"طارق يونس" هو أحد الجنود المجهولين خلف كاميرات "القاهرة اليوم"، فالرجل يقود فريق الإعداد منذ بداية البرنامج بحرفية عالية جعلت للبرنامج مذاقاً مختلفاً سواء بالضيوف الذين يستضيفهم أو بالموضوعات التي يناقشها، والأهم من كل ذلك أنه يحاول جاهداً أن يكون موضوعياً دائماً في عرضه للمشكلة أو الأزمة باستضافة كل الأطراف وسماع كل وجهات النظر مهما بدت صعبة وغير مقبولة.

في مكتبه باستديوهات أوربت بمدينة الإنتاج الإعلامي التقيت "طارق يونس" الذي ذلل لي الكثير من العقبات ليخرج الموضوع بهذا الشكل، ولاحظت كم الخطابات الرهيب الموجود على مكتبه والذي عرفت فيما بعد أنه لحالات خاصة أو لناس لديهم ظروف إنسانية صعبة يحتاجون فيها لعلاج أو لمساعدات مالية يتولى البرنامج توفيرها دون الإعلان عن معظمها، ليقدم جانباً آخر من جوانب الإعلام هو الإعلام الخدمي القائم على تقديم العون الناس على قدر المستطاع.

سألت "طارق يونس": ليه القاهرة اليوم ناجح؟
فرد: لأ مش أنا اللي أقول.. اسأل الناس..

طب إيه المعادلة اللي بتحاول تعملها في معالجتك للموضوعات اللي بيطرحها "القاهرة اليوم" واللي ممكن تكون ساهمت في نجاح البرنامج؟
بيتهيألي المصداقية.. كونك تخلي للبرنامج مصداقية عند الناس اللي بتشوفه فتثق فيك وفي اللي بتقوله أو بتطرحه من موضوعات حاجة مهمة جداً. ده رأي الناس اللي بنسمعه..

جيت "القاهرة اليوم" ازاي؟
قبل "القاهرة اليوم" كنا بنقدم تبع شركة خاصة برنامج هو (ليلة أوربت) وكان أول ظهور لـ"عمرو أديب" و"نيرفانا" مع بعض في الأوربت، وكنت بعده مع مديريني "مصطفى السقا" و"طارق الكاشف"، وبعدين لما عملوا "القاهرة اليوم" كنت معاهم من الأول..

قبل "القاهرة اليوم" كنت فين؟
كنت مع "طارق الكاشف" في "أمريكانا" وقبلها كنت في شركة خاصة اسمها "ميوزيك ماستر"، وقبلها كنت في عدد من الشركات الخاصة.

هل ساعدك في ذلك دراستك للإعلام
أنا مادرستش إعلام بالمناسبة.. أنا خريج اجتماع، والعمل في الإعداد بعد كل السنين دي بقى شيء سهل لأن خلاص.. الهوا عودك على كل حاجة وكونك بتطلع كل يوم ده بيخليك تتعلم حاجات جديدة وكويسة، وعلى رأي "عمرو أديب" إنت لو جبت أي حد بيشتغل الشغلانة دي 8 سنين على الهوا هيعملها كويس، وبعدين العمل مع شخص مثل "طارق الكاشف" في حد ذاته يعتبر كأنك متخرج من إعلام.. لأن "طارق الكاشف" لوحده مدرسة..

المسألة إذن أصبحت احترافية؟
يعني الحمد لله ماقدرش أقول كده لكن أصبح التعود موجود والمواقف المختلفة اللي بتتعرض لها بتعلمك ازاي تتصرف وحتى على مستوى شبكة علاقاتك مع المصادر بتزيد كل يوم بسبب الأحداث اللي موجودة..

يوم "القاهرة اليوم" بيبدأ ازاي؟
احنا شغالين 24 ساعة يعتبر.. بنحاول نتابع كل حاجة حتى لو مش هناخدها معانا لازم نبقى عارفينها عشان ربما نناقش تطوراتها أو نعالجها من زاوية تانية.. حتى من حيث إنك تتابع كمبدأ ده شيء مهم جداً في شغلنا..

وازاي بتختار الموضوعات؟
بناخد الحاجة اللي تهم الناس، ومابيهمناش إن كانت اتنشرت في جرنان أو إنها قضية مشهورة أو ماحدش يعرف عنها حاجة.. المهم عندنا هو إنها بتهم الناس بمختلف طوائفهم لأنك لازم تفكر دايماً الناس عاوزة إيه. لما تعمل حلقة عن الاستخدامات السيئة للموبايل أو حلقة عن العلمانية أو حلقة عن الشيعة وتستضيف بعض منهم الحاجات دي الناس مهتمة بيها وغيرها وغيرها من الموضوعات اللي إنت بتكون عارف إن الناس لازم تتابعها..

إيه القيود اللي على "القاهرة اليوم"؟
الحمد لله ماعندناش قيود خالص..

يعني لم يحدث في مرة إن حد كلمك وقال لك: "بلاش الموضوع ده أو بلاش الشخصية دي"؟
إطلاقاً.

ما أهم الحلقات التي تعتز بإعدادها؟
المشكلة إن احنا بننسى حلقة امبارح لأن بيبقى همنا حلقة النهارده وبنفكر دايماً في حلقة بكرة كمان، فالتتابع اليومي ده بيخليك مش فاكر إيه الكويس، وبتحاول تسمع ده من الناس لأن بيبقى طعمه أحلى..

هل تتوقع المعارك قبل حدوثها في البرنامج؟
احنا مابنعملش معارك بين حد وحد، لكن مبدأنا اللي ماشيين عليه في البرنامج إنك ماتقدمش وجهة نظر واحدة، وماتخليش واحد بس اللي يتكلم.. خلّي كل اللي عنده وجهة نظر يقولها والناس اللي تحكم في الآخر.. دي أهم حاجة عندنا..

هل تعد كلام "عمرو أديب" نفسه؟
احنا بنعد الفقرات والمعلومات والأسئلة ومعظم الحاجات التانية، لكن "عمرو" دايماً بيبقى ليه مفاجآته وأسلوبه في الكلام أو في تقديم الحلقة وفيه مساحة دايماً بتبقى لوحده دايماً يفاجئنا بيها..

ما أصعب الحلقات التي قمت بإعدادها؟
يوم انتخابات الرئاسة كان يوم طويل جداً لأننا قدمنا حوالي 13 ساعة ونص على الهوا من 12 ظهراً حتى الواحدة والنصف بعد منتصف الليل.. فاحنا كإعداد اليوم ده بالنسبة لنا كان 24 ساعة وتعبنا فيه جداً.

هل بتتابع البرامج التانية اللي أصبحت منافسة بشكل ما لـ"القاهرة اليوم"؟
لأ خالص.. أنا باشتغل.. دايماً باحاول إني أبص لشغلي وبس..

بس ممكن تناقشوا نفس الموضوعات..
مافيش مشكلة بس الطريقة هي اللي بتحكم هتناقش الموضوعات دي ازاي ومع مين وهتقول عنها إيه.. دي حاجات بتختلف بين برنامج والتاني.. احنا لينا أسلوب تاني، ولاحظ إن وجود حد زي "عمرو أديب" بيخلي كل حاجة مختلفة..

ناويين تخرجوا بره الاستوديو في الفترة القادمة؟
احنا خرجنا فعلاً في فترة وقدمنا "القاهرة اليوم" من شرم الشيخ، وبإذن الله السنة دي في نيتنا نقدم "القاهرة اليوم" من الإسكندرية.