أنا بحبكم أوي على فكرة وبعتّ لكم أكتر من مرة قبل كده لما واجهتني مشاكل، والنهارده أنا محتاجة لكم أوي أوي، ومحتاجة ردكم في أسرع وقت.. أنا عندي 21 سنة، كنت مخطوبة لمدة سنة وفسخت من سنة ونص، وكان خطيبي عن حب، ولكن نظرا لعدم تفاهم العيلتين وسوء معاملة والدته وتسلّطها لقينا إن ده الحل الوحيد، وبعدها ارتبطت ارتباط فاشل لم أحسبه في حياتي..
بعدها اتعرفت على مهندس خريج السنة عن طريق صديقة ليّ وأعجبنا ببعض، وهي كانت عايزة توفّق بيننا فقررنا إننا نرتبط، وأول ما يشتغل بعدها بكام شهر يكلّم أهلي فورا ويشرح لهم ظروفه، أنا كنت حاسة إنه إنسان كويس أوي ومحترم، ولو إني مش بحبه الحب اللي يمنعني أبعد عنه، ولكن اتمسكت بيه؛ لأن من الصعب ألاقي حد كويس ومحترم في وقتنا ده، وبعدين خطيبي السابق حاول يكلمني تاني ويوضّح ندمه الشديد في إنه خطب بعدي، وإنه ضحّى بيّ، وعايز يرجع لي، المكالمة قلبت حالي، وفضلت فترة متغيرة، ولقيت إن اللي باعني مرة ممكن يبيعني تاني، ومهما كان حبه فهو ما قدرش يحميني من والدته وغدرها..
المهم دلوقتي حبيبي المهندس ده مشكلته إن شغله واخده أوي ومش بييجي إجازة إلا كل أسبوعين، وكمان مش بنتكلم إلا مرة بالليل وبيكون تعبان، هو بيحبني وأنا مقدّرة شغله، والمسئولية اللي عليه خصوصا إنه لسه بيبدأ حياته، وعايز يثبت نفسه، بس كتير كلّمته عن احتياجي له، وإني عايزة دايما أحس بوجوده حتى لو كان برنّة أو رسالة، وهو مشغول، وحتى لو غاب عني اليوم كله في آخر اليوم أحسّ بمكالمته إنه ما سابنيش ولا دقيقة.. مش بالاقي منه غير إنه بيقول لي خلاص أنا فهمت وحاضر وحاجات كتير باكلمه فيها ويوعدني بيها، ومش بلاقي استجابة وغصب عني دماغي بتروح لخطيبي السابق وحبه ولهفته الدايمة عليّ..
أنا دلوقتي عايزة آخد رأيكم أسيبه ولا أكمّل وأحاول تاني لحد ما يتغيّر ولا هو مش هيتغير؟!! مع العلم إن كل ما أقابله لازم نتخانق على أي حاجة، ساعدوني في أسرع وقت أرجوكم، وآسفة على الإطالة وجزاكم الله خيراً.
love.dodo
أولاً من بداية كلامك اتكلمتي عن دخولك في ثلاثة ارتباطات، وإنتِ كما تقولين في الحادية والعشرين من عمرك، يعني لسه صغيرة على هذا العدد من الارتباطات، والمشكلة كمان إنك بتدخّلي نفسك في الارتباطات دي سريعا يعني بتخرجي من ارتباط وتبدئي في ارتباط جديد بعده على طول، وكأنك في محل ملابس تختارين من بين المعروض إلى أن تصلي إلى ما تريدينه، وكأنك في سباق مع الزمن بأنك لازم توصلي للهدف سريعا، فأنت لا تعطين لنفسك الفرصة بعد كل ارتباط؛ لكي تحاسبي نفسك لتدركي أخطاءك ومميزاتك وما كسبتِه وما خسرتِه في هذه العلاقة، وما تحتاجين لتغييره في نفسك وما تحتاجين لتقويمه.
أما بالنسبة لخطيبك الأول فإن الحال كما هو، ولم يتغير فيه شيء يعني اللي ما قدرتيش تغيريه في الأول ما أعتقدش إنك هتقدري تغيريه دلوقتي، وعندما تصل المشاكل لتصبح بين العائلات ده من الصعب إنه يبقى له حل، وغالبا تنتهي العلاقة بالفشل، وأيضا كما تقولين إن اللي ما قدرش يحميكِ وباعك مرة ممكن بسهولة إنه يبيعك مرة أخرى، طالما أن الوضع لم يتغير فيه شيء.
أما بالنسبة للشخص التاني المهندس فهو ليس عيبا فيه أن انشغاله عنك بسبب سعيه لبناء حياته ومستقبله اللي في الآخر هتكون نتيجته عايدة عليكِ، يعني عندما يصل إلى مكانة جيدة ففي النهاية هيكون خير ليكي وهتبقي فخورة إن الإنسان اللي اخترتيه وارتبطتي بيه إنسان ناجح وملتزم، وصدقيني الحكاية دي هتحسي بيها بعدين، وهتبقي فخورة بيها جدا.
أما مسألة تقصيره في التعبير عن مشاعره لكِ فهي طبيعة شخصيته، وممكن إنك تساعديه وتعملي معاه الحاجات اللي نفسك إنه يعملها معاكي، ومع الوقت هيفهم طبيعتك وهيبقى بيدوّر إنه يسعدك، بس أهم شيء إنك ما تقارنيش بينه وبين الشخصين السابقين؛ لأن كل إنسان وله طبيعته الخاصة، وله أسلوبه في التعبير عن مشاعره.
كما أنك يجب ألا تنخدعي بهذه الأساليب؛ فهي ليست وحدها الدليل على حب هذا الشخص لكِ، فهناك أشياء أخرى تكون معبّرة عن الحب والأهم أن تكوني واثقة من حب هذا الشخص لكِ ومن توافقه معكِ، ومن أخلاقه، وزي ما بتقولي فعلا إنه صعب إنك تلاقي شخص مناسب في هذه الأيام، ولكن لا تجعلي هذا السبب هو الأساس في اختيارك؛ ففي النهاية ستجدين نفسك تعيشين حياتك وأنت غير راضية عنها، فأنت عليكِ اتخاذ القرار بأن تكملي أو تنفصلي، المهم إنك تفكري صحّ في الحالتين وتخططي لحياتك بشكل أكتر موضوعية، وتهتمي بدراستك ومشروعك؛ لأنه هيساعدك إنك تشغلي وقتك بأشياء مهمة ويشغل حيز من تفكيرك، وإن شاء الله ربنا يهديكِ للخير ويوفقك.
السلام عليكم و رحمة الله و
السلام عليكم و رحمة الله و بركاتة بصى يا رنا قبل ما تبتدى حاجة لازم تفكرى فيها كويس مش علشان الشخص بيقول كلام حلو يبقى بيحبك لازم تكونى حاسة بكل كلمة بيقولها وربنا يوفقك ويكرمك
بصي مقارنتك بخطيبك السابق مش
بصي مقارنتك بخطيبك السابق مش حتكون مجديه بالنسبه لكي ابدا لانك بتحبيه او حنقول كنتي بتحبيه بلاش تقارني بين الاتننين ومعلش حاولي تقربي من خطيبك المهندس وانتي متياسيش من الكلام معاه وقربي منه حببيه فيكي وهو حتلاقيه مش قادر يبعد عنك بس انتي الاول ابعدي فكرك عن الماضي عشان تقدري تعيشي الحاضر وافتكري ان خطيبك السابق اد ايه سابك وباعك ومشتركيش وهو لو كان فعلا بيحبك كان سيطر علي المشاكل واتغلب عليها ومكانش باعك وعرفيه بقي انك مش لعبه في ايده يسيبك وعايز يرجع يلاقي مستنياه هو انتي ايه الحيطة الواطيه بتاعته اسفه يعني بس انتي لو فكرتي فيه تاني حيسيبك تاني ويجرحك تالت
كل اللى انتى فيه ده طبيعي بس
كل اللى انتى فيه ده طبيعي
بس نصيحتي ليكي مترجعيش لخطيبك لأسباب مهمه جدا
معاملة امه السيئه ليكي
عدم تفاهم الاهل او تفاهمكم
ومحدش يابنتى لاقي اليومين دول مهندس بيشتغل عشان يكون نفسه ويكون بيحبك واخلاقه كويسه وهو متقدملك من نفسه يعنى اكيد اهله مرحبين بيكي وعمرهم ما هيعاملوكى كويس
وفراغك واحتياجك العاطفي طبيعي ان يجي كلام الحب اللى كان بيقولهولك خطيبك على بالك ده طبيعي بس متزوديهاش ومتقارنيش بينهم
اللى انا حسيته ان خطيبك حنين ولما فهمتيه باحتياجك ليه قالك حاضر ووعدك بس منفذش وده مش عيب فيه عشان تقولي استنى عليه يمكن يتغير
وعارفه كمان انك هتقولي مش هيفضى 5 دقايق لو رن عليا ده مش هيشغله بس هو في شباب كده وممكن تكوني على باله طول الوقت بس ميكلمكيش وراعى انه تعبان وبيشتغل عشان مصاريف الجواز وكل ده
السلام عليكم ورحمة الله
السلام عليكم ورحمة الله وبركاته
اختي العزيزه
اللي باعك مره يبقى مش بيحبك هو كلمك تاني عشان حس انك حتبقي لغيره او مش في ايده لكن اول ماتبقي في ايده ويضمن انك بقيتي ليه ممكن يبيعك للمره التانيه والتالته
حافظي علي اللي معاكي وقدري شغله وربنا يوفقك ويكرمكم ياااااااارب
انا عايزه اقولك حبيبتى اللى
انا عايزه اقولك حبيبتى اللى يحبك ويقدرك ويحترمك ماتفرطيش فيه مهما كان واكيد لما يحس بقربك منه هيعمل اى حاجه فى الدنيا عشان يسعدك لانك ترددك ومقارنتك هي بينك وبين نفسك لكن هيوصله الاحساس دا بدون ما تقصدي انتي وهيتجرح منك اوى وممكن تخسريه انسى اللى باعك مره وهيبعك تانى وتالت وخليكى فى اللى يحبك
لا طبعا عمرك ماترجعى لخطيبك
لا طبعا عمرك ماترجعى لخطيبك ده تانى لان هترجعى زى الاول والظاهر من كلامك ان التانى بيحبك خليكي معاه
المفروض انك تحسسيه انك جمبه
المفروض انك تحسسيه انك جمبه على طول وانك تشجعيه انه يوصل للى هو عايزه ودى حاجة كويسة ليكى ومتندميش ولا تفكرى فى حد باعك
خطيبك السابق ربنا يهديه ويشوف
خطيبك السابق ربنا يهديه ويشوف غيرك ونصيبه فى حته تانيه
واللى معاكى الوقتى وربنا اكرمك بيه لا تتركيه
واولا خطيبك السابق اين هو من حديث الرسول صلى الله عليه وسلم
* المؤمن أخو المؤمن فلا يحل للمؤمن أن يبتاع على بيع أخيه ولايخطب على خطبة أخيه حتى يذر *
وانتى طبعا القرار فى ايديك طالما ان الانسان الموجود معكى الان محترم ولم يقدم لك شىء لتعاقبيه بها بتركه لماذا تفكرى من الاساس فى العوده للسابق
شوفى انتى اتجرحتى قد ايه لما سابك الاول ودلوقتى طعم الجرح
اتريدين ان تذيقيه لخطيبك الحالى
حتقولى انا لم افعل الا كل خير مع خطيبى السابق لماذا تركنى
وخطيبك الحالى حيقول نفس الكلمه ليه سابنتى
وبعيد عن الحب ووساوس الشيطان اترضين لنفسك تكونى كالسلعه كل كم شهر فى ايد واحد واستخيرى ربناوربنا يقدم ليكى اللى فيه الخير
ههههههههههههههه نو كومنت لاني
ههههههههههههههه نو كومنت لاني زهقت من قصص البنات لان البنت الناصحة تشوف اللي باعها الاول وتبص علي اللي بيشتريها ونصيحة مني ليكي اللي يبيع في الاول دة اكيد هيبيع تاني وتالت برجاء قراءة الفاتحة علي روح والدي وبرجااااء النشر
أنا حقول اللي عندي ورزقي على
أنا حقول اللي عندي ورزقي على الله.
أولا: 21 سنة وارتبطت 3 مرات فالغالب بتكون بنت جميلة وعارفة انها جميلة وبيكون عندها ثقة شديدة انها لو سابت واحد لأي سبب أيا كان حييجي غيره عشرة فالارتباط مش بيطول.
ثانيا: الراجل مهتم بشغله وهي عايزاه يكلمها ويبعتلها ماسجات ورنات ولما ييجي يتقدملها حتقولوا الشبكة والفستان والدبدوب اللي المفروض يجيبهم بفلوس يكسبها من شغله، يعني يشتغل ويجيب فلوس مش عاجب، يحب ويضيع رصيده مش حيعجب بعد كده وده حال معظم البنات اللي فى السن ده.
ثالثا: بتقول الأولاني سابها مش عارف ليه وأمه حاجات كده وده ممكن يكون حقيقي بس فالغالب لما بتحصل مشكلة محدش بيبص لغلطه ويجيب الغلط على التاني وتاخد عندك بقى: أصله بخيل (عشان ماجابش فالانتين) أصل امه وحشة، أصل شعره مش ناعم وأي كلام يا عبد السلام.
وياعيني مجرد انه كلمها حتبتدي تدور للراجل الجديد على أي حاجة برضه عشان تبرر لنفسها انها تسيبه وترجع للأولاني أو ممكن تشوف حاجة جديدة خالص.
والله يا جماعة اللي بيحصل فينا ده حلال. وحالات الطلاق والخلع والعنوسة بسبب الدلع والهيافة اللي بقينا فيها ولاد وبنات رجالة وستات.
أنا أفهم ارتباط وحب ماشي وماله بس على أساس يعني الشاب يكون عنده الحد الأدنى اللي يخليه ممكن يفتح بيت والبنت أهلها يربوها ويعلموها أن الارتباط يعني جواز يعني مسئولية ومشاركة وأعباء وضغوط قبل مايكون شبكة وصور وفرح وسجاد وستاير. يارب حد يفهم
انسي اللي فات وخليكي في
انسي اللي فات وخليكي في المهندس دلوقتي
هي دي طبيعه شغله
احنا مهندسين زي بعض وانا عارف
المهم اديله الفرصه وحسسيه انك اقرب حد ليه وشوفي هيعمل معاكي ايه بعدها
وربنا يجعلكوا من نصيب بعض
انا شايف كفايه مكالمه كل يوم
انا شايف كفايه مكالمه كل يوم تطمني عليه بلاش طمع.ومتقارنيش حد بحد.وكمان لو بتحبيه بجد هتستنيه ومفيش حد جديد هيأثر عليكي.اما لو في حد جديد اثر عليكي وأعجبتي بيه وكدا يبقي انتي مش بتحبي المهندس.سلام
السلام عليكم ورحمة الله
السلام عليكم ورحمة الله وبركاته
سؤال
ليه يا بنات كل ما نحب حد نعمل مقارنه بينه وبين اللى قبله ؟
هل المفروض يبقى نسخة من الانسان اللى قبله ؟
مش من حقه انه يكون ليه شخصيته وصفاته وطباعه
ليه نظلمه وناخده بذنب غيره ويبقى ذنبه الوحيد انه مش زى اللى قبله !!!!!!!
لمجرد انه مشغول ومش بيوصلك مشاعره كويس عايزة ترجعى لخطيبك
طب مسألتيش نفسك لما ترجعى ايه اللى اتغير ؟
هو هو خطيبك وتسلط امه والمشاكل هترجعيله عشان تسمعى كلام حلو
مش ده الحل ولا هى دى الحياة هيفيد بايه الكلام الحلو طالما حياتك هتبقى فى مشااكل علطووول
اما المهندس مش عيب انه مبيعرفش يعبر عن مشاعره واكيد هو لسه فى بداية حياته وعايز يبنى نفسه صح انتى مفروض توقفى جنبه عشان يقدر يبنى نفسه ويتقدملك وبعد كده تسمعى الكلام الحلو زى ما انتى عايزة
لو انتى بتحبيه بجد مكنتيش قارنتيه باللى قبله
اختى حاولى تفكرى بهدوء وبدون تسرع عشان متظلمهوش معاكى
لو عايزاه بجد اقفى جنبه وساعديه لحد ما يتقدملك
وانسى خطيبك ......... الكلام الحلو مش كل حاجه فى حياتنا
فى حاجات تانية اهم
وان شاء الله ربنا يوفقك ويهديكى للقرار الصح
*hayoma*
السلام عليكم ورحمة الله
السلام عليكم ورحمة الله وبركاتة
إنسي الأول والتاني متضغطيش عليه
وحاولي إنك تخليه يعجل بالخطبة
وربنا يوفقكم
