جمالك بالألوان مع جيلان.. تألّقي بالإسدال والعباية في رمضان

انا جبت بلوزة لونها لبني مش عارفة اختار المكياج.

============

رد بص وطل:
ممكن تحطي الوان هادية زي الرمادي الفاتح وممكن تحطي كحل لونه لبني في عينيكي.

ازيك يا جيجى انتى قولتي لى اعمل عصير جرجير على شعرى طيب بعد ما اضربه في الخلاط اصفيه ولا اسيبه كده اصله فيه فتافيت كده ومش عارفه هو هينشف شعرى يعنى احط عليه زيت او كريم ولا اسيبه كده وبتقولي لى نتيجته بعد 3 شهور معلش يا حبيبتى مش كتير ولا نتيجته ممكن تظهر قبل كده.

==============

رد بص وطل:
اي علاج للشعر بيحتاج لفترة من 3 لـ 6 شهور علشان تحسي بالنتيجة، ووصفة الجرجير مش هتنشف شعرك ولا حاجة بل على العكس ده بيرطب الشعر ويغذيه ويقويه، وإنتي بتعصريه وبعد كده بتصفيه وتدلكي به فروة راسك وتسيبيه على شعرك من غير ما تغسليه.

أنا عاوزة لفات طرح مش إسبانش عاديه بس جديدة وياريت ماتبقاش فيديو تبقى صور بالشرح التفاصلى بس جديدة وحلوة .

====================
رد بص وطل :
صديقتى العزيزة تابعينا وإن شاء الله هتلاقى لفات جديدة وعاديه .

هاى جيلان ازيك انا كنت حابة اعرف منك اماكن بيع الاسدالات الشيك واللى يكون شكلها جميل وفى اماكن كويسة زى اللى انتى بتقدميهم لينا بجد شيك جدا وكمان اماكن شراء فساتين خطوبة او زفاف شيك لانى بحب اكون انيقة بطبعى واكون شيك دايما وياريت تقولي لى على حمامات كريم تغذية لشعرى وازاى اعتنى بية كويس واغذية لانة قصير وخفيف جدا.

===============

رد بص وطل:
صديقتي العزيزة هتلاقي في آخر كل عدد ارقام تليفونات المحلات اللي بجيب منها الملابس اللي بقدمها في الحلقات، وبالنسبة لحمامات الكريم فلوريال من أحسن حمامات الكريم لتغذية الشعر.

هاى ازيكم نشكركم على معلوماتكم الجميلة عن العناية بكل شى انا من سنتين استعملت كريم فرد ايطالى فى شعرى وتم وضع عبوتين لمدة ساعة وبعد غسله وقع وطلع 95% من شعرى ووقع وتم علاجه بس مشكلتى الكبيرة لحد الان هى انى استعملت اغلب حمامات الكريم وشعرى ناشف مفيش ولا واحد جاب نتيجة معايا خالص انا شعرى جاف ارجو المساعدة بليييييييز _ انواع الحمامات الكريم هى كاريتيه بالزبدة- وكريم سبشيل الايطالى - وواحد للشعر المصبوغ من ايفون بولندى- وواحد مصرى بالاعشاب البحرية وززيت الزيتون ... بجد انا تعبت اوى اوى ساعدونى بالحل ولكم جزيل الشكر ارجو الرد بسرعة ..شكرا.

==============

رد بص وطل:
ممكن تستخدمي حمام كريم لوريال لإنه من احسن حمامات الكريم اللي بتغذي الشعر، وكمان اهتمي بعمل حمامات زيوت طبيعية كل أسبوع وقصي شعرك كل فترة.

طيب معلش اعمل ماسك ايه عشان افتح بشرتى من اثار الشمس.. والبورده السايبه استخدمها ازاى معلش انا لسه جديده فى الميك اب ومش عارفه حاجه.

=============

رد بص وطل:
ماسك الزبادي والليمون من احسن الماسكات اللي ممكن تعمليها لتفتيح البشرة، وبالنسبة للبودرة السايبة فدي بتحطيها بعد كريم الأساس علشان تثبت الميك اب، ولونها لازم يكون من نفس لون البشرة.

السلام عليكم ازيك يا جيجى ميرسى اوى على الحاجات الجميلة اللى بتفيدينا بيها انا فرحى بعد العيد وكنت عايزة اسألك عن مكياج ولفات طرح للوش المدور والمليان وانا قصيرة فنفسى تكون لفة الطرحة عالية كمان فى حبوب كتير ظهرت فى وشى عايزة اى علاج سريع ليها.

===========

رد بص وطل:
ميرسي ليكي إنتي صديقتي العزيزة على متابعتك لينا، وبالنسبة لسؤالك فياريت تتابعينا لإن هيكون عندنا مفاجأة جميلة لكل العرايس اللي فرحهم على العيد، وبالنسبة لمشكلة الحبوب فالأفضل إنك تستشيري دكتور أمراض جلدية علشان يديكي العلاج المناسب على حسب طبيعة الحبوب ويا ريت في الفترة دي ماتحطيش ميك اب خالص أو تقللي منه على اد ما تقدري وتهتمي بنظافة بشرتك باستمرار.

ازيك يا جيلان.. عندي سؤال ليكي يا قمر.. بس الاول احب اشكرك على مجهووودك الرائع يا حبيبتي. سؤالي يا قمر هو ان ظوافر ايدي بيطلع فيها بقع بيضه وبتضايقني جداا انا مش عارفة دي ايه في ناس قالوا نقص كالسيوم مع اني بشرب لبن وباكل زبادي وباكل بيض كتير.. بجد شوفي لي حل يشيل لي البقع دي ولو حضرتك تعرفي سببها ايه ياريت تفيديني وشكرا ليكي يا قمر.

=============

رد بص وطل:
فيه اسباب كتيرة لظهور البقع البيضاء على الأظافر ومنها نقص الكالسيوم والزنك، أو نقص الحديد في الدم (الانيميا)، وعلشان تتغلبي على المشكلة دي اهتمي بتناول الأكلات الغنية بالحديد والكالسيوم وفيتامين (ب) والبوتاسيوم لأنها مواد غذائية مفيدة للأظافر والحاجات دي بتكون موجودة في الكرفس والسبانخ والثوم والزبادي والبيض والأسماك والقرفة.

هاي جيلان حبيبتي أنا عندي ماكينة بخار وكنت عايزة أعرف أستعملها إزاي يعني إيه الطريقة بتاعتها بعد لما أحط وشي فيها؟ أغسل وشي على طول ولا في حاجة بتتعمل عشان أستفاد من البخار ده؟ ارجو الرد

====================
رد بص وطل :
صديقتى العزيزة بصى إنتى بتحطى وشك قدام البخار ده، بس إغسلى وشك الأول وممكن تمسحى وشك بقطعه قطن فيها ميه ورد وحطى وشك قدام البخار شويه وممكن تتغطى على بشرتك بقطعه قطن عشان لو فى دهون فيها وبعد كده ممكن تعملى ماسك لبشرتك .

هاي جيلان من فضلك حبيبتي عايزة اشوف رايك وخبرتك طبعا معايا.. انا ان شاء الله خطوبتي بعد رمضان ان شاء الله .. وكنت عايزة اعرف اجيب لون فستان ايه يليق عليّ يعني.. انا لون بشرتي قمحي فاتح اوى يدخل على اول درجة من البياض وعيوني بني غامق والحمد لله .. وطولي كويس .. ارجو الرد ضروري ياقمر ..

==========

رد بص وطل:
صديقتى العزيزة ألف مبروك مقدماً وإن شاء الله هتكونى زى القمر بصى الألوان دى بتكون مناسبه جداً على البشرة القمحيه زي الذهبي‏ والأحمر بكل درجاته والبرتقالي والأخضر الغامق‏ والأزرق الزهري أما بالنسبه للميك أب فالألوان الهاديه والبسيطه زي البينك والموف والبنيات موضه جداً وكمان هتكون مناسبه معاكى.

كل سنة وإنتى طيبة ياجيلان ممكن وصفة لعمل حمام كريم من مكونات طبيعية بنفس نتيجة اللى بنشتريه عشان أنا بصراحة بقلق من الحاجات الكيماوية .

========================
رد بص وطل :
صديقتى العزيزة تابعينا وإن شاء الله هتلاقى كل اللى إنتى بتسألى عليه .

هاى أنا سمعت إن الليزر ليه أضرار وممكن يحرق الجلد ويطلع فيه بقع بنى هل فى بديل يعنى ياريت أى وصفة طبيعية لتأخير نمو الشعر أو تقليل كميته.

===================
رد بص وطل :
صديقتى العزيزة بصى إنتى لازم تسألى دكتور متخصص عشان تعرفى الليزر هيكون مناسب معاكى ولا لأ، ودى طريقه طبيعيه بتقل من نمو الشعر إنقعي ترمس في ميه لمدة 6 ساعات وخدي الميه بتاعته وأحتفظي بيها في الثلاجة وإدهني منها على إيديك ورجليك وكل مكان عاوزاه خالي من الشعر واستمري فى إستخدامها لمدة 3 أسابيع يوميا.

إزيك جيلان بالنسبة لخليط الجرجير بتاع الشعر نغسله بعد أد إيه وبالماء ولا بالشامبو كمان.

==================
رد بص وطل :
صديقتى العزيزة إنتى بتسيبى الجرجير على فروة راسك عادى وبتغسلى شعرك مرتين فى الأسبوع بالشامبو المناسب مع نوع شعرك .

هاى ياجيلان كل سنة وإنتى طيبة أنا كنت عاوزة اسألك على حاجة أنا مش بحط مكياج وأنا طالعة وأنا بشرتى دهنية بس بحط كريم دوف غير الدهنى فى البيت بس كنت عاوزاكى تقولي لى على إسم كريم يكون حلو وأستخدمه لما أخرج ويكون بديل للمكياج وميرسى ليكى ياقمر .

==================
رد بص وطل :
صديقتى العزيزة بصى إنتى لازم تهتمى ببشرتك وتعملى ماسكات طبيعيه عشان بشرتك يكون مظهرها صحى وكمان ممكن تستخدمى كريمات مرطبه زى أولاى، نيفيا ودوف .

إزيك ياجيلان ذوقك هايل بجد وكل سنه وإنتي طيبة أنا كنت عايزه اسأل بالنسبه لمستحضرات التنظيف والعناية بالبشره ممكن أحفظهم في الثلاجه ولاعادي أسيبهم في حرارة الجو العادي خصوصا مع الجو الحر ده والمستحضرات العنايه بالبشره أقصد بيهم طبعا كريم الليل والنهار وكريم العين والصن بلوك والغسول والتونيك وياريت تعملي حلقة عن كيفية العنايه بمستحضرات والعناية بالبشره وإيه هى المستحضرات اللي المفروض البنت تستعملها للعنايه ببشرتها.

=====================
رد بص وطل :
صديقتى العزيزة بصى إنتى ممكن تحتفظى بمستحضرات التجميل دى فى الثلاجه، وتابعينا وإن شاء الله هيكون فى عدد عن العنايه بالبشرة ومستحضرات التجميل .

هاى يا جيلان شوفى يا عسل انا اللى كنت طلبت لفات طرح على لاسدال باشكال جديده بس فى مشكله مش ده الاسدال اللى انا اقصده انا عندى صورته بس مش عارفه ابعته لك ازاى وتاني حاجه انتى كنتى عطيانى وصفه عشان تطويل الشعر حبه بركه وزيت زيتون وزبادى وعملته بس للاسف ملقتش نتيجة خالص بالعكس ده خلى شعري يخشن اكتر فياريت لو طريقه تانيه تكون مفعولها اقوى وبسيطه وياريت كمان وصفه تخليه ناعم معلش أنا طلبت طلبات كتير بس ياريت تردى عليّ.

============

رد بص وطل:
بالنسبة للإسدالات فمش بينفع معاها إلا الربطات التقليدية لإن الاسبانش أو الربطات اللي على ورا مش هتكون حلوة معاه، وبالنسبة لوصفة حبة البركة فهي كويسة جداً بس حاولي تواظبي عليها وممكن تعملي حمام كريم كل اسبوع علشان تطري شعرك، ولازم تعرفي إن أي وصفة للشعر بتحتاج لوقت طويل شوية علشان تحسي بالنتيجة.

السلام عليكم اختى والده من حوالى اسبوعين مفيش ماسك ليها لازاله الكلف واسمرار الجسم بسبب الحمل وجزاك الله خيرا

=============

رد بص وطل:
أحسن طريقة لعلاج المشكلة دي هي استخدام المفتحات الطبية للبشرة ودي لازم تستخدميها تحت إشراف دكتور أمراض جلدية علشان يديكي الكريم المناسب ليكي.

هاى جيلان ميرسى جدا على رسالتك ليا بس أنا كنت حابة تقولي لى ماسكات تفتيح وتنظيف وتقشير للبشرة الدهنية والعادية وماسكات تانية تغذية وتنعيم لشعرى لان شعرى خفيف جدا ونفسى أغذيه كويس وقولي لى أفضل سيرم معالج للشعر وأفضل صبغة لا تؤذى الشعر وكمان تدى لون جميل وإيه أفضل لون ممكن يتعمل كصبغة للشعر بحيث إن يكون أقرب للطبيعي وبجد ميرسي جدا ليكي.

===========

رد بص وطل:
صديقتي العزيزة السيرم مش بيستخدم لعلاج الشعر ولكنه بيستخدم لإعطاء مظهر كويس للشعر وافضل الأنواع زيرو فريز وكريستال، وبالنسبة للصبغة فأحسن الأنواع هو باليت وجارنييه، وبالنسبة للون الصبغة فده بيكون على حسب لون الشعر الطبيعي ولون البشرة، ويا ريت تتابعينا لإن الفترة الجاية هنقدم لك مفاجآت كتيرة خاصة بالعناية بالبشرة والشعر.

هاي جيلان تسلمي على كل الحاجات الجميلة اللى بتقدميها أنا عاوزة اسالك عن كريم اولاى للتفتيح هل مضر للبشرة أو يحتوى على كورتيزون وكمان كريم غارنييه للتفتيح برده كويس ولا لأ وينفع استخدم الاتنين مع بعض وإزاى .

====================
رد بص وطل :
صديقتى العزيزة بصى أولاى من الماركات المضمونه وكمان غارنيه كريم كوس بس ماينفعش إنك تستخدمى الاتنين فى نفس الوقت .

ازيك ياجيلان إنقذينى أنا مشعرة جدا ولما بعمل سويت بيبقى فيه شعر متبقى والملمس مش بيبقي ناعم أعمل إيه عشان أزيل الشعر كله ومش يتبقى حاجة وكمان الشعر لما ييجى يطلع بيبقى تحت الجلد وبيبقى منظره صعب جدا أعمل إيه وكمان الشعر بينمو بعد أيام قليلة جدا بعد ماعمل سويت من فضلك افيدينى .

====================
رد بص وطل :
صديقتى العزيزة أهلاً بيكى، وبالنسبه لسؤالك أحب أقولك إن الطريقة التقليدية السويت بتعتبر من أحسن الطرق لازالة الشعر، ولو إنتى مشعرة أوى وده بيسببلك مشكله فمن الأفضل إنك تستشيرى دكتور عن الليزر لأزاله الشعر نهائياً .

السلام عليكم إزيك ياجيلان بجد أنا معجبة بكل اللى بتقدميه وبجد الحمد لله بنستفيد منك جدا أنا كان عندى سؤال أنا شعرى دهنى وطبعا فى الحر ده باخد شاور أكتر من مرة فى اليوم فشعرى بيكون مبلول وبحاول بقدر الامكان إنه مش يتبل أوى بس بلاقى لما بينشف من الميه بلاقيه ناشف جدا مش عارفه ليه ده غير إنه بقى بيقع جدا من فضلك قوليلى أعمل إيه؟ كمان عايزة اسألك عن احسن نوع حمام كريم بوناويل ولا لوريال؟ وإيه رايك فى حمامات الكريم اللى بالنخاع ؟
واسفة إنى طولت عليكى وكل سنة وانتى طيبة ودايما مفرحانه بكل اللى بتقدميه.

========================
رد بص وطل :
صديقتى العزيزة بصى حاولى إنك ماتغسليش شعرك كل يوم وممكن تستحمى من غير ماتغسليه، وحاولى تعملى حمام كريم مرتين فى الأسبوع عشان مشكله جفاف الشعر وأفضل أنواع حمام الكريم لوريال،بوناويل،دوف وبالنسبه لحمام كريم النخاع فهو كويس وممكن تستخدميه وبالنسبه لتساقط الشعر فإنتى ممكن تعملى الوصفه دى هايلة لانبات الشعر ومكوناتها سهلة كل اللي عليكي إنك تجيبي حزمة جرجير وتحطيها في الخلاط مع كوب ماء, وتحطى عصير الجرجير على راسك وإحرصى على إنه يلمس فروه راسك لان تاثيره بيكون في إنبات الشعر وتقويه البصيلات الضعيفه كرري هذه العملية كل يوم لمدة 3 شهر وهتلاقي نتيجة هايلة.

أولا كل سنة وإنتى طيبة ثانيا أنا وزني 45 ونفسي أزيد شوية
أنا بجد تعبانة نفسيا من الموضوع ده.

==================
رد بص وطل :
صديقتى هند كل سنه وإنتى طيبه بصى إنتى لازم تستشيرى دكتور وتتأكدى إنك ماعندكيش مشكله صحيه، وكمان فى أكلات بيكون فيها سعرات حراريه عاليه ممكن إنك تكليها زى العسل والشوكلاته مثلاً .

إزيك ياجيلان عاملة إيه بجد العبايات والاسدالات الى نزلتيها جميلة اوى أنا عندى 18 سنة بس مش طلعلى حب شباب خالص الحمد لله بس جت الفترة الاخيرة دى كل ما أكل أى حاجة فيها دهنيات الاقى بعدها بيومين منطقة الجبهة فيها حبوب صغيرة جدا صفرا بتبقى حبتين أو تلاته بس بيبقى شكلها وحش للى يقرب منى بيلاحظها الحبوب دى ممكن تتجرح بسرعة لدرجة إنى بخاف أغسل وشى بليفة الوش العادية أو أعمل مسك إسكرب مع العلم انى قللت من أكل اى حاجة فيها دهنيات وبردو لسه بتطلع ممكن تقولي لى أعمل إيه؟ وهل حبوب الخميرة البيرة الى بتتباع فى الصيدلية مفيدة وبتنقى الوش ولا لأ؟

=====================
رد بص وطل :
صديقتى العزيزة بصى إنتى لازم تهتمى بنظافه بشرتك وكمان ممكن تستخدمى صابونه طبيه وقللى جداً من الأكلات اللى فيها دهون وبالنسبه لحبوب الخميرة فهى كويسه بس لازم تستشيرى دكتور جلديه قبل ماتستخدمى أى حاجه .

ارجوكي عايزة علاج لتشققات الشفايف وتشققات القدم.

===================
رد بص وطل :
صديقتى العزيزة بصى بالنسبه لمشكله تشقق الشفاة فإنتى ممكن تدهني شفايفك 3 مرات فى اليوم بزيت اللوز الحلو أو بزيت الورد
وكمان ممكن ترطبي شفايفك كل يوم بقطنة مبلولة بميه ورد، أما بالنسبه لمشكله تشقق القدم فإنتى ممكن تعملى الوصفه دى مرتين فى الأسبوع المكونات: معلقة كبيرة خميرة + معلقة كبيرة فازلين + 3 معالق عصير ليمون .
الطريقة :بتخلطي المكونات دي كويس مع بعضهم وبعد كده تحطي الخليط على رجلك وكل أماكن التشققات وتغطي رجلك بكيس بلاستيك لمدة ربع ساعة وبعد كده تحطي رجلك في ماء دافئ وملح وتفركي رجلك بحجر القدمين وبعد كده إغسلي رجلك بصابون مرطب وتنشفيها كويس وإدهنيها بأي كريم مرطب وهتلاحظي الفرق على طول إن شاء الله .

ازيك يا جيلان وكل سنة وانتى طيبة وبشكرك على ردك عليّ وكنت بسأل عن اسماء المحلات لملابس المحجبات وقولتي لى انها فى اخر العدد بس انا كنت عايزة اسماء المحلات لملابس المحجبات الكاجوال العادى مش العبايات والاسدالات وبشكرك جدا وبعتذر عن الاطالة.

=============

رد بص وطل:
صديقتي العزيزة تقدري ترجعي للأعداد القديمة اللي قدمت فيها موضة ملابس الصيف وهتلاقي في آخرها أرقام المحلات اللي بتعامل معاها.

هاى جيلان بجد كل حجاتك تحفه وجميله وشيك جدا ممكن أسئلك سؤال أنا كنت عايزه واصفه أفضل من الزبادى والليمون عشان جربتو كتير ومعملش نتيجه ولسه بشرتى مفتحتش من البحر وكمان عايزه أفتح لون إيدى عشان المنطقه المعرضه للشمش سمرة والباقى فاتح .

=====================
رد بص وطل :
صديقتى العزيزة إنتى لازم تستمرى على إستخدام الماسك دة فترة عشان تبدئى تحسى بالنتيجه وكمان ممكن تستخدمى صن بلوك قبل ماتتعرضى للشمس وده ماسك تانى بيساعد على تفتيح البشرة ممكن تعمليه ومكوناته: معلقتين لبن بودرة + ماء ورد + معلقتين بياض بيضة + نص معلقة نشا، وبتخلطي المكونات كلها مع بعضها وبعدين تفردي الخليط على وشك وتسيبيه لمدة ربع ساعة وبعد كده تغسلي وشك بميه، وممكن تعملي الوصفة دي مرتين في الأسبوع وبالنسبه لمشكله إسمرار إيدك فاممكن تعملى الطريقه دى وإنك تدهني المنطقة الغامقة بزيت زيتون وبعد كده تدعكيها كويس بنصف ليمونة مغموسة في ملح ناعم .

هاى إزيك ياجيلان كل سنة وإنتى طيبة أنا عاملت وصفة الجرجير بس حسيت إن شعرى نشف أوى فحطيت عليه كمان كريم باراشوت فى أى ضرر أو حاجة وميرسى ليكى بجد .

===================
رد بص وطل :
صديقتى العزيزة إنتى ممكن تعملى حمام كريم مرتين فى الأسبوع لكن ماتحطيش الكريم على وصفه الجرجير .

هاى إزيك يا قمر لو سمحتى أنا بس كنت عايزة اسألك شوية أسئلة كدة بخصوص بشرتى أنا بشرتى دهنية وعايزة أعرف الميك أب المناسب ليها عشان يدارى كل حاجة فى البشرة ويخليها صافية وبسيطة يعنى أحط إيه بالظبط وماركات إيه وفعلا اجيب الميك أب فرى أويل يعنى خالى من الزيوت ولا إيه؟ وميرسى ليكى جدا .

=====================
رد بص وطل :
صديقتى العزيزة بصى البشرة الدهنيه محتاجه منك إهتمام وإنك تهتمى بنظافتها على طول وطبعاً لازم تستخدمى الميك أب أويل فرى، ودي من أفضل ماركات الماكياج اللي ممكن تستعمليها وإنتي مطمنة فلوريل ومادينا وكيرولان وريمال وبورجوا وكريستيان ديور وكمان منتجات أوريفلام كويسه وممكن تستخدميها .

السلام عليكم إزيك ياجيلان كل رمضان وإنتي بصحة وسعادة يارب إن شاء الله جيلان حبيبتي أنا إن شاء الله خطوبتي في العيد إن شاء الله وكنت عايزة أعرف البس الفستان لونه إيه وكده أنا وشي مدور وطويلة ماشاء الله جسمي متناسق الحمد لله وبشرتي امحي فاتح أول درجة دخلة على الابيض وعيني لونها بني غامق ياريت تعرفيني إيه لون فستان مناسب ليه ومكياج مناسب لان أنا مش عايزة أعمل مكياج غامق أنا بحب يكون فاتح أوى كأنى حطة ميك أب هادي يارب يكون قدرت أوضحلك احتياجي وجزاكي الله خيرا يا قمر وشكرا ليكي ولادارة الموقع كله .

=====================
رد بص وطل :
صديقتى العزيزة ألف مبروك مقدماً وإن شاء الله حتكونى زى القمر بصى الألوان دى بتكون مناسبه جداً على البشرة القمحيه مثل الذهبي‏ والأحمر بكل درجاته والبرتقالي والأخضر الغامق‏ والأزرق أما بالنسبه للميك أب فالألوان الهاديه والبسيطه موضه جداً وكمان حتكون مناسبه معاكى .

هاى جيلان هو يعنى إيه الاسكراب وبيستخدم فى إيه ممكن سوال تانى هو زيت الزيتون هو لازم لما أحط زيت زيتون على أى ماسك لازم يكون مغلى ولا مش لازم ولا فى ماسك معين .

==================
رد بص وطل :
صديقتى العزيزة بصى الأسكراب بيساعد على إزاله خلايا الجلد، وبالنسبه لزيت الزيتون فامش لازم إنك تغليه .

هاى جيلان أنا 22 سنه طلعلى حبوب جوة الجلد فى الوجه مع إنى بنظف بشرتى كويس وفيه صابونه منظفه إسمها لمبادا بستخدمها هى كويسه أوى وبتنظف الوجه بس معرفش ظهر لى حبوب بحس إنها لجوة وظاهره وحمره ومش عارفه أعمل ليها حاجه .

====================
رد بص وطل :
صديقتى العزيزة أهم حاجه إنك تهتمى بنظافه بشرتك على طول وكمان من الأفضل إنك تستخدمى صابونه طبيه عشان مشكله الحبوب دى، وممكن تستشيرى دكتور جلديه عشان يديكى علاج مناسب .

السلام عليكم إزيك ياجيلان أخبارك إيه أنا أول مرة أشارك معاكم النهارده أنا بحييكي علي المجهود الرائع بجد الحاجات تحفه بما إني بلبس عبايات وبجد العبايه اللي إنتي جايباها جميله جدا لو سمحتي يا جيلان كنت عايزه أسالك علي كذه حاجه كده أنا أول مرة عملت سويت في منطقة البكيني طلعلي حبوب جامده المهم الحمد لله راحت بس الحبوب سابت أثر فممكن تقولي لي علي ماسك لازاله الأثار دي وأنا شعري قصير فممكن تقولي لي علي وصفه لتطويل الشعر وتنعيمه وأنا جوازي قرب فالمشكله برده إني شعري مجعد فانا فكرت أعمله فرد بس عرفت إن اضراره كتير فانصحيني قوليلي أعمل إيه وشكرا ليكي .

=====================
رد بص وطل :
صديقتى العزيزة ألف مبروك مقدماً وبالنسبه لسؤالك دى وصفه كويسه جدا لأزالة أثار الحبوب ومكونتها: تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، وبعد كده حطيها فى المنطقه اللى فيها أثار للحبوب وسبيها لحد ماتنشف وبعد كده إغسليها بالميه، وبالنسبه لشعرك فإنتى لازم تهتمى به وتعملى حمام كريم ونصحتى ليكى إنك ماتعمليش الفرد لأنه مضر جداً للشعر وممكن تسألى الكوافير عن الكيراتين لأنه بيعالج كل مشاكل الشعر .

جيلان بليز ساعديني مشكلة تشققات شفايفي وغمقانها مضايقني أعمل إيه أنا كنت دايما بعض عليها بس بطلت ممكن مجموعة نصايح .

=====================
رد بص وطل :
صديقتى العزيزة بصى لازم تستخدمى أنواع مضمونه بالنسبه لأحمر الشفاة وممكن تعملى الوصفه دى كل يوم ومكوناتها: جليسرين + عصير ليمون + عسل وكمان ممكن تدهنى شفايفك بزيت اللوز .

جيلان أنا جبت بنطلون سروال أسود إيه أحلي الوان اللي ممكن اجيبها للبضيهات أنا عارفة إن الاسود بيليق عليه كل حاجة بس ممكن أحلي الوان مع العلم إن بشرتي قمحية ساعديني بليز لان أهل خطيبي معزومين عندنا .

=====================
رد بص وطل :
صديقتى العزيزة شوشو بصى اللون الأسود بيكون مناسب معاة معظم الألوان وممكن تلبسى من الألوان دى (الأحمر، الفوشيه، الأزرق، الأصفر) .

جيلان بليز بشرتي كانت مختلطة دلوقتي بقت دهنية جامد قوي ومش عارفة أتعامل معاها ممكن ماسكات تمتص الدهون واستخدملها إيه عموما.

=====================
رد بص وطل :
صديقتى العزيزة شوشو بصى إنتى لازم تستخدمى غسول مناسب للبشرة الدهنيه زى ديور، نيتروجينا أو منتجات كلين أند كلير وعلى فكرة في حاجة حلوة أوي ممكن أنك تعمليها وهي إنك تغلسي وشك كل يوم الصبح بميه الورد لانها مفيد جدا وبتخفي أى إفرازات دهنية ممكن أنها تظهر على البشرة والماسك ده كويس جداً ومناسب للبشرة الدهنيه ومكوناته: ردة+ ميه ورد.
الطريقة: ضيفي ميه الورد على الردة لغاية لما تلاقيها على شكل عجينة لينه حطيها على وشك ورقبتك لمدة ربع ساعة، بعد مرور ربع ساعة إفركي الخليط من على وشك .

hiiiiii

إزيك ياجيلان بجد الاسدالات والعبايه حلوه أوى أنا كنت عايزه اسألك ينفع ألبسهم عندى 20 سنه وجسمى عريض شويه وكمان مش طويله مش ببقى عارفه ألبس إيه جيبات ولا بنطلونات وكمان ألبس عليهم إيه؟ أنا بحس إن البنطلون بيقصرنى لأنى بلبس عليه حاجه طويله ياريت تفدينى بجد وتقولي لى إقتراحات فى اللى ممكن البسه؟

===================
رد بص وطل :
صديقتى العزيزة بصى الأسدال والعبايه بيكونوا مناسبين على أجسام مختلفه وممكن تختارى الألوان الفاتحه، وبالنسبه لأختيار الملابس ممكن تلبسى جيبات لو إنتى حاسه إنها بتكون مناسبه عليكى أكتر وكمان ممكن تلبسى كعب عالى لو إنتى لبسه بنطلون لأن ده بيدى شكل مختلف وحاولى تختارى بلوزة يكون طولها مناسب وتابعينا وإن شاء الله هتلاقى أفكار جديدة ومختلفه .

هاى ياجيلان إزيك كل سنه وحضرتك طيبه أنا مش عارفه سؤالى هيوصل ولا لأ أنا شعرى من قدام إتنحل وهاش وتقصف لو أنا شلته من قدام هيطلع ولا لأ ولو سمحتى عايزه ماسك للرؤس السوده ووصفه لفرد التجعيد من الشعر معلش طولت عليكى .

=====================
رد بص وطل :
صديقتى العزيزة منى كل سنه وإنتى طيبه بصى أهم حاجه إنك تهتمى بشعرك ونصحتى ليكى إنك ماتشليش شعرك من قدام خالص لأن ده مضر جداً لشعرك وممكن تعملى حمام كريم مرتين فى الأسبوع على الأقل ودى أفضل الأنواع اللى ممكن تستخدميها(بوناويل،لوريال،دوف)، وكمان دى وصفه طبيعيه لأنبات الشعر ومكوناتها سهلة جداً كل اللي عليكي إنك تجيبي حزمة جرجير وحطيها في الخلاط مع كوب ماء, وبعد كده حطى عصير الجرجير على راسك وإحرصي على إنه يلامس فروه راسك لأن تاثيره يكون في إنبات الشعر وتقويه البصيلات الضعيفه كرري العملية دى كل يوم لمدة 3 شهور وهتلاقي نتيجة هايلة، أما بالنسبه لمشكله الرؤوس السودة فأهم حاجه إنك تهتمى ببشرتك وتستخدمى غسول للبشرة مناسب ودة ماسك كويس وهيخلصك من المشكله دى كل اللي عليكى إنك تحطي شوية خميرة على ردة وتعجنيهم بميه ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة وقبل ما تشيليه حاولي تضغطي برفق على بشرتك بقطنة أو منديل، وبعد كده إفركي بشرتك كويس، وبعدين إغسلي وشك بميه فاترة، وبالنسبه لحمام البخار تعمليه بأنك تحطي ميه في حلة حتي الغليان وتعرضي وشك للبخار .

إذيك جيلان جزاك الله خيرا أنا شعري جاف جدا بعمله فير أوقات بس في وقت مش بينفع أعمله أغذيه إذاي وأعمل فيه إيه بحيث يظهر بمظهر معقول أنواع سيرم أو بلسم كريم تحسن من مظهره شكرا جيلان .

====================
رد بص وطل :
صديقتى العزيزة أهم حاجه إنك تعملى حمام كريم لشعرك مرتين فى الأسبوع على الأقل ودى أفضل الأنواع(بوناويل،لوريال،دوف) وبالنسبه لسؤالك عن السيروم فممكن تستخدمى زيرو فريز أو كريستال وكمان ممكن تستخدمى كريم بانتين بديل الزيت .

أنا إشتاريت قميص كحلى غامق بس هو مش قميص قميص يعنى موديله قريب للبلوزة شويه وبفكر أجيبله بنطلون جينز نفس الدرجه بس مش عارفه الطرحه يبقى لونها إيه والشوز والشنطة بس أنا مش عايزاهم أبيض .

=================
رد بص وطل :
صديقتى العزيزة بصى إنتى ممكن تلبسى طرحه مشجرة وممكن يكون فيها ألوان مختلفه أما بالنسبه للشوز والشنطه فاحولى إنك تختارى ألوان فاتحه زى الموف أو الفوشيه وممكن تلبسى شنطه يكون فيها ألوان مختلفه .

كل سنه وإنتي طيبه ياجيلان ياسكره أولاً الموديلات تجنن تسلم إيديك وذوقك اللي يجنن عاوزه طلب منك ياجيلان نفسي تحطي لفات طرح بس مش إسبانش لأني مش بعرف ألفهم ومش بيليق خالص عليه لأن وشي رفيع وميرسي أوي ليكي .

==================
رد بص وطل :
صديقتى العزيزة شكراً على ذوقك وتابعينا وإن شاء الله هتلاقى لفات طرح عاديه .

أنا كنت هشترى بودره مائيه سمعت إنها مضره فنزل حاجه بيقولوا إنها أحسن من البودره المائيه أسمها كريم مائى موضه ده حلو ولا لأ.

===================
رد بص وطل :
صديقتى العزيزة البودرة المائيه مضرة جداً للبشرة، وأفضل بودرة ممكن تستخدميها هى اللوس باودر(البودرة السايبه) .

كل سنة وإنتي طيبة ياجيلان الموديلات اللي جبتيها بجد تحفة وتخلي الواحد يحب الاسدال لأني ماليش فيه خالص وياريت تجيبي لينا لفات طرح جديدة للعبايات .

====================
رد بص وطل :
صديقتى العزيزة شكراً على ذوقك، وتابعينا وإن شاء الله هتلاقى لفات طرح جديدة ومختلفه .

معلش أنا إشتريت ماء زهر وماء ورد عايزه أستعملهم فى تفتيح البشرة أستعملهم إزاى .

======================
رد بص وطل :
صديقتى العزيزة بصى ماءالزهر وماء الورد مش بيستخدموا لتفتيح البشرة، ودة الفرق بين ماء الزهر وماء الورد
ماء الزهر:بيساعد على تنعيم البشرة ونضارتها .
ماء الورد: قابض لمسام البشرة ومفيدة جداً للبشرة الدهنيه و بيساعد على منع ظهور الحبوب .

هاى ياجيلان يا قمر إنتى كل سنة وإنتى طيبة ياجميل أنا عندى مشكلة شعرى بيقع وأنا بغسله أو بسرحه ومش عارفة من إيه ممكن حل للمشكله دى .

====================
رد بص وطل :
صديقتى العزيزة بصى تساقط الشعر لي أسباب كتير ممكن تكون بسبب نقص الفيتامينات عشان كدة إنتى لازم تهتمى بنوعيه أكلك زى الخضار والفاكهه ومنتجات الألبان، ودي وصفة بتساعد على إنبات الشعر ومكوناتها سهلة جدا كل اللي عليكي إنك تجيبي حزمة جرجير وحطيها في الخلاط مع كوب ماء, وبعد كده حطى عصير الجرجير على راسك و أحرصي على أن يلامس فروه راسك لاْن تأثيره بيكون في إنبات الشعر و تقويه البصيلات الضعيفه كرري هذه العملية دى كل يوم لمدة 3 شهور وإن شاء الله وهتلاقي نتيجة هايلة.

ماهو أكيد الكوافير هيكون مضمون مش هنعمله لنفسنا أنا سؤالى كان هل هنفضل طول عمرنا نعمل الكيراتين برضو حتى لو كان علاج مش فرد ولا الشعر نفسه بيتعالج بعد فتره؟

===================
رد بص وطل :
صديقتى العزيزة المقصود بكوافير مضمون إنك تكونى واثقه فيه عشان تكونى واثقه إن الكراتين اللى بيستخدمه أصلى، وبالنسبه للكراتين فإنتى مش بتعمليه مدى الحياة دى بتكون فترة لحد ماتعالجى شعرك .

هاي يا جيلان لو سمحتي أنا عندي سؤال أنا الحمد لله منتظمة على ماسك السواد حول الفم بس حاسة إنه مش بيجيب نتيجة وكمان أنا من قريب إشتريت برتقال بس لونه كان أخضر فهل ده هيأثر؟

===================
رد بص وطل :
صديقتى العزيزة بصى إنتى لازم تنتظمى على الماسك ده لفترة عشان تبدئى تحسى بنتيجه، وبالنسبه للون البرتقال مفيهوش أى مشكلة .

السلام عليكم إزيك ياجيلان كل سنه وإنتى طيبه وبالف خير ميرسى عالافكار الجميله دى أنا كنت عايزه اسألك أنا بعمل الماسك ده معلقتين ترمس مطحون+معلقتين زبادى+ماء ورد+نقطتين ليمون أنا مش عارفه هو الماسك ده صح ولا لأ وبيعمل إيه للبشرة؟ وياريت وصفه تتقل شعرى عشان هو خفيف أوى وكمان مقصف وشكرا ليكى.

===================
رد بص وطل :
صديقتى العزيزة بصى الماسك ده مناسب للبشرة الدهنيه عشان فى مكوناته ليمون وماء ورد والماسك ده بيساعد على تفتيح البشرة، وبالنسبه لمشكله شعرك فالازم إنك تهتمى بنوعيه أكلك لأن تساقط الشعر ممكن يكون بسبب سوء التغذيه وكمان لازم تقصى أطراف شعرك كل فترة ودى وصفه طبيعيه لأنبات الشعر ومكوناتها سهلة جدا كل اللي عليكي إنك تجيبي حزمة جرجير وتحطيها في الخلاط مع كوب ماء, وبعد كده حطى عصير الجرجير على راسك ولازم إنه يلمس فروه راسك لان تاثيره بيكون في إنبات الشعر وتقويه البصيلات الضعيفه كرري العملية دى كل يوم لمدة 3 شهور وإن شاء الله وهتلاقي نتيجة هايلة .

هاى جيلان كل سنة وانتى طيبة انا بحب كل لفات الطرح بتاعتك معجبة بيها جداوالحمد لله بطبقها بالضبط زى مابتعمليها وبما انى مش بعرف ألف الطرح عادى ودايما بلفها اسبانش بس بدارى رقبتى وشعرى ينفع تقولي لى طرق لفات طرح جديدة بجد ياريت إلى جانب ان عندى فستان سهرة تركواز واسع وعايزة اطرز عليه بنفسى بما انى بعرف بس مش عارفة شكل مناسب ياريت تقولي لى ويكون ايه الوانات الطرح عليه من فوق ياريت تردى عليّ.

=================

رد بص وطل:
كل سنة وإنتي بصحة وخير وسعادة يا ريري، وميرسي على متابعتك لينا، واتمنى إننا نفضل عند حسن ظنك دايماً، وإن شاء الله اقدم لك دايماً كل الجديد، وبالنسبة لسؤالك التاني فعايزة اقول لك إن الموضة دلوقتي هو التطريز البسيط والرقيق جداً، وممكن تطرزيه بألوان زي الأسود أو الفضي، وتدخلي من نفس ألوان التطريز في الطرح مع اللون التركواز.

السلام عليكم ازيك يا جيلان كل سنه وانتي طيبه انا عندي سؤال انا اشتريت بدي فيجا الاصلي من محل والمحل بيبيع التقليد بتاع فيجا مع الاصلي وانا اول مرة اشتري منه وحاسه ان مفيش فرق بينهم اتأكد ازاي ان اللي معايا هو بدي فيجا الاصلي.

=============

رد بص وطل:
ممكن تشتريه من محلات فيجا نفسها علشان تتأكدي إنه الأصلي.