أنا عندي 23 سنة.. مخطوبة عن قصة حب خمس سنين، مشكلتي إني إنسانة خجولة جداً وعلى رأي خطيبي مقفولة أوي، مشكلتي إن كل ما بيكلمني خطيبي بيقول لي حسسيني إني باكلم أنثى، أنا دايماً جد في كل شيء، وهو حبني على كده، بس بعد الخطوبة بقى يكره كده، السؤال دلوقت إزاي أبقى بنت وأنثى في نظر خطيبي أعمل إيه؟!! مشكلتي إني ما باعرفش أدلّع ولا أتكلّم كلام حلو ساعدوني أعمل إيه؟!!
mero
عجيب صديقتي أنه بعد أكثر من خمس سنوات حُب اكتشف خطيبك أنك خجولة، ومقفولة، و.. إلخ. والأعجب أنه لم يلفت نظرك أنك لم تتغيّري في مشاعرك تجاهه، وأن طلبه الجديد من ورائه مسألة قد يكون سببها الخطبة، أو سببها أن مشاعر الحب الصافي النقي النظيف حل معها حب للجسد، والكلام المفتوح من إنسانة مفتوحة تقبل تغضب ربنا وتعطي ما لا يستحق الخطيب بدون حقه وهو كتب الكتاب، والزفاف.
أما الأشد عجباً وما لا يُصدق أنك تسألين أن نعلمك الكلام الذي يجرك للخطأ، وللخسارة، مع خطيب ليس بينك وبينه إلا دبلة يخلعها ويرميها.
وما فهمته صديقتي قد يكون صواباً وقد يكون خطأ، وسأترك لكِ أن تتأكدي لنفسك بنفسك ما الذي تغيّر؟ وما الذي يريده خطيبك بكلامه هذا؟ هل يا ترى يريد أن تنفتحي على الحب وتبدئي بالدلال، والكلام الذي يؤدي إلى التلامس وما يغضب الله (تبارك وتعالى) الذي بيده خيرك كله، وقادر على منع هذا الخير لغضبه منك لمخالفته فيما يرضيه؟!!
أم يريد أن تهتز ثقتك بنفسك وتتصوري أن أنوثتك ناقصة، وأن عليك أن تتصرفي وتشوفي لنفسك حل عشان تتغيري وترضيه؟!!
ولقد نسيت صديقتي أن الأنوثة مع الحلال ستظهر في وقتها، فكما يقولون لكل مقام مقال ولكل حادث حديث. ومقال الأنوثة ومستلزماتها مقامة الزواج وليس الخطبة التي تنفسخ لأهون الأسباب.
والمرأة صديقتي.. أنثى بطبيعة خلقها، وأصحاب الأخلاق تختفي أنوثتهم حتى يأتي أوانها، ومكانها. فالمرأة خارج بيتها ومع غير زوجها إنسان يتعامل مع إنسان مثله طالما لا مقام لهذه الأنوثة.
فالطبيبة، والمدرّسة، والمهندسة.. إلخ أناث، ولكن لا نرى إلا صفة الطبيبة أو المدرّسة أو المهندسة، وتظهر الأنثى مع الزوج وفي البيت وربما في حجرة النوم فقط؛ حيث لا يصح أن تظهر الأنثى في حضور الأطفال، أو غيرهم ممن يشاركون الزوج، والزوجة بيتهم.
صديقتي:
مبادلتك الحب للطرف الآخر دليل على الأنوثة الكاملة، ودليل على أنك متفتحة حيث يرفض الكثير الحب قبل الزواج والارتباط الرسمي؛ خوفاً من العلاقات الطياري والتسلي بالوقت، وبالطرف الآخر، وبعدين فركش.
وما يطلبه خطيبك لم يأتِ وقته بعد فمقام الأنوثة وأنت فقط مخطوبة يبدأ بالكلام الناعم واللمسات التي تؤدي إلى الشهوة و.. إلخ.
ونصيحتي لك صديقتي:
أن تثقي بنفسك، وأن تحاولي أن يفهم خطيبك أنه أحب فيك الأنثى بأجمل مقوماتها وهو الحياء الذي هو شُعبة من الإيمان، وأن يفهم أن التفتح الذي يقول عنه يعتبر عند البعض صفة قبيحة للفتاة تجعلها سهلة؛ بمعنى غير محترمة، وأن يفهم أن الجديد الذي يطلبه بعد 5 سنوات حب لم يحن أوانه بعد، وأنه لا سبيل أمامه ليتمتع بأنوثتك إلا أن يُسرع ويتمم الزواج، وساعتها أنوثتك ستظهر ويمكنك طبعاً إنك تفتحي على الرابع (حلال بقى.. وليه إيه؟!!)
بجد حاجة تحير يعنى الواحدة
بجد حاجة تحير يعنى الواحدة مننا لو محترمة ومحافظة على دينها وعلى نفسها يبقى معقدة ومقفلة ولو فرى وبتقول احلى كلام حب تبقى قليلة الادب ومش محترمة
لازم كل واحد خاطب واحدة يعرف انه لحد ما تبقى فى بيته فهو غريب عنها وملوش اى حقوق عليها لازم يفهم انه حقوقه زى حق الضيف او الزائر ويفهم ان البنت اللى زى دى هى اللى هتحافظ على بيته وهتتقى الله فيه وهتربى ولاده تربية صالحة
وعلى فكرة لازم الرجالة يفهموا ان اسهل حاجة على اى بنت انها تدلع وتضحك على الراجل بس المحترمة هى اللى عارفة قيمة نفسها وبتحافظ عليها
وبجد لازم يعرفوا ان الكلام والدلع والكلام ده كله بعد الزواج بيكون احسن ده غير انهم بياخدوا عليهم ثواب يبقى يستعجلوا ليه
ربنا يهديه ويرجعه لصوابه ويسعدك ويسعد كل الناس يارب
ويرزقنا جميعا بالزوج الصالح باذن الله
زي ما انتي انتي كده زي
زي ما انتي
انتي كده زي الفل
الحياء والخجل أجمل حاجة في المرأة وهو اللي بيديها قيمتها وبيخليها جميلة فعلا
لو خطيبك مش مقدر جمالك ده يبقى تنفصلوا احسن واوعي تغيري نفسك او شخصيتك طالما انتي صح
أنا من وجهة نظري ان ربنا مخلقش أي بنت مش جميلة وكل واحدة ليها جمالها الخاص سواء مظهر او جوهر وانت ربنا خلى جمالك كله في حيائك وسكوتك وعشان كده هو حبك لانك نادرة ومش ايزي مع كل الناس... ميجيش بقى بعد الخطوبه يطلب منك انك تسيبي نفسك معاه عشان الدبلة لان ده ميدلهوش الحق في كده وده مصدر جمالك الوحيد ياريت متتنازليش عنه عشانه... هو يمشي وهاتلاقي 1000 واحد بعدة هايحب اللي هو حبة فيكي.
اوعي اوعي اوعي اثبتي على
اوعي
اوعي
اوعي
اثبتي على موقفك للنهاية وبعد النهاية كمان
و إياكي تتنازلي عن حيائك يا بنت الناس مهما كان المقابل
و بعدين الى خلقه خلق زيه آلاف مش لوحده الكويس ف الدنيا دي
ولا هو الملاك وبعدين توقعي منه أي حاجة بعد ماياخد منك الكلام الى عايز يسمعه منك وساعتها هاتخسري كرامتك ، وما أقصدشي إن الامور هاتتطور للبعيد بس على أي حال حيائك كرامتك وعفتك مدى الحياة
خليكى زى ما انتى متتغيريش
خليكى زى ما انتى متتغيريش محدش عارف إيه اللى هيحصل بكرة أولا إرضى الله ثم نفسك ثم الاخرين أنا مخطوبة وبحب خطيبى جدا أنا زيك وأكتر وهو راضى وعاوزنى أفضل كده وأكتر لانه بيحبنى كده هواللى كسبان مش هيخاف بعد كده من حاجات كتير وهيبقى مأمن مهما بعد وإحنا مجوزين لو مسافر مثلا خلية يوافقك على كده لو بيحبك
انا عايزة اقولك أنى بعانى
انا عايزة اقولك أنى بعانى جداا من مشكلتك دى ..
و هى الخجل الشديد و الزائد عن الحد ..
و أنى دايما بحب اكون جد ..
بس عايزة اقولك ع حاجة ..
هو لو بيحبك بجد ..
هيقبلك زى ما انتى ..
و مش هيبقي مستنى مقابل منك ..
وساعتها انتى هتحسى انه بيحبك ..
و هتطمنى و هتقدرى تعبرى عن مشاعرك ليه ..
و لكن فى الوقت المناسب ..
لان من وجهة نظرى الخطوبة غير كافية ..
لما ان شاء الله يتكتب كتبكوا ..
ساعتها هيكون ده حق ليه لانك اصبحتى زوجته امام الله و امام الناس ..
و فى الحلال ..
و ربنا يوفقك و يهديكى الى ما يحبه و يرضاه ..
جزاكى الله كل خير
لكوا جزيل الشكر و الاحترام
بصراحه لي رأي الشخصي لو
بصراحه لي رأي الشخصي
لو بتحبيه اعملي كل حاجه بيحبها سيبك من اني مبعرفش اتكلم ولا ملييش في الا الكلام الجد
لو كنتي بتحبيه فعلا اكيد انتي مستعده تعملي اي شئ ليه حتي لو كان اغلي شئ في حياتك وهي طبعا حياتك
فكري انتي بتحبيه ولا لأ
لو بتحبيه اعملي اللي يسعده ويفرحه
وربنا يوفقكم
وعقبالي يا رب
خطيبك كذاب وعاوز حاجات فيها
خطيبك كذاب وعاوز حاجات فيها تنازلات احنا كلنا بنعمل كده كشباب ونقول يبقى انتي مش بتحبيني ومش حاسة بيا لازم تحسسيني بحبك ولهفتك وشوقك ليا وطبعا بنضحك على البنت لاشباع رغبات عند كل الشباب المحترم وغير المحترم لانها غريزة وايضا تكون متفاوتة بين الشباب
ممكن استفسر معندوش بتنشروا
ممكن استفسر معندوش بتنشروا مشاركاتى ليه ولا بلاش بعد كده أشارك لى كذا مشاركة فى كذا موضوع ومش لاقى وشكرا على الاهمال
=================
رد بص وطل
شكرا على رغبتك في المشاركة معانا طبعا وبنعتذر عن بعض التأخير لكن لازم تتأكد إننا بنهتم بكل مشاركات قراءنا وبنكون سعداء بيها جدا...في انتظارك.
اوعى تسمعى كلام اى حد يقلك
اوعى تسمعى كلام اى حد يقلك عبرليه عن حبك ولازم يكون فى فرق بينك وبين صاحبه ودا عن تجربه مع الاسف الشباب دلوقتى ما بقاش عايز البنت البريئه المقفوله من كتر الى بيشوفه اه يقولك فى الاول انا عايز البنت الاخلاق المتربيه وبعد الخطوبه يقولك دى ما بتعرفش تعبر عن مشاعرها ودى مقفله خطيبى كان كده خطبنى عشان انا اخلاق ومقفله وبعد الخطوبه ابتدى يزعل عشان انا ما بعبرلوش عن مشاعرى وانه بيشوف البنات اللى بره وعايزنى اتعلم عشان بعد الجواز وانوا خايف لافضل كده بعد الجواز وفضل مع الضغط ولانى كنت بحبه وماعنديش خبره اسمع كلامه واتعلم انى ارد عليه وابتدى الكلام ببحبك ووحشتنى وانتهى ... صحيح انا فقت وصحيت قبل فوات الاوان واتفسخت الخطوبه لكن بقالى انى بلوم نفسى كل يوم انى طاوعته وما سمعتش كلام ابويا وهو بيقولى ما تتكلميش معاه كتير الكلام ده عامل ذى الميه المالحه ما حدش بيشبع منه واوعى تفتكرى انك ها تقفى عند بحبك ووحشتنى بس لا قدر الله ممكن خطوبتك تتفسخ زى هو لحد ما يكتب كتابك انسان غريب عنك لازم تلتزمى معاه فى الكلام واذا كان عاجبه انا لسا قريه مشكله لواحد بيشك فى خطبته لانها بتقعد تتكلم معاه على النت بعد نص االليل وانها ما بتوقفوش لما بيقولها كلام حلو ما حدش عاجبه حاجه التزمى بمبادئك وما تحيديش عنها عشان ما تخسريش
حاولي تعبريله عن حبك وعرفيه
حاولي تعبريله عن حبك وعرفيه إنك بتتكسفي ولما تتجوزوا إن شاء الله الكسوف ده هيروح
السلام عليكم الموضوع ده فى نص
السلام عليكم الموضوع ده فى نص البنات أكيد الحياء ده فى كل بنت ده مش عيب ده من ميزاتنا وده دليل الاحترام ومعنى أن الولد يكره كده ده يبقى غلط
مش شرط انها عشان تكلمه وتبوح
مش شرط انها عشان تكلمه وتبوح باللي جواها ليه يبقي هي بتعمل الغلط.الغلط هو المقصود به اللمس والأشياء التي تحدث بين أتنين مخطوبين ويكون الثالث بينهم الشيطان بس برضه البنت هي اللي بتسمح بفعل ده فممكن أوي إنها تحبه وتكلمه وتبادله المشاعر بالكلام الحلو المعسول اللي يخلي خطيبها يحبها وتكون بينهم علاقة كويسة وفي نفس الوقت خالية من الشبهات لأن يا حبيبتي الخطيب دائما لابد وأنه يكون من جوه نفسه إنسان بيحب دائما سماع الكلام المعسول وتبادل المشاعر الرقيقة الرومانسية
ده اسمه احترام ياحبيبتي مش
ده اسمه احترام ياحبيبتي مش تقفيل
ولعلمك كده احسن
وانا زيك برضو بس بيقولوا عني معقده
بصراحه يا جماعة أنا مش عارفة
بصراحه يا جماعة أنا مش عارفة البنت اللى جد مش نافعه واللعبية مش نافعة أنتوا عايزين إيه بالظبط
مع احترامى لأراء الجميع ده
مع احترامى لأراء الجميع ده خطيبك ولازم يحس بحبك وحنانك أنتى بتقولى إنكوا تعرفوا بعض من خمس سنين يعنى واخدين على بعض يعنى أنتى فاهمه هو بيحب إيه وبيكره إيه إسمعى كلامى لازم تعملى كده يا إما هيروح منك بس فى حدود الإحترام والأدب ويارب يوفقكوا مع بعض
هقولك على حاجة ممكن تريحك
هقولك على حاجة ممكن تريحك تخيلى انك معك 1000جنيه صرفتى منه واحد جنيه أو ضاع هتزعلى لا طبعا لأنه مش هيحصل تأثير فى قيمة 1000 جنيه تخيلى بقا انك هتعيشى مثلا 50 عام وأننا نقف أدام ربنا علشان نتحاسب بس 500000 خمسون ألف عام يبقى انتى كده عشتى لا طبعا صد قينى الدنيا هذه ما هى الا لحظات فى حياتنا كده كده الموت قادم استغفرى ربك واطلبى منه انه يعوضك خيرا فى الآخرة وعلى فكرة كل انسان مرتبته فى الجنة حسب عمله فى الدنيا وقدر ابتلاءه واحمدى ربنا على انتى فيه وصدقينى القرب من الله افضل من اى شىء وافضل حل خليك كده وفعلا انوثة البنت فى حياءها وليس دلعها وربنا يثبتك على موقفك وان شاء الله ربنا يسعدك فى حياتك واللهم استر على بناتنا بنات المسلمين
يا جماعه الله اعلم بالظبط ايه
يا جماعه الله اعلم بالظبط ايه اللي بيحصل بينهم ومنعرفش بردوا هو بيقول ليه كده احنا مش بنقعد معاهم يعني ممكن هو بيكلمها ف التليفون يقولها وحشتيني تقوله متشوفش وحش ليه نفهمه غلط وبرضوا منعرفش ممكن يكون هو بيقصد حاجات أوفر شويه اكتر من حقه كخطيب ليه المفروض انها تعرض مواقف علشان نقدر نحكم بالظبط
أعتقد مشكلة الحياء لاتتفق مع
أعتقد مشكلة الحياء لاتتفق مع علاقة لمدة خمس سنيين يبدو أن مفهوم الحياء فى تتطور
عمتا شكرا على النصيحة التى
عمتا شكرا على النصيحة التى أسديتها للأنسة صاحبة المشكله ولكن لماذا اخذتى الموضوع بهذا المنطق وهو الخطأ وغضب ربنا عليها وهل ممكن أن يكون خطيبها بعد خمس سنوات يحرضها على الخطأ الأن وكمان بعد ما خطبها انا عايزة اقول إن نفس المشكله معايا شخصيا أنا بحب خطيبى بقالى سنتين وعندى نفس المشكله أنى خجوله جدا ومبعرفش أتكلم فى الرومانسية خالص من الاخر لحد الأن لما بيقول لى بحبك مش بعرف أرد خجلا شديدا ولما يقول لى وحشتينى بجيبها بهزار وقول له اخرس هوه حب فيا خجلى ولكن هو خائف من ان هذايحدث بعد الزواج أنا بحاول أن أقنعه أنى بعد الزواج هتغير مع طبيعة الحال لأنه حلال ولكن الفكرة فى إنه هيكون حلالى اه وهسمع كلامه وإحساسى تجاهه من ناحية حب الجسد ولكنى هفضل خجوله ولا أنطق بمعنى أن إحساسى مخفى ولا يظهر إلا عندما هو يحركنى بالزعل إنه محتاج يسمع منى بحبك أو وحشتنى أو مقدرش أعيش من غيرك كل إحساسى بيخرج فى أفعالى ولكنه يقول لى أن الكلام برضه عليه عامل أرجو أن أكون وصلت لك المعلومة
السلام عليكم ورحمة الله
السلام عليكم ورحمة الله وبركاته ..
يعني ايه بنت مقفولة .. علشان بنت محترمة وصريحة في كلامها وجادة تبقي مقفولة ..
بجد انا بستغرب من الشباب , لو البنت محترمة تبقي مقفولة .. ولا البنت فري .. تبقي غير محترمة .. امال انتوا عايزين ايه ؟
بس انا عندي نصيحة صغيرة ياريت تطبيقيها في حياتك بصورة عامة ..
ياريت تحسسي الناس اللي بتحبك بحبك لهم .. بالكلمة وبالفعل ..
اما مسألة خطيبك هو اكيد عايز يحس انه خاطب بنوتة جميلة .. ولما يتكلم معاها يحس انه بيتكلم مع بنت .. مش بيتكلم مع واحد صاحبوا .. لازم تحسسيه انك خطيبته ..
انا مش بقولك كده علشان تعملي حاجة حرام او عيب .. انا اقصد ان لازم يكون فيه فرق بين اتنين زمايل واتنين مخطوبين .. حسسي خطيبك بحبك له ..
* ويعني ايه مش بتعرفي تتكلمي كلام حلو ؟
نصيحة تانية: مع خطيبك قولي اللي انتي حاسة بيه قولي اللي في قلبك وبس .. وصدقيني هو ده الكلام الحلو اللي عايزه خطيبك ..
وتقبلي مروري
** باهر الحميلي **
