أنا مخطوبة من يومين، وخطيبي صارحني إنه كان بيحب واحدة من أربع سنين، وإنها اتجوزت، وأنا مرعوبة لا يكون لسه بيفكر فيها بينه وبين نفسه، أو بيحاول ينساها بيّ، وفي نفس الوقت ما اقدرش أفتح معاه الموضوع ده واسأله لأنه ممكن يسألني إذا كنت عمري حبيت قبله ولا لأ؟ وأبقى أنا اللي فتحت على نفسي فتحة لأني مش هاقدر أكدب عليه لأني زمان كنت مرتبطة بواحد؛ بس أنا والله العظيم ما بافكرش فيه، وبحب خطيبي، ساعدوني لو سمحتوا لأن الشك هيجنّني ومنغّص عليّ فرحتي وعيشتي.
marmar
صديقتنا العزيزة..
ليك حق في الشك اللي جواك ده؛ بس لازم تتطمّني؛ لأن الحمد لله واضح أنه خلاص قرب ينساها, وفيه كام دليل يطمنك, أولاً لأنه خطبك، وكونه خطب؛ فده دليل على إنه قدر يتجاوز مرحلة الصدمة، وقدر يبدأ حياته من جديد مع واحدة تانية, والدليل التاني إنه صارحك، وده برضه معناه أنه بيفضفض لك بكل اللي جواه علشان تساعديه ينسى الحزن والألم اللي مرّ بيهم, وكمان ده معناه إنه اتعلق بيك، وعاوز يحكي لك كل حاجة في حياته؛ بس الرجل لما بيعمل كده؛ الست بتتفهّم ده وبتحتويه، وحتى لو حست بغيرة وبشكّ بتقدر تسيطر عليهم.
أما الراجل لو عرف إن كان في حياة خطيبته تجربة حب سابقة؛ فده هيكون سبب كبير في خراب العلاقة من قبل حتى ما تبدأ, وحتى لو ما أظهرش غضبه وشكه؛ فده مش معناه إنه متقبل الوضع, فاوعي.. اوعي.. اوعي تصرّحي له بحاجة عن ارتباط أو حب قديم؛ لأن الراجل بطبيعته غيور، وخطيبك بالذات، بسبب تجربته القديمة، هيبقي أكتر غيرة وتردد وشك، وممكن الشيطان يهيئ له حاجات مش موجودة غير في عقله بس, ويكون ده سبب لا قدر الله في فسخ خطوبته بيك أو حتى شكّه المستمر ونظرته الظالمة ليك, وكمان ربنا عفى عما سلف وستر الذنب ده ليه، عاوزة تفضحي ستر ربنا عليك وتكشفيه؛ فربنا هو الغفور الرحيم مش البني آدمين.
وبعدين لازم تحطي في بطنك بطيخة صيفي؛ لأن حبيبته دي اتجوزت يعني ما فيش أي فرصة إنه يرجع لها، ولو قعد من هنا للسنة الجاية يفكّر فيها؛ فخلاص هي متجوزة؛ فبلاش تفتحي على نفسك أبواب جهنم بالتقليب في الدفاتر القديمة, بلاش تبعديه عنك بشكك وتحقيقك المستمر معاه.
خلي قلبك مفتوح له علشان يفضفض لك وهو مطمن، وبكده هتعرفي كل حاجة في حياته منه هو؛ لأن الرجل بطبيعته كتاب مقفول لكن لما هو ييجي ويفتح لك قلبه ويكشف لك ورقه اسمعيه، وبلاش تخوّفيه منك؛ فيقفل على نفسه تاني وما تعرفيش تلاقي له مدخل, اسمعي شكوته، وخليك دايماً الحضن اللي يرمي فيه كل همومه, خليك بير أسراره, حسّسيه إنك سامعاه وفاهماه وإنك معاه في كل حالاته علشان يفضل على طول يفضفض لك ويثق فيك, وبلاش تسمعي كلام أي حد ينصحك بغير كده؛ فزي ما باقول لك اطمني؛ فهو خلاص بينسى حبه القديم معاك وبيك، وده مش عيب؛ المهم إنه ينسي وما يبقاش فيه غيرك في حياته, وربنا يجمع بينكما في خير.
بصراحه انا مش معاكى يا أ/ منى
بصراحه انا مش معاكى يا أ/ منى لان فى حاجات كتير يتوقف عليها انه ينسى حبه الاول ده او تنجح علاقته الجديده مع خطيبته منها
1 - قرار الخطوبه بالنسبه له كان قرار متسرع نتيجه صدمه ولا مبنى عن اعجاب بس ولا حب ولا عايز يتجوز عشان اهله مثلا عايزين كده
وشايف خطيبته بنت مؤدبه وخلاص تحافظ عليه فى اسباب كتير
2 - اخلاقه تسمح له انه يفكر لسه انه يتواصل مع حبيبته الاولى بالكلام او بلقاء او اى حاجه
3 - طبعا اخلاق حبيبته الاولى هتسمح لنفسها تبص لغير جوزها ده لو كانت هى كمان لسه بتحبه
ويبقى فى النهايه اننا نقول اننا لا نستطيع ان ننسى او نبدأ حب جديد كما يحلو لنا فقط ادعو لاخى هذا ان يساعده ربى ان ينسى ما فاته ويبدأ حياه جديده كلها سعاده...
وأسف للاطاله
السلام عليكم,انا كمان مريت
السلام عليكم,انا كمان مريت بنفس التجربه خطيبى كان بيحب واحده من عشر سنين وكانت الاولى ف حياته واتفرقوا وعرف بعدها كتيير بس لما خطبنى حكى لى عنها لأنها تجربة مميزة ف حياته بس أنا الحمد لله زكية وعرفت أخليه يكره الأيام اللى قبل ماعرفنى أنا تعبت معاه كتير بس دلوقتى أنا واثقه أنى حبه الوحيد وأتجوزنا وجرب معايا حب الاسرة والبيت وكان إتفاقنا إننا مش هنتجوز غير لما نحب بعض ولاقيته بيقدم معاد الجواز أما حبنى بجد وأكتشفت إنى ياما عذبت نفسى بالأفكار لكن الحمد لله ودلوقتى منتظريين بيبى عقبالك يامرمر خلى أسلحتك الحنية والعطاء وخلى نفسك طويل وخليكى واثقة من نفسك ومن قدراتك واعتبرى نفسك فى معركة وإن شاء الله كسبانة
كل شئ قسمة ونصيب...ربنا
كل شئ قسمة ونصيب...ربنا كاتبكوا تكونوا لبعض وإنه يبعد عن حبيبته ومعتقدش انه لسه بيحبها أنتى مهمتك إنك تعرفي إزاى تنسية الذكريات بس نصيحة لازم تصارحية إنك كنتى مرتبطة لازم علاقتكوا تبنى ع الصراحة
بصراحه يا مرمر الاجابه اللي
بصراحه يا مرمر الاجابه اللي ارتد بيها علي سؤالك ممتاااازة ومفيش اجابه ممكن يترد بيها احسن من كده
يابنتى من اربع سنين واتجوزت
يابنتى من اربع سنين واتجوزت ممكن يكون بينساها بيكي لو مكنش خطبك بس هو خطبك وبيختار شريكة حياته خلاص
صح مش تفكرى كتير مانتى كمان مجربه ونسيتى ربنا يتتمم ليكي بخير يارب
هقولك يا اختى على شىء نالماضى
هقولك يا اختى على شىء نالماضى ليس ملك لكن المستقبل والحاضر هو اللى ملك لك الحق فىيه وهو صارحك يعنى مكدبش وقالك انها اتجوزت وانتم الاتنين طلعتم زى بعض خلاص بقا انسى وهو ينسى علشان الحياة تستمر بينكم بهدوء وثقة وحب وتفاهم يا اختى اتقى الله فى نفسك وصدقينى هتلاقى خطيبك ليك وليس لأحد غيرك ان شاء الله
السلام عليكم ورحمة الله
السلام عليكم ورحمة الله وبركاته ..
انتي عايزة تتعبي نفسك وخلاص .. خطيبك هو اللي اعترف لك بحبه القديم .. يعني انتي مش عرفتي من وراه .. وكمان ازاي يكون بيحبها وهي اصلا اتجوزت .. بلاش الاوهام اللي انتي عايشة فيها دي ..
وهفترض معاكي انه لسه بيفكر فيها وعايز ينساها بيكي .. طالما هي اتجوزت خلاص تبقي مفيش امل انه يسيبك ويروح يرتبط بيها .. وكمان فين ذكاء حواء .. المفروض ان انتي بنت وعارفة ان اي بنت ممكن تنسي خطيبها اي حب قديم .. بذكائها وحبها له .. حاولي تقربي من خطيبك وتحبيه بجد .. وطالما هو خطبك تبقي اكيد بيحبك وعارف انك انسانة كويسة ومحترمة .. مش ناقص غير انك تقربي منه وتنسية حبه القديم ..
اما موضوع انك خايفة انه يسألك عن حبك القديم ؟؟
بصي يا انسه مرمر .. مفيش انسان علي وجه الارض مش ليه تجارب عاطفية .. هتلاقي شاب اعجب ببنت وكلمها وارتبط بيها والبنت ممكن تكون رافضة اي علاقات غير رسمية .. بس بينها وبين نفسها ممكن تعجب بشاب وتحبه وبيكون حب من طرف واحد ..
اللي عايز اقوله انكم المفروض انتي وخطيبك طالما قبلتوا انكم ترتبطوا ببعض تبقي لازم وضروري تحكي لة علي كل حاجة زي ما هو عمل معاكي ..
وتبدأي تحاسبية من اول ما ارتبط بيكي .. انما قبل كده مش من حقك
* افرحي وحبي خطيبك وحاولي تتعرفي عليه اكتر واكتر .. وربنا يسعدكم ببعض ويتمم لكم علي خير
وتقبلي مروري
** باهر الحميلي **
السلام عليكم ورحمة الله
السلام عليكم ورحمة الله وبركاتة
حاولي إنتي تنسيه أي حاجة طول ما هو معاكي
هتلاقي نفسك مطمنه له
