هو وهي: عن الهمس المسموح واللمس الممنوع

انا للاسف عندى المبادىء دى ان ممنوع اللمس لاكن اللى حصل بقى انى كان عندى تدريب شهر فى شرم الشيخ لانى سياحة وفنادق بس كان فى فندق محترم جدا 5 نجوم المهم كان فية واحد زميلى حبيتة وهو كمان حبنى وخرجنا سوا مرتين عند الفنار والبحر قدامنا والهوا المهم يعنى الموقف خادنا وطلبت منة انة ياخدنى فى حضنة واتطورت الامور شوية شوية بس ماوصلناش لحاجة بعيدة قوى علشان ماحدش يتخيل المهم ان الواحد ماكانش فى وعية وبعد كدة لما فقت حسيت بالندم الشديد والحسرة وان انا عملت حاجة غلط فى حق نفسى ونفسى انسى بس مش قادرة نفسى افقد الذاكرة خالص احسن وحاسة بالذنب علشان امى لانها وثقت فيا وانا ماطلعتش قد الثقة دى وبصراحة نزلت من نظر نفسى جدا بس هو بيحبنى واتخطبنا لاكن مش عارفة ازاى اكفر عن ذنبى لانى حاسة بالذنب ودايما بفكر فى الموضوع دة لدرجة ان دماغى هتنفجر ودايما حاسة ان انا قليلة فى نظر نفسى وانا عارفة انة حرام بس نفسى ربنا يسامحنى ويخلينى اقدر انسى يااااااااارب بس ارجوكوا يا جماعة ما حدش يرد عليا رد قاسى لانى مش مستحملة وممكن انهار فى اى لحظة في ارجوكوا الرأفة بيا
===========================
رد بص وطل
عزيزتي: لا يمكن أن ننكر أن ما حدث بينكما ذنب كبير، فما حدث يتنافي مع الدين والأخلاق، والأعراف والقيم والعادات التي تربينا عليها، فكان عليك أن تعملي عقلك دائماً في تصرفاتك، وتعرفي أن الخطبة لا تسمح ولا تتيح ما يحدث، الخطبة شرعت لكي يحدث نوع من التفاهم، ولكي تكون فترة لإعداد بيت الزوجية، وأن يعرف الناس أن هذه الفتاة يرغب فيها هذا الشاب، وليس لتكون فرصة لاقتراف أشياء محرمة، وكثير من الفتيات قد تقعن في هذا اللبس، فتعتقد أنها قد خطبت لهذا الشخص فهذا يعني أن من حقهما أن يفعلا أي شيء حتى ولو كان يغضب الله سبحانه وتعالى.

وحتى لو تم كتب الكتاب فعقد القران لا يجيز للشاب ما يجيزه للزوج، لأنه يتنافى مع عادات المجتمع، والدين الإسلامي دائماً أبداً يراعي أعراف المجتمع، ويراعي الأشياء التي من شأنها أن تصلح المجتمع من الأشياء التي من شأنها أن تشيع الفوضى والمشكلات في هذا المجتمع، لهذا فعليك أن تعرفي أنك حتى ولو عقدت قرانك لا يجوز أن تصل الأمور بينكما إلى الدخول دون أن يتم الزفاف، المعروف في المجتمع المصري بليلة الدخلة، كوني حريصة، ولا تسيء إلى نفسك وإلى أسرتك بأي تصرف من شأنه أن يجلب لك المشكلات فيما بعد.

ولكن المولى عز وجل، كان رؤوفاً بك، وانقضى الأمر على خير، وبما أنك عرفت بشاعة ما وقعت فيه وأنت ندمت على ما حدث، فإن هذا يعني أن توبتك توبة نصوحة، وهذا يعني أن الله سبحانه وتعالى سوف يتقبلها بإذن الله، لأن الله يقبل التوبة من عباده جميعاً، وأنه يغفر أي شيء إلا أن يشرك به، لهذا فلا تخافي فإنه سبحانه أرحم وأعلم بنا من أنفسنا، وكل ما عليك فعله هو الإكثار من الاستغفار، وألا تعودي أبداً لمثل هذا الفعل مهما كانت المغريات والضغوط، وأن تحرصي على ألا تضيع توبتك هباء، وليكن إيمانك بالله كبيراً، ويقينك بواسع مغفرته، كبيراً أيضاً، فإنه تعالى يسعد كثيراً عندما يعود إليه العبد العاصي بالتوبة، ويفرح به كثيراً، وندعو الله أن يستجيب توبتك، وأن يثبتك على الطريق القويم.

الواحد لو فكر ف ربنا قبل مايعمل اى حاجه
اكيد هانبقى احسن وارقى
وشكرا للى بيكتب الحاجات الحلوه دى

وهو يعني لازم الحب بتاع الجامعة ونفضل نحب على نفسنا سنين واحنا عارفين اننا مش هنقدر نتجوز دلوقتي؟ ... ليه ميحاولش كل واحد يعمل كنترول على نفسه ويخلي كل شئ لبعد العلاقة الرسمية .. ويقول كل اللي نفسه فيه
انا عن نفسي ومبقولش اني متشدد دينياً ولا حتى ملتزم ... الحمد لله 24 سنة ومتزوج من شهرين .. وبعد خطوبتي مع زوجتي اتفقنا اننا منتعداش الحدود في تعاملاتنا لغاية اما نكتب كتابنا... وكان بيبقى بيننا كل حاجة حلوة في فترة الخطوبة والكلام الجميل والنقاش الهادف والأحلام المستقبلية .. وبعد كتب الكتاب عملنا كل حاجة متاحة لينا ... وبعد كل ده برضه ربنا كرمنا واتجوزنا وبفضل الله عايشين أجمل حياة أغلبها فيها تفاهم وفي حالة وجود مشكلة بتتحل بالعقل أو بتنازل مني أو منها ... وان شاء الله منتظرين المولود الجاي بعد 8 شهور عقبال كل اللي نفسهم في حياة مستقرة وجميلة
@ الأخ اللي بيقول البنت المحترمة اللي محدش لمسها فين .... أحب أرد عليه بمنتهى البساطة وأقوله ... لو انتا شايف ان البنت اللي عاوزها تكون زوجتك تكون بنفس أخلاق أختك واحترامها .... دور على بيت زي بيتك :)
ونصيحة مني غير نظرتك للبنات هتلاقيك شوفت حاجات كويسة كتير ... ومش شرط البنت الشقية في الجامعة والكلام الفاكس ده كله تكون زوجة شقية وتعيش معاها حياة عاطفية صح.. بالعكس كتير من البنات اللي بتشوفهم قافلين ورخمين ودمهم بارد أيام الجامعة ... هما دول الزوجات الكويسين ... وعجبي

طيب لو ف اتنين بيحبوا بعض وف بيمهم نظرات فقط ولكن دينهم ومبادئهم تمنعهم م اللقاااء او حتى لمس اليد وهم ف اخر سنه ومفيش خطوه ايجااابيه منهم يكون ايه الحل...
=============================
رد بص وطل
هو بما إنك إنت الولد ففإيدك الخطوة الأولى أكيد وهي إنك تحاول تكلمها عن ارتباط جد ورسمي ولو حتى هيكون بعد تخرجكم بس ده يتطلب طبعا إنك تكون بتشتغل أو على الأقل دلوقتي قدامك فرصة عارف إنك هتكون فيها بعد التخرج لإن حتى لو هي وافقت على الاريتاط بيك من غير شغل فأكيد أسرتها مش ممكن توافق، فمتحطش آمال مستحيلة وابدأ حياتك من الأول صح وخطوة خطوة وإن شاء الله ربنا يقدم لك اللي فيه الخير

طب ولو عبود عدا الحدود :d ينفع يعمل سطو على دول مجاورة :D?

فيا "عبود" حافظ على الحدود!

حدوووووووووود ..

أنا موافق هاحافظ علي الحدوووووود .. بي إضمنلي بنت نضيفة لم يلمسها أحد قبلي وأنا أوعدك أحافظ علي كل أنملة في شعرها لحد ما أرتبط بيها

بس فين .. ( ياعمنا دول كلهم مغيرين ماكينة واللي مغيره شاسية واللي واللي واللي )

الله يسهلك .. هاتقولي نو في ناس محترمين .. مين !!؟؟ أو فين !!؟؟ ياعمنا دا كانو بيروحو التحرير مش عشان الثورة نو نو نو هههههههههههه يارب إسترها علينا

أنا متأكد إن في بنات نضيفة جدا جدا جدا بس مع الأسف بيصيبها حالة من البرود الجنسي بمرور الوقت لدرجة إنها ممكن تحرم نفسها حتي من الإحساس بالحب وبالمشاعر حتي ولو بينها وبين نفسها ...
وبرغم كل دا أنا موش عاوز عللة أنا عاوز أعيش كويس .. فيا كل بنت محترمة وملتزمة إعطي لنفسك فرصة تحبي فيها بجد حتي ولو بينك وبين نفسك .. مش شرط تعملي حاجه حرام ومش شرط تخرجي مع أولاد ومش شرط أي حاجه حرااااااام

لكن انا عاوز لما ربنا يكرمك وألاقي بنت ملتزمة وكويسة ( تكون عندها شوق ولهفة وحب ومشاعر فياضة .. من أقل لمسة بتدوب فيا .. لإن كل الشباااااااااب صابرين وشايلين وحارمين نفسهم من ملذات كتير جدا جدا .. علشان البنت اللي هايرتبطو بيها .. فرفقاً بالرجـــــــــــــال أيتها العذراوات )

السلام عليكم ورحمة الله وبركاته ..
بص وطل
اصدقائي واحبتي في الله
اولا انا بشكر بص وطل على المواضيع الجديدة المميزة جداااا واللي بدورها بتوعينا بالصح والغلط .. لاننا اصبحنا في عالم لكل منا مفاهيمة .. واصبح الصح يختلف من شخص لإخر .
طبعا الموضوع اكثر من رائع لاننا بنشوف مثل هذه القصص الكثير والكثير ..
بس انا ليا رأي مختلف شوية :
انا معاكم ان لازم يكون فيه حدود ثااااابتة في حياة اي اتنين مرتبطين .. بس اللي انا شفته ان الحدود دي كل فترة بتتحرك من مكانها .. وكله من الشباب .. لان هو اللي بيكون عنده فضول يعرف كل حاجة عن البنت اللي معاه .. من اول لبسها حتى وقت تعبها .. اللي عاوز اقوله ان فيه شباب بتقدر توصل للدرجة دي بادب وكل حاجة - رغم ان ده مش من حقه في الوقت ده .. لانهم لسه اغراب عن بعض .. لسه اجانب . طبعا مش كل البنات كده .. بس في الغالب ان بنات كتييير بتوافق على كده مع حبيبها .. لانها بتعتبره كل حاجة في حياتها .
===========================
اما الاخ ياسين :
ف انا بحييك على وجهة نظرك ... وتحترم طبعا ..
بس اسمحلي اقولك ان فعلا حياتنا والحب والزواج بشريكة حياتنا .. وجهان لعملة واحدة .. انا كنت دايما بشبه حياتنا والحب بقضبان القطار .. خطين متوازيين يسيران مع بعض في نفس الوقت .. انجح في حياتك زي ما انت عاوز واطمح في كل نجاح براحتك .. وفي نفس الوقت انجح في حياتك الاسرية واختار شريكة حياتك اللي تقدر توصلك للنجاح ده .. ومتنساش ان وراء كل رجل عظيم امراة تساعدة وتسانده على صعاب ومشاكل الحياة ..
ومتنساش برضه ان ربنا قال ان الزواج نص الدين ..
ومتنساش ان ربنا قال في سورة الكهف .. فيما معناه .. ان المال والبنون زينه الحياة الدنيا .. المال ( العمل والكفاح والنجاح )والبنون (الاطفال = زواج = حب )يعني برضه خطين متوازيين ..
* بتقول ان كل شوية بنت او شاب يبعتوا ويقولوا الحب وحبيبتي سابتني .. متنساش ان موقع فضفضة اغلب مشاكله مشاكل عاطفية .. لان اي مشكلة في حياتنا بنجاول نحلها ومش بنحكيها في الموقع .. وبالتالي هتلاقي كللللل المشاكل مشاكل حبيبة ..
عموما جزاك الله كل خير ..
وبكرة تحب وتعرف ان الحب فعلا نص الحياة ومنقدرش نعيش لحظة واحدة من غيرة .. وخصوصا لما تجربة .
وتقبلوا مروروي
** باهر الحميلي**

بصراحه انا عايزه اقول للكتب الكلام الجميل ده ا:محمد صلاح انت برنس...وكلام جميييييل قوي ويا ريت الكل يعمل بيه...شكرا على النصايح الثمينه وجزاك الله خيرا...

العجيب جدا في الموضوع ده ان الحكايه كلها من الاول علي بعضها غلط
ومش هتكلم في الدين لان الوقت بقي اي حد بيخالف ثوابت المجتمع الغلط يبقي متشدد
بالنسبه للبنت
ابوها لو عرف هيعمل ايه ؟؟
اخوها لو عرف هيسكتلها ؟؟
الولد نفسه
يرضي كده مع اخته
يتصل بيها شاب غريب في نص الليل ويقولها كلام ميرضيش ربنا
يرضي لبنته تقف مع واحد غريب في الجامعه ويقولها كلام ميرضيش ربنا
لو راح الجامعه اللي هي فيها وبالصدفه شاف واحد صاحبه ميعرفش ان البنت دي اخته وفي وسط الكلام قاله دي بتحب فلان
تخيل الحوار
هو : مين اللي بتحب؟؟
صاحبه: البنت دي بتحب فلان
هو : وانت اش عرفك
صاحبه :يا عم الجامعه كلها عارفه
تفتكروا هيكون رد فعله ايه
انا مقولتش بالنسبه للدين ايه النظام
ومش هقول ان ده ميجوزش اي علاقه من اي نوع بين اي ولد واي بنت قبل الزواج
عشان محدش يقول عليا متشدد

احنا مطلوب مننا كمجمتع ان احنا زي ما بنعمل اعلانات للتعليم والتدخين و..... الخ

لازم نعمل اعلانات للاخلاق والتربية السليمه ومش لازم يبقي اولادنا بياخدو كا افكارهم من الشارع والتليفزيون اللي مش فيه حاجه تصلح الا ما رحم ربي ومن النت وغيرها من المصادر الصفرا

وبعدين برضه البنت لازم تعرف انها بنت وتحافظ علي اخلاقها ومبادئها ومتستسلمش لاي حد بسهوله
وبرضه لازم ان احنا كشباب نحترم نفسنا ولازم نعرف ان كل واحد عنده اخت بنت وام
ومسيرة هايتجوز
لازم نكون عندنا وعي اكتر من كده

وشكرا A.A

انت كده يا ياسين ميه ميه والله انا واحده من الناس كل شويه دخل واشوف مشاكل الناس وبقعد اقره الكومنتات بس بجد الكومنت اللى انت بعته ميه ميه بالعكس محدش يقدر يقول عليك انك معندكش احساسيس انت لفت انتباه ناس كتير ان الدنيا مش كلها مشاكل حب الدنيا فعلا فييها كتير

السلام عليكم
يا استاذ محمد
حضرتك طبعا بتتكلم فى المفروض مش كده مش اللى بيحصل
عارف فى كم شاب وصل سنه ل40 ولسه متجوزش؟
طيب عارف كم بنت وصلت ل 35 انسات ولسه متجوزوش

طيب
عارف الشباب الصغير من 20 لحد 30 اللى بيتجوزوا سواء لانهم قادرين ماديا او بيمشو حالهم على القد يعنى او لانهم محتاجين فعلا شريك او شريكة حياة، عارف كم واحد فيهم بيشوف افلام اباحيه؟

تعرف اننا مجتمع جنسى من الدرجة الاولى

والله العظيم انا مرة ركبت ميكروباش وبنات ثانوى كانو مروحين فيه وكل كلامهم ايحاءات جنسية واضحه جدااا وبصوت عالى وكان فى شباب موجودين... دوول بنات مع بعض خلى بالك

عارف فى كم بنت متحجبه ومنتقبه وشباب ملتحيين بيستنوا اللحظة اللى يبقوا فيها لحد هيبقى الزوج او الزوجه عشان مينفعش نغضب ربنا" المفروض يعنى"

هات بقى كل الفئات دى وخلى فى خطوبة
الشاب دلوقتى بقى اجرىء من 5 سنين فاتو والبنت ديما مستنيه خطوته عشان تبدأ الحب والعشق فى فترة الخطوبة

لمس الايد ده معدش من الاحلام!!!!!!!!!!! لمس ايد ايه هو حضرتك بتتكلم بجد؟

دلوقتى فى اننا نحافظ على غشاء البكارة وكتر الف خيرنا " واسفه لجرأتى"

ايوة هى فعلا بتبدأ بمكالمة بس مش عايز المس ايدك دنا عايز اكون جمبك دلوقتى

وعلى فكرة موضوع انه بيعمل كده عشان يختبرها او يسيبها لو وافقت احنا تخطيناه من زمااااااااااااااااان بيعمل وبتعمل وبيتجوزو وعادى جدا مش احسن ما تكون قفل وتقرفه بعد الجواز

مفيش حد بيطبق اللى المفروض يتعمل غير اتنين لا تالت لهما : 1- حد متزمت جدا ومشاعره حديد
2- واحد مش بيحب خطيبته ولا طايقها

وعلى فكرة لو الشاب مبداش فى غالب الامر مش هيحصل حاجه الا لو البنت استفزته

واللى يقول غير كلامى ده يبقى بيغالط نفسى وعايزة رد حضرتك على كلامى

ملاحظة
كلامى مش معناه انى بشجع على كده حاشا لله
لكن عكس كده بقى اقرب الى الخيال
======================================
رد بص وطل
طبعا بنشكرك على مشاركتك في بص وطل وللأسف الشديد معاكي حق في إن الواقع بقى أكتر من مؤسف ومقرف كمان لكن ده مش معناه إننا نسكت لإنك أكيد عارفة عن الساكت على الحق شيطان أخرس، مش معنى انتشار الفساد إننا نستسلم ومش معنى عدم الزواج إننا نغضب ربنا عن عمد ونفرح بكده ونسكت ونقول ظروف، ده مش ممكن، لكن لازم دايما نحاول على الأقل نفكر الناس بإن اللي بيعملوه ده غلط مش نوافق ونهز راسنا أو ندفنها في الرمل

السلام عليكم...فى حاجة مضيقانى جدا فى أغلب المشاكل والأسئلة اللى بتيجى ..انا عايز أفهم هو أحنا مخلوقين فى الدنيا عشان نحب ونتجوز و الواد يلاقى واحدة يعد يحب فيها والبنت نفس الكلام وهو ده كل هدفنا فى الحياة !! يعنى بجد حرام أن كل شوية ناس تبعت أن (حبيبى أو حبيبتى ) سابنى أو سابتنى...أنا مش معترض على الحب ولكن الحب شىء ضرورى ولكنه مش هدف رئيسى يبقى هو أهم حاجة فى حياتنا...يعنى مع أحترامى للجميع الواحد مش مخلوق فى الدنيا عشان يخلص دراسة ويشتغل أى حاجة عشان يقدر يوصل للى هايموت ويعيش من غيرها" أو العكس "وخلصت الحياة على كده ؟؟ أنا مش بقلل من قيمة الحب لأن الحب من أهم الحاجات اللى بتدى دفعة للأنسان فى حياته بس مش ينفع أنه يكون كل حاجة فى حياتى...يعنى نظام لو حبيبى / حبيبتى بعد عنى أنا هموت !!...يا سلااام !! انا بحس أن ناس كتيير لما بتدور على حد يحبه أنه بيكون عنده مشاكل وعقد كتيييير فيبقى معلق نفسه أنه يلاقى حد يخلصه من كل اللى هو فيه ويحس معاه بكل اللى ناقصه فى حياته الأساسية مش بيلاقى غير أنه يحب...وطبعا هيتقال اللى باعت الرسالة أنسان معندوش أحساس وميعرفش الحب و..و...و... مش مهم بس المهم أنى أفهم هو الأنسان أتولد بنص قلب عشان يجى الدنيا يدور على نص تانى فى الحياة ويقف بين أيدين اللى خلقه ويقول هو ده اللى أنا كنت عايشس عشانه !! وآسف للأطاله...
===================
رد بص وطل
شكرا على مراسلتك لبص وطل وبالنسبة للحب فهو فعلا من الحاجات المهمة في حياتنا وعلى فكرة من مقومات النجاح وجود علاقة مستقرة أو زواج لإن ده بيخلي الانسان مرتاح نفسيا فبيقدر يركز في شغله أو في مستقبله واحيانا بيكون وجود الحب والرغبة في الحفاظ عليه دافع للنجاح، ولكني لا أختلف معاك في أن البعض يبالغون في مشاعرهم وفي قيمة الحب في حياتهم لكن لا يمكن انكار أنه مهم جدا في حياتنا وفي مستقبلنا سواء الحب بصفة عامة أو وجود علاقة تفاهم ومودة بين الجنسين.

فعلا أي مشاكل بين اتنين بيحبو بعض بتبدأ بمسك الأيد وبعدين الدنيا بتبوظ