تم أخذ بطاقتي الشخصية من ضابط شرطة، ولم أستطع الحصول عليها منه.. هل من حقي أن أتقدم بطلب شكوى ضد الضابط؟ وكيف أقدمها؟ ولمن أقدّمها؟
عزيزي.. يمكنك اللجوء الى إدارة التفتيش والرقابة بوزارة الداخلية لتقديم شكوى توضح فيها ما حدث من الضابط، وأخذ بطاقتك، وطبقا لأحكام قانون هيئة الشرطة سوف تتخذ هذه الإدارة إجراءات التحقيق اللازمة؛ لمعرفة حقيقة الواقعة، وبالتالي لا مانع قانونا من تقديم شكوى ضد هذا الضابط.
إحنا ليه عندنا الشعور بالخوف من أقل واحد في الشرطة؟ إيه اللي لهم عندنا؟ يعني أنا مواطن عادي ماشي في الشارع، أمين شرطة ممكن يوقّفني ليه؟ إيه اللي ليّ واللي عليّ غير إني معايا بطاقتي ومش باعمل حاجة؟ ولو أنا ماشي في وقت متأخر له الحق يسألني جاي منين؟
عزيزي.. استيقاف الأشخاص ليلا جزء من عمل رجال الأمن؛ حيث يدخل هذا الأمر في نطاق واجباتهم؛ لمنع الجريمة قبل وقوعها، بالتالي يحق له السؤال عن تحقيق الشخصية وأسباب التواجد في هذا المكان متأخرا ليلا، إلا عند التعسّف في استعمال حقه، فهذا يجعل لك الحق في اتخاذ الإجراءات القانونية المناسبة تجاه رجل الشرطة إذا تعسّف في استعمال حقه.
أنا الظابط وقفني في الشارع وضربني وشتمني من غير أي سبب، وأخدني على القسم وكان عايز يعمل لي محضر سكّينة، ولكن بعد ما المحامي جالي القسم والظابط ده مشي، الظابط التاني عمل لي محضر تحري، على الرغم من إن شكلي ومظهري كويس جدا، وباقول له طيب ليه بتعمل كده؟ قال لي: أنا ماشي في الشارع، وطلبت معايا آخدك!، وعاملني معاملة وحشة، ومعايا شهود على كده، ورحت سألت محامي عشان أرفع قضية قال لي لازم يكون الضرب معلّم في جسمك، وأنا مافيش أي حاجة في جسمي، فهل لو رفعت قضية قضيتي خاسرة؟ طيب لو خاسرة أعمل إيه وأنا عايز آخد حقي؟؟
عزيزي.. الاعتداء على الناس دون وجه حق من الأمور التي يعاقب عليها قانون العقوبات أيا كان هذا المعتدي وصفته الرسمية أو غير الرسمية، لذلك أنصحك بتقديم بلاغ إلى النيابة العامة التابع لها قسم الشرطة الذي يعمل فيه هذا المعتدي؛ حتى تقوم بدورها في التحقيق في الواقعة لمعرفة مدى صحتها من عدمه، وفي حالة ثبوت صحة واقعة التعدي المادي أو اللفظي سوف تحيل المعتدي إلى المحكمة بتهمة التعدي على مواطن سواء بألفاظ أو الإشارة أو الضرب، فضلا عن أنه يمكنك اللجوء إلى إدارة التفتيش والرقابة بوزارة الداخلية بشكوى للتحقيق فيها.
والله يا جماعه اللى انا
والله يا جماعه اللى انا اعرفوا ان اللى مالهوش ظهر بيضرب على بطنه ودى اول نقطه.
ثانى نقطه وهى الاهم :ان ضابط الشرطه مبيعملش اعتبار لأى حد غير ضابط الشرطه ووكيل النيابه وممكن ضابط الجيش غير كده عوضنا على الله والاهم من كده وكده ان لو ضابط واقف فى كمين وياسلام بقى لو ضابط مباحث لسه النجمتين تعبينه اوى ووقفك وقالك رخصك طبعا هتديلوا الرخص
وياعينى عليك بقى لو سألك بتشتغل ايه وقلتله بكالوريوس تجاره ولا دكتور ولا مهندس حتى قابل بقى العجرفه وقله الذوق والكلام من طرف المناخير وفتش العربيه واهانه ما بعدها اهانه طبعا ليه علشان انت كنت كافر ومدخلتش الجنه اللى هى كليه الشرطه فى نظرهم وطبعا والدك مش مستشار عشان انت مش وكيل نيابه ويبقى هنا سؤال؟؟؟
هل المواطن العادى ليس له الحق فى الاحترام من قبل رجال الشرطه يعنى كل ذنبه انه دخل تجاره ولا اداب ولا حتى طب طيب نعمل ايه ومع احترامى الكبير جدا جدا جدا لسياده المستشار احمد مهاب تفتيش ايه ورقابه ايه اللى فى وزاره الداخليه يامعالى الباشا اى واحد ضابط شرطه ابوه لواء شرطه بيمشي يلطش فى الناس وابوه يلم وراه عادى يعنى فى بيتها وعليه فإن التفتيش والرقابه فى وزاره الداخليه بالبلدى كده بيروح الزبون بياخد الشكوى واحنا هنعمل وهنسوى وابقى قابلنى عموما انا بنصح كل شاب وبنصح اى حد مش عاوز يضرب على قفاه انه يدخل شرطه او يكون والده مستشار عشان يدخله نيابه او يهاجر من البلد يعنى ايهما انسب ليه وللعلم انا والدى لواء فى جهه امنيه والكارنيه بتاعه بطلعه فى الكمين كانى طلعت كارت فودافون 10 ملهوش ايه قيمه مع ان احسن كارنيه كان الضابط شافه كان كارنيه لواء فى الوزاره وليس فى جهه امنيه عليا والنهايه اختم كلامى بسلامى وبمقوله (عليه العوض ومنه العوض ) وارجو الرد على هذا التعليق من قبل سياده المستشار سواء بالايجاب او بالنقد وشكرا لحسن تعاونكم
بصراحة إحنا فى عهد الحكومة
بصراحة إحنا فى عهد الحكومة الحالية واللى قبلها بنحظى بالديمقراطية يعنى تحكم نفسك بنفسك تاخد حقك بايدك مفيش حد هينفعك وكتير من المزايا....ممكن تقول إن فى قانون وإن دى همجية وكده هنعيش فى غابة ...أقول لك إن الغابة دى أرحم من العيش فى ذل والقانون مش بينفع حد..."الحق فوق القوة والأمانة فوق الحكومة" وماتنساش إن الوحيد اللى يجيب لك حقك هو ملك الملوك "الله عز وجل"
الكلام ده كله جميل بس الحكومة
الكلام ده كله جميل بس الحكومة مينفعش نشتكيها غير لربنا الكلام شىء والواقع شىء اخر
اضربه انت كمان من غير ماتسيب
اضربه انت كمان من غير ماتسيب علامة على الضرب
وتبقى كلمتك ادام كلمته ومحدش احسن من حد
فى حد يستجرى يشتكى ضابط شرطه؟
فى حد يستجرى يشتكى ضابط شرطه؟ طيب وهتشكيه لمين؟
هو ليه كان شعار الشرطة زمان
هو ليه كان شعار الشرطة زمان (الشرطة فى خدمة الشعب )
و دلوقتى الشعار بقا ( الشرطة والشعب فى خدمة الوطن) ..
غريبة يعنى نعمل أى حاجة فيك علشان نحمى الوطن .
