عروسة جديدة وعلى وش جواز، يبقى أكيد نفسك إن بشرتك تكون ناعمة ونضرة مش كده وبس، ده أنتِ أكيد نفسك كمان تتخلصي من الأماكن الغامقة الموجودة في بعض أجزاء الجسم..وأكيد طبعاً عمّالة تسألي أصحابك، وكل ما تسألي حد يقول لك إن المركز الفلاني هايل وبيقدّم خدمات هايلة جداً للعرايس، بس أنتِ خايفة تروحي علشان موضوع التصوير اللي بيحصل في بعض الأماكن أو لعدم تأكدك من مستوى النظافة اللي ممكن يكون موجود هناك، بالإضافة إلى أن المراكز دي بتاخد فلوس كتيرة جداً وأنتِ مش عاملة حسابك عليها..
علشان كده إحنا النهارده هنعرف مع بعض إزاي ممكن إنك تحققي كل ده وأنتِ قاعدة في البيت من غير ما تروحي أي مركز من مراكز التجميل وتدفعي فلوس كتير...تعالي نشوف إزاي؟!
حمام البخار لبشرة الوجه
حمام البخار من الحمامات المعروفة جداً لبشرة الوجه، وفايدته إنه بيساعد على تنشيط الدورة الدموية في البشرة، وبيفتّح المسام وبكده تقدري إنك تتخلصي من أكبر قدر ممكن من الإفرازات الدهنية والرءوس السوداء اللي ممكن إنها تكون موجودة على وجهك..
وكل اللي هتحتاجي له:
1- شيح "من عند العطار".
2- مياه.
3- فوطة كبيرة.
الخطوات:
1- سيبي الشيح يغلي في حلة متوسطة الحجم.
2- بعد ما تتأكدي إن المياه وصلت لمرحلة الغليان حطي الفوطة على رأسك وافرديها كويس وشيلي "الحَلّة" من على النار وقربي وجهك من "الحلة" علشان وجهك يلاقي البخار اللي طالع من "الحلة".
3- سيبي البخار يتسرب لبشرتك لمدة 10 دقائق، ولو حسيتِ إن بشرتك تعبت من البخار ممكن إنك تريحي شوية وبعد كده ترجعي تاني تكملي.
4- بعد مرور الـ10 دقائق امسحي بشرتك بإسفنجة ناعمة مبلولة بميّه ساقعة.
حمام الثلج لبشرة الوجه
لو كنتِ بتعاني من وجود سواد جامد جدا في المنطقة اللي تحت العين يبقى عليكِ وعلى حمام التلج، وعلى فكرة حمام التلج منعش جداً للبشرة.
كل اللي هتحتاجي إليه:
قطعة تلج متوسطة الحجم.
الطريقة:
دي مفيش أبسط منها كل اللي هتعمليه إنك تمسكي بقطعة التلج وتمرريها على وجهك في حركات دائرية سريعة، طبعاً في البداية هتحسي إنك مش طايقة قطعة التلج بس بعد شوية هتلاقي نفسك مستمتعة جداً، استمري لغاية ما التلجة تدوب وأول ما تخلصي هتلاقي وشك بقى لونه وردي وهتحسي إنه منتعش جداً.
الحمام المغربي والدلكة لبشرة الجسم
ده أول حمام مفروض إن العروسة تعمله قبل فرحها بيوم على الأقل، وفايدته إنه بيزيل الخلايا الميتة من الجسم، وبيفتّح مسام البشرة وبالتالي بيساعدها على التخلص من الحبوب والدهون، وبكده تلاقي بشرتك في منتهى النعومة والرقة.. بس أهم حاجة لازم تاخدي بالك منها هي إنك قبل الحمام ده تكوني أكلتِ كويس جداً؛ وده لأن الجسم بيفقد سوائل كتيرة؛ بسبب البخار والحرارة العالية وبكده ممكن تصابي بالهبوط، ولو حسيتِ في أي لحظة إنك دايخة أو مخنوقة يبقى روحي بسرعة وافتحي أي منفذ هوا.
وكل اللي هتحتاجي إليه:
1- ماء ساخن جداً.
2- ليفة مغربي خشنة "هتلاقيها في الصيدليات الكبيرة".
3- صابونة مغربي "هتلاقيها في الصيدليات الكبيرة".
4- دلكة سوداني "من عند العطار".
الطريقة:
1- اقفلي أي منفذ للهواء في الحمام "الشباك والباب".
2- جيبي طبق وامليه ميه سخنة جداً وحطي فيه اللوفة المغربي.
3- افتحي الميه السخنة في البانيو على الآخر لغاية ما يبقى فيه بخار جامد في الحمام، وبعدين سدي البانيو واملي نصه من الميه السخنة.
4- اقعدي في البانيو لمدة نص ساعة علشان جسمك يتعرض لأكبر قدر من البخار.
5- هاتي الصابون المغربي وابدئي في فركه بالراحة على جسمك، وده علشان بشرتك ما يحصلش لها التهاب واوعي تجيبي الصابون على عينيكِ.
6- سيبي الصابون على جسمك لمدة 10 دقائق.
7- اشطفي جسمك بالميه السخنة وبعدين حطي كمية تانية من الصابون بنفس الطريقة السابقة وسيبيه برضه لمدة 10 دقائق.
8- ممكن تستفيدي بالفترة دي في تنظيف الكعبين بالحجر الخاص بالقدمين "هتلاقيه عند العطار".
9- بعد مرور 10 دقائق اشطفي جسمك من الصابون بالميه السخنة.
10- امسكي اللوفة المغربي وابدئي في دعك جسمك ماعدا منطقة الوجه بشكل دائري، أثناء دعك جسمك هتلاقي إن الخلايا الميتة في الجسم بتتشال وبتقع على الأرض بمنتهى السهولة.
11- اشطفي جسمك كويس بالميه السخنة، واوعي تسمعي كلام أي حد يقول لك إنك تستخدمي عطور أو أي مستحضرات تجميل أو كريمات في الحمام المغربي؛ لأن كل الحاجات دي فيها مواد كيميائية ممكن إنها تضر بشرتك.
12- ممكن إنك تعملي سويت لجسمك بعد ما تخلصي الحمام المغربي.
13- هاتي الدلكة السوداني "هتلاقيها عند العطار" وابدئي في فرك جسمك كله بيها، والدلكة دي عبارة عن عجينة من مكونات عطرية وأعشاب وأخشاب ثمينة، كخشب الصندل وبعض أنواع الفواكه مثل مهروس قشر البرتقال أو الليمون، بالإضافة إلى مسحوق الذرة والترمس، تُمزج هذه المكوّنات مع زيت السمسم أو زيت الزيتون؛ للحصول على عجينة شبيهة بالصلصال يغطى بها كل الجسم، وعلى فكرة الدلكة دي مهمة جداً؛ لأنها بتكسب الجسم لمعان ولون وردي.
14- سيبي الدلكة على جسمك لمدة ربع ساعة وبعد كده اشطفي جسمك بالماء الفاتر المضاف إليه ماء الورد.
وبكده تكوني حققتي كل اللي نِفسك فيه، وكمان وفرتي فلوسك..وألف مبروك..
انا فرحي بعد 5 شهور وكنت
انا فرحي بعد 5 شهور وكنت عايزة اعرف انا المفروض اعمل ايه خلال الفترة دي لاني حاسه اني في دماغي مليون حاجه التجهيزات بتاع اللبس والكلام ده كله شغالة فيه لكن اقصد اني مفروض ابدأ بعمل حاجات للبشرة والشعر والكلام ده من امتي ؟
وكنت عايزة اروح بيوتي سنتر قبل الفرح بس يكون بأسعار معقولة برده المفروض ابدأ اروح من امتى؟ وفي حد من المنيا يعرف أماكن بيوتي سنتر كويسه ومجربة وأمنة؟
اه مع العلم اني مدرسة تربية رياضية يعني شغلي كله في الشمس يعني اي حاجه ممكن اعملها دلوقتي ممكن مش تعمل نتيجة لان شغلي كله في الشمس فبتأثر علي بشرتي بالله عليكم محتاجه حد يرد علي كل أسئلتي
================
رد بص وطل:
ربنا يتمم على خير يا رحيق، واهم حاجة احب اقولها لك هي إنك لازم تستخدمي الصن بلوك قبل ما تتعرضي للمشس بحوالي ربع ساعة، ولو بتتعرضي للشمس لفترات طويلة يبقى بتجددي دهانه على بشرتك مرة كل ساعتين، علشان تحافظي على وشك من آشعة الشمس الضارة، وتقدري ترحي لمراكز التجميل من دلوقتي لو عايزة لكن لو مش فاضية فغنتي ممكن تبداي تتابعي معاهم من قبلها بشهرين مثلاً، ولازم تبداي تعتني بشعرك من دلوقتي وتعملي له حمام كريم مرة كل أسبوع، وكمان لازم تهتمي ببشرتك جداً وترطبيها بكريمات الترطيب وتعملي لها تنظيف كل فترة، ويا ريت تحاولي تقللي من الميك اب علشان بشرتك تكون نضرة ومتألقة في الفرح، وإن شاء الله هتكوني عروسة زي القمر.
انا جودين انا فرحى بعد 3 شهور
انا جودين انا فرحى بعد 3 شهور عندى مشاكل بس معاكى واحدة واحدة
1*انا سمعت ان البيكربونات الصوديوم بتستخدم فى المناطق الحساسة للتبييض فعلا صح
2*هو بعد حمام البخار اعمل وراها على طول الدلكة السودانى وبعد كده ادهن كريم عشان المسام.
3*انا عايزة افتح المنطقة الحساسة، فهل جمب عمل الحمام المغربى اعمل حاجة كمان علشان فاضل لى شهرين بس
كفاية كدة وبعدين اكمل معاكى لحد ما تجاوبى على اسئلتى.
=============
رد بص وطل:
ألف مبروك مقدماً يا جودين، وأنا هجاوب على اسئلتك واحد واحد، بالنسبة للسؤال الأول فيا ريت بلاش تستعملي بيكربونات الصوديوم لإن ممكن يكون لها اضرار على البشرة مع كثرة الاستخدام ودي وصفة مضمونة لتفتيح المنطقة دي وهي عبارة عن زيت زيتون + زيت لوز + دقيق خشن (دقيق البسيسة)
الطريقة
اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.
وبالنسبة لسؤالك الثاني فإنتي ممكن تعملي حمام البخار وبعده الدلكة وبعد كده تدهني كريم ترطيب للبشرة.
السلام عليكم انا ليا سؤال هي
السلام عليكم انا ليا سؤال هي الشبه لما تستعمل تحت الابط مابتعملش اسمرار وكنت سمعت وصفه لتخفيف الشعر بنبات السعد بيجي جاهز من العطار بس قبل ما احطه اعمل ماسك شبه وعليها ليمون لمده ساعه وبعدها احط السعد 3 مرات في اليوم هل المعلومه دي صح اصل أنا خايفه احط الشبه دي على وشي ويا ريت اعرف استعمل الصابون المغربي واللوفه المغربي وماسك السنفره في التدليك في الحمام اليومي ازاي ايه يتحط الاول واعمل ايه لاني مش عارفه وميرسي ليكم اووووي.
===============
رد بص وطل:
الشبه مابتعملش اي اسمرار تحت الإبط، وعلى فكرة مش لازم خالص إنك تعملي ماسك الشبه قبل نبات السعد فيه طريقة بسيطة جداً ممكن تعمليها وهي إنك تاخدي 3 معالق من مسحوق النبات وضيفيه إلى "لتر ماء" وحطيه على النار لغاية ما يغلي ثم يترك لينقع لمدة ربع ساعة، وبعدين يوضع على الجسم كغسول بعد إزالة الشعر لمدة 6 أيام متواصلة من كل شهر.
أما بالنسبة لسؤالك التاني فإنتي بتحطي الماسك على جسمك وتسيبيه شويه وبعدين تبداي تفركي جسمك بالليفة المغربي والصابونة.
ميرسى اوى على الحمام ده لانى
ميرسى اوى على الحمام ده لانى كنت بدور عليه بس انا كنت عاوزة اسال انا باستخدم صابونة دوف لغسيل وجهى اول ما اقوم من النوم وفى حالة ازالة الميك اب ده كدة كويس ولا فى فيه ضرر على بشرتى ولا استخدم حاجة تانية احسن وياريت تقوليها لى.
==============
رد بص وطل:
صابونة دوف كويسة، وبالنسبة لإزالة الميك اب فإنتي لازم تستعملي مزيل للميك اب من ماركات زي دوف أو نيفيا، وممكن تستعملي ماء الورد كمان.
هاااااااااااااى بجد انتي
هاااااااااااااى بجد انتي رائعه انا كنت عايزه اسئلك لما بحط البودره المائى بتخلينى سمره اكتر من لون بشرتى انا قمحويه بس مش اوى لما بحطها بكون سمرا ممكن اى بديل ليها او حتى اسم كريم اساس كويس واجيبه منين انا من الجيزه امبابه يا ريت الرد بسرررررررعه.
==============
رد بص وطل:
البودرة المائية مضرة جداً وياريت تبطلي تستعمليها، والأفضل إنك تستخدمي كريم اساس مناسب لدرجة لون بشرتك ودي أحسن الماركات اللي ممكن تستعمليها "فلوريل" و"مادينا" و"كيرولان" و"ريمال" و"بورجوا" و"كريستيان ديور".
طريقه راااااااااااااائعه جدا
طريقه راااااااااااااائعه جدا ياجميل انا باجيب الليفه والصابونه من عند العطار برضه ومش غاليين والدلكه مره جبت مكوناتها من عند العطار وعملتها في البيت وكانت رااائعه جدا
صح الطريقه سهله جدا بس بتاخد وقت شويه
بس ممكن ادهن اي كريم مرطب للجسم بعد ما اخلص الحمام المغربي لان المسام هتكون مفتوحه كدا او مثلا اي تونر قابض للمسام ولا يضر البشره؟
==================
رد بص وطل:
ميرسي ليكي صديقتنا العزيزة على مشاركتك الجميلة دي معانا وبالنسبة لسؤالك فإنتي طبعاً ممكن تدهني جسمك بكريم ترطيب بعد الحمام المغربي مفيش أي مشكلة.
ممكن يانوسة تساعدينى انا بنتى
ممكن يانوسة تساعدينى انا بنتى عندها سنتين وشعرها خشن وهى زى القمر وعشان كدة عملت لها جلات بوظ شعرها اكتر اعمل ايه ارجوكى ساعدينى ولو حلقته لها هيكون احسن ولا ايه ردى على ارجوكى.
=============
رد بص وطل:
صديقتي العزيزة إنتي غلطتي جداً لما عملتي شعر بنتك بكريم فرد لإنه مضر جداً للشعر وخصوصاً إنها لسه صغيرة وشعرها ضعيف وإنتي دلوقتي ممكن تقصيه لها قصير خالص وتبدأي تعالجي فروة راسها اللي أكيد اتأثرت بكريم الفرد والأفضل لو كان العلاج تحت إشراف دكتور.
شكرا ليكي كتير علي المعلومات
شكرا ليكي كتير علي المعلومات القيمه دي بس عندي سؤال انا في الصيف جسمي بيبقي حلو قوي بس اول ما الجو يبرد في الشتا دايما بلاقيه بهتان ومقشر كله مش مناطق مناطق عندك حل ليا رغم اني دايما برطبه علي طول بكريم جونسون والتقشير دايما في ظهري ممكن تلاقي ليا حل وكمان رجليه وكعوبي في الصيف دايما لونها غامق معلش طولت عليك.
============
رد بص وطل:
صديقتي العزيزة إنتي لازم تستشيري دكتور أمراض جلدية علشان يكشف عليكي وتعملي بعض التحاليل لإن واضح إن عندك نقص في بعض المواد والفيتامينات اللي بيحتاج لها الجلد والدكتور هيقدر يديكي العلاج المناسب وياريت تطمنينا عليكي.
بجد شكراً على النصائح الهائله
بجد شكراً على النصائح الهائله دى بس انا عندى مشكله ومش عارفه اعمل ايه انا فرحى قريب ولما بعمل سويت فى منطقه الكتف بيطلع لي حبوب ومحتاجه وصفه للشعر الزائد.
============
رد بص وطل:
ميرسي ليكي إنتي صديقتنا العزيزة وبالنسبة للحبوب اللي بتطلع بعد السويت إنتي ممكن تتغلبي عليها بإنك تملي طبق غويط بالثلج وضيفي ليه 4 أكواب لبن وبعدين غطسي حتة قطن في الطبق ده وضعيها على المناطق اللي بتعاني من الاحمرار والحساسية واتركيها لتجف... ثم ضعي طبقة أخرى بعد 15 دقيقة وكرري العملية مرتين لتعود بشرتك إلى حالتها الطبيعية.
وفيه وصفات بتساعد على تقليل نمو الشعر ممكن تجربيها ومنها:
1- إنك تنقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر.. واستمري على ذلك لمدة 3 أسابيع يوميا.
2- إنك تستخدمي نبات السعد وده هتلاقيه عند العطار. خدي 3 معالق من مسحوق النبات وضيفيه إلى 'لتر ماء' وحطيه على النار لغاية ما يغلي ثم يترك لينقع لمدة ربع ساعة.... ثم يوضع على الجسم كغسول بعد إزالة الشعر لمدة 6 أيام متواصلة من كل شهر.
عندى فى الكوع والركبه حاجه
عندى فى الكوع والركبه حاجه غريبه كده عامله زى الحبوب بس هى مش حبوب ولما بقشرها بلاقى جواها شعر صغير روحت للدكتور وقال لى ماتشغليش بالك بها هتروح ومش بتروح اعملها ايه دى.
===============
رد بص وطل:
زي ما قال لك الدكتور هي هتروح لوحدها مع الوقت ومع الاستحمام وفرك الجسم وكمان إزالة الشعر من المنطقة دي بالسويت هيساعد على حل المشكلة دي.
ممكن اسأل على قشرة الشعر دى
ممكن اسأل على قشرة الشعر دى عندى صعبه جدأ جدأ حد يقولى اعمل ايه ورحت لدكتور اكتر من مره ورحت لبتوع الاعشاب كمان مفيش فايده اعمل ايه؟؟؟
===============
رد بص وطل:
لو كانت القشرة عندك موجودة بصورة مش طبيعية يبقى لازم تتابع عند دكتور أمراض جلدية كويس ولازم تصير لإن العلاج ممكن ياخد وقت طويل شويه.
هو بيتعمل كل أد
هو بيتعمل كل أد إيه؟
==============
رد بص وطل:
ممكن تعمليه مرة كل شهر على الأقل.
شكرا ليكى كتير وعلى تعبك
شكرا ليكى كتير وعلى تعبك موضوعك اكتر من رائع
السلام عليكم لو سمحتوا انا
السلام عليكم لو سمحتوا انا وجهى فيه حبوب وبثور سوداء اعمل ايه؟
============
رد بص وطل:
ياريت يا نجوى تستشيري دكتور أمراض جلدية في موضوع الحبوب ده وبلاش تلعبي فيها خالص.. أما بالنسبة للبثور السوداء فده ماسك هايل ممكن تجربيه كل اللي عليكِ إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة. وقبل ما تشيليه حاولي تضغطي برفق على البشرة باستخدام قطنة او منديل، وبعد كده افركي بشرتك كويس، وبعدين اغسلي وشك بماء فاتر.
بجد ما شاء الله عليكى انا
بجد ما شاء الله عليكى انا خايفة عليكى من الحسد انتى استاذة فعلا انا بعمل اغلبيةالحاجات دى والحمد لله بتجيب نتيجة في يومها بس بالنسبة لماسكات تفتيح البشرة ارجو الرد وبجد ميرسى ليكى كتيررررر.
===============
رد بص وطل:
ميرسي ليكي صديقتي العزيزة على ذوقك.. ودي مجموعة من الماسكات الطبيعية لتفتيح البشرة وتغذيتها وإنتي أختاري المناسب ليكي
أولا: ماسك اللوز
المكونات:
لوز مطحون.
بياض بيضة.
نصف ليمونة.
الطريقة:
• انقعي اللوز في الماء حتى تستطيعي نزع القشرة منه.
• اطحني اللوز المقشر في الخلاط حتى يصبح بودرة.
• اخلطي اللوز المطحون مع بياض البيضة مع نصف الليمونة حتى تتجانس مع بعضها البعض.
• ثم ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك.
• كرري هذه العملية كل يوم وسوف ترين الفرق
ثانياً: ماسك الموز
المكونات:
موز.
ونصف كوب من اللبن.
الطريقة:
• تهرس الموزة.
• ويوضع عليها اللبن ويخلط جيداً.
• يوزع الخليط على البشرة مع التركيز على الأماكن الغامقة في البشرة.
• يترك لمدة ربع ساعة ثم تغسلين الوجه بالماء، بس المياه تكون فاترة.
• الماسك ده مش بيبيض الوجه بس لأ وكمان بيكسبه نعومة وحيوية ليس لها مثيل.
ثالثاً: ماسك البطاطس
المكونات:
ثمرة بطاطس.
لبن حليب.
الطريقة:
• اسلقي البطاطس واهرسيها.
• اخلطي البطاطس المهروسة مع اللبن وياريت في الخلاط لغاية ما تبقى ناعمة.
• ضعي الخليط على وجهك واتركيه لمدة نصف ساعة حتى ينشف، ثم اغسلي وجهك بالماء الدافئ ثم بالماء البارد... علشان غسيل الوجه بالماء البارد ثم الدافئ بيعطي للبشرة انتعاشا.
• جربي الماسك ده مرة كل أسبوع وهتلاحظي الفرق.
رابعاً: ماسك الزبادي والليمون
من أكتر المواد التي تساعد على تفتيح البشرة الزبادي بالليمون.
المكونات:
زبادي.
ليمون.
الطريقة:
• توضع نقطة أو اثنتان من عصير الليمون على الزبادي.
• وضعي الخليط على وجهك لمدة ساعتين إلى أن ينشف هذا الماسك ثم اشطفي وجهك بالمياه .
لو سمحتى يا سمسمه هو انا لازم
لو سمحتى يا سمسمه هو انا لازم اخلى الحمام كله بخار عشان اعمل بالليفه المغربى اصلي بتخنق من البخار وكمان هو ينفع استخدم الليفه من غير الصابونه ولما بعمل الحمام المغربى النتيجه بتظهر بعد اد ايه واذا كان استعمل الحمام المغربى كل يوم ولا مره واحده فى الشهر؟
====================
رد بص وطل:
في الحمام المغربي يفضل إنك تعرضي بشرتك لبخار كتير ولو حسيتي إنك اتخنقتي افتحي أي منفذ هوا بسرعة.. والحمام المغربي نتيجته بتظهر على الجسم على طول وممكن تعمليه مرة كل شهر على الأقل.
هاى يا قمر كنت عايزه اسال اذا
هاى يا قمر كنت عايزه اسال اذا كان اللوفه المغربى والصابون ليه علاقه بتخفيف نمو الشعر او تاخيره لانه مسبب لى عقده نفسيه لانه بيطلعه تقيل وبيبقى فى حبوب فبيشوه شكل الرجل وانا مضايقه فياريت تقولي لى الحل وميرسي ليكى.
========================
رد بص وطل:
صديقتي العزيزة أكيد استخدام الليفة بيخف شوية من نمو الشعر ودي كمان وصفات طبيعية ممكن تعمليها لإنها بتخف من نمو الشعر
1- انقعي ترمس في مية لمدة 6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر...... واستمري على ذلك لمدة 3 أسابيع يوميا.
2- استخدمي نبات السعد -هتلاقيه عند العطار. خدي 3 معالق من مسحوق النبات وضيفيه إلى 'لتر ماء' وحطيه على النار لغاية ما يغلي ثم يترك لينقع لمدة ربع ساعة.... ثم يوضع على الجسم كغسول بعد إزالة الشعر لمدة 6 أيام متواصلة من كل شهر.
هو حمام العروسه المغربى للجسم
هو حمام العروسه المغربى للجسم ده بيتعمل مره واحده فى العمر ولا ينغع اعمله يوم خطوبتى واثناء فتره الخطوبه اكتر من مره؟
===============
رد بص وطل:
صديقتي العزيزة الحمام المغربي ده المفروض إنه يتعمل مرة في الشهر على الأقل.
انا بحبك اوى وبتابع اى حاجة
انا بحبك اوى وبتابع اى حاجة بتقوليها وبجد بستفيد منها جدا انا فرحى قريب وعندى مشاكل فى جسمى زى الاسمرار بين الرجلين وكنت عاوزة اسالك هل جلسات تفتيح الجسم اللى فى مراكز التجميل بتعمل مفعول فى الجسم كله ياريت تردى عليا ضرورى لأن فرحى الشهر اللى جاى.
=============================
رد بص وطل:
ألف مبروك مقدماً على الفرح وانت ممكن تحلي مشكلة الأسمرار دي في البيت بدون اللجوء لمراكز التجميل عن طريق إنك تجيبي الليفة المغربي والصابون المغربي وأي ماسك سنفرة من الصيدلية وتعملي تدليك يومي مع الحمام اليومي بعد الماء الدافيء لمدة أسبوعين كل يوم وهتشوفي الفرق بنفسك.
هاى يا جميله انا كنت بسأل على
هاى يا جميله انا كنت بسأل على نبات السعد مش بلاقيه خالص عايزه اعرف الاقيه فين.
===========================
رد بص وطل:
أهلاً بيكي يا قمر وبالنسبة لنبات السعد فده هتلاقيه في محلات العطارة الكبيره.
ممكن أعرف يعني ايه تشقير
ممكن أعرف يعني ايه تشقير ؟
===========================
رد بص وطل:
التشقير ده هو إنك تخلي لون شعر الوجه أصفر بحيث إنه مايبانش في وشك والطريقة دي بتتعمل كبديل لإزالة الشعر بالفتلة.
شكرا على المعلومات الجميله
شكرا على المعلومات الجميله وكنت عايزه اسال ايه الفرق بين كريم حمام العروسة اللى موجود في المحلات ب12 جنيه وبين كريم إزالة الشعر وهل الحمام المغربى أحسن في الاستخدام من أي كريمات.
===========================
رد بص وطل:
كريم حمام العروسة ده بيتحط بعد إزالة الشعر علشان يساعد على تأخر نمو الشعر، أما كريمات إزالة الشعر فهي كريمات عادية لإزالة الشعر ولايفضل أستخدامها لان الشعر بعد أستخدمها بيطلع خشن، وعلى فكرة الحمام المغربي من أفضل طرق تنظيف البشرة ولكنه ليس كريم فهو مجرد وسيلة لتنظيف البشرة
شكرا على الموضوع ده انا كان
شكرا على الموضوع ده انا كان نفسي اعرف بيتعمل ازاي من زمان بس ممكن تقولي لي الدلكه السوداني ممكن اعملها بعد السويت ولا قبلها وممكن الحمام المغربي كله عادي بعد ما اعمل سويت ولا لازم قبله.
============================================
رد بص وطل:
صديقتي العزيزة هتلاقي موجود في العدد إن الدلكة السوداني بتتعمل بعد السويت أما الحمام المغربي فبيتعمل قبل ما تعملي السويت.
شكرا لكل القائمين على قمر 14
شكرا لكل القائمين على قمر 14 كان بس عندى سؤال نفسى بجد الاقى حل لمشكلة بنوتى هى عندها 5 سنوات وشعرها حلو بس بيهيش والاهم انه كمان خفيف من ادام ومش بيطول الا كل فتره بعيدة استخدمت حاجات كتير واخر شى سيرم مغدى لشعرها عوزاكى بس تقولي لى على كريم او زيت يخلى شعرها يطول ارجو الاجابه على وجه السرعه شكراا.
========================
رد بص وطل:
صديقتي العزيزة بنوتك لسه صغيرة ومع الوقت هتلاقي شعرها بيطول بطبيعته، بس أهم حاجة إنك تهتمي بالتغذية الصحية لها واللي بتحتوي على كل العناصر الغذائية والفيتامينات اللازمة لنمو الشعر، وده ماسك كويس ممكن تعمليه لها علشان مشكلة هيشان وضعف الشعر وكل اللي عليكي إنك تجيبي ورقة صبار وتفتحيها من النص وتاخدي المادة اللزجة اللي بتكون فيها وتخلطي 3 كوبايات من زيت جوز الهند مع المادة دي وتحطي الخليط على النار لمدة خمس دقائق وبعدين حطيه في زجاجة وسيبيه يبرد شويه وبعدين اعملي لها بيه حمام زيت لشعرك وبعد كده اغسلي شعرها، وممكن تعملي لها حمام الزيت ده كل أسبوع.
انا بحس ان حمام البخار بتاع
انا بحس ان حمام البخار بتاع الوجه بيطلع حبوب هل ده صح ولا لا وهل ينفع اعمله مره كل اسبوع.
==============================
رد بص وطل:
حمام البخار بتاع الوجه ده بيفتح مسام البشرة وبيساعد البشرة على إنها تتخلص من الشوائب والدهون الزيادة، ومش بتسبب اي مشاكل لاي نوع من أنواع البشرة ولو بشرتك دهنية ممكن تحطي أوراق نعناع في حمام البخار لإنه بيدي انتعاش وحيوية للبشرة الدهنية.
ميرسى ليكى على الوصفات
ميرسى ليكى على الوصفات الجميلة دي وممكن وصفات للشعر المقصف والمموج والجاف وميرسى ليكى اويىىىىىى.
==============================
رد بص وطل:
صديقتي العزيزة ياريت تتابعينا ,وإن شاء الله هتلاقي كل اللي إنتي عايزاه معانا على قمر 14 فانتظرينا.
طيب نستعمل الشبه ازاى عشان
طيب نستعمل الشبه ازاى عشان نزيل رائحه العرق.
===========================
رد بص وطل:
الشبه بتكون إما على شكل بودرة ودي بتحطيها بالقطنة، أو بتكون قطعة صحيحة بتمسحي بها مباشرة منطقة تحت الابط.
بجد انا متشكره على ردك عليا
بجد انا متشكره على ردك عليا وياريت تقبلى انى اكون صديقه ليكم ميرسى اوى
=========================
رد بص وطل
اه طبعا اهلا وسهلا بيكي صديقة عزيزة وفي انتظار المزيد والمزيد من مشاركاتك معانا
ميرسى اوى على المعلومات
ميرسى اوى على المعلومات الهايله دي ممكن تقولي لي على حل لآثار الحبوب والنقط السوداء الموجوده فى مكان الانف.
====================================
رد بص وطل:
صديقتي العزيزة بالنسبة لآثار الحبوب فممكن تعالجيها بماسك الخميرة
الطريقة:
تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع.
أما بالنسبة للبثور السوداء فده ماسك هايل ممكن تعمليه وإن شاء الله هتحسي بالنتيجة على طول، والماسك عبارة عن كوب زبادي كبير + معلقتين من الطمي الخاص بالبشرة (وده بيكون موجود في الصيدليات)+ معلقتين ماء بطاطس (وده ممكن تعمليه بإنك تسلقي البطاطس و تاخدي الميه بتاعتها).
الطريقة :
بتخلطي المكونات دي كلها مع بعضها و بعد كده تفردي الخليط على وشك وتسيبيه لمدة 20 دقيقة و بعد كده تشطفي وشك بالماء الفاتر و تحطي كريم مرطب خاص بالبشرة الدهنية ، و الماسك ده بيتعمل مرة واحدة في الأسبوع...
ميرسى كتير ياعسل والله بحبك
ميرسى كتير ياعسل والله بحبك والله وبجد انا بشكرك على الرد وعلى الوصفه الجميله اللى انتى قولتيلى عليها بس انا كان ليه استفسار انا بعد ما اخلط الوصفه دى احطها على عينى وبعد كده احط الشاشه ولاالشاشه تكون عازل بين عينى وبين الماسك وبجد ميرسى ليكى ياعسل على المجهود اللى انتى بتبزليه وجزاكى الله كل الخير
===========================
رد بص وطل
بعد ما تعملي الماسك تحطيه في الشاشة وبعد كده تحطي الشاشة على عينيكي وماتخافيش مش هتكون عازل ولا حاجة
بجد شكرا ليكى على مجهودك
بجد شكرا ليكى على مجهودك الرائع بس كنت عاوزة اسألك عن ماسك الترمس والشوفان مع العسل هل كويس للبشرة الجافة وهل هو فعلا بيشيل اثر الحبوب وبيفتح البشرة وكنت عاوز طريقة اشيل بيها لون الشعر المصبوغ اصلى عاملة بودرة تفتيح وشعرى بقى ناشف جدا عاوزة اتخلص منه وهل اعمل حنة بعد ما اشيله؟ وايه نوع الحنة الكويسة؟ وهل اى زيت يتعمل حمام قبل غسيل الشعر بيوقعه فعلا ولا بلاش منه؟ اصل شعرى بيقع وخف مش عارفة اعمل ايه ارجوكى تفيدينى بارك الله فيكى.
=======================================
رد بص وطل:
الترمس والشوفان من الحاجات المفيدة جداً للبشرة والترمس من الحاجات اللي بتفتح البشرة،أما بالنسبة لصبغة الشعر فلازم تستني لغاية ما اللون يروح خالص، وبعد كده ممكن تعملي الحنة، ونصيحتي ليكي بلاش تستعملي بودرة التفتيح دي تاني، وحاولي تعالجي شعرك في الفترة دي بإنك تعملي حمام كريم مغذي لشعرك كل أسبوع. ولو حسيتي إن شعرك بيقع بشكل مبالغ فيه يبقى الأفضل إنك تستشيري دكتور أمراض جلدية علشان يديكي العلاج المناسب له..
انا عندى مشكله وهي انه بيظهر
انا عندى مشكله وهي انه بيظهر عندى فى منطقه القوره حبوب صغيره وبتزيد قبل الدراسه بشكل فظيع وبيبقى شكلها وحش بعملها بليمون بتخف بس بعد كده بتظهر تانى وبقالها بالحال ده سنه وزياده فياريت ايه الحل؟ وميرسى.
========================================
رد بص وطل:
صديقتي العزيزة أحسن حل للمشكلة دي هي إنك تستشيري دكتور أمراض جلدية علشان يديكي العلاج المناسب على حسب طبيعة الحبوب، وبلاش تلعبي فيها خالص ولا تستعملي أي علاج لها إلا تحت إشراف الدكتور.
كنت عايزة اسال عن تشققات
كنت عايزة اسال عن تشققات الكعبين عشان دي تعبانى جدا ومش عارفة اعمل ايه عشان اتخلص منها مع اني جربت حاجات كتير وبرضه مفيش فايدة ارجوكي انصحيني ولكي جزيل الشكر.
================================
رد بص وطل:
صديقتي العزيزة ياريت تتابعينا علشان هنقدم لك الحل لمشكلتك في عدد خاص قريب جداً جداً على قمر 14.
شكرا على المعلومات المفيدة
شكرا على المعلومات المفيدة جدا ولكن ممكن تفيديني أنا بشتغل طول النهار ففي آخر اليوم بيكون وجهي مرهق جدا وواضح عليه الارهاق أعمل ايه ؟
=============================
رد بص وطل:
ميرسي ليكي إنتي على متابعتك لينا، وبالنسبة لمشكلتك فأهم حاجة إنك تنامي وقت كافي وتهتمي جداً بإنك تشربي ميه طول اليوم، وكمان ده ماسك ممكن تعمليه علشان تداري علامات الإرهاق من على بشرتك والماسك ده هو ماسك الخيار
المكونات:
نصف فنجان خيار مبشور.
بياض بيضة.
2 معلقة صغيرة من اللبن البودرة.
الطريقة:
اخلطي المكونات دي كلها مع بعضها لغاية ما تبقى عجينة لينة وحطيها على وشك، وبعد مرور 20 دقيقة اشطفي وشك بالماء الدافئ، وبعد شوية اشطفيه بالمية الباردة. جربي الماسك ده مرتين في الأسبوع وإنتِ تشوفي النتيجة بنفسك
أنا عمري 23 سنه متقدم لي واحد
أنا عمري 23 سنه متقدم لي واحد وعايزة يوم مايجي اهله عشان يخطبوني اكون زي القمر انا بيضة جسمي ابيض بس عندي مشكله ان دراعي اسمر من جسمي وبين رجلي اسمر زي اي بنت فيا تري اعمل ايه عشان الاسمرار ده يروح لاني بجد خايفه ومكسوفه مووووووت لاني لو اتجوزت هيكون شكلي ايه قدام جوزي قولي لي اعمل ايه بليز؟
==============================
رد بص وطل:
صديقتي العزيزة ممكن تعملي الحمام المغربي ده لإنه بيساعد على تفتيح المناطق الغامقة في الجسم، وياريت تتابعينا لإن قريب هنقدم لك مجموعة من الماسكات الطبيعية لعلاج مشاكل بشرة الجسم. وإن شاء الله هتكوني أحلى عروسة.
بجد بجد تسلم ايديك يا قمر بس
بجد بجد تسلم ايديك يا قمر بس انا عايزة اسألك عن مشكله بدأت تظهر لى بشكل سخيف بيظهر لى حبوب متفرقه فى وجهى فقط ومش عارفه اعمل ليها ايه اخدت مرهم وحمام بخار ولا حاجه بتأثر ومش عارفه اعمل ايه وخاصه انها بتسيب اثر ودى حاجه مضايقانى جدا وخاصه ان فرحى بعد شهرين ارجوكى ردى عليا بسرعه..بجد موضوعك افادنى جداً.
============================
رد بص وطل:
صديقتي العزيزة الأفضل إنك تستشيري دكتور أمراض جلدية علشان يديكي العلاج المناسب على حسب طبيعة الحبوب، بلاش تلعبي فيهم ولا تعملي أي ماسكات إلا بعد استشارة الدكتور، وإن شاء الله هتكوني عروسة زي القمر.
بجد موضوع هايل كنت عايزه أسأل
بجد موضوع هايل كنت عايزه أسأل عن اللوشن نو هير كويس ولا لأ؟ وعايزه أسأل أستخدمه إزاى يعنى وأنا جسمى مبلول بعد الاستحمام ومغسول.
================================
رد بص وطل:
اللوشن ده كويس واللوشن عموماً بتستخدميه بعد الحمام وهو الجسم مبلول.
مش قادرة اقولك حاجة غير ميرسى
مش قادرة اقولك حاجة غير ميرسى يااجمل قمراااااية في الدنيا يا سماء ميرسى جدا لكل ده.
ميرسي علي الموضوع الجميل ده
ميرسي علي الموضوع الجميل ده انا برضه عروسه وفرحي قرب بس عندي مشكله انا عندي حساسيه فى الجلد من قرص الناموس والحشرات واي قرصه بتخلي جسمي يتملي حبوب والمشكله الاكبر انها بتسيب اثر وبيتغير لون الجلد مكان الحبوب دي و بالتالي بقي جسمي كله مبقع و رحت لدكاتره كتير و كانو بيوصفوا لي كريمات تفتيح بس اللي كان بيحصل انها بتفتح الجلد كله مش بس البقع الغامقه فيفضل الحال علي ما هو عليه ارجوكي قولي لي اعمل ايه؟ واستعمل ايه عشان يرجع الجلد تاني لون واحد وبطريقه سريعه؟ هل اروح لدكتور تجميل ولا اعمل ليزر ولا فى طرق تانيه؟ برجاء الرد و شكرا
=================================
رد بص وطل:
صديقتي العزيزة..الأفضل إنك تستشيري دكتور تجميل علشان يقول لك على الطريقة المناسبة ليكي للتخلص من البقع دي، وياريت تطمنينا عليكي.
انا بجد متشكره جدا على
انا بجد متشكره جدا على النصائح الحلوه دى بس انا كان ليا سؤال ياريت تجاوبينى عليه انا عايزه حاجه لاثر حب الشباب والنقط السوداء الموجوده حول منطقه الانف وميرسى اوى.
=================================
رد بص وطل:
صديقتي العزيزة ده ماسك كويس أوي هيساعدك إنك تتخلصي من المشاكل دي وهو ماسك الخميرة
الطريقة :تذوبي معلقة خميرة في معلقة كبيرة ماء ثم أضيفي معلقة عسل ومعلقة دقيق وتخلطي كل المكونات لحد ما تكون زي العجينة في السمك، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، وماسك الخميرة بينظف البشرة ويفتح لونها ويضفي عليها نضارة ويخفي اى اثر للحبوب الموجودة ، وأنصحك بالماسك مرة في الأسبوع.
انا عملت التلج لوجهى وبعد
انا عملت التلج لوجهى وبعد حوالى نص ساعة عملت حمام بخار هل ده فيه ضرر على بشرتى لحسن انا خفت خالص وخايفة يحصل حاجة.
=====================================
رد بص وطل:
ما تقلقيش خالص مفيش أي مشكلة بس لازم تكوني عارفة إن الثلج بيقفل مسام البشرة أما حمام البخار بيفتح المسام وبيخرج الدهون، وعشان كده من الأفضل إنك تعملي حمام البخار الأول وبعد كده تحطي الثلج.
ميرسى كتييير على الاهتمام
ميرسى كتييير على الاهتمام بنا..انا كنت عاوزه اعرف ماسك لإزاله السمار اللى تحت العين لانه مشكله كبيره وماسك لو فى حبوب بسيطه فى البشره ولو ممكن اعمل الحمام المغربى فى اى وقت ولا لازم قبل الدخله وشكرا وعلى فكره بحبك أوى.
===============================
رد بص وطل:
ميرسي ليكي إنتي يا اسماء على متابعتك لينا، وبالنسبة للسمار اللي تحت العين فده ماسك كويس ممكن تجربيه
المكونات:-
• معلقة كبيرة نشا.
• معلقة كبيرة ماء ورد.
• معلقة كبيرة خميرة.
• معلقة كبيرة لبن فاتر.
• نقطتين زيت لوز.
• معلقة كبيرة عصير الخيار.
طريقة تحضير الماسك:-
بتخلطي المكونات دي كلها مع بعضها كويس أوي، وبتجيبي قطعة شاش من الصيدلية، وبتحطي فيها الماسك ده، وبعدين بتحطيه على عينيك لمدة 10 دقائق، بعد مرور العشرة دقائق بتشيلي قطعة الشاش، وبعدين بتغسلي عينك بالميه الباردة....ممكن بعد ما تخلصي الماسك ده تحطي كريم مرطب حول العين.
أما بالنسبة للحبوب فالأفضل إنك تستشيري دكتور أمراض جلدية علشان يديكي العلاج المناسب ليها.
وبالنسبة للحمام المغربي فأنتي ممكن تعمليه قبل أي مناسبة بس تعمليه قبل المناسبة بيوم أو يومين.
أنا عملت الماسك ده مرة واحدة
أنا عملت الماسك ده مرة واحدة بس لحد دلوقتى بس مش لقيت نتيجة..المفروض نعمله كام مرة فى الأسبوع وبعدين أنا معرفتش أحطه فى الشاش إزاى فبليت الشاش بيه وحطيته بس طبعاً الكمية دي كبيرة جداً وفى الآخر إترمت يمكن أنا إستخدمت الشاش بطريقة غلط أنا قطعت الشاش على شكل مستطيل وبليت نصها بخليط الماسك بشكل العين كده تقريباً وبعدين حطيت الطرفين على بعض وحطيت الشاش على عيني ده صح ولا غلط والماسك أعمله كل أد إيه وشكراً ليكى يا قمر.
==================================
رد بص وطل:
صديقتي العزيزة..الماسك بيكون عامل زي العجينة فممكن تحطيه في الشاشة وبعد كده تحطيه على عينيكي ولو حسيتي إن الماسك خفيف ممكن تزودي شوية نشا علشان يتماسك مع بعضه، وعلى فكرة لو لقيتي الكمية كبيرة ممكن تحطيها في الثلاجة وتستعملي منها كل ما تحتاجي، والماسك ده بتعمليه مرتين في الأسبوع علشان تحسي بالنتيجة.
ممكن حد يكتب عن حنة فرد
ممكن حد يكتب عن حنة فرد الشعر
==============================
رد بص وطل:
صديقتي العزيزة حنة فرد الشعر دي مضرة جداً وبلاش تستعمليها.
ميرسى جدا على الحاجات الجميله
ميرسى جدا على الحاجات الجميله دى. عندى سؤال محيرنى اوى هو بالنسبه للشبه اللى بتزيل رائحة العرق..هى دى يعنى بتتشرب ولا بنستخدمها ازاى؟
=================================
رد بص وطل:
الشبه دي بتشتريها من عند العطار وبتكون إما بودرة أو صحيحة وكل اللي عليكي إنك تحطي منها تحت الابط كل يوم.
شكرا علي المواضيع الجميله دي
شكرا علي المواضيع الجميله دي بس انا عندي مشكله شعري متقصف جدا ومش عارفه اعمل ايه وياتري كريمات فرد الشعر كويسه ولا ايه؟
========================================
رد بص وطل:
كريمات الفرد مضرة جداً جداً للشعر وبتسبب تقصفه وجفافه، وأحسن حل لعلاج تقصيف الشعر هي إنك تقصي اطرافه كل 40 يوم، وتعملي حمام كريم مرة كل أسبوع.
السلام عليكم ورحمه الله ميرسى
السلام عليكم ورحمه الله ميرسى جدا على المعلومات القيمه دى واحلى ما فيها ان سهل اعملها بنفسى وباقل الاسعار بس 0انا عندى مشكله الهالات السوده تحت العين تعبانى نفسيا جدا فهل عندك حل؟
=====================================
رد بص وطل:
ميرسي ليكي يا "دعاء" على ذوقك، وبالنسبة للهالات السوداء فده ماسك كويس ممكن تعمليه علشان تعالجي المشكلة دي
المكونات:-
• معلقة كبيرة نشا.
• معلقة كبيرة ماء ورد.
• معلقة كبيرة خميرة.
• معلقة كبيرة لبن فاتر.
• نقطتين زيت لوز.
• معلقة كبيرة عصير الخيار.
طريقة تحضير الماسك:-
بتخلطي المكونات دي كلها مع بعضها كويس أوي، وبتجيبي قطعة شاش من الصيدلية، وبتحطي فيها الماسك ده، وبعدين بتحطيه على عينيك لمدة 10 دقائق، بعد مرور العشرة دقائق بتشيلي قطعة الشاش، وبعدين بتغسلي عينك بالميه الباردة....ممكن بعد ما تخلصي الماسك ده تحطي كريم مرطب حول العين.
تحفة بجد تسلمى اناعندى في
تحفة بجد تسلمى اناعندى في ركبتى اسمرار ازاى يروح
=============================
رد بص وطل
صديقتي العزيزة دي مجموعة من الوصفات الهايلة اللي هتساعدك على تفتيح الاماكن الغامقة من
الجسم
اولا :ماسك قشر الموالح
المقادير:قشر ليمونة ناشف.
قشر برتقالة ناشف.
زيت اللوز المر.
زيت الجلسرين.
الطريقة:هاتي قشر ليمونة ناشف وقشر برتقالة ناشف واطحنيهم لغاية ما ينعموا وحطيهم في علبة. خدي معلقتين أو حسب المنطقة المراد تفتيحها وضيفي ليهم خليط متجانس من زيت اللوز المروزيت الجلسرين بالقطارة لغاية ما يبقى الخليط زي المعجون وافردي
المعجون على المناطق السمراء 10 دقايق كل يوم والماسك ده بيساعد على تفتيح مناطق الركبة والرقبة والكوعين. وده لأن المناطق دي بتتعرض دايما للاحتكاك سواء بالملابس زي الرقبة أو بالسند على الكراسي أو الترابيزات
وده ماسك تاني ممكن أنك تجربيه هو ماسك زيت الخروع وده مخصوص علشان تفتيح منطقة الإبط والمناطق الحساسة التانية اللي هي مشكلة بتعاني منها أغلب البنات خصوصا المقبلات على الزواج.
الطريقة:
تجيبي زيت الخروع وتدهني بيه المنطقة دي 3 مرات يوميا لمدة شهر وهتشوفي الفرق.
ماسك لتبييض الإيدين
المقادير:
1 معلقة كبيرة عصير ليمون طازج.
3 معالق صغيرة جلسرين.
1 معلقة صغيرة ماء بطاطس مُصفّى.
10 نقط من خلاصة البنزوين 'اشتريه من عند الصيدلية'.
الطريقة:يضاف عصير الليمون للجلسرين ثم يضاف لهما ماء البطاطس. ثم يضاف البنزوين 'اشتريه من عند الصيدلية' نقطة تلو الأخرى... يقلب الخليط جيداً.. يحفظ المستحضر في زجاجة ثم يُرجّ عدة مرات.. يمكن استعمال هذا المستحضر عدة مرات يومياً.
الحقينى يا سماء عندى مشكلة مش
الحقينى يا سماء عندى مشكلة مش عارفة اعمل فيها ايه يا ريت تساعدينى وانا فى الاعدادى وكنت مش فاهمة حاجة لقيت اصحابى بيقولولى انهم بيشيلوا الشعر الزايد فى اماكن حساسة بالموس وفعلا عملت زيهم بس مرة واحدة ودلوقتى لما جيت اعمله بالسويت مش بيتشال ومجدر واللى عرفت اشيله منه عمل مكانه حبوب وانا فرحى قريب قوليلى اعمل ايه ربنا يخليكى ساعدينى
=====================================
رد بص وطل
صديقتي العزيزة اللي حصل لك ده نتيجة أستخدام الموس علشان كده حاولي أنت واحدة واحدة بالسويت وإن شاء الله تتخلصي من المشكلة دي إن شاء الله، وبقي طمنينا عليكي
