أنا مخطوبة من 3 سنوات بس أكيد خلالهم كان فيه أيام كويسة وأيام كلها مشاكل؛ بس مشكلتي معاه إن كل مشكلة يقول مش عايز الموضوع ده.
أنا تعبت.. مش عارفة أعمل إيه ومش معقول أسيبه بعد 3 سنوات وأنا داخلة على الرابعة كان مفروض شهرين أو 3 ونتجوز؛ بس الكلمة دي بتخوّفني، وعلى طول بافكر أسيبه؛ بس بعد ما وقفت معاه كل ده، بسهولة أسيب كل ده لحد تاني.
أنا مخنوقة.. مخنوقة بجد.. وشكراً.
newlove
اعترف لك صديقتي العزيزة أنني تعجّبت كثيراً من رسالتك، ليس بسبب المشكلة التي تتضمّنتها الرسالة ولكن بسبب طريقتك في كتابتها.
فعادة ما تبدأ الرسائلُ التي تحوي مشكلة كمشكلتك كالتالي "أنا مخطوبة وبحب خطيبي أوي، لكن فيه مشاكل كتير بيننا".
ولكنك لم تفعلي؛ فرسالتك كلها لا تحوي كلمة واحدة تدلّ على الحب؛ ولكن مصطلحاتك كلها كانت على نمط "أسيبه بعد كل ده" أو "أسيب كل ده لحد تاني"، وهكذا.
كل هذه الكلمات جعلتني أشعر بأن استمرارك معه كل تلك السنوات كان استخساراً للمجهود الذي بذلتِه معه وليس حباً فيه أو رغبة منك في استمرار تلك العلاقة.
لذا فإن علاقتكما تعاني من مشكلة أكبر بكثير من كونه عصبياً أو متهوراً.. فمعنى أنكما بعد 3 أو 4 سنوات من الارتباط لا يزال عندكما مشكلة في التواصل، وأنه عند كل مشكلة تحدث بينكما يقرّر هو "إنه مش عايز الموضوع ده"، وأنت تفكّرين في نفس الشيء؛ ولكن الفارق بينك وبينه أنك تفكرين في الموضوع بينك وبين نفسك وليس عندك الجرأة لأن تعلنيها؛ معنى هذا كله أن هناك شيئاً خطأ في علاقتكما من البداية.
إذ إنه بعد كل تلك السنوات، كان من المفترض أن تكونا في قمة الحب، تحلمان وتخططان سوياً لحياتكما القادمة؛ بدلاً من أن يعيش كل منكما وهو يحمل خنجراً للآخر وراء ظهره لن يتوانَ في إظهاره في أي وقت.
ونصيحتي لكِ أن تجلسي مع خطيبك جلسة صراحة، تحكين له فيها عن كل ما يُقلقك منه، وتطلبي منه أن تؤجلا موعد الزواج حتى تشعرا بالاطمئنان على علاقتكما، وتصلا لحلول للمشاكل التي تواجهانها.
ولا تنسي -صديقتي العزيزة- أن الزواج مشروع عمر يجب أن نكون حذرين جداً قبل أن نخطو أي خطوة فيه، ولذا فأنا أريد منك أن تمحي من ذهنك فكرة أن تُكملي في علاقة تشعرين أنها فاشلة، لمجرد أنك نادمة على السنين التي أهدرتِها فيها؛ لأنك لو استمريتِ في تلك العلاقة سيكون ندمك أكبر بكثير.
وملخص ما أريد قوله لكِ هو أن تُحاولي مع خطيبك أن تُنجحا علاقتكما بكل الطرق الممكنة، ولكن إذا شعرتِ بأنه لا فائدة من كل تلك المحاولات؛ فلا تتردي في إنهاء العلاقة، وكوني واثقة في الله، واعلمي أن نصيبك ستنالينه لا محالة.
فتوكلي على الله واستخيريه في كل خطوة، واطلبي منه التوفيق.
السلام عليكم ورحمه الله
السلام عليكم ورحمه الله وبركاته:
يا جماعه انا بسأل على الاستاذه "دعاء رمزى" وبسلم عليها هى بخير؟ واحب اوجه لها تحيه كبيره جدااااااااااااااااا
================
بخير الحمد لله يا أسماء وباشكرك على تحيتك جدا وفي انتظار المزيد من رسائلك ومشاركاتك
دعاء رمزي
والله كلامك جميل يا اسماء
والله كلامك جميل يا اسماء فعلا مش لازم يكون جوازها منه مجرد تخليص حق
وعلى فكره يا استاذه اسماء انا بقرأ كل تعليقاتك واول مره اشارك عشان اكتب رايى فى كلامك بجد انا معجب بارائك جدااااااا وياريت كل البنات محترمين زيك لان ده واضح من كلامك ويارب يرزقنى بواحده زيك ويرزقك بانسان كويس لو انتى مش مخطوبه
وكمان احب اسال على الاستاذ باهر الحميلى برضه بحب ارائه
بصراحه يا جماعه انا بحب ارائه جدل وبقتنع بيها هو واسماء"على خطى الحبيب"
السلام عليكم ورحمه الله
السلام عليكم ورحمه الله وبركاته:
"انا مش عارفه اعمل ايه" معقوله بعد 3 سنين مخطوبه او اكتر كمان مقدرتيش تفهمى خطيبك ودلوقتى بعد كل الفتره دى بادئه تسالى اعمل ايه
اسمحيلى لو فى غلط فى الموضوع مش هيبقى غلطه لوحده
انتى كمان عليكى ولو جزء من الغلط ده
انتى ضيعتى سنين من عمرك كان كفايه سنه واحده تفهمى الانسان ده وتسألى نفسك هل كل واحد منكم هيضيف للتانى ولا لأ؟
هل كل واحد منكم محتاج للتانى ولا لأ؟
وهتقدروا تنشئوا اسره مع بعض قايمه على الحب والتعاون وتربيه اطفال تربيه سليمه؟
كل دى اسئله وغيرها كتييييييييييير لازم انتى وهو تجاوبوا عليها
انتى مقولتيش اذا كنتى بتحبيه ولا لأ بس واضح من كلامك انه لأ
لان كل اللى صعبان عليكى السنين مش بعد الشخص ده عنك
ولا قولتى كمان اذا كان هو بيحبك...............
يبقى اعمل ايه دلوقتى:
1-لازم لازم لازم تقعدى مع نفسك قعده طويله وتصارحى نفسك
الانسان ده فعلا هتقدرى تبعدى عنه ولا لأ
2-لو بتحبيه هل هو يستاهل الحب ده وانتى شايفه فيه الزوج المناسب ليكى والاب المسئول عن ولاده وبيته وانتى طبعا؟
3-لو اجابتك عن السؤال التانى ده لأ
يبقى رايى انك تسبيه بغض النظر عن السنين-ومحدش يزعل من كلامى-
لان ده افضل من انك تضيعى عمرك كله معاه وساعتها مش هتكونى
لوحدك احتمال كبير يكون ربنا رزقك باطفال
4-اطلبى منه ان هو كمان يصارح نفسه بحقيقه مشاعره من ناحيتك
حاجه اخيره:
مينفعش باى حال من الاحوال انه يسيب المشاكل معلقه
لازم يواجهها ويحلها مش يهرب منها
وانتى كمان ازاى يبقى خوفك على العلاقه دى من باب انك مش عايزه حد غيرك ياخده على الجاهز بعد وقوفك جانبه
وقوفك جنبه شئ يحترم لكن ميجيش على حساب حياتكم وكأن جوازك منه مجرد تخليص حق ولا ايه ؟
وبرضه صلى صلاه استخاره لانه لا يعلم الغيب الا الله
ربنا يوفقك ويصلحلك حالك
**asmaa**
السلا عليكم ورحمة الله
السلا عليكم ورحمة الله وبركاته صلى على سيدنا محمد اولا اللهم اهدينا واغفرلنا من خطايانا وذنوبنا . رسالة من واحد مش عايز انكم تنفصلوا ممكن تخلى ايامك كلها سعادة وحب بينكما بس كانت الفرصة فى ايدك تخلى 3 سنوات يوم أو اسبوع لأنك كان ممكن لاتؤجلى زواجك لأى ظروف مهما كانت هل بينكما حب لماذا تحول بمشاكل لأن ايام الخطوبة كثيرة وبذلك فهو يتردد كل يوم عنك وانت تترددين كل يوم عنه فكل يوم يتغير الحب الى مشكلة حتى يصل الى الانفصال فأنا اريد منك عدم التفريط فى حقوقك وحقوقه من الحياة وأنكما تحددا موقفكما من تلك الايام وان تجلسى معه وتفكرين فى حل المشكلة و تعودان لله وتتزوجان بأسرع وقت وهذا يرجع علاقتكما بأحسن بكثير من المشاكل أخوكى احمد من الاقصر والسلام عليكم ورحمة الله وبركاته
يا بت اعقلى بأيدك انتى تخليه
يا بت اعقلى بأيدك انتى تخليه زى مانتى عايزه وتخلى بيتك (جنه) بجد والله مش بضحك عليكى
يلا حالا كلميه وقوليله ربنا يخليك ليا
وعلى فكره ممكن يكون احساسك ده نتيجه فترة خطوبه طويله
يلا اتجوزوا اتجوزوا بلاش دلع وسلميلى ع الواد حبيبك
بيتهيأ لى ان الموضوع كان فيه
بيتهيأ لى ان الموضوع كان فيه تنازلات كتير اوى منك عشان كده يمكن يكون زهق او ما حبش تنازلاتك دى فقال انه يخلع أحسن ويشوف حد تانى
وانتى لو مش عايزه تسبيه عشان بقالكم مع بعض 3 سنين خلى بالك انك هتفضلى معاه بقيت عمرك اللى جاى عمرك اللى جاى معاه وجواز مش خطوبه ولا أحلى كلام من كلام الاستاذه رنا طبعا بس احنا مجرد بنشارك ومش بنقول رأينا لان الرأى لآصحاب الرأى والخبرة وشكرا ليهم جميعا وكل القائمين على موقع بص وطل اللى بجد انا بحبه جدا جدا جدا عشان بلاقى فيه اللى انا عايزه بجد مع ان فيه شويه تناقضات بس يلا الموقع ككل حلو اوى للهم بارك يعنى
