جمالك بالألوان مع جيلان.. العباية لإطلالة جديدة ومميزة في رمضان

ميرسى يا جيجى انك رديتى بس انا عاوزة اعرف منك برضه ايه الالوان غير الاحمر اللى تليق عليّ وانا خمريه.

============

رد بص وطل:
فيه الوان كتيرة ممكن تليق عليكي زي الذهبي والنحاسي والموف الفاتح والبيستاج.

ازيك يا جيلان معلش هتعبك معايا بس انا بثق فى ذوقك، أنا فرحي في العيد ان شاء الله وانا مش متعودة احط ميك اب وكده وعينيا واسعه وبارزه بس انا عاوزه احط لون واحد فوق عينيا ايه رأيك.

=========

رد بص وطل:
ممكن تحطي لون واحد مناسب معاكي، وتحددي عينيكي بالآي لاينر والماسكرا.

السلام عليكم ازيك يا جيلان وميرسي ليكي على الموديلات الجميلة انا عندى سؤال ازاى احافظ على كريم الاساس والبلاشر وادوات التجميل عموما لانها عندى ومش بستخدمها كتير وعايزه احافظ عليها اطول فتره ممكنه وايه مدة صلاحية كريم الاساس والبلاشر والبودره وازاى اخلى كريم الاساس مش بيلمع على بشرتي عشان بشرتي دهنية وجزاكي الله كل خير.

==========

رد بص وطل:
علشان تحافظي على أدوات التجميل لازم تحفظيهم بعيد عن الضوء ودرجات الحرارة العالية، يعني ممكن تحتفظي بها في الثلاجة، وكمان لازم تقفلي أدوات التجميل كويس جداً علشان تحافظي عليهم من الميكروبات الموجودة في الهواء، وبالنسبة لتاريخ الصلاحية فكل مستحضر وله تاريخ الصلاحية بتاعه، فبالنسبة لكريم الأساس بيتم الاحتفاظ به لمدة عام واحد من تاريخ الاستخدام، وبالنسبة للبلاشر ممكن تستعمليه لمدة ثلاث سنوات، بس خدي بالك إنك تغسلي الفرشاة من فترة للثانية للقضاء على أي ميكروبات ممكن تتواجد داخل الفرشاة، أما بقى بالنسبة للبودرة فدي ممكن تستخدميها لمدة سنتين، بس لازم تحافظي على نظافة الاسفنجة أو الفرشة اللي بتستخدميها معاها.
وبالنسبة لسؤالك التاني علشان كريم الأساس مايلمعش على بشرتك، فإنتي بعد ما تحطيه بتحطي عليه طبقة خفيفة من البودرة السايبة (اللوس باودر).

لو سمحتي يا جيلان ممكن تقولي لي ازاي اعرف نوع بشرتي؟

============

رد بص وطل:
تابعينا وإن شاء الله هنقدم أعداد هنتكلم فيها عن الموضوع ده بالتفصيل.

ازيك يا جيلان انا كنت عايزاكى تساعدينى فى انى اوصل لمجال التفصيل والاستايل يعنى انتى تشورى عليّ باية وابدأ ازاى وهل انتى ممكن تدربى بنات عندك على الموضوع ده بس بليز تردى عليّ ضرورى بالله عليكى.

=============

رد بص وطل:
صديقتي العزيزة انا مش باشتغل في مجال التفصيل والتصميم.

السلام عليكم وكل سنه وإنتم طيبين شكرا لكى يا جيلان على تعبك معنا معلش أنا عندى سؤال أنا شعرى خفيف جدا وعلى طول بيتساقط وبالذات وهو مبلول بيقع بطوله هل أعمل وصفة الجرجير ولا فى حاجة ثانية على العلم إنه فيه تموجات من الامام وناشف من الاطراف وقصير قصيتة مرة علشان يطول من ساعتها مطولش ونسيت أقولك إنى بعمل ريجيم بس التساقط ده قبل الريجيم وأسفة طولت عليكى.

===========

رد بص وطل:
صديقتى العزيزة وردة أهلاً بيكى، بصى أهم حاجه إنك تهتمى بنوعيه أكلك زى الخضار والفاكهه ومنتجات الألبان لأن التغذيه ليها علاقه بصحه شعرك وبالنسبه لوصفه الجرجير فهى كويسه جداً وبتساعد على إنبات الشعر.

لو سمحت يا جيلان كنت عايز اسأل هو فعلا شرب ماء الورد مع المياه بيكبر الصدر وعملت ماسك الزبادى والليمون بس الزبادى كان بينزل من على وشى ووصفة الاماكن الغامقة بنسيبها قد ايه وشكرا.

==============

رد بص وطل:
مفيش أي دراسات أثبتت إن فيه اي مشروب بيتخن منطقة معينة في الجسم، وبالنسبة لماسك الزبادي بالليمون فإنتي ممكن تحطيه وتسترخي برقبتك على ورا طول المدة اللي إنتي بتعملي فيها الماسك.

إزيك يا جيلان كل سنه وإنتى طيبه بصى أنا خمريه وكنت عاوزة أعرف الألوان اللى تليق عليّ فى فستان خطوبتى وإيه رأيك فى الاحمر عليّ وأنا أحتمال أعمل الشبكه فى قاعه ونظام الفستان اللى فى دماغى اللى هو منفوش من تحت عند الركبه إيه رأيك لو نفع الاحمر عليه هيبقى أوفر كاللون مع نظام الفستان ولا إيه بليز ساعدينى.

===========

رد بص وطل:
صديقتى العزيزة شاهى ألف مبروك مقدماً، وبالنسبه للون الأحمر فى الفستان فهو هيكون مناسب جداً خاصه إنك خمريه.

أنا بشكرك أوي ورمضان كريم أنا جوزي جبلي عباية سوده وفيها تطريز أصفر كده ألبس طرحه شكلها إيه وكمان جبت تونك رمادي في فوشيا البس له طرحه شكلها إيه أنا بشرتي قمحي ووشي صغير وفاشلة جدا في ظبط الطرحة أرجو الرد.

==============

رد بص وطل:
كل سنة وإنتي وأسرتك بخير يا ام دودو وبالنسبة للعباية فإنتي ممكن تلبسي عليها طرحتين واحدة سوداء وواحدة صفراء، اما بالنسبة للتونيك فممكن تلبسي طرحتين بنفس ألوان التونيك، وتقدري ترجعي للأعداد القديمة وهتلاقي فيها شرح لمجموعة كبيرة من لفات الطرح.

إزيك ياجيلان كل سنة وإنتى طيبة أنا خطوبتى قربت وهى عائلية جدا فى البيت أنا هلبس فستان سهرة بسيط وهعمل مكياج لنفسى عايزة اسألك أركب رموش ولا لأ أنا بشوفهم حلوين أوى وبيخلو شكل العين حلو أوى وفى ناس بتقولى بلاش حطى ماسكرا أحسن وبلاش رموش إنتى إيه رأيك ياقمر؟

====================
رد بص وطل :
صديقتى العزيزة ألف مبروك مقدماً، وبالنسبه لسؤالك إنتى ممكن تحطى رموش لأنها بيكون شكلها حلو .

مساء الخير ياجيلان أنا بستخدم بديل الزيت من بانتين بس بينشف شعرى أوى وأنا شعرى جاف ينفع بعد ما أحطه أحط أى كريم أو زيت عشان يطرى شعرى شوية ؟

====================
رد بص وطل :
صديقتى العزيزة إنتى ممكن تعملى حمام كريم مرتين فى الأسبوع ودى أفضل الأنواع اللى ممكن تستخدميها(لوريال،بوناويل،دوف) .

هاى جيلان كل سنة وإنتى بألف خير عاوزة اقولك ملحوظة أنا بثق جدا فى ذوقك وكمان إنتى بتساعدى ناس كتير فى التغير للاحسن فعاوزة أسألك سؤال هو حمام الكريم اللى أسمه (مارفيل) كويس ولا لأ.

===========

رد بص وطل:
صديقتى العزيزة أهلاً بيكى، بصى أفضل ماركات حمام الكريم اللى ممكن تستخدميها وإنتى متطمنه (لوريال، بوناويل،دوف)

السلام عليكم كل سنة وإنتى طيبة أشكرك على العدد الهايل ده وعاوزة اسال سؤال عاوزة لفة طرحة تبقى مناسبة على جيبة وبدى بس ياريت تكون فى أسرع وقت لانى محتجاها ضرورى .

=======================
رد بص وطل :
صديقتى العزيزة أهلاً بيكى، هتلاقى فى الأعداد القديمه لفات طرح مختلفه ممكن تختارى منها المناسب معاكى وتابعينا وإن شاء الله هتلاقى لفات جديدة .

أهلا وسهلا يا جيلان كل سنة وإنتى طيبة أنا عندى 14 سنة وعاوزة أعرف هى العبايات لطيفة لسنى ولا لأ وكمان لو لطيفة قولي لى تبقى الcut شكلها إزاى وأتمنى جدا انك تعملى العدد الجديد عن العبايات لسن صغير.

============

رد بص وطل:
ممكن تلبسي عباية بس تختاريه موديلها ولونها يكون مناسب معاكي ومع سنك، وهتلاقي في العدد ده أكتر من عباية مناسبة مع السن الصغير.

إزيك ياجيلان كل سنه وإنتي طيبه وميرسي بجد لكل اللي بتقدميه أنا كنت سألتلك قبل كده إني عندي تونيك أوف وايت ومش عارفه ألبس عليه إيه وإنتي قولتي لى ألبس عليه بدي بني أو موف أنا جبت البدي موف بس موف فاتح مش الغامق زي اللي في العبايه اللي لابساها المودل والطرحه فيها الموف الغامق فكده البدي هيكون حلو علي التونيك ولا لأ وحاجه كمان معلش أنا عندي صندل وشنطه كروس لونهم أسود فهيكونوا حلوين وليقين لو لبستهم علي الطقم وهل لو جبت البدي بني والشنطه والسندل هيبقوا لايقين برده ولا إيه ويرسي ليكي كتير وأتمني تردي عليه معلش لو طولت عليكي .

=======================
رد بص وطل :
صديقتى العزيزة أهلاً بيكى، وبالنسبه لسؤالك اللون الموف هيكون مناسب مع لون التونك وبالنسبه للشنطه والصندل فامن الأفضل إنك تلبسى اللون الأبيض ، ولو جبتى البدى والشنطه والصندل بنى هيكونوا مناسبين جداً .

السلام عليكم بجد ذوقك عالى جدا تسلمى على الحاجات الجامده دى أنا عايزه أعرف الكيراتين ده بيتعمل فين وهو علاج ولافرد وبيتعمل كل قد إيه وشكرا ليكى.

====================
رد بص وطل :
صديقتى العزيزة بصى الكيراتين بتعمليه عند كوافير مضمون وفى كيراتين للفرد وكيراتين للعلاج والكوافير بيقولك إنتى بتعمليه كل أد إيه حسب نوع الكيراتين اللى بتستخدميه .

السلام عليكم يا جيلان أنا شعرى بيجف بسرعة أوى وحسيت إنه بقى خشن أوى وسمعت عن المايونيز إنه بينعم الشعر فجبت فعلا مايونيز ممكن أعرف أستخدمه إزاى على شعرى وممكن أحطه لوحده كده ولا لازم يكون معاه حاجة تانية وميرسى ليكى أوى ياجيلان.

=============

رد بص وطل:
ده ماسك كويس اوي بالمايونيز بيعالج جفاف وتساقط الشعر وهو عبارة عن بيضة واحدة + معلقة عسل كبيرة + زيت زيتون + زيت جوز هند + زيت صبار + ريحان مجفف (ممكن تجيبيه من عند العطار) + معلقة كبيرة مايونيز، وبتخلطي المكونات دي كلها مع بعض وتحطيها على شعرك وهو ناشف وتسيبيها على شعرك لمدة ساعتين وبعد كده تغسلي شعرك بالشامبو.

السلام عليكم ورجمة الله وبركاته إزيك ياقمر أنا عندى سؤال باخرج تقريبا كل يوم الصبح للشغل وباعمل ميك أب خفيف جدا بودره وأحمر خدود وروج خفيف أو ملمع بس البودرة بتطير من على وشى بسرعه ومش باستخدم كريم أساس علشان بيكون تقيل الصبح عايزة أسم كريم وش خيف أحطه تحت الباودر ياترى ممكن أستخدم إيه؟ كنت باحط فير أند لافلى بس باحسه بيسمر وشى أما أتعرض للشمس ياريت تردى عليه بسرعه وميرسى ليكى على كل الحاجات والنصائح الحلوة دى .

======================
رد بص وطل :
صديقتى العزيزة بصى أهم حاجه إنك تستخدمى منتجات ميك أب مضمونه ودى من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور وأفضل حاجه تستخدميها تحت البودرة هى كريم الأساس وممكن تستخدمى كريم أساس خفيف وكمان ماتحطيش كتير.

جيلان إنتى ميعاد حلقاتك بتعات قمر 14 بتقى إمتى.

===================
رد بص وطل :
صديقتى العزيزة بصى الحلقات الجديدة بتكون يوم الأثنين من كل أسبوع .

جيلان أنا سألتك عن الكراتين لقيت سعرة غالى أوى مفيش حاجة بديلة وبنفس المفعول.

===================
رد بص وطل :
صديقتى العزيزة ندى الكيراتين أفضل حاجه لعلاج وفرد الشعر .

سلام عليكم طبعا أنا بشكرك جدا والعبايات كلها تجنن وده دليل على ذوقك الجميل بس عندي سؤال بعد إذنك هو أنا عايزه أستعمل زيت اللوز لوجهي فأنا أستعمل المر ولا الحلو؟

=====================
رد بص وطل :
صديقتى العزيزة شكراً على ذوقك، وبالنسبه لسؤالك فإنتى ممكن تستخدمى زيت اللوز المر لوجهك .

سلام عليكم إزيك ياجيلان أنا كنت بعتلك بس تقريبا موصلش المهم أنا إشتريت صن بلوك isis pharma درجه الحمايه 80 وكان في نفس النوع درجه الحمايه 50 بس ده أغلى من اللي درجه حمايته 80 أنا بصراحه كنت محتارة أشتري ده ولاده مع إنهم نفس الشركه وكنت مستغربه أكتر إن اللى درجه حمايته 50 أغلى من ال80 ياريت تردي عليه ياجيلان وتقولي لي إيه الفرق بين الاتنين .

====================
رد بص وطل :
صديقتى العزيزة بصى درجه الحمايه ملهاش علاقه بسعر الصن بلوك، ودى أفضل أنواع الصن بلوك اللى ممكن تستخدميها وإنتى مطمنه (بايودرما،نيفيا،لونا) .

أنا جربت وصفه زيت الزيتون على رجلي اللى قولتي لي عليها وجبت نص لمونه وحطيتها في ملح ودعكت بيها رجلي بس أغسل رجلي بعد أد إيه بالظبط؟ وهل ينفع أستخدم الماسك ده في وشي أو أي حته في جسمي؟

====================
رد بص وطل:
صديقتى العزيزة بصى إنتى ممكن تغسلى رجلك بعد ربع ساعه، وممكن تستخدمى الماسك ده على جسمك لكن ماتستخدمهوش على بشرتك لأن البشرة بتكون حساسه جداً .

جيلان أنا سألتك قبل كدة عن حاجة تفرد الشعر وقولتى الكيراتين لكن ده سعره غالى أوى مفيش حاجة بديلة تفرد الشعر.

===========

رد بص وطل:
صديقتى العزيزة منة للأسف الكيراتين أفضل حاجه لفرد وعلاج مشاكل الشعر لأن ملوش أضرار.

أنا لفيت الفات وبصراحه تحفه بس المشكله إنها كلها طرح صغيره وأنا بلبس طرح كبيره أوى لو عندك حل ياريت تقولي لى أنا عارفه إنى تعباكى معايا بس أنا بجد والله مبسوطه إنى عرفتك .

=====================
رد بص وطل :
صديقتى العزيزة إيمى تابعينا وإن شاء الله هيكون فى لفات طرح جديدة ومختلفه .

إزيك ياجيلان أنا بحبك أوى, أنا مضايقه أوى علشان أنا قصيره جدا طولى152 ووزنى60 أنا بثق فى ذوقك ياجيلان من رأيك إيه الاستايل اللى يبقى حلو عليه ولو حاجه سواريه يكون فستان ولاإيه معلش طولت عليكى .

======================
رد بص وطل :
صديقتى العزيزة نوره بصى الفساتين هتكون مناسبه معاكى جداً وحاولى إن الفستان يكون واسع من تحت عشان ده هيديكى طول .

انا مش لاقيه الاعداد القديمه زى ما قولتي لى ياريت تقولي لى هى فين واشكرك جدا.

=============

رد بص وطل:
تقدري ترجعي للأعداد القديمة لما تضغطي على لينك "قمر 14" الموجود في خريطة الموقع أسفل الصفحة.

صباح الخير ياجيلان بشكرك على الذوق الراقي للعبايات باحيكي بجد وكان ليه سؤال كنت عايزه ماسك تفتيح تحت الإبط وكنت عايزه أعرف كيفية الحفاظ على مستحضرات العنايه بالبشره يعني يفضل أن نحطها في التلاجه ولاممكن عادي نسيبها لحرارة الجو الطبيعي مع العلم ان الجو حر جدا والمستحضرات اللي أقصدها طبعا كريم النهار والليل وكريم العين والغسول والتونر والصن بلوك وأسفه للاطاله ياريت تجاوبيني وميرسي ليكي كتير وللموقع الاكتر من رائع.

==========

رد بص وطل:
صديقتى العزيزة أهلاً بيكى وشكراً على ذوقك، أنا جاوبتك على مشاركتك بس هجاوبك تانى عشان ممكن تكونى مش عارفه توصلى للرد، بالنسبه للسواد تحت الأبط دي طريقة سهلة عشان تشيلي بيها السواد في منطقة تحت الابط وهي بتتكون من معلقة ملح ومعلقة لبن بودرة وبتعجنيهم بماء ورد عشان تحصلي على خليط متماسك وبتحطي الخليط على منطقة تحت الابط، وممكن تكرري الوصفة دي يومياً عشان تتخلصي من المشكلة دي، وبالنسبه لمستحضرات التجميل فإنتى ممكن تحتفظى بيها فى التلاجة.

السلام عليكم لو سمحتى كنت عاوزة اسأل عن إنى عندى مسمات إيدى بتكون باينه أوى ومش عارفه أعمل إيه عاوزة ماسك أو أى حاجه تخلها تختفى شويه شكرا.

========================
رد بص وطل :
صديقتى العزيزة بصى وجود المسامات ده شيء طبيعيى جداً، والماسك ده بيقلل من مشكله المسام الواسعه
ومكوناته:ملعقة كبيرة نشا+ربع فنجان ميه دافية +ربع فنجان زيت الزيتون.
الطريقة: إدهني إيدك الأول بزيت الزيتون وبعدين إخلطي النشا بالميه وحطيهم لمدة 20 دقيقة وبعد كده إغسلى إيدك بالميه.

أنا بعت إستفسار بس مش عارفه وصل ولا لأ أعرف إزاى .

====================
رد بص وطل :
صديقتى العزيزة ايمى إنتى ممكن تبعتى مشاركتك بنفس الطريقه دى .

أنا بقالي شهر بعمل وصفه حبه البركه لكن أنا شعري ناشف بجد بطريقه فظيعه بليز قولي لي علي حل مش عارفه أعمل إيه.

=====================
رد بص وطل :
صديقتى العزيزة بصى إنتى ممكن تعملى حمام كريم مرتين فى الأسبوع وإن شاء الله هتحسى بفرق ودى أفضل الأنواع اللى ممكن تستخدميها وإنتى متطمنه(لوريال،بوناويل،دوف) .

أنا بستعمل وصفه الزبادي وزيت الزيتون وحبه البركه عشان تطري الشعر وتطوله لكن أنا بضيف عليهم شويه خل عايزة أعرف مفيد ولا بلاش أحطه وعيازه أقولك إني بحط الوصفه علي الشعر مش فروه الراس أنهي أحسن مكان أحط عليه؟ ميرسي

===================
رد بص وطل :
صديقتى العزيزة أنا رديت على سؤالك قبل كده وهتلاقى الرد فى المشاركات .

إزيك ياجيلان وحشتيني أنا بقالي فترة بستعمل ماسك السواد حول الفم من حوالي شهر وأسبوع تقريبا وماجبش نتيجة خالص فاعمل إيه وهل لو إستعملت زيت اللوز المر بالليل قبل ما أنام على منطقة حول الفم ممكن تبيضها ولا لأ ولو ينفع يجيب نتيجة في أد إيه؟

=====================
رد بص وطل :
صديقتى العزيزة بصى الماسكات الطبيعيه بتكون محتاجه وقت وإنك تستمرى فى إستخدامها عشان تحسى بنتيجه، وممكن تستخدمى زيت اللوز حول الفم كل يوم باليل لأنه كويس جداً .

ذوقك تحفة أوي عايزة أسالك أنا مليانة إيه هي قصة البنطلونات اللي تليق عليه والبنطلونات الواسعة اللي فيها كرمشة دي تليق عليا ولا لأ وياريت لو تعرفي محلات بتبيع بنطلونات شيك ومقاسات تقولي لي ولو تعرفي أسم أو ماركة بنطلون أسال عليها قولي لي ميرسي ليكي أوي يا جيلان.

===========

رد بص وطل:
صديقتى العزيزة سارة بصى البنطالونات الواسعه هتكون مناسبه معاكى جداً وهتلاقى البنطلونات دى فى المحلات التجاريه وكمان هتلاقى أرقام تليفونات لبعض المحلات فى أخر الأعداد القديمه اللي قدمناها عن الموضة.

جيلان أنا كنت عايزة اسألك عن أحسن نوع فرد للشعر علشان أنا عندى فرح فى العيد ومش عايزة أستعمل إستشوار ولامكواة وعارفة إنه مضر بس ضرورى وعايزة يكون بيجيب نتيجة جامدة فى الشعر وعايزة ماسك يخلى وشى صافى مع العلم إنى عندى حبوب فى قورتى وأسفة على الاطالة.

===========

رد بص وطل:
صديقتى ندى بصى كل كريمات الفرد مضرة جداً جداً على الشعر وأنا مش بانصحك بأستخدامها، ولو عايزة تفردى شعرك إنتى ممكن تعملى كيراتين وممكن تسألى أى كوافير مضمون عنه، أما بالنسبه لمشكله الحبوب فمن الأفضل إنك تستشيرى دكتور عشان يديكى علاج مناسب وتعالجيها وده ماسك حلو أوي ممكن تعمليه علشان تحافظي على نضارة بشرتك وهو بيتكون من خيارة ومعلقتين عسل نحل.
الطريقة:إضربي الخيارة في الخلاط وبعدين ضيفي عليها العسل، وإفردي الخليط ده على وشك، وسيبيه لمدة ربع ساعة وبعد كده إغسلي وشك بميه والماسك ده ممكن تعمليه مرة كل أسبوع وإن شاء الله هتحسي بنتيجة هايلة.

جيلان حببتي أنا بحبك فالله لأنك بستاعدنا كتيير أوى ميرسي ليكي كتير أوى ورمضان كريم كنت عايزه اسأل بس عن أي منتجات أفضل للشركات دى أوريفلام ولاإفون ولا ماي واي وربنا يجازيكي عنا كل خير.

==========

رد بص وطل:
صديقتى العزيزة شكراً على ذوقك، وبالنسبه لسؤالك فكل الشريكات دى منتجاتها كويسه وممكن تستخدمى منتجاتها وإنتى متطمنه.

جيلان أنا بشكرك أوى على الحاجات الجميله دى وأتمنى إنى أكون صديقه أنا عايزه أسال سؤال أنا لونى قمحى فاتح شويه وجبت واقى للشمس اللى هو sun block علشان أنا بخرج فى الشمس كتير جبته درجه 50% وكل ما أحطه أحسه إنه بيسمرنى أوى ويبين وشى زى مايكون عرقان فهل ده علشان أنا بحطه بطريقه غلط ولا إيه وياريت تقولي لى على الصح وعندى طلب تانى أنا بلبس طرحه كبيره اللى هى بتغطى جسمى من فوق وبلفها اللفه التقليديه وحاولت أغيرها بس لقيت شكلى مش حلو لأنى فيه خدود شويه ونفسى أغيرها ياريت تساعدينى أغيرها إزاى ولكى جزيل الشكر والتقدير.

======================
رد بص وطل :
صديقتى العزيزة ايمى بصى لازم تحطى الصن بلوك قبل ماتتعرضى للشمس بربع ساعه على الأقل وكمان لازم تتأكدى إن الصن بلوك ده نوعه كويس ومضمون عشان يحميكى من أشعه الشمس ودى أفضل الأنواع اللى ممكن تستخدميها (بايوديرما،نيفيا،لونا)، وبالنسبه للفه الطرحه فاهتلاقى فى الأعداد القديمه لفات طرح مختلقه ممكن تختارى منها المناسب معاكى وتابعينا وهتلاقى لفات طرح مختلفه.

معلش ياجيلان بزعجك بس أنا بثق في أختياراتك وذوقك إيه أفضل مكان أعمل في كيراتين فرد وتكلفتة بتكون في حدود كام وهل هو كويس فعلا وبيستمر .

============

رد بص وطل:
صديقتى العزيزة فيه أماكن كتير بتعمل الكيراتين دلوقتي وممكن تسألى حد يكون عمل الكيراتين في مكان كويس، وكمان لما تروحي تعمليه لازم تتأكدي من الكوافير إنه بيستخدم المنتج الأصلي أو البرازيلي، وبيكون سعره من 1500 إلى 5000 جنيه

جامد أخر حاجة أنا عايزة اشتري كريم أساس سائل يكون حلو أنا جبت من بورجوا هيلثي وطلع وحش وبستخدم سوبرا كلر بس سمعت إنه تقيل علي البشرة ممكن أحسن ماركة لكريمات الاساس الليكويد وتخفي شوائب البشرة.

===========

رد بص وطل:
صديقتى العزيزة شوشو بصى دي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وكريستيان ديور ونصيحتى ليكى إنك ماتحطيش كريم أساس الصبح عشان ماتضريش بشرتك.

هاي ياجيلان إزيك عاملة إيه لو سمحتي ياجيلان أنا كنت سمعت عن إن الثوم بينبت الشعر فأنا عايزه أجربه بس مش عارفه أستخدمه إزاي وخايفه أحطه علي شعري يحرق فروة راسي فممكن تقولي لي أعمله إزاي وهل ينفع إني أعمل حمام زيت وأغسله وبعد كده أعمل حمام كريم ولا ده في يوم وده في يوم تاني .

========================
رد بص وطل :
صديقتى العزيزة بصى الثوم مفيد جداً للشعر وإنتى ممكن تستخدميه وتدلكى فروة راسك بيه، وكمان فى حمامات كريم بتحتوى على الثوم ممكن إنك تستخدميها، ومن الأفضل إنك تعملى حمام الكريم فى يوم وحمام الزيت فى يوم تانى .

جيلان بليز أنا محتاجة رقمك أوى وكل إستايلاتك تحفة بجد.

===================
رد بص وطل :
صديقتى العزيزة ده رقم الموبايل 0123418020

لو سمحتي ياجيلان أنا من الحر تحت صدري أغمق خالص وفرحي إن شاء الله بعد العيد وعاوزة وصفة سريعة لأزالة السواد وشكرا ليكى ياقمر.

======================
رد بص وطل :
صديقتى العزيزة ألف مبروك مقدماً بصى الوصفه دى بتساعد على تفتيح المناطق الغامقه فى الجسم ومكوناتها:زبادي+ ترمس مطحون+عصير برتقال
الطريقة:إخلطي المكونات دي كلها مع بعضها، وإفرديها على المناطق الغامقة في جسمك، وسيبيها لمدة 10 دقائق وبعد كده إشطفي جسمك بميه فاترة.

إزيك ياجيلان أنا بستعمل وصفه الزبادي وزيت الزيتون وحبه البركه عشان تطول شعري وتطريه لكن أنا كمان بحط معاهم شويه خل فهل ده مضر ولا مفيد وبعدين أنا بحط الوصفه دي علي شعري مش علي فروه الراس عايزه أعرف المفروض تتحط فين بالظبط.

=======================
رد بص وطل :
صديقتى العزيزة بصى إنتى بتحطى وصفه حبه البركه على شعرك كله وبتغطيه ببونيه وبعد 3 ساعات بتغسلى شعرك بالشامبو والبلسم المناسبين ولو عايزة تستخدمى الخل يبقى ممكن تستخدميه لوحدة وتشطفى بيه شعرك .

أنا كنت عايزة اسألك عن كيفية جعل الاظافر بيضاء شبة الممثلين الى بيطلعوا فى التليفزيون وطويلة.

=====================
رد بص وطل :
صديقتى العزيزة بصى ده بيكون مانيكير وبيتعمل عند الكوافير وأسمه فرنش .

كنت عايزة أسال عن حاجة فى حباية شبة عين السمكة ظهرة فى إيدى ومش عارفة أعمل إيه بقالها أكتر من سنه ومش بتروح .

====================
رد بص وطل :
صديقتى العزيزة ندى إنتى لازم تستشيرى دكتور جلديه عشان يديكى علاج مناسب .

جيلان هو أنا ممكن أعمل حمام زيت أو حمام كريم وبعد ما أغسل بالشامبو أستخدم بلسم.

======================
رد بص وطل :
صديقتى العزيزة بصى حمام الزيت بتعمليه وإنتى شعرك ناشف وبعد كده بتغسلى شعرك بالشامبو والبلسم لكن عشان تعملى حمام كريم فإنتى بتغسلى شعرك الأول بالشامبو والبلسم وبعد كده بتحطى حمام الكريم وبتسبيه 30 دقيقه وبعد كده بتشطفى شعرك بالميه .

إزيك ياجيلان أنا بجد مبسوطة أو بيكى وربنا يوفقك فى المجال ده بس أنا محتاجة أوصلك ضرورى حابه أشوفك وأستشيريك فى حاجات بخصوص الاستايل ياترى ممكن أكلمك .

===========================
رد بص وطل:
صديقتى العزيزة شكراً على ذوقك، وده رقم تليفونى 0123418020 .

إزيك ياجيلان كل سنة وإنت بصحة وخير أنا خطوبتي في العيد والفستان لونة دهبي ومتطرز تطريز فضي ممكن تقولي لي لون الطرح ممكن يكون إيه أنا وشي صغير وقمحية هل في لفة تانية غير الاسبانش لاني حاسة إنها مش هتكون حلوة عليه وإيه لون العدسات الي ممكن ألبسها معلش طولت عليكي بس أنت عارفة جنون العرايس في الوقت ده.

==========

رد بص وطل:
صديقتى العزيزة ألف مبروك مقدماً وبالنسبه لألوان الطرح فإنتى ممكن تستخدمى اللون الدهبى والفضى وممكن تستخدمى التول لأنه بيكون مناسب جداً، وبالنسبه للفه الطرحه فاممكن تعملى إسبانش بس تكون على جمب عشان إنتى وشك صغير وكمان ممكن تعملى اللفه العاديه وتابعينا عشان هيكون فى مفاجأت كتيرة للعرايس، وبالنسبه للون العدسات فإنتى ممكن تجربى الألوان وإنتى بتشتريها واللون الأخضر والعسلى هيكونوا مناسبين معاكى.

بجد إنتى أموره جدا ياجيلان كنت عاوزه اسألك عن حاجه أنا فى أنفى نقط سودة كده صغيره معندكيش أى ماسك يخليها تختفى وشكرا أوى ياقمر على مجهودك .

====================
رد بص وطل :
صديقتى العزيزة بصى ده ماسك كويس للتخلص من مشكلة الرؤوس السوداء كل اللي عليك إنك تحطي شوية خميرة على ردة وتعجنيهم بميه ورد أو عسل وبعد ماتعملي حمام بخار لبشرتك تحطي الخليط على بشرتك وتسيبيه 20 دقيقة، وقبل ما تشيليه إضغطى على بشرتك وعلى الرؤوس السودة بأستخدام قطنة أو منديل، وبعد كده إفركي بشرتك كويس، وبعدين إغسلي وشك بميه فاترة.

هاى جيلان كل سنه وإنتى طيبه ورمضان كريم المهم أنا إشتريت دريل لونه رمادى فى أسود فى أبيض فى نبيتى والارضيه هى الابيض وجبت عليه بوليرو أسود طويل بس عايزة أعرف أجيب الطرحه إيه والبليرو مفتوح وأنا جربت الطرحه الرمادى قفل اللبس والنيتى عبارة عن دواير صغيرة فى الدريل تفتكرى لو جبت طرحة نبيتى سادة هيبقا شيك ولاتكون منقوشه بس أنا مش عارفه كله قالى طالما البليرو سادة هاتى طرحه مشجرة وأنا الحقيقه البليرو مفتوح وأخاف يبوظ الطقم.

====================
رد بص وطل :
صديقتى العزيزة بصى إنتى ممكن تجيبى طرحه فيها لونينين زى النبيتى والأسود أو ممكن تجيبى طرحه مشجرة .