أنا باشكر أسرة "بص وطل" على حلكم لكل مشاكلي، وأرجو أن تساعدوني في المشكلة دي؛ لأنها محيراني أوي.. أنا بنت عندي 19 سنة أولى خدمة اجتماعية، اتعرفت على شاب في معهد كمبيوتر من سنة تقريبا، ساعتها كنت في ثانوي وقال لي إنه عايز يرتبط بيّ، أنا ساعتها كنت رافضة علشان دراستي، وبعد سنة لما دخلت المعهد اتفاجئت إنه اتصل بيّ تاني، وجدد طلبه فوافقت؛ لأني خلاص دخلت المعهد، ويقدر ييجي يتقدم لي، وفعلا طلب مني إنه يكلم بابا، ولما المعاد قرّب لقيته بيكلمني بيقول لي إنه عنده مرض السرطان، ومش هينفع إننا نكمل مع بعض بسبب كده، قلت له أنا مستعدة أعيش معاك لو باقي في عمرك يوم، ما وافقش.
اتألمت أوي لما عرفت، ولكن ناس كتير أكدت لي إنه بيكذب عليّ، بس أنا مش عارفة هو عمل كده ليه معايا؟ مع إني ما عملتش معاه حاجة وحشة، ولا عمري قلت له تعالى اتقدم لي بالعكس هو اللي كان بيلحّ عليّ، أنا مش عارفة أصدق ولا لأ.. وخايفة أبعد عنه أكون باظلمه، وبابعد عنه في وقت محتاج لي فيه.. من فضلكم ساعدوني منتظرة ردكم هو اللي هيخرجني من المشكلة، وشكرا على مجهودكم.
سمسمة
بصي انتي مش عارفة هو مريض ولا
بصي انتي مش عارفة هو مريض ولا لأ فلو كان مريض فربنا معاه ويتولي امرة وجودك مش فارق من عدمه لانك اساسا لسة في مرحله صغيرة جدا وصغيرة علي الزواج اللي انتي بتتكلمي عنه ده ده غير انه كمان هو صغير ولو كان فعلا مريض فهو محتاج لكل قرش عشان المرض ده بيحتاج مصاريف باهظة ولو كان كداب ربنا حيجازيه لانه ادعي مرض زي ده وحرام عليه كمان يلعب بيكي ويوهمك بالحب الكاذب اهتمي بدراستك بدل من تضيع وقتك في شيء متعرفيش ان كان حقيقة ولا سراب وهو من الاخر لو كان حتي صادق معاكي في مرضه مش حيقدر يتجوزك ولا حيقدر يوفر لكي العيشه المستقرة
لا انا رأيى إنك تتأكدى من حد
لا انا رأيى إنك تتأكدى من حد قريب منه حد من أهله يعنى تثقي فكلامه
ولو كان مريض فعلا لازم تقفي جمبه لانه معنى إنه طلب منك الزواج مرتين وإنه داخلها جد وانه محصلتش حوارات بنكوا يبقي أنتى حد قريب من قلبه فعلا
ولو كان تعبان فعلا يبقى إنتى أول واحدة هيستنى منها إنها تقف جمبه ومتتخلاش عنده ومتزودش ألمه فى أخر أيامه
إنما لو معرفتيش تتأكدى من صحة مرضه يبقى إستخيرى ربنا وسيبيها على الله وكل واحد بياخد نصيبه
بصى الموضوع ده سهل انتى ممكن
بصى الموضوع ده سهل انتى ممكن تقوليلوا انه مش مهم نتجوز بس أنا عايزه أفضل جنبك نفضل أصدقاء لحد ماتتأكدى من الموضوع ولو كان بيكذب إمسحى بكرمتوا الارض أما لو كان صادق نصيحه خليكى جنبه لحد مايموت وحاولى ترسمى السعادة على أيام حياته الباقيه وربنا يستر لأنى حاسس إنه بدل هو اللى كان بيطلب يتقدم إنه صادق والله أعلم
ادعيلو وابعدى عنو احسنلك
ادعيلو وابعدى عنو احسنلك واحسنلو
السلام عليكم ورحمة الله
السلام عليكم ورحمة الله وبركاته هناك احتمالين لمشكلتك يا انه صادق او كاذب ودعينا نفكر فى الاحتمالين لو انه صادق ومريض فعلا فأريدك ان تفكرى هل تستطيعين المرور معه بهذه المحنة وما سوف يتطلبه منك من صبر والتخفيف عنه واحتماله فى نوبات مرضه او غضبه لانى اعرف هذا المرض اللعين جدا واثاره غير الجسمانيه النفسية ايضا والمعاناة التى سوف تمرى بها لو شاهدتيه يتألم ولا تستطيعى ان تفعلى اى شىء له لو حسيتى انك تقدرى على كدة ساعتها وبعد ان تتأكدى انه مريض فقولى له انك متمسكة به وان هذا المرض ابتلاء واختبار من الله وانك تريدين مشاركته فى هذا الاختبار والاحتمال التانى انه كداب وهو ده الاحتمال الاكبر لانى اعرف العديد من القصص المشابهة عندما يريد الشاب ان يتهرب من الفتاة بعد ما وعدها بالزواج انه بيقول لها انا مريض بمرض مستعصى ولا امل فى الشفاء ولا اريد ان اظلمك معى فلو هو كده يبقى تحمدى ربنا انك ما حبيتهوش وانسيه وتابعى حياتك وممكن تعملى صلاة استخارة تعرفى هو صادق ام كداب وباذن الله ربنا يوفقك فى حياتك
اتأكدي الاول هو فعلا تعبان
اتأكدي الاول هو فعلا تعبان ولالأ وبيعمل معاكي كده ليه
السلام عليكم اختى
السلام عليكم اختى العزيزة.........بصى الله اعلم ان كان فعلا مريض ولامش مريض....المهم انسى الموضوع ده وعيشى حياتك فكل الاحوال ده قدر انكم متبقوش لبعض وانتى لسه صغيرة وياماهتشوفى ناس وتتعرفى على ناس ولعلمك....مش كل الناس صادقة فكلامهايعنى الكدب موجود كتير فمتظلميش نفسك مع حد كداب زيه....اه كداب على مااعتقدلانه احتمال يكون بيقولك كده عشان ينول عطفك ويربطك بيه من غيرارتباط رسمى ...ووقتهاهتظلمى نفسك وتضيعى سنين من عمرك عالفاضى مع حد كداب...وانتى بنت والبنت زى الزهرة كل ما تكبر وحيدة من غير رعاية كويسة تدبل...ركزى فدراستك وربنا يوفقك وكل حاجة هتيجى فوقتهاان شاء الله
ايه اللى بيحصل ده يا بنتى
ايه اللى بيحصل ده يا بنتى خلصى دراستك وبعدين هو هيحتاجك تقفى معاه ازاى ده محتاج ربنا هو اللى يهديه لو كان كداب ويشفيه لو كان مريض والله انتم عايشين فى الوهم هو فى اولى وانتى فى اولى يا الله على الزمن الجميل يا بنتى لو الجواز والحياة سهلة زى ما بحكى مكنش الانحلال انتشر والزنا وقصص الحب الواهية والبنت اللى تضحى انتى عايشة فى وهم ومعيشةنفسك فى وهم يا بنتى قربى من ربنا احسن وساعدى نفسك ومتظلمش انتى نفسك مش تظلميه هو والله المستعان
اللهم اهدى بناتنا بنات المسلمين يارب العالمين
اولا انتى ايه مدى معرفتك بهذا
اولا انتى ايه مدى معرفتك بهذا الشاب هل تعرفين اهله الذين ممكن يساعدونكى فى معرفة الحقيقة او صديق مقرب منه يعطيكى الحقيقه حتى تتاكدى منه ولو تاكدتى من مرضه انصحك ان تقفى بجانبه وتساعديه ان يتخطى هذه المحنه وان كان يكذب عليكى فهو انسان لا يستحقق ولا يحترم نفسه لانه ادعى هذا المرض الخطير على نفسه دون تبرير واضح ابحثى عن الحقيقه حتى لاتندمى فى كلتا الحالتين ان صدقتيه ام لم تصدقيه *hayam*
السلام عليكم ورحمة الله
السلام عليكم ورحمة الله وبركاته ..
انسه سمسمه .. انا اسف الولد ده بيلعب بيكي .. لعدة اسباب :
1- ازاي بيطلب انه يرتبط بيكي وانتي لسه في ثانوي ..
2- طلبه انه يتقدم ليكي كان مجرد انه يطمنك ويعرفك انه جاد في طلبه وكده
3- بعد ما اتكلم معاكي لمدة سنة وقرب الميعاد اللي هيفضحة امامك .. اخترع حكاية مرضه .. علشان يهرب منك وعلشان مش يوفي بكلامه معاكي ..
علي اساس ان المرض ده مالوش علاج وعلي اساس انه خلاص مش هيتجوز ..
هو عمل كده معاكي علشان يهرب ويبعد عنك .. وعايز اطمنك انك كده مش بتظلميه ولا حاجة .. بالعكس هو اللي ظلمك لما اتكلم معاكي لمجرد التسلية .. وانتي ممكن تتاكدي من مسألة مرضه ده من اي شخص تعرفيه او ليه علاقة به ..
انتي لسه صغيرة وياما هتقابلي شباب من النوعية دي .. هتلاقي شباب بيقول كلام جميل ومحترم .. بس في داخله شيطان - شباب الاسطوانات - وفيه شباب بتتعرف عليكي لمجرد التسلية وتضييع الوقت والمشكلة انهم بيوهموكي بالحب والجواز .. طبعا مش كل الشباب بس خلي بالك من النوعية دي ..
وكمان بلاش تفكري في الحب والارتباط دلوقتي لان سنك فعلا صغير ولسه في مرحلة المراهقة .. مشاعرك واحاسيسك غير مستقرة .. فكري كويس في العلاقات دي علشان مش تتجرحي من شاب مستهتر ...
وتقبلي مروري
** باهر الحميلي **
