"سنة أولى" قصة قصيرة: النجوم

لما بتعب أوي بقعد أكلم النجوم وأبصلهم كتير وساعات بتمنى أن واحدة منهم تنزلي

سنة أولى قصة.. باب جديد ينضم إلى ورشة "بص وطل" للقصة القصيرة سننشر فيه بالتتابع القصص التي تعدّ المحاولات الأولى للكتّاب في كتابة القصة البسيطة.
 
تلك الكتابات التي لا تنتمي لفن القصة القصيرة بقدر ما تعد محاولات بدائية للكتابة.. سننشرها مع تعليق د. سيد البحراوي حتى تتعرّف على تلك المحاولات وتضع يدك على أخطائها..
 
وننتظر منك أن تُشارك أصحاب تلك المحاولات بالتعليق على قصصهم بإضافة ملاحظات إضافية حتى تتحقق الاستفادة الكاملة لك ولصاحب أو صاحبة القصّة..
 في انتظاركم...



"النجوم"

لأني صعب أني أتوجد فوق وسط النجوم قررت أني أعيش معاهم بس وأنا ع الأرض، معرفش هعمل الموضوع ده ازاي لكني هعمله لأني عايز أعمله. ساعات لما بتعب أوي وتضيق بيا بقعد أكلم معاهم وأبصلهم كتير وساعات بتمني أن واحدة منهم تنزلي تقعد معايا في الأودة شوية، نشرب كوبايتين شاي أو ناكل شوكولاتة سوا .. مش مهم هنعمل ايه علي قد ما هو مهم نكلم شوية وشنا ف وش بعض.

لما روحت حكيت لواحد صحبي عن أحلامي وأفكاري دي فطس علي نفسه م  الضحك، بصتله وسبته ومشي من غير ما أسلم حتي لأني بكره الناس اللي ما بتحاولش حتي تفكر في الكلام اللي بيتقالها أو اللي بتسمعه حتي لو هو كلام ما يهمهاش، لكن أكيد وراه معني لأن مفيش حاجة بتتقال كده والسلام. عيبنا أننا ما بنفكرش كتير وبناخد الحاجات ونسبها تعدي علينا مرور الكرام، مش كلنا طبعا لكن معظمنا.

أتكلمت مع نجمة من نجومي الصغيرين في الموضوع ده ولكنها ما ردتش عليا بشكل مقنع وقفلت الموضوع بسرعة لأن عندها مشوار فوق في مجرة بعيد عننا كده عشان تروح تنور في حتة بعيد عننا برضه ما نعرفهاش ولما سألتها عن اسم الحتة دي ما رضيتش تقولي، أظنه سر ممنوع يطلع لكن أنا ما اتحايلتش عليها وسبتها علي راحتها. نجمتي الصغيرة دي أنا يعتبر مربيها علي إيدي وفي عشم أوي بيننا، يعني لما ما يبقاش وراها حتة تنور فيها تزلي نقعد سوا شوية نلكم ونضحك ونهزر، علي فكرة هي بتحب الخوخ أوي، فلما بعرف أنها نازلة بنزل أشتريي كيلو خوخ ليها لوحدها تقعد تاكل فيه وساعات تاخده وهي طالعة فوق وكمان عرفت أنها ساعات بتأكل أصحابها النجوم التانية معاها.

لسة علاقتي بالنجمة دي لحد دلوقتي موجودة وقوية كمان .. ولسة برتاح وأنا بتكلم معاها .. كل اللي أنا قلته فوق ده بيني وبيني.

إنما بيني وبينكم .. ما فيش نجمة بتنزلي .. ماليش نجمة صاحبتي .. ما بأشتريلهاش خوخ ولا حاجة .. النجوم عمرها ما تنزل علي الأرض لأن ده مش مكانها وعمرها ما تكلم معانا لأنها بعيد وصوتنا ما يوصلهاش وعمرها ما هتشوفنا لأ ملهش عينين .. لكن النجوم لتجس بينا والجميل فيها إنها لما بنحتاجها عشان نقولها كلمتين سر بتلاقيها موجودة.

كريم هشام

التعليق:

أسلوب كريم بالعامية جميل، لكن النص مجرد فضفضة مليئة بالتناقضات ومتسرعة وخيالية طبعا وبعيدة عن الكثافة الفنية.

د. سيد البحراوي
أستاذ الأدب العربي الحديث بكلية الآداب، جامعة القاهرة