خيانة لأهلك وخطيبك.. وظلم لنفسك

تفتكري خطيبك هيرضي بيكي دا لو اتجوزك هيكون مقلب حياته

هو فاكرك محترمة انتي بتقرطسيه لو عرف واحدة عليكي هتعملي 7 رجالة في بعض ربنا يرزقة واحدة تقدرة مش مقلب 

لا الموضوع مش مقبول خالص وحرااااااااام وذنبه ايه خطيبك اللى وثق فيك واعطاك حبه واحترامه وشرفه وسمعته اتقى الله فى نفسك واهلك وخطيبك الراجل اللى كرمك واتقدملك فعلا والله المستعان

انا بس عايزة اقول ان حب النت مش كله وهم لأن أنا واحدة حبيت من على النت وعرفنا بعض وحبينا بعض على النت طبعا تصرفات البنى آدم وكلامه وصراحته هى اللى بينتلى إذا كان الشخص دا بيلعب ولا بيتكلم جد وبعد 3 شهور معرفه على النت ومن غير مايشوفنى طلب إنه يتقدملى رسمى وساعتها هيشوفنى حقيقى فى بيتنا وقدام أهلى وفعلا إتقدم وماطلعش مختلف إطلاقا عن الشخصيه اللى عرفتها على النت والحمد لله إتخطبنا وزى الفل مع بعض وكتبنا الكتاب وفرحنا الشهر اللى جاى والأهالى مبسوطه ببعض وكله تمام فين بقى اللى أنت بتقول عليه إن حتى لو حصل رسمى بتبقى نهايه مهببه ياإما طلاق ياإما مش عارفه إيه؟دلوقتى تقدر تقولى إيه الفرق بينى وبين واحده إتخطبت عادى صالونات يمكن الفرق الوحيد إنى اتخطبت عن حب ودى أحلى حاجه ..وأحب أقول لجوزى حبيبى إنى بحبك اوى وإن أحلى لحظه حصلتلى فى حياتى أول ماتقبلنا على النت وحبينا بعض ربنا يخليك ليا

السلام عليكم انا هضيف حاجه علي كل الكلام الجمييييل اللي فات ده انا عايز اقولك ان التعارف علي النت في منظوووور ناس كتير تعارف زي النادي او الشغل بس بجد اقسم بالله لكي يا اختي ان هيفضل الشك يساور حبيبك وشك ان انتي ممكن تعملي علاقة علي النت من وراه شبح بيطارده وهيقلب حياتك جحيم والكلام ده عن تجربه كتيييييييييييير مني ومن ناس كتير حبت علي النت وانا ارتبطت بفتاة علي النت وأمها رفضتني لأني طبيب وهي عايزه وكيل نيابة يا للعجب العجاب ولكن أحمد الله مليون مرة اني تخلصت من هذه الفتاة لأنى إكتشفت بعد ذلك إنها كانت بتكلم ولاد كتير علي الفيس بوك وعلي الشات رغم اني كنت مانعها منهم كانت بتدخل من علي الموبيل فبقولك شبح الوسواس هيفضل وراكي ووراه فأنصحك أمام الله ابتعدي عن حب وزواج النت لأنه جحيم والولاد بالذات بيبقي الشك ده رهيب فيهم هيقلب حياتك واللهم بلغت اللهم فأشهد فأنصحك بإنك تخلصي لخطيبك اللي قدرك واحترمك واحترم اهلك وطلب الحلال فهو الان أولي بحبك وإخلاصك وربنا معاكي ويكرمك لما فيه الخير

بصراحة وبجد موضوع النت دا موضوع فاشل وكلمة منى والله والله عن تجربة خدى اللى يحبك متخديش اللى تحبية علشان مترجعيش تندمى ولو خطيبك بجد إنسان كويس يبقى حرام عليكى حاولى تنفضى لبتاع النت وخليكى ف الحلال وربنا يكرمك ويعدى محنتك ع خير

أنتى واحدة معندكيش مبدأ فى حياتك وحكايتك دى بعتبرها مش مشكلة أصل المشكلة الحقيقية فيكى انتى وبكرة هتخسرى الاثنين ساعتها هتعرفى ان العيب فيكى انتى لانك خاينة سببتى حبيبك عشان عريس جاهز وبتخونى خطيبك عشان تتسلى بأسم الحب

بصراحة وبدون زعل انتى محبتيش اصلا لان الحب حاجة تانية ومفيش واحدة بتتخطب غصب عنها وتسيب حبيبها عشان مجرد ضغط من أهلها إنتى قارنتى فأخذتى الأحسن اللى هو خطيبك أما بقى موضوع الحب ع النت ده فاشل وتضيع وقت ليكوا وزى ماقلتى إنه مش بيشتغل يعنى واحد فاضى أنا أسفة على كلامى بس حبيت أوضحلك حاجة يارب تكونى فهمتيها ولو خطيبك بيحبك حاولى قربى منه وافهميه وسيبك من تضيع وقتك ع نت

على فكرة انا بنت زيك والله العظيم الشاب لماتحبى تخيريه فى الجواز يقولك انا لما ارتبط اتجوز انسانة محترمة طيب يا حبيبى البنت الا ماشى معاها دى اية يقولك تسلية ويقولك اناازاى أضمن ان هى معرفتش واحد غيرى وكانت بتقابله زى ماكانت بتعمل معايه لية مشتغلش حبيبك ده زى ما وعدك وصدقينى دائما الجواز والمعرفة عن طريق النت مش بيدوم والله العظيم مش بيكون فى ثقة بين الطرفين يارب يوفقك الى الصح وصدقينى عمر ما حد لجأ الى الله وندم أبدا

خلاصة الموضوع ده كله سيبك من اللى بتحبيه وخليكى فى خطيبك ولو مفيش توافق بينك انتى وخطيبك سيبيه بس تسيبى حبيبك ده بتاع النت بس وفى فعلا بيتجوزوا من النت وعايشين 100 فل و10 كمان وانا أعرف منهم بس نادر جدا لما تلاقى فى حد كدا بس وربنا يوفقك يا أختى الكريمه

انا رأيى انك تحاولى تحبي خطيبك ولو فشلتى لازم تفسخى خطوبتك سواء رجعتى لحبيبك او لغيره
المهم انك لازم تاخدى فترة تقررى
لان الخطوبة والجواز مش سهلين ومش تهريج
لازم تفكرى فنفسك وتحسبيها صح بعقلك وقلبك بردو
لاننا احنا البنات عواطفنا بتسيطر علينا ولا نحكمها بردو وربنا يوفقك

انتو كلكو تقريبا رافضين علشان من النت يعنى لو كانت اتعرفت عليه باى طريقه تانى كان هايبقى عادى زى مافى ناس مش كويسين على النت كمان فى حياتنا بنقابل ناس كدابه بردو انا شايفه ان النت دى وسيله للتعارف وحسب الشخص دة يعنى ممكن يكون كويس وممكن لا وعن تجربه انا بحب خطيبى جداااا وهو كمان وعارفين بعض من على النت بس كنا صادقين مع بعض من الاول بصى يا حبيبتى اولا محدش بيتجوز غاصب عنه ادام انتى مش عايزاة خلاص كنتى عملتى اى حاجه علشان الخطوبه دى متمش بس اهم حاجه تكونى متاكدة من حبيبك دة ان هو بيحبك علشان متكونيش خسرتى كل حاجه واتكلمى مع خطيبك معتقدتش انو بعد ما يعرف انك مش عايزة هايستمر يعنى وقبل اى حاجه صلى استخارة :لا خاب من استخار الله

وربنا يوفقك يارب

بصوا انا مش هقول حب وكلام من ده من على النت انا بتكلم عن المبدأ يفرق ايه عرفت واحد من على النت او من كباريه حتى هو مش ده انسانة وليها مشاعر ودى برضو انسانة وليها مشاعر؟؟ والله العظيم من الممكن الواحد مننا يقابل شخص على النت وتكون فيه صفات جميلة مش موجودة فى شخص اتعرفت عليه فى جامع بيحصل ولا مبيحصلش؟؟ ولا هو حب الجامعة ده حلال وحب النت ده حرام؟؟ انا وجهة نظرى المتحرمة جداا ان طالما العلاقة محترمة وهتصب فى الاخر فى الزواج يبقى مافيش مانع أحب من على النت أو من كباريه حتى. ملحوظة/ خطيبتى أنا عارفها من على النت وإنسانة محترمة جدا وهى اللى وجهتنى لطريق الصلاة والعبادة وجعلت منى إنسان محترم ومرغوب داخل المجتمع بعد ماكنت محبط وإنسان مليش أمل فى الدنيا وياريت أسرة بص وطل تنشر تعليقى من فضلكم

التعارف بين الشباب من النت شيئ يرفضه الدين والعقل والمنطق والعرف الاجتماعي ايه يا جماعة أنسيتم أنكم مسلمون شرقيون وأنا أنصح الأخت السائلة بألا ترتبط بهذا الشاب لأني أنا أعاني من هذا الموضوع فأنا تزوجت من إنسانة مثل ذلك وكما قال أحد المعلقين برأيه أنه سيشك فيكي هذا ما يحدث إتقي الله في نفسك ووالدك وإخوتك واعلمي ان الله مطلع عليك سيحاسبك بأعمالك واعلمي أن الممنوع دائما مرغوب وصدقيني لو ارتبطتي به فسوف تحسين ببرود في العلاقة بينكما وتتمني الانفصال عنه

السلام عليكم
نصيحة مني إبعدي خالص عن الإنسان اللي انتي بتحبيه ده
لأن موضوع الارتباط من علي النت موضوع فاشل وانا أعرف واحدة اتعرفت علي واحد من علي النت وأتجوزت بس شوفي هي عايشه إزاي دلوقتي مفيش ثقة خالص مش بيخليها تقعد علي النت إلا وهو قاعد معاها والحياة بينهم صعبة
وأعطي نفسك فرصة تقربي من خطيبك لو مقدرتيش خلاص قوليلوا
بس في كل الأحوال مش هينفع ترجعي للشخص اللي أنتي بتحبيه لأن مش هيكون في ثقة وهو مش هيجي يتقدم أبسط حاجة هيقولها زي ما كانت بتكلمني وهي مخطوبة أكيد وأنا خاطبها هتكلم حد تاني

أنا مع الأخ اللى نصحك وقالك جربى تقولى لحبيب النت انى فسختى الخطوبة وماما وبابا عايزينك تتقدم دلوقتى وشوفى هيقول ايه ورد فعله ......وانا اظن الرد غالبا مش دلوقتى طيب أحضر نفسى شوية تكاليف الزواج كتير ولازم أكون نفسى قبل ما أتقدم ...............إلخ وفى هذه الحال ياريت تقول له طيب خلتنى أسيب خطيبى ليه أنت السبب وشوفى رد فى هذه الحال هيكون إيه .............مليش دعوة

صديقتى العزيزه الحب حاجه والجواز حاجه ومفيش حد حب ومتجرحش وممكن تتخطبى للإنسان اللى بتحبيه ولما تقربى له متستريحيش معاه وحب النت ده حب وهمى ده جهاز بيكلم جهاز يعنى جماد لاروح فيه ولا إحساس الحب لازم يكون مواجهه مش عبر الأجهزة انسيه من الأفضل لكى وحاولى تكونى أمينة مع خطيبك الذى سوف يعطيكى اسمه وأنتى مش أول من حب ومتجوزش حبيبه .

بلاش موضوع حب النت ده عن تجربة بجد هيرجع يقولك أقول لأهلى إية خليكى مع خطيبك عمرك ماهتلقى حد يحبك قده والله عن تجربة صدقينى

الأخت العزيزة أنا أشعر بمشكلتك جدا لأنني من نوعية الشباب اللي بيتكلم مع بنات علي النت وكثير حبيت وكثير جاؤا من الخارج لكي يشاهدوا هذا الدنجوان بالنسبة للبنات كانوا مثلك لكنني لم أحب أي فتاة منهم ولو كان هناك شئ فهو جنسي بحت ..فأرجوك أختي الصغيرة إقتنعي بخطيبك وحبيه ..وستحبيه مع مرور الوقت وحاولي أن تنسجمي معه وأتركي هذا الحب الزائف .. أرجوكى إسمعي الكلام

السلام عليكم أيها الأخت الكريمة بجد أنا عارف أن الموضوع أصعب مما يتكلمون فيه ولكن حكمى العقل ومررى الموضوع على تيرمومتر الحياة وهوالقلب ثم أعقلى الموضوع أيهما أحسن وحاولى تصلى استخارة وتوكلى على الله بس نصيحة أنا شايف إن الحلال بين والحرام بين وإنتى اختارى أخوكى مصطفى

انا بس عايزة اقول ان حب النت مش كله وهم لأن أنا واحدة حبيت من على النت وعرفنا بعض وحبينا بعض على النت طبعا تصرفات البنى آدم وكلامه وصراحته هى اللى بينتلى إذا كان الشخص دا بيلعب ولا بيتكلم جد وبعد 3 شهور معرفه على النت ومن غير مايشوفنى طلب إنه يتقدملى رسمى وساعتها هيشوفنى حقيقى فى بيتنا وقدام أهلى وفعلا إتقدم وماطلعش مختلف إطلاقا عن الشخصيه اللى عرفتها على النت والحمد لله إتخطبنا وزى الفل مع بعض وكتبنا الكتاب وفرحنا الشهر اللى جاى والأهالى مبسوطه ببعض وكله تمام فين بقى اللى أنت بتقول عليه إن حتى لو حصل رسمى بتبقى نهايه مهببه ياإما طلاق ياإما مش عارفه إيه؟دلوقتى تقدر تقولى إيه الفرق بينى وبين واحده إتخطبت عادى صالونات يمكن الفرق الوحيد إنى اتخطبت عن حب ودى أحلى حاجه ..وأحب أقول لجوزى حبيبى إنى بحبك اوى وإن أحلى لحظه حصلتلى فى حياتى أول ماتقبلنا على النت وحبينا بعض ربنا يخليك ليا

لو واثقه فى حبيبك إستنيه ومتخديش غير اللى بتحبيه اعمليله أى إختبار وشوفيه جاد ولا لا أنا حاسه بيكى قوى بجد

بصى ياحبيبتى انا مريت بتجربه زيك كدا بس مكنتش من النت وكان انسان ملتزم ومتدين وإستنيت كتير عشانه ورفضت كتير متتخيليش وقالى برده الشغل والكلام الفارغ دا ودلوقتى بندم ع الوقت اللى ضيعته واستنيته فيه خطيبك دا انسان كرمك ودخل بيتك من بابه لكن اللى بتحبيه دا عمل إيه عشانك بيسرقك إبعدى عنه خالص وحاولى تدى لخطيبك فرصه ومتفكريش فى الإنسان دا ومتصدقيش اللى يقولك هتندمى وكدا لأن المكتوب مفيش حد يغيره وإنتى بإيدك تخلى حياتك سعيده بعد كدا أو فيه مشاكل واتوكلى على ربنا وبتمنى ليكى كل خير بس نصيحه متضيعيش عمرك معاه عشان متندميش .

بصي انا هقولك كلمة اعتبريها من أختك حكاية النت دى إنسى خالص إنها تنجح وفعلا كل الشباب اللى على النت بيتسلى وأسألينى أنا كان عندى صحاب ياما جدا وحكاية النت دى وصلتهم لطريق مسدود مسدود بمعنى الكلمة وكمان مافيش فعلا حد دلوقتى بيتخطب خلاص الحكاية دى قلت خالص وكمان يكون إنسان محترم قليييييييييييل لما تلاقى النوع ده دلوقتى وممكن يكون ناااااادر كمان بس بجد نصيحة منى سيبى البنى آدم ده اللى أساسا مش محترمك إزاى يوافق إنك تكليمه أصلا وأنتى مخطوبة أنتى مش شايفة أن الموضوع ده فيه حاجة غلط!!!! صح؟ إزاى يعنى هو يوافق على كده مش دا يبينلك إنه مش طبيعى ومش بيحترم حد أصلا مش أنتى بس وخطيبك ده مش ليه حق عليكى إنك تكونى مخلصة ليه إزاى تسمحى لنفسك تعملى فيه كده أنتى ترضى إنه يعمل كده فيكى اتقى الله فيه وحاولى تحبيه ومش هقولك إنك مش هتعرفى تحبيه علشان مش ينفع تخرجى من علاقة وتحبى تانى لا لأن اللى انتى فيه ده أصلا مش حب ولا حاجة دا وهم ووهم كبير وصدقينى ارجعى لعقلك وفكرى كويس وربنا يوفقك ويهديكى للصواب بإذنه إن شاء الله

بصي انا شايفه ان الكل بيقول ان ما فيش حب من النت وانا بصراحه حقولك شيء ممكن تحبي لانك حسيتي بإنه هو الشخص اللي حسسك بالأمان وقالك كلام حلو وأهتم بيكي كلام جميل بس المفروض يعمل حاجة عشان يثبتلك انه بيحبك لكن طالما قالك لا وبس يبقي بيلعب بيكي وعايزك تفضلي مرهونه ليه وده حرام عليه لانه لو بيحبك يا إما يعمل خطوة أو حتي يكلم أهلك ويعرفهم ظروفه يا إما يبتعد عنك ويسيبك تشوفي نصيبك واشكر بجد الأخ باهر الجميلي كلامه فعلا وردوده دايما عجباني أفادك الله وحاولي تحبي خطيبك وقربي منه ولو ربنا مش رايد لكي الخير معاه وهو إنسان مش كويس خلاص يبقي جربتي ومظلمتيش وإوعي تكوني ظالمه في يوم من الأيام لأن الأيام دوارة ولو ظلمتي أنتي اليوم بكرة حتتظلمي اتركي الشاب بتاع النت لأنه شكله بتاع كلام وبس وهو لو بيحبك ومش قادر يتقدملك حيتمنى لكى الخير مع غيره لأن الحب تضحيه مش تملك

السلام عليكم ورحمة الله وبركاته
أختى الكريمة أنا من وجهة نظرى ومن خلال معرفتي القصيرة بالحياة أقول ليكي أن هذا الشاب الذي يقول إنه بيحبك لازم يبين ليكي حبه على الأقل كان عمل إيه حاجة علشان خاطرك كان دور على شغل بأي طريقة علشان خاطرك وكان جالك واتقدم وكان عمل أي حاجة لكن ده ....
ولكن فى الاخر بقولك إن الحب دلوقتي مفيش ليه مكان فى الزمن ده لو على الحب هتستني طول عمرك تنتظري الحب ده علشان يجي ليكي
والسلام عليكم ورحمة الله وبركاته

لا متكمليش مع اللي تعرفتي عليه من النت

يعني لو كانت قالت انها قابلت الشخص الأول من أي مكان عام كان هيبقى كويس ولو من النت مش كويس مش عارفة إية النظرية الغريبة ديه

شوفى يااختى الرسول حث ان من الافضل زواج المتحابين لكن ؟؟؟

الأخ اللى بتحبيه بيحبك اه بتحبيه كويس لكن وبعدين مرتطبين بقالكم قد ايه قدملك ايه عمل ايه وبعدين شغل ايه يابنت الناس اللى هيشتغله هيأمن له الشبكه والمهر والفرح هو واحد عايش مبسوط حب وتليفونات وخروجات عايز ايه تانى يعنى كل جنس بيحتاج مكمله من الجنس الأخر هو دلوقتى معاه مكمل فمش هيفكر فى خطوة جديه

اللى جاى يخطبك دا راجل جاهز اسألى نفسك أيهم أحسن ومن الأخر جردى نفسك وقلبك من مشاعرك 10 دقايق خليه يفكر وقارنى بس المقارنه من اى جهه !

1_ الدين والاخلاق
2_المبادىء والصلاة والمعامله
3_الحياء والبشاشه والقبول

على فكرة عمر المال ماكان عائق كبير قوى قدام اللى هيتجوز لأن إحنا مؤمنين يقينا إن اللى بينوى العفة والزواج ربنا بيسهلهاله اه والله

زى ماالأخوة والأخوات قالوا صلى الأول صلاة استخارة وحاولى ماتنحازيش للحب كتير لان والله مابقاش يعيش

وزى مالرسول قال ( اظفر بذات الدين) انتى كمان موجه لكى الكلام ده(اظفرى بذا الدين)وربنا يوفقك للصواب

أسمعي يابنوتة من أخوكي الكبير

إذا جائكم من ترضون دينه فزوجوه ، لو اللى جاي يخطبك كويس سيبك من الحب

صدقني أكاد أقسم لك إن الشاب اللى أنتى بتحبيه مش هيتزوجك ، وزهرة شبابك هتضيع في انتظاره.

تصدقي بالله الكابتن اللى أنتى بتحبيه ده مش بيثق فيك، بيقول البنت اللى قابلت ولد من النت مش هتصوني وما تصلحشى.

مشاعر الحب مزيفة لو مش مقرونة بعلاقة شرعية

أنا خايف على أختى المسلمة وقولت اللى عندى وأنتى حرة تدمرى مستقبلك أو تبنى حياة جديدة على أسس سليمة وهي أساس الزواج

ومعلشى ما تقرنيش الولد اللى أنتى بتحبيه باللى جاي يخطبك

اللى انتى بتحبيه ده حرامي بيقابلك من ورا أهلك ، و الثاني جاي من الباب

اتقى الله ياختى وفكرى بعقلك، الحب من غير عقل عمره ما بنى بيت

السلام عليكم الشاب الى عرفتيه عالنت مش صادق معاكى لو صادق كان اتقدم لك دة بيتسلى بيكى

سلام عليكم ممكن اقول حاجة انتى ممكن تتكلمى مع خطيبك بالراحة وتفهميه وجهة نظرك فى ارتباطك بيه بس نصيحة يااختاه ابعدى عن الزواج الذى يتم عن طريق الانترنت وشكــــــــــــــرا

مش هقد أقولك غير بيت الشعر ده :
خطىً كتبت علينا ما رجوناها ومن كتبت عليه خطىً مشاها
ربنا يعينك أنا ولد وحاسس بيكى

ابسط حاجة ممكن اقولها أن الحب أهتمام
وانتي قدامك طريقين
واحد بيهتم بيكي نت وتليفونات وخروجات وفسح وكلام حب " وانتي اللي أدتيلو الفرصة "
وواحد بيهتم بيكي أكتر لأنه اختارك تبقي مراته " وده اكبر اهتمام فالدنيا وأكبر دليل أنه بيحبك " بس انتي مدتيلوش الفرصة
فبإيدك تختاري !!
وتشوفي مين اهتم بيكي أكتر وعايزك أكتر وشاريكي أكتر من التاني
وانا متاكد انك هتعرفي ان خطيبك بيحبك أكتر
أنتي بس أديتي فرصة لحد ميستحقهاش وفنفس الوقت لو أدتيها لخطيبك كانت هتبقي حياتك احسن لانه أكيد بيحبك اكتر
قربي منه .. اتصلي بيه كل يوم بالليل واتكلمي معاه.اطلبي منه تخرجوا مع بعض فأماكن هادية وخليه يفتح قلبه وافتحيلو قلبك
أديله الفرصة اللي يستحقها فعلا انه يكون حبيبك مش مجرد خطيب لانه أكتر واحد فالدنيا دي حبك بعد والدك ووالدتك والدليل أنه اختارك من وسط بنات الدنيا بحالها تكوني مراته وتحملي اسمه وشرفة " وده دليل انه واثق فيكي وفأخلاقك "
وصدقيني أنا كشاب بقولك ان مفيش أهتمام فالحب أكتر من ان الراجل زي م بنقول يضحي بحريته قبل الجواز عشان يوهب حياته لانسانة اختار يديها عمره وحياته طول العمر
وهتلاقي خطيبك مستعد يعمل المستحيل عشانك بس انتي اطلبي منه وقربي منه وأملكي قلبه هيبقي حبيبك وخطيبك وجوزك اللي هيحطك جوا عنيه
أديله بس الفرصة

سلام عليكم ..

الموضه اليومين دول موضوع الحب من عالنت ده .. البنات بيدخلو نت عشان يدوروا علي واحد يحبهم و العكس !! .. و المشكله ان كل واحد فيهم بيعمل نفسه الملاك البرئ اللي محصلش و يفضلوا يشتغلوا فبعض كتير اوي اوي و فالاخر ساعة الجد الواد بيفك منها طبعا لأنه اكيد بيقول بينه و بين نفسه ازاي اتجوز واحده من غير ما تشوفني وقعتها !! مين يضمني ان مفيش غيري !!
و البنت بتتفاجئ بشخصيه غير اللي تعرفها .. مثلا ممكن يكون بيحشش !! عادي جدا ما هي متعرفوش و فاكره نفسها انها عارفاه عشان كام تيليفون وللا كام قعده عالنت .. ممكن يكون اصلا بيكلمها و بيوقعها عشان يبدأ يقل ادبه معاها زي ما بقي بيحصل كتير اوي الايام دي للأسف الشديد .. و بعد قصص و حوارات الموضوع بيتفشكل ده الطبيعي .. اللي مش طبيعي و بيحصل قليل جدا ان فعلا يحصل ارتباط رسمي .. و ده بيحصل بس للي حظهم وحش لأن النهايه بتكون حاجه من اتنين .. يا اما الطلاق .. يا اما العيشه المهببه اللي بيستحملوها عشان هما اصلا كانوا واخدين بعض غصب عن اهلهم و مينفعش يرجعوا يقولوا خلاص زهقنا !!

انعدام المسؤليه و البعد عن الدين و قلة الاخلاق هما اسم اللعبه دلوقتي .. كل ده ضحك عالدقون و لعب بالقلوب و نتيجه لتأخر سن الجواز و البوظان و الإسفاف اللي مالي الدنيا .. خلاص كل حاجه بقت مقلوبه .. اللي بيكلمك عالنت و فالتيليفون من ورا اهلك و اهله فالغالب هو اللي كويس و اللي جالك من الباب و احترمك و اتقدم لأهلك عشان يخطبك و مشي فالطريق الصح هو اللي وحش !!

انتي اصلا مقتنعه بكلامي ده خلي بالك .. لأنك لو مش مقتنعه بيه مكنتيش وافقتي تتخطبي .. انتي جواكي بيقولك ان الخطوبه هي الصح بس انتي بتضحكي علي نفسك بأنك بتحبي التاني ..

ثم ان انا عايز اسأل سؤال لكل الناس يعني الصراحه .. ايه حكاية الحب من عالنت دي وللا بالتيليفون وللا بالمش عارف ايه ؟؟ حب ايه ده ان شاء الله .. تعرف عنها ايه وللا تعرفي عنه ايه عشان تحبوا بعض ؟؟ .. ده كله لعب و - سوري - هبل .. بنضحك بيه علي نفسنا و خلاص عشان نعيش اللحظه .. احنا معزورين كل حاجه بتضغط علينا .. الافلام كلها حب .. المسلسلات كلها ناس بتحب بعض .. الاغاني كلها عن الحب .. خلاص الحياه بقت المفروض تبقي حب و بس .. كل شاب و كل بنت عايزين يحبوا و خلاص .. مش بيقفوا يفكروا فأي حاجه .. اي حد يادوب ينفع بيرموا كل المشاعر اللي جواهم عليه .. و صدقوني ساعة ما الانسان بيفوق بيلاقي انه لا بيحب و لا اصلا البني ادمه او البني ادم دول فارقين معاه فأي حاجه ..

نصيحتي ليكي يا انسه انك تفوقي و تراعي ربنا فخطيبك و اهلك اللي بيثقوا فيكي .. و قبل كل ده تراعي ربنا فنفسك .. عيب اوي ترخصي نفسك كده .. ثم انتي متخيله يعني ان اللي بتخوني خطيبك معاه هيخطبك ؟؟ .. فكرك اصلا انتي صورتك قدامه دلوقتي شكلها ايه ؟؟

يا تسيبيه و تكملي مع خطيبك .. يا تسيبيه هو و خطيبك لو مفيش وفاق .. بس فالحالتين تسيبيه طبعا ..

و ده مجرد رأي او نصيحه او اي حاجه .. فالاخر انتي اللي هتاخدي القرار .. ففكري كويس بعقلك و ربنا يوفقك للخير .. و اسف عالاسلوب الهجومي بس احيانا لازم نواجه نفسنا بالحقيقه عشان نصحى ..

السلام عليكم الله يكون فى عونك بس الناس اللى مش مصدقة انى فى بيتخطبوا غصب عنهم لا صدقوا وبتحصل كتير لما الاهل بيكونوا جامدين فى المعاملة ولو رفضت البيت هيبقى حجيم والله صدقوا ديه حقيقة اما انتى يابنتى حاولى تخليكى مع خطيبك لان الشاب الى انتى بتحبية ممكن مايكونيش جاد فى الموضوع والله يكون فى عونك

مانضحكش على نفسنا مافيش اى حد فى الزمن ده بيتخطب غصب عنه ولو انتى فعلا مصرة ومش عايزة خطيبك بلاش تظلميه معاكى الحياة فعلا داين تدان ومش معقول يعنى لو انتى قولتى لخطيبك انتى رافضاه ومش عايزاه هيمسك فيكى بايديه وسنانه ايه اللى هيخليه يتمسك بواحدة رفضاه........وبرضه فى الاخر هتخسرى خسارة كبيرة لانك ظلمتى انسان جاد وخطبك وعمر التانى ماهيتقدم خطوة ولازم هيكون فى حاجة ناقصة حتى لو حصل نصيب بينكم ربنا هيرد اللى انتى عملتيه فى خطيبك وهتلاقى سوء معاملة من التانى والحب ده كله هيروح زى الميه لما تتبخر استخيرى ربنا واختارى الانسان اللى شاريكى وعرف الاصول وعارف ربنا فيكى

والله ياأخت انتى ليكى اللى اتقدم اثبتلك حسن النيه ودخل البيت من بابه ده راجل محترم انما هتستنى الباشا اللى دخل من الشباك على اما يشتغل اعقليها مع نفسك كويس وتوبى الى الله وانسى اللى فات وقربى من خطيبك وهوه لو حابب ليكى الخير لو انسان كويس هيتمنالك السعاده مش هيقعدك جنبه على اما يشتغل ده ان اشتغل مووت ياحمار وده رأيى وانتى ليكى الاختيار اللهم قد بلغت اللهم فاشهد

على فكرة انتى عمرك ما هتحبى خطيبك ده ابدا طالما انتى لسة على علاقة بالشخص اللى انتى اتعرفتى عليه من على النت مسألتيش نفسك حتى لو اشتغل حيبقى مرتبة كام ولسة الشبكة والشقة ومع ذلك صدقينى اعطى نفسك للانسان اللى انتى اتخطبتيلوا لانه لو ماكان انسان محترم مكنوش اهلك وافقوا علية وصلى صلاة الاستخارة اكيد ربنا حيكتبلك كل خير وبلاش نظام حب النت يا بنتى ده فاضى ولا شغلة ولا مشغلة والله لو جاتلوا سفرية برة مصر انتى اول انسانة حيسبها واعتقد ان اهلك عمرهم ما حيخلوكى تفضلى مستنية بقية عمرك ارضى بما كتبة الله ليكى

صدقينى معرفه النت مبطولش كتير وخلى بالك زى مبيكلمك بيكلم 100غيرك وانا حبيت زيك كتيرررررررررررر من النت وكان اخر العلاقه شهر بالكتير وكمان النت ده كل كدب وخلى بالك اكيد انتى متعلقه بيه علشان انتى حاسه ان الى بيدهولك مش عند غيره لكن كونى واثقه انه بيشتغلك وجربى وقوليله انا فسخت الخطوبه وماما وبابا موافقين عليك تعالى اتقدم ليه وشوفى هيكون ايه رده وابقى عرفينى ايه الرد مع انى واثق انه هيهرب منك ومش هتعرفى توصليلوه تانى( ربنا يهديكى للصواب ياأختى )

خطيبك بجد اولى بالحب ده لأنه هو الانسان اللى اختارك دونا عن بنات كتير وفضلك تبقي زوجته وأم أولاده وائتمنك على اسمه فليه تخونيه
الانسان اللى بتقولى انك بتحبيه من عالنت معتقدش انه يستاهلك ابدااااااااا يابنتى فكرى بعقلك شويه دا انا اصغر منك ومش عارفه انتى عملتى كده ازاى ميستحقكيش ده لو شاريكي كان جه اتكلم مع اهلك خصوصا بعد ما عرف ان فى عريس اتقدملك
حاولى مع خطيبك وقبل ما تحاولى معاه صلى صلاة استخارة وبنية صافية ولو ارتحتى حاولى مع خطيبك
لو ماارتحتيش قولى لأهلك انك صليتي ومش مرتاحه
وطبعا انتى هتكونى بعدتى عن الشخص التانى اللى من عالنت بيلعب بيكيييييييييي
مش هظلمه إن بعض الظن إثم بس العقل والمنطق بيقول كده
حتى لو مارتحتيش وانفصلتى عن خطيبك إبعدى عن الولد التانى ده ومتخونيش اهلك وتضيعي ثقتهم فيكي وقربي لربنا شويه ربنا يهديني ويهديكي ويهدى شباب المسلمين والمسلمات
وربنا يقدملك اللى فيه الخير

anty khsara feky aldkhal mn albab kfaea 3alyky alsbak

انتى اكيد غلطانة جداااا فى حق خطيبك احنا بقينا فى زمن عصرى زمن الجاهلية والتعصب خلاص انتهى واسفة انى اقولك انك مش قادرة تقنعى اهلك برفضك وان الوضع فرحانة بية نصيحتى ليكى اعملى صلاة استخارة لله واكيد ربنا اقدر يهديكى للخير باذن الله

الموضوع نااااااااقص حاجه مافيش حد في الزمن ده بيتجوز غصب عنه ولو فعلا زي مابتقولي اهلك غصبوكي عليه يبقى لازم تقبلي الامر الواقع وتبعدي عن العلاقه الحرام اللي انتي ماشيه فيها لانها علاقه هوائيه أو نزوة وتعدي وخليكي مع خطيبك اللي مديكي ثقته يا إما تقولي لخطيبك على الحقيقه وتخليه هو يكرهك لأنه لو راجل مش هيقبل على نفسه كده فهو اللي هيسيبك ويريح نفسه منك وانتي كمان بقى ترتاحي والواحد اللي بيحبك يجي ويخطبك من أهلك ..... واتقي الله ياأختي في الله

اقولك حاجة

احنا حنعيش مرة واحدة

ارجعى لحبيبك

عشان الانسان بيتحاسب على نفسه وانتى كدا بتظلمى نفسك

وحتندمى لو اتجوزتى وحصل مع اللى مش بتحبيه أى مشكلة حتندمى بجد

حاولى تخلصى نفسك دلوقتى

محدش يا حبيبتى حيتجوز غيرك ولا حيعيش غيرك

حاولى تاخدى موقف

وربنا معاكى

على فكرة انا كنت فى نفس موقفك بس مكنش من النت وكمان كان مسافر بره مصر ومكنش كمل 10 شهور ولما عرف انى متقدم لى عريس عمل المستحيل عشان ينزل أجازة وفعلا نزل واتقدم لى واتخطبنا يعنى عايزة اعرفك ان اللى بيحب حد بيعمل عشانة المستحيل عشان ميضعش من ايده فكرى صح وشوفى هو عمل اية عشان كان ممكن يتقدملك حتى لو كان هيلبس دبل بس فكرى صح عشان متظلميش حد معاكى عشان حرام وحطى نفسك مكان خطيبك كنتى هتقبلى انة يبقى لبس دبلتك وبيكلم واحدة تانية طبعا مكنتيش هتوافقى فكرى صح وخدى خطوة جدية وصلى استخارة وقربى منه يمكن يكون دا نصيبك ودا اللى هيسعدك وربنا يوفقك

الحب من على النت ده حب وهمى وغلط فى كل حاجة انتى مش بتعرفى الشخص كويس لأنه بيحاول يظهر أحسن ما عنده قدامك وكمان العلاقة دى مترضيش ربنا حاولى تشوفى ايه المميزات اللى فى الشخص التانى ومتظليمهوش واعرفى ان العلاقةدى حرام وبلاش تبدأى حياة جديدة بحاجة زى كده حاولى تبدأيها صح عشان ربنا يباركلك . آمييين

دي تصرفات مراهقه طايشه و99 في الميه من شباب النت بيتسلي ببنات النت حسوا بقي يابنات وفتحوا عينيكوا الشيطان بيتسلى بيكم وبيمرمغكم في التراب