|
"هو وهي".. خرج أحدهما من ضلع الآخر، فهم في الأصل شريكان في طريق مالهوش آخر، ولكنهما رغم كل ما سلف لا يكفان عن التناحر.. ناقر ونقير.. ثنائي بحق مفزع وخطير.
"هو وهي".. طرفا المعادلة الثنائية، معادلة لا حل لها، وإجابتها دائما غير منطقية، وشعارهما دائما: "نعم للخناق ولا للاتفاق"!!
عشان كده قررنا نطرح حلول لمشاكلهم المستعصية، حتى تصبح الحياة مية مية، كل أسبوع مشكلة وحلها بكل وضوح، من غير ما "هي" كرامتها تتهان، ولا "هو" يحس إنه مجروح. |
*****************************
الأم: يا بنتي.. ربنا يهديكي إيه عيب ياسر بس، ده شاب زي الفل، ومامته تتحط ع الجرح يطيب، هو إنتي خلاص عجبتك قعدتك دي قدام الكمبيوتر وهتتجوزيه ولا إيه؟!! أنا مش عارفة يا ربي أقنعك إزاي وعايزاه يعمل إيه؟!
رانيا: هو خلاص مابقاش في إيده حاجة يعملها، وأنا مش ممكن أوافق عليه ولو أجمل وأغنى وأذكى راجل في الدنيا، ده يا ماما عمره ما نزل التحرير، ولا خد رصاصة هنا ولا هنا ولا شم ريحة الدخان إلا من على بعد 20 كيلو، وكل فكرته عن المظاهرات لا تتعدى اللي بيقراه في الصحف والمجلات.. ده يبقى بني آدم ده؟؟!
الأم: يا بنتي.. ما هو قال لك إن مامته هددته لو نزل هتنزل هي كمان؛ علشان هي مش هتقدر تشوفه وهو بيجرى له حاجة، وكمان كان واجب عليه يدافع عنها ويقعد معاها، خاصة أيام البلطجة يعني كان يسيبها لوحدها؟!
رانيا: يعني هم الشباب اللي ماتوا مالهمش أمهات بيخافوا عليهم وهيموتوا دلوقتي لما فقدوهم؟
الأم: دول نصيبهم كده، وكانوا هيموتوا حتى لو في بيوتهم وبيدافعوا عن أهلهم ضد رصاص بلطجي ولا سكينة شبّيح، وبعدين دول إن شاء الله محسوبين عند ربنا شهداء، وإن شاء الله جزاء ربنا لأهلهم ورحمته بيهم هتكون كبيرة، وبعدين الولد من المؤيدين لكل التظاهرات والمليونيات حتى العيال اللي كانت عند مجلس الوزراء واللي ناس كتير كرهت عمايلهم.
رانيا: برضه ماليش دعوة، أنا مش ممكن أتجوزه يا ناس ده مالهوش في التحرير، يعني من الآخر واحد خواف، وشايل هم رصاصة ولا قنبلة مسيلة للدموع.. رجالة آخر زمن!!
طبعا فيه بنات كتير بتقرانا دلوقتي مش هتستغرب موقف رانيا وبالعكس بتشجعها عليه، فبعد ما كتير مننا كبنات كان بيقول إن الرجالة خلصت في حرب أكتوبر ظهر من العدم وجود رجالة في مصر، وكمان من اللي كانت سمعتهم سبقاهم إنهم "عيال فيس بوكية" و"بسلسلة ولبانة"؛ يعني من اللي آخرهم يلعبوا فيفا وكل فكرتهم عن الشمس هي إنهم يستمتعوا بيها ع البحر وهم بيعملوا "تان".
ولذلك فيه بنات كتير ربطت فكرة الرجولة والشجاعة وفارس الأحلام الهمام اللي بييجي على حصانه الأبيض بثورة يناير وتظاهرات ومليونيات التحرير، وبقت عندهم الرجولة والشجاعة مرتبطة باللي خسره الشاب في الثورة، وشارك بكام عضلة، وفقد كام لتر دم، وحتى اللي شارك وماقعدش يوم على الأقل في المستشفى ممكن ده في نظر بعضهم مايكونش كافي للشعور معه بالأمان.. فكيف وهو خائن لدم الشهيد؟
وده طبعا غير صحيح؛ وقد أخبرنا ذلك الرسول صلى الله عليه وسلم حين جاءه رجل أراد الذهاب للجهاد لينال الجنة؛ فسأله ألك أم؟ فأجاب الرجل: نعم، فقال له سيدنا ورسولنا: "الزم قدمها فثم الجنة". وهذا يوافق القول الشائع الذي يظن البعض أنه حديث: "الجنة تحت أقدام الأمهات".
أي أن المكوث مع الأم حتى أيام الجهاد ليس من الجبن وليس من سمات الهروب من الميدان أو الرهبة من الموت بل هو أفضل، وفي أشد أيام الغزوات وأكثرها قسوة كان الرسول عليه الصلاة والسلام والصحابة من بعده يتركون في البلاد من ينشر الدعوة، فلم يكن الرجال كلهم يشتركون في الغزوة؛ حتى لو كان منهم شباب يستطيعون حمل السلاح.
ولنا في التاريخ الإسلامي نماذج عظيمة لرجال اشتركوا في الحروب وفتحوا الطريق ثم اتجهوا للدعوة وللتعبد، وليس سيدنا عقبة بن نافع رضي الله عنه ولا سيدنا عليّ بن أبي طالب كرّم الله وجهه بالأمثلة الوحيدة في هذا الشأن.
لذلك تهمة الخيانة والجبن والتقهقر والسلبية اللي بقت تهمة جاهزة يلصقها البعض بكل من لم يشارك في التظاهرات ليست من الدين في شيء، وليست من الصفات التي وصانا الرسول الكريم صلى الله عليه وسلم أن تكون موجودة في من يتقدم للخطبة؛ حيث قال صلى الله عليه وسلم: "إذا جاءكم من ترضون دينه وخلقه فزوجوه"؛ فإذا كنا سنتفرغ لإلقاء التهم جزافا على بعضنا البعض فلن نتقدم أبدا، وسنظل كل عام نتساءل لماذا لم تحقق الثورة أهدافها!!
لذلك لكل "هي" بتقرانا دلوقتي هل أولوياتك اتغيرت وأصبح كل همك في زوج المستقبل أن يكون من ثوّار التحرير؟؟ أم ستحكمي عليه بأفكاره وخلقه ومستواه المادي والاجتماعي مناسبا أو غير مناسب؟؟!
في انتظار آرائكم وتجاربكم
اقرأ أيضا
هو وهي: خطيبته وأنا حرة.. مش هاسيبه يروح الثورة
انا متابعة جيدا لجميع مواضيع
انا متابعة جيدا لجميع مواضيع فضفض معانا واحب اشكرك على الموضوع الرائع ده لان انا مريت بنفس التجربة انا اتقدم لى شاب من الشباب الى شاركوا ايام الثورةوبينزل التحرير وفى بداية التعارف سألنى السؤال الشهير ادا كت نزلت التحرير وشاركت قى الثورة ولا لا؟فجاوبت بكل صراحة ان انا منزلتش التحرير رغم تايدى الكامل للثورة ولشباب الثورة واكملنا مشروع الخطوبة وبدانا نجهز عش الزوجية وقبل الزواج بشهرين تقريبا فى أحداث مجلس الوزراء هو كان بيشارك فى جميع الاحداث من محمد محمود لمجلس الوزراء بدون مقدمات بعتلى رسالة على الفيس بوك مضمونهاان ازاى واحد شارك فى احداث الثورة واتعرض للقتل فى جميع الاحداث و شم الغاز المسيل للدموع يرتبط بانسانة مشاركيتش فى اى فعالية من فعاليات الثورة ولا شمت الغاز وبيسال نفسه هل ستكون هذه الانسانة مأتمنة على تربية اولادة وازاى هتعلمهم يحافظوا على كرامتهم ويحبوا وطنهم !!انا لن انكر ان صدمت من هدا التفكير وفسخت خطوبتي مباشرة لان لم اصدق ان المفروض انه شاب على مستوى عالى من التعليم والثقافة يكون بهداالتفكير وان المفروض ان من اول مطالب الثورة الحرية ومنها حرية الراى والتعبير هل اصبحت الحياة الزوجية تقاس بنزول للتحرير ام لا هل اصبحنا فى مجتمع اختلطت لديه جميع المعايير والمقاييس وهل الحياة الاسرية ممكن ان تنتهى بسبب نزول التحرير من عدمة وبعد قرائتى للموضوع اكتشفت انه يوجد كثيرين مروا بنفس التجربة ارجو الاجابة على سؤالى هل هذا طبيعى ؟؟؟
======================
رد بص وطل
صديقتنا العزيزة أهلا بيكي طبعا صديقة عزيزة وبالنسبة للي حصل لك فده طبعا مش طبيعي على الإطلاق وواضح إن فيه أسباب تانية عنده للي قاله، بس برضه إنت تسرعتي في فسخ الخطوبة لإن كان المفروض تشرحي له وجهة نظرك وإنك مش هتكوني فرحانة بنفسك لو عسكري غلس عليكي ولا كنتي اتسحلتي في الميدان ولا قضيتي يوم في السجن.
محدش في طول تاريخنا الحربي سواء الإسلامي أو المصري وجه اللوم لأي سيدة أو بنت لم تشارك في الحرب، وبالنسبة للوطنية والشجاعة وتربية الأبناء على حب الوطن فده دور الأب والأم مع بعض ومش ممكن تتقاس بنزول الميدان، واضح إن كان فيه بينكم فرق في التوجهات والأفكار وفي الأول والآخر ده نصيب وإن شاء الله ربنا هيرزقك بالإنسان المناسب ليكي
شكرا لبص وطل على الرد على
شكرا لبص وطل على الرد على رسالتى ولكن للعلم فانا من مؤيدين نزول البنات للمظاهرات وليس لدي مانع فى ان تسحل اى بنت او تتعرض لاى نوع من انواع الاذى طالما فى الدفاع عن حريتها وأرى انها فخر لاى بنت اذا تم سحلها او سجنها فى سبيل الثورة و الحرية
انا اعرف ناس راحوا التحرير و
انا اعرف ناس راحوا التحرير و كانوا محششين لو اتقدموليك هتوفقى عليهم؟
و لو مش عجبينك نجبلك واحد فاتح محل فى التحرير عشان ميبقاش عندك حجه ههههههههه
فى فرق بين انه مؤيد و ايجابي
فى فرق بين انه مؤيد و ايجابي و من جواه نفسه ينزل بس فى سبب منعه زى ان مامته لوحدها, و فرق بين انه سلبي و مش عايز ينزل و مش مهتم من غير مبرر يبقي ده فعلا مش راجل و مقبلش اتجوزه
و فى الاخر كل واحد هيلاقى اللى زيه يعني السلبي اللى مبينزلش هيلاقى اللى بردو مبتحبش النزول و بتؤيد مبارك و الثورى اللى بينزل هيلاقى اللى بتنزل زيه او على الاق بتشارك و نفسها تنزل بس اهلها مش موافقين
ههههههههه بجد شر البلية
ههههههههه بجد شر البلية مايضحك انا حاسس انكم بتتكلمو عن التحرير كأن القبله اتغيرت وبقيت للتحرير واللي مش هايحج التحرير او يعمل عمرة مش نرتبط بيه ايه الكلام المسخرة ده خلاص الاختيار دلوقتي مش ع الاساس الدين والاخلاق بقي علي نزول التحرير ايه العقليات الفاضيه ديه ولا ممكن بكره وبعده يبقي اللي نزل التحرير هوه اللي عنده دين فين حديث الرسول اذا جاءكم من تردون دينه وخلقه فزوجوه الا تكن فتنة في الارض وفساد كبير ده كلام الرسول ولا فالحين نعلق يافته حبيبي يارسول الله ومش نعمل بكلامه بجد الموضوع بقي تهريج ومستفز عايزبن الديمقراطيه من بره وكل واحد عايز يمشي اللي في باله واللي يعارض يبقي عدو ومش فاهم حاجه قولنا هانخلص من الفساد والتخلف الموجود الموضوع زاد اكتر واكتر انا واحد من الناس لايشرفني ارتبط ببنت راحت قعدت في التحرير ليل ونهار هناك حاجه من الاثنين يانزلت من ورا اهلها ياما اهلها هيا مش فارقه معاهم تروح فين وتبات فين مش معترض علي التحرير والثورة لكن انا شوفت هناك مشاهد مستفزة كتير
مفيش كلام يتقال بعد كلامك ..
مفيش كلام يتقال بعد كلامك .. فعلا موضوع بقى مستفز قوي اي موضه بتطلع والسلام !!
أنا مش موافقاكم خالص يعني إيه
أنا مش موافقاكم خالص يعني إيه واحد متحركش ونزل الميدان يبقى ليّ شريك في الحياة علشان شارك في لجان شعبية، لازم اللي أتجوزه يكون شجاع وبيدافع عن قضية
======================
رد بص وطل
طبعا ده رأيك وبنشكرك على رسالتك لكن مش كل اللي نزل التحرير كان بيدافع عن قضية ومش كل حد منزلش بايع القضية، وده ممكن يخليكي تخسري ناس كويسة فعلا علشان تصورات مسبقة ممكن جدا متكونش صحيحة، الأصل في الارتباط إنك تعرفي الانسان اللي قدامك وتحكمي عليه من أكتر من موقف.. عموما ربنا يوفقك
طمنتوني ربنا يخليكم أصلي برضه
طمنتوني ربنا يخليكم أصلي برضه مش اللي نزلوا التحرير كتير وفعلا اتعرضت لموقف إني اتقدمت لبنت كانت عاملة نفسها ثورجية ومرضيتش بيّ رغم إني عندي انتماء وكنت فعلا في اللجان الشعبية
مقال جميل قوي قوي تسلم إيديكم
مقال جميل قوي قوي تسلم إيديكم
السلام عليكم ورحمة الله
السلام عليكم ورحمة الله وبركاتة
مداخلة بسيطة للدكتورة هبه قطب
اشكرك كثيرا لانى أرسلت لكى قبل زواجى سؤال ورديتى عليا فيه وطمئنتى وريحتى قلبى
مداخلتى انهاردة عشان اشكرك جزاكى الله خيرا وبارك الله فيكى
مقال رائع وكلام مظبوط الحكم
مقال رائع وكلام مظبوط الحكم بالاخلاق والتريية والشخصية مش راح التحرير ولا لا
