لوريال أو ودوف، وبالنسبه لماسك الرؤوس السوده فإنتى ممكن تعمليه مرتين فى الأسبوع .

هاي جيلان إزيك لو سمحتي هو أنا ينفع أعمل ماسك الخميره لازاله اثار الحبوب في يوم وماسك اللوز برده اللي بيزيل اثار الحبوب في يوم تاني ولا لازم أستمر علي ماسك واحد بس وبالنسبه لماسك زيت الزيتون والليمون والملح ممكن استعمله علي المنطقه الحساسه ولا لأ

===================
رد بص وطل :
صديقتى العزيزة بصى ماسك الخميرة ده ممكن تعمليه مرة واحدة فى الأسبوع وكمان ماسك اللوز مرة واحدة فى الأسبوع، وبالنسبه لماسك المناطق الحساسه فإنتى ممكن تعملى الماسك ده ومكوناته:زيت زيتون+زيت لوز+ (دقيق البسيسة)
الطريقة:إخلطي كل المكونات دي مع بعضها وافركي بها المناطقه الغامقه، وعلشان تشعري بالنتيجة ممكن تعملي الوصفة دي 3 مرات في الأسبوع.

يا جماعة احب اهني موقع بص وطل علي مواضيعة الجميلة جدا دي بس انا زعلانة يا جماعة الرسايل بقالها كتير مش بتتبعت ياريت تحاولوا تشوفوا المشكلة دي بسرعة.

==============

رد بص وطل:
ميرسي ليكي صديقتنا العزيزة وتقدري تجربي خدمة الرسايل مرة تانية وهتلاقيها اشتغلت.

هاي ياجيلان إزيك كنت عايزة اسألك انا جايبة فستان جنزارى سادة ومش عارفة البس علية بوليرو لونة أية والوان الطرح والاكسسوار؟؟.. ياريت تقولي لى رأيك.. وميرسى ليكى.

=============

رد بص وطل:
ألف مبروك مقدماً يا نوران وإن شاء الله تبقي زي القمر، وممكن تعملي البوليرو بنفس لون الفستان وتعملي عليه تطريز بسيط، وممكن تدخلي الألوان مع ربطة الطرحة يعني ممكن تدخلي اللون الجنزاري مع اللون الفوشيا الهادي والفضي، وتدخلي نفس الالوان في الإكسسوارات.

ازيك يا احلى جيلان انا كنت عايزه اعرف انا وشى طويل ورفيع بس زهقت من لفة الطرحه العاديه وجوزى زهق من انى مش بغير ممكن تقولي لى اعمل ايه وايه طريقه اللفه الخليجى اعملها ازاى زهل بتليق معايا ردى عليا بليززززززز.

==============

رد بص وطل:
صديقتنا العزيزة تقدري ترجعي للأعداد اللي قدمناها قبل كده وهتلاقي أفكار مختلفة لربطات طرح جديدة ومختلفة.

law sama7ty ya jailan ana kont 3ayza as2alek 3an el rolo (elbakar)le el sha3r bey3mel eh w ezay asta3melo w hal f3lan leh adrar le el sha3r wala de esha3at yaret terody 3alaya

==========

رد بص وطل:
بكر الشعر مش بيضر الشعر لكن لازم تستخدمي أنواع كويسة علشان ماتقطعش شعرك، وكمان الطريقة اللي بتلفي بها شعرك بتفرق يعني لازم تسرحيه بالراحة وبرفق.

ازيك يا جيلان انا شعرى جاف ومع ذلك فية قشرة كتيرة اعمل اية علشان القشرة تروح وشعرى يبقى جميل

=================

رد بص وطل:

علشان تقدري تعالجي مشكلة القشرة حاولي ماتستعمليش أي شامبوهات ضد القشرة إلا تحت اشراف دكتور متخصص في الأمراض الجلدية وممكن تشطفي شعرك بالخل وبعد كده تغسليه بالشامبو العادي المناسب لشعرك ودي طريقة طبيعية وفعالة لعلاج مشكلة القشرة.

صديقتى العزيزة جايلان ممكن اسألك سؤال انا جايبة بدى رمادى البس تحتية بدى كارينا لونة اية وطرحة لونها اية وميرسى

===================

رد بص وطل:

تقدري تلبسي بدي كارينا لونه روز أو موف فاتح أو أحمر، والطرحة هتكون مشجرة من لون البدي الرمادي والبدي الثاني الللي هتختاري لونه.

ازيك يا جيجي يا قمر.. بصي يا جيجي انا بشرتي دهنية وبجد بتأثر بالشمس بطريقه فظيعه وطلع لي نمش من وانا في رابعه ابتدائي انا ناو عندي 20 سنه ورحت لدكتور من فتره لاني كنت سايبه بشرتي لما اتبهدلت موت وكنت عاوزه اعمل ليزر عشان اشيل النمش بس قالي انه صعب جدا عشان انا بنزل يوميا وكده وانه هيرجع تاني لان دي طبيعي بشرتي وبقالي 3 شهور بستعمل تريتوسبوت للتقشير وكليراليك 4% للتفتيح والحمد لله جابو نتيجه حلوه والنمش خف اوي بس انا ناو خايفه جدا عشان الدراسه قربت واكيد مش هستعملهم على طول لان التقشير بهدل بشرتي برده وخايفه النمش يرجع تاني لانه بيتأثر اوي بالشمس قولي لي احافظ علي بشرتي ازاي لانها دهنيه وبيطلع لي حبوب ورؤوس سودا نفسي بجد تقولي لي كل حاجه اعملها لبشرتي وانا بستعمل صن بلوك بايوديرما photoderm max spf 100 ايه رايك فيه واستعمله ازاي بالظبط لاني حاسه انه مش بيفرق كتير بليز يا جيجي قولي لي اعمل ايه لان خطوبتي كمان شهر ونص وعاوزه احافظ علي بشرتي الفتره دي... معلش يا جيجي طولت عليكي.

==========

رد بص وطل:
صديقتي العزيزة بالنسبة لعلاج النمش فالأفضل إنك تمشي على علاج الدكتور وتستشيريه في اللي ممكن تعمليه وقت الدراسة، وكمان لازم تاخدي علاج طبي للحبوب، أما بالنسبة للرؤوس السوداء فإنتي ممكن تعملي الماسك ده وكل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر، وبالنسبة لصن بلوك بايوديرما فده من أحسن الأنواع الموجودة وبتدهني منه على بشرتك قبل ما تتعرضي للشمس بربع ساعة وبتجددي دهانه مرة كل ساعتين لو هتعدي في الشمس لفترة طويلة، وحاولي في الفترة اللي قبل الخطوبة إنك تقللي من الميك اب.

جيلان لو سمحتي انا عاوزه وصفه علشان شعري بيقع كتير اوي وبيقع بطوله وكمان انا بعمل حمام كريم مرتين في الاسبوع زي ما بتقولي بس انا لما باجي اسرح شعري وبحط كريم براشوت بلاقيه بينشف شعري اوي وبيخليه هايش فكنت عاوزاكي تقولي لي على نوع كريم تاني وشكرا يا قمر

=================

رد بص وطل:

بالنسبة لمشكلة تساقط الشعر فانتي ممكن تعملي الوصفة دي مرتين في الأسبوع وهتلاقي نتيجة هايلة والوصفة بتتكون من بيضة واحدة + معلقة عسل كبيرة + زيت زيتون + زيت جوز هند + زيت صبار + ريحان مجفف ( ممكن تجيبيه من عند العطار ) + معلقة كبيرة مايونيز (والمايونيز على فكرة مفيد أوي لعلاج جفاف الشعر )، وبتخلطي المكونات دي كلها مع بعض وتحطيها على شعرك وهو ناشف وتسيبيها على شعرك لمدة ساعتين وبعد كده تغسلي شعرك بالشامبو.
وبالنسبة للكريم فانتي ممكن تستخدمي كريم هيركود أو دابر أملا.

ازيك يا جيلان أنا اول مره ابعت لك عايزه كريم تفتيح بشره حلو وكريم مرطب وكريم صن بلوك وماسكات ترطيب البشره وانا شعرى مقصف وبيهيش بسرعه عايزه شامبو وبلسم وكريم شعر وحمام كريم كويس جدا مع ذكر أمثله وهو الاحسن استعمل كريم ولا زيت شعر.

==========

رد بص وطل:
أهلاً بيكي صديقتي العزيزة واتمنى إنك تتابعينا دايماً، وبالنسبة للكريم المرطب فإنتي ممكن تستخدمي كريم زي نيفيا أو دوف وبالنسبة للصن بلوك فأفضل نوع هو بايوديرما وبالنسبة للشامبو ممكن تستخدمي هيربل اسينسز أو بانتين وبالنسبة لحمام الكريم فممكن تستخدمي لوريال، ومن الافضل إنك ما تزيتيش شعرك بعد الاستحمام وتسيبيه يفرز زيوته الطبيعية ولو حاسة إنه جاف ومحتاج إنك تحطي مادة زيتية ممكن تحطي كمية صغيرة من أي كريم تصفيف زي باراشوت أو بانتين بديل الزيت، وتابعينا لإن في الفترة اللي جاية هنقدم أعداد كتيرة عن الماسكات الطبيعية.

جيلان انا عملت فرد فى شعرى فينفع اعمل صبغة جارنيه أنا سمعت إنها طبيعية بس أنا لسة عاملة الفرد فده يؤثر على شعرى ولا ايه وكنت عايزة اسأل عن الكريم اللى بيتحط للعرايس فى الوش بيبقى ابيض كدة لية ومشدود واسمة اية وبالنسبة للرموش ينفع احطها من غير ميك اب هيبقى شكلها وحش وتبان ولا اية واسفة على الاطالة.

==============

رد بص وطل:
صديقتي العزيزة نصحنا أكتر من مرة قبل كده وقولنا إن كريمات الفرد دي بتضر الشعر جداً وبتضعفه، ويفضل إنك تستني شوية قبل ما تعملي الصبغة علشان شعرك يكون استرد صحته شوية، والافضل إنك تستشيري الكوافير بتاعك قبل ما تعملي الصبغة، وبالنسبة لصبغة جارنييه فهي كويسة، وبالنسبة للماسك ففيه اكتر من ماسك ممكن يتعمل، أما بقى بالنسبة للرموش فإنتي ممكن تحطيها من غير ميك اب بس لازم تتقلي على خط الرموش بعد ما تحطيها بكحل او بآي لاينر.

جيلان لو سمحتي هو الروج الاورانج الصريح بيليق علي البشرة الخمرية وكمان المانيكير الاورانج الفاقع بيليق علي البشرة الخمريةومعلش اخر سؤال ايه لون الروجاجو اللي بيليق علي البشرة الخمرية بس ارجوكي غير البيجات انا عايزة اعرف ايه الدرجة اللي حاطاها علا غانم في مسلسل العار اصلها تحفة ياريت تردي عليا محتاجة ردك في اقرب وقت.

============

رد بص وطل:
درجات الأورانج بتليق على البشرة الخمرية وبالنسبة للروجاجو فيه درجات كتير بتليق ولكن احسن درجة هي المشمشي.

هاي يا جيلان يا حبيبة قلبي من فضلك انا قريت في احد المنتديات عن ماسك للبشرة ممكن يفتح الغمقان حول الفم ومدة استخدامه 5 ايام وهو بيتكون من معلقة صغيرة خميرة بيرة ومعلقة كبيرة عسل واحطهم على بشرتي ربع ساعة وبعد كدة اشيله فهل ده فعلا هيجيب نتيجة؟ وكمان انا سمعت ان الخميرة ضارة جدا بالبشرة وبتعجل من ظهور التجاعيد فهل الكلام ده صحيح؟ معلش يا جيلان تقلت عليكي بس ارجوكي ردي عليا ضروري.

===========

رد بص وطل:
ماسك الخميرة كويس لكن ممكن تعمليه مرة كل أسبوع أو اسبوعين.

السلام عليكم عوزاكى تقولي لى اهتم ببشرتى ازاى هيا جافه يعنى اول مااصحى احط كريم ايه؟
وفي الضهر وبعد مااخرج وهكذا وعوزة ماسك بسيط اداوم عليه بس ياريت تقولي لى اسماء كريمات اداوم عليها

==================

رد بص وطل:

وعليكم السلام ورحمة الله وبركاته، ياريت تتابعينا الفترة القادمة لأننا هنتكلم عن العناية اليومية بالبشرة، وماتنسيش تقولي لنا رأيك.

ميرسى ليكى اوى يا جيلان على الحاجات الجميلة دي انا بشرتى دهنية بتشرب المكياج اعمل ايه عشان احتفظ بالمكياج على بشرتى وقت طويل وعايزة اعرف استخدم اللوس باودر ازاى احطها على بشرتى بالفرشة ولا الاسفنجة واحط تحتيها اية وشكرا ليكى واسفة انى طولت عليكى.

============

رد بص وطل:
بعد ما تستخدمي كريم الاساس المناسب للبشرة الدهنية بتحطي كمية من اللوس باودر على بشرتك علشان تثبت الميك اب، وبتحطيها بالاسفنجة او بالفرشة.

السلام عليكم يا جيلان
اولا ميرسي اوي علي الحاجات الجميله اللي بتقدميها
كنت عاوزه اسألك علي حاجه انا لما بعمل سويت بيبقي في أثر مكان الشعر فياريت لو في حاجه تخلي البشره شكلها حلو ومايبقاش فيها البقع الحمراء اللي مكان الشعر.
وكمان الشعر لما بيطلع بيبقي لونه في الأول أسود تحت الجلد وبيبقي شكله مش حلو فياريت لو في حاجه تخلي الشعر يطلع من غير ما يبقي لونه أسود تحت الجلد ويبقي خفيف شويه
وميرسي جدا ليكي

==================

رد بص وطل:

وعليكم السلام ورحمة الله وبركاته، ميرسي ليكي أنتي يا صديقتي وعلشان تقدري تتخلصي من البقع الحمراء اللي بتظهر مكان الشعر تقدري تعملي أي وصفة من الوصفات دي واللي هتساعدك على تقليل نمو الشعر:

1- انقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر... واستمري على ذلك لمدة 3 أسابيع يوميا.

2- استخدمي نبات السعد -هتلاقيه عند العطار. خدي 3 معالق من مسحوق النبات وضيفيه إلى 'لتر ماء' وحطيه على النار لغاية ما يغلي ثم يترك لينقع لمدة ربع ساعة.... ثم يوضع على الجسم كغسول بعد إزالة الشعر لمدة 6 أيام متواصلة من كل شهر.

3- خذي زيت زيتون وادهنيه على جسمك... هتلاحظي إن الشعر نموه بيتأخر ولما يطلع هيطلع خفيف ولو كان الشعر سميك هيطلع ضعيف جدا.

4- اخلطي 'قليلا من الماء' مع بودرة التلك واعملي منها عجينة لينة توضع على المكان المنزوع منه الشعر وسيبيها حتى تجف واغسليها كويس ودي بتخفف من الاحمرار والحساسية الناتجة عن نزع الشعر.

5- لتتخلصي من مشكلة حساسية واحمرار بشرتك بعد إزالة الشعر الزائد من الوجة املي طبق غويط بالثلج وضيفي ليه كوب لبن وبعدين غطسي حتة قطن في الطبق ده وضعيها على المناطق اللي بتعاني من الاحمرار واتركيها لتجف.... ثم ضعي طبقة أخرى بعد 15دقيقة وكرري العملية مرتين لتعود بشرتك إلى حالتها الطبيعية السابقة.

سلام جيلان انا معجبة بالموديلات اللي بتعرضيها وحابة اسألك
انا عندي فستان سواريه لونه اسود وصدره لونه ذهبي, ألبس له ايه بلوزة اسود ولا ذهبي ـ انا عايزة ألبسه حجاب ـ ياريت تردي علي بسرعة وشكرا.

============

رد بص وطل:
الاتنين هيكونوا مناسبين ممكن تجربيهم قدام المرايا وتشوفي إيه الافضل عليكي.

عاوزه لفات طرح عاديه واسبنش روشة جدا وتكون كبيره لاني وشي صغير اوي ومش بتليق فيه الربطات الصغيرة.

===========

رد بص وطل:
صديقتي العزيزة تقدري ترجعي للاعداد اللي فاتت وهتلاقي فيها ربطات طرح جديدة ومختلفة.

هاى جيلان كل سنة وانتى طيبة انا كنت عايزة اسألك على حاجة انا اشتريت صبغة باليت لون ذهبى كراميل فشفت فى محل كتالوج لكل الوانات صبغة باليت فلاقيت ان درجة اللون اللى جبتها هتدينى لون بنى مع ان انا لون شعرى افتح من كدة يمكن لونة قريب من الذهبيات الغامقة فبدلتها وجبت لون اشقر فاتح اكسترا مع العلم ان شعرى متوسط الطول فاضطريت اشترى علبة صغيرة عشان تقضى شعرى كلة وملقتش نفس درجة اللون فجبت اشقر ذهبى اكسترا فهل لو خلطهم مع بعض هيدينى لون فاتح اوى ولا عادى ام هل من الافضل ان يكون كل حاجة لوحدها.

============

رد بص وطل:
الأفضل إنك تستشيري مصفف شعر أو كوافير متخصص لإني مش باشتغل في الصبغات والحاجات الخاصة بالشعر.

هاااااى جيلان ميرسى على المعلومات دى وكنت عايزه اعرف غسول مناسب للبشره العادية.

==========

رد بص وطل:
ممكن تستخدمي غسول نيتروجينا أو دوف أو ديور

هاي يا جيلان ازيك عامله ايه بصي عايزه اسألك علي حاجه ايه رأيك في زيت الخروع للشعر وإزاي استعمله لشعري وبالنسبة لماسك هيشان الشعر لو ملقتش الماده اللزجه بتاعة الصبار احط زيت صبار ولا ايه وكمان عايزه اسالك علي ماسك بتاع تجاعيد الشعر انا عملته فلاقيت شعري رائحته زفره فاضريت اني اغسله بالشامبو يا تري كده فايدته راحت ولا لا.

============

رد بص وطل:
ده ماسك كويس جداً للشعر بيقويه وبيمنع تساقطه وهو عبارة عن
معلقة زيت زيتون + معلقة زيت الخروع + معلقة زيت اللوز + صفاربيضتين.
الطريقة:
اخلطيهم كويس مع بعض وبعد كده افردي الخليط على شعرك كله ولفيه بفوطه دافئه لمدة ساعتان وبعد كده اشطفيه بماء فاتر، أما بالنسبة لماسك الصبار فإنتي ممكن تستبدلي المادة اللزجة بزيت الصبار، وبالنسبة لماسك تجاعيد الشعر فمفيش مشكلة إنك تغسليه بعدها.

لو سمحتى يا جيلان انا بشرتى جافة عاوزاكى تقولي لى ازاى اهتم بيها يعنى الصبح والضهر وبالليل احط ايه قولي لى اسماء كريمات ولو ماسك اواظب عليه على طول انا مش عارفه اهتم بيها ازاى فيه ماسكات كتير اوى اعمل ايه ولا ايه لو تقولي لى حاجات بسيطه اواظب عليها انا بشرتى فيها حبوب بس مش كتير هل فعلا الخميره مفيده للحبوب انا كمان بشرتى حساسه اوى.

============

رد بص وطل:
طيب تابعينا صديقتي العزيزة وإن شاء الله هتلاقي أعداد كتيرة عن العناية بالبشرة بكل أنواعها في الفترة اللي جاية فانتظرينا.

كل سنة وانتى طيبة يا قمر انا كان عندى سؤال انا عندى بنت صغيرة عندها سنة كان شعرها ناعم بس دلوقتى بقى شعرية خشنة وشعرية ناعمة وكمان هايش على طول وكمان بيطول ببطء ياريتك تردى عليّ وشكرا ليكى.

==========

رد بص وطل:
صديقتي العزيزة حاولي تهتمي أكثر بتغذيتها، وممكن تعملي لها ماسك زبادي بالعسل على شعرها مرة كل أسبوع.

السلام عليكم ورحمة الله وبركاته إزيك يا جيلان يا قمر ممكن لو سمحتي تساعديني عندي كذا مشكلة عاوزة نوع كريم كويس لفرد الشعر
ضوافري لو طولتها بتتكسر وكمان في جلد بينشف حوالين الضافر
والله تعبت جدا جدا معلش هتعبك معايا يا قمر.

========

رد بص وطل:
بلاش تستخدمي كريمات الفرد لإنها بجد مضرة جدا للشعر وحاولي تهتمي بشعرك أكتر وتعملي حمامات كريم باستمرار لشعرك، وبالنسبة لأظافرك ممكن تدهني أظافرك وكل الجلد المحيط بها بعصير الليمون 3 مرات في اليوم لمدة عشرة أيام بس خدي بالك إنك تغسلي ايديكي قبل وضع الليمون، وبعد كده استخدمي كريم مرطب لايديكي.

كل سنة وانت طيبه انا مش بعرف احدد عينى بالاي لاينر ممكن تعرفينى ازاى ياريت تعملى حلقة للميك اب.

=============

رد بص وطل:
طيب تابعينا وإن شاء الله قريب أوي هتلاقي كل اللي إنتي عايزاه.

ميرسى على ردك بس معلش انا كنت عايزة اسألك على حاجة تانية هى ايه الالوان الموضة السنة دي والوان البناطيل والاستايل واشكالها واشكال الطرح العاديه مش الاسبنش معلش طولت عليكى باى.

============

رد بص وطل:
صديقتي العزيزة تقدري ترجعي للاعداد القديمة اللي قدمناها في الحلقات اللي فاتت وهتلاقي معلومات كتير عن موضة الألوان والاستايلات السنة دي وكمان ربطات طرح مختلفة.

ازيك يا جيجي ميرسي انك رديتي عليّ بس انا كان قصدي لو لبست الصندل والشنطه لونهم اسود علي التونيك الاوف وايت والبدي والطرحه البني هيكونوا حلوين ولا الشنطة والصندل البني افضل وكنت عاوزه اسألك علي حاجه كمان هي ميه الترمس احطها علي الاماكن اللي عاوزه نمو الشعر منها يقل بعد ازاله الشعر واحطها كل اد ايه وازاي اغسل مثلا وشي بيها وانشفه وخلاص ولا ازاي وبرده معلش حاجه تاني انا عندي ميه ورد من ايفا بس مكتوب عليها انها بتفتح المسام هي ميه الورد بتفتح ولا بتقفل المسام علشان انا عندي مسام صغيره جمب انفي صغيره اوي واغسل بيها وشي امتي وكام مره بليز تردي عليّ وسوري طولت عليكي.

============

رد بص وطل:
صديقتي العزيزة طبعاً الجزمة والشنطة البني هيكونوا مناسبين أكتر، لكن مش لازم تقيدي نفسك إنك تلبسي نفس الألوان، وبالنسبة لمية الترمس فإنتي بتدهني به الأماكن اللي عايزة تقللي نمو الشعر فيها وبتسيبيها لمدة نصف ساعة او ساعة وبعد كده بتشطفي بشرتك، وبالنسبة لمية الورد فهي بتعمل كقابض للمسام.

جيلان ذوقك جميل جدا ورائع للغاية وأنا بحبك أوي أوي واتمنى اشوفك فى الطبيعة أكيد أجمل بكتير ياريت تعتبرينى صديقتك بس عندي ليكي سؤال انا عندي اسمرار في منطقة الارداف والركبة غامق جدا جدا ياريت تقولي لي على طريقة اتخلص من الاسمرار ده.

========

رد بص وطل:
ميرسي ليكي يا amira جداً على ذوقك وأنا يشرفني جداً إني أكون صديقة ليكي، وبالنسبة لسؤالك فعايزة اقول لك إن استخدام الليفة في تدليك الجسم بيساعد على تفتيح المناطق الغامقة، وده كمان ماسك كويس جداً لتفتيح المناطق الغامقة في الجسم عبارة عن زبادي وترمس مطحون وعصير برتقال، اخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر.

جيلان بليز ممكن تكترى من لفات الطرح الكاجول اللى بتبقى من قدام بدل الاسبانش وتورينا بتتعمل إزاى بس ياريت قريب اوى.

=======================
رد بص وطل :
صديقتى العزيزة هتلاقى فى الأعداد القديمه لفات طرح مختلفه، وتابعينا وإن شاء الله هتلاقى لفات طرح جديدة .

السلام عليكم كل سنة وإنتى طيبة ياجيلان كنت عايزة اسالك أنا إسمعت ماسك لازالة بقع الحبوب مكون من ملعقة حنةو ثلاث ملاعق عسل ويوضع على مكان الحبوب لمدة نص ساعه ويتحط يوميا حتى تزول البقع ياترى الحنة لو إتحطت على البشرة ممكن تضبغ لانى بردوا سمعت إن الحنه بتفتح لون الجسم ياترى الماسك ده ينفع استخدمه ولا هيضبغ لون بشرتى سورى ياقمر طولت عليكى بس ياريت تردى عليه ضرورى لان مشكلة البقع مضايقنى أوى .

==========================
رد بص وطل :
صديقتى العزيزة بصى الماسك ده أنا أول مرة أسمع عنه، والحنه مش بتستخدم للبشرة ودي وصفة سهلة جداً ممكن تعمليها علشان تفتحي البقع البنية اللي بتظهر على الوجه قشري ثلاث حبات لوز و إنقعيها في الميه وبعدين إطحنيها، وبعد كده ضيفي ملعقة صغيرة من عصير الليمون وبياض بيضة لعجينة اللوز وبعديد حطي طبقة من الخليط ده فوق البقع واشطفي وشك بميه فاترة بعد 15 دقيقة, كرري الماسك ده كل يوم علشان تحسي بالفرق.

أنا عايزة أحدد عنيه وأرسمها ممكن تقولي لي بتترسم بايه أنا عندي كحل بورجوا الاسود وبشرتي خمرية ممكن أرسم بيه من تحت وفوق وعنيه واسعة أصل بشوف الممثلين وبتعجبني ونفسي أعملها .

=======================
رد بص وطل :
صديقتى العزيزة إنتى ممكن ترسمى عينك بأستخدام الكحل والآى لاينر والماسكرا، وكمان الرموش الصناعية اللي بيستخدمها الممثلين بتحدد العين بشكل أجمل.

ازاى اعرف نوع بشرتى

======================
رد بص وطل :
صديقتى العزيزة بصى علشان تعرفي نوع بشرتك يبقى أول ما تصحي الصبح، بس تكوني منظفة بشرتك قبلها بيوم، بصي لبشرتك في المرايا
لو بشرتك بتلمع شوية يبقى بشرتك دهنية، ولو بشرتك فيها حبوب أو شوية مقشرة فبشرتك جافة، ولو بشرتك عادية خالص مافيهاش أي لمعة أو تقشير يبقى بشرتك عادية.

إزيك ياجيلان أنا جايبة بلوزة لونها جنزارى بس عاطى على أخضر مزرق شوية المهم درجة من درجات الجنزارى مش عارفة البسلها بدى كارينا لونة إيه وأجبلها بنطلون أو جيبة لونها إيه وياريت تقولي لى البسلها طرح إيه معلش طولت عليكى .

=======================
رد بص وطل :
صديقتى العزيزة بصى إنتى ممكن تلبسى بنطلون أسود أو رومادى والبدى إلبسيه حسب لون البنطلون وبالنسبه للطرحه فممكن تلبسى طرحه مشجرة يكون فيها اللون الجنزارى .

إزيك ياجيلان عاملة إيه لو سمحتي ياجيلان أنا سالتك علي زيت لانبات الشعر فانتي قولتي لي زيت الجرجير يعني ممكن أستعمل الزيت بدل العصارة أستعمله كدهان يومي وإيه الافضل الزيت ولاالعصارة
وممكن تقولي لي علي ماسك للشعر الهايش وشكرا .

=========================
رد بص وطل :
صديقتى العزيزة بصى إنتى ممكن تعملى عصارة الجرجير كل يوم وتعملى حمام زيت مرتين فى الأسبوع، أما بالنسبة لمشكلة الشعر الهايش ممكن تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين أعملي بيه حمام زيت لشعرك وبعد كده إغسلي شعرك بالشامبو والبلسم المناسبين لنوع شعرك ،وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر .

إزيك ياجيلان يا سكر أنا لما بحط كريم بوناويل على شعرى أو بلسم( كل الماركات) أو شامبو سباركل شعرى بيقع بطوله فى نفس الوقت مع إنهم بيطروا شعرى أوى العيب فى شعري ولا فى الحاجات دى وأعمل إيه.

=====================
رد بص وطل :
صديقتى العزيزة بصى لازم تستخدمى شامبو مناسب مع نوع شعرك ودى أفضل الأنواع (بانتين،هيربل،دوف) وكمان ممكن تستخدمى حمام كريم لوريال .

جيلان أنا عندى زيت نارجيل (جوز الهند) خام أصلى جايباه من السعودية بحطه على شعرى بس بينشف شعرى الناس قالولى أخلطيه مع زيوت تانية لأنه مش بيتحط لوحده من فضلك قولي لى إزاى أقدر أستفيد منه شكرا .

========================
رد بص وطل :
صديقتى العزيزة بصى إنتى ممكن تحطى زيت زيتون وزيت لوز على الزيت ده وتعملى بيه حمام زيت .

هاى جيلان ينفع بدل ماحط شرايح خيار على الهالات أضرب خيار فى الخلاط وأحتفظ بيه فى التلاجة أبقى أحط منه ولو كده أغسله بعد أد إيه .

=======================
رد بص وطل :
صديقتى العزيزة ممكن تحتفظى بعصير الجرجير فى التلاجه وتستخدميه وإغسليه بعد ربع ساعه .

إزيك ياجيلان أنا إشتريت كونسيلر بورجواه سائل وكان حلو جدا بيدارى الهالات وكأنى مش حطة حاجة بس بعد حوالى 3 أسابيع بيقطع وبيبقى حتت كدة وكأنها عليها زيت من برة مع إن تاريخ صلاحيته بيبقى لسة فاضل عليه وقت وكل أما أجيبه بيحصل كده أنا شاكيت إنه مغشوش وكان سعره 5ج .

=======================
رد بص وطل :
صديقتى العزيزة من الواضح إن الكونسيلر ده مش أصلى، فالازم تستخدمى الكونسيلر الأصلى وإشتريه من مكان مضمون .

إزيك ياجيلان أنا بستفاد منك أوى أوى على فكرة ربنا يخليكى ليه يارب زيت الزيتون الخام الاصلى أشتريه منين بصى هو في أزايز زيت زيتون بتتباع فى السوبر ماركت بس أعتقد إنها لاغراض الطهى بس هو زيت خام ينفع أستعمله لشعري .

=========================
رد بص وطل :
صديقتى العزيزة بصى زيت الزيتون هتلاقيه عند أى عطار وكمان ماينفعش تستخدمى زيت الزيتون المخصص للطهى على شعرك .