انا مش من اشاوس الحزب الوطني
انا مش من اشاوس الحزب الوطني .. ولا بحب اسرائيل .. ولا ليا علاقه بالحكومه المصريه لامن قريب ولا من بعيد ولا مقتنعه بعرايس الماريونيت -الاحزاب المصريه- ولا الحركات الاجتماعيه الفيس بوكيه ولا الجماعات المنظمه والغير منظمه ..
بس هوضح لك نقطه مهمه
1 - اتفاقيه الجات الي تطورت الي "منظمه التجاره العالميه" .. الي مع الاسف والندم العميق لكل المصريين، مصر منضمه ليها .. -وعشان مصر تنظم لمنظمه دوليه او توقع على اتفاقيه دا بيتم بمعرفه البرلمان واي تصرف بعيد عن البرلمان وموافقته يعتبر باطل ومصر غير ملزمه بيه ! فالحمد لله برلمان مصر - عمال وفلاحين- وافقو على الاتفاقيه دي من زمان اتذكر في 1995 ..ف بالتالي مصر ملزمه بيها.
2 - ولأن الدول المتقدمه علميا وعسكريا واقتصاديا ومفيهاش اميه وجهل وفقر وتخلف بتفرض نفسها على الدول المهلبيه الي زيي مصر لاهي طايله سما ولا ارض - ودا مش تقليل مني لمصر انما واقع مقارنه بدول العالم- فمصر لازم تسمع كلام الي اكبر منها في المنظمه الي بيرأسها دول الاوغاد الي بيمشو كلامهم على مصر وكل الدول العربيه المنضمه للمنظمه .. ولان الاوغاد بيمشيهم اوغاد اسرائيل .. والممصالح هيا الي بتحكم والفلوس هيا المفتاح، فمصر ملزمه بتنفيذ قرارات منظمه التجاره العالميه ولو رفضت هيبقى فيها مصيبه لان مخالفه القرارات الدوليه مش حاجه سهله ولا بسيطه !
3 - حكومتنا غلطانه انها مش بتنشر ورقها كله قدام الناس .. بتتعامل معانا كأننا مش هنفهم هيا بتعمل ايه فبتوفر جهد التوضيح .. المحصله .. فيه مساومات وقذاره و اتفاقيات وضغوطات مصر بتتعرض ليها في كل المجالات ولان فيه ناس محترمه في مصر .. وفيه ناس خايفه على مستقبل البلد .. فتصدير الغاز اهون الحلول واقل الخسائر الي ممكن مصر تتكبدها .. وطبعا لازم يكون فيه شله المنتفعين الي بيستغلو الظروف دي بكل الطرق لتحقيق مصالحهم الشخصيه .. والشله دي مش هتموت ولا تنقرض ولا هتروح بثوره ..
احنا مش ضحايا ولا غلابه .. احنا جهله .. ومغفلين
